My life lesson 2

بالأول رح أخبركم عن شغلي، بعدين رح أخبركم عن شغل دلال. وبدي أشوف إزا بتقدرو تحزروا شو بنشتغل أنا ودلال. وبرأيكم، هل بنحب شغلنا أو لا؟

أنا شغلي متعب جسديًا بس مش عاطفيًا، وممكن يكون كتير متعب لإني بقعد ساعات طويلة وأنا بشتغل وعشان هيك ما بحب يكون شغلي عالانترنت. بفضل إني اطلع من البيت والتقي بالناس إللي بشتغل معهم واتمشى بأوقات الاستراحة وادردش مع زملائي، بس مع هيك، شغلي كتير ممتع، لإنو كل يوم وكل موضوع بختلف عن التاني. وبكّيف بس تطلع معي أنسب كلمة للسياق، وبالحقيقة، بكون شعوري كتير حلو وأنا بساعد الناس يفهمو بوضوح الحكي بالقاعة خاصة إنهم ما بيحكو نفس اللغة.

وهلأ رح أخبركم عن شغل دلال، لازم دلال تتدرج بلغتها وتغير من أسلوبها على طول، ووظيفتها مش سهلة، خاصة لما يكون عندها حصص طويلة، بس بنفس الوقت شغلها في جانب إبداعي وفي عواطف لإنها بتتعامل مع الصغار والكبار، وممكن شغلها بجيب توتر للناس اللي ما بحبو يحضروا قبل بوقت. لإنو التحضير كتير مهم عشان توصل الشغل بطريقة إلها معنى وجودة. بس على عكسي، دلال بتحب تشتغل عالانترنت مع إنها برضه بتحس إنو القعدة الطويلة متعبة. المشترك بيني أن ودلال إنو مستحيل نشتغل بمكتب. وما بنقدر نشتغل لساعات محددة ولوظايف بدوام كامل. وما عنا مشكلة نقبض فلوس أقل طالما ضغط الشغل علينا مش كتير.