一 飯 千 金

喺 二千 幾 年 前 ， 中國 古代 有 一 位 好 勁 嘅 將軍 ， 佢 叫做 韓信 。 佢 嘅 本領 天下 第一 ， 無 人 能 及 。 而家 我 要 講 佢 細個 受 人 照顧 ， 大個 報恩 嘅 故事 。

韓信 細個 好 窮 ， 冇 錢 食飯 ， 而且 佢 父母 好 早 過身 ， 所以 平時 只 可以 乞 飯 食 。

因為 佢 父母 好 早 就 死 咗 ， 佢 冇 人 可以 依靠 。 有 一 日 ， 佢 去 咗 河邊 釣魚 ， 諗 住 食 魚 充飢 。 喺 呢 個 時候 ， 佢 見到 一 位 洗衫 嘅 婆婆 。 婆婆 見到 韓信 個 肚 餓 到 扁 晒 ， 就 餵 佢 食飯 ， 一連 幾十 日 都 係 噉 ， 直到 婆婆 洗 晒 啲 衫 。 韓信 好 感動 ， 佢 同 婆婆 講 ：「 你 咁 照顧 我 ， 將來 我 一定 會 好好 報答 你 。」 婆婆 就 話 ：「 我 請 你 食飯 ， 係 因為 我 見 你 可憐 。 我 唔 需要 你 報答 我 ， 我 只 需要 你 努力 做人 。 」 韓信 覺得 好 慚愧 。 從此 ， 韓信 認真 閱讀 兵書 ， 練習 武藝 ， 決心 要 做 一 個 有用 嘅 人 。

過 咗 一排 ， 韓信 遇到 一 位 蝦 蝦 霸霸 嘅 少爺 。 呢 位 少爺 話 ：「 你 生到 牛高馬大 ， 又 帶 刀 佩劍 ， 其實 你 只 係 一 個 冇 膽鬼 。」 之後 仲 當眾 侮辱 佢 ， 話 ：「 你 夠膽 就 一 劍 拮 死 我 ； 唔 夠膽 就 瓹 我 褲襠 底 過去 啦 ！」 韓信 心 諗 ：「 如果 我 攞 劍 拮 佢 ， 殺 咗 人 就 要 坐監 。 噉 樣 做 好 唔 抵 ， 都 係 唔 殺 佢 好 啲 。」 之後 韓信 真 係 瓹 佢 褲襠 底 。 周圍 睇 熱鬧 嘅 人 都 笑 佢 細膽 。

後來 ， 韓信 做 咗 劉邦 嘅 將軍 。 當時 劉邦 只 係 一 個 小王 ， 冇 能力 統一 天下 。 劉邦 又 覺得 韓信 好 普通 ， 所以 只 係 畀 佢 做 個 小 將軍 。 於是 有 一 晚 ， 韓信 決定 離開 劉邦 。

丞相 蕭何 知道 之後 ， 就 即刻 騎馬 追 韓信 返 嚟 。 劉邦 知道 就 好 嬲 ：「 逃走 嘅 將軍 有 幾十 個 ， 點解 你 偏偏 要 追 韓信 ？」 蕭何 話 ：「 如果 你 甘心 做 一 個 小王 ， 你 可以 唔 要 韓信 ； 但 如果 你 要 一統天下 ， 冇 韓信 你 就 做 唔 到 ！」 劉邦 知道 錯 在 自己 ， 於是 封 咗 韓信 做 大將軍 。 最終 ， 喺 韓信 嘅 幫助 下 ， 劉邦 成功 統一 天下 。

韓信 功成 之後 ， 始終 冇 忘記 當初 幫 佢 嘅 婆婆 。 佢 返 鄉下 揾 返 嗰 位 婆婆 ， 畀 咗 一千 兩 黃金 佢 —— 呢 個 就 係 成語 「 一飯千金 」 嘅 由來 。 當然 ， 韓信 都 冇 忘記 當初 想 害 佢 嗰 位 少爺 。 嗰 位 少爺 見 返 韓信 ， 知道 人 哋 做 咗 大將軍 ， 嚇 到 手震 腳震 ， 咩 都 講唔 到 。 點知 韓信 竟然 話 ：「 雖然 你 當眾 羞辱 過 我 ， 但 亦 因為 噉 ， 我 至 識得 忍辱負重 ， 仲 成就 咗 今日 嘅 我 。 所以 我 唔 會 報仇 ， 仲 會 以德報怨 ， 畀 個 官 你 做 。」

韓信 一生 人 入面 ， 影響 佢 最 大 嘅 有 三 個 人 ， 分別 係 婆婆 、 少爺 ， 同埋 蕭何 。 如果 你 係 韓信 ？ 你 又 會 點 報答 佢 哋 ？