我哋 講到 陸遜 啊 用 火攻 ，打到 劉備 啊 趯咗 去 馬鞍山 啦 。
噉啊到咗第日 ，吳兵 又 四周圍 放火 燒山 。
驚到啲兵呀亂飚亂貢 ，劉備亦慌到滴滴震啊 。
忽然間 ，喺 火光 之中 有 個 將軍 帶住 幾個 人 殺上 山 嚟 ，一 睇 ，係 關興 ！
關興 就 滾 鞍 落馬 ，跪 喺度 對 劉備 話 ：而家 四面 大火 ，就快 燒到 埋嚟 嘞 ，呢處 唔能夠 停留 喇 ！
陛下 快啲 去 白帝城 ，再嚟 收拾 殘兵 啦 ！
劉備 話 ：噉 邊個 斷後 啊 ？
傅彤 話 喇 ：臣 情願 死 都 要 頂住 敵兵 呀 ！
呢個 時候 ，已經 係 黃昏 ，佢哋 喇喇聲 上馬 ，關興 在 前 ，張苞 居中 就 留 傅彤 斷後 。
噉啊 保住 劉備 殺 落山 突圍 走人 。
吳兵 見到 劉備 逃跑 ，得米咯 ！人人 都 要 爭功 啊 ，遮天蓋地 ，跟住 尾 向住 西 便 猛追 。
劉備啊 叫 啲 兵 除 晒 啲 袍甲 ，堆晒 喺 啲 窄路 處 燒着 佢 ，用 噉 嚟 攔住 啲 追兵 噃 。
正喺度逃跑緊 ，喎嗬殺啊 ！東吳 大將 朱然 帶住 一支 人馬 ，喺 江岸邊 殺嚟 截住 去路 。
劉備 大聲 噉 嗌 ：孤王 今日 實 死 喺 呢處 嚟 喇 ！
關興 、張苞 啊 殺到 眼 都 紅晒 ，縱馬 搏命 想 衝開 條 路 ，但係 幾次 都 畀 吳兵 亂箭 噉 射返 轉頭 。
兩個人 都 負咗 重傷 ，已經 冇力 再 殺出去 。
唉死喇死喇 ，後便 嘅 吶喊聲 呢 又 響起嚟 嘞 ，係 陸遜 親自 率領 大軍 由 山谷 嗰便 追殺 過嚟 啊 ！
劉備 正在 又 慌又急 ，呢陣時 呢 ，天色 已經 微微 有啲 光 喇 。咦 ？只 聽見 前便 喊殺 連 天 。
朱然軍隊 嘅 兵卒 啊 零零林林 跌落 山崖 就 鬼哭神嚎 喎 。
嘿 呀 ！ 謝天謝地 啊 ！ 有 一彪 軍隊 殺入 嚟 救駕 咯 ！
劉備 個 心 定返啲 喇 ，一 睇 ，得 ！係 常山 趙子龍 啊 ！
噉啊趙子龍點嚟嘅呢又 ？原來趙雲喺西川江州嚟 。
佢 就 聽聞 吳蜀 開戰 ，就 帶兵 過嚟 啦 。
呢一日 ，佢 見到 東南方 一帶 火光 沖天 ，趙雲 就 有啲 心驚 ，派人 去 探聽 一下 。
點知 係 劉備 被困 喎 ，所以 就 奮勇 衝殺 過嚟 救駕 。
陸遜 一 聽聞 係 趙雲 嚟到 ，哼咪喇 ，急急 下令 撤退 啊 。
趙雲 喺 度 衝殺 緊 ， 遇 啱 朱然 ， 兩個 一 交鋒 唧 ， 打 咗 一個 回合 ， 一槍 就 刺 咗 朱然 落馬 ， 噉 啊 殺 散 咗 啲 吳兵 ， 噉 啊 救出 咗 劉備 向 住 白帝城 逃跑 。
劉備 話 ：朕 雖然 脫險 喇 ，咁多 將士 點算 呢 ？
趙雲話 ：敵軍 追緊嚟啊 ，呢處 唔停留得 ，陛下 快啲 去 白帝城 休息 先 ，臣 再 帶兵 去 救 其他 嘅 人 啦 。
呢個 時候 呀 ，劉備 僅僅 得返 百零人 跟 佢 入 白帝城 咋 。
而家 講下 傅彤 ，佢 拼死 斷後 ，就 畀 吳軍 八面 圍 實 。
丁奉 大聲 噉 喝佢 ：你哋 啲 川兵 死 嘅 死 ，投降 嘅 投降 。
你嘅 主公 劉備 啊 ，已經 畀 我哋 捉咗 喇 ！而家 你 已經 山窮水盡 喇 ，仲 唔 投降 等 幾時 啊 你 ！
呸 ！我 係 堂堂 漢朝 大將 ，投降 你哋 吳狗 都有 嘅 咩 ！
傅彤 挺槍 縱馬 ，帶領 蜀兵 搏晒命 噉 死打 ，左衝 右突 衝唔出去 。
最後 ，傅彤 長歎 一聲 ：啊 ！我 呢趟 死喇 ！啊 ！誒 ！口吐鮮血 ，噉 就 死 喺 吳兵 重重 嘅 包圍 之中 。
噉啊嗰位 參謀 程畿 呢 ，佢 單人匹馬 ，飛跑 去到 江邊 就 通知 水兵 快啲 去 打 啦噉 。
吳兵啊 跟住 佢 尾 追住嚟 ，啲 水軍 就 唔敢 打 喎 四散 咁 逃跑 。
有人 大聲 嗌話 吳兵 追 嚟 喇 ，程將軍 你 快啲 逃命 啦 ！
程畿真 嬲 啊 佢 話 ：我 跟隨 主上 行軍 打仗 咁 耐 啊 ，未 試過 臨陣 逃跑 㗎 ！
說話 未完 ，吳兵 㗾㗾聲 圍過嚟 ，四面 都 冇 路 好 走 ，結果 程畿 用 把 劍 自殺 而 死 。
當時 ，吳班 、張南 係 圍攻 彝陵城 好耐 㗎喇 。
突然 馮習 趯 到 嚟 話 打敗 咗 仗 喇 噉 ， 噉 啊 帶兵 去 救 劉備 啦 。
因為噉樣呢 ，困住 喺 彝陵城 裏頭 嘅 吳軍 將領 孫桓 就 甩身 嘞喎 。
張南 、馮習 正在 行進緊 ，前便 撞到 吳兵 殺嚟 ，背後 呢 ，孫桓 又 喺 彝陵城 殺出嚟 反攻 嘞 ，兩面 夾住 嚟 打 。
噉啊張南 、馮習 搏命 噉 衝 都 衝唔出 ，結果 呢 就 死 喺 亂軍 之中 。
吳班啊好彩 ，畀佢殺出咗包圍圈 ，噉又得到趙雲接應 ，佢呢亦走咗去白帝城 。
嗰位 蠻王 沙摩柯 啊 ，打剩 佢 一個人 ，飛馬 逃跑 喺 半路 撞到 周泰 ，大戰咗 二十幾個 回合 ，就 畀 周泰 殺咗 。
杜路 同 劉寧 呢 ，就 投降咗 東吳 。
蜀 軍營 寨 所有 嘅 糧食 啊 物資 啊 半點 都 冇 得 剩咯 。
噉 蜀軍 嘅 將士 呢 ，唔係 戰死 嘅 就係 投降 㗎 喇 。
當時 孫夫人 就 喺 東吳 建業城 ，佢 聽聞 劉備 喺 猇亭 大敗 ，又 有 謠言 話 劉備 已經 死於 亂軍 之中 喇噉 。
嗰日 孫夫人 就 坐車 去到 江邊 ，向住 西 便 痛哭 一場 ，就 投水 死咗 。
唉 ，劉備 呢 一場 仗 啊 輸得 慘 咯 ，全師 盡 墨 啊 ！
有咩辦法呢 ？忠言逆耳 唄唔聽人勸喇 ，一意孤行 結果就係噉嘅咯 。
而家 就 講下 陸遜 ，佢 大獲全勝 ，就 馬不停蹄 指揮 軍隊 乘勝 向住 西便 展開 追擊 。
噉啊 當 陸遜 帶兵 嚟到 離夔關 冇 幾 遠 嘅 地方 啊 ，咦 ？見到 前便 依 山傍水 嗰處 ，一浸 殺氣 沖天 而起 喎 。
陸遜 呀 即刻 勒定 馬 ，擰轉頭 對 嗰 班 將官 講 ：
前便 一定 有 埋伏 ，傳令 三軍 停止 前進 ，立即 後退 ！
喇喇聲 ，就 退後 十幾里 ，選擇咗 一笪 空闊 嘅 地方 ，排開 陣勢 就 準備 迎擊 敵軍 嘞 。
同時 呢 ，又 派出 哨馬 去 前便 偵察 。
過咗一陣 ，哨馬 返嚟 報告 ，話 前便 並冇 敵軍 駐扎 啊噉 。
陸遜 諗 點 會 呢 ？唔信 ！落咗 馬 親自 上去 高頂 遼望 ，一 睇 ，咦 ？殺氣 又 起 喇 ，係 有人 埋伏 ！
陸遜 就 再 派 人 去 仔細 偵察 下 ，哈 點知 返嚟 報告 話 一 人 一 馬 都 冇 。
呢個 時候 ，一輪 紅日 就 快 落山 ，嘩嗨 ！前便 啲 殺氣 呀 越發 厲害 ，個 心 啊 非常之 奇怪 。
呢次 又 派 佢 個 心腹 衛士 再 去 偵察 ，噉 啊 返嚟 報告 啊 ，話 人馬 確實 冇 見到 喎 。
之 喺 江邊 呢 ，就 有 八九十 堆 石頭 ，亂 咁 堆 喺 處 唧噉 。
奇怪到極喇 ，陸遜 就 吩咐 搵 幾個 當地 老百姓 嚟 問下 。
過咗冇幾耐 ，搵咗 幾個人 返嚟 ，陸遜 就 問 佢哋 話喇 ：
呢處 叫做 咩嘢 地方 ？
回回 稟 大人 ，誒 呢處 嘅 地名 叫做 魚腹浦 啊 。
係咩嘢人 將 啲 石頭 堆成 一堆堆 ？點解 啲 亂石堆 裏 便 會 有 殺氣 沖起嚟 嘅 呢 ？
誒 ， 回覆 大人 ， 誒 ， 前 嗰 幾年 喇 ， 誒 諸葛亮 入 西川 嘅 時候 呢 ， 佢 呀 帶兵 嚟 到 呢 處 ， 就 搬 啲 石頭 喺 沙灘 上 便 ， 誒 ， 誒 排成 個陣 噉 樣 。
吖 ，噉 啊 從此之後 呢 ，就 時不時 都有 啲 煙 唔似 煙霧 唔似 霧 噉 嘅 雲 噉 嘅 嘢 ，噉 啊 喺 啲 石堆 裏 便 升起嚟 㗎 喇 。
哦 ？係咩 ？
陸遜 聽完 上返 馬 ，帶住 幾十個 馬軍 上前 去 睇下 呢個 石頭 陣 嘞 。
佢 勒定 馬 企 喺 山坡 上 便 ，放眼 一望 ，誒 ？係 喎 。
只見 嗰啲 石頭 呀 擺得 四面八方 ，都 係 有 門 有 戶 嘅 噃 。
陸遜 笑喇 ：哈哈哈哈哈哈 ，呢啲 都係 愛 嚟 呃人 嘅 嘢 ，冇 咩 嘢用 嘅 。
嚟 ！你哋 跟 我 行 入去 睇 下 。
陸遜 一拍 隻 馬 ，就 帶住 幾個 人 跑 落 山坡 ，直 入 石頭 陣 睇下 嘞噃 。
行咗 一陣間 ，部將 話 喇 ：個 天 就 黑嘞 ，請 都督 早啲 返去 啦 。
好啦 ！我哋 走 。
陸遜 正話 想 出陣 ，突然 翻起 一浸 狂風 拂 ！呼 ！霎時間 ，飛沙 走石 鋪天蓋地 。
嘩嗨 ！見到 啲 怪石嶙峋 ，好似 刀劍 噉 豎起晒 。
沙泥堆積 好似 一座座 山仔 噉 ，波浪 洶湧 十足 擂響 戰鼓 噉 聲 。
陸遜 驚 喇 ：我 中咗 孔明 之 計 喇 ！走 ！
急急 想 返 扯 ，弊喇 ！搵唔到 路 出去 添 。
正在 唔知 點好 個 時候 ，哈 ，忽然 見到 有 個 老人家 喺 佢 馬 前面 出現 。
嗰個 老人家 笑住 噉 問 陸遜 ：哈哈 將軍 ，誒 想 出 呢個 陣 係 嘛 ？
係呀 ！請 老人家 帶 我 出去 啦 。
得吖 。請 將軍 你哋 跟住 我 行 啦吓 。
老人家 扶住 支 拐杖 ，慢慢慢慢 噉 行 ，陸遜 佢哋 跟住 尾 。
哈哈 ！一啲 都 冇 到 阻滯 ，好快 就 行出咗 石陣 一直 行返 上 山坡 。
陸遜 就 問 喇 ：老人家 你 係 咩 人 ？尊姓大名 ？
老夫 乃係 諸葛孔明 嘅 岳父 黃承彥 啊 。
往日 ，小婿 入川 嘅 時候 喺 呢度 佈落咗 石陣 ，名叫 八陣圖 。
反覆 八個 門 ，就 按照 遁甲 、休 、生 、傷 、杜 、景 、死 、驚 、開 。
每日 每時 ， 變化多端 ， 嗨 可以 比得上 十萬 精兵 㗎 。
佢 臨 去 嘅 時候 曾經 吩咐過 老夫 ，佢 話 ，日後 有 個 東吳 大將 啊 ，就 會 迷 喺 陣 裏 便 嚟 嘅 ，誒 你 唔好 帶 佢 出嚟 啊 噉 。
老夫 剛 才 喺 山岩 上 便 ， 睇 住 將軍 由 死門 入陣 ， 就 估到 將軍 係 唔 識 呢 個 陣 㗎 喇 ， 實會 迷 喺 裏 便 嘅 。
老夫 生平 好善 ，唔忍心 睇住 將軍 死 喺 呢處 ，故此 行過嚟 帶 將軍 由 生門 出 陣 啦 。
哦？ 老先生 有冇 學過 呢個 陣法 呢 ？
變化 無窮 ，學唔到 㗎 。
啊 ！多謝 老先生 ！
陸遜 落馬 ，拜謝 黃承彥 啊 ，然後 帶住 大家 回營 嘞 。
呢後嚟 大詩人 杜甫 就 寫過 一首 詩 ：
功蓋三分國 ，名成八陣圖 。江流石不轉 ，遺恨失吞吳 。
而家 講下 陸遜 佢 返到 營寨 之後 ，佢 好 感慨 噉 話 ：孔明 真係 臥龍 啊 ，我 唔 及得上 佢 啊 ！於是 就 下令 班師 。
噉佢 左右啲人 就 問 陸遜 啦 ：都督 ，劉備 而家 兵敗 勢窮 ，困守 喺 白帝城 ，我哋 正好 趁勢 打 佢 至 係 㗎 。
但係 今日 都督 見到 個 石陣 就 撤退 喇 ，點解 啊 ？
我唔係因為害怕個石陣就撤退嘅 ，我係料到曹丕呢個人啊 ，佢嗰種奸詐詭譎 同佢父親冇乜兩樣 。
當佢知道 我 追擊 蜀兵 ，就必定 會 乘機 嚟 偷襲 。
我 如果 深入 西川 嘅 話 ，情勢 一 緊急 就 想 退 嗰陣 就 難 喇 。
於是 陸遜 就 命令 一員 將官 擔任 斷後 ，自己 又 統率 大軍 返 東吳 嘞 。
嘩真 係 啊 ， 退兵 都 未 到 兩日 呀 ， 三處 地方 派 人 嚟 飛報 話 ： 魏 兵曹 仁 出現 喺 濡 須 ， 曹休 出現 喺 洞口 ， 曹真 出現 喺 南郡 ， 三路 兵馬 總共 幾十萬 人 ， 大軍 壓境 唔 知 乜嘢 用意 噉 。
陸遜 就 笑瞇瞇 噉 話 ：哼哼 ，不出 我 之 所料 ，我 已經 派 咗 兵 去 抵擋 嘅 喇 。
噉啊 魏軍 兵分 三路 逼近 東吳 啊 ，呢件事 呀 等陣 再 講 。
而家 先 講返 下 劉備 呢位 漢中王 ，佢 喺 猇亭 大敗 之後 啊 ，就 趯咗 去 白帝城 吖 。
趙雲 就 帶住 一支 軍隊 喺度 保駕 。
呢一日 ，馬良 返到嚟喇 ，唉 見到 輸得 咁 淒涼 ，後悔到 極 啦 。
就 將 孔明 講 嘅 說話 稟奏 畀 劉備 聽 。
劉備 話 ：唉 ，朕 若果 早啲 聽 丞相 嘅 說話 呢 ，就 不至於 有 今日 嘅 失敗 咯 。
唉 ，而家 ，仲有 咩嘢 面目 返去 成都 ，見 呢班 文武大臣 呢 ？
劉備 決定 唔 返去 成都 ，就 喺 白帝城 駐扎 ，就 將 住緊 呢間 賓館 啊 改做 永安宮 。
啲 人 嚟 報告 話 馮習 、張南 、傅彤 、程畿 、沙摩柯 等等 ，都 喺 作戰 中 犧牲 嘞 。
唉 ，劉備 好 傷心 啊 ！
過咗幾日 ，有 個 侍臣 嚟 同 劉備 話 ：黃權 帶住 江北 啲 兵 投降咗 魏國 啊 ，陛下 將 佢 嘅 家屬 送去 官府 問罪 啦 。
劉備 話 喇 ：唉 ，黃權 畀 吳 兵 隔斷 喺 江北岸 嚟 ，想 返嚟 都 冇 路 咯 ，不得已 先至 投降 魏國 啫 。
係 朕 對 唔 住 黃權 ， 並非 黃權 對 唔 住 朕 啊 ， 何必 要 將 佢 啲 家屬 嚟 問罪 呢 ？
噉 啊 劉備 唔 淨止 冇 處分 黃權 嘅 家屬 ， 而且 仲 仍然 將 黃權 嘅 薪水 啊 照 畀 佢 哋 家屬 添 。
黃權 就 投降咗 魏國 ，噉 啊 去 拜見 曹丕 啦 。
曹丕 話 喇 ：將軍 今日 投降 孤王 ，係唔係 想 學 陳平 、韓信 噉 啊 ？
曹丕 噉樣 講 係 咩 意思 呢 ？
係噉嘅 ，陳平 同 韓信 呢 兩個 人 ，原來 都 係 楚霸王 項羽 嘅 部下 。
收尾 呢 都 離開咗 項羽 ，投奔 劉邦 ，就 卒 之 幫助 劉邦 消滅 咗 項羽 。
噉佢 兩個 呢 ，亦都 成為 漢朝 嘅 開國 功臣 。
黃權 聽 阿曹 丕噉樣 問佢 就 不禁 流起 眼淚 嚟 話 ：
臣 受 漢中王 極深 嘅 恩德 。
臣 喺 江北岸 ，統率 各路 軍隊 ，畀 陸遜 截斷 歸路 ，要 返 西川 已經 無路可走 。
投降 東吳 係 萬萬 不能 嘅 ，故此 就嚟 投降 陛下 。
敗軍之將 ，能夠 免死 就係 萬幸 ，仲 點 敢 學 古人 嘅 事 呀 ？
噉啊 黃權 帶 咁多 兵馬 投降 過嚟 ，曹丕 仲 係 極之 歡喜 嘅 ，要 封 佢 做 鎮南將軍 。
但係 黃權 呢 堅決 辭謝 ，唔肯 接受 。
有一日 ，曹丕 同 賈詡 、劉曄 噉 幾個 親信 大臣 商量 。
曹丕 話 ：朕 想 統一 天下 ，噉 先 去 消滅 西蜀 吖 ，定係 先 去 消滅 東吳 好 呢 ？
賈詡話 ：劉備 係 個 梟雄 ，頗 有 才幹 ，更兼 諸葛亮 善於 治理 國家 ；
孫權 呢 ，亦 甚 有 見識 ，陸遜 現時 喺 啲 險要 嘅 地方 都 駐扎 咗 軍隊 ，加以 東吳 嘅 地區 江河 湖泊 極 多 。
要打起上嚟 ，誒 西蜀 、東吳 都 唔 容易 啊 。
以 臣 睇嚟 呢 ，我哋 所有 嘅 將官 冇 一個 係 劉備 同 孫權 嘅 敵手 。
即使 陛下 御駕 親征 ，亦 未見得 有 十足 把握 嘅 。
所以 ，臣 認為 只宜於 保持 現狀 ，等待 佢 兩國 起 變化 唧 。
朕 已經 派遣 三路 大軍 去 攻打 東吳 嘞 ，點 會 打唔贏 呢 ？
劉曄 就 話 ：最近 ，陸遜 打敗 咗 蜀兵 七十萬 ，上下 齊心 ，士氣 大振 ；
更兼 有 江河 嘅 阻隔 ，想 制服 東吳 並非 係 一朝一夕 嘅 事 。
而且 ，陸遜 係 個 有計謀 嘅 人 ，佢 必定 有所 準備 㗎 。
嗯？ 你 以前 係 勸 朕 去 攻打 東吳 嘅 ，而家 又 勸 朕 唔好 去 嘞 ，點解 啊 ？
時勢 唔 同 啊 ， 陛下 。 過去 東吳 屢屢 敗 於 西 蜀 ， 兵勢 受到 挫折 ， 故此 可以 去 打 佢 。
現時 就 唔同 咯 ，大獲全勝 ，銳氣 百倍 ，噉 就 唔去 打得 㗎喇 。
朕 已經 揸定 主意 ，你哋 唔使 多講 。
曹丕 於是 決定 親自 率領 御林軍 ，去 接應 三路 兵馬 。
都未曾出發 ，就 得到 報告 話 ，東吳 已經 有咗 準備 ：
呂范 帶兵 頂住 曹休 ；
諸葛瑾 帶 兵 喺 南郡 頂住 曹真 ；
朱桓 帶兵 防守 濡須 ，頂住 曹仁 。
劉曄 話 喇 ：東吳 既然 真係 有 準備 ，去 呀 冇 好處 㗎 ，陛下 。
曹丕 唔聽 ，一於 帶兵 出發 ！
而家 講下 東吳 呢位 少年 將軍 朱桓 嘞 ，佢 現年 先至 係 二十七 歲 ，為人 呀 極 有 膽量 ，孫權 非常 之 喜歡 佢 。
當時 佢 統率 大軍 鎮守 濡須 ，佢 聽聞 曹仁 帶領 大隊 人馬 ，去 攻打 濡須 以 北 冇 幾 遠 嘅 羨溪 。
朱桓啊 ，就 調撥 絕大部份 嘅 兵力 ，去 防守 羨溪 ，而 只係 留低 五千 馬軍 啊 把守 濡須城 唧 。
呢一日 ，突然 得到 消息 ，話 曹仁 呀 派 佢 嘅 大將 常雕 ，同 諸葛虔 、王雙 ，率領 五萬 名 精兵 就 向住 濡須城 飛奔 而 嚟 喇噉 。
嘩 ，啲 兵卒 聽到 就 怕 啦 ！五千 對 五萬 啊 一 對 十 噃 ，講 玩 咩 ！
朱桓 好鎮定 ，亦 好嚴肅 啊 佢 按住 把 劍 噉 對 大家 話 ：
勝負 在於 將帥 ，不在 兵 嘅 多少 。
兵法 有講 ： 客兵 倍 而 主兵 半者 ， 主兵 尚能 勝於 客兵 。
今日 ，曹仁 千里 跋涉 ，人馬 疲困 。
而 我 同埋 大家 呢 ，共同 據守 高城 ，南 便 ，有 大江 作為 屏障 ，北 便 ，可以 靠住 險峻 嘅 大山 ，以逸待勞 以 主制 客 ：呢個 乃 係 百戰百勝 嘅 形勢 啊 。
就算 曹丕 親自 嚟 都 唔使 怕 佢 ，何況 係 曹仁 佢哋 呢 ！
於是 傳下 號令 ，吩咐 啲 兵卒 ，偃旗息鼓 ，裝成 冇人 把守 噉 嘅 樣 。
好喇 ，曹仁 嘅 先鋒 常雕 帶領 五萬 精兵 嚟 奔襲 濡須城 。
遠遠 望見 城 上 冇 人 守 個 喎 ，就 猛 催 啲 軍兵 快速 前進 咯 。
一直 跑 到 離城 不遠 ， 就 以 為 呢 次濡須 城 呀 可以 不費吹灰之力 攞 到手 嘞 。
點知道 轟噉 一聲 炮響 ，城頭 上 霎聲 下 豎起 晒 旗幟 刀槍 。
跟住 城門 大開 ，朱桓 橫刀 飛馬 衝出嚟 就 直取 常雕 。
打咗唔到 三個 回合 ，常雕 就 畀 朱桓 一刀 斬咗 落馬 就 做 個 無頭之鬼 嘞 。
吳兵啊 趁勢 衝殺 一陣 ，打到 魏兵 大敗 就 死咗 無數 咁 多人 。
曹仁 帶兵 隨後 趕到嚟 ，點知 畀 吳兵 喺 羨溪 殺出嚟 兜篤 一將 ，曹仁呀 輸 到 貼地 ，趯返去 見 曹丕 。
將 呢次 打敗仗 嘅 經過 啊 ，就 詳詳細細 報告 一番 。
曹丕 驚 喇 。
正喺度講緊 ，探馬 又 嚟 報告 話 ：曹真 、夏侯尚 圍住 南郡 ，畀 陸遜 埋伏 喺 城內 嘅 人馬 ，同 諸葛瑾 埋伏 喺 城外 嘅 人馬 內外 夾攻 因此 大敗 啊 。
說話 未 完 ， 探馬 又 報 喇 ， 報 ！ 稟告 大王 ， 曹休 亦 畀 呂范 殺敗 喇 ！
啊！ 曹丕 長歎 一 聲 ：朕 唔 聽 賈詡 、劉曄 嘅 說話 ，果然 失敗 咯 。
當時 正係 大暑季節 ，瘟疫 流行 ，馬步軍 呀 十成 死咗 六七成 。
曹丕 唯有 帶兵 返去 洛陽 喇 ，噉呢 ，吳 、魏 啊 就 從此 不和 喇 。
話分 兩頭 ，而家 講下 劉備 佢 喺 永安宮 得咗 病 ，一日 重過 一日 。
一路呢 ，就 病到 章武 三年 ，即係 公元 二二三年 嘅 四月 。
劉備啊 病到 手腳 四肢 都 唔係 點逳得 ，又 因為 想念 關羽 同 張飛 ，成日 咁 喊 ，噉 啊 病情 就 越發 重 。
佢 兩眼 昏花 ，見到 侍從 啲 人 都 覺得 好 討厭 。
有 一 晚 ，佢 叫 侍候 佢 嗰啲 人 行開 ，自己 啊 瞓 喺 張 龍床 處 。
忽然間 ，呼噉 一浸 陰風 吹過 ，將 盞燈 吹到 閃下閃下 。
咦 ，只見 燈影 之下 有 兩個 人 企 響處 。
噉啊劉備嬲嘞 ，佢話 ：朕心情唔好 ，叫你哋出去咯 ，又返嚟做乜嘢啊 ！
哈 ，叫極 都 唔行 噃 。
噉啊劉備趷起身睇下啦 ，哦 ！原來 上手便 嗰個 係 關羽 ，下手便 嗰個 係 張飛 。
劉備 大吃一驚 啦 佢 話 ：哎呀 ，兩位 賢弟 ，乜 原來 你哋 仲 響 處 呀 ？
關羽 話 ：臣 唔係 人 ，係 鬼 啊 ！
上帝 因為 臣等 兩人 ，平生 不失 信義 ，都 封咗 做 神 啊 。
大哥 同 小弟 相聚 嘅 時候 就 到 喇 。
二弟 呀 ！ 三弟 呀 ！ 劉備 喊住 想 掹 住 佢 哋 ， 忽然間 一下 扎醒 ， 關羽 、 張飛 都 唔 見 咗 嘞 。
就即刻嗌人嚟問下 ，當時 呢啱啱打過 三更 。
劉備 話 喇 ：唉 ，唉 ！朕 都 不久於 人世 咯 。
於是就 派 使者 去 成都 ，請 丞相 諸葛亮 、尚書令 李嚴 等等 大臣 ，火速 趕嚟 白帝城 永安宮 ，接受 遺命 。
孔明 一 接到 聖旨 ，就 留低 太子 劉禪 守 成都 。
自己啊 同 劉備 嘅 二仔 三仔 魯王 劉永 、梁王 劉理 ，日夜 趕路 去 永安宮 嘞 。
呢一日 ，孔明 嚟到 永安宮 見到 劉備 啊 已經 病危 ，連忙 喺 龍床 前面 跪低 叩頭 請安 。
劉備啊 叫 孔明 坐埋 嚟 龍床 嘅 旁邊 ，用 隻 手 震揗揗 噉 摸住 孔明 嘅 背脊 話 ：
朕 ，自從 得到 丞相 你 ，好 幸運 ，能夠 建立起 帝王 嘅 事業 啊 。
點知 ，自己 嘅 智識 淺陋 ，唔 聽 丞相 嘅 說話 ，自取其敗 。
誒 ，悔恨 都 遲咯 ，朕 ，就快要 死咯 。
太子 孱弱 ，不得不 請 丞相 你 嚟 ，將 大事 ，託付 畀 你 啊 ，丞相 ！
講完 ，劉備 淚流滿面 。
孔明 亦都 喊起上嚟 話 ：請 陛下 ，好好 保養 龍體 ，以 副 天下 之 望 啊 ！
劉備 唔 講 嘢 住 ，先 不 先用 雙眼 四圍 噉 望 ，佢 發現 馬良 嘅 細佬 馬謖 就 企 喺 一便 嚟 ，就 叫 佢 行 出去 。
馬謖 出咗 去 喇 ，劉備 就 對 孔明 話 ：丞相 ，你 覺得 馬謖 嘅 才能 ，點樣 啊 ？
陛下 ，呢個 人 亦 係 當代 嘅 英才 嚟 啊 。
唔係啊 ，朕 睇 呢個 人 ，言過其實 ，不能 重用 ，丞相 你 要 注意 至好 啊 。
各位 ，呢一段 講嘅 就係 白帝城 ，劉 先主 遺詔 託 孤兒 。
今日 就 夠鐘 喇 ，就 講到 呢處 先 。
究竟 劉備 仲有 咩 緊要 嘅 事情 要 交帶 孔明 嘅 呢 ？就 且 聽 下回 分解 。
