曹操啊 已經 打穩咗 鴻圖大業 嘅 根基 ，高興啦 ！
嗰日 ，佢 喺 後堂 舉行 宴會 啊 ，召集 自己 嗰班 文官 武將 一便 飲酒 ，一便 商量 。
哈哈哈 ， 吖 睇 起 上 嚟 呀 ， 而家 外國 好 興 嗰 啲 咩 工作 早餐 啊 工作 午餐 啊 等等 ， 一便 食 牛扒 一便 傾 工作 ， 嘻 都 係 學 曹操 都 唔 定 啊 吓 。
噉啊曹操話嘞 ：而家 劉備 駐兵 喺 徐州 嚟 ，接管 咗 徐州 。
最近 呂布 啊 因為 打 咗 敗仗 走 去 投靠 佢 ， 佢 就 收留 咗 呂布 ， 叫 呂布 住 喺 小 沛 。
如果 佢哋 兩個人 同心共力 ，帶兵 嚟 進犯 我哋 嘅 話 ，確係 心腹 大患 嚟 㗎 。
各位 有 咩嘢 妙計 搞掂 佢 呢 ？
許褚 話嘞 ：畀 五萬 精兵 我 吖 ，等 我 去 斬 劉備 、呂布 個人頭 獻 畀 丞相 。
荀彧 就 話嘞 ：許 將軍 勇猛 就夠晒 勇猛喇 ，但係 仲未 識得 策略 啊 。
目前 許都 剛剛 安定 ，唔應該 逳下 就 用兵 ，係嘛 ？
我 有 一條 計策 ，叫做 二虎爭食計 。
哦 ，請 講落去 。
嗱 ，而家 劉備 雖然 係 接管咗 徐州 唧 ，但係 仲 未曾 得到 朝廷 正式 任命 嘅 噃 。
噉 曹公 你 就 去 稟奏 皇上 ，正式 委任 劉備 做 徐州牧 。
同時 呢 ，寫 封 密信 畀 佢 ，叫 佢 去 殺咗 呂布 。
噉 呢件事 如果 做成 嘞 ，劉備 就 冇 咗 呂布 呢個 猛士 嚟 輔助 佢 啦 ，我哋 慢慢 就 可以 制服 劉備 嘞 。
如果 劉備 呢件事 做唔成 ，噉 呂布 就 一定 要 殺 劉備 嘅 喎 。噉 就係 二虎 爭食 之計 嘞 。
啊 ，好計啊 ！
第日 ，曹操 稟奏 過 獻帝 ，派遣 使者 帶住 皇帝 嘅 聖旨 去 徐州 ，封 劉備 做 征東 將軍 ，宜城 亭侯 ，領 徐州 牧 ，同時 呢 ，附 一 封 密信 。
而家 就 講 下 劉備 佢 喺 徐州 ，聞之 皇帝 去咗 許都 ，正 話 想 寫 個 表章 送去 祝賀 。
忽然 接到 報告 話 天使 到 啊噉 ，即刻 就 出城 去 迎接 ，返到嚟 衙門 宣讀 聖旨 ，接受 咗 新 封 嘅 官爵 ，高興 啦 。
跟住 就 擺 酒 款待 天使 ，喺 飲酒 嘅 時候 個 天使 話 ：
君侯 蒙受 皇恩 得到 呢個 任命 ，都係 曹 將軍 喺 皇上 面前 一力 舉薦 㗎 。
劉備 表示 非常 感謝 曹操 ，個 天使 就 攞出 封 密信 嚟 交畀 劉備 。
佢 睇完 封信 就 話嘞 ：呢件事 仲要 商量 一下 先 。
散咗席之後 ，劉備 就 送 天使 喺 賓館 休息 。
跟住 劉備 漏夜 就 叫 齊啲 人 嚟 商量 呢件事 嘞 。
張飛 就 話 啦 ：呂布 本來 係 個 毫無 信義 嘅 人 ，殺咗 佢 有 乜 所謂 啊 ！
劉備 話 ： 佢 打敗 咗 冇 埞 走 ， 走到 嚟 投奔 我 ， 我 如果 殺 咗 佢 ， 噉 亦 係 唔 講 信義 啫 。
好人 難做 啊 大哥 ！
劉備 硬係 唔肯 ，噉 其他 嘅 人 亦 冇 咩 意見 。
第日 ，呂布 嚟到 祝賀 ，劉備 請 佢 入去 大廳 坐 ，呂布 話 ：
聽聞 劉公 接受 咗 朝廷 嘅 恩命 ，加官進爵 ，所以 專誠 嚟 祝賀 啊 ！
唔敢當 ，唔敢當 ！
正喺呢個時候 ，只見 張飛 張三爺 揸住 把 寶劍 喺 手 ，蹬蹬聲 行上嚟 大廳 要 殺 呂布 喎 。
劉備 慌忙 攔住 佢 ： 三弟 ， 三弟 ！ 千祈 唔 好 亂 嚟 啊 ！
呂布 亦 大吃一驚 ：翼德 ，你 因咩事 一味 要 殺 我 呢 ！
曹操 話 你 係 個 唔 講 信義 嘅 人 ，叫 我 大哥 殺咗 你 ！
三弟 你 出去 先 ， 你 出去 先 ！ 劉備 喝 咗 張飛 出去 ， 然後 就 帶 呂布 一齊 入去 後堂 ， 就 老老實實 ， 將 前因後果 講 畀 呂布 聽 。
同時 呢 ，仲 將 曹操 寫 畀 佢 嗰 封 密信 交 畀 呂布 睇 。
呂布 睇完 信 就 流起 眼淚 上嚟 話 ：哎 ，呢啲 乃係 曹賊 想 搞到 我哋 兩個 不和 唧 ！
兄長 你 唔使 憂慮 嘅 ，我 劉備 發誓 唔做 呢啲 不仁不義 嘅 事 。
呂布 噉 就 再三 拜謝 。劉備 就 留住 呂布 喺度 飲酒 ，一直到 夜晚 先至 送 佢 返去 。
呂布 一 走 ，關公 同 張飛 就 話嘞 ：
大哥 ，你 點解 唔 殺 呂布 呢 ？
呢啲 不過 係 曹操 怕 我 同 呂布 聯合 埋 一齊 去 打 佢 ，所以 就 用 呢 一條 計策 ，想 使到 我哋 兩個 互相 併吞 ，佢 就 從中 取利 咋嘛 。
我哋 為咩事 要 畀佢 當 刀使 呢 ？
哦 ，係啊 ！兄長 你 睇得 深 啊 ！關公 醒悟過嚟 ，一味 猛咁 岌頭 。
但係 張飛 話嘞 ：我 冇嘢 ，我就係 要 殺咗 呢個 奸賊 ，以 絕 後患 咋 ！
劉備話 ：噉樣 就 唔係 大丈夫 嘅 所為 啦 ，我哋 唔能夠 噉 做 嘅 。
張飛 冇 聲 出 。
第日 ，劉備 送 天使 返 京師 ，呈 份 表章 畀 皇帝 謝恩 ，並且 覆咗 封信 畀 曹操 ，只係 話 等 以後 慢慢 再 算 啦 噉 。
嗰個 使者 返到去 就 見到 曹操 ，話 劉備 唔肯 殺 呂布 啊噉 。
曹操 就 問 荀彧 話嘞 ：你 條 計 唔得嘞 ，噉 點呢 ？
荀彧 話 ：仲有 一條 計 ，叫做 驅虎吞狼計 啊 。
哦 ， 呢 條計 又 點 嘅 呢 ？
我哋 暗中 派 個人 去 袁術 嗰處 同 佢 講 ，話 劉備 秘密 噉 上咗 個 奏章 畀 皇帝 ，要 去 攻打 南郡 。
袁術 一聽 ，一定 會 嬲起上嚟 要 去 打 劉備 嘅 。
噉到 其時 曹公 你 用 天子 嘅 名義 ，發佈 命令 叫 劉備 討伐 袁術 。
兩便 一 火併 起上嚟 ，呂布 嘅 心 就 變 㗎 喇 ，呢個 就 叫 驅虎吞狼計 嘞 。
曹操 極之 歡喜 啊 。首先 就 派人 去 袁術 處 ，跟住 用 天子 嘅 名義 發佈 命令 ，派人 送去 徐州 。
呢一日 ，劉備 接到 命令 ，話 要 佢 起兵 去 討伐 袁術 喎 。
噉 送咗 個 使者 走 之後 啊 ，糜竺 就 話 ：
呢個 ，又 係 曹操 嘅 詭計 嚟 啊 。
劉備 話嘞 ：雖然 明知 佢 係 詭計 ，不過 皇上 嘅 命令 唔能夠 違抗 㗎 。
於是就 點齊 兵馬 ，定咗 日期 出發 。
孫乾 對 劉備 話嘞 ：留 邊個 守 徐州 ，要 定咗 落嚟 先 喎 。
誒 ，你們 話 我 兩個 細佬 當中 ，留 邊個 守城 好 呢 ？
關公 話 嘞 ：留 我 守 城 啦 。
我 時時 都 要 同 你 商量 事情 嘅 ，點 能夠 離開 你 呢 ？
張飛 話 ：噉就 等 我 守城 啦 ！
你呀 ？你唔能夠 守城 㗎 ！
你 一來 飲完酒 就 脾氣 唔好 ，周時 都 鞭打 啲 士兵 。
二來 做事 任性 唔聽 人 勸 嘅 。唔得嘅 唔得嘅 ，留 你 喺度 我 唔放心 。
噉 小弟 從而家起 ，唔 飲酒 ，唔 打士兵 ，樣樣 都 聽 人 勸 ，噉 就 得啦 嘛 。
糜竺 將 佢 嘅 軍 話 嘞 ：就係 怕 你 口 不對心 喎 。
吓 ？哼 ——我 跟隨 大哥 咁 多年 ，未曾 失信 過 一次 ，你 為乜事 睇小 我 啊 ！
劉備 話嘞 ：三弟 ，你 雖然 係 噉 話唧 ，我 始終 都係 唔 放心 ，仲係 請 陳元龍 留低 輔助 你 啦 。
元龍 ，你 要 經常 提醒 佢 ，要 佢 少 飲啲 酒 ，免至 誤事 至 好啊 ！
陳元龍 就係 陳登 ，就 接受咗 命令 應承咗 落嚟 。
劉備 樣樣 都 準備妥當 之後 ，呢一日 ，就 統率 馬部 軍兵 三萬 人 離開 徐州 ，向 淮南 進發 嘞 。
而家 講下 袁術 ， 佢 聽聞 劉備 上 咗 個表 畀 皇帝 ， 話 要 吞併 佢 嘅 州 縣 喎 ， 嬲 到 佢 咬牙切齒 話 ：
劉備啊劉備 ，你 不過 係 個 賣草鞋 嘅 鄉下佬 唧 ，而家 佔領 個 徐州 大郡 ，同埋 各路 諸侯 同 起 同坐 。
我 正 係 想 去 討伐 你 呀 ， 你 反而 想 嚟 謀 我 係 嘛 ？
哼 ！可恨啊 ，可恨啊 ！
於是就 派 上將 紀靈 ，點起 十萬 大軍 就 殺去 徐州 。
噉劉備 同 袁術 兩支 部隊 喺 盱眙 遭遇 嘞 。
盱眙 呢 地方 即係 喺 今日 安徽省 嘅 鳳陽 縣 以 東 。
劉備啊兵少 ，得 三萬人 咋嘛 ，佢 依山傍水 啊 ，扎好營寨 。
嗰個 紀靈 呀 ，係 山東 人 ，使 一把 三尖刀 ，五十 斤 重 嘅 。
呢一日 ，佢 帶兵 出陣 ，大聲 噉 鬧 劉備 話 ：
劉備 你個 鄉下佬 ！居然 侵犯 我哋 境界 咁 斗膽 ！
劉備 話 ：
我 奉 皇上 聖旨 ， 討伐 叛逆 ， 你 而家 膽敢 抗拒 ， 真 係 罪不容誅 呀 ！
紀靈 嬲嘞 ，拍馬 舞刀 直取 劉備 。
關公 大喝 一聲 話 ：哼 ！你 呢個 家伙 唔好 猖狂 ！出馬 同 紀靈 大戰 。
連氣 打咗 三十個 回合 不分 勝負 。
紀靈 大聲 話 暫停 噉 ，關公 就 撥轉 馬頭 回 陣 ，企 喺 陣前 等 佢 嘞喎 。
哈哈 ，誰知 紀靈 就 派 個 副將 荀正 出馬 。
關公 就 話 啦 ：你 去 叫 紀靈 嚟 ，等 我 同 佢 決 個 雌雄 ！
荀正話嘞 ：哼 ！你 係 個 無名下將 ，唔係 紀將軍 嘅 對手 啊 ！
關公 一發火 ，拍馬上前 直取 荀正 ，只係 一個 回合 ，手起一刀 ，就 斬咗 荀正 落馬 。
劉備 即刻 揮兵 衝殺 過去 ，殺到 紀靈 大敗 ，一直 向 後退 ，守住 淮陰 河口 ，就 唔敢 正式 交戰 。
以後呢 ，只係 叫 啲 軍士 呀 去 偷營 劫寨 ，但係 去親 都 畀 徐州 嘅 軍兵 殺敗 嘅 。
兩方 呢 都 相持住 ，噉 喺 呢處 呢 暫時 就 唔 講 佢哋 先 嘞 。
而家 返轉頭 講下 張飛 。
張飛佢 送咗 劉備 起程 之後 ，噉 徐州 一切 嘅 雜事 呢 ，冚𠾴唥 都 交晒 畀 陳登 去 管理 ，至於 軍機 大事 啊 ，就 由 佢 自己 斟酌 作主 嘞 。
呢一日 ，佢 舉行 個 宴會 ，請 齊 啲 官員 嚟 飲酒 。
大家 坐定 之後 ，張飛 就 開口 喇 ，佢 話 ：
我 大哥 臨行 嘅 時候 ，吩咐 我 要 飲 少啲 酒 ，怕 我 誤事 。
今日 呢 ，各位 都 要 盡地 一醉吓 ！聽日 就 人人 都 要 戒酒 ，幫 我 守城 。但係 今日 ，杯杯 都 要 飲 勝嘅 ！
講完 ，張飛 就 起身 同 各位 官員 敬酒 嘞 。
敬到 曹豹 面前 ，曹豹話 ：
嘿嘿 ，誒 ，我 誒生落嚟 就 戒酒 嘅 咯 喎 。
嚱嚱！ 做個 軍佬 打打殺殺 ， 唔 飲酒 都 得 嘅 咩 ？ 飲 ！ 我要 你 飲 一杯 ！
誒 ， 誒 ， 誒 誒 ， 誒 誒 ， 誒 噉 啊 ， 誒 誒 ， 呵呵 呵 ， 好 ， 誒 誒 飲 ， 誒 飲 。
曹豹 怕嘞 ，眯埋眼 ，夾硬 飲咗 一杯 。
張飛 敬勻晒 各位 官員 ，自己 攞咗 一隻 用 野牛角 做嘅 大杯 ，斟到 滿瀉 ，連氣 飲咗 幾十 杯 。
咩 話 ？ 幾十杯 呀 ？ 冇 錯 喎 ， 幾十杯 啊 ！
飲到 佢 醉晒 ，好喇 ，又 試 起身 同 大家 敬酒 嘞 。
又 試輪 到 曹豹 咯 喎 ， 曹豹 話 ： 哎 ， 真 係 對 唔 住 喇 ， 對 唔 住 咯 ， 我 實在 唔 飲得 㗎 喇 ， 張將軍 。
哈哈哈 哈哈哈 ， 啊 ， 你 𧦠 我 ！ 啱 先 你 都 飲 咗 咯 ， 而家 你 點解 唔 飲 啊 ？ 啊 ！ 飲 ！ 飲 ！
誒 ，真係 唔得 嘅 咧 ，嘻嘻 ，張將軍 ，我 真係 唔得 嘅 咧 。
曹豹 再三 推辭 唔肯 飲 ，張飛 飲醉酒 發脾氣 嘞 ：
吓 ！你 違抗 我 嘅 將令 ，該 打 一百 ！
人嚟 ！同我 捉起 佢 打 ！
陳登勸佢話嘞 ：張將軍啊 ，玄德公 臨行 嘅 時候 點 吩咐 你㗎 ？
哼 ！你 係 文官 ，管 你 文官 嘅 事 ，你 咪 嚟 管 我 ！
曹豹 冇 收 ，就 唯有 𠼮 張飛 話 ：
誒 ， 誒 翼 德公 ， 唔 該 你 睇 在 我 女婿 份 上 ， 饒恕 我 啦 。
哦？ 你 女婿 係 邊個 ？
係呂布啊 。
吓 ！啊 ——嘿 ！我 本來 都 唔想 打 你 嘅 ，你就 搬出 個 呂布 嚟 嚇 我 係 嘛 ？
我 偏要 打 你 ， 我 偏要 打 你 ！ 我 打 你 就 係 打 呂布 ！
張將軍 ，唔好啊 ！
翼德公 ，你 唔好 發火 咋 。
大家 猛咁 勸 張飛 都 勸佢 唔聽 ，係 要 打 ，終歸 係 將 曹豹 鞭到 五十下 。
大家 苦苦 幫 曹豹 求饒 ，噉 先至 冇 再 打落去 。
散咗席 ，曹豹 返到 屋企 ，嬲到 張飛 入骨 喇 。
佢 漏夜 寫咗 封 信 ，派 人 帶 去 小沛 送畀 呂布 ，將 張飛 點樣 欺負 佢 法 ，講晒 畀 呂布 聽 。
同時 話 劉備 已經 去咗 淮南 喇 ，今晚 可以 趁住 張飛 酒醉 ，帶兵 嚟 偷襲 徐州 ，唔好 錯過 呢個 機會 啊噉 。
呂布 收到 岳父 嘅 來信 ，即刻 就 請 陳宮 嚟 商量 。
陳宮 話嘞 ：小沛 本來 就 唔係 長久 居住 嘅 地方 嚟 。
而家 徐州 既然 有 可乘之機 ，噉 都 仲 唔去 攞咗 佢 呀 ，就 悔之晚矣 咯 ！
呂布 聽 佢 講 ，即刻 就 披褂 上馬 ，帶 五百 馬軍 行 先 ，叫 陳宮 帶領 大軍 跟住 嚟 ，高順 呢 亦都 隨後 進發 。
小沛 離開 徐州 只係 四五十里 ，上馬 就到 個嘞 。
呂布 嚟 到 徐州 城下 嘅 時候 先至 係 四 更天 ， 城樓 上 呀 一 啲 都 冇 發覺 ， 呂布 嚟 到 城門 邊就 嗌 喇 ：
劉使君 有 機密 使者 到 啊 ！
城樓上 有 曹豹 嘅 人 ，即刻 就 去 報告 曹豹 。
曹豹 上城 一 睇 ，好喇 ，嚟嘞 ，即刻 就 叫 軍士 開 門 。
呂布 一聲 暗號 ，嗰啲 軍兵 ：衝啊 ！一齊 湧入 城 。
當時 張飛 正 喺度 飲醉酒 吖 ，喺 屋企 瞓緊 ，瞓到 噘噘聲 。
啲 衛士 急急噉 擙醒 佢 話 ：呂布 騙 開 個 城門 殺 咗 入嚟 喇 ！
咩話 ？備馬 ！張飛 發大火 ，連忙 着 好盔甲 ，攞起 支 丈八蛇矛 出咗 大門口 。
啱啱 上得 馬嚟 ，嘩 ！呂布 軍馬 已經 衝到 ，一下 撞到 正 。
張飛 呢陣時 呀 ，酒 都 未曾 醒 ，打起 上嚟 就 冇 力 。
哈之噉 ，呂布 一向 都 知道 張飛 好 勇 嘅 ，所以 亦 唔 敢 逼得 佢 太 緊要 。
打得 兩 打 ， 十八個 燕將 ， 即 係 同 張飛 同鄉 嘅 軍官 嘞 ， 保住 張飛 ， 飛馬 殺出 東門 。
連 劉備 嘅 家眷 都 賴 低 咗 喺 屋企 ，顧 都 顧唔切 喇 。
嗰個 曹豹 見到 張飛 只係 得 十幾個 人 保住 佢 ，又 蝦 佢 飲 醉酒 ，帶住 百零個 馬軍 追上嚟 嘞 噃 。
張飛 一見到 曹豹 呀 ，嬲到 火烚烚 ，一拍 隻 馬 迎上去 就 打 。
打咗 三個 回合 ，曹豹 邊度 係 手腳 呢 ，掉頭 就 走 。
張飛 追佢 追到 河邊 ，一槍 㨃過去 ，㓤中 曹豹 嘅 背脢 ，連 人 帶 馬 摏咗 落 河 死咗 。
噉 張飛 喺 城外 招呼 啲 士兵 ，出得 城 嘅 ，冚𠾴 唥 都 跟隨 張飛 去 淮南 搵 劉備 。
噉 呂布 入咗 徐州 之後 呢 ，馬上 啊 出榜 安民 。派咗 一百 名 軍士 保護住 劉備 嘅 住宅 ，唔准 啲 人 隨便 入去 。
張飛啊 帶住 幾十個人 ，一直 嚟到 盱眙 見到 劉備 ，話 曹豹 同 呂布 裏 應 外合 ，夜襲 徐州 ，徐州 失守 。
哎呀 ！哎徐州失守啊 ！大家 聽咗 面色 都 變晒 。
劉備 話嘞 ：唉 ！得 有 咩 咁 歡喜 ，失 又 有 咩 好 憂 呢 ？算咯 。
關公 問嘞 ：阿嫂 喺 邊處 啊 ？
啊？ 阿嫂 ，失陷 喺 徐州 嚟 啊 。
嘿！ 三弟 ，你 當初 要 守城 嘅 時候 講過 啲 乜嘢 ！兄長 又 點樣 吩咐 你 㗎 ！
而家 徐州 又 失咗 ，阿嫂 又 唔見埋 ，噉樣 點算 ，噉樣 點算 啊 ！
啊 ？ 啊 ？ 啊 —— 誒 ！
張飛 聽 關公 噉 講 ，真係 羞愧 難當 無地自容 啊 ！𠻘聲 掹出 把 劍 嚟 想 自刎 。
劉備 即刻 撲上去 抱住 張飛 ，搶咗 把 劍 掉咗 喺 地 嚟 。
哎 ！ 三弟 啊 ！ 三弟 ！
古人 都有話 ：兄弟 如 手足 ，妻子 如 衣服 。衣服 破 尚可 縫 ，手足 斷 安可 續 啊 ？
我哋 三個人 桃園 結義 ，不求 同生 但願 同死 ！
今日 ，雖然 失去咗 城池 同 家人 老小 ，但係 我哋 兄弟 ，點 能夠 噉樣 就 死 呢 ？
況且 ， 徐州 本來 就 唔 係 我 嘅 ， 家眷 雖然 失陷 喺 城裏 頭 ， 我 估計 ， 呂布 一定 唔 會 害 佢 哋 ， 仲 可以 想 辦法 救出 嚟 嘅 。
三弟 ， 你 不過 係 一時 之誤 ， 使 乜 要死 咁 交關 呢 ？ 三弟 ！ 啊 ， 哎 ！
講完 ，劉備 放聲 痛哭 。
關公 、張飛 都 感動到 流起 眼淚 啊 。
而家 講 下 袁術 。
佢 知道 呂布 襲擊 佔領 咗 徐州 ，就 即刻 派 人 去 呂布嗰處 ，應承 送 糧食 五萬石 、馬 五百匹 、金銀 一萬兩 、彩緞 一千匹 ，約 呂布 夾攻 劉備 。
呂布 好 歡喜 ，命令 高順 率領 五萬 兵馬 ，由 後 便 襲擊 劉備 。
劉備 一 得到 呢個 消息 ，趁住 天陰 落雨 撤兵 嘞 放棄 盱眙 ，想 向 東 便 進攻 搶佔 廣陵 嘞 。
廣陵 即係 喺 今日 江蘇省 江都縣 嘅 東北 。
所以 等到 高順 嘅 軍隊 嚟到 嘅 時候 呢 ，劉備 已經 去咗 嘞 。
高順 見咗 紀靈 ，就 問 佢 攞 糧食 、馬匹 等等 嘞噃 。
紀靈話 ：將軍 請 帶兵 返去 先 ，等 我 見到 主公 同佢 講 啦 。
於是 高順 就 帶兵 返去 徐州 ，將 紀靈 所 講 個 說話 回復 呂布 。
呂布 個 心 正在 思疑 乜 噉 㗎 ，哈 ，嗰 頭 袁術 有 信 到 嘞 。
打開嚟 一睇 ，封信 嘅 大意 係話 ：高順 雖然 係 嚟過 ，不過 冇 打到 劉備 噃 。
等 將來 捉到 劉備 之後 ，到時 一定 將 應承 送 嘅 物件 送上 嘅 噉 。
嘩！ 激死 呂布 咯 ！袁術 噉樣 失信 都有 嘅 ？好似 氹 細佬 哥 噉 呀 ，豈有此理 ！起兵 打 佢 ！
陳宮 話 ：唔好啊 ，袁術 佔據住 壽春 ，兵 多 糧 廣 ，唔好 輕敵 啊 。
不如 仲係 請 劉備 返嚟 喺 小沛 駐扎 ，等 佢 成為 我哋 嘅 羽翼 噉 唔係 仲 好 。
第日 ，我哋 叫 劉備 做 先鋒 ，到 其時 就 先 打 袁術 後 掃 袁紹 ，噉 就 可以 縱橫 天下 啦嘛 。
呂布 採納咗 陳宮 呢個 意見 ，就 派 人 帶信 去 請 劉備 返嚟 。
當時 劉備 佢 帶兵 向 東 便 進發 ，係 想 奪取 廣陵 吖 。
點知 有 一次 畀 袁術 劫寨 ，啲 兵馬 損失 咗 成 大半 ，正係 狼狽 嘅 時候 ，啱啱 就 遇着 呂布 個 使者 帶 信 嚟 嘞 。
劉備 睇咗 信 唔知 幾 歡喜 呀 。
但係 關公 同 張飛 話 ：呂布 係 個 毫無 信義 嘅 人 ，唔好 信 佢 啊 ！
劉備 話嘞 ：佢 既然 好心好意 待 我 ，點解 要 懷疑 佢 呢 ？於是 劉備 就 帶隊 去 徐州 。
呂布 亦 好會 做 喎 ，佢 怕 劉備 疑心 啊 ，喺 劉備 入 城 之前 ，就 派 人 將 家眷 送 返嚟 畀 劉備 先 。
甘夫人 、麋夫人 見到 劉備 ，口口聲聲 都 話 呂布 呢 派 咗 士兵 守 實 住宅 嘅 大門口 ，唔 畀 啲 垃雜人 入 屋 ，又 經常 叫 啲 婢女 送 食用 嘅 物件 嚟 ，樣樣 都 齊備 啊 噉 。
劉備 就 對 關公 、張飛 話 ：係唔係 啊 ？我 就 知道 呂布 必定 唔會 害 我 嘅 家眷 嘅 。
噉就 入城 去 多謝 呂布 。
張飛 啊 嬲 呂布 ，唔 肯 跟埋 去 ，就 護送 兩個 阿嫂 去 小沛 先 。
劉備 見到 呂布 就 深深噉 表示 感謝之情 啦 。
呂布 話嘞 ：我 唔係 話 想 搶 你 嘅 城 ，皆因 令弟 張飛 喺 處 飲 醉酒 鬧事 要 殺人 ，我啊 怕 失事 所以 就 嚟 守城 唧 。
劉備話 ：我 早就 想 將 徐州 讓畀 兄長 㗎喇 。
噉唔好嘅 ，噉唔好嘅 。
呂布 仲 詐 假意 話 想 將 徐州 交 返 畀 劉備 。
但係 劉備 堅決 推辭 唔肯 ，終歸 呢 ，就 返去 小沛 駐扎 。
以前 自己 係 喺 徐州 ，收留 呂布 喺 小沛 住 ，而家 啱啱 調返轉頭 喎 ，噉 關公 、張飛 啊 深深 不忿 啦 。
劉備 就 話 嘞 ： 我 哋 要 暫時 委屈 一下 ， 安守本分 等待 時機 ， 命中注定 嘅 事 無謂 去爭 啊 。
噉 關公 、張飛 就 唔 出聲 。
呂布 呢 亦 唔 話得 ，經常 啊 使 人 送 糧食 布匹 嚟 。
噉 從此之後 ，兩家 和好 ，呢啲 就 暫時 唔 講 佢 住 。
而家 只係 講下 袁術 。
佢 係 喺 壽春 嚟 ，壽春 即係 喺 今日 安徽省 壽縣 嗰度 。
嗰日 ，佢 啊 請 齊啲 將士 嚟 舉行 個 盛大 嘅 宴會 。
啲 人 報告 話 孫策 去 攻打 廬江 太守 陸康 ，得勝 返嚟 喇 噉 。
袁術 就 叫 佢 入嚟 ，孫策 入到嚟 ，跪 喺 廳堂 下 便 就 拜見 袁術 。
袁術 慰勞 咗 佢 幾 句 就 叫 佢 埋 席 參加 宴會 。
原來 孫策 啊 ，佢 自從 父親 孫堅 死咗 之後 呢 ，就 趯咗 去 江南 住 。待人 謙虛 有禮 ，廣泛噉 結交 嗰啲 有學問 、品德高尚 嘅 人士 。
後嚟 因為 陶謙 同 佢 嘅 舅父 ，丹陽 太守 吳景 不和 ，孫策 呢 就 將 母親 同 家屬 ，搬咗 去 曲阿 ，即係 而家 江蘇省 丹陽縣 嗰度 住 ，就 避免 衝突 。
佢 自己 呢 ，就 走咗 去 投奔 袁術 。
袁術 就 非常 之 喜歡 佢 嘅 ， 時時 都 好 感慨 噉 話 㗎 喇 ： 哎 ， 如果 我 有 個 仔 好似 孫郎 噉 ， 我 死 咗 都 冇 乜 遺憾 咯 噉 嘅 。
因此呢 ，就任命 孫策 做 懷義 校尉 ，派佢 帶兵 去 進攻 涇縣 大帥 祖郎 ，結果啊 打贏咗 。
袁術 見 孫策 果然 英勇 ，又 派 佢 去 攻打 陸康 ，今日 就 得勝 返嚟 嘞 。
噉孫策 喺度 參加 袁術 嘅 宴會 嘅 前因後果 呢 就係 噉嘅 。
當晚 ，散咗席 之後 ，孫策 就 返去 自己 嘅 軍營 。
佢 諗起 袁術 喺 酒席 筵前 對待 自己 嘅 態度 咁 傲慢 ，個 心 呀 ，又 翳 又 悶 。
見月色咁好 ，就 行出去 天井 散下步 啦 。
佢 思前想後 ，想到 父親 孫堅 咁 英雄 ，而 自己 竟然 淪落到 今日 噉 嘅 地步 。
諗 下 諗 下 ， 就 忍 唔 住 放聲 喊起 上 嚟 啊 。
