Food - Lesson 2
طبعا، في كتير تشابه بين عادات الطبخ في الشرق الأوسط، من مصر وبلاد الشام في الجهة الشرقية للعراق في الغرب لليمن في الجنوب. بس لكل دولة أكيد في طعمات ونكهات مختلفة. اليوم، في هادا البودكاست رح أخبركم عن الطعمات اللي بنحبها وبنكرها في عمان عاصمة الأردن. أولا، مش غريب أبداً على أهل البلد إنو يطلعو من الصبح بكير عشان يفطروا بره البيت، ومن فطوراتنا اللي كتير بنحبها أكلة الفلافل المقرمش والحمص الزاكي والخبز الطازه. وللعلم الخبز العربي بيقدم بسرعة في البيت وعشان هيك الناس بفضلو يشتروه أول بأول. وفي يوم الجمعة من الصبح بكير، بوقفو العالم طوابير طويلة على مطاعم الحمص والفلافل زي مطعم أبو جبارة ومرات بيحتاجو لنص ساعة أو ساعة ليخلصو شرا الفطور. ولازم يكون عسفرة الفطور يوم الجمعة خبز طازة طالع من الفرن وحمص وشرحات بندورة وخيار مملحين وبيض مقلي على وجهه رشة ملح وفلفل ومنغنغ بزيت الزيتون. وشعبنا مش ميال كتير لأكل الشوربات، يعني الشوربة المنتشرة الوحيدة اللي بتخطر عبالي هي شوربة العدس اللي بناكلها أكتر اشي بشهر رمضان. وأكتر الأسياء اللي بنفضل ناكلها هي لحمة العجل والخروف وبنفضلها على الجاج لانو الجاج إلو زنخة أكتر من اللحمة وبنفضل تكون اللحمة مستوية زيادة ودايبة ومدهنة ومبهرة. ولكل طبق محضر من اللحمة بنستعمل بهارات وتوابل مختلفة عشان بنحب النكهات المتنوعة. أصلا أكلاتنا قد ما هي كتيرة ما بتخلص. وبنقدر نقول إنو بنحب الأكل الحامض وبنعصر الليمون على كتير أطباق. والأردنيين مش ميالين للأكل المقرمش أو المفتت أو اليابس. يعني الأكل الطري المدهن بمشي معاهم أكتر. وتقريبا، بنستعمل كل أنواع الخضار على الطبيخ بسنادرا ما بنضيف أي فواكة على الأكلات المالحة زي كتير شعوب تانية. ومن الأكلات اللي الناس ما بتحبها كتير الباذنجان لأنه ما إلو طعم. أما بالنسبة لطبقي المفضل فهو المسخن، المكون من خبز طابون عليه كتير زيت زيتون وبصل وسماق وجاج محمر. بحبو لانه كتير لزيز وطري. أما دلال فطبقها المفضل هو الملوخية الخضراء المعصور عليها ليمون عشان تصير حامضة وبتحب تاكلها مع رز وجاج محمر. بنحب تيجو تزورونا وتجربو كل أكلاتنا!