蝴蝶 好 靚 呀

「大家 快啲 過嚟 集合 ，我哋 要 出發 喇 ！ 阿花 ！ 快啲 埋嚟 ，等緊 你 呀 ！」

阿花 細細聲 ：「哦 ，我 依家 過嚟 喇 老師 。」

「 大家 好 ， 我 …… 我 叫 阿 ...... 阿花 。 之前 老師 話 ， 唔 想 我 哋 淨 係 掛 住 讀 ...... 讀書 ， 都 要 多 啲 出去 睇 下 嘢 ， 開 ...... 開 下 眼界 ， 所以 老師 今日 帶 我 哋 一 班 同學 ， 出去 大自然 行 下 …… 」

「我 喺 鄉村 新 搬嚟 冇 耐 ，啱啱 先 入嚟 呢 ...... 呢間 學校 兩 星期 …… 我 唔敢 同 其他 同學仔 講 ...... 講嘢 ，我 驚 佢哋 話 我 大鄉里 ，睇唔起 我 呢啲 鄉村 嚟 嘅 人 ——」

「呀 ！」 突然 ，全部 同學 大叫 一 聲 ，原來 有 一 隻 毛毛蟲 躝 過 。

老師 就 問 ：「有冇 人 知道 毛毛蟲 大個 咗 會 變 咩 ？」

「乜 佢 會 變身 嘅 咩 ？」 全部 同學 都 你 眼 望 我 眼 ，冇 人 識 答 呢 條 問題 。

阿花 好 緊張 ，佢 知道 答案 啊 ！ 佢 諗 咗 一陣 ，終於 慢慢 舉手 話 ：「老師 ，我 知道 ……」

老師 見 阿花 平時 咁 文靜 ，就 問 ：「噉 答案 係 咩 呀 ？」

阿花 答 ：「係 蝴蝶 。 佢哋 變 咗 蝴蝶 之後 仲 會 識 飛 ——」

「真係 ？ 阿花 講 多 啲 俾 我哋 知 吖 ！」 阿心 同學 問 阿花 。

阿花 慢慢 講 ：「毛毛蟲 有 好多 毛毛 ，佢哋 最 鍾意 食 樹葉 。 到 佢哋 慢慢 長大 ，就 會 變成 蛹 ，最後 破繭而出 ，就 會 變成 蝴蝶 。」

同學仔 聽到 都 話 神奇 。

阿花 好 開心 ，佢 開始 慢慢 繼續 講 ：「佢哋 仲 有 好多 唔同 顏色 ，好 靚 㗎 ！」

老師 都 接口 ：「係 呀 ！ 蝴蝶 有時 仲 好 鍾意 一齊 飛 去 公園 食嘢 ，嗰度 會 多 啲 嘢 食 。」

老師 又 語重心長 噉 話 ：「其實 我哋 同 毛毛蟲 一樣 ，每 個 人 一 開始 都 係 毛毛蟲 。

「有啲 人 細細個 就 好 有錢 ，有啲 人 嘅 屋企 就 冇 咁 有錢 。」

「但 噉 唔 代表 你哋 將來 都 會 一直 係 噉 ：到 你哋 大個仔 大個女 ，就 會 發現 其實 人 係 會 變 ，當 你哋 變 得 更 叻仔叻女 ，嗰陣 就 係 你哋 破繭成蝶 嘅 時候 喇 ！」

阿花 聽 完 老師 嘅 一 番 話 ，再 望 一 望 眼前 嘅 蝴蝶 。

「 我 都 想 有 改變 —— 我 想 同 其他 同學 做 好 朋友 …… 但 首先 我 要 學 下 唔 好 咁 在意 其他 人 嘅 眼光 …… 」

阿心 佢哋 喺 另 一邊 睇緊 蝴蝶 ，阿花 就 行埋去 問 ：「阿心 ，你哋 可唔可以 摻埋 我 一齊 睇 啊 ？」

「當然 可以 ！ 我哋 一齊 玩 吖 ！」 阿心 應得 好 爽快 。

於是 佢哋 一齊 玩 咗 大半日 。

「大家 快啲 過嚟 集合 ，我哋 要 走 喇 ！ 阿花 、阿心 ！ 快啲 埋嚟 ，等緊 你哋 呀 ！」

「哦 ！ 」阿心 應 完 就 拉住 阿花 隻 手 問 ：「我哋 做 個 好 朋友 ，好唔好 ？」

阿花 細細 聲 ： 「 好 、 好 …… 」 又 不停 點頭 。

睇嚟 迎接 阿花 嘅 ，係 個 美麗 嘅 改變 呀 ！