流浪狗

「走開啦！你好污糟呀！」

「阿仔快啲走，唔好俾呢隻污糟嘢行埋嚟！」

「走呀！走呀！我叫你走呀！唔好行埋嚟呀！」

全部人都好嫌棄噉避開一隻好污糟嘅狗仔。

「點解佢哋好似唔鍾意我噉嘅？我只係想揾佢哋幫下手 ……」狗仔好攰噉瞓喺垃圾堆上面，一路望住外面，好似等緊人噉，個肚仔一路喺度叫。

我係一隻狗仔，我好鍾意同阿檸一齊玩㗎！記得一個月前我仲係半歲，嗰陣我住喺一個好細嘅籠入面，籠外面人來人往，仲成日聽到啲人講咩「歡迎光臨」。最後唔知做咗啲咩，阿檸就帶咗我返佢屋企喇！

阿檸好鍾意同我玩㗎，佢仲成日都叫我畀隻手佢，但「手」即係咩呀？佢係咪諗住請我食嘢？好呀，好呀！我就坐喺度等佢畀嘢我食。有時佢又會將啲樹枝拋到好遠，到底想點呢？唔明呀！跟住佢好似有啲嬲嬲哋噉。

兩個星期之後，阿檸已經好少理我喇。有時我揾佢玩，佢會好大聲鬧我，我肚餓都唔敢出聲，我好驚佢鬧我。

突然有一日，阿檸爸爸開車帶我哋出去玩。坐車嗰陣，好似聽到阿檸爸爸話：「買咗兩個星期就唔要嗱？」我唔知佢講緊咩，但我好開心呀！好耐冇出過去喇！嗰日落好大雨，阿檸拖住我去到一個垃圾堆，叫我喺度等佢。我乖乖哋喺度等 ……

我由朝等到晚，都仲未見到阿檸返嚟。我又凍又肚餓。

一日一日噉過去，喺呢段日子，我肚餓就揾下垃圾堆有冇嘢食，覺得眼瞓就喺垃圾堆度瞓。

到咗今日，我終於驚覺阿檸可能係蕩失路，就想揾人幫手揾佢 ——佢依家一個人一定好驚㗎喇！但我辛苦咗大半日，都係無功而返。正當我諗住返埋去垃圾堆度唞下，一陣腳步聲由遠至近，最後停咗喺我後面。我以為係阿檸，即刻轉頭一望 ——原來唔係 ……

係另一個男仔。佢望咗我好耐，跟住就走埋嚟。嗰時我好驚佢會好似其他人噉打我，所以我即刻縮返去後面。佢停咗喺度，打開書包，拎咗一包腸仔出嚟，好似想叫我一齊食。我真係太肚餓喇，忍唔住行上前食咗一啖，見佢冇鬧我，我就繼續食埋佢。佢笑住同我講：「仲要唔要呀？」我點點頭，佢又拎多一條俾我食。跟住佢每日都會畀嘢我食，又同我一齊玩 ……

大家好！我係阿明，係個小學生。我喺上星期開始見到街上有隻流浪狗仔周圍走，佢肚餓就喺垃圾堆揾嘢食，有時唔小心掂到啲路人仲會俾人鬧、俾人打。見到佢噉，我唔忍心，於是用晒啲零用錢嚟買腸仔俾佢食，得閒又嚟同佢玩。

就係噉過咗一星期。

我決定帶隻狗仔返屋企。雖然我好驚媽媽會鬧我，但見到佢咁慘，我唔忍心。

媽媽一見到隻狗，就大聲問我：「隻狗仔喺邊度拎返嚟㗎？」

我細細聲答：「我啱啱喺街執嘅 ……我 ……我哋可唔可以養佢呀？」

媽媽見到隻狗仔成身都係傷，好嚴肅噉同我講：「你想養佢？你做到以下兩樣嘢，我就畀你養。」

「第一，你要日日同佢玩，同佢沖涼，餵佢食嘢 ……」

我點點頭 ……

唔經唔覺，我已經養咗呢隻流浪狗（佢依家叫「阿旺」）三年喇，我哋一直都玩得好開心。

我到依家都仲好記得媽媽講嘅第二個要求：「你可能有好多朋友，但你要記住，佢只係得你呢一個朋友，所以你唔准抌低佢，唔理佢。」

當時我好大力噉點咗一下頭。

想養寵物諗一諗

養佢一世唔准抌

Hambaanglaang - Level 4, 流浪狗

流浪狗