噉啊 話說 董荼 那 帶兵 去到 夾山峪 ，馬岱 就 出嚟 迎戰 啦 。
有啲 兵 啊 認得 呢個 蠻將 就係 董荼那 喇 ，就 講畀 馬岱 聽 ，話 佢 呀 ，係 畀 諸葛 丞相 捉過 嘅 ，收尾 釋放 返 如此如此噉 。
馬岱 縱 馬 上前 大聲 噉 鬧 佢 ：
哼 ！董荼那 ，你 呢個 忘恩負義 嘅 傢伙 ！
我哋 丞相 好心 放生 你 一條命 ，今日 你 又 試作 反 ，你 唔識 醜 㗎 ！
董荼 那 畀 馬岱 鬧 到 滿面 羞慚 ，冇 說話 好 講 ，冇 打 到 就 撤退 喇 。
馬岱 掩殺咗 一陣 呢 亦都 收兵 回營 。
董荼那 返到去 就 回覆 孟獲 話 ：馬岱 好 厲害 ，唔夠 佢 打 。
嘿！ 我 知道 ，你 ，係 受咗 諸葛亮 嘅 恩 ，所以 ，今日 ，你 唔 打 就 退返嚟 喇 。
嗯 ！你呀 ，係 賣陣之計 啊 ！
孟獲 嬲 到 火紅火綠 ，喝 人 啊 拉 董荼那 出去 殺頭 。
好彩 得 嗰班 酋長 苦苦 勸諫 求情 ，先至 免咗 一死 啊 。
孟獲 話 喇 死罪 免去 就 活罪 難 饒 ，嗌 啲 武士 將 董荼那 痛打 一百 大棍 ，打到 囉柚 開花 先至 放佢 返去 自己 嘅 營寨 。
事後 呢 ，好多個 酋長 啊 都 走嚟 探望 董荼那 喎 。
佢哋 話 喇 ：我哋 一直 都 居住 喺 蠻荒 ，從來 都 未 侵犯過 中國 ，中國 ，亦 冇 侵犯過 我哋 。
而家 ，都係 因為 孟獲 恃勢 嚟 威逼 ，我哋 不得已 先至 跟埋 佢 作反 嘅 啫 。
而家 睇嚟 ，孔明 神機 莫測 ，曹操 、孫權 尚且 都 怕晒 佢 嘅 ，何況 我哋 啲 蠻人 吖 。
仲有 添 噃， 我 哋 都 受過 佢 活命之恩 嘅 ， 冇 乜嘢 好 報答 佢 嘞 。
不如噉啦 ，至多 拼咗 呢條命 ，殺咗 孟獲 然後 去 投降 孔明 ，免致 百姓 受苦 都好吖 。
董荼那 話 喇 ：你哋 係 唔係 個個 都 係 噉 諗 㗎 ？
嗰啲 畀 孔明 釋放 返嚟 嘅 酋長 呀 ，一齊 大聲 話 ：係啊 ，去啦 ！
好 ，跟 我 嚟 ！
董荼那 都 唔顧得 棍傷 咯 ，一手 揦起 把 鋼刀 ，帶住 百幾個 人 一直 走去 大本營 。
當時 孟獲 正 係 飲醉酒 ，喺 帳篷 裏 便 瞓 到 噘噘聲 。
董荼那 帶住 大家 直衝 入去 。
帳篷門口 有 兩個 將官 喺度 守衛 嘅 ，董荼那 用 把 刀 指住 佢 兩個 話 ：
你哋 亦 係 受過 諸葛丞相 活命 之恩 嘅 ，而家 係 你哋 報答 嘅 時候 喇 。
係 ， 係 ， 唔 使 將軍 你 逳 手 啊 ， 等 我 哋 生擒 孟獲 ， 去 獻 畀 丞相 啦 。
於是乎 大家 一齊 湧入 帳篷 ，將 孟獲 呀 好似 扎 粽 咁 紮 啊 扎到 實一實 ，拉咗 佢 去 瀘水 邊 ，然後 就 坐 船 過咗 去 北岸 。
先不先就 派 個人 去 報告 孔明 ，話 捉到 孟獲 嚟 喇噉 。
孔明 呢 ，早就 得到 間諜 嘅 報告 知道咗 呢件事 嘞 。
就 秘密 噉 傳令 落去 ，吩咐 各個 營寨 嘅 將士 啊 ，整頓 好啲 軍器 物資 。
然後 呢 先至 叫人 請 為首 嘅 酋長 ，押 孟獲 入嚟 。
其餘嘅 人 呢 ，都 叫 佢哋 返去 本寨 聽候 命令 。
董荼那 最先 入去 中軍帳 拜見 孔明 ，噉啊 將 生擒 孟獲 嘅 經過 報告 咗 。
孔明 重重噉 獎賞佢 ，同 佢 講咗 好多 好說話 慰問咗佢 一番 ，又 叫 董荼那 帶 嗰班 酋長 返 扯 。
然後呢 ，就 叫 刀斧手 拉 孟獲 入嚟 嘞 。
孔明 一見到 孟獲 就 笑喇 ：哈哈哈哈哈 ，你 以前 講過 ，話 再 畀 我 捉到 就 服輸 投降 㗎喇 ，今日 點 啊 ，啊 ？哈哈哈哈哈哈 。
呢啲 ，又唔係 你嘅 本事 ，不過 ，係 我 手下 嘅 人 ，自傷 殘害 ，搞成 噉 咋嘛 。
我 ，一啲 都 唔 服 啊 ！
唔服呀 ？噉 而家 我 再 放 你 返去 好唔好 啊 ？
好啊！ 我 ，雖然 係 個 蠻人 ，我亦都 頗 知 兵法 。
若果 ，丞相 真係 肯 放 我 返去 呀 ，我就 帶 兵 ，嚟 同 丞相 你 ，再 決 勝負 ！
若果 ，丞相 下次 ，再 捉到 我 呢 ，我 就 真心實意 投降 ，點都唔變喇 ！
嗱 ，下次 再 捉到 你 ，如果 你 又 唔服 呢 ，我 就 唔 寬恕 你 㗎 喇 。
人 嚟 ！同 佢 鬆綁 。
孔明 叫 人 同 孟獲 解開 啲 繩 ，仍然 學似 上次 噉 攞 酒菜 嚟 款待 佢 ，就 叫 佢 喺 中軍 帳 裏 便 坐 。
孔明 話 喇 ：我 自從 一 出 茅廬 ，戰 無 不勝 攻 無 不克 。你 呢啲 蠻邦 嘅 人 點解 唔 服 啊 ？嗯 ？
孟獲 粒聲 唔出 噃 。
好啦噉就 ，飲完酒嘞 ，孔明 就 叫 孟獲 騎 上 馬 ，同埋 佢 出去 四圍 噉 行 ，畀 佢 睇下 各個 營寨 所 儲備 嘅 糧草 軍器 。
孔明 指住 嗰啲 軍用物資 對 孟獲 話 喇 ：
你 唔 投降 我 呀 真係 個 蠢人 啊 你 。
我 有 咁 多 精兵 猛將 ， 咁 多 糧草 兵器 ， 你點 打得贏 我 嘅 呢 ？
你 如果 投降 呢 ，我 一定 稟奏 天子 ，使 你 保持 個 王位 ，子子孫孫 ，永遠 鎮守 蠻邦 ，你 意下 如何 吖 ？
我 ，就算 肯 投降 ，洞裏 便 啲 人 ，都 未曾 心服 㗎 。
若果 ，丞相 肯 放 我 返去 ，噉 ，我就 去 招安 本部 人馬 ，講到 佢哋 同心共意 ，噉 先至 投降 得㗎 。
噉就好極嘞 。孔明 好高興 ，同 孟獲 一齊 再 返去 中軍帳 ，又 試嚟 飲過酒 ，一直 飲 到 晚頭黑 ，噉 孟獲 先至 告辭 返去 。
孔明 親自 送佢 去到 瀘水 邊 ，用 船 送佢 回 營 。
孟獲 一 返到 營寨 呢 ，先 不先 就 搵 一班 刀斧手 ，喺 帳篷 附近 埋伏 好喎 。
跟住 又 派 個 心腹 人 去 董塗 那 、阿會 喃 嘅 營寨 ，話 孔明 派咗 使者 嚟 ，就 將 佢 兩個 氹 咗 嚟 ，殺 咗 佢哋 ，將 佢哋 嘅 屍首 掉 咗 落 隻 山坑 裏 便 。
噉 孟獲 就 隨即 派 自己 嘅 親信 將官 啊 ，把守 隘口 ，自己 帶領 一支 人馬 ，直出 夾山峪 要 同 馬岱 打過 。
點知 去到 嘅 時候 呢 ，哈 ，人影 都 唔見 一個 。
問下 附近 啲 土人 都 話 馬岱 嘅 軍隊 呀 ，喺 尋晚 黑 ，搬晒 啲 糧草 返咗 過去 瀘水 嗰 便 ，走咗 喇 噉 。
於是 孟獲 就 帶兵 返去 洞 ，同 佢 嘅 親細佬 孟優 商量 話 喇 ：
而家 ， 諸葛亮 嘅 虛實 ， 我 完全 知道 晒 喇 ，嗱， 你 去 噉 噉 噉 噉 噉 啦 。
孟優 依照 佢 大佬 嘅 計策 ，就 率領 百幾個 蠻兵 ，帶住 好多 金珠 、寶貝 、象牙 、犀角 之類 嘅 禮物 ，渡過 瀘水 ，直奔 孔明 嘅 大本營 。
佢哋 啱啱 過咗 河 ，忽然間 前面 鼓角 齊 鳴 ，一彪 人馬 衝出嚟 擺開 陣勢 。
為首嘅大將 係 馬岱 啊 ，嘿 嚇到 孟優 呀 驚晒 。
馬岱 問 清楚 佢 嚟 嘅 原因 ，就 叫 佢 喺 外便 等住 先 ，跟住 呢 就 派 人 去 報告 孔明 。
當時啊 ，孔明 正 喺 中軍帳 ，同 馬謖 、呂凱 、蔣琬 、費禕 等等 ，喺度 議論緊 平定 南蠻 嘅 事情 。
有人 嚟 報告 話 孟獲 派 咗 佢 嘅 細佬 孟優 ，嚟到 進貢 寶貝 啊噉 。
孔明 就 問 馬謖 嘞 ：你 知唔知 佢 嘅 來意 係 為咗 咩嘢 嘅 呢 ？
末將 唔敢 明講 ，不如 等 末將 寫 張 紙 處 交畀 丞相 ，睇下 合 唔合 丞相 嘅 意思 啦 。
好吖 。孔明 同意 喇 。
馬謖 就 用 張 紙 寫 好 畀 孔明 睇 。
孔明 睇 完 就 不禁 拍起 手 哈哈大笑 話 ： 哈哈哈 哈哈哈 ， 捉 孟 獲 嘅 計謀 我 已經 安排 好 㗎 喇 ， 你 嘅 意見 同 我 完全 一樣 啊 ， 哈哈哈哈 。
跟住 孔明 就 叫 趙雲 入嚟 ，喺 佢 嘅 耳仔 邊 ，吩咐 話 如此 如此噉 。
又叫 魏延 入嚟 ，亦都係 細細聲 噉 吩咐 一番 。
接住 又 叫咗 王平 、馬忠 、關索 入嚟 ，同樣 秘秘密密 噉 向 佢哋 交帶 任務 。
噉 各人 接受咗 命令 呢 就 分頭 去 做 嘞 。
安排妥當喇 ，噉 先 叫 孟優 入嚟 。
孟優 一 入到 中軍 帳 就 跪低 叩頭 行禮 佢 話 ：
家兄 孟獲 ， 好 感激 丞相 活命之恩 ， 無可 奉獻 啊 ， 只 係 準備 咗 一 啲 金珠 寶貝 ， 求其作 為 慰勞 軍隊 之用 啊 。
以後 ，另外 仲有 啲 禮物 進貢 畀 天子 嘅 。
孔明 話 ：你 阿哥 而家 喺 邊處 啊 ？
佢 為咗 感謝 丞相 嘅 大恩大德 ，去咗 銀坑山 準備 啲 珠寶 禮物 啊 ，等陣 就 嚟 㗎 嘞 。
你 帶咗 幾多 人 嚟 啊 ？
唔敢 帶 咁多 ，只係 百零 人 唧 ，都係 搬運 貨物 嘅 。
孔明 叫 佢哋 都 入嚟 睇下 ，嘩嗨 ！個個 都係 青眼珠 ，黑面皮 ，黃頭髮 ，紫鬍鬚 。
戴住 大金耳環 ，披頭散髮 除 大赤腳 ，手瓜 起展 身長 九尺 ，嗬好 厲害 㗎 ！
孔明 叫 佢哋 埋席 坐低 ，又 叫 啲 將官 向 佢哋 敬酒 ，款待 得 呀 十分 殷勤 。
孟獲 啊 邊度 係 去咗 銀坑山 吖 ，佢 喺 營寨 裏 便 等住 消息 就 真 。
呢 ，有 兩個 人 返嚟 喇 ，佢哋 向 佢 報告 話 ：
稟告 大王 ，諸葛亮 受咗 禮物 好 高興 啊 。
將 隨行 嘅 人員 ，請 晒 入去 中軍 帳 ，殺 牛 劏 羊 ，擺 酒 款待 啊 。
二大王 吩咐 我 返嚟 報告 大王 ，今晚 二更 ，裏應外合 ，一舉 打敗 諸葛亮 喎 ！
孟獲 一聽講 就 歡喜到 舞手舞腳 ，立即 下令 點起 三萬 蠻兵 ，分為 三隊 。
又 召集 各 洞 酋長 嚟 吩咐 佢哋 話 ：
個個士兵 ，都 要 帶齊 火種 ，今晚 ，去到 蜀軍 營寨 就 放火 為 號 。
我 ，親自 攻打 中軍 ，生擒 諸葛亮 啊 ！
噉嗰 班 酋長 蠻將 接受咗 命令 ，分頭 去 準備 。
到咗 黃昏 時候 ，就 帶 兵 出發 ，渡過 瀘水 去 襲擊 蜀軍 嘞 。
孟獲啊 親自 率領 百幾個 心腹 將士 ，直撲 孔明 嘅 大本營 。
一路上 ，都冇 遇見過 蜀軍 嘅 阻擋 喎 。
去到喇 ，孟獲 帶頭 縱馬 衝入去 ，咦 ？係 一座 空寨 ，一個人 都 唔見 。
孟獲 直撞 入到去 中軍 ，只見 中軍帳 內 燈火輝煌 ，孟優 同 一班 蠻兵 飲醉晒酒 ，碌晒 喺地 嚟 。
點解 呢喂 ？原來 啊 ，孟優 佢哋 中計 喇 。
孔明 吩咐 馬謖 同 呂凱 兩個 款待 孟優 佢哋 ，仲 搵咗 一班 人 嚟 奏 音樂 做 戲 添 喎 ，都 唔知 幾 熱鬧 ，又 猛咁 同 佢哋 敬酒 。
啲酒 裏頭 呀 都 放咗 藥 嘅 ，飲 到 個個 都 暈倒晒 ，醉到 呀 好似 死蛇 爛鱔 噉 。
孟獲 衝到 入去 逐個 咁 摮 ，終歸 就 摮醒 咗 一個 問 佢 ：
點知 嗰個 嘢 雖然 係 醒咗 啊 ，之 唔會 講 說話 喇 ，一味 指下 指下 把口 。
弊傢伙 ，孟獲 知道 中計 喇 ，急忙 救起 孟優 佢哋 呢班人 ，噉啊 正話 想 撤退 返去 中路 啦 。
遲咯 ！只 聽見 前 便 吶喊 連 天 ，火光 沖 天 而 起 。
嘩 ！走咯 啲 蠻兵 冇 理 咁多 ，紛紛 各自 逃跑 嘞 。
呢個 時候 ，一彪 軍馬 殺到 ，為首 大將 乃係 王平 啊 。
孟獲 驚嘞 ，急急 趯去 左路 。
咦呀 ！火光 熊熊 ，又 一彪 軍馬 殺到 ，為首 大將 乃係 魏延 ！
嚇到 孟獲 急忙 掉頭 就 趯去 右路 。
喎嗬殺啊噉只見火光一起 ，迎面又有一彪軍馬殺嚟嘞 ，為首大將係趙雲喇 ！
三路 大軍 夾攻 過 嚟 ， 打到 孟獲 冇 路 好 走 ， 就 唯有 撇低 啲 蠻兵 ， 單人 匹馬 就 向 住 瀘水 逃跑 。
跑到去河邊 ，咁啱啊 見到 喺 河上 有 幾十個 蠻兵 撐住 隻 船 噃 。
孟獲啊 大聲 嗌 隻 船 撐埋 岸 搭佢 。
點知道佢牽住匹馬 ，啱啱落咗船 唧 ，一聲號令 ，㗾噉 ，孟獲 就 畀 船上啲人 捉住 嘞 。
咦 ，咩嘢 一回事 啊 ？
哈哈 ，原來 係 馬岱 佢 依照 孔明 定 落 嘅 計謀 啊 ，帶住 一班 兵士 ，扮成 蠻兵 噉樣 喺 呢度 撐住 隻 船 ，睺住 孟獲 ，氹 佢 上 船 就 將 佢 捉住 嘞 。
噉 當晚 打 輸咗 嘅 蠻兵 ，絕大部分 都 投降 喇 。
孔明 就 傳令 落去 一個 都 唔準 殺害 ，而且 要 好好地 招呼 佢哋 添 。
同時 呢 ，就 吩咐 啲 人 快啲 去 救熄 啲 火 。
過咗一陣 ，馬岱 捉住 孟獲 嚟喇 ；
趙雲 捉住 孟優 嚟 喇 ；
魏延 、馬忠 、王平 、關索 呀 捉住 各 洞 酋長 嚟 喇 。
孔明 指住 孟獲 話 ：你 叫 你嘅 細佬 帶 啲 禮物 嚟 詐降 ，點 瞞得過 我 㗎 ？
哈哈哈哈 ，你 呢次 又 畀 我 捉住 嘞噃 ，你 服 啦 嘛 ？
呢啲 ，都係 皆因 我 細佬 為食 之故 啫 ，一時 中咗 你 嘅 毒 ，所以 ，誤咗 大事 咋嘛 。
如果 ，係 我 自己 嚟 ，我 細佬 呢 ，喺 外便 ，帶 兵 嚟 接應 ，就 必定 成功 嘅 。
呢啲 ，係 個 天使 我 失敗 ，唔係 我 ，冇 本事 啊 ！我 真係 唔服 啊 ！
唔服 ？計埋 呢次 係 三次 咯喎 ，點解 仲 唔服 啊 ？嗯 ？
哼 ！孟獲 耷低頭 唔出聲 。
噉呀 ，哈哈哈哈 ，我 再 放 你 返去 啦 。
係唔係啊？ 好！ 丞相 ，如果 肯 放 我 兩 兄弟 返去 ，我 就 出 齊 人馬 ，同 丞相 你 ，大戰 一場 。
嗰陣時 ，丞相 如果 再 捉到 我 ，我 ，就 死心塌地 ，噉 投降 喇 ！
如果 再 畀 我 捉到 你 呢 ，就 唔會 輕易 饒恕 你 㗎 喇 ，你 要 小心 在意 至好 啊 。
你 返去 好好地 讀 下 啲 兵書 ，整頓 好 你 嘅 親信 將士 ，諗定 好 計策 ，免致 將來 後悔 啊 。
人 嚟 ！同 佢 鬆綁 。
孔明 叫 人 解開 孟獲 嗰啲 繩索 ，就 放 佢 起身 。
同時 呢 ，連 孟優 以及 各 洞 酋長 啊 一齊 都 放晒 。
孟獲 佢哋 叩 幾個 頭 ，多謝 過 孔明 就 返去 嘞 。
呢個 時候 呢 ，蜀兵 已經 渡過 咗 瀘水 㗎 喇 。
孟獲 佢哋 一 過咗 瀘水 ，只見 蜀兵 喺 岸邊 擺開 隊伍 ，陳兵 列 將 旗幟 招展 。
孟獲行 到 軍營 前 便 ， 馬岱 高高在上 噉 坐響 處 ， 用 把 劍 指住 孟 獲話 ：
下次 再 捉到 你 ，就 冇 咁 易 放 你 走 㗎 喇 ！
係 ，係 ！
孟 獲 佢 哋 返 到 自己 嘅 營寨 嘅 時候 啊 ， 衰喇 ！ 原來 趙雲 早就 攻佔 咗 呢 個 營寨 嘞 ， 人馬 都 擺齊 喺 處 ， 都 唔 知 幾 威武 啊 。
趙雲 坐 喺 大旗 下 便 按住 把 劍 話 ：
孟獲 ， 丞相 噉 樣 嚟 對待 你 ， 你 唔 好 忘記 丞相 嘅 大恩大德 啊 。
係 ，係 ，係 ！
等到 孟獲 佢哋 行到 界口 山坡 嗰度 ，魏延 率領住 一千 名 精兵 ，喺 山坡 上面 排開 陣勢 。
魏延 騎住 匹 高頭大馬 企定 喺 處 大聲 噉 話 ：
我 今日 已經 深入 你 嘅 巢穴 ，奪取咗 你啲 險要 地方 。
而 你 呢 ，竟然 仲 愚蠢 不堪 ，要 抗拒 大軍 。
你 聽住 ，下次 捉到 你 ，就 碎尸萬段 決不 輕饒 ！
係喇 ！孟獲 佢哋 抱頭鼠竄 ，趯 返去 蠻洞 啊 。
呢 ，有 詩 為 證 啊 ：
五月 驅兵 入 不毛 ，月明 瀘水 瘴煙 高 。誓 將 雄略 酬 三顧 ，豈 憚 征 蠻 七 縱 勞 。
而家 講 下 孔明 ，佢 率領 軍隊 渡過 咗 瀘水 ，安好 營寨 之後 呢 就 大賞 三軍 。
佢 召集 所有 個 將官 嚟到 中軍帳 ，對 佢哋 講 ：
第二次 捉到 孟獲 嘅 時候 呢 ，我 呀 特登 帶 佢 去 各個 營寨 參觀 ，我 就係 想 佢 嚟 劫 營 啊 。
我 知道 孟獲 此人 ，都 懂 啲 兵法 嘅 。
我 喺 佢 面前 炫耀 我軍 有 咁多 糧草 物資 ，就係 要 等 佢 睇出 我哋 嘅 破綻 ，噉 佢 必定 會 用 火攻 嘅 。
佢 叫 個 細佬 嚟 投降 ，係 想 嚟 做 內應 嘅 啫 ，噉 果然 係 啦 。
哈哈哈 ，我 三次 捉到 佢 都 唔 殺 ，主要 嘅 ，係 想 使到 佢 個 心服 ，而唔係 想 消滅 佢 嘅 種族 啊 。
今日 我要 講明 畀 各位 聽 ，各位 要 不辭勞苦 ，全心 報國 啊 。
眾將官 聽咗 都 一齊 下拜 ：丞相 智 仁 勇 三樣 齊全 ，即使 係 姜子牙 同 張良 都 及唔上 啊 。
哈哈哈哈哈 ，唔能夠 噉 講 。
我 點 能夠 話 同 古人 相比 吖 ，都係 全靠 各位 嘅 力量 先至 取得 成功 嘅 啫 。
哎呀 孔明 噉樣 一 講 呀 ，眾位 將官 個 心 真係 好似 大暑天 時 就 飲咗 杯 冰凍 蜜糖水 噉 又 甜 又爽 啊 。
而家 講 下 孟獲 ，佢 受 咗 三次 被擒 嗰啖 氣 呀 ，嬲爆爆 噉 返到去 銀坑洞 。
立即 派出 心腹人 ，帶咗 好多 金銀珠寶 ，去 八番 九十三甸 等等 地方 ，與及 蠻荒 部落 借 兵 呀 。
借咩嘢兵呢 ？係使 藤牌 單刀 嘅 凶神惡煞 兵 啊 ，總共 借咗 幾十萬 。
噉啊過咗一段時候呢 ，各隊人馬 嘻嘻冚冚 就 雲堆霧湧 ，嚟到 報到 ，聽候 孟獲 指揮 調用 嘞 。
呢 件 事 呢 ， 自然 有 偵察兵 呀 探聽到 就 去 報告 孔明 啦 。
孔明 高興 喇 佢 話 ：我 正係 想 蠻兵 有 咁多 嚟 咁多 ，等 佢哋 見識 下 我 嘅 本事 啊 。
噉孔明就坐住架車 ，帶住 幾百個 馬軍 親自 去 探路 視察 地形 嘞喎 。
呢一日 ，孔明 佢哋 嚟到 一笪 地方 ，前便 有 一條 河 ，叫做 西洱河 。
呢條 河 呢 ，佢 嘅 源頭 係 出於 雲南省 ，劍村縣 北便 嘅 羅谷山 ，就 一直 向南 就 流入 洱海 ，再 流入 去 漾濞江 。
而家 呢 ，係 喺 雲南省 大理 ，白族自治州 嘅 境內 嚟 嘅 。
噉 當時 孔明 見到 呢條 河 嘅 水勢 啊 ，雖然 係 比較 緩慢 ，但係 一隻 船 都 唔 見 喎 。
就 命令 士兵 斬 樹 ，扎 木 排 嚟 渡河 ，哈哈 ，點 知道 啲 木 一 放 落水 呀 ，你 估 點 吖嗱 ，唔係 浮 嘅 係 沉底 嘅 。
孔明 就 問呂凱 喇 ， 呂凱話 ： 聽聞 西洱河 上游 有座 山 ， 山上 好多 竹 。
啲 竹 呀 好 粗大 ，請 丞相 派 人 上 山 斬 竹 ，搭 一道 竹橋 畀 軍馬 過 啦 。
孔明 立即 調 三萬人 入 山 ，斬咗 幾十萬 支 竹 ，順水流 放 落嚟 。
就 選擇咗 一處 河面 比較 窄 嘅 地點 ，搭起 一座 啊 十幾丈 長 嘅 竹橋 ，跟住 呢 就 將 大軍 調 到 嚟 河 嘅 北岸 。
沿岸 安營扎寨 ，就 以 河 作為 壕塹 喇 ，浮橋 作為 門戶 。
舂實啲泥 做 城牆 ，然後 就 過 橋 去到 南岸 ，一排 噉 建立咗 三個 大兵營 就 等住 啲 蠻兵 嚟 。
好喇 ，孟獲 佢 率領住 幾十萬 蠻兵 ，唂住 成肚 怒氣 嚟到 咯喎 。
呢日 ，就嚟到 西洱河 喇 。
孟獲 帶住 前鋒部隊 一萬 兵 凶神惡煞 嘅 藤牌兵 ，直逼 前寨 挑戰 。
只見 孔明 頭戴 綸巾 ，身披 鶴氅 ，搖住 把 鵝毛扇 ，坐住 架 四匹 馬 拉 嘅 車 。
由 一群 將官 簇擁住 出 到 陣前 ，孔明 一眼 望過去 咦 ，今日 孟獲 嘅 打扮 亦 十分 威風 啊 。
只見 佢 身穿 犀皮甲 ，頭戴 朱紅盔 ，左手 挽住 個 藤牌 右手 執住 把 鋼刀 ，騎 匹 赤牦牛 ，個 口 呀 嘰裡呱啦 噉 猛咁 鬧 。
佢 手下 嗰 一萬 名 蠻兵 ，舞住 藤牌 刀 啊 跑來 衝去 。
孔明 急忙 下令 啊 退返 入 營寨 ，四面 閂實 營門 唔準 出去 迎戰 。
當時 嗰啲 蠻兵 都係 赤身露體 嘅 ，光捋捋 噉 啊 一直 衝 到 寨門 前面 大叫 大罵 。
蜀軍 嘅 將官 都 憤怒 到 不得了 ，紛紛 去 見 孔明 請求 出戰 。
孔明 又 唔 畀 ， 大家 再三再四 噉 要求 ， 孔明 就 話 喇 ：
呢 啲 蠻荒 嘅 人 呀 都 係 未開化 嘅 ， 今日 佢 哋 剛剛 嚟 到 ， 正 係 又 狂 又 惡 ， 唔 好 去 同 佢 哋 打住 啊 。
我哋 堅守 幾日 先 ，等 啲 蠻兵 冇 咁 猖狂 喇 ，我 自然 有 妙計 破 佢 㗎 喇 。於是 蜀兵 就 堅守咗 幾日 。
呢一日呢 ，孔明 行 上 個 山坡 上面 觀察 下 ，見到 啲 蠻兵 已經 疲沓 咗 好多 喇 ，就 返落嚟 召集 啲 將官 話 ：
你哋 係唔係 想 出去 打 啊 ？
大家 梗係 話 想 啦 。
孔明 首先 叫 趙雲 同 魏延 過嚟 ，喺 佢哋 耳仔邊 細細聲 ，吩咐 話 如此如此噉 ，兩個 接受咗 命令 就 先行 出發 喇 。
接住 又 叫 王平 、馬忠 嚟 ，如此 這般 噉 細細聲 交帶 一番 ，佢 兩個 又 去咗 喇 。
又叫 馬岱 嚟 吩咐 佢 話 ：我 而家 要 放棄 南岸 呢 三個 寨 ，退 過去 河北 。
部隊 一 撤退 完 呢 ，你 就 拆咗 浮橋 ，移去 下游 嗰 便 ，接 趙雲 、魏延 嘅 兵馬 過河 嚟 接應 啦 。馬岱 接受 咗 命令 就 出發 。
最後 ，又 叫 張奕 嚟 話 ：軍隊 撤退 之後 啊 ，營寨 裏 便 要 點 多啲 燈火 ，等 孟獲 知道 咗 之後 呢 佢 必定 會 嚟 追 嘅 ，你 呀 截斷 佢 嘅 後路 啦 。
得令 ！張翼 去咗 喇 。
佈置妥當之後 ，孔明 只係 留返 關索 嚟 保護 佢 ，上咗 車 ，帶住 軍隊 撤退 。
蜀兵 撤走晒 就 留返 三個 空寨 ，裏 便 點着 晒 燈火 。
哈果然喎 ，啲 蠻兵 望見 呢 當晚 就 唔敢 嚟 打 。
到咗 第日 天光 之後 ，孟獲 帶住 大隊 蠻兵 直衝 到 蜀兵 營寨 嘅 時候 呢 ，噉 先至 發現 原來 係 空 嘅 冇 到 人馬 ，只係 掉落 幾百 架 糧車 唧 。
孟優 就 話 喇 ：諸葛亮 放棄 營寨 趯 走咗 ，莫非 佢 有 咩嘢 詭計 ？
孟獲 話 喇 ：哼 ！我 諗 啊 ，諸葛亮 ，掉低 輜重 走咗 ，實係 呀 ，佢 國內 有 緊急 嘅 事 啊 。
唔係 東吳 嚟 打 佢哋 ，就係 魏兵 嚟 侵犯 喇 。
所以 ，佢 就 點多啲 燈火 ，虛張聲勢 ，作為 疑兵 ，放棄晒 糧草 物資 返 扯 啊 。
我哋 ，快啲 去 追 ！大好機會 唔好 錯過 啊 。
於是 孟獲 親自 率領 前鋒 ，一直 追到 去 西洱河 邊 。
咦 ，望見 北岸 嗰 便 ，蜀軍 嘅 營寨 裏頭 旗幟 齊整 ，刀槍 鮮明 ，沿住 河岸 一帶 呀 都 築起 城牆 嘅 。
啲 蠻兵 見到 噉樣 就 唔敢 前進 嘞 。
孟獲 就 同 佢 個 細佬 話 ：哼哼 ，我 知 喇 ，實係 ，諸葛亮 ，怕 我 追 佢 ，故此 ，就 喺 北岸 逗留 一下 ，唔使 三兩日 呀 ，佢 實 走人 㗎 喇 。
噉 孟獲 就 命令 啲 蠻兵 ，喺 岸邊 駐扎 ，又 派 人 上山 去 斬 竹 做 竹排 ，準備 渡河 。
同時 呢 ，將 啲 精兵 啊 部署 喺 營寨 嘅 前便 。
哈哈哈 ，佢 都 唔 知道 呀 ，原來 蜀兵 早就 入咗 佢 孟獲 嘅 境界 喇 。
各位 想 知道 後事 如何 啊 ，且 聽 下回 分解 。
