而家 講 啊 喺 建安 十八 年 正月 ，嗰陣時 春雨 連綿 就 河 湧 水 漲 。
曹軍 嘅 日子 呀 非常之 難捱 喇 。
呢一日 ，曹操 喺 中軍帳 同 嗰班 謀士 商量 。
有啲啊勸曹操收兵 ；
有啲 又 話 喎 喂 而家 正 係 春暖 噃 ，打落去 就 啱喇 唔好 撤退 啊 噉 。
曹操 啊 揸唔定 主意 。
正喺 呢個 十五十六 嘅 時候 ，東吳 有 個 使者 送 信 嚟 。
曹操 打開 封信 一睇 ，係 孫權 寫畀佢 嘅 。
封信 嘅 大意 呢 就 噉 ：
我 同 丞相 都 係 漢朝 嘅 臣子 。
丞相 你 都 唔 諗住 報國安民 ，而係 隨便 噉 起兵 殺害 生靈 ，噉做 就 唔啱 喇 。
目前 春天 水漲 ，丞相 你好快啲 返 扯 嘞 喎 ，如果 唔係 呀 ，又 試 有 赤壁 之 禍 㗎 喇 。
丞相 你好好地 考慮 下 啦 。
喺 封 信 後 便 ，又 批 多 兩 句 ，你 唔 死 呀 ，我 硬係 唔 安樂 啊 噉 。
哈哈哈哈哈哈哈哈哈哈哈 ，曹操 睇完 信 哈哈 大笑 。
孫仲謀 好老實 ，佢 冇 呃 我 吖 ，哈哈哈哈哈 。
佢 叫 人 攞咗 好多 金銀 嚟 ，賞賜 畀 個 使者 ，就 打發 佢 返去 。
佢 又 任命 廬江 太守 朱光 鎮守 皖城 。
皖城 呢 ，喺 古時 係 長江 沿岸 嘅 軍事 要地 ，誒 喺 今日 安徽省 安慶市 嘅 西 便 嚟 。
跟住 呢 ，佢 就 下令 班師 ，率領 大軍 返去 許昌 。
噉 孫權 亦都 收兵 返去 秣陵 。
過咗冇耐 ，孫權 就 同 啲 將軍 商量 話 ：
曹操 雖然 撤退咗 返去 許昌 ，之 劉備 仲 喺 葭萌關 未 返 。
不如 就 帶 打 曹操 呢 支 軍隊 去 奪取 荊州 ，噉 豈 唔係 好 ？
張昭 就 獻計 話 喇 ：
唔好 起兵 住 啊 主公 ，我 有 一條 計策 ，可以 使到 劉備 唔能夠 再 返嚟 荊州 嘅 。
哦？ 請 你 講講 ，你嘅 計策 係 點 嘅 呢 ？
主公 ，我哋 唔能夠 再 起兵 嘅 喇 。
點解 呢 ？
因為 我哋 一起 兵 呢 ，曹操 就 必定 會 再 嚟 嘅 。
主公 不如 寫 兩 封 信 ，一 封 寫 畀 劉璋 ，講 佢 聽 ，話 劉備 啊 要 聯合 東吳 一齊 去 奪取 西川 。
噉啊 使到 劉璋 起咗 疑心 ，就 去 打 劉備 。
另外一封呢 ，就 寫畀 張魯 ，叫 佢 進兵 嚟 攻打 荊州 。
噉樣 一嚟 ，劉備 就 顧得 頭 嚟 顧唔得 尾 嘞 。
我哋 然之後 起兵 去 奪取 荊州 ，事情 噉 就 妥 啦 嘛 主公 。
係噃 ，呢條 計 係 使得 。
孫權 接受 咗 張昭 呢個 意見 ，即刻 就 寫咗 信 ，派 兩個 使者 分別 送去 劉璋 同 張魯 。
噉呢啲呢 ，暫時 就 放落 唔講 佢 住 喇吓 。
而家 講 下 劉備 ，佢 喺 葭萌關 日子 就 唔 短 嘞 ，佢 非常之 得 民心 。
呢一日 ，佢 接到 孔明 嘅 來信 就 知道 孫夫人 已經 返咗 東吳 嘞 。
又聽講 曹操 興兵 去 攻打 濡須 ，佢 就 同 龐統 商量 話 ：
曹操 去 攻打 孫權 ， 曹操 如果 得勝 ， 噉 就 必定會 得到 荊州 。
如果 孫權 得勝 呢 ，亦 會 得到 荊州 㗎 ，噉 點算 好 呢 ？
龐統 就 話 ：主公 唔使 擔心 嘅 ，有 孔明 喺 處 ，估計 東吳 唔 敢 侵犯 荊州 嘅 。
主公 呀 ，你 噉 做 啦 。
你 寫 封 信 畀 劉璋 ，話 ，而家 曹操 攻打 孫權 ，孫權啊 向 荊州 求救 。
我哋 同 東吳 乃係 唇齒之邦 ，唔能夠 唔去 救佢 。
誒 張 魯 嘅 力量 ， 不過 只 能夠 守住 自己 嘅 地方 ， 佢 決 唔 敢 嚟 侵犯 西川 嘅 噉 。
噉 我哋 而家 呢 ，又 要 帶 兵 返 去 荊州 ，會 同 孫權 一齊 去 迎擊 曹操 。
但係 兵 少 糧 缺 ，希望 劉璋 能夠 念在 同宗 之 情 ，撥 三四萬 精兵 ，軍糧 十萬 斛 嚟 支援 。
如果 劉璋 應承咯 ，有 咗 軍馬 錢 糧 ，到時 再 作 打算 啦 。
劉備 就 依從 龐統 嘅 計策 ，真係 寫咗 封 信 ，派 個 使者 送 去 成都 畀 劉璋 嘞 喎 。
呢件事呢 ，就 畀 鎮守 涪水關 嘅 楊懷 同 高沛 知道咗 。
所以 當 送信 嘅 使者 路過 涪水關 嘅 時候 啊 ，楊懷 就 跟埋 個 使者 去 成都 。
劉璋 接到 劉備 封信 ，睇咗 喇 。
噉 見到 楊懷 又 嚟 ，就 問 佢 嚟 成都 有 咩 事 喇 噉 。
楊懷話 ：主公 ，我 係 專門 為 劉備 呢 封 信 嚟 。
劉備 自從 入 西川 之後 ，到處 用 啲 小恩小惠 去 收買 民心 ，佢 嘅 用意 呀 係 十分 險惡 ！
而家 ，佢 又 嚟 要求 軍馬 錢 糧 嘞 。
主公 你 千萬千萬 唔好 畀 佢 啊 ！如果 噉樣 嚟 幫 佢 呀 ，就 無異 加 柴 落 火堆 㗎 咋 。
劉璋 話 喇 ：我 同 玄德 有 兄弟 之 情 噃 ，點 可以 話 唔 幫 佢 吖 ？
有個 官員 就 叫做 劉巴 ，佢 行出嚟 話 ：
劉備 係 個 梟雄 ，留 佢 喺 西蜀 咁 耐 仲 唔 叫 佢 走 ，直情 係 縱 虎 入 屋 呀 。
如果 而家 仲 畀 軍馬 錢 糧 嚟 資助 佢 ，豈唔係 與 虎 添翼 ？
劉璋 聽咗 劉巴 呢 番 說話 ，仲係 猶猶疑疑 揸唔定 主意 。
黃權 呢 又 再三再四 噉 苦苦 勸諫 佢 。
終於 劉璋 就 決定 撥 四千名 老弱殘兵 、一萬 斛 米 嚟 應酬 一下 ，派 個 使者 送 信 去 回覆 劉備 。
同時 呢 ，就 命令 楊懷 、高沛 啊 要 嚴守 關隘 。
噉劉璋嘅使者啊去到葭萌關 ，呈送書信畀劉備啦 。
劉備 一 睇 ，哼 ！發惡嘞 ：
我 同 你 防禦 敵人 ，費力 勞心 你 又 孤孤寒寒 ，唔捨得 使 錢 。
噉點樣 叫 士兵 同 你 搏命 啊 ，豈有此理 ！
一下兩下 ，撕爛咗 劉璋 封 回信 ，嘭嘭聲 咁 拍枱 猛咁 鬧 劉璋 。
嘩嚇到 個 使者 呀 走 都 走唔切 ，即刻 趯 返 去 成都 。
龐統 對 劉備 話嘞 ：主公 素來 以 仁義 為 重 ，今日 撕爛 封信 發 咁 大 火 ，噉 以前 嘅 交情 就 冇 晒 嘅 嘞噃 。
係呢 ，噉 點 做好 呢我哋 ？
我 有 三條 計策 ，請 主公 你 自己 選擇 嚟 做 啦 。
邊 三條 計策 呢 ？
誒 ，而家 ，立即 挑選 精兵 ，日夜 兼程 奔襲 成都 ，呢條 ，係 上計 ；
誒 ，楊懷 、高沛 ，佢哋 乃係 西蜀 嘅 名將 。
佢哋 統率住 強大 嘅 軍隊 ，緊守 關隘 。
噉 ，主公 你 可以 詐諦話 要 返去 荊州 ，楊懷 、高沛 知道咗 必定 會 嚟 送行 嘅 。
我哋 就 喺 送行 嘅 地方 ，殺咗 佢哋 兩個 ，先 奪取咗 涪城 ，然後 再 去 攻打 成都 ，呢條 ，係 中計 ；
嗯 ，噉 仲有 呢 軍師 ？
退返去白帝城 ，有 咁快 得 咁快 趕返去 荊州 ，然後 慢慢 再 嚟 考慮 奪取 西川 ，呢條 ，就 乃係 下計 。
至於 ，如果 猶猶疑疑 該去 而 不去 ，實 搞到 無路可走 ，嗰陣 ，就 冇得摱嘞 。
嗯 ，軍師 你 嘅 上計 太 急 ，下計 啊 太 慢 ，中計 唔 快 唔 慢 。
誒 ，我哋 就 按照 中計 嚟 做啦 。
於是 劉備 就 發咗 封信 去 畀 劉璋 。
話 曹操 啊 派 咗 樂進 帶 兵 去到 青泥鎮 ，啲 人 頂唔住 佢 ，我 要 親自 去 打 。
因為 時間 緊迫 ，嚟唔及 面辭 喇 ，就 寫 封 信 嚟 告辭 啦 噉 。
劉璋 收到 呢 封 信 ，噉 啊 張松 就 實知 㗎 。
佢 捉錯 用神 喇 ，以為 劉備 係 真心 要 返 荊州 喎 就 喇喇聲 寫 封 信 ，想 派 個 人 送 去 畀 劉備 。
啱啱 佢 寫好 封信 ，佢 個 親 大佬 啊 ，廣漢 太守 張肅 就 嚟 搵 佢 。
噉張松 就 急急忙忙 將 封信 收 喺 衫袖 籠 裏便 ，然後 招呼 佢 大佬 ，陪 佢 坐 傾下 偈 。
張肅啊 見 張松 嘅 神情 有啲 唔對路 ，吖 點解 恍恍惚惚 ？個 心 有啲 思疑 。
坐到 咁上下 ，張松 就 攞 啲 酒 出嚟 同 張肅 飲 。
噉喺 斟酒 敬酒 嘅 時候 ，張松 收 喺 衫袖 籠 嗰 封 信 啊 ，唔覺意 跌咗出嚟 佢 自己 都 唔知 喎 。
哈 ，就 畀 張 肅 嘅 僕人 執到 。
飲完酒 ，張肅 返 屋企 嘞 ，佢 僕人 就 攞出 執到 嗰 封 信 嚟 交畀 張肅 。
張肅 打開嚟 一睇 ，見到 封信 話 ：
我 張松 ， 以前 對 皇叔 你 所講 嘅 並 無差錯 ， 點解 皇叔 仲 遲遲 唔 出兵 呢 ？
而家 成功 嘅 機會 已 在 掌握 之中 ，點解 皇叔 反而 放棄 咗 機會 要 返 荊州 啊 ？
希望 皇叔 接到 呢封信 就 從速 進兵 ，我 張松 一定 做 內應 ，請 皇叔 你 切勿 自誤 啊 ！
嘩嗨 ！張肅 睇咗 就 嚇 一大驚 。
哎呀 ，我 細佬 做 啲 噉 嘅 大逆不道 嘅 事 呀 ，要 累到 滿門 抄斬 㗎 ，唔 去 自首 告 佢 都 唔得 咯 。
張肅 漏夜 就 攞住 封信 去 畀 劉璋 睇 ，話 佢 細佬 張松 啊 ，同 劉備 合謀 要 出賣 西川 。
劉璋 就 嬲 到 極喇 ， 佢 話 ： 我 平日 未曾 待 薄 過 佢 嘅 ， 佢 竟然 間 要 謀反 吓 ？
於是就 下令 捉晒 張松 全家 ，拉去 街市 冚𠾴唥 殺 清光 。
劉璋 殺咗 張松 之後 ，就 召集 佢 嗰班 文武官員 嚟 商量 對策 。
佢 話 ：劉備 要 搶 我 嘅 基業 呀 ，噉 我哋 點 做好 呢 ？
黃權 話嘞 ：主公 ，事 不宜遲 啊 ，請 主公 馬上 派人 通告 各個 關隘 ，增兵 把守 ，唔準 放 荊州 一人 一馬 入 關 ！
好啦 。劉璋 聽 黃權 講 喇 呢次 ，立刻 寫好 檄文 ，派 人 騎馬 分頭 去 通知 。
而家 講 下 劉備 ，佢 呀 帶兵 詐作 返去 荊州 ，要 路過 涪城 。
佢 又 派 人 先 去 涪水關 ，請 楊懷 、高沛 兩位 將軍 出 關 嚟 話別 噉 。
楊懷 、高沛 兩位 呀 商量 嘞 ：誒 究竟 劉備 又 想 點 呢噉 ？
高沛話 ：劉備 啊 呢次 整定 佢 該死 㗎 喇 。
嗱 ，我哋 喺 身上 擪定 把 利劍 ，就 喺 送行 嘅 地方 殺死 佢 ，為 我哋 主公 除去 後患 啊 ！
楊懷話 ： 咦 ？ 妙極 喇 妙極 喇 ， 一 於 係 噉 做 啦 ！
於是 兩個人 只係 帶咗 二百人 跟尾 ，出關 去 送行 嘞 。
其餘嘅 將士 呢 全部 留返 喺 關上 。
呢一日 ，劉備 率領 全部 人馬 ，行到 涪水 。
龐統 對 劉備 話 ：若果 楊懷 、高沛 佢哋 歡歡喜喜 噉 嚟 呢 ，就 要 提防住 佢 至好 。
之 如果 佢哋 唔嚟 呢 ，就 直情 去 奪取 涪水關 ，一啲 都 唔好 遲疑 啊 。
正喺度講緊 ，突然 一浸 旋風 吹過 ，啪聲 將 馬前 嘅 帥字 大旗 吹倒 咗 喎 。
劉備 就 問 嘞 ：咦 ？呢個 係 咩 兆頭 啊 軍師 ？
龐統 話 喇 ：嗯 呢個 係 警報 啊 。
楊懷 、高沛 兩個人 必定 想 暗殺 主公 ，要 認真 防備 至得 。
劉備 就 即刻 換返 件 厚厚 嘅 鐵甲 ，喺 腰間 ，掛返 起 把 寶劍 嚟到 防身 。
過咗 一陣 ，侍衛 嚟 報告 話 楊懷 、高沛 兩位 將軍 嚟 送行 喇 噉 。
劉備 就 命令 人馬 停止 前進 ，原地 休息 待命 。
龐統 吩咐 魏延 、黃忠 ：但凡 係 涪水關 嚟 嘅 軍士 啊 ，唔理 多少 ，唔理 係 馬軍 定 步軍 ，總之 一個 都 唔準 放走 ！
魏延 、黃忠 接受 咗 命令 就 各自 去 佈置 嘞 。
噉 而家 講 下 楊懷 同 高沛 。
佢 兩個 都 擪住 把 利劍 喺 身 嚟 ，帶住 二百 名 兵卒 ，牽 羊 擔 酒 一直 嚟到 劉備 嘅 軍隊 前 便 。
哎呀 好 嘢 啊 好 嘢 啊 ！ 冇 到 準備 喎 佢 哋 ， 哼 劉備 你 仲 唔 死 ？ 噉 兩個 好 高興 嘞 。
入到 中軍帳 ，見到 劉備 同 龐統 坐 響處 。
佢 兩個 行過 禮話 ：聽聞 皇叔 要 返去 荊州 ，專誠 準備咗 薄禮 嚟 送行 啊 。
斟滿 一 杯 酒 敬畀 劉備 。
劉備話 ：兩位 將軍 守關 咁 艱苦 ，應當 飲 勝一杯 先 。
劉備 敬 返 轉頭 。
噉佢 兩個 捧起 酒 一飲而盡 。
劉備 又 話 ：我 有 啲 機密 嘅 事情 ，要 同 兩位 將軍 商量 下 ，閒人 都 退出 去 ！
噉就 將 帶嚟 嗰 二百 人 冚𠾴 唥 趕走 晒 。
好喇 ，劉備 突然間 面色 一變 ，喝 一聲 人 嚟 ！將 呢 兩個 奸賊 捉起 佢 ！
早就 埋伏 喺 帳 後 嘅 劉封 、關平 應聲 而 出 。
楊懷 、高沛 想 反抗 都 嚟唔切 啊 ，畀 劉封 、關平 各 捉住 一個 。
劉備 又 喝 佢哋 話 喇 ：我 同 你哋 主人 係 同宗 兄弟 ，你 兩個 人 為 咩 要 合謀 嚟 離間 我哋 嘅 親情 啊 ？吓 ！
龐統 又 叫 人 搜 佢哋 身 ，搜出 佢哋 每人 都 擪住 一把 利劍 。
龐統 立即 喝令 刀斧手 ，斬咗 佢哋 兩個 。
但係 劉備 仲係 猶豫不決 啊 。
龐統 就 話嘞 ：佢 兩個 係 有意 嚟 暗殺 主公 你 㗎 ，罪 不容 誅 啊 ！
就叫刀斧手 ，將 楊懷 、高沛 推出去 帳外 一刀 斬咗 。
嗰 二百 個 兵卒 呢 ，早 就 畀 黃忠 ，魏延 捉起 晒 嘞 ，一個 都 走唔甩 。
噉呢 二百人 就 冇 殺到 ，劉備 叫 佢哋 入嚟 ，請 佢哋 飲酒 同 佢哋 壓驚 。
劉備 話 喇 ：楊懷 、高沛 離間 我哋 兄弟 嘅 感情 ，又 喺 身邊 擪住 把 利劍 想 暗殺 我 ，所以 我 先至 斬咗 佢哋 。
你哋 係 冇罪 嘅 ，大家 唔使 驚 。
嗰班 兵卒 即刻 跪低 叩頭 謝恩 啦 。
龐統 就 話 ：我 而家 要 你哋 帶路 ，去 奪取 涪水關 ，成功之後 ，各 有 重賞 ！
誒 遵命 ，遵命 ！
當晚 嗰 二百人 喺 前面 帶路 行先 ，大軍 跟住 後便 。
嗰 二百人 嚟 到 關下 就 叫門 喇 ： 喂 ！ 兩位 將軍 有 急事 返 嚟 喇 ， 快 啲 開門 喇 ！
關上面 聽見 係 自己人 唄 咪 立即 開關 咯 。
城門 一 開 ，嗬 ！大軍 一 湧 而 入 ，都 唔 使 流 一 滴 血 啊 就 得咗 涪水關 。
噉 關上 嘅 蜀兵 呢 ，全部 投降 。劉備 啊 吩咐 ，人人 都有 重賞 啊 ！就 同時 分派 兵力 前後 把守 。
到咗 第日 ，慰勞 軍隊 ，劉備 佢哋 喺 公堂 呢 就 舉行 宴會 。
劉備 飲到 有啲 醉意 嘞 ，佢 就 問 龐統 話 ：
誒軍師 ，今日 嘅 宴會 ，都 算 高興 嘞啩 ？
龐統 就 話 ：打人哋 嘅 國家 就 覺得 好 高興 ，呢啲 唔係 仁者 之 兵 啊 。
咩話 ？哼 ！我 聽講 古時 周武王 打敗咗 紂王 ，都 慶祝 勝利 啊 。
唔通 周武王 嗰啲 亦 唔係 仁者 之 兵 咩 ？
你 講 啲 說話 都 唔 合 道理 嘅 ，你 快啲 扯 你 快啲 扯 ！
龐統 哈哈大笑 起身 行咗 出去 。
啲侍從 呢 亦 扶咗 劉備 入去 後堂 瞓覺 。
到咗 半夜 ，劉備 酒醒 嘞 。
啲侍從啊 將 佢 趕走 龐統 講過 嘅 說話 就 講返 畀 佢 聽 ，嗨 ，劉備 真係 後悔 呀 。
第朝早 ，佢 出嚟 公堂 就 向 龐統 道歉 ：
昨晚 飲醉咗 酒 ，言語 冒犯 ，請 軍師 唔好 記 喺 心處 啊 。
昨晚 我 講 嗰啲 說話 ，係 我 講錯 。
龐統 就 話 嘞 ： 君臣 都 有 錯 ， 唔 淨止 主公 啊 。
兩個人 都 笑起上嚟 ，彼此 都 唔介意 啊 ，互相 嘅 感情 同 以前 一樣 咁 融洽 。
呢啲呢就唔講佢咁多喇 。
而家 講 下 劉璋 啊 佢 聽聞 劉備 殺咗 楊懷 、高沛 ，又 偷襲 咗 涪水關 ，大吃一驚 啊 ，佢 話 ：
哎 想唔到 今日 果然 發生 噉嘅 事 啊 。
即刻 就 召集 佢 嘅 文武官員 嚟 商量 點樣 打退 劉備 。
黃權 就 話嘞 ：主公 ，你 即刻 派兵 去 守住 雒縣 ，控制住 呢條 咽喉 之 路 。
劉備 就算 有 精兵猛將 啊 ，佢 都 通唔過 嘅 。
劉璋 採納咗 呢個 建議 。
就 命令 劉璝 、泠苞 、張任 、鄧賢 噉 四員 大將 ，點起 五萬 大軍 就 立即 出發 ，趕去 雒縣 嚟 頂住 劉備 。
雒縣 係 古時 嘅 縣 ，佢 個 位置 就 喺 而家 四川省 廣漢縣 嘅 北便 ，即係 喺 成都市 嘅 東北方 嚟 。
噉喺 行軍 嘅 時候 呢 ，劉璝 就 話 喎 ：
我 聽講 錦屏山 上 便 有 一個 人 ，好 神奇 嘅 ，道號 紫虛 上人 。
佢 能夠 算出 一個人 嘅 生死 貴賤 嘅 喎 。
我哋 而家 行軍 啱啱 要 經過 錦屏山 嘅 ，不如 去 搵 佢 問下 吉兇 都 好喎 。
張任 就 話嘞 ：大丈夫 行軍 打仗 ，何必 問 嗰啲 道士 山野 之 人 呢 ？
劉璝 話 喇 ：噉 又 唔係 喇 ，聖人 有 話 至誠 之 道 就 可以 前知 吖 嘛 。
我哋 去 搵 個 高明 嘅 人 嚟 問 下 ，可以 趨吉避兇 㗎 ，去啦 去啦 。
噉啊 於是 四個人 帶住 五六十個 馬軍 ，就 嚟到 錦屏山 下 。
見到 有 個 斬柴佬 就 問 佢 路 啦 ，個 斬柴佬 話 呢 上到去 至 高 個 山頂 就 係 喇 噉 。
噉佢哋 四個人 就 上山 。
去到 山頂 ，吖 ，果然 見到 有 間 庵 。
噉佢哋 行到 門口 ，有 個 道童 出嚟 就 問過 姓名 ，帶 佢哋 入去 。
只見 嗰個 紫虛上人 啊 ，坐 喺 個 蒲團 上 便 。
噉啊 四個人 恭恭敬敬 跪低 叩頭 行禮 。
請 上人 指點 迷津 ，指示 下 佢哋 嘅 前程 。
紫虛上人 初時 又唔肯 講 ，誒 話 自己 唔識 睇 啊 。
噉啊 收尾 劉璝 懇求 得 多 嘞 ，紫虛 上人 就 叫 個 道童 攞 紙 筆 嚟 ，寫落 八句 說話 交畀 劉璝 。
嗰 八 句 說話 係 噉 嘅 ：
左龍右鳳 ，飛入 西川 。雛鳳 墜地 ，臥龍 升天 。一得一失 ，天數 當然 。見機而作 ，勿喪 九泉 。
劉璝 又 問嘞 ：噉 請問 我哋 四個人 嘅 氣數 如何 呢 ？
定數 難逃 ，何必 再問 ！
劉璝仲 想 問 落去 ，但係 一 睇 ，誒 ，紫虛上人 都 低眉合眼 好似 瞓着咗 噉嘞 ，完全 唔 回答 。
噉唔回答就算啦 ，四個人 就 落山 嘞 。
劉璝 又 話 喇 ：神仙 嘅 說話 都 不可 不信 㗎 。
張任話 ：嘿 ！咩 神仙 吖 ，神經佬 就 真 ，聽 佢 個 說話 有 乜 好處 啊 ！
噉佢哋 落咗 山上 馬 繼續 前進 。
到咗 雒縣 之後 ，就 分派 人馬 把守 各處 隘口 。
劉璝話 ：雒城 係 成都 嘅 保障 ，失咗 雒城 ，就 成都 難保 喇 。
我哋 四個人 公議 喇 ，兩個人 守城 ，兩個人 去 雒縣 前 便 依 山 傍 險 ，扎 兩個 營寨 守住 ，唔 畀 敵兵 逼近 城池 ，各位 意下 如何 呢 ？
泠苞 、鄧賢 就 話嘞 ：我哋 願 去 扎寨 。
劉璝 好高興 ，就 分 兩萬 兵 ，由 泠苞 、鄧賢 率領 ，離 城 六十 里 安營 扎寨 。
噉劉璝 、張任 呢 就 留低 守衛 雒城 。
而家 講 下 劉備 ，佢 得咗 涪水關 之後 啊 ，就 同 龐統 研究 點樣 去 奪取 雒城 。
佢 得到 報告 話 劉璋 派 咗 四個 將軍 嚟到 嘞 。
同時 ，泠苞 、鄧賢 帶咗 二萬 兵 離 城 六十 里 ，扎落 兩個 大寨 噉 。
劉備 就 召集 啲 將領 嚟 問 ：邊位 願 去 建立 頭功 ，奪取 泠苞 、鄧賢 嘅 營寨 啊 ？
只見 老將 黃忠 應聲 而 出話 ：老夫 願去 ！
劉備 話嘞 ：好極喇 ！老將軍 你 就 率領 本部 人馬 ，出發 去 雒城 。
如果 攻陷 泠苞 、鄧賢 嘅 營寨 ，必 有 重賞 ！
得吖令 ！
黃忠 好高興 ，行咗 個禮 ，正話 想 點兵 出發 。
點知 魏延 行 出嚟 話 喇 ：老將軍 年紀 咁 老喇 ，仲 點 去得 㗎 。
小將 雖然 能力 淺薄 ，仲係 等 小將 去 罷 啦 。
誒 ！我 已經 接受咗 將令 ，你 仲 點 能夠 搶住 去 㗎 ？
老人家 唔好 唔服老 啊 ，無謂 同人哋 鬥力 。
我 聽講 泠苞 、鄧賢 ，乃係 西蜀 名將 ，血氣方剛 ，恐怕 老將軍 唔係 佢 嘅 敵手 。
噉豈唔係 誤咗 主公 嘅 大事 ？
因此 ，我 先至 願意 替 老將軍 嘅 啫 ，完全 係 好意 㗎 。
吓 ？你話 我 老 呀 ？你 敢唔敢 同 我 比賽 武藝 ？
好吖 ！就 喺 主公 面前 當面 比賽 ，邊個 贏 就 邊個 去 ，點吖 ？
好 ！
黃忠 噔噔噔 行 落 台階 ，吩咐 衛士 ：攞 刀 嚟 ！
唔 好 啊 唔 好 啊 唔 好 啊 ！
劉備 連忙 制止 佢 話 嘞 ：而家 我 帶兵 奪取 西川 ，全靠 你 兩位 嘅 力量 。
今日 兩虎 相爭 必有 一 傷 ，噉 就 實誤咗 我 嘅 大事 㗎 。
好喇好喇 ，我 嚟 同 你哋 做 個 和事佬 ，吓 ，大家 唔好 爭 。
龐統 話 喇 ：你 兩位 不必 爭 。
嗱 ，而家 泠苞 、鄧賢 扎落 兩個 營寨 吖嘛 。
你哋 兩位 各自 率領 本部 人馬 ，各 打 一 個 寨 ，邊個 首先 奪到 嘅 就算 佢 係 頭功 。
於是 分定 黃忠 ，去 攻打 泠苞 嘅 營寨 ，魏延 就 去 攻打 鄧賢 營寨 。
噉 兩個人 接受 命令 走咗 之後 啊 ，龐統 對 劉備 話嘞 ：
佢哋 兩個 去咗 ，就 怕 喺 半路 爭起嚟 啊 ，請 主公 你 親自 帶 支 軍隊 去 做 後應 啦 。
噉劉備就留低龐統守城 ，自己 同埋 劉封 、關平 帶領 五千 軍兵 隨後 出發 嘞 。
而家 先 講下 黃忠 ， 佢 返 到 自己 嘅 營寨 ， 傳令 落 去 ， 聽日 四 更 煮飯 五更 出發 ， 由 左 便 山谷 打入 去 。
哈魏延 就 好鬼馬 ，佢 暗中 派人 去 探聽 黃忠 咩嘢 時候 起兵 。
探聽 消息 嘅 人 返嚟 話 ：佢哋 聽日 四更 煮飯 ，五更 起兵 啊噉 。
嗯得喇 。魏延 就 吩咐 本部 軍兵 ，二更 煮飯 就 三更 起兵 ，拂曉 前 就 要 去到 鄧賢 營寨 。
啊 真係 就 噉 做 嘞 喎 。
到咗 三更 咁上下 ，嗰啲 軍士 個個 都 飽餐 一頓 ，馬 摘鈴 人 銜 枚 ，卷 旗 束 甲 唔 聲 唔 響 就 出發 去 劫寨 喇 。
行到半路 ，魏延 個 心 諗 ：
只係 去 打 鄧賢 嘅 營寨 ，顯唔出 我 嘅 叻處 吖 。
嗯 ，不如 先 去 打 泠苞 營寨 ，贏咗 咯 ，再 去 打 鄧賢 營寨 ，噉 兩份 功勞 都係 我 㗎 喇 。
好 ！就係 呢個 主意 ！
魏延 立即 傳令 ，叫 軍士 啊 全部 由 左便山路 去 嘞 。
