今日 講下 參軍 蔣琬 佢 啱啱 由 成都 嚟 ，見到 刀斧手 要 斬 馬謖 大吃一驚 。
大聲噉叫話 刀下留人 ，刀下留人 ！
刀斧手 唔敢 逳手 住 嘞 。
蔣琬 三步 夾埋 兩步 行入去 中軍帳 見到 孔明 佢 就 話 ：
丞相呀 ，你 今日 斬咗 馬謖 ，司馬懿 就 高興 咯 。
而家 天下 未定 ， 正 係 用人 嘅 時候 啊 ， 噉 樣 嚟 殺 咗 一個 有志 有 謀 嘅 人 太 過 可惜 咯 。
往日 ， 孫武 之所以 能夠 克敵制勝 於 天下 ， 唉 皆 因 佢 係 執法 嚴明 啊 。
今日 ，天下 紛爭 ，正係 要 行軍 打仗 。
若果 唔 執行 法律 ，又 點樣 去 討伐 逆賊 呢 ？應該 殺咗 佢 。
斬 ！
過咗 一陣間 ，刀斧手 用 托盤 裝住 馬謖 個 首級 獻上嚟 。
孔明 一見 揞住 塊面 痛哭 起嚟 啊 。
蔣琬 就 問 喇 ：馬謖 有罪 ，係 按照 軍法 處置 ，丞相 點解 又 喊 呢 ？
唉 ，我 唔係 為咗 馬謖 喊 。
我係 想起 先帝 喺 白帝城 臨終 嗰陣 ，曾經 囑咐 我 話 ：
馬謖 言 過 其實 ，唔好 重用 啊噉 。
今日 ，唉果然 應晒 先帝 嘅 說話 咯 。
我 真係 痛恨 自己 冇 知人之明 ，一下 諗起 先帝 嘅 說話 ，故此 喊起 上嚟 啫 。
當時 在場 啲 人 聽到 ，個個 都 好 大 感觸 ，忍唔住 都 流起 眼淚 。
馬謖 死 嘅 時候 ，係 卅九 歲 ，係 蜀漢 建興 六 年 ，即係 公元 二 二八 年 ，五月 間 嘅 事 。
噉孔明 下令 斬咗 馬謖 ，噉啊 將 佢 個 首級 ，攞去 各個 兵營 示眾 之後啊 ，就 用 線 聯返 喺 佢 個 屍體 上便 ，用 棺材 斂好 然後 先至 埋葬 。
孔明 親自 寫咗 一篇 祭文 嚟 祭奠 佢 。
對 馬謖 嘅 家屬 ，加額 撫恤 ，按 月 發 薪水 。
處理 完馬 謖 嘅 事 ， 孔明 又 寫 咗 一篇 表章 ， 叫 蔣琬返 去 成都 代 佢 去 呈送 畀 後主 劉禪 。
劉禪 打開 一睇 ，孔明 喺 表章 裏 便 講 ：
自己 擔負 丞相 咁 高 嘅 職位 ，因為 領導 錯誤 用人不當 ，造成 街亭 大敗 。
就 請求 主上 同意 將 佢 自己 降低 三級 ，以示 懲罰 噉 。
後主 睇完 表章 就 話 喇 ：哎 勝敗 係 兵家 常事 ，丞相 點解 要 噉樣 講 啊 ？
侍中 費禕 就 話 ：臣 認為 要 治理 好 國家 呢 ，最 重要 嘅 就係 遵從 法律 啊 。
若果 唔 按照 法律 嚟 做事 ， 又 何以 服人 啦 ？
丞相 打咗 敗仗 ，自己 降級 貶職 係 應該 㗎 。
劉禪 覺得 有道理 ，就 聽佢 嘅 。就 落 一道 詔書 ，貶 孔明 做 右將軍 ，行 丞相 事 ，照舊 總督 軍馬 。
哎孔明啊 ，確係 一位 偉大 嘅 政治家 軍事家 吓 。
佢 有 錯 就 認錯 而且 主動 承擔 責任 ，自己 要 降 自己 嘅 級 。
大家 睇 下 ， 睇 孔明 呢種 胸襟 ， 呢種 氣量 啊 呢種 負責 嘅 精神 啊 ， 古往今來 都 少有 㗎 係 值得 人 讚 㗎 。
噉劉禪啊落一道詔書將孔明降級 ，就派費禕帶詔書去漢中 。
孔明 接受 咗 詔書 ，降 咗 級 喇 。
費禕 好心 ，怕 孔明 醜 唔好意思 ，就 講返 幾句 好話 嚟 恭維 下 孔明 ，祝賀 下 佢 。
蜀中 嘅 百姓 ，知道 丞相 一開始 就 奪取 咗 四個 縣 ，人人 都 非常 高興 啊 。
孔明 就 板起 個 面 話 喇 ：呢啲 係 咩 嘢 說話 啊 ？
得而復失 ，同 冇 得到 係 一樣 嘅 。
費公 你 仲 用 呢件事 嚟 賀 我 ？實在 係 使 我 羞愧 嘅 啫 。
誒 ， 聽講 丞相 得到 姜維 ， 天子 呀 好 歡喜 啊 。
孔明 嬲 嘞 ：打咗 敗仗 返嚟 ，一寸 咁多 土地 都 奪唔到 ，呢個 係 我 嘅 大罪 。
就算得到一個姜維 ，對於 魏國 嚟 講 佢哋 有 咩 損失 吖 ？
係 ， 係 ， 誒 丞相 現時 統率 雄兵 數十萬 ， 可 唔 可以 再 去 北伐 魏國 呢 ？
嗯 ， 上 一次 我 哋 大軍 駐 扎 喺 祁山 、 箕 谷 嘅 時候 ， 我軍 兵多過 魏 軍 ， 但 係 唔 能夠 打敗 魏 軍 ， 反而 畀 魏 軍 打敗 。
由此可見 弊病 唔在於 兵 嘅 多少 ，而 在於 主將 啊 。
今後 我要 裁減 兵將 ，反省 自己 嘅 過失 ，使到 將來 唔好 再犯 噉樣 嘅 錯誤 。
如果唔係呀 ，雖然 兵多 又 有 咩嘢 用處 呢 ？
從 今 之 後 ，各位 係 為 國家 打算 嘅 呢 ，就 請 經常 噉 指出 我 嘅 缺陷 同埋 短處 。
噉樣 做嘅話 ，事情 就 好辦 ，逆賊 就 可以 剿滅 ，統一 天下 嘅 事業 ，就 有 成功 嘅 希望 咯 。
孔明 呢一番 說話 ，講明 好多 道理 啊 。
費禕 同埋 眾將官 聽到 都 非常 感動 同 佩服 呀 。
費禕 送咗 詔書 嚟 ，就 返去 成都 喇 。
噉孔明喺漢中呢 ，對待 軍士 、民眾 都 十分 愛護 親近 。
佢 加緊 訓練 軍隊 ，添置 種種 攻城 、渡水 嘅 器械 ，積聚 糧草 ，多 做 戰船 ，為 日後 嘅 北伐 作 準備 。
噉呢啲事呢 ，魏國 嘅 間諜 探聽到 ，就 向 洛陽 報告 嘞 。
魏主 曹睿 接到 報告 ，立即 召見 司馬懿 同佢 商量 奪取 西蜀 嘅 辦法 。
司馬懿話 ：而家 ，仲未 可以 去 攻打 蜀國 啊 。
事關 目前 正係 天熱 ，蜀兵 必定 唔會 出兵 嘅 。
如果 我軍 深入 去 蜀國 嘅 地方 ，佢哋 誒 據 險 把守 ，短 時間 係 攻 唔 落 㗎 。
如果 蜀兵 又 試嚟 進犯 我國 ，如之奈何 啊 ？
臣 已經 估計到 嘞 ，呢次 諸葛亮 如果 再 嚟 興兵 侵犯 呢 ，必定 係 仿效 韓信 暗度 陳倉 之計 嘅 。
臣 想 推薦 一個人 ，去 陳倉道口 ，築城 防禦 ，擔保 萬無一失 。
此人 身長 九尺 ，射箭 極準 ，深有 謀略 。
若果 諸葛亮 想 入寇 中原 呀 ，此人 完全 可以 抵敵得住 㗎 。
哦 ？佢 係 邊個 啊 ？
佢 係 太原 人 ，姓 郝 ，名 昭 ，字 伯道 ，現任 雜號 將軍 ，鎮守 河西 呀 。
曹睿 聽咗 好 高興 ，接受咗 司馬懿 嘅 推薦 ，就 加封 郝昭 做 鎮西 將軍 ，派 佢 去 把守 陳倉道口 。立即 就 派 個 使者 帶住 詔書 去 嘞 。
各位 ，上面 司馬懿 講到 暗度陳倉 啊 ，係 咩嘢 一回事 呢 ？
噉嘅 ，陳倉 係 古時 一個 縣 ，縣城 就 喺 今日 陝西省 寶雞市 嘅 東便 。
係 關中 同 漢中 嘅 交通 要沖 ，素來 都 係 戰爭 嘅 要地 。
噉啊 當年 楚漢 相爭 嘅 時候啊 ，有 一次 劉邦 就 要 進兵 攻打 項羽 。
韓信 就 用 一條 計策 ，表面上 呢 ，就 修理 棧道 嘅 道路 。
所謂棧道 呢 ，係 我國 古代 喺 啲 懸崖 峭壁 啊 ，鑿窿 架 木 鋪板 所築成 嘅 一種 道路 喇 。
噉用噉嘅做法啊嚟轉移對方嘅注意 ，而 暗中 將 兵馬 偷過咗 陳倉 。
噉啊叫做明修棧道就暗度陳倉喇 。
噉 有 一日 ，揚州 司馬 大都督 曹休 ，就 送嚟 一份 表章 畀 曹睿 。
話 東吳 方面 嘅 鄱陽 太守 周魴 啊 ，願意 獻 郡 投降 。
佢 曾經 秘密 派人 嚟 講過 七條道理 ，話 完全 可以 打敗 東吳 ，噉啊 請 曹睿 早日 發兵 。
曹睿 就 喺 御案 上 便 打開 份 奏章 ，同 司馬懿 一齊 嚟 研究 。
司馬懿 話 喇 ：啲 說話 講得 極 有道理 啊 ，東吳 係 要 滅亡 嘅 喇 。
臣 願意 率領 一支 軍隊 ，去 協助 曹休 。
建威 將軍 賈逵 就 喺 班內 行 出嚟 稟奏 話 喇 ：陛下 ，東吳人 所 講 嘅 說話 反復 不一 ，唔 信得過 嘅 。
周魴 係 個 智謀 之 士 ，必定 唔會 肯 投降 嘅 ，睇嚟 ，呢個 係 誘兵 之 計 咋 。
司馬懿 話 喇 ：嗯 ，呢個 意見 唔能夠 唔聽 ，之 呢個 機會 亦 唔好 錯過 啊 。
曹睿 就 話 啦 ：噉啦 ，仲達 你 同 賈逵 一齊 去 協助 曹休 啦 。
臣 領 旨 ！
司馬懿 、賈逵 就 帶兵 出發 咯 喎 。
噉 曹休 呢 ，佢 率領 大軍 直取 皖城 。
賈逵 帶住 前將軍 滿寵 、東莞 太守 胡質 ，直取 陽城 指向 東關 。
司馬懿 率領 本部 軍馬 直取 江陵 。
江陵 ，係 喺 湖北省 中部 偏南 嘅 地方 ，亦即係 當時 荊州 附近 嘞 。
仲有 ，東莞 太守 呢個 東莞 呢 就 唔係 我哋 廣東 東莞 喎 。
呢個 東莞 係 古時 一個 郡 ，管轄 嘅 地方 包括 山東省 益都 、沂水 等等 幾個 縣 嘅 。
好喇 而家 講下 東吳 孫權 啊 。
呢一日 ，佢 喺 武昌 東關 就 召集 文武官員 舉行 會議 。
佢 話 ：朕 收到 鄱陽 太守 周魴 一 份 秘密 嘅 奏章 ，話 魏國 揚州 都督 曹休 ，有 入侵 我國 嘅 意思 。
而家 周魴 施行 一條 計策 ，向 曹休 講咗 東吳 必敗 嘅 理由 ，表示 要 向 曹休 投降 ，引誘 魏軍 深入 重地 ，然後 設下 伏兵 嚟 消滅 佢 。
目前 ，魏兵 正在 分 三路 嚟緊 ，各位 有 何 高見 啊 ？
顧雍 就 啟奏 話 ：呢個 咁 重大 嘅 責任 ，誒 非 陸伯言 擔當 唔起 啊 。
陸伯言 就係 陸遜 呀 。
呢個 建議 合 正孫權 嘅 心水 。就 召 陸遜 嚟 ，封 佢 做 輔國 大將軍 、平北 都 元帥 ，統率 御林 大軍 ，代理 王事 。
又 將 權力 嘅 象征 ，白旄 黃鉞 授畀 佢 ，所有 文武百官 一律 聽從 約束 。
噉任命嗰日 ，孫權 呀 親自 為 陸遜 揸 馬鞭 啊 。
呢個 乃係 君主 對 大臣 所 表示 嘅 一 種 極其 尊重 嘅 禮儀 嘞 。
陸遜 接受 咗 官爵 任命 ，三 呼 萬歲 叩謝 隆恩 。
然後 稟奏 話 要 保舉 兩個 人 啊 做 左右 都督 ，分別 率領 軍隊 去 迎擊 三路 魏軍 噉 。
孫權 問 佢 要 保舉 邊個 啊 ？
陸遜 就 保舉 奮威 將軍 朱桓 ，綏南 將軍 全琮 嚟 做 佢 嘅 助手 。
孫權 冇 話 唔同意 嘅 ，就 任命 朱桓 做 左 都督 ，全琮 做 右 都督 。
於是 陸遜 擇咗 個 吉日 ，統率 江南 八十一州 ，以及 荊湖 兵馬 總共 七十多萬人 ，命令 朱桓 在 左 ，全琮 在 右 ，自己 居中 ，浩浩蕩蕩 分 三路 進兵 。
呢一日 ，朱桓 就 去 見 陸遜 向 佢 獻策 。
朱桓話 ： 元帥 ， 曹休 此人 ， 唔 係 個 智勇之 將啊 。
佢 不過 係 魏主 曹睿 嘅 親戚 ，故此 先至 會 被 任命 為 大都督 嘅 啫 。
而家 佢 聽信咗 周魴 呃 佢 嘅 說話 ，深入 重地 。
元帥 一 發起 攻擊 呀 ，曹休 必定 失敗 嘅 。
噉佢 打敗 之後 ，由 邊條 路 趯 呢 ？
不外 兩條 ，左便 係 夾石 ，右便 係 掛車 。
呢 兩條 路 都 係 崎嶇 荒僻 ，非常之 險峻 。
我 想 同 全琮 將軍 各 帶 一 支 軍隊 ，喺 險要 嘅 地方 埋伏 。
先不先用樹木石頭 ，塞斷條路 ，噉實捉到曹休嘅 。
若果捉到曹休呀 ，我軍 長驅直進 ，逳下手 就 可以 奪取到 壽春 ，然後 再 向 許昌 、洛陽 進兵 。
元帥呀 ，呢個 乃係 千載難逢 嘅 好時機 啊 ！
朱 將軍 ， 你 所講 嘅 並非 係 好 計策 ， 我 自有妙計 㗎 喇 。
係 ！朱桓 走嘞 ，個心啊 當然 唔高興 啦 。
陸遜 就 命令 諸葛瑾 等 人 啊 ，堅守 江陵 ，抵敵 司馬懿 。
其他 各路 軍馬 都 分別 調撥 妥當 。
花開 兩朵 各表 一支 ，而家 講下 曹休 佢 帶領 大軍 就 去到 皖城 附近 扎落 營寨 。
周魴 出城 去 迎接 。
曹休 請 佢 入 去 中軍帳 坐落 之後 ， 噉 曹休 就 同周 魴 話 喇 ：
前嗰排 ，接到 周大人 嘅 信 ，所講嘅 七件事 非常之 有道理 。
稟奏咗 天子 之後 ，就 出動 大軍 由 三路 進發 。
將來 若果 得到 江東 嘅 地方 ，周大人 嘅 功勞 就 大咯 。
不過 ，有 人 話 周大人 你好多計嘅 ，怕 你 講嘅 說話 係 假嘅 噉 。
誒之我諗 ，周大人 必定 唔會 呃 我 嘅 ，係唔係啊 ？哈哈哈哈哈哈 。
周魴 聽 曹休 噉樣 講 ，當堂 就 喊起 上嚟 。
即刻 喺 佢 嘅 侍從 人員 身邊 ，掹出 把 劍 想 自刎 噃 。
曹休 急忙 制止 佢 叫 佢 唔好 噉 啊 。
周魴 揸住 把 劍 話 ：
我所講嘅七件事 ，真係 腑肺之言 啊 ！
而家 竟然 懷疑 我 係 講 假話 ，睇嚟 ，必定 係 有 東吳 嘅 人 喺度 使 反間計 。
若果 聽 佢哋 講 ，我 就 實死 㗎喇 。
我嘅忠心 ，唯有 天 知道 係啦 ！
周魴 講完 又 要 自刎 。
曹休 連忙 一下 攬 實 佢 話 ： 唉 我 係 講 笑 嘅 啫 ， 周大人 千祈 唔 好 噉 千祈 唔 好 噉 啊 ！
周魴 除咗 頂帽 ，打散 頭髮 ，一劍 落去 割咗 啲 頭髮 掉咗 喺 地 。
佢 話 ： 我以 忠心 嚟 對待 大 都督 ， 大 都督 你 又 以 為 我 係 假 嘅 。
而家 我 割 咗 父母 畀 我 嘅 頭髮 ， 嚟 表示 我 嘅 真心 ！
曹休 呢次 就 信到 十足 喇 ，設宴 招待 周魴 。
噉啊 宴會 完咗 咯 ，周魴 就 告辭 返 扯 。
第日 ，建威 將軍 賈逵 就 嚟到 見 曹休 。
曹休 問 佢 ：你 嚟 呢處 有 咩嘢 事 啊 ？
賈逵 話 ： 我 諗 東吳 嘅 兵 ， 必定 係 全部 都 駐 扎 喺 皖 城 嚟 。
都督 唔好 隨便 進兵 ，等 我 兩面 夾攻 就 實 打敗 敵人 㗎嘞 。
咩嘢話 ？仲要 等 你 嚟 夾攻 ，哼 ！你 想 搶咗 我 嘅 功勞 係 嘛 ？
末將 不敢 。
哼！
都督 ，聽講 周魴 割斷 頭髮 嚟 發誓 ，呢啲 係 詭計 嚟 㗎 。
就好似 以前 要 離斷臂 刺殺 慶忌 一樣 嘅 啫 ，都督 唔好 信 佢 啊 。
豈有此理 ！我正係 要進兵 嘅 時候 ，你 講埋 啲 噉嘅 說話 嚟 動搖 軍心 ！
刀斧手 ，將佢 推出去 斬首 ！
嘩 ，噉點得啊 ！當時 在場 嘅 眾位 將官 都 一齊 嚟 為 賈逵 求情 啦 。
大家 都 話 喇 ，未曾 進兵 先 斬 大將 ，於 軍 不利 啊 ！請 都督 免 佢 罪 啦 ！
曹休 亦 唔 想 太過份 ，就 聽 大家 勸 ，撤咗 賈逵 嘅 職 ，將 佢 嘅 兵 留 喺 處 另外 調用 。
自己 帶 一支 軍隊 去 奪取 東關 。
噉 啊 上 便 賈逵 講 嘅 要 離 斷臂 刺殺 慶忌 啊 ， 係 有 段 古 嘅 。
要離 係 春秋 時候 吳國 嘅 一個 刺客 ，即係 殺手 啊 。
佢 係 奉咗 吳國 公子 光 嘅 命令 ，去 謀殺 吳王 僚 嘅 仔 慶忌 。
噉佢 又 為咗 騙取 慶忌 嘅 信任 呢 ，就 故意 斬斷 咗 自己 隻 手臂 ，就 話 係 公子光 斬 嘅 噉 。
噉 後 嚟 果然 畀 佢 將 慶 忌 刺殺 咗 。
周魴 探聽到 賈逵 畀 曹休 削 咗 兵權 嘞 ，個 心 真係 高興 啊 。
佢 諗嘞 ：若果 曹休 聽 賈逵 話 ，噉 東吳 實 打敗 咯 。
今日呀 係 上天 幫 我 成功 啊 ！
於是 周魴 立即 秘密 就 派人 去 皖城 報告 陸遜 。
陸遜 就 調兵遣將 ，佢 佈置咗 人馬 ，喺 石亭 嘅 山路 埋伏 。
然後呢 ，搶先 去 石亭 開闊 嘅 地方 ，佈好 陣勢 等待 魏軍 。
佢 任命 徐盛 做 先鋒 帶兵 出發 。
而家 就 講 下 曹休 嗰 便 ，佢 叫 周魴 喺 軍隊 前 便 帶路 一路 噉 行 。
就行到 一笪 地方 ，曹休 問 ：前便 係 邊處 呀 ？
都督 ， 前 便 就 係 石亭 啊 ， 嗰 處 可以 駐兵 嘅 。
於是 曹休 聽咗 佢 話 ，率領 大軍 ，以及 車上 物資 等等 全部 去 石亭 駐扎 。
當晚 就 冇事 吖 。
到咗 第二 朝早 ，探馬 就 嚟 報告 話 喇 ：前面 嘅 山口 畀 吳兵 佔領 咗 ，人數 不明 啊 ！
吓 ？
周魴 話 冇 吳兵 喺 處 㗎 ，點解 吳兵 又 有 準備 㗎 ？
人 嚟 ，去 叫 周魴 嚟 見 我 ！
稟告 都督 ，周魴 帶住 幾十 人 ，唔知 去咗 邊處 啊 ！
哎呀 ！我 中咗 奸賊 嘅 詭計 喇 ！
嗯 ，雖然 係噉 ，亦 唔使 怕 嘅 ！
曹休 就 命令 大將 張普 做 先鋒 ，帶 幾千 人馬 去 同 吳兵 交戰 。
兩陣 對圓 ，張普 同 徐盛 打咗 幾個 回合 。
張普 唔夠 打 ，就 勒馬 收兵 ，返去 見 曹休 ，話 徐盛 勇 不可當 啊噉 。
曹休 諗咗 一諗 就 話 喇 ：我要 以 奇兵 嚟 勝 佢 。
佢 就 命令 張普 帶 二萬 兵 ，喺 石亭 嘅 南 便 埋伏 。
又 命令 薛喬 ，帶 二萬 兵 喺 石亭 嘅 北 便 埋伏 。
佢 話 ：聽日 ，我 自己 帶 一千 兵 去 挑戰 ，詐作 打輸 ，將 吳 兵 引 到 北山 前 便 。
我 以 放炮 為 號 ，噉 三面 夾攻 ，必定 可以 獲得 全勝 嘅 。
噉張普 、薛喬 兩個 接受咗 命令 ，各 帶 二萬 兵 就 漏夜 出發 去 埋伏 喇 。
話分 兩頭 ， 又 講返 陸遜 啊 。
當日 佢 叫 朱桓 、全琮 嚟 吩咐 佢哋 話 ：
你 兩位 各 帶 三萬 兵 ，由 石亭山 路 包抄 去 曹休 嘅 營寨 後方 ，以 放火 為 號 。
我 親自 率領 大軍 由 中路 進攻 ，噉 實 捉到 曹休 嘅 。
當日 黃昏 時候 ，朱桓 、全琮 接受 咗 命令 帶兵 出發 。
到咗 晚上 二更 時分 ，朱桓 帶住 軍隊 正 話 包抄 去到 魏兵寨 後 就 遇到 張普 個 伏兵 。
張普 唔 知道 嚟嘅 係 吳兵 㗎 ，烏瀡瀡 仲 行過嚟 問 係 邊個 喎 ，畀 朱桓 手起 一刀 就 當堂 攞咗 佢 命 。
魏兵 就 走咯 ，朱桓 即刻 就 命令 後軍 放火 。
全琮 呢 又 係 咁上下 樣 。
佢 帶住 軍隊 包抄 去到 魏兵寨 後 ，撞咗 入去 薛喬 伏兵 嘅 陣地 喎 ，噉啊 就 喺 嗰度 大殺 一場 。
薛喬 唔夠 打喇 ，就 帶住 啲 殘兵 趯 返 去 本寨 。
朱桓 、全琮 兩路 兵馬 ，喺 後便 就 追殺 過嚟 一直 殺到 曹休 嘅 大本營 ，嘿 殺到 曹休 兵馬 大亂 ，自相 衝擊 。
曹休 慌忙 上馬 ，向住 夾石道 逃跑 。
呢個 時候 呀 ，徐盛 又 帶住 大隊 軍馬 由 正路 殺嚟 ，嘩 殺到 魏兵 死 嘅 死傷 嘅 傷 就 不計其數 。
噉好彩趯甩嘅呢都丟盔棄甲咯 。
曹休慌喇 ，喺 夾石道 上 搏晒老命 咁 狂奔 。
跑到 一處 ，忽然 有 一彪 人馬 喺 小路 衝出嚟 ，為首 一名 大將 乃係 賈逵 。
嘿 ，曹休 噉 先至 有機會 喘返啖氣 啊 。
佢 又 好 羞愧 咯 ，佢 話 ：哎 ，哎呀 ，我 冇 聽 將軍 你 嘅 說話 ，果然 打敗仗 啊 ！
賈逵 話 喇 ：都督 你 快啲 衝出 呢條 路 啦 。
如果 吳兵 用 啲 石頭 樹木 塞 斷 條 路 呀 ，我哋 冚𠾴唥 都 冇 命 㗎 。
係 ，走喇 ！於是 曹休 就 鞭 衡 隻 馬 飛快 咁 跑 。
賈逵 就 斷後 ，佢 喺 啲 樹林 茂密 嘅 地方 同埋 一啲 靜僻 嘅 險峻 山路 上 便 啊 ，插 啲 軍旗 喺 處 作為 疑兵 ，哈 有效 噃 。
過咗 冇 耐 ，徐盛 嘅 人馬 追到嚟 喇 。
佢 見到 山坡 下 便 ，隱隱約約 ，誒 有 啲 旗幟 飄飄 下 。
就懷疑 係 有埋伏 ，唔敢 繼續 追 ，咪 收兵 返轉頭 。
因此呢 ，曹休 就 得救 嘞 。
司馬懿 聽到 曹休 兵敗 嘅 消息 ，亦都 帶兵 退走 嘞 。
呢一仗呀 ，東吳 大獲全勝 。
徐盛 、 朱桓 、 全琮 各人 嘅 軍隊 啊 ， 都 繳獲 好多好多 嘅 車輛 啊 牛馬 軍用物資 器械 啊 等等 。
另外 投降 過嚟 嘅 兵卒 有 成 萬 幾 人 。
陸遜 就 非常 歡喜 啦 ，就 同埋 太守 周魴 ，與及 各位 將官 班師 回朝 。
返到武昌嗰日 ，吳主孫權啊 ，帶齊 文武百官 ，出到去 武昌城外 嚟 歡迎 。
用 自己 皇帝 羅傘 嚟 遮住 陸遜 ，嘩 ，夠晒 榮耀 咯 ！
呢 一次 所有 嘅 將官 都 得到 獎賞 。
孫權 見到 周魴 割咗 頭髮 ，就 對 佢 話 ：
愛卿 割斷 頭髮 ，而 使到 國家 獲得 一場 咁 大 嘅 勝利 。
你嘅 功績呀 ，應當 記載 喺 史書 上 便嚟 啊 ！於是 就 封 周魴 做 關內侯 。
同時 又 大排筵席 ，勞軍 慶賀 ，呢啲 都 不在 話下 喇 。
噉陸遜呢又向孫權建議 ，寫封信去蜀國 ，請諸葛亮啊 ，趁住魏軍新近兵敗 ，進兵去攻打魏國 。
孫權 聽 佢 嘅 說話 ，就 寫好 封 國書 派 個 使者 送 去 西川 。
嗱噉上面 我哋 講過 啊 ，喺 蜀漢 建興 六年 即係 公元 二二八年 嘅 秋天 。
曹休 就 喺 石亭 畀 陸遜 打到 大敗 ，噉 佢 又 嬲 又 翳 又 害怕 ，就 悒 到 病起 上嚟 。
佢 返到 洛陽 之後 呢 ，背脊 呀 生咗 個 大 瘡 ，好快 就 病死咗 咯 。
過咗冇幾耐 ，司馬懿 亦都 帶兵 返嚟 。
嗰班 將領 迎接 咗 佢 返到去 帥府 就 問 佢 話 喇 ：
曹都督 打敗咗 ，亦係 同 元帥 有關 嘅 ，點解 元帥 咁 急 返嚟 京師 呢 ？
哦 ， 噉 嘅 ， 我 估計 諸葛亮 一 聽到 我 哋 魏 軍 失敗 呀 ， 必定會 乘虛 嚟 侵犯 長安 。
倘若 隴西 告急 ，邊個 去 救 佢 啊 ，所以 我 就 返嚟 喇 。
嗰班 將領 聽咗 呀 ，都 認為 司馬懿 係 膽怯 啫 。
個口 呢 當然 唔敢 講 ，之 人人 都 喺 個 肚 裏 便 笑 佢 。
而家 再 講返 東吳 ，孫權 佢 派咗 使者 帶 封信 去 成都 畀 蜀主 劉禪 ，請 佢 興兵 去 攻打 魏國 。
並且 喺 信 內 呢 ，又 講咗 擊敗 曹休 嘅 經過 ，一來 就 顯示 下 自己 嘅 威風 ，二來 就 表示 友好 。
劉禪 睇咗 信 就 好 歡喜 ，派 人 將 呢 封 信 啊 送 去 漢中 ，報告 畀 孔明 知 。
當時 ，孔明 啊 整頓 軍隊 ，真係 算得上 兵強馬壯 糧草充足 ，所用 嘅 物資 一切 完備 。
正話準備要起兵㗎喇 ，就喺呢個時候 ，孔明 得到 後主 轉嚟 東吳 嘅 信件 。
好啊！ 孔明 立即 舉行 宴會 ，請 齊啲 將官 嚟 ，一便 飲酒 一便 商量 出兵 嘅 事 。
忽然間 ，呼噉 一浸 大風 ，喺 東北方 吹嚟 ，將 大廳 前面 一棵 松樹 啊啪聲 下 吹 斷咗 。
大家 都 吃一驚 ，孔明 隨即 占咗 個 卦 佢 話 ：
啊呢浸風 ，預兆 要 損失 一員 大將 啊 ！
噉究竟 損失 邊 一位 大將 呢 ？且 聽 下回 分解 。
