司馬懿 發動 政變 啊 ，佢 帶兵 出城 ，駐扎 喺 洛河 岸邊 就 守住 道 浮橋 吖 。
而家 講下 曹爽 手下 啊 ，有 個 司馬 叫做 魯芝 ，司馬 係 官名 。
佢 見到 城內 發生 事變 ，就 去 搵 參軍 辛敞 商量 話 ：
而家 仲 達 噉樣 作 起 亂嚟 ，我哋 點 做好 啊 ？
辛敞 話 嘞 ：不如 帶領 本部 兵馬 出城 去 見 天子 啦 。
嗯 ，冇錯 ，噉 我哋 一齊 去 。
唔 該 你 等一等 。 辛敞 講完 就 急急 返入 去 後堂 。
辛敞 有個 家姐 叫做 辛憲英 ， 佢 見到 辛敞 噉 嘅 樣 就 問 嘞 ：
你 有 咩嘢事 啊 ？點解 咁 慌張 噉 嘅 ？
家姐 ， 天子 出 咗 外 ， 太傅 突然 關閉 城門 ， 必定 係 想 謀反 啊 。
司馬公 未必 係 想 謀反 嘅 ，睇嚟 ，不過 係 想 殺 曹將軍 啫 。
啊 ，噉啊 ，噉 呢件事 唔知 會 有 點 結果 呢 ？
曹將軍 唔係 司馬公 嘅 敵手 ，一定 失敗 嘅 。
而家 魯司馬 叫 我 一齊 去 見 天子 ，唔知 去 好 定 唔去 好 呢 ？
一個人 ，當然 要 盡忠職守 啦 ，就算 見到 一個 普通 嘅 人 有 難 啊 ，都 要 去 幫 下 佢 吖 嘛 。
何況 喺 人哋 手下 做事 ，遇到 危難 ，唔通 反而 放棄 職守 咩 ？
如果噉做呀 ，一世 都 衰㗎 。
嗯 ，家姐 你 講得 有道理 ，我 去 喇 。
於是 辛敞 同埋 魯芝 帶住 幾十 人 ，騎住 馬 斬開 城門 大鎖 ，就 衝咗 出去 。
守門嘅人 就 立即 去 報告 司馬懿 啦 。
司馬懿 聽見 話 走咗 兩個 唄 ，佢 又 怕 桓范 亦都 走埋 就 急急 派 人 去 召 佢 嚟 。
桓范 就 同 個 仔 商量 。
佢 個 仔 話 ：車 駕 在 外 ，父親 不如 混 南門 出去 走 罷 啦 。
桓范 就 聽 個 仔 話 ，立即 上馬 就 跑 到 去 平昌門 。
當時 城門 就 已經 閂實 嘞 ，守門 嘅 門將 呢 ，就 叫做 司蕃 ，佢 係 桓范 舊時 嘅 下屬 嚟 。
桓范 一去到 城門 ，就 喺 衫袖 籠 攞出 一件 竹版 對 司蕃 話 ：
太后 有 詔 ，你 快啲 開門 。
司蕃話嘞 ：請 大人 將 詔書 畀 卑職 檢查 一下 。
哼 ！你 係 我 舊時 嘅 下屬 ，點解 要 噉樣 做 咁 斗膽 ？
司蕃 無可奈何 ，就唯有 開門 放桓范 出城 。
桓范 一 出咗 城 ，就 同 司蕃 話 喇 ：我 話 你 聽 啦 ，太傅 作 反 啊 而家 ，你 快啲 跟 我 一齊 走 罷 啦 。
咩話 ？大人 你 返嚟 ，你 返嚟 ！
司蕃 大吃一驚 啊 ，就 想 去 追 ，但係 已經 追唔到 嘞 ，就 派 人 去 報告 司馬懿 啦 。
司馬懿 一 聽 又 走埋 桓范 ，佢 就 話 喇 ：
弊 喇 ！ 智囊 實洩 露出 去 㗎 喇 ， 如之奈何 呢 ？
蔣濟 就 好定 ，佢 話 ：嗰啲 人 ，只係 會 貪圖 安逸 ，毫無 大志 ，冇用 嘅 ，太傅 唔使 擔心 嘅 。
雖然 話 係 噉話啫 ，之 司馬懿 功夫 要 做到 十足 。
佢 叫 許允 、陳泰 兩個人 嚟 吩咐 佢 兩個 話 ：
你哋 去 見 曹爽 ，就 話 太傅 冇 其他 意思 嘅 ，就 話 要 削 佢哋 兄弟 兵權 啫噉 ，要 佢哋 唔使 驚 。
噉許允 、陳泰 兩個 就 去嘞 。
跟住 司馬懿 又 叫咗 殿中 校尉 尹大目 嚟 。
然後 叫 蔣濟 啊 寫好 一 封 信 交畀 尹大目 ，帶 去 見 曹爽 。
司馬懿 話 ：你 同 曹爽 係 好 朋友 ，你 嚟 做 呢件事 就 啱晒 。
你 去 見 曹爽 ，就 話 ，我 同 蔣濟 當住 洛水 發誓 ，只係 為咗 兵權 嘅 事 唧 ，並 冇 其他 意思 嘅 。
尹大目啊 遵照 命令 就 去 嘞 。
好喇 ，我哋 而家 輪到 要 講返 下 曹爽 嘞 。
佢 喺 郊外 正在 放 啲 牙鷹 啊 放 啲 獵狗 ， 高高興興 喺 度 打緊 獵 啊 。
忽然 有 報告 嚟 ，話 城內 發生 變亂 ，太傅 送咗 表章 到 噉 。
曹爽 一 聽 嚇到 腳 軟 啊 連 馬 都 挾 唔住 幾乎 𢴈咗 落地 。
黃門官 捧住 司馬懿 嘅 表章 ，跪 喺 魏主 曹芳 面前 。
曹爽 手震震 接過 表章 拆開 封皮 ，就 交畀 啲 侍臣 嚟 讀 。
司馬懿 嘅 表章 大意 呢 就係 話 ：
先帝 當日 召見 臣 同 曹爽 ，託付 後事 。
時至今日 ，曹爽 背叛 咗 先帝 嘅 遺命 ，敗壞 國家 嘅 法制 。
在內 ，擅自 仿效 天子 嘅 衣服 器皿 ；
在外 就 專橫跋扈 ，作威作福 。
又 用 黃門官 張 當 為 都監 ，監視 天子 ，傷害 皇上 骨肉之親 ，使到 天下 不安 ，人人 都 心懷 危懼 。
臣 同 蔣濟 、司馬孚 等 ，都 認為 曹爽 目無君主 ，佢 幾 兄弟 ，都 唔適宜 再 統率 御林軍 喺 宮禁 之 中 警衛 。
故此 ，請得 太后 命令 ，按照 臣等 嘅 稟奏 施行 ，削去 曹爽 、曹羲 、曹訓 嘅 兵權 ，立即 回府 聽候 命令 。
不准 拖延 時間 ，阻止 車駕 ，膽敢 違反 ，就 以 軍法 從事 ！
臣 現時 已經 將 兵馬 駐扎 喺 洛水 浮橋 ，注視住 形勢 。
魏主 曹芳 聽完 ，就 對 曹爽 話 喇 ：太傅 就係 噉樣 講 嘞 ，卿家 你 想 點樣 做 呢 ？
曹爽 呢陣時 呀 ，已經 六神無主 手足無措 咯 ，佢 問 兩個 細佬 ：
點呀 ？吓 ？點啊 ？點啊 ？
曹羲 話 ： 小弟 ， 亦 都 曾經 勸過 兄長 㗎 啦 ， 兄長 你 執迷不悟 硬 係 唔 聽 勸 ， 以致 有 今日 。
司馬懿 此人 詭譎 無比 ，孔明 尚且 鬥 佢 唔 贏 ，何況 我哋 幾 兄弟 呢 ？
不如 ，不如綁住自己去見佢 ，希望 能夠 免去 一死 係啦 。
說話 未完 ，參軍 辛敞 、司馬 魯芝 嚟到 嘞 。
曹爽 就 問 佢哋 究竟 點樣 啦 。
佢 兩個 話 ：城裏 便 把守 得 好似 個 鐵桶 咁 密 ，太傅 帶 兵 駐扎 喺 洛水 浮橋 。
睇嚟呀 ，實唔好 返去 喇 ，將軍 要 早啲 決定 點做 至好 啊 ！
正喺度 講緊 大司農 桓范 就 跑馬 嚟到 ，佢 對 曹爽 話 喇 ：太傅 已經 叛變 喇 ，將軍 點解 唔 請 皇上 去 許都 ，調 外地 嘅 兵馬 嚟 討伐 司馬懿 呢 ？
曹爽 話 喇 ：唉 ！我哋 全家 都 喺 城 裏 便 嚟 㗎 ，點 能夠 投奔 去 外地 請求 援助 嘅 呢 ？
桓范話喇 ：一個人 面臨 危難 ，尚且 希望 生存 落去 啊 。
而家 主公 跟隨住 皇上 號令 天下 ，邊個 敢 唔聽 啊 ？點解 要 去 自投死地 啊 ？
噉呀 ，唉 ！唉 ！
曹爽 聽 桓范 噉樣 講 ，硬係 落唔到 決心 ，一味 喺度 歎氣 流 眼淚 。
桓范 又 話 喇 ：喺 呢度 去 許都 不過 係 一日 嘅 路程 ，城內 嘅 糧食 完全 足夠 支持 好幾 年 嘅 。
現時 主公 你 其他 嘅 兵馬 ，就 喺 京師 嘅 南方 ，一 叫 就 到 㗎 喇 。
大司馬嘅印 ，下官 已經 帶咗嚟 喇 ，主公 快啲 起行 啦 ，一遲 就 弊 㗎 喇 。
曹爽話 ：哎 大家 唔好催 我 唔好催我 ，等 我 仔細 考慮 下 先 啦 。
過咗冇幾耐 ，侍中 許允 、尚書 陳泰 嚟嘞 ，佢哋 同 曹爽 話 ：
太傅 僅僅 係 因為 將軍 嘅 權力 太 重 ，不過 係 要 削去 兵權 啫 ，再冇 其他 意思 ，請 將軍 早啲 返入 城 啦 。
曹爽 聽咗 唔出聲 。
冇幾耐 ，又只見 殿中 校尉 尹大目 嚟到 嘞 ，佢 對 曹爽 話 ：太傅 指住 洛水 發誓 ，並 冇 其他 意思 。
蔣太尉 有 封信 畀 你 ，請 將軍 你 削去 兵權 ，早啲 返去 相府 啦 。
曹爽 信 喎 ，認為 講得 啱噃 。
桓范 又 對 曹爽 話 喇 ：形勢 危急 啊 ，唔好 聽 佢哋 講 ，去 自尋死路 啊 ！
當晚 ，曹爽 嘅 心情 矛盾 到 極之 厲害 ，揸唔定 主意 。
突然間 ，佢 撐聲 拔出 把 劍 ，嘿 ，但係 毫無 表示 ，只係 長嗟短歎 就 猛 喺 處 諗 。
嘿 ，由 黃昏 一直 到 第 朝早 ，一味噉 流眼淚 始終 猶疑不決 。
桓范 等到 忍唔住 嘞 ，就 入去 中軍帳 催促 佢 話 ：
主公 啊 主公 ， 你 考慮 咗 一日 一夜 喇 ， 點解 仲 唔 決定 得 啊 ？
嘭噉 一聲 曹爽 掉低 把 劍 佢 話 ：唉 我 唔起兵 ，唔起兵啊 。
哎我 情願 唔做 呢個 官 ，做返 個 有錢佬 就 心足 喇 ，
吓 ？吓 ？
桓范 當堂 喊起嚟 ，佢 行出 中軍 帳 佢話 ：
唉 ！曹子丹 一生 ，都 為 自己 嘅 足智多謀 而 驕傲 ，但係 睇 佢 呢 三個 仔 ，直情 好似 豬牛 一樣 啊 ！啊啊啊啊啊 。
許允 、陳泰 叫 曹爽 啊 ，首先 將 大將軍 嘅 印 交 畀 司馬懿 。
事到如今嘞 ，曹爽啊 同意啦 ，就攞個大印 ，要交畀 許允 、陳泰 。
主簿 楊 綜就 揦 實 大印 嗰 條 綬帶 ， 喊住 對 曹爽 話 ： 主公 啊 主公 啊 你 今日 放棄 咗 兵權 ， 自己 綁住 自己 去 投降 ， 就 免不了 要 喺 東市 被 斬 㗎 主公 ！
曹爽話 ：太傅 ，佢 對 我 一定 唔會 失信 嘅 。
於是 曹爽 將 大印 ，交畀 許允 、陳泰 先行 送去 畀 司馬懿 。
好咯 ，軍隊 見到 將印 都 冇咗 嘞 ，仲 唔 走 咩 ，冚噉 就 散晒 。
當時 曹爽 手下 啊 ，只係 剩返 幾個 官員 仲 肯 跟住 佢 。
當佢哋 行到嚟 浮橋 嘅 時候 ，司馬懿 傳令 ，叫 曹爽 三 兄弟 返去 自己 嘅 住宅 先 。
其餘啲人 就 監禁起嚟 ，聽候 命令 。
所以 曹爽 三 兄弟 入城 嘅 時候 啊 ，就 一個 人 跟隨 都 冇 喇 。
過咗 一陣 ，桓范 佢哋 亦 返轉頭 行到 浮橋 邊 。
司馬懿 坐 喺 馬 上 用 條 馬鞭 指住 佢 話 ：
桓大夫 ，點解 搞到 噉樣 啊 ，吓 ？
桓范 耷低 個 頭 唔 出聲 ，入 咗 城 。
跟住 司馬懿 就 請 魏主 曹芳 ，返 入 洛陽 。
而家 講 曹爽 三 兄弟 返到 屋企 之後 ，司馬懿 就 下令 用 把 大鎖 將 佢哋 屋企 大門 鎖實 。
再派 八百 名 居民 沊沊𡃈噉 ，圍住 佢 屋企 。
嘩嗨 ，噉 究竟 係 咩嘢 意思 㗎 ？
曹爽 個 心 就 好 憂愁 啦 。
呢一日 ，曹羲 同 曹爽 話喇 ：
而家 屋企 冇 糧食 ，兄長 你 寫 封 信 去 畀 太傅 問 佢 借 糧 。
如果 佢 肯 借 糧 畀 我哋 嘞 ，就 即係話 唔會 害 我哋 㗎啦 。
係喎嚱 。曹爽 即刻 寫好 封信 派人 送去 。
司馬懿 睇咗 信 ，就 派人 送 一百 斛 ，即係 大約 一百 擔 糧食 去 曹爽 屋企 。
曹爽 就 歡喜 到 眉開眼笑 嘞 佢 話 ：
哎呀 司馬公 根本 冇 害 我 個 意思 㗎 ！
噉就 放晒 心 ，一啲 都 唔 憂慮 咯 喎 。
點知道 司馬懿 呀 一早 就 將 黃門官 張 當 拉咗 ，韞咗 入去 監獄 審問 。
張 當 招供 話 ：
唔止 我 一個人 㗎 ，仲有 何晏 、鄧颺 、李勝 、畢軌 ，丁謐 五 個人 ，佢哋 都 係 一齊 謀反 篡位 㗎 。
司馬懿 攞到 張當 嘅 口供 ，立即 將 何晏 佢哋 一班人 逮捕 起嚟 審問 。
噉佢哋 都 招認 話 係 準備 喺 三月 間 作 反 㗎 喇噉 。
司馬懿 就 吩咐 將 佢哋 用 長枷 鎖起嚟 ，韞 咗 喺 監獄 。
噉啊當時 城門 嘅 守門 將官 司蕃 就 嚟到 報告 ，話 桓范 啊 假冒 太后 聖旨 ，逃跑 出 城 ，仲 話 太傅 謀反 噉 。
司馬懿 就 治 佢哋 誣告罪 ，逮捕 咗 桓范 佢哋 。
然後 將 曹爽 三 兄弟 ，與及 呢一班 受 牽連 嘅 人犯 啊 ，押晒 去 街市 斬首 ，滅 佢哋 三族 ，將 佢哋 嘅 家產 財物 就 全部 充公 。
曹爽 有 個 堂兄弟 叫做 文叔 。
佢 個 老婆 呢 ，就 乃 係 夏侯令 個 女 。
文叔 好早 就 死咗 喇 ，噉 佢 啊 年紀 輕輕 就 守寡 ，又 冇 仔 ，佢 父親 想要 佢 改嫁 ，吖 佢 就 唔肯 喎 。
自己 就 割咗 隻 耳仔 ，嚟 發誓 唔 改嫁 。
及至 曹爽 被 斬 嘞 ，噉 佢 父親 又 試 想 要 佢 改嫁 。
噉 呢次 佢 呢 將 自己 嘅 鼻 切咗 落嚟 。
哎噉啲 家人 就 勸佢 啦 ：唉 人生在世 ，好似 啲 塵埃 黐 喺 條 草 上面 噉 嘅 啫 ，好兒戲 嘅 咋嘛 ，你 又 何苦 咁 認真 啦 。
而且 ，夫家 又 畀 司馬太傅 斬盡殺絕 咯 ，你 一味 噉 守寡 唔 改嫁 又 為 咗 乜水 啊 你 。
文叔 個 老婆 就 話 喇 ：
一個 有仁德嘅 人 ，唔會 因為 盛衰 而 變節 ；有義理嘅 人 ，唔會 因為 存亡 而 變心 。
曹氏 興盛 嘅 時候 ，我 尚且 對 佢 有始有終 。
到而家 ，曹氏 滅亡 喇 ，我 又 點 忍心 拋棄 佢 呢 ？
如果 拋棄 佢 ，就係 禽獸 嘅 行為 喇 ，我 唔 會 做 啲 噉 事 嘅 。
一於 唔肯 改嫁 。
司馬懿 聽講 呢件事 嘞 ，認為 文叔 個 老婆 夠 賢德 啊 ，就 特別 准 佢 攞 個仔 返嚟 養 ，作為 曹氏 嘅 後代 。
呢啲 呢 就 唔 講 咁多 喇 。
而家 講下 司馬懿 殺咗 曹爽 之後 啊 有 一日 ，太尉 蔣濟 就 對 司馬懿 話 ：
太傅 ，當時 仲有 魯芝 、辛敞 佢哋 斬開 城門 逃跑 ，楊綜 又 揦實 個 大印 唔肯 放 ，呢啲 人 都 唔好 放過 佢哋 噃 。
司馬懿話 ：佢哋 都係 各為其主 啊 ，都係 有 節義 嘅 人 嚟 啊 。
哈 不但 冇 殺 佢哋 ，仲 恢復 佢哋 原來 嘅 官職 添 。
辛敞 就 好感慨 啊 佢 話 ：
唉 ，當初 ，我 若果 唔 問 下 家姐 我 就 失咗 節義 咯 。
噉司馬懿 赦免 咗 辛敞 等 人 之後 ，就 出榜 通知 ：
凡係 曹爽 部下 所有 嘅 人啊 ，一律 免死 ，有 官職 嘅 官 復原職 。
於是 軍民 人等 都 平平靜靜 ，冇到 驚擾 ，照常 安居樂業 。
而家 講下 魏主 曹芳 ，佢 要 封 司馬懿 做 丞相 加 九錫 。
司馬懿 堅決 推辭 唔肯 接受 。
但係 曹芳 唔 准 嘞 ，要 佢哋 三 父子 一齊 嚟 管理 國家 大事 。
有一日 ，司馬懿 忽然間 想起 ：嗯 ？曹爽 雖然 全家 被斬 ，但係 而家 仲有 夏侯玄 喺 雍州 等地 守衛 噃 。
夏侯玄 乃係 曹爽 嘅 親族 ，若果 佢 驟然間 作起 亂嚟 就 麻煩 嘞噃 。
哼 ！一定要 快啲 搞掂 佢 至 得 ！
於是 司馬懿 立即 下令 ，派 個 侍者 去 雍州 ，召 征西 將軍 夏侯玄 返嚟 洛陽 ，有 要事 商量 噉 。
夏侯玄 嘅 叔父 就係 夏侯霸 。
大家 都 記得 㗎 ，夏侯霸 係 夏侯淵 嘅 大仔 ，好 打得 嘅 ，當年 曾經 跟隨 司馬懿 同 孔明 打過 仗 。
夏侯霸 一 知道咗 就 大吃一驚 ，帶住 本部 三千 兵 作反 喇 。
噉啊當時 雍州 刺史 郭淮 ，聽聞 夏侯霸 作反唄 ，立即 率領 人馬 嚟 打 夏侯霸 。
兩軍 相遇 ，郭淮 出馬 就 放聲 大罵 ：
嘿！ 夏侯霸 你 個 反賊 ！你 本來 係 大魏王族 ，天子 又 冇 待 薄 你 ，為咩嘢事 要 作 反 啊 ！
吖吖呸 ！
我 祖父 為 國家 建立 咗 咁 大 嘅 功勞 ，而家 司馬懿 呢個 匹夫 ，竟然 滅 咗 我 兄長 曹爽 宗族 ，仲要 嚟 害 我 添 ，好快 趣 佢 就 要 謀 朝 篡位 㗎 喇 。
今日 我 仗義 討伐 逆賊 ，我 作 咩嘢 反 啊 ！
郭淮 無名火 起 ，挺槍 躍馬 就 直取 夏侯霸 。
夏侯霸 就 揮刀 縱馬 就 上前 迎戰 。
打咗唔到十個回合 ，郭淮 唔夠打喇 ，轉頭就走 。
夏侯霸 就 拍馬 追殺 過去 。
追追下 ，忽然間 聽見 後軍 嘈起 上嚟 。
夏侯霸 急忙 勒轉 馬 睇下 ，嘩嗨 ，原來 係 陳泰 帶住 一支 軍隊 殺嚟 啊 。
噉 郭淮 呢 一陣 呢又 殺返轉頭 咯噃 ，兩路 夾攻 ，就 殺到 夏侯霸 大敗 而 走 ，人馬 就 損失 咗 成 大半 。
夏侯霸 諗來諗去 ，呢趟 真係 有家難奔 有國難投 啊 。
一狠心 ，就 趯咗 去 漢中 ，投降 蜀漢 劉 後主 嘞 。
姜維 聽 講話 夏侯霸 嚟 投降 呀 ，咦 ？乜 有冇 搞錯 啊 ，唔信 啊 。
派人 出去 仔細 查問 清楚 ，噉 先至 放佢 入城 。
夏侯霸 拜見咗 姜維 ，流住 眼淚 將 經過 情形 講畀 姜維 聽 。
姜維 好 歡喜 啊 佢 話 ：古時 ，微子 離開 紂王 而 歸順 周朝 ，萬古 傳名 。
今日 ，將軍 能夠 嚟到 扶助 漢室 ，真係 無愧於 古人 啊 ！
當日 姜維 就 設宴 款待 夏侯霸 ，喺 飲宴 嘅 時候 姜維 問 嘞 ：
而家 司馬懿 父子 掌握 大權 ，佢哋 有冇 侵犯 我國 嘅 意思 呢吓 ？
嗰個 老賊 ，正係 策劃緊 謀朝篡位 ，所以 都 未有 時間 去 顧及 外便 。
不過 ，魏國 最近 有 兩個 人 ，正係 年華芳盛 ，若果 任用 佢哋 嚟到 統率 軍隊 ，實在 係 吳 、蜀 嘅 大患 嚟啊 。
姜維 就 問 嗰 兩個 係 邊個 咯 喎 。
於是 夏侯霸 呢 ，就 詳詳細細 噉 介紹 畀 姜維 聽 。
原來 呢 兩個 人 啊 ，一個 而家 就 喺 魏國 官任 秘書郎 ，潁川 長社 人 ，姓 鍾 名 會 ，別字 士季 。
係 太傅 鍾繇 嘅 仔 ，佢 自細 就 好 有膽識 嘅 。
呢 有 一次 啊 ，鍾繇 帶住 佢 兩個 仔 即係 鐘會 同 鍾毓 ，就 去 見 魏文帝 ，就係 曹丕 嘞 。
當其時鐘 會 係 七歲 ，佢 阿哥 鍾毓 呢 係 八歲 。
鍾毓 見到 皇帝 就 好 怕 ，驚到 成面 都 流汗 。
曹丕 就 問 鍾毓喇 ：小卿家 為 咩事 流汗 啊吓 ？
鍾毓 回答 話 ：戰戰惶惶 ，汗出如漿 啊 。
嘩嗨 ，一 出口 就係 詩 啊吓 。
曹丕 又 問 鐘會 ：小卿家 ，你 又 點解 冇 流汗 嘅 呢 ？
鐘 會 回答 話 喇 ：戰戰栗栗 ，汗 不敢 出 。
哈哈哈哈 真係 叻 ，曹丕 特別 睇起 佢 。
及至 鐘會 年紀 稍為 大啲 嘞 ，佢 好 喜歡 研究 兵法 ，深明 韜略 。
司馬懿 同 蔣濟 啊 都 十分 看重 佢 嘅 才幹 嘅 。
噉 另外 一個 呢 ，而家 嘅 官職 係 掾吏 ，義陽 人 ，姓 鄧 明艾 ，別字 士載 ，佢 好 細個 呢 又 死咗 父親 。
佢 為人 就 好 有志向 嘅 ，每逢 見到 高山大宅 ，總係 用心 觀察 ，指指點點 話 邊處邊處 可以 駐兵 ，邊處邊處 可以 存放 糧食 ，邊處邊處 又 可以 埋伏 人馬 等等 。
哦 好多 人 都 笑 佢 ， 就 唯獨 司馬懿 又 好 賞識 佢 嘅 才能 ， 任用 咗 佢 嚟 參贊 軍機 。
鄧艾 呢 有 啲 漏口 嘅 ，佢 每逢 向 司馬懿 報告 事情 總係 話 ，嗯嗯嗯 艾 ，艾噉 。
司馬懿 有 一次 同 佢 開玩笑 嘞 ： 你 話 艾艾 ， 究竟 有 幾 多個 艾 啊 ， 啊 ， 哈 ， 哈哈哈 哈哈哈 。
鄧艾 應聲 回答 話 ：鳳兮鳳兮 ，都係 一 ，嗯 隻 鳳啫 。
吖由此可見此人資質聰明 ，思路敏捷 。
夏侯霸 介紹完 鐘 會 同 鄧艾 就 話嘞 ：呢 兩個 人 呀 ，認真 要 因住 啊 。
姜維 不以為意 啊 佢 話 ：哈哈哈哈哈 ，呢啲 噉嘅 後生仔 算得 乜嘢 呢 ？
過咗幾日 ，姜維 帶 夏侯霸 去 成都 ，朝見 後主 劉禪 。
姜維 同時 稟奏 話 ：
啟奏 陛下 ， 司馬懿 殺害 咗 曹爽 ， 又 想 嚟 騙 殺 夏侯霸 ， 夏侯霸 故此 嚟 到 投降 。
目前 ，司馬懿 父子 專權 ，曹芳 懦弱 ，魏國 內部 充滿 危機 。
臣 喺 漢中 多年 ，兵 精 糧 足 。
臣 願意 率領 王師 ，以 夏侯霸 為 嚮導官 ，去 征服 中原 ，重興 漢室 ，嚟 報答 陛下 嘅 恩德 ，完成 丞相 嘅 遺志 。
姜維 一 講完 ，尚書令 費禕 就 話喇 ：最近 蔣琬 、董允 都 相繼 逝世 ，內政 無人 治理 。
姜將軍 只係 宜於 等待 時機 ，唔適宜於 輕舉妄動 啊 。
唔係噉講 ，時間 過得 飛快 ，學 似噉樣 遷延 歲月 ，拖嚟拖去 ，要 拖到 何時何日 先至 能夠 恢復 中原 呢 ？
姜將軍 ，孫子 話 知彼知己 ，百戰百勝 ，我哋 都 遠遠 不及 丞相 。
想當年 丞相 尚且 唔能夠 恢復 中原 ，又何況 我哋 呢 ？
啟稟陛下 ，臣 喺 隴上 居住咗 好耐 ，非常 了解 當地 嘅 羌人 。
我哋 如果 聯合埋 羌人 作為 援軍 ，噉 就 雖然 唔能夠 恢復 中原 啊 ，但係 隴上 以西 一帶 ，完全 可以 得到 嘅 。
劉禪 話 喇 ：愛卿 既然 要 討伐 魏國 ，就 要 盡忠竭力 ，唔好 挫折 銳氣 ，辜負 朕 嘅 命令 啊 。
於是 姜維領 咗 後主 嘅 敕令 ， 辭別 後主 ， 同 夏侯霸 一齊 返去 漢中 ， 商量 出兵 嘞 。
