今日 講下 關興 ，佢 就 畀 啲 西羌兵 包圍 ，就 向住 山谷 裏頭 到處 搵 路 趯 啦 。
當時 天 就 快 黑嘞 ，忽然間 ，前面 一紮 黑旗 好似 一片 烏雲 噉 撲過嚟 。
一員 西羌 大將 ，手提 鐵錘 啊 大聲 高叫 話 ：小將 你咪 走 ！我 就係 越吉 元帥 啊 ！
關興 一撥 馬頭 ，盡力 噉 縱馬 加鞭 就 向 橫路 猛跑 。哎 ！弊 ！前面 係 一條 山坑 ，冇 橋 ，唔過得 ！
咬一咬牙關 ，回馬嚟 同 越吉 搏過 。
之 關興 終歸 係 膽寒 喇 ，頂唔住 啊 。
佢 又 返轉頭 向住 山坑 嗰 便 逃走 ，就 畀 越吉 追到 嘞 ，一 鐵錘 打過嚟 ，關興 就 急急 閃開 。
冇錯啊 人 係 閃開咗 ，馬 就 閃唔開 噃 ，啪噉 一錘 打中 馬囉柚 ，嗰隻 馬 當堂 碌咗 落 山坑 處 ，關興 啊 成個 𢴈 咗 落 水 。
關興 睇 白 自己 呢趟 係 咁 大 㗎 喇 ，忽然 聽到 後 便 咁 沙 一 聲 響 ，奇怪 喇 ，越吉 元帥 連 人 帶 馬 無端端 自己 碌 咗 落水 噃 。
關興 喺 水處 掙扎 起身 睇下 ，嘩 好嘢 ！只見 岸上 有 一員 大將 ，正 殺退 咗 啲 羌兵 。
關興 就 高興 喇 揸住 把 刀 撲過去 想 斬 越吉 ，就 畀 越吉 噼噼啪啪 浭水 走甩 咗 。
關興 就 得咗 越吉 嗰 匹 戰馬 ，就 拉咗 上岸 ，整頓 好 馬鞍 勒 返 緊 肚帶 ，就 提刀 上馬 。
咦 ？見到 嗰 員 大將 啊 ，仲 喺 前面 追殺 羌兵 噃 。
關興 諗 呢個 人 救咗 我 條命 ，要 多謝 佢 至得 ，一拍 隻 馬 就 追上去 啦 。
追到近喇 ，一浸 雲霧 飄嚟 ，隱隱約約 見到 呢一 員 大將 呀 ，頭頂 青巾 ，身穿 綠袍 金甲 ，丹鳳眼 ，臥蠶眉 面如 重棗 。
一手 倒 提 青龍 偃月 刀 ， 一手 捋 住 五柳 長 鬚 ， 騎住 追風 赤兔馬 ， 哎呀 ！ 分明 係 自己 父親 關公 啊 ！
關興 驚奇 到 極 啦 。
關公 用 隻手 指住 東南方 話 ：乖仔 快啲 混 呢條路 去 ，我 會 保護 你 回營 㗎 ！
講完 ，拂聲 唔見咗 嘞 ，關興 立即 向住 東南方 飛跑 。
行到半夜 ，就 撞見 一彪 軍馬 嚟到 ，原來 係 張苞 啊 。
張苞 就 問 關興 嘞 ：你 係唔係 見到 二伯父 啊 ？
嗯 ？你 點知 㗎 ？
我 畀 鐵車 追到 實 ，好 危急 喇 ，忽然 見到 二伯父 喺 天上面 飛落嚟 ，嚇退 咗 啲 羌兵 。
二伯父 指 畀 我 睇 話 ：你 由 呢條 路 去 救 我 個 仔 啦噉 。
所以 我 就 直筆 帶兵 嚟 搵 你 喇 。
哦 ，噉嘅 。
關興 呢 亦都 將 先頭 嘅 遭遇 講 畀 張苞 聽 ，兩個 都 讚歎 話 神奇 啦 。
噉關 、張 兩個 返到 營寨 之後 就 同 馬岱 商量 。
馬岱 話 喇 ：我哋 都 冇 咩 好 計 嚟 打退 啲 羌兵 嘞 ，不如 我 留 喺度 守住 營寨 ，你 兩個 返去 稟告 丞相 ，用 計 嚟 破 佢 啦 。
於是 關 、張 兩個 啊 即時 趕路 返去 見 孔明 ，將 作戰 失利 嘅 經過 詳細 向 佢 報告 。
孔明 聽咗 ，跟住 就 命令 趙雲 、魏延 啊 ，各 帶 一支 軍隊 分頭 去 埋伏 。
然後 點起 三萬 兵馬 ，帶埋 姜維 、張翼 、關興 、張苞 ，親自 去 馬岱 嘅 營寨 。當晚 ，就 喺 處 住 落 。
第二朝 一早啊 ，孔明 同埋 大家 一齊 行 上座 高山 睇下 羌兵 嘅 情況 。
只見啲鐵車 呀 一架接一架 ，人馬 一隊隊 來來往往 咁 奔跑 。
孔明 睇咗 一陣 就 話嘞 ：呢啲 唔難 破佢 嘅 。
孔明 落返山 ，返到 營寨 就 叫 馬岱 、張翼 嚟 ，吩咐 佢哋 如此如此噉 ，兩個人 就 去咗 喇 。
孔明 又 叫 姜維 嚟 問 佢 話 ：伯約 ，你 識唔識 點樣 破 啲 鐵車 啊 ？
姜維 回答 話 喇 ：西羌人 不過 係 恃住 勇猛 力 大 唧 ，點 知道 咁多 妙計 㗎 。
哈哈哈哈哈哈哈哈 ，伯約 你 明白 我 嘅 意思 。
今日 雲層 甚 厚 北風 又 猛 ，個 天 就 快 會 落 雪 ，我 嘅 計策 可以 實行 嘞 。
孔明 就 命令 關興 、張苞 帶 兵 去 埋伏 。
又 命令 姜維 帶 兵 出戰 ，但凡 有 鐵車兵 嚟 ，一於 退後 就 走 ，
喺 營寨 裏 便 啊 ，只係 虛 插 旗幟 唔 擺 人馬 。
孔明 佈置 妥當 晒 喇 。
呢個 時候 啊 係 十二月 尾 ，果然 又 落起 大雪 嚟 。
呢一日 ，姜維 帶兵 出去 挑戰 。
越吉 諗 哈 你 都 唔知 死 啊 ，就 率領 鐵車兵 嚟 迎戰 嘞 喎 。
姜維 一 見到 立即 退後 就 走 。
羌兵 一直 追 到 去 蜀軍 營寨 ，姜維 呢 由 寨 後 走咗 。
啲羌兵 逼近 營寨 睇下 ，咦 ？好奇怪 喎 ，居然 聽見 營寨裏 便 有人 彈琴 噃 。
再望下 ，四周圍 都係 虛插旗幟嘅 ，就 派人 急急 返去 報告 越吉 。
越吉 個 心 就 好 思疑 啦 唔 敢 下令 衝入去 喎 。
雅丹丞相 就 話嘞 ：怕乜嘢吖 ，呢啲 係 諸葛亮 嘅 詭計 ，佢 呢啲 係 虛設 疑兵 咋嘛 攻佢 冇 錯嘅 ！
於是 越吉 就 帶兵 親自 嚟到 蜀軍 營寨 前便 。
去到嘅時候 ，見到 孔明 帶住 個琴 上車 ，後便 呢 有 幾個 馬軍 跟住 ，由 寨 後 走嘞 。
追 ！羌兵 㗾噉 衝入 營寨 ，一直 追過咗 山口 就 見到 嗰架 車 啊 ，隱隱約約 噉 轉咗 入去 樹林 裏 便 嘞 。
雅丹 對 越吉 話 ：呢啲 噉嘅 兵 ，就算 有埋伏 啊 亦 唔使 怕 嘅 ，追 ！於是 率領 大軍 猛追 。
追追下 ，又見到 姜維 啲 兵 都 喺 雪地 上面 行走 ，越吉 就 發起 火嚟 ，催促 鐵車兵 又 急追 。
呢陣時 ，啲 山路 畀 大雪 冚住 ，一望 平坦 ，銀裝玉琢 啊 。
越吉 、雅丹 就 正在 追趕 緊 咯 喎 ，忽然 報馬 嚟 報告 話 ，發現 有 一隊 蜀兵 由 山 後 殺出 嚟 噉 。
雅丹話 就算 有些少 伏兵 啊 ，唔使 怕 佢 嘅 ，繼續 前進 ！
噉 一味 催住 向前 追 ，追啊追啊 ，忽然 一聲 巨響 直情 好似 山崩地裂 ，啲 羌兵 零零林林 跌晒 落 嗰啲 山坑 裏頭 。
後便嗰啲鐵車呢 ，正行得爽神喎 瀡瀡聲噉 向前衝 ，一下就收唔住掣 死咯 自己撞自己咯 。
後隊啲羌兵 正係 要 回頭 嘅 時候 ，左便 關興 右便 張苞 兩支 軍隊 一齊 衝出嚟 ，萬箭齊發 。
背後 呢 ， 姜維 、 馬岱 、 張翼 三路 兵 又 殺 到 ， 殺到 鐵車兵 亂糟糟 潰不成軍 呀 。
越吉元帥 騎住 馬 ，向後 便 山谷 裏 便就 狂奔 。
點知 撞 正 關興 ， 打 咗 僅僅 一個 回合 ， 關興 就 舉起 大刀 ， 猛 喝 一聲 ： 啊 ！ 將越 吉 斬 死 跌 咗 落馬 。
雅丹丞相 早就 畀 馬岱 生擒活捉 啊 押咗 去 大本營 嘞 。
啲 羌兵 就 散晒 到處 咁 逃跑 ，呢啲 呢 就 不在話下 喇 。
大戰 結束咗 ，孔明 返到 中軍 帳 。
馬岱 就 押 雅丹 丞相 嚟 嘞 。
孔明 叫人 解開 佢啲 繩 ，畀 酒 佢 飲 等 佢 壓下 驚 ，仲 好好 噉 撫慰 佢 一番 ，雅丹 就 當然 極之 感激 啦 。
孔明 話 喇 ：我 主上 係 大漢 皇帝 ，命令 我 討伐 逆賊 ，你 仲 點解 要 去 幫助 啲 叛逆 呢 ？
我 而家 放 你 返去 ，你 講 畀 你哋 國主 聽 ，我 國 同 你哋 係 鄰邦 應該 永遠 和好 ，唔好 再 聽 啲 反賊 嘅 說話 喇 。
孔明 就 叫 人將 俘虜 繳獲 嘅 羌 兵 ， 以及 車馬 軍器 ， 全數 還 畀 雅丹 ， 放 佢 哋 回國 。
噉 雅丹 佢哋 呢 千多謝 萬多謝 就 返去 嘞 。
孔明 就 率領 三軍 ，日夜 兼程 趕返去 祁山 嘅 營寨 。
命令 關興 、張苞 帶 兵 行 先 ，同時 又 派 人 送 表章 去 成都 向 後主 劉禪 報捷 嘞 。
而家 返轉頭 ，講下 魏軍 嗰 便 。
曹真 自從 派咗 使者 去 西羌 請求 支援 之後 呢 ，日日 都 喺度 盼望 有 好消息 。
呢一日 ，探子 嚟 報告 話 蜀兵 拔寨 收拾 起程 喇 噉 。
郭淮 就 高興 啊 ，佢 話 ：實係 羌兵 去 攻 佢哋 ，所以 要 撤退 喇 。
於是就 分 兩路 去 追擊 。
當時 蜀兵 喺 前 便 亂走 ，魏兵 喺 後 便 猛追 。
先鋒 曹遵正 喺度 追趕 ，忽然 咚咚聲 響起 戰鼓 。
魏延 帶住 一彪 軍馬 出現嘞 ，佢 大聲 噉 喝啊 反賊 咪 走 ！
驚到 曹遵 面 都 青 ，夾硬 打咗 三個 回合 ，就 畀 魏延 一刀 斬死 跌咗 落 馬 。
副先鋒 朱贊 呢 就 帶兵 追到 半路 ，突然間 就 遇 正 趙雲 帶住 一彪 兵馬 截住 。
朱贊 措手不及 ，畀 趙雲 一槍 就 攞咗 命 。
曹真 、郭淮 見 兩路 先鋒 都 𢰸咗咯 ，就 想 收兵 返去 啦 。
誰知 背後 吶喊 連天 鼓角 齊鳴 ，原來 係 關興 、張苞 兩路 兵 殺到 ，一下 就 包圍住 曹真 、郭淮 痛殺 一陣 。
曹 、郭 兩個 輸到 貼地 ，咪 仲 算 好彩 ，畀 佢哋 帶住 一班 敗兵 走甩咗 。
蜀軍 呢一仗 大獲全勝 一直 追到去 渭水 ，佔領 咗 魏軍 嘅 營寨 。
曹真 損失咗 兩個 先鋒 啊 非常 心痛 啊 。
唯有 寫份 奏章 飛馬 送去 洛陽 ，請求 魏主 曹睿 派 救兵 嘞 。
呢一日 ，魏主 曹睿 登殿 臨朝 。
侍臣 稟奏 話 ：大都督 曹真 ，屢次 畀 蜀兵 打敗 ，兩個 先鋒 陣亡 。
羌兵 又 損失 無數 形勢 非常 危急 。
而家 上表 求救 ，請 陛下 決斷 。
曹睿 大吃一驚 啊 ，急忙 問 啲 文武 大臣 有 咩嘢 擊退 蜀軍 嘅 好 計策 。
華歆 就 稟奏 話 嘞 ：誒 一定 要 陛下 御駕 親征 ，召集 各路 諸侯 共同 起兵 ，並且 人人 都 要 唔怕死 肯 拼命 ，噉 先至 可以 擊敗 蜀軍 㗎 。
否則 ，長安 一旦 失守 ，關中 就 危險 咯 。
太傅 鐘繇 出班 啟奏 話 ：陛下 ，但凡 一個 將帥 ，佢 嘅 智謀 超過 他人 ，就 能夠 制服 他人 。
孫子 有話 ：知彼 知己 ，百戰百勝 。
臣 認為 曹真 雖然 用兵 好耐 ，但係 佢 唔係 諸葛亮 嘅 對手 。
臣 以 全家 老少 保舉 一個人 ，能夠 擊退 蜀兵 ，唔知 主上 意思 如何 呢 ？
曹睿 就 話 喇 ： 卿家 乃 係 大 老元臣 ， 知道 邊個 有 本事 嘅 人 能夠 擊退 蜀 兵 嘅 ， 就 快 啲 召 佢 嚟 同 孤 王 分憂 啦 。
鐘繇 話 ：往日 ，諸葛亮 想 興師 侵犯 。
因為 怕 呢個 人 ，故此 就 散播 流言蜚語 ，使 陛下 懷疑 佢 而 趕走咗 佢 ，噉樣 諸葛亮 先至 膽敢 長驅直進 。
而家 陛下 若果 能夠 重新 起用 佢 嘅 話 ，諸葛亮 自然 就 會 撤退 㗎 喇 。
卿家 講 嘅 係 邊個 呢 ？
驃騎大將軍 司馬懿 ！
係 啊 ， 呢 件 事 孤王 亦 都 非常 後悔 嘅 。 誒 而家仲 達 喺 邊 處 嚟 啊 ？
近日 聽講 仲達 喺 宛城 住 ，得閒 無事 啊 。
曹睿 即刻 落咗 道聖旨 ，派 個 使者 去 恢復 司馬懿 原來 嘅 官職 。
同時 加封 佢 做 平西 都督 ，就 地點 起 南陽 各路 軍馬 立即 開赴 長安 。
曹睿 要 御駕 親征 啊 ，定 一個 日期 ，要 司馬懿 準時 去到 長安 聚匯 。
噉使者 就 漏夜 騎馬 飛跑去 宛城 喇 。
南陽啊 係 一個 郡 ，郡城 叫做 宛城 ，即係 今日 河南省 南陽市 。
南陽 郡 所 管轄 嘅 地方 呢 ， 相當於 今日 河南 、 湖北 嘅 一部分 地區 。
而家 講下 孔明 ，佢 自從 出師 以嚟 就 屢次 都 大獲全勝 ，個心啊 非常 歡喜 。
有一日 ，孔明 正 喺 祁山 嘅 營寨 裏頭 啊 ，同 大家 喺度 商量 事情 。
忽然 守門官 嚟 報告 話 鎮守 白帝城 永安宮 嘅 李嚴 啊 ，派 佢 個 仔 李豐 嚟到 求見 。
孔明 即 估 話 東吳 嚟 侵犯 邊境 添 個 心 就 好 思疑 ，就 請 佢 快啲 入嚟 中軍 帳 問 佢 。
誰知 李豐 一嚟到 就 話 ，特意 嚟 報喜 啊噉 。
孔明 問 嘞 ：有 咩 喜事 呢 ？
係噉嘅 ，往日 孟達 投降 魏國 ，係 不得已 嘅 。
當時 曹丕 喜歡 佢 有才幹 ，時常 都 將 珠寶 、駿馬 等等 禮物 賞賜 畀 佢 。
有時 甚至 仲 同 佢 坐埋 一架 車 出入 ，封 佢 做 散騎常侍 ，令 新城 太守 鎮守 上庸 、金城 等等 地方 ，將 西南 一帶 嘅 防守 重任 委託 畀 佢 啊 。
曹丕 死咗 之後 ，曹睿 即位 吖 ，朝廷 上 有 唔少 人 妒忌 孟達 ，噉 啊 使到 佢 非常 之 唔安樂 喇 。
佢 周時 都 對 部下 嘅 將領 話 ：我 本來 係 蜀國 嘅 將領 ，因為 形勢 所逼 先至 好似 今日 噉 嘅 啫 。
近來 佢 屢次 派 心腹人 ，帶 信 嚟 見 家父 ，請 家父 代為 稟告 丞相 ，話 佢 早就 想 返嚟 蜀國 。
而家 喺 新城 ，聽講 丞相 討伐 魏國 ，想 率領 金城 、新城 、上庸 三個 地方 嘅 軍隊 起義 ，直取 洛陽 。
丞相 就 去 奪取 長安 ，噉 兩個 京都 都 奪取到 ，就 大局 定 喇 。
而家 我 帶埋 孟達 嘅 心腹 同 屢次 嘅 書信 嚟 ，請 丞相 過目 啊 。
孔明 就 真係 歡喜 喇 ，重重 噉 賞賜 李豐 佢哋 。
誒各位聽眾 ，你哋 大概 都 記得吓 ，喺 八年前 啊 ，就 關公 畀 東吳 大將 呂蒙 打敗 ，就 被 困 麥城 。
廖化 突圍 去 上庸 見到 劉封 同 孟達 ，就 請求 發 救兵 。
孟達 就 勸 劉封 唔好 發兵 ，結果 關公 就 孤立無援 ，畀 呂蒙 捉住 殺死 吖 。
劉備 就 非常 痛恨 孟達 、 劉封 ， 孟達 就 趯 咗 去 投降 魏主曹 丕 。
噉 而家 李豐 嚟 講話 要 歸順 返 蜀國 嘅 就係 呢個 孟達 喇 。
孟達 當時 喺 新城 ，新城 係 個 郡 ，郡城 係 喺 房陵 ，即係 今日 湖北省 房縣 。
新城郡 所管轄 嘅 地方 啊 ，就 包括 今日 湖北省 房縣 ，保康 ，南漳 等 幾個 縣 以及 陝西 白河 等等 幾個 縣 嘅 地方 。
好喇 ，閑話休提 言歸正傳 ，正當 孔明 高興 嘅 時候 啊 ，就 忽然 得到 個 情報 。
話 魏主 曹丕 一便 親自 去 長安 ，一便就 恢復 司馬懿 嘅 職務 並且 加封 佢 做 平西 都督 ，出動 佢 本處 兵馬 喺 長安 會合 噉 。
啊！ 孔明 吃咗 一 驚 啊 。
參軍 馬謖 就 話 喇 ：曹丕 算得 乜嘢 呢 ？若果 佢 嚟 長安 捉咗 佢 就係 啦 ，丞相 為 咩事 咁 驚 啊 ？
我唔係怕曹睿啊 ，我所顧忌嘅 ，係司馬懿一個人唧 。
而家 孟達 想起 義 ，若果 遇着 司馬懿 事情 必定 失敗 。
孟達 唔 係 司馬懿 嘅 對手 ， 實 畀 司馬懿 冚 咗 佢 。
孟達 如果 一 死 ，中原 就 唔 容易 得 咯 。
既然 係 噉 ， 丞相 不如 立即 寫封信 叫 孟達 多加 提防 啦 。
嗯 。孔明 接受 咗 馬謖 嘅 意見 ，即刻 寫好 封信 交畀 孟達 嘅 心腹 ，叫 佢 火急 帶 返去 。
噉啊 孟達 喺 新城 佢 等 孔明 嘅 回音 確係 等得 好 心急 。
而家 佢 收到 孔明 嘅 信 ，拆開 一 睇 ，孔明 封 信 嘅 大意 就係 話 ：
近日 得到 你 嘅 信 ， 知道 你 忠義 嘅 心腸 不忘故舊 ， 我 十分 歡喜 安慰 啊 。
若果 大事 成功 ，你 就係 漢朝 中興 嘅 第一 功臣 喇 。
呢件事 ，應該 緊守 祕密 ，唔好 輕易 託人 ，認真 要 注意 。
最近 聽講 曹睿 重新 起用 司馬懿 ，命令 佢 率領 宛 、洛 嘅 軍隊 。
佢 如果 知道 你 要 起義 呀 ，必定 好快 就 嚟 鎮壓 ，必須 認真 戒備 唔好 等閒視之 呀 。
孟達 睇完 信 就 忍唔住 笑起上嚟 話 喇 ：哈哈哈哈哈哈哈哈哈哈哈哈 ，啊哈哈哈 ，啲 人 話 孔明 心多 ，真係 冇錯 㗎 ，睇下 呢件事 就 知 㗎喇 。
孟達 寫咗 封覆信 ，仍舊 叫 佢 個 心腹人 就 送去 畀 孔明 。
孔明 收到 信 一 睇 ，封 信 大意 就 話 ：
收到 丞相 嘅 信 ，關於 司馬懿 嘅 事 ，唔使 怕 嘅 ，事關 宛城 離 洛陽 大約 八百 里 ，離 新城 一千 二百 里 。
若果 司馬懿 聽到 我 起義 嘅 消息 ，需要 寫 表章 稟奏 魏主 ，來回 要 一個月 先至 能夠 行動 。
喺 呢個 期間 ，我 嘅 軍隊 已經 做好 一切 防守 準備 。
司馬懿 就算 嚟 呀 ，我 亦 唔 怕 ，請 丞相 寬心 ，等住 聽 捷報 就係 喇 。
孔明 睇完 ，哎 一手 掉咗 封信 落地 𨂽住 腳 噉 話 ：孟達 實 死 喺 司馬懿 嘅 手 上 咯 。
馬謖 就 問嘞 ：丞相 點解 噉 講 呢 ？
唉 ，兵法 有 話 ：攻其不備 出其不意 呀 。點到 你 諗住 有 一個 月 時間 㗎 ？
曹睿 既然 任命 得 司馬懿 嘞 ， 就 准 佢 逢 賊 即 除 仲 使 乜 等 佢 稟奏 呢 ？
司馬懿 如果 知道 孟達 起義 呀 ，唔使 十日 兵 就 到喇 ，邊度 有 咁多 時間 畀 你 防備 呢 ？
啊 係 啊 係 啊 ！ 大家 聽 孔明 噉 樣一 分析 呀 服晒 啊 。
孔明 急急 叫 孟 達 嘅 心腹 ， 火急 返去 新城 通知 孟達 ， 囑咐 佢 如果 未 起義 呢 ， 切勿 畀 同事 知道 ， 知親 就 必敗 。
噉 孟達 嘅 心腹人 呢 ，辭別 咗 孔明 就 趕路 返 新城 嘞 。
花 開 兩 朵 各 表 一 枝 。
而家 講 司馬懿 啊 ，佢 自從 畀 曹睿 削 咗 職 回鄉 之後 呢 ，一直 都 喺 宛城 居住 。
佢 聽聞 魏兵 屢屢 畀 蜀 兵 打敗 個心 啊 非常 之 難過 ， 禁不住 仰 天長 歎 。
司馬懿 有 兩個 仔 ，大仔 叫 司馬師 ，別字 子元 ；
二仔 叫做 司馬昭 ，別字 子尚 。
佢 兩個 都 係 熟讀 兵書 啊 有 遠大 志向 嘅 人 啊 。
呢一日 ，佢 兩 兄弟 企 喺 司馬懿 身邊 就 侍候 父親 。
見到 父親 唉聲歎氣 ，就 問 喇 ：父親 為 咩嘢事 歎氣 啊 ？
唉 ！你哋 啲 後生仔 ，點 知道 咁多 國家 大事 吖 ？
司馬師 話 喇 ：係唔係 因為 魏主 唔用 你 所以 歎氣 啊 父親 ？
唉！
司馬昭 笑住 話 喇 ：照 孩兒 估計 唔使 幾耐 朝廷 就 會 嚟 宣召 父親 㗎 喇 。
哈哈 ，真係 乜 都 冇 咁 靈 啊吓 。
司馬昭 話 口 未完 ，僕人 就 通報 話 天使 到 快啲 接 聖旨 。
司馬懿 喇喇聲 吩咐 大開 中門 ，擺好 香案 ，迎接 天使 入嚟 宣讀 咗 聖旨 。
果然 係 皇上 重新 起用 ，仲 升咗 級 添 。
司馬懿 就職 之後 啊 ，立即 下令 調 齊 宛城 各路 兵馬 。
有一日 ，金城 太守 申儀 嘅 家人 就 嚟 求見 司馬懿 ，話 有 極其 機密 嘅 事 要 報告 噉 。
司馬懿 喺 間 密室 裏 便 接見 佢 ，呢個人 呢 ，就 將 孟達 想 反水 嘅 事 講 畀 司馬懿 聽 。
而且啊 ，佢 仲 帶埋 孟達 嘅 心腹人 李輔 ，仲有 孟達 嘅 外甥 鄧賢 嚟 自首 作證 。
司馬懿 聽 佢 講完 好 慶幸 好 慶幸 啊 ， 佢 話 ： 呢 個 真 係 皇上 齊天 之福 啊 ！
諸葛亮 嘅 大軍 喺 祁山 ，殺得 人人 喪膽 ，使到 皇上 不得不 親自 去 長安 。
如果唔係 近日 重新起用 我 呀 ，孟達 一 反水 ，長安 、洛陽 兩個 京都 都 要 陷落 咯 。
孟達 呢個 奸賊 ，必定 同 諸葛亮 有 密謀 嘅 。
我 去 捉咗 佢 先 ！諸葛亮 自然 心寒 ，唔退兵 都 唔得 㗎喇 。
司馬師 就 話 喇 ：父親 呀 ，噉 你 要 快啲 寫 份 表章 稟奏 皇上 至 得 啊 。
如果 要 等 聖旨 ，一來一回 成 個月 ，嚟唔切 喇 ，唔使 寫 。
司馬懿 立即 下令 叫人 馬 起程 ，一日 要行 兩日 嘅 路 ，遲嘅 就 斬 ！
同時 佢 又 派 參軍 梁畿 ，帶住 檄文 趕去 新城 ，命令 孟達 準備 進軍 就 使 佢 唔好 疑心 。
梁畿 出發 先 ，隨後 司馬懿 大軍 起行 喇 。
行咗 兩日 ，喺 半路 遇見 右將軍 徐晃 帶住 一支 軍隊 。
徐晃 落馬 就 拜見 司馬懿 佢 問 ：皇上 御駕 去咗 長安 ，親自 迎擊 蜀兵 ，而家 都督 要 去 邊處 啊 ？
司馬懿 細細聲 話 ：而家 孟達 作反 ，我 去 捉佢 咋嘛 。
我 ，我願 做 先鋒 呀 ，都督 意下 如何 ？
司馬懿 當然 高興 啦 ，噉 就 將軍隊 聯合 起嚟 ，徐晃 做 前鋒 ，司馬懿 自己 喺 中軍 ，兩個 仔 啊 押 後 。
噉又 行咗 兩日 ，前鋒 嘅 偵察人員 就 捉到 孟達 嘅 心腹人 ，抄到 孔明 寫 畀 孟達 嘅 回信 ，就 押佢 去 見 司馬懿 。
司馬懿 話 喇 ： 我 唔 殺 你 ， 你 將件 事 嘅 經過 從頭 詳詳細細 噉 講 。
噉嗰個人 就 唯有 將 孔明 、孟達 來往 商量 嘅 事 ，一五一十 噉 講晒出嚟 啦 。
司馬懿 睇 咗 孔明 嘅 回信 大吃一驚 噉 話 ： 哎呀呀 呀 ， 世間 上能 人 嘅 見解 都 係 相同 㗎 ， 我 嘅 計謀 原來 早就 畀 孔明 識穿 咗 。
哦好在 皇上 洪福齊天 ，截到 呢個 消息 ，孟達 而家 噉 就 無能為力 咯 。
於是 司馬懿 催促 兵馬 加急 前進 。
孟達 喺 新城 ，佢 同 金城 太守 申儀 、上庸 太守 申耽 就 約定 一個 日期 共同 起義 。
申耽 、 申儀 詐諦 應承 ， 之 每日 呢 ， 都 喺 度 操練 兵馬 等 魏兵 嚟 到 嘅 時候 做 內應 喎 。
然後呢 ，又 報畀 孟達 聽 ，話 軍器 糧草 都 未曾 齊備 啊 ，唔能夠 定實 起義 嘅 日期 噉 。
孟達 就 信以為真 ，冇到 懷疑 。
呢一日 ，參軍 梁畿 嚟到 ，孟達 接咗 佢 入城 。
梁畿 對 佢 傳達 司馬懿 嘅 命令 話 ： 司馬 都督 奉 皇上 聖旨 ， 點齊 各路 軍馬 迎擊 蜀兵 。
孟太守 你 召集 本部 軍馬 ，聽候 調遣 啦 。
係 ，都督 幾時 起程 呢 ？
呢個 時候 ，大概 已經 離開 宛城 去 咗 長安 喇 。
孟達 個 心 偷笑 喇 ，好啊 ，哈哈 ，呢趟 我 大事 成功 喇 。
當日 ，孟達 舉行 宴會 款待 梁畿 ，然後 送佢 出城 返 扯 。
孟達 一 送走咗 梁畿 ，立即 通知 申耽 、申儀 ，決定 明日 起義 ，換上 大漢 旗號 ，出動 各路 兵馬 直取 洛陽 。
孟達 呢頭 剛剛 佈置好 ，嗰頭 就 接到 報告 話 ，城外 煙塵 滾滾 ，唔知道 邊處 有 兵 嚟緊 啊噉 。
孟達 喇喇聲 上 城樓 睇 下 啦 ，只見 一彪 軍馬 打住 右 將軍 徐 晃 旗號 ，飛奔 嚟到 城下 。
孟達 大吃一驚 不得了 ！即刻 命令 扯起 吊橋 。
徐晃啊 騎住 馬 飛噉 衝緊嚟 ，一下 收唔住 腳 直 衝到 護城河 邊 。
徐晃 大聲 噉嗌 ：反賊 孟達 ！及早 投降 啊 ！
孟達 好 嬲 啊 ， 開弓 射 佢 𠻘 噉 一箭射 正 徐 晃 嘅 額頭 ， 跌 咗 落馬 。
魏兵 就 連忙 搶救 佢 回 營 ， 噉 城上 又 猛 咁 射箭 落 嚟 ， 魏兵 就 退走 啦 。
孟達 正話 想 打開 城門 帶 兵 去 追殺 ，點知 就 喺 呢個 時候 ，司馬懿 大軍 嚟到 喇 。
孟達 長歎 一聲 話 ：啊 ！果然 不出 孔明 所料 啊 ！
於是 閂實 城門 一 於 堅守 。
噉 欲知 後事 如何 啊 ，且 聽 下回 分解 。
