魏延 同 姜維 啊 ，佢 哋 帶兵 去到 散關 嘅 時候 ，啊 ，果然 守關 啲 人 ，趯 走 晒 嘞 。
佢 兩個 入咗 關 ，啱啱 想話 除開 盔甲 唞下 唧 ，遠遠 就 望見 關外 塵頭 大起 ，大隊 魏兵 嚟緊 喇 ！
佢 兩個 都 話 喇 ：丞相 神算 真係 深不可測 㗎 ！
急急行 上 城樓 睇 下 ，原來 係 魏國 大將 張郃 啊 。
噉佢 兩個 就 分兵 守住 啲 險要 路口 。
張郃 一嚟到 ，咦 ？睇見 蜀兵 守住 要道 ，知道 冇法子 強攻 嘞 。
就 下令 退兵 ，嘿 ！點知 畀 魏延 咬住 後尾 追殺 一輪 ，打到 魏兵 傷亡 極大 。
張郃 大敗 一場 走人 啦 。
魏延 贏咗 一仗 ，返上 散關 就 派 人 去 報告 孔明 。
孔明 就 親自 帶兵 行先 ，由 陳倉 斜谷 出去 ，奪取 咗 建威 。
噉後 便 嘅 蜀兵 大部隊 就 陸續 進發 。
後主 劉禪 啊 又 派咗 大將 陳式 ，嚟 協助 孔明 。
於是 孔明 就 指揮 大軍 ，第三次 出 祁山 嘞 。
安好營寨之後 ，孔明 就 召集 眾位 將官 舉行 會議 。
佢 話 ：我 兩次 出 祁山 ，都 不得其利 啊 。
今日 又 嚟到 呢處 咯 ，我 估計 魏兵 必定 會 喺 返往日 交戰 嘅 地方 ，同 我軍 對抗 。
佢哋 諗 實 我軍 要 奪取 雍城 同 郿城 ，必定 會 分兵 去 把守 。
但係 ，我哋 要 出其不意 。
我 睇 陰平 同 武都 兩個 郡 ，同 漢中 連接 。
若果 奪取到 呢 兩個 郡城 ，亦 可以 分散 魏國 嘅 兵勢 啊 。
邊位 將軍 願意 去 攞 呢 兩個 郡城 啊 ？
姜維 應聲 而 出話 ：末將 願 去 ！
王平 跟住 話 喇 ：末張翼 都 願 去 啊 ！
孔明 好高興 ，就 命令 姜維 帶 一萬 兵 去 奪取 武都 ，王平 啊 帶 一萬 兵 去 奪取 陰平 。
噉 兩個 就 帶兵 出發 。
各位 ，呢次 孔明 出咗 祁山 啊 ，就唔係 按照 魏軍 嘅 諗法 ，向住 東便 嘅 郿城 同 雍城 進攻 ，而係 先 去 奪取 西便 嘅 陰平 同 武都 噃 。
陰平郡 嘅 郡城 ，係 喺 今日 甘肅省 文縣 嘅 西北 。
武都郡 嘅 郡城 呢 ，就 喺 甘肅省 成縣 嘅 東便 。
而家 講 下 張郃 ，佢 畀 魏延 殺到 大敗 就 返到 去 長安 ，就 對 郭淮 同 孫禮 話 喇 ：
陳倉 已經 失守 ，郝昭 病死咗 ，散關 亦都 畀 蜀軍 奪取 咗 ，而家 ，孔明 又 試出咗 祁山 ，分路 進兵 啊 。
郭淮 大吃一驚 話 ：啊 ，噉啊 ！
孔明 必定 要 嚟 奪取 雍城 、郿城 㗎 喇 。
於是 郭淮 就 留 張郃 喺度 鎮守 長安 ，派 孫禮 去 守衛 雍城 。
郭淮 自己 呢 就 帶兵 去 把守 郿城 。
同時 寫咗 表章 ，飛馬 送去 洛陽 告急 。
嗰個 魏主 曹睿 啊 ，佢 呢頭 接到 郭淮 送嚟 告急 文書 ，個 心 都 未曾 驚完 唧 。
嗰頭 又 呈上 滿 寵 幾個 大臣 嘅 奏章 ，話 東吳 孫權 擅自 稱帝 ，同 蜀國 結成 同盟 。
而家 派 咗 陸遜 喺 武昌 訓練 軍隊 ，聽候 調用 ，近期 之內 呀 必定 會 嚟 侵犯 嘅 噉 。
哎呀 ，兩處 都 危急 啊 ，慌到 曹睿 手足無措 。
當時 ，曹真 啊 有病 未曾 好 ，曹睿 就 召 司馬懿 嚟 商量 嘞 。
司馬懿 一嚟 ，就 畀 粒 定心丸 畀 曹睿 食 。
佢 話 ：依照 臣 嘅 估計 ，東吳 必定 唔會 起兵 嘅 。
吓 ？ 點解 呢 點解 呢 ？
孔明 係 好 想 報猇亭 兵敗 之 仇 啊 。
佢 唔係 唔想 吞併 東吳 嘅 ，只係 怕 我哋 乘虛 攻擊 佢 ，故此 ，暫時 同 東吳 定立 同盟 嘅 啫 。
陸遜 亦 好 明白 佢 嘅 心思 嘅 ， 所以 呢 ， 就 作出 起兵 嘅 樣子 嚟 應付 下 佢 。
實際上 ，係 想 坐 觀 成敗 啊 。
陛下 你 不必 防備 東吳 嘅 ，就係 防備 西蜀 就 得 喇 。
啊 愛卿 真係 高見 啊 ！
曹睿 聽 司馬懿 講咗 呢 一番 說話 周身 鬆晒 啊 ，就 封 司馬懿 做 大都督 ，總管 隴西 各路 軍馬 。
曹睿仲 吩咐 侍臣 立即 去 問 曹真 ，攞 嗰個 總兵 將 印 嚟 交 畀 司馬懿 。
司馬懿 話 ：陛下 ，仲係 等 臣 自己 去 攞 罷 啦 。
誒噉 亦 好吖 。
臣 ，告辭 ！
司馬懿 辭別 咗 曹睿 ，行 出 金殿 ，就 直筆 去到 曹真 嘅 住宅 。
首先 叫人 入去 通報 ，然後 自己 先 入去 。
問候完喇 ，司馬懿 就 話喇 ：
而家 東吳 同 西蜀 聯合 ，興兵 入寇 。
孔明 又 出 祁山 ，安營 扎寨 喇 。
曹公 知唔 知道 啊 ？
係咩 ？
唉 ，我啲 家人 ，見 我 病得 緊要 就 唔 講畀 我 知 啊 。
係喇 ，學似 目前 噉 國家 正在 危急 ，為 咩嘢 事 唔 任命 仲達 你 做 都督 ，去 擊退 蜀兵 呢 ？
唉 ，下官 才薄 智淺 ，不稱其職 嘅 。
嗯 ，人 嚟 ！攞 個 大印 嚟 交畀 仲達 。
都督 你 不必 過慮 ，下官 好 願意 助 一臂之力 。
不過 ，呢個 大印 就 點 都 唔 敢 接 喇 。
唉 ，如果 仲達 你 唔肯 擔起 呢個 責任 ，魏國 就 危險 咯 。
我 ， 嗯 我 唉 ， 唉 ， 我 帶病 都 要 去 面見 皇上 ， 推薦 仲達 你 嚟 做 都督 啊 。
都督 ，皇上 已經 有 咗 命令 喇 ，但係 下官 唔 敢 接 啫 。
吓 ？哦噉就好 ，噉就好 ！仲達 ，你 擔起 呢個 責任 ，必定 可以 擊退 蜀兵 嘅 。
司馬懿 見到 曹真 再三 讓 印 ，確係 出於 誠意 ，就 接咗 個 大印 。
再入皇宮 辭別咗 曹睿 ，立即 啊 帶兵 趕去 長安 ，要 同 孔明 決戰 嘞 。
當時 ，正係 蜀漢 建興 七年 ，亦即係 魏 太和 三年 。
用 公元 幾年 嚟 講 呢 ，就係 二二九年 啊 ，四月 。
噉 孔明 嘅 兵馬 就 喺 祁山 就 分為 三個 營寨 ，等住 魏兵 嚟 㗎 嘞 。
司馬懿 率領 大軍 到咗 長安 ，張郃 迎接咗 都督 ，就 向 佢 報告咗 軍情 。
司馬懿 任命 張郃 做 先鋒 ，戴陵 做 副將 ，帶 十萬 人馬 去 祁山 ，喺 渭水 嘅 南岸 扎寨 。
呢一日 ，郭淮 同 孫禮 就 嚟 參見 司馬懿 。
司馬懿 問 佢哋 話 喇 ：你哋 有冇 同 蜀兵 對過 陣 啊 ？
冇啊 。
蜀兵 千里 而 嚟 ，利在 速戰 啊 。
而家 ，佢哋 已經 嚟到 呢處 喇 ，又 唔 出戰 ，必定 有 陰謀 嘅 。
誒 ，隴西 各個 地方 ，有 咩 嘢 消息 呢 ？
已經 派出 探馬 ，到 各 郡 去 探聽 情形 喇 。
各郡 都係 日夜 小心 防備 ，未曾 發現 有 咩嘢 事 。
誒 只有 武都 、陰平 兩 笪 地方 未 有 消息 返嚟 。
嗯 ，我 會 派人 去 同 孔明 交戰 。
你 兩位 要 盡快 由 小路 去 救 武都 同 陰平 兩個 郡 。
你哋 迂迴 喺 蜀兵 嘅 背後 ，佢哋 ，自己 就 會 亂起上嚟 㗎 喇 。
郭淮 、張郃 接受 咗 命令 ，就 帶 五千 兵馬 ，由 隴西 小路 去 救 武都 同 陰平 ，去 偷襲 蜀兵 嘅 背後 。
喺 路上 ，郭淮 就 問 孫禮 話 喇 ：
照 你 睇 ，仲 達比 起 孔明 嚟 點樣 呢 吓 ？
噉孔明 勝得多咯 。
係嘅 ，孔明 雖然 勝過 仲達 ，不過 從 呢一條 計 嚟 睇 ，足以 顯示出 仲達 確係 有 過人 之 智 啊 ！
蜀兵 如果 正係 攻打緊 兩個 郡 ，我哋 喺 佢 後 便 包抄 過去 ，嘿噉 佢哋 冇 話 唔亂 㗎 ，啊 ，嘿嘿嘿嘿嘿 。
正喺度傾談緊 ，哨馬 就嚟到 報告 話 陰平 同 武都 呀 ，已經 分別 畀 王平 、姜維 攻破咗 。
前便 離開 蜀兵 唔 遠 喇 噉 。
孫禮 一諗就話喇 ：蜀兵 既然 攻破咗 城池 ，點解 仲 會 喺 城外 擺開 人馬 呢 ？
哼哼 ，必有 詭計 ，不如 快啲 後退 啦 ！
啊 你 講得 啱 啊 ！
郭淮 同意 孫禮 嘅 判斷 ，就 下令 全軍 向 後 轉退兵 。
遲咯 ！轟噉 忽然 一聲 炮響 ，喺 山 背後 閃出 一彪 兵馬 。
前便 一面 大旗 上面 寫住 ：漢丞相 諸葛亮 ！
當中 一架 四輪車 ，孔明 啊 端端正正 坐 響處 ，左 有 關興 右 有 張苞 。
哎呀 撞板 喇 呢 勻 ，孫禮 同 郭淮 慌 啊 。
孔明 就 放聲 大笑 喇 ：哈哈哈哈哈哈 ，郭淮 、孫禮 你 兩個 咪 走 啊 ！
司馬懿 嘅 計謀 ，點 瞞得過 我 呢 ？
佢 日日 都 派兵 喺 正面 嚟 同 我哋 交戰 ，暗中 又 派 你 兩個 嚟 偷襲 我軍 嘅 背後 。
哈哈哈哈 ，武都 、陰平 兩個 郡 ，我 已經 攞咗 嘞 。
你 兩個 唔 快 啲 投降 ，仲 想 帶兵 嚟 同 我 決戰 係 唔 係 啊 ！
郭淮 、孫禮 聽咗 ，仲 更加 心慌 啦 。
忽然間 ，魏軍 背後 喊殺 連天 ，王平 、姜維 就 帶兵 喺 後 便 殺嚟 。
關興 、張苞 ，又 帶兵 喺 前面 殺 嚟 ，兩頭 夾攻 ，嘿 冇 得 頂 啊 ，魏兵 大敗 啊 。
郭淮 同 孫禮 就 擗 低 隻 馬 ，爬山 逃跑 。
張苞 一眼 望見 ：哼 ！你 想 走 呀 ？追 ！
拍馬 就 追上去 ，誰 不知 連 人 帶 馬 就 跌咗 落 山坑 。
啲 軍士 就 慌忙 救返 起佢 啦 ，但係 呢 ，已經 跌到 頭 崩 額 裂 傷勢 都 幾 重 啊 。
孔明 就 即刻 派 人 送 佢 返 去 成都 養傷 。
而家 講下 孫禮 同 郭淮 ，佢 兩個 終歸 就 好彩 走甩咗 ，就 返去 報告 司馬懿 話 喇 ：
稟告 都督 ，武都 、陰平 兩個 郡 呀 已經 失守 。
孔明 埋伏 喺 要路 ，前後 夾攻 。
因此 畀佢 殺得 大敗 ，搞到 要 棄 馬 步行 先至 逃跑 返嚟 啊 。
請 都督 恕罪 啊 ！
哦 ，呢啲 唔係 你哋 嘅 過錯 ，事關 孔明 嘅 智謀 ，係 勝過 我 啊 。
你 兩位 再 帶兵 去 守衛 雍城 、郿城 啦 ，千祈 唔好 出戰 ，我 自然 有 破敵 嘅 計策 嘅 。
噉郭淮 、孫禮 告辭 司馬懿 就 帶兵 去咗 嘞 。
跟住 ，司馬懿 又 叫 張郃 同 戴陵 嚟 ，吩咐 佢哋 話 ：
孔明 而家 得咗 武都 、陰平 ，必定 要 去 郡城 慰問 百姓 ，安定 民心 。
因此 ，實唔喺 營寨 嚟㗎 喇 。
你 兩個 各 帶 一萬 名 精兵 ，今晚 出發 ，包抄 去 蜀軍 營 後 ，一齊 奮勇 殺出嚟 。
我 呢 ，就 喺 蜀軍 嘅 正面 佈 好 陣勢 。
一等 蜀軍 亂 起上嚟 喇 ，就 發起 衝鋒 ，攻殺 入去 。
噉樣 我哋 前後 兩軍 ，合力 強攻 ，就 可以 奪取 蜀軍 營寨 。
如果 佔據咗 呢處 有利地勢 呀 ，破敵 就 唔 難 喇 。
張郃 、戴陵 接受 咗 命令 ，就 帶兵 出發 嘞 。
當晚 ，戴陵 在 左 ，張郃 在 右 ，都 係 混小路 行 呀 一直 深入 到 蜀軍 嘅 背後 。
到咗 半夜 三更 ，嚟到 大路 喇 ，兩支 軍隊 會合 喇 ，就 準備 向 蜀軍 嘅 背後 殺過去 咯喎 。
行咗 唔夠 三十里 ，前軍 唔逳 嘞 ，點解 呢喂 ？
張郃 、戴陵 就 𡃈𡃈聲 跑 馬上 去 睇 下 咩嘢 事 啦 。
嘩嗨 ！只見 幾百架 車 ，裝滿 乾草 就 橫 兵馬乓 噉 堆滿晒 喺 條 路 處 塞死 晒 唔 行得 。
不妙喇 ！
張郃 就 話 ：睇嚟 敵人 有 準備 啊 ，我哋 快啲 混 原路 返去 啦 ！
啱啱 傳令 退兵 唧 ，烚 一 聲 下 ，滿山 火把 就 光棖棖 ，鼓角 聲 呀 震到 耳 都 聾 啊 ！
霎時之間 ，啲 伏兵 喺 四面 衝出嚟 將 佢 兩個 圍到 實一實 。
孔明 喺 祁山 上面 大聲 噉 嗌落嚟 ：
戴陵 、張郃 ，你哋 聽 我 講 啦 ！
司馬懿 估計 我 去咗 武都 、陰平 安民 ，唔喺 營寨 。
故此 就 派 你 兩個 走 嚟 劫 我 嘅 營 ， 點知 中 咗 我 嘅 計 喇 。
你 兩個 不過 係 無名下 將 ，我 唔 殺 你哋 ，快啲 落馬 投降 啦 ！
嘩 ！激到 張郃 頭殼 出煙 呀 ，佢 指住 孔明 大聲 噉 鬧 ：
呸 ！孔明 你 呢個 鄉下佬 ！今日 侵犯 我哋 大國 境界 ，仲 口吐狂言 真係 豈有此理 ！
捉到 你 呀 ，我 要 將 你 碎屍萬段 啊 ！
張郃 講完 就 縱馬 挺槍 ，向住 山上 衝殺 上去 。
山上 便 呢 ，又 射箭 又 掟 石頭 好似 落雨 噉 飛落嚟 。
張郃 衝唔上去 嘞 ，就 拍馬舞槍 ，衝出 重圍 。
嘩 冇 人 敢 攔 佢 啊 ，攔 唔 住 張 郃 就 圍 戴陵 啦 ！
噉啊 戴陵 畀 蜀兵 圍 實 喺 中間 嚟 ，正係 危急 萬分 。
張郃 殺 返 出去 舊路 ，咦 ？唔見咗 戴陵 ，即時 又 奮起 神威 ，返身 再次 殺入 重圍 就 救 返 戴陵 返 扯 。
孔明 喺 山上 一直 都 喺度 睇實 。
眼見 張郃 喺 萬軍 之 中 往來 衝突 ，越 殺 越 勇 。
孔明 又 對 身邊 啲 人 話 喇 ：以前 ，聽講 張翼德 大戰 張郃 ，見到 嘅 人 都 驚心動魄 。
我 今日 親眼 見到 佢 ，確係 勇猛 啊 ！
若果 呢個 人 喺 處 ，對 我哋 蜀國 係 個 大 害 ，我 事 必要 殺咗 佢 ！
噉 既然 張郃 同 戴陵 已經 突圍 逃跑咗 ，孔明 就 收兵 回營 嘞 。
司馬懿 喺 蜀 軍 嘅 正面 ，佢 將 兵 馬 擺好 陣勢 ，一心 等住 蜀 軍亂 起 上 嚟 就 發起 衝鋒 吖 。
點知 等啊等啊 ，蜀軍 嗰便 都 冇 到 動靜 。
再過一陣 ，哎呀 乜噉搞法 ，只見 張郃 、戴陵 頭盔 又 歪 ，袍甲 又 甩 ，滿身 血污 狼狽 到 極噉 嚟到 話 ：
哎呀 稟告 都督 ，孔明 早有 準備 ，因此 末將 等 大敗 而 歸 啊 ！
啊 ？哎呀呀呀 孔明 真係 神 啊 ！
嗯 ！不如 返去 罷 啦 。
司馬懿 立即 傳令 ，全部 兵馬 退返 去 營寨 ，堅守 不出 。
而家 講下 孔明 ，佢 打咗 一場 大勝仗 ，繳獲 嘅 馬匹 、器械 就 不計其數 ，好 高興 啦 。
噉佢 每日 啊 都 派 魏延 出去 挑戰 ，之 魏軍 呢 ，硬係 唔 出兵 應戰 喎 ，連 氣 半個月 頭 未 交鋒 過 一次 。
呢一日 ，孔明 正 喺 中軍帳 考慮緊 問題 。
守門官 入嚟 通報 話 ，皇上 派咗 侍中 費禕 ，帶咗 詔書 嚟到 啊噉 。
孔明 即刻 吩咐 大開 轅門 ，迎接 天使 。
佢 喺 大營 擺起 香案 ，焚香 行禮 ，然後 就 宣讀 皇上 嘅 詔書 。
原來 後主 劉禪 嘅 詔書 啊 ，就係 話 孔明 以前 因為 街亭 之 役 失敗 ，引咎 降職 ，亦 已經 過咗 好 長 時間 喇 。
噉前年 出兵 斬咗 王雙 ；今年 出兵 ，又 打到 郭淮 大敗 逃走 ，攻克 兩個 郡城 ，功勛 顯著 。
故此呢 ，就 唔應該 長期 噉樣 降職 嘅 ，從 今日 起 ，要 恢復 孔明 原來 丞相 嘅 職位 噉 。
宣讀完 詔書 之後 ，孔明 就 同 費禕 話 ：
我 帶 兵 北伐 ，都 仲 未 成功 ，點 可以 恢復 丞相 嘅 職務 呢 ？
孔明 堅決 推辭 唔肯 復職 ，費禕 就 勸 佢 話 喇 ：
丞相 呀 ， 若果 你 唔 肯 受職 ， 一來 就 額 咗 天子 嘅 心意 ， 二來 又 冷淡 咗 將士 嘅 心 啊 ， 仲 係 受職 好 。
見到 費禕 噉樣 講喇 ，孔明 先至 跪低 行禮 ，接受返 原來 嘅 官職 。
噉 費禕 就 告辭 返去 成都 ，呢啲 就 唔多 講 喇 。
有一日 ，孔明 見 司馬懿 硬係 堅守 不出 ，佢 就 諗到 條計 ，就 傳令 三軍 ，拔寨 起行 。
魏軍 嘅 探子 就 去 報告 司馬懿 ，話 孔明 退兵 喇 噉 。
司馬懿 話 喇 ：嗯 ，孔明 必定 有 一個 大 陰謀 啊 ，我哋 唔好 逳 啊 ！
張郃 話 喇 ：都督 ，孔明 實係 因為 冇 糧 ，所以 就 退兵 ，點解 唔 追 呢 ？
哼哼 ，我 睇 呀 ，孔明 佢 舊年 糧食 豐收 ，而家 啲 麥 又 熟 嘞 ，糧草 充足 。
雖然 轉運 係 艱難啲 ，之 無論如何 ，佢 點 都 可以 支持 半年 嘅 ，佢 點 會話 隨便 退兵 㗎 。
睇嚟 ，佢 係 見 我 連氣 咁耐 都 唔 出兵 同 佢 打 ，故此 就 用 呢一條 計 嚟 引 我 出去 咋嘛 。
我 哋 派 人 去 偵察 過 先 ， 噉 就 派 人 去 偵察 嘞 噃 。
偵察過 返嚟 報告 話 ，孔明 喺 離開 呢處 三十里 嘅 地方 安營 噉 。
司馬懿 就 話 喇 ：係唔係 呢 ？我 都 話 孔明 唔會 走 㗎 喇 。
我哋 仲係 應該 堅守 營寨 ，唔好 亂逳 啊 。
過咗 十幾日 ，絕無 音訊 ，並 唔見 蜀兵 嚟 挑戰 喎 。
司馬懿 再 派 人 去 偵察 下 。
返嚟 報告 話 蜀兵 呀 已經 起營 走咗 喇 噉 。
走 咗 ？司馬懿 唔 信 啊 ，就 換過 衣服 ，混雜 埋 喺 一 群 士兵 裏頭 親自 去 睇 過 。
吖 ，果然 見到 蜀兵 又 退咗 三十里 扎寨 。
司馬懿 觀察 咗 一輪 就 返去 對 張郃 話 ：
呢 個 呀 ，乃 係 孔明 嘅 詭計 嚟 啊 ，唔 好 追 啊 ！
又過咗十幾日 ，司馬懿 再 派人 去 偵察 ，返嚟 報告 話 ：蜀兵 又 退咗 三十里 扎寨 喇噉 。
張 郃 話 喇 ：都督 啊 ，孔明 係 用 緩兵之計 ，漸漸 漸漸 一步 一步 噉 退 返去 漢中 啊 。
都督 點解 仲要 懷疑 ，唔 趁早 去 追擊 佢 呢 ？
末將 願意 去 同佢 決 一戰 啊 ！
唔係㗎 ，孔明 此人 詭計 極多 ，倘若 有 咩嘢 失算 呀 ，就 挫折 我軍 嘅 銳氣 嘅喇 ，唔去得㗎 ！
都督 ，末將 如果 打敗 ，甘當 軍令 ！
噉好啦 ，既然 你 一定要去 ，我 就 分兵 兩支 。
你 帶 一支 行先 ，務必要 奮力 死戰 ！
我就喺後便接應 ，提防 伏兵 。
你 聽日 出發 ，去到 半路 要 宿營 休息 ，後日 然後 交戰 。
噉 我軍 就 唔會 疲乏 喇 。
得令 ！
到咗 第日 ，張郃 、戴陵 ，率領住 幾十 員 副將 ，精兵 三萬 ，昂昂然噉 出發喇 。
去到 半路 ，就 遵照 司馬懿 嘅 命令 喺度 宿營 休息 。
司馬懿 呢 ，佢 係 留低 大部分 嘅 兵馬 守衛 營寨 。
自己 只係 帶住 五千 精兵 ，隨後 出發 。
原來 孔明 啊 佢 一直 都 暗中 派 人 監視住 魏兵 嘅 動靜 嘅 。
呢一日 ，偵察到 魏兵 出動喇 ，行到 半路 安營 休息 。
當晚 孔明 就 召集 眾 將官 嚟 商量 話 ：
而家 魏兵 追緊 嚟 喇 ，佢 哋 實 係 死戰 嘅 ，你 哋 必須 以一當十 至 得 。
我 決定 用 伏兵 喺 佢 後便 截擊 。
呢個 任務 ，非要 一位 智勇雙全 嘅 大將 嚟 擔當 不可 。
孔明 講完 就 用 雙眼 望住 魏延 。
你話 魏延 應聲 而起 話 末將 願去 噉 幾咁 好 呢 ，之 魏延 耷低 個 頭 粒 聲 唔出 喎 。
王平 就 行 出 一步 大聲 話 ：末將 願意 擔當 呢個 責任 ！
如果 失敗 又 點 呢 王 將軍 ？
甘當 軍令 ！
好 ！ 好 ！ 好 ！ 王將軍 ， 肯不避 刀槍 捨身 作戰 ， 真 係 忠臣 啊 ！
不過 呢次 魏兵 分 兩 支 前後 而 嚟 ，將 我 嘅 伏兵 隔斷 喺 當中 。
王將軍 縱使 係 智勇兼備 ，亦 只能 頂得住 一頭 ，又 點 能夠 分身 頂住 另一頭 呢 ？
所以 必須 再 有 一位 將軍 同埋 去 至 好 。
唉 ！無奈 軍中 再 搵 唔 到 一位 捨 死 當先 嘅 人 咯 。
孔明 說話 未完 ，張翼 就 行出嚟 話 末將 願 去 ！
孔明 話 喇 ：張郃 係 北魏 名將 ，有 萬夫不當之勇 ，你 唔 係 佢 嘅 敵手 啊 。
如果 失敗 ，末將 情願 將 個人頭 獻於 丞相 帳下 ！
好 ！你既然 咁 勇敢 ，就 同 王平 將軍 各 帶 一萬名 精兵 ，喺 山谷 裏 便 埋伏 。
等到 魏兵 追上嚟 ，就 任 佢哋 過盡 啦 ，你哋 就 率領 伏兵 喺 後 便 掩殺 。
若果 司馬懿 隨後 追嚟 呢 ，你哋 就 分兵 兩頭 。
張將軍 帶 一支 頂住 後 隊 ， 王將軍 帶 一支 截 佢 前 隊 。
你哋 兩 支 兵 都 要 死戰 。
我 自然 有 其他 嘅 辦法 嚟 幫 你哋 嘅 。
王平 、張翼 接受 咗 命令 ，就 帶兵 去 埋伏 嘞 。
跟住 孔明 又 叫 姜維 、廖化 過嚟 吩咐 佢哋 話 ：
我交個 錦囊 畀 你 哋 ， 你 哋 帶 三千 精兵 ， 偃旗息鼓 ， 埋伏 喺 前 山上 便 。
如果 見到 魏兵 圍住 王平 、張翼 ，十分 危急 喇 ，你哋 不必 去 救 。
到時 打開 個 錦囊 睇下 ，自然 就 有 解救 危險 嘅 計策 㗎喇 。
噉 姜維 、廖化 接受咗 命令 就 帶兵 出發 。
孔明 又 叫 吳班 、吳懿 、馬忠 、張嶷 噉 四員 將領 過嚟 ，細細聲 噉 吩咐 佢哋 話 ：
聽日 ， 魏兵 嚟 到 嘅 時候 ， 銳氣 正 係 旺盛 。
你哋 唔好 馬上 同佢 硬打 ，要 且戰且走 。
當 你哋 見到 關興 帶兵 嚟 掠陣 嘞 ，就 回兵 殺 返 轉頭 。
到時 ，我 自然 有 兵馬 嚟 接應 你哋 嘅 。
噉 四個 將領 就 去咗 咯 喎 。
孔明 最後 叫 關興 嚟 吩咐 佢 話 ：
你 帶 五千 精兵 ，埋伏 喺 山谷 裏 便 。
一睇見 山上 拂起 紅旗 ，就 帶兵 殺出嚟 啦 。
關興 接受 咗 命令 就 帶兵 出發 嘞 。
好喇 ，蜀魏 雙方 都 扭盡 計仔 ，都 做好 應急 嘅 部署 ，眼睇住 一場 惡戰 就 要 展開 嘞 。
噉究竟 誰 勝 誰負 呢 ？且 聽 下回 分解 。
