張悦楷講《三國演義》, 050 | LingQ Cantonés Lesson

劉備第一次去隆中，見唔到諸葛亮，噉就返返去新野。過咗一段時候，劉備派人去探聽孔明嘅消息。返嚟報告話：臥龍先生已經返咗屋企。劉備個心就好歡喜，即刻叫人重新置辦禮物，又叫埋關羽、張飛嚟，準備起程第二次去隆中。張飛又開口：大哥，唔好去咯！點解呀三弟？諒佢一個鄉下佬，何必大哥親自去呢？叫個人去嗌佢嚟就得啦嘛。哼！孔明乃係當世奇才，嗌嚟都得嘅咩？聽你噉講你都唔好去喇，我同你二哥去算喇。誒大哥二哥都去，小弟點能夠唔去啊？既然要去，不得無禮。噉誒梗係啦。好喇，又起程喇。當日嘅天氣好冷呀。佢哋出咗城行咗冇幾遠，翻起北風，彤雲密布，過咗一陣就落起大雪嚟添。劉備見到落雪哈哈大笑，笑咩呢？佢笑呢場雪落得好啊。佢個心諗：落咁大嘅雪，諸葛亮點都唔會出門㗎喇，今次呀一定能夠同佢會面嘅。呢一陣，劉備就滿心歡喜吖。但係有個人個肚就咕咕聲唔高興喎，邊個啊？張飛。佢忍唔住就喺後便嘈起上嚟嘞：嘩，啊啊，嗯，好冷啊今日。嗯，好似噉嘅天氣，喺屋企裏便嚟，圍住火爐，飲燒酒，食羊肉，噉就痛快咯。天寒地凍都尚且唔用兵呀，仲要行咁遠，去搵嗰個無益之人，哼！如果佢又唔喺處，豈唔係又要白行一趟？劉備擰轉頭望住張飛：三弟。吓，大哥。你怕冷？小弟連死都唔怕，怕冷？你先頭唔係嗌冷咩？誒，今日係冷啊。三弟，而家離城不過幾里路，孫乾、簡雍佢哋都喺處呀。你不如返去同佢哋圍住火爐飲燒酒食羊肉罷啦。哦，誒噉大哥、二哥你哋呢？我同你二哥寧願冒住風雪去臥龍崗，等孔明知道我哋嘅誠心。大哥、二哥都去，小弟點能夠唔去呀？既然要去唔准多講！誒，係，係，唔講。一路行啊行啊，行咗唔少路，經過一間酒店，哈張飛又開口喇：大哥。三弟。行咗咁耐，個口有啲淡啊。口淡？係。劉備擰轉頭望下張飛，雙眼一掃，哈見到路邊嗰間酒店個心明白嘞。只見張飛已經勒定馬，一味望實間酒店。再睇下跟住嚟嗰班差人，冷到佢哋呀縮頭縮脖。劉備諗：確係嘅，咁冷嘅天時行咁遠路，實在係難頂。於是佢就話喇：三弟，我哋一齊入去間酒店飲返幾杯呢好嘛？好啊，啊大哥，你真係知道小弟嘅心水呀！呢趟就唔止張飛精神喇，嗰幾個差人呀個個都眉飞色舞咯。入到去，店主人招呼佢哋坐落。座熱咗幾壺酒，擺開幾碟送酒嘅小菜。劉備、關羽呢係咁意飲兩杯，禦下啲寒氣。張飛一啲都唔客氣喇，攞起酒壺，飲完一杯又一杯呀。呢個時候，劉備聽見隔籬房有人喺度唱起嚟。歌詞係噉嘅：壯士功名尚未成，嗚呼久不遇陽春！君不見：東海者叟辭荊榛，後車遂與文王親；八百諸侯不期會，白魚入舟涉孟津；牧野一戰血流杵，鷹揚偉烈冠武臣。又不見：高陽酒徒起草中，長楫芒碭隆準公；高談王霸驚人耳，輟洗延坐欽英風；東下齊城七十二，天下無人能繼蹤。二人功跡尚如此，至今誰肯論英雄？劉備聽咗呀個心暗暗讚好：呢一位嘅腹中才學唔錯啊！呢跟住又聽見另外一個人，敲住張枱喺度唱嘞喎：吾皇提劍清寰海，創業垂基四百載；桓靈季業火德衰，奸臣賊子調鼎鼐。青蛇飛下御座傍，又見妖虹降玉堂；群盜四方如蟻聚，奸雄百輩皆鷹揚，吾儕長嘯空拍手，悶來村店飲村酒；獨善其身盡日安，何須千古名不朽！劉備聽咗個心諗嘞：呢首歌雖然有出世隱逸嘅意思呀，但係亦暗含未受器重嘅感慨呀，絕非一般人所能夠作得出嚟嘅。啊，講唔定呢兩個人當中有一位係諸葛亮都唔定噃，我最好入去問一問。劉備於是拉開門簾行咗入去。見到兩個人喺張枱處，打對面坐，佢哋正喺度拍掌大笑啊。上首便坐住嗰個人，白面長鬚。打對面坐喺下首嗰個呢，相貌清奇古樸。劉備入到去，企定，對住佢哋深深作咗個揖：兩位，邊一位係臥龍先生啊？哈嗰兩個人啦，又似係擰頭又唔似係岌頭，唔話係又唔話唔係喎。嗰個相貌清奇古樸年紀輕啲嘅人就微微欠一欠身，望住劉備話：將軍係邊位呀？問臥龍咩事呢？劉備諗嘞：嗯，佢就係諸葛亮喇。臥龍先生，我乃係新野縣令，姓劉名備字玄德。久慕先生大名，日前，曾經到府上拜訪，未見高顏。今日冒雪前嚟，想唔到喺呢處巧遇，真係我之萬幸啊！講完，雙膝跪倒，行咗個大禮。嗰個人連忙企起身行開嚟扶起劉備。原來係劉將軍啊，我哋兩個並非臥龍，乃係臥龍嘅朋友嚟唔。劉備個心話喇：真論盡嘞，我又心急嘞。不過亦唔緊要，既然係諸葛亮嘅朋友，行個大禮尊重一啲亦應該嘅。劉備就話喇：仲未請教兩位先生高姓大名啊？噉呢個人呢就用手指住白面長鬚嗰個話喇：呢位係潁川石廣元，我係汝南孟公威呀。劉備已經聽司馬徽介紹過就知道呢兩位亦都係大名士。就拱一拱手話：哦，久聞兩位大名，今日有幸邂逅相遇，我呢處有隨行嘅馬匹，不如請兩位一齊去臥龍先生府上一談唄，未知意下如何呢？石廣元話喇：呵呵，我哋都係山野庸懶之徒，唔識治國安民呢啲事嘅，不勞下問，不勞下問。將軍去尋訪臥龍，誒請自便啦。講完就坐返低，又飲酒，唔理劉備嘞喎。正喺呢個時候，劉備聽見房外便有種聲嘞嗯！哎呀！劉備聽出嚟喇，張飛要發火啊，佢即刻向孟、石兩位告辭。一轉身，掀起道門簾行出去，當頭就見到張飛企喺房門口，仲喺度嗯噉喺度嗯緊。張飛呀點解又會企喺門口嘅呢？原來劉備先頭離席行咗入去隔籬嗰間房啊同人哋傾偈。張飛喺度開懷暢飲啦，佢見劉備入咗去咁耐下都未出嚟，唔知有咩事噃。所以佢就幾步行到嚟門口，掀起啲多門簾裝下。哈，啱啱就聽到石廣元最後講嗰幾句。又見劉備大哥啊畢恭畢敬噉企實喺處。嗰兩個人呢，竟然大模大樣坐喺處飲酒喎。噉都似樣嘅？張三爺怒從心上起呀惡向膽邊生。一發作起嚟就嗯噉嘞。正話想入去教訓下個兩個夫子先生，劉備醒水又趕返出嚟。劉備醒水就趕返出嚟，一手就揦住張飛個膊頭，一手指住張飛：哼！唔准開口！ Hmm? Hurry up ! Liu Bei grabbed Zhang Fei and they rushed out . Zhang Fei couldn't hold back and shouted loudly : Ah! How outrageous! These two people are too rude . Let me go in and tear those two apart ! Hmph! You bold rascal ,do not be reckless ! Liu Bei turned and saw the shopkeeper ,who was so scared he stood there dumbfounded . He said ,' Shopkeeper ,please calculate the bill .' After Liu Bei called for the bill ,he told Guan Yu : ' Second brother ,quickly take this rascal away ,lest he be rude .' So Guan Yu pulled Zhang Fei out ,followed Liu Bei ,andcontinued on their journey . When they arrived at the foot of Wolong Ridge , Liu Bei instructed Guan Yu : ' Second brother ,keep an eye on Third Brother for me while I go up the ridge to pay my respects to Mr. Wolong . You must not let him be rude .' 謹遵兄長吩咐。張飛個肚呀咕咕聲喇，我呢個人唔知點呢，仲要二哥看實我喎。劉備一步一步踏住雪行上山崗，嚟到草廬前便伸手敲門嘞。咯咯咯。裏便應咗聲：嚟喇嚟喇。咯，咦，開咗門嘞，哦！原來係劉將軍呀。啊係呀，冇錯係我劉備呀，你哋先生喺屋企嚟嘛？啊，有位先生喺屋企嚟呀。劉備滿心歡喜行咗入門口，跟住個小童行到中門。門上兩便，有副對聯寫住：淡泊以明志，寧靜而致遠。過咗中門，門對面係一道板照壁，板照壁背後就係草堂嘞。草堂裏便，端端正正有位青年坐喺度，抱住個手爐取暖，就攞住本書，正在睇到入晒神。劉備整一整衣冠，正話想行入去呀，就喺呢個時候，嗰位青年啊嗯噉清一清喉嚨，朗誦起嚟：鳳翱翔於千仞兮，非梧不棲。劉備一聽個心就讚好：先生外號臥龍，佢呢首歌詞嘅第一句，歌頌嘅就係鳳，龍鳳呈祥吖嘛，好，好，再聽佢下文。士伏處於一方兮，非主不依。樂躬耕於隴畝兮，吾愛吾廬；聊寄傲於琴書兮，以待天時。劉備一聽：好，真係絕妙嘅歌啊！完全係臥龍等待時機，飛升天外之志，一定係諸葛亮無疑喇！劉備快步行過板照壁，行上草堂，深深作個揖，佢話：新野縣令劉備，久慕先生大名無緣拜會。日前得徐元直先生推薦，敬來仙莊，適逢先生外出，未睹尊顏。今日專誠冒雪而來，得見臥龍先生，實為萬幸咯。講完，雙膝一跪，就叩頭行禮。呢一位青年書生，連忙放低書本，推開個手爐企起身，搶前一步扶住劉備。不敢不敢，尊駕莫非係劉玄德將軍？冇錯，我就係劉備。劉將軍，我唔係臥龍啊。劉備聽咗呀，喺個肚處嘆咗一口氣：唉！又唔係諸葛亮。於是就企返起身：哦，先生唔係臥龍，尚未請教。劉將軍，我係臥龍嘅細佬諸葛均啊。我哋兄弟三人，長兄諸葛瑾，而家喺江東孫仲謀處做幕賓。孔明乃係二家兄。劉備呢個時候呀，自己都覺得好笑起上嚟。自己個心成日諗住諸葛亮諸葛亮，見到個讀書人就迎住佢就係諸葛亮嘞，哈哈。誒請問三先生，令兄臥龍喺唔喺屋企呀？劉將軍嚟得唔湊巧，昨日下午崔州平嚟約咗佢去遊覽喇。劉備聽咗個心就埋怨崔州平嘞：遲唔約呀早唔約，偏偏昨日下午就掹咗佢出去遊覽？三先生，令兄去咗邊度遊覽呢？家兄嘅行蹤好難意料㗎。佢或者坐隻船仔遊於江湖之上；或者去崇山峻嶺探訪下啲和尚道士；或者去啲村落搵朋友；或者喺啲山谷洞府之內彈琴捉棋。總之，佢往來莫測，唔知去邊處㗎。唉，都係我劉備緣分淺薄，兩次都遇唔着大賢啊。啊，劉將軍請坐。諸葛均跟住叫個小童獻茶。劉備坐落，飲過茶，佢話：三先生，勞煩你借啲紙墨筆硯我，等我留封信畀令兄聊表心意啦。好，好呀。諸葛均叫個小童捧嚟文房四寶，擺好喺張枱處。然後呢就佢有佢睇書，劉備有劉備寫信。嗰封信個大意呢就係噉嘅：我劉備眼睇住朝廷衰微，群雄亂國，個心好不安。為咗要拯救天下，兩次嚟到拜訪先生都遇唔見。而家留低個字，表達下自己對先生嘅敬意同誠心，下次仲要嚟嘅。劉備寫完信，封好，交咗畀諸葛均。佢諗：今日既然一場嚟到嘞，不妨坐多一陣同諸葛均傾下偈。順便等下諸葛亮都好吖，講唔定會等到嘅呢？佢想等，有個人唔願等啊，邊個啊？張飛。張飛本來喺崗下由佢關二哥看住佢㗎嘛。佢見劉備上咗崗咁耐嘞有啲唔放心。佢係最怕劉備一個人行開咗出咩事嘅，佢忍唔住就話嘞：二哥。三弟。睇個樣，大哥實係會見到臥龍先生。你點知㗎？都去咗咁耐咯，實見到啦。等我都上去見下嗰個先生，睇佢係點樣至得。大哥關照過我，要我好好看住你㗎。二哥放心，小弟上崗，決唔會無禮嘅。噉見到張飛噉講，關羽就冇攔阻佢，由得佢上去。張飛上咗崗，嚟到草廬，入咗大門，行過中門就嚟到板照壁前面企定。佢裝一裝裏便，見到劉備喺當中嗰間草堂坐喺處，同一個年青人傾偈。個心就諗嘞：呢個年青人，一定係諸葛亮嘞。一轉眼，又見到個小童喺草堂門口煲緊茶。張飛就笑噬噬噉對住個細路翕翕手：欸，欸。個小童就行到佢面前：咩事呀？黑面將軍。哈，你個細路，出口傷人，誒我大哥喺你屋企。個小童都未等佢講完就話喇：哦，你嚟搵大哥呀？我哋屋企好多耕田佬㗎，邊個係你大哥啊？咩耕田佬啊，我大哥就係劉皇叔。哦，原來劉皇叔係你大哥咩？你睇，劉皇叔喺度同我哋三先生傾緊偈呀。誒，三先生係唔係臥龍先生啊？唔係，臥龍先生係臥龍先生，三先生還三先生。哦，臥龍先生喺邊處呀？臥龍先生唔喺企呀。吓？嘩！張飛嘩一聲就嚇到個細路一跳，掉頭就走。張飛忍唔住嘞，大步上前行過板照壁，大聲噉嗌：大哥啊，啲風越嚟越猛，雪就越落越大，臥龍先生既然唔喺屋企，請大哥返去罷啦！張飛個心諗喎：諸葛亮既然都唔喺屋企嚟，同三先生有咩傾頭啊噉喎。佢噉樣一嗌，劉備就急喇。佢諗：我正係想同諸葛均傾下，你呢個莽撞鬼又偏偏撞到嚟。劉備連忙起身，快步行出草堂嚟到張飛面前：三弟，你快啲出去。哦，大哥呀，啲風越嚟越猛。我知道喇，快啲出去啦。哦，誒啲雪越落越大喇。係喇，我知道喇，出去啦！大哥，臥龍先生既然唔喺屋企，請大哥返去罷啦。真係激到劉備冇晒辦法。佢用手撳住張飛個心口，出力咁推佢：走啦走啦，你快啲走啦！張飛一字退後仲一字嗌喎：大哥，風越嚟越猛，雪越落越大呀！劉備將張飛呀推咗過板照壁。見到關公趕到嚟喇，劉備就話：二弟呀，快啲嚟將呢個匹夫拉走，佢喺度呀真係無禮呀！關羽聽到劉備大哥噉講啊搶步上前，一手揦住張飛：走！蹬蹬蹬蹬，落咗山崗。劉備等關羽拉咗張飛出去，就行返入去草堂坐落，佢話：聽講令兄熟讀兵書，深明韜略，唔知三先生好唔好講啲畀我聽下，等我領教一二呢？劉將軍，家兄嘅事，我哋從來都冇過問，所以毫無所知呀。哦，劉備呀本來仲想搵個話頭，同諸葛均傾下。但係諸葛均開口嘞：劉將軍，家兄唔喺屋企，我亦不敢屈留將軍，請將軍返去先。第日等家兄返嚟，叫佢登門回拜啦。不敢不敢，我第日再嚟拜候令兄。剛才打擾晒，告辭喇。諸葛均送劉備出到大門口，劉備再三殷勤致意，然後分別。正話想起步行，就聽見個小童指住外便話：老先生嚟喇，老先生嚟喇！劉備跟住佢隻手望過去，只見前便冇幾遠啊有一道小橋。有個人，頭戴暖帽，身穿狐皮袍啊，騎住一匹驢仔，𠽤𡃈𠽤𡃈噉行緊嚟喎。仲有個青衣小童，挽住一隻紅咚咚嘅酒葫蘆，跟住喺後便嚟。騎住驢仔嗰個人啊啱啱過咗道小橋，吟起詩上嚟喎，嗰首詩就係噉嘅：一夜北風寒，萬里彤雲厚。長空雪亂飄，改盡江山舊。仰面觀太虛，疑是玉龍斗。紛紛鱗甲飛，頃刻遍宇宙。騎驢過小橋，獨嘆梅花瘦啊！劉備一聽：好，一定係諸葛亮返嚟喇！佢喇喇聲快步行前迎上去：啊！臥龍先生，頂風冒雪辛苦咯。新野縣令劉備久候多時喇。一講完，深深作咗個揖。騎驢仔嗰個人慌忙落地回個禮：不敢不敢。劉備正話想跪低叩頭行個大禮。諸葛均喺後便追上嚟話喇：劉將軍，呢位並非二家兄，乃係二家兄嘅外父黃承彥老先生啊。哈哈哈哈哈哈，嘿劉備自己好笑，我想諸葛亮呢想到入咗迷咯。將佢個朋友當諸葛亮，將佢個兄弟當諸葛亮。而家，連佢嘅外父大人當成諸葛亮咯。啊劉備轉肽亦轉得快喎，佢話：哦，原來係黃老先生！剛才聽見老先生吟嘅詩句非常高妙，故此錯認做令婿臥龍啊。劉將軍，你雙耳好使得啊！呢一首梁父吟，正係老夫喺小婿屋企見過嘅。因為鍾意佢寫得有新意，所以就記住喺個心嚟。剛才行過道小橋，見到有幾樹梅花喺雪中開放。一時感觸，就故此朗誦咗出嚟，點知畀將軍聽到添，哈哈哈哈。請問老先生，你一路嚟有冇見到令婿呢？吓？乜小婿唔喺屋企嚟咩？哈哈，誒老夫今日嚟亦係想嚟睇下佢嘅啫。哦噉呀，我告辭喇老先生，請啊！劉備對黃承彥作咗個揖，就扯嘞。唉，呢趟係第二次嚟，又遇唔見孔明。佢回轉頭一望，嗰間草廬已經隱沒喺紛紛嘅大雪之中。行到落山崗腳，就叫埋關羽、張飛上咗馬，一班隨從跟住，冒住風雪就返去新野縣。呢個時候，已經係年尾喇。劉備呀打算過咗年再去拜望諸葛亮。就請咗個占卦先生，擇定個吉日，專係等住過咗新年就三訪臥龍崗。噉啊話說大漢建安十三年春天，正月十三呢一日，劉備呀三顧草廬，去邀請諸葛亮下山。佢喺三日之前呀，就洗乾淨個身，開始食齋，焚香祈禱。晚上呢，一個人喺書房瞓，修身養性。嘿，嗰個求賢之心呀實在係夠晒誠懇。到咗十三嗰日，一早就叫差人去採辦禮品。事關去年辦嗰兩次禮呀，已經係隔咗年喇，陳年舊禮，唔能夠再用啦嘛。同時又叫人去請埋關公同張飛嚟，約佢哋一齊去臥龍崗。張飛上兩次都畀劉備訓過喇，哈哈呢次又學乖咗，冇開口。但係關二爺忍唔住喇：兄長唔好去喇。二弟，點解你叫我唔好去呢？兄長，諸葛亮年紀輕輕，有幾大本事至得㗎？兄長你兩次登門拜訪，已經盡晒禮㗎喇。睇嚟嗰個諸葛亮徒有虛名，毫無實學，所以佢就避而不見唧。今日又去第三次，太過喇兄長。關羽話諸葛亮年紀輕，諸葛亮年紀係輕。我哋睇戲睇親嗰個諸葛亮呢吓都係五柳長鬚，以為佢好老吖。其實呀，佢比劉備後生成二十歲。建安十三年，劉備三顧草廬呢一陣啊已經係四十七歲。諸葛亮先至係二十七歲咋。好喇，閑話休提，就講返下劉備。佢聽關公噉樣講呢就知道關羽有啲睇唔起諸葛亮，佢就話：二弟，你冇聽過咩？古時齊桓公要見東郭野人，去咗五次先至見上一面。見一個地位好低嘅小臣尚且如此，何況我係去見一位大賢呢？哦。關羽唔出聲，又輪到張飛忍唔住嘞：大哥，諸葛亮不過係個年紀輕輕嘅鄉下佬，點當得起大賢兩個字呀？呢次唔使大哥親自去喇，等我去得喇！你去？你點請得臥龍先生嚟呀？哼！佢肯嚟就嚟；唔嚟，我用條麻繩扎起佢，拉佢嚟！哼！三弟，你噉都講得出嚟嘅！我講你聽啦，當初周文王九訪姜太公係點樣㗎。文王將自己坐嘅車讓畀姜太公坐，自己呀親自拉車。文王尚且噉樣尊敬賢德嘅人何況我呢？你既然藐視佢，就唔好去喇，等我同你二哥去啦。大哥二哥你哋都去，小弟點能夠唔去啊？既然要去就不准無禮。誒噉梗係啦。好快脆，禮物採辦妥當喇。劉備同埋關羽、張飛出門上馬，帶住幾個隨從，第三次直奔臥龍崗。