而家 講 下 曹操 啊 佢 得知 馬超 同 韓遂 ，輪流 分頭 帶兵 嚟 監視 。
佢 好高興噉 話 ：我 嘅 計謀 可以 成功 喇 呢趟 。
聽日 ，係 邊個 嚟 我 呢便 啊 ？
啲人 就 回覆 佢 話 ：係 韓遂 。
呵呵呵呵呵呵呵呵呵呵呵呵呵呵 。
第日 ，曹操 帶 齊 部下 嘅 將官 出 營 。
嗰班 將官 喺 左右 兩旁 圍繞住 曹操 。
噉 曹操 就 伶伶俐俐 清清楚楚 ，一個人 騎住 馬 喺 正中間 嚟 。
嗨 真係 好似 眾星拱月 噉 。
韓遂 部下 嗰啲 兵卒 呢 ，絕大部分 都 未曾 見過 曹操 㗎 嘛 。
今日 聽講 話 曹操 嚟咗 喎 噉 ，嘿 ，係 人 都 出陣 嚟 睇下 啦 。
曹操 就 高聲 大叫 話 喇 ：你哋 都 想 見 下 曹公 係 嘛 ，我 就係 喇 。
我 亦 係 人 嚟 啫 ，唔係 四隻眼 兩個嘴 嘅 ，哈哈哈哈哈哈 ，所 不同 嘅 ，就係 計謀 多啲 啫 。
韓遂 嗰啲 兵卒 ，畀 曹操 呢種 咁 厲害 嘅 威儀 嚇窒 嘞 ，個個 都有 啲 面青 喇 。
曹操 使人 過陣 對 韓遂 講 ：丞相 請 韓將軍 會話 。
好！ 韓遂 立即 出陣 。
出到去 ，只見 曹操 啊 只係 着住 日常 嘅 服裝 ，冇 着 盔甲 亦 冇 帶 兵器 。
好吖 ，文 對 文 就 武 對 武 。
於是 韓遂 啊 亦都 除咗 盔甲 ，放低 兵器 ，就 噉 着住 便服 ，單人 匹馬 就 行 出去 。
曹操 同 韓遂 兩個 行到 好 近 啊 。
兩匹馬 嘅 馬頭 都 貼到 實 ，誒 就噉 挽住 馬韁 喺度 對話 嘞 噃 。
曹操 話 ：我 當年 同 將軍 你 嘅 父親 ，一齊 被 選拔 做 孝廉 。
嗰陣 ，我 當 你 父親 係 叔父 噉 看待 㗎 。
後嚟 ，我 又 同 將軍 你 一齊 喺 朝 上 做官 。
啊 ，唔經唔覺 ，亦 好多年 咯嗬 。
哈哈哈 哈哈哈 ， 誒 ， 將軍 今年 妙齡 多少 啊 ？
四十歲 喇 。
啊 ，往日 喺 京師 嘅 時候 ，我哋 都 仲係 青春年少 ，咁快 又 到 中年 咯 。
幾時 得到 天下 清平 ，一齊 快樂 下 就 好喇 。
曹操 同 韓遂 交談 嘅 都係 講埋 啲 以前 嘅 事 ，半點 都 冇 提到 軍情 嘅 。
噉啊 一路 傾談 都 唔知 幾 開心 ，講講下 呢 ，就 哈哈大笑 。
就係噉 ，高高興興 一直 傾咗 成個 時辰 咁耐 ，彼此 先至 分別 就 各自 回營 。
有人就 將 今日 呢件事 講咗 畀 馬超 聽 ，馬超 就 連忙 走去 問 韓遂 ：
曹操 今日 同 叔父 喺 陣前 ，講 啲 乜嘢 啊 ？
只係 講 舊時 喺 京師 啲 事 啫 。
冇 講 及 軍事上 啲 事情 咩 ？
曹操 唔 講 ，我 自己 亦 無謂 講 啦 。
哦？ 馬超 非常 疑心 ，但係 亦 冇 再 出聲 嘞 ，走咗 。
噉 而家 講 下 曹操 ，佢 回營 之後 同 賈詡 話 喇 ：
先生 ，你 知唔知道 我 喺 陣前 同 韓遂 交談 嘅 意思 啊 ？
賈詡 話 喇 ：丞相 嘅 意思 雖然 極妙 啊 ，不過 尚未 足以 離間 佢哋 兩個人 噃 。
我 有 一條 計策 ，可以 令到 韓 、馬 自相仇殺 嘅 。
好啊 ！你 有 咩嘢 計策 呢 ？
丞相 ，馬超 乃係 個 一勇之夫 ，淨係 識得 打 ，唔識得 諗嘢 嘅 。
丞相 ，你 親筆 寫 封 信 ，就係 寫畀 韓遂 一個 人 嘅 啫 。
噉誒 喺 其中 一啲 緊要 嘅 地方 呢 ，特登 改過 佢 ，或者 叉咗 佢 ，然後 封好 ，派 人 送 畀 韓遂 。
同時 呢 ，要 故意 畀 馬超 知道 噃 ，噉 馬超 就 必定 會 搵 韓遂 攞 封 信 嚟 睇 嘅 。
當佢 一 睇到 上面 緊要 嘅 地方 ，都 係 改過 嘅 或者 叉咗 嘅 ，噉 佢 實 諗㗎 。
佢啊 一定 會 猜測 實係 韓遂 呢 ，怕 佢 馬超 知道咗 啲 機密 ，所以 就 塗改過 先至 畀 佢 睇 。
噉樣呀 ，佢 一連 帶 想起 丞相 你 同 韓遂 兩個 單獨 傾談 嘅 事 ，就 更 會 疑心 喇 ，一 疑心 就 亂 㗎 啦。
同時 ，我哋 再 去 暗中 聯繫 韓遂 部下 啲 將官 ，離間 佢哋 同 馬超 嘅 關係 ，噉 馬超 就 推得冧 啦 嘛 。
嗯 ，呢條 計策 甚妙 啊 ！
跟住 曹操 就 寫咗 一封 信 ，真係 將 緊要 嘅 地方 都 塗改過 ，然後 封實 ，特登 就 派 多 幾個 人 送去 畀 韓遂 。
果然 ，即刻 就 有人 將 呢件事 報告 畀 馬超 知 。
馬超 就 越發 疑心 啦 ，喇喇聲 走嚟 問 韓遂 攞 封信 睇 。
韓遂 就 以 心 為 心啊 ，馬超 要 睇 嘞咪 畀 佢 睇咯 。
馬超 見到 封信 上 便 ，乜 有 咁多 地方 塗改過 嘅 ，有啲 仲 叉到 睇唔到 添 ，就 問 韓遂 話 喇 ：
點解 封信 ，塗改 得 一塌糊塗 嘅 ？
係咯 ，原信 就係 噉嘅 ，都 唔知 點解 呢 。
冇人 會 將 封信 嘅 草稿 送畀 人 㗎 ，實係 叔父 怕 我 知道 啲 嘢 ，就 叉咗 先至 畀 我 睇 喇 係 唔係 啊 ？
莫非 曹操 搞錯咗 ，唔垂意 將 封信 嘅 草稿 送咗嚟 ？
我 唔 信 ， 曹操 係 個 好 精細 嘅 人 ， 唔 會 出 啲 噉 嘅 差錯 嘅 。
我 同 叔父 你 合力 嚟 殺 賊 ，何以 突然間 變咗 心 啊 ？
唉 ，賢侄 你 如果 唔信 我 個 心 ，噉啦 ，聽日 我 喺 陣前 氹 曹操 出嚟 講 說話 ，你 就 喺 陣內 突然 衝 出去 ，將 佢 一 槍 刺死 就係啦 。
好吖 ，係噉樣 先至 顯得出 叔父 你 嘅 一片 真心 。
噉 兩個人 就 約好咗 嘞 。
第日 ，韓遂 就 帶住 侯選 、李堪 、梁興 、馬玩 、楊秋 就 五名 將官 出陣 。
馬超 匿埋 喺 門旗 嘅 陰影 之下 。
韓遂 派人 去到 曹操 嘅 營寨 前 便 ，高聲 大叫 ：韓將軍 請 丞相 答話 ！
哈 ，點知 曹操 唔 出嚟 喎 。
佢 又 叫咗 曹洪 帶住 幾十個 馬軍 ，出到 陣前 同 韓遂 見面 。
曹洪 騎馬 就 行到 離 韓遂 幾步 遠 就 勒定 馬 ，護 一護 個 身 話 ：
昨晚 丞相 對 將軍 講過 嘅 說話 ，請 將軍 千祈 要 記住 ，唔好 誤事 噃 。
曹洪 就係 噏咗 呢句 噉嘢 ，就 回馬 扯 人 嘞 。呢句 說話 就 講得 都 唔知 幾 大聲 。
馬超 聽到 晒 ，當堂 嬲到 佢 頭殼 出煙 ，一拍 隻 馬 ，挺起 長槍 對住 韓遂 就 刺過去 。
侯選嗰五位將官 就 即刻 攔住 佢 啦 ，終歸 左勸右勸 就 勸咗 佢 返入 營寨 。
韓遂 同 馬超 話嘞 ：賢侄 你 唔好 懷疑 ，我 一啲 壞心腸 都 冇 㗎 真係 。
馬超 任你 點講 都 唔肯 信 ，硬硬聲 滿懷 怨恨 走咗 去 。
韓遂 就 同 嗰 五位 將官 商量 啦 佢 話 ：唉 ，呢件事 ，點 同 佢 解釋 好 呢 ？
楊秋話 ：哼 ！馬超 恃住 自己 勇猛 ，一向 都係 想 欺壓 主公 你 嘅 。
呢 次 就算 係 打贏 咗 曹操 ， 佢 又 點 肯 將 好處 同 主公 你 平分 呢 ？
以 我 睇 ， 不如 暗中 投降 曹公 ， 第 日 ， 仲 不失 封侯之 位 啊 。
噉嘛 ，我 ，唉 ，我啊 同 馬騰 係 結拜 兄弟 ，噉樣 背叛 咗 佢 點得 㗎 。
主公 ，事到如今 ，冇法子 唔係 噉 做 㗎喇 。
噉 ，邊個 去 同 曹操 講好 呢 ？
我 去 啦 。
於是 韓遂 就 寫咗 封 密信 ，叫 楊秋 靜靜 帶 去 畀 曹操 請求 投降 。
曹操 收到 信 呀 歡喜 到 極 ，應承 封 韓遂 啊 做 西涼侯 ，封 楊秋 做 西涼太守 ，其餘 個人 呀 個個 都 封 官 。
又約定 放火 為 號 ，一齊 嚟 謀 馬超 。
噉啊樣樣都斟掂晒之後呢 ，楊秋 就 返嚟 講畀 韓遂 聽 ，話 ，約定 今晚 放火 為 號 ，裏應外合 噉 。
韓遂 就 話 好啦 ，就 吩咐 軍士 喺 中軍 帳 後 便 啊冧 起 啲 乾柴 。
五個 將官 ，都 帶齊 刀劍 待命 。
當時 韓遂 呢 ，係 想 擺酒 嚟 請 馬超 ，然後 喺 飲飲下 酒 嘅 時候 逳手 嘅 。
但係 佢 仲 有 啲 猶猶疑疑 就 未曾 最後 決定 。
哈哈 ，點 知道 馬超 呢 早就 摸清 底 嘞 。
佢 帶住 幾個 親隨 ，手執 寶劍 行先 就 叫 龐德 、馬岱 喺 後 便 接應 。
馬超 踮起 腳尖 ，靜靜噉 行入 韓遂 嘅 中軍 帳 。
見到 嗰 五個 將官 正在 同 韓遂 密 斟緊 。
只聽見 楊秋 話 ：事 不宜 遲 ，快啲 逳手 啦噉 。
嘿馬超嬲到極啊 ，舉起把劍 ，啪啪啪直衝入去 ，大喝一聲話 ：你班奸賊想謀害我咁大膽 ！
嘩 嚇到 嗰班人 呀 驚晒 。
我攞你命 ！馬超 一劍 ，對住 韓遂 個 頭殼 就 斬過去 。
韓遂 慌忙 用手 去 格 佢 啊 ， 哎呀 ！ 韓遂 隻 左手 啊 當堂 斬斷 咗 。
嗰 五個 將官 撐噉 就 拔出 刀劍 ，圍住 馬超 。
馬超 幾個 箭步 衝出 中軍 帳 。
噉嗰 五個 人 呀 跟住 追 出去 啦 ，就 圍住 馬超 亂斬亂劈 。
馬超 一啲 都 唔驚 你 啊 ，舞起 把 寶劍 ，一個 打 五個 。
嘩嗨 ，劍光 一閃 ，鮮血 橫飛 。
首先 就 斬低 咗 馬玩 ，跟住 就 劈倒 咗 梁興 。
剩返 三個 呀 ，細佬 趯得 摩 啊 ，各自 逃生 。
馬超 又 試 走入去 中軍帳 ，想 去 殺 韓遂 ，但係 韓遂 呢 ，已經 畀 佢 嗰啲 衛兵 救走 咗 咯 。
喺 呢個 時候 ，中軍 帳 後 便 就 含含聲 起火 。
各個 營寨 啲 兵卒 一齊 出動 ，咦咪 搞 ，馬超 連忙 上馬 。
龐德 、馬岱 亦都 嚟到 嘞 ，就 展開 一場 混戰 。
等到 馬超 帶住 人馬 殺返 出去 嘅 時候 ，曹操 個 兵馬 前 有 許褚 ，後 有 徐晃 ，左 有 夏侯淵 右 有 曹洪 ，喺 四面 包抄 殺過嚟 。
而 西涼 嘅 士兵 呢 ，又 自相 殘殺 。
嘿 ，呢啲 呀 ，真真正正 係 混戰 喇 ，打到 亂晒 龍 。
馬超 就 唔見咗 龐德 同 馬岱 ，就 帶住 百零個 馬軍 ，喺 渭河 橋 上面 就 截住 條 路 。
等到 天 蒙蒙光 嘅 時候 ，見到 李堪 帶住 一支 人馬 喺 橋 下 經過 。
啱喇 ，馬超 挺槍 縱馬 追佢 。
李堪 唔敢 同 馬超 打 ，拖住 條 槍 就 跑 。
啱啱 于 禁 喺 馬超 後 便 追緊 過嚟 。
于禁 呀 開弓 嚟 射 馬超 。
馬超 聽見 背後 弓弦 騰噉 一響 ，急急 一閃 ，哈 ，嗰支箭 喺 佢 身邊 射過 就 射中 前便 嘅 李堪 ，當堂 死咗 跌咗 落 馬 。
啱喇 ，你 于禁 幫 我 射死 咗 李堪 呀 ，而家 我 嚟 報答 你 我 嚟 殺返 你 啊 。
馬超勒轉馬 要嚟 打 于禁 ，于禁 一拍 隻馬 ，鬆人喇 。
噉馬超 就 跑返 上去 橋 上面 ，閘 實 。
冇無幾耐 ，曹軍 大隊 人馬 ，一前一後 追到嚟嘞 。
係 虎衛軍 當先 ，兩頭 亂箭 夾住 嚟 射 馬超 。
馬超 用 支 槍 嚟 撥 嗰啲 箭 ，嘿 你 睇下 吖 嗱 ，真係 犀利 嘅 吓 ，嗰啲 箭 呀 紛紛 落地 冇 一支 能夠 揩 得到 佢 嘅 。
馬超 叫 跟住 佢 嗰班 馬軍 就 來回 衝殺 ，想 殺開 條 血路 突圍 。
但係 曹兵 多 啊 ，一重 又 一重 噉 圍到 實實 ，冇 辦法 衝得 出去 。
馬超 喺 橋 上 嘩噉 大喝 一 聲 ，殺 入 去 河北 。
佢 噉樣 一衝 ，弊喇 ，跟 佢 嗰班 馬軍 就 畀 曹兵 切斷 咗 。
噉 馬超 單槍匹馬 ，就 喺 陣內 來回 咁 衝擊 。
真係 明槍 易躲 就 暗箭 難防 ，一支 暗箭 𠻘噉 射中 佢 隻 馬 噼啪 噉 馬 超 成個 𢴈咗 落地 。
殺啊 ！曹兵 就 立刻 合圍 埋嚟 想 捉 人 嘞噃 。
正在 危險 萬分 嘅 時候 啊 ，喺 西北角 嗰 便 呢 ，有 一 彪 軍馬 殺 過嚟 嘞 。
原來 係 龐德 同 馬岱 噉 兩個 人 嚟到 就 救 咗 馬超 。
喺 軍隊 裏頭 ，要 咗 匹 戰馬 畀 馬超 騎 ，即刻 就 返轉頭 ，向住 西北方 殺開 條 血路 衝咗 出去 。
曹操 聽聞 話 馬超 走甩咗 唄 ，馬上 傳令 所有 嘅 將官 ，不分 日夜 ，務必要 追到 馬仔 。
得到佢人頭嘅 ，賞千金 ，封萬戶侯 ；生擒嘅 ，封大將軍 。
嗰班 將官 得到 命令 ，真係 人人 搏命 就 個個 爭功 呀 ，一路 猛咁 追 。
馬超 都 唔 顧得到 人 困 馬 乏 喇 ，就係 顧住 狂奔 猛跑 。
跑跑下 ，跟住 佢 嗰啲 馬軍 就 漸漸 散晒 。
步兵 實 跟唔上 㗎 啦 ，大部分 都 做咗 俘虜 ，結果 呢 ，只係 剩返 卅 零 個 馬軍 跟住 。
馬超噉啊同龐德 ，馬岱 一路 走去 隴西 臨洮 嘞 。
臨洮 呢 即係 喺 今日 甘肅省 中部 嚟 ，誒 喺 蘭州市 以 南 嘅 。
好喇 ，噉 呢啲 呢暫時 放落 唔講 佢 住 喇吓 。
而家 講 下 曹操 ，佢 親自 追到去 安定 啊 ，知道 馬超 呢 已經 趯咗 好遠 喇 ，噉 先至 收兵 返去 長安 。
所有嘅將領 呢 亦都 返齊嚟 嘞 。
韓遂 就 已經 冇咗 左手 ，變咗 個 殘廢 。
曹操 就 叫 佢 喺 長安 住 ，封 佢 做 西涼侯 。
楊秋 、侯選 都 封 做 列侯 ，任命 佢哋 鎮守 渭口 。
安排妥當之後 呢 ，曹操 就 下令 班師 返 許都 。
當時 有 個人 姓 楊 名 阜 ，字 義山 ，官職 呢 係 涼州 參軍 。
佢 嚟到 長安 求見 曹操 ，噉 啊 曹操 問 佢 有 咩 事 啊 噉 。
楊阜話 ：馬超 有 呂布 之 勇 ，喺 羌人 之 中 深得 人心 。
丞相 而家 如果 唔 趁勢 消滅 佢 ，第日 等 佢 恢復 咗 元氣 ，噉 隴上 各個 州郡 就 唔 能夠 再 為 國家 所有 㗎 喇 。
希望 丞相 唔好 收兵 返去 住 呀 。
曹操話 ：我本來 都 好想 留喺度 消滅佢 。
無奈 中原 多事 ，南方 未定 ，因此 冇辦法 留低 咁耐 。
楊公 ，你 同 我 好好噉 保住 隴上 各 郡 啦 。
楊阜 接受 咗 呢個 委託 ，佢 又 推薦 韋康 做 涼州 刺史 ，共同 率領 軍隊 駐扎 喺 冀城 嚟 防備 馬超 。
楊阜 臨行 嘅 時候 ，又 請求 曹操 話 喇 ：
丞相 ，必定 要 留 大軍 喺 長安 做 後援 至 好 啊 。
我 已經 安排好 㗎喇 ，你 即管 放心 啦 ，吓 。
噉 楊阜 辭別 咗 曹操 就 走 嘞 。
呢次 擊敗 馬超 啊 ，曹操 就 用咗 好多 計謀 。
嗰班 將官 呢 雖然 係 打贏咗 ，但係 好多 都 唔係 點 明白 嘅 。
所以 就 問 曹操 嘞 ：初初 馬超 佢哋 佔領住 潼關 ，渭北 防守 空虛 ，當時 丞相 你 唔 由 河東 去 攻擊 馮翊 ，反而 盯住 潼關 拖咗 咁 長 時間 ，先至 北渡 渭河 立營 固守 ，點解 呢 丞相 ？
哈哈哈哈哈哈哈哈哈哈 。
初時 ，啲 賊兵 佔據住 潼關 啦 ，如果 我軍 一到 ，就 去 打 河東 ，噉 賊兵 就 必定 死守 各個 渡口 ，噉樣 ，河西 就 渡唔過去 嘅 嘞噃 。
我啊 故意 將 大軍 聚集 喺 潼關 前面 ，使到 賊人 用 全部 兵力 ，守住 南便 。
而 河西 呢 ，佢哋 就 不作 防備 嘞 ，所以 徐晃 、朱靈 就 過得去 啦 。
然後 ，我 再 帶兵 北渡 渭河 ，將 啲 車輛 、樹木 連結 埋 ，整 條 甬道 又 築起 冰城 。
我 之所以 噉樣 做 ，係 想 賊人 以為 我 無力 進攻 ，軟弱 啊 ，使到 佢哋 驕傲 起嚟 ，不作 準備 。
最後 ，我 就 用 反間計 ，集中 全部 力量 ，一下 就 擊破 佢 。
嘿嘿 ， 正 所謂 迅雷不及掩耳 啊 ， 啊 。
哈哈哈哈哈哈哈哈哈哈 。
用兵嘅 變化 係 好多 嘅 ，當然 唔係 一條路 咁 簡單 啦 。
嗰班 將官 又 問 ：丞相 你 每次 聽聞 馬超 佢哋 增加咗 兵力 ，就 歡喜 嘞 ，又 點解 呢 ？
關中 係 邊 遠地區 ，如果 嗰班 賊人 分散 起嚟 ，各自 據險 固守 ，要 征服 佢哋 呀 ，冇 一兩年 嘅 時間 做唔到 。
而家 佢哋 聚集埋一齊 ，冇錯 佢哋嘅 人數 雖然 多咗 啊 ，之 人 多 ，個 心 就 唔 齊 ，易於 離間 ，一舉 就 可以 消滅 ，所以 ，我 就 歡喜 啦 嘛 。
原來噉嘅 ，嗰班 將官 呀 都 跪 喺 處 叩頭 行禮 話 ：丞相 嘅 計謀 如 神 ，無人 能 及 啊 ！
哈哈哈哈哈哈哈 ，我 亦 係 靠 你哋 大家 文武之力 唧 ，呢次 勝利 ，人人 有 賞 ！
多謝 丞相 ！
嘿噉就真係大家高興喇 。
曹操 就 留低 夏侯淵 帶 兵 駐扎 喺 長安 。
噉 呢次 投降 過嚟 嘅 兵卒 呢 ，都 分晒 落去 各個 部隊 裏便 。
夏侯淵 又 推薦 咗 一個 人 ，姓 張 名 既 字 德容 ，搵 佢 嚟 做 京兆尹 一同 鎮守 長安 。
曹操 放心 喇 ，噉 就 班師 回朝 啦 。
返到 許都 嘅 時候 呀 ， 漢獻帝 啊 親自 率領 文武百官 出 到 城外 迎接 曹操 啊 ， 啊 都 可謂 夠晒威 咯 。
因為 曹操 有功 ，皇帝 仲 落咗 道 聖旨 。
準佢 贊拜 不名 ，入朝 不趨 ，劍履 上殿 。
即係 ，好似 往日 漢朝 丞相 蕭何 噉樣 。
亦都係 開始 嗰陣時 我哋 講過 啊 當日 董卓 噉嘞 。
從此之後 ，曹操 嘅 名聲 就 威震 中外 。
曹操 擊敗 西涼 嘅 消息 ，傳到 去 漢中 。
漢中 即係 而家 陝西 、湖北 呢 一 部分 嘅 地方 。
三國 嘅 時候 呢 係 一個 郡 ，首府 係 南鄭 ，即係 今日 陝西省 漢中市 嘅 東便 。
噉誒 ，當時 佢 呢個 消息 使到 漢寧 太守 張魯 啊 受到 極大 嘅 震動 。
呢個 張 魯 幾 古怪 㗎 吓 。
張魯 嘅 祖父 叫做 張陵 ，喺 西川 鵠鳴山 裏 便 修仙 煉道 ，有 啲 法術 。
啲人 都 好 信 佢 ，亦 好 敬重 佢 。
張陵 死咗 之後 呢 ，佢 個 仔 叫做 張衡 就 繼承 父親 嘅 衣缽 。
啲 老百姓 跟 佢 學道 嘅 呢 ，就 要 收 學費 ，收 幾多 呢 ？五斗米 。
當時 啲 人 嗌 佢 做 米賊 。
張衡 死咗 之後 ，張魯 就 接住 做落去 。
張魯 喺 漢中 自己 稱做 師君 。
噉嚟 跟佢 學道 個 徒弟 都 叫做 鬼卒 。
為首嗰個 叫做 祭酒 。
帶得人 最多 個 呢 就 叫做 治頭 大祭酒 喎 。
噉佢個道規呢 ，就係 以 誠信 為 主 ，唔準 欺詐 嘅 。
有病 嚟 求醫 嘅 呢 ，佢 就 同 你 開壇 。
叫個病人 住 一間 乾淨 清靜 嘅 房間 裏 便 ，反省 自己 做過 啲咩 錯事 ，要 供認 自己 嘅 罪過 。
然之後 呢 就 同 個 病人 祈禱 嘞 。
主持 祈禱 呢件事 嘅 人 啊 就 叫做 奸令 祭酒 。
點樣 祈禱 嘅 呢 ，幾 複雜 嘅 噃 。
誒 要 寫 一道 文書 ，喺 上 便 寫明 自己 嘅 名 ，講 自己 服罪 喇噉 ，一式 三份 ，就 名 叫做 三官手書 喎 。
一份 ，放喺 山頂 用嚟 稟奏 上天 ；一份 就 埋喺 地下 ，用嚟 稟奏 地府 ；一份 就 放落 條 河 底 用嚟 稟奏 水官 。
噉樣 做齊 之後 呢 ，如果 病 好喇 ，就 要 送 五斗米 作為 酬謝 ，嚱 。
噉啊喺各處地方呢 ，又起咗 好多屋 啊叫做 義舍 喎 。
噉喺 呢啲 屋 裏頭 呀 ，米 、飯 、柴火 、肉食 ，樣樣 都 準備好 㗎 喇 。
凡係路過嘅人 都 可以 根據 自己 嘅 食量 啊 ，隨便 去 攞嚟 食嘅 。
貪心 攞 多個 呢 ，要 受 天誅 ，啊 。
噉喺 張 魯 管轄 嘅 地方 之 內 啊 ，有 邊個 犯法 嘅 呢 ，必定 饒恕 你 三 次 先 ，仲 唔 改 嘅 就 罰 喇 。
噉喺 佢 呢啲 地方 啊 冇 官長 嘅 噃 ，全部 都係 由 祭酒 嚟 管轄 。
呢就係噉樣 ，張魯雄 據 漢中 呢個 地區 啊 已經 三十 年 嘞 。
朝廷 因為 呢個 地區 太過 邊遠 喇 ，好 難 去 討伐 佢 。
就 索性 任命 咗 張魯 做 鎮南 中郎將 兼 漢寧 太守 。
噉啊其實呢 ，每年 進貢 多少 畀 朝廷 就係㗎喇 。
噉 啊 話 說 張魯 當時 聽聞 曹操 擊敗 咗 西涼 大軍 ， 威震天下 。
佢 就 召集 大家 嚟 商量 啦 ，佢 話 ：
西涼 馬騰 畀 曹操 殺咗 ，馬超 又 打敗仗 ，噉 曹操 必定 嚟 侵犯 我哋 漢中 㗎 噃 。
我呀 想 自稱 為 漢寧王 ，帶兵 去 抵抗 曹操 ，諸君 認為 噉 好唔好 呢 ？
有個 謀士 叫做 閻圃 啊 ，佢 建議 話 喇 ：
漢川 嘅 民眾 ，有 十幾萬 戶 之多 ，財富 糧 足 ，四面 險固 。
目前 ，馬超 啱啱 打咗 敗仗 。
西涼 嘅 民眾 ，由 子午谷 呢 條 路 趯 嚟 漢中 嘅 不下 幾萬 人 啊 。
我嘅意思係噉嘅 ，益州 劉璋 為人 昏庸 軟弱 ，不如 先去 奪取咗 西川 四十一州 嚟 做 基礎 ，然後 再 稱王 都 未遲 吖 。
係噃 ！張魯 極之 歡喜 ，就 搵埋 佢 細佬 張衛 一齊 嚟 商量 起兵 嘅 事情 嘞 。
噉呢個 消息啊 ，就 畀 西川 方面 嘅 偵探 知道咗 ，就 立即 報告 返去 。
而家 講 下 嗰個 益州 劉璋 ，佢 個 別字 叫做 季玉 ，劉 季玉 ，係 劉焉 個 仔 ，乃 係 漢 魯 恭王 嘅 後代 。
劉焉 呢 做官 做到 益州牧 ，十幾年前 得病 死咗 。
噉 益州 啲 官員 呢 ，好似 趙韙 啊 等等 ，就 共同 保 阿 劉璋 啊 繼承 佢 父親 做 益州牧 。
劉璋 曾經 殺咗 張魯 嘅 母親 同 細佬 嘅 ，因此 兩個 啊 有 仇 。
劉璋 派 龐羲 做 巴西 太守 ，嚟 頂住 張魯 。
噉 當日 龐羲 探聽到 張魯 想 興兵 嚟 打 西川 嘅 消息 ，急急 報告 畀 劉璋 知道 。
劉璋 為人 十分 軟弱 ，一聽聞 呢個 消息 ，憂心 到 佢 不得了 。
連忙 召集 啲 文武 官員 嚟 商量 對策 。
有 一個 人 ，昂昂然 行 出嚟 話 ：
請主公放心啦 ，我 雖然 才疏學淺 ，就憑 我 三寸不爛之舌 ，就 可以 使到 張魯 唔敢 嚟 望 我哋 西川 一眼 喇 。
呢個 向 劉璋 獻計 嘅 人 係 邊個 呢 ？
佢 姓 張 名 松 ，字 永年 ，官職 係 益州 別駕 。
佢 呢個 人 呀 ，生得 尖頭 突額 ，扁鼻 哨牙 ，身高 唔到 五尺 ，係 個 矮仔 嚟 。
開聲 講嘢 好似 打鐘 噉嘅 。
劉璋 見 佢 講得 咁 有把握 佢 就 問 佢 啦 ：
別駕 你 有 何 高見 ，誒 可以 解除 張魯 嚟 侵犯 嘅 危險 呢 ？
主公 ，曹操 而家 做 丞相 。
佢 掃蕩 中原 ，呂布 、袁術 、袁紹 都 畀 佢 消滅 咗 ，最近 又 擊敗 馬超 ，真係 天下 無敵 啊 ！
主公 你 呀 準備好 一啲 禮物 ，我 親自 送去 許都 獻畀 曹操 ，說服 曹操 興兵 嚟 攻打 張魯 ，奪取 漢中 。
噉樣 一嚟 ，張魯 要 抵抗 曹操 都 嚟唔切 喇 ，佢 仲 敢 嚟 打 我哋 西川 咩 ？
哦 ，冇錯啊 冇錯啊 。
劉璋 非常 高興 ，立即 置辦好 金珠寶貝 作為 進貢 嘅 禮物 ，同時 任命 張松 做 使者 送去 許都 。
