昨日啊 講到 曹操 為咗 立 繼承人 嘅 問題 好 躊躇 吖 。
有一日 ，佢 就 問 賈詡 話 喇 ：我 想 立 個 繼承人 ，應該 立 邊個 好 呢 ？
嗯 ，點解 你 唔 出聲 啊 ？
啊 ，誒 啱啱 諗緊 啲 事 ，所以 冇 立即 回答 唧 。
諗緊 啲 咩嘢事 啊 ？
我 諗緊 當年 袁本初 、劉景升 佢哋 父子 嘅 事 啊 。
啊 ，啊哈哈哈哈哈哈哈哈哈哈 ，曹操 哈哈大笑 ，就 決定 啊 立 大仔 曹丕 做 王世子 嘞 。
賈詡 個人 真係 精 啊 ，佢 係 擁護 曹丕 嘅 ，之 佢 唔 明 講 。
佢 只係 用 當年 袁紹 、劉表 立 繼承人 ，因為 都係 廢 長 立 幼 結果 搞到 兄弟 殘殺 嘅 故事 嚟 點 曹操 。
果然 一點 就 靈嘞 ，促使咗 曹操 下 決心 ，立咗 個 大仔 做 繼承人 。
喺 當年 嘅 冬天 ，魏王宮 起好嘞 。
當時 派咗 好多人 去 各個 地方 ，置辦 大量 嘅 奇花異果 愛 嚟 種 喺 王宮 嘅 後花園 。
噉啊 有 個 使者 去到 東吳 ，見咗 孫權 ，傳達咗 魏王 嘅 旨意 ，話 要 啲 溫州 嘅 大蜜柑 。
嗰陣時 孫權 正係 尊崇 曹操 嘅 ，噉 啊 上面 講過 啦 ，係 應承 年年 進貢 㗎 嘛 。
就 派人 去 溫州 選 咗 四十幾 擔 最 靚 嘅 蜜柑 ，日夜 兼程 送 去 鄴郡 。
去到 半路 中途 ，有 一日 ，嗰啲 擔擔 嘅 挑夫 呢 ，就 喺 山腳 歇膊 休息 。
見到 有 個 道士 先生 ，就 單 咗 隻 眼 ，跛 咗 隻 腳 嘅 ，頭 戴 白 藤 帽 ，身 穿 青 懶 衣 ，行 過 嚟 同 啲 挑夫 行 過 禮 話 ：
嘿嘿嘿嘿 ，你哋 擔擔 咁 辛苦 ，等 貧道 幫 你哋 擔 下 呢 。
嘿嘿 乜 有 啲 咁 好人 嘅 ，誒 好吖 好吖 唔該晒 喎 。
於是 個 道士 先生 呢 ，就 幫 啲 挑夫 每人 各 擔 五里 路 。
哈哈 ，凡係 畀 道士 先生 擔過 嗰啲 擔 呢 ，擔擔 都 輕晒 個 噃 奇怪 嘞 。
呢個 道士 先生 臨走 嘅 時候 ，同 押運 蜜柑 嘅 官員 話 ：
貧道 乃係 魏王 鄉下 嘅 老朋友 ，姓 左 名 慈 ，字 元放 ，道號 烏角 先生 。
嘿嘿嘿嘿 ，誒 你 去到 鄴郡 ，就 話 左慈 致意 啊噉啦吓 ，嘿嘿嘿嘿嘿嘿 。
講完 ，嘳下 嘳下衫袖 走咗 嘞 。
押運 蜜柑 嘅 官員 返到 鄴郡 ，就 將 啲 蜜柑 呈送 去 畀 曹操 嘞 。
曹操 攞 個 柑 嚟 ，嘩嗨 ，拳頭 咁 大 個 金黃金黃色 油亮亮 好 靚 啊 。
就 親手 剝開 佢 想 試下 味道 嘞噃 ，哎吖 ，奇怪 喇 ，乜 裏頭 冇 肉 嘅 呢 喂 ，淨係 得 個 殼 㗎 咋 ？
就 問 個 押運官員 ，個 官員 就 將 左慈 嘅 事 稟報 畀 曹操 聽 ，曹操 邊度 肯 信 㗎 。
正喺呢個時候 ，守門人 嚟 報告 話 ：有 個 叫做 左慈 嘅 道士 先生 求見 大王 啊 。
哦？ 叫 佢 入嚟 。
左慈 入到嚟 ，押運官員 一見 就 認得 喇 話 畀 曹操 聽 ：稟 大王 ，喺 路 上 見到 嘅 就係 佢 嘞 就係 佢 嘞 。
我問 你 ， 你 用 乜嘢 妖術 ， 偷 咗 我 啲 咁 靚 嘅 水果 啊 ？ 啊 ！
嘿嘿嘿嘿嘿嘿 ，點會呢 ，點會呢 ？
左慈 攞起 個 柑 剝開 佢 ，哈 有 肉 㗎 喎 ，食起嚟 好 甜 嘅 。
曹操 自己 又 攞 一個 剝開 ，咦 ？乜 又 係 空 㗎 喎 。
曹操 就 越發 奇怪 嘞 ，就 叫 左慈 坐落 ，準備 慢慢 嚟 問 佢 。
左慈 話 肚餓 啊 ，想 食 啲 嘢 先 噉 。
曹操啊 叫 人 攞 畀 佢 。
嘩 ，犀利咯 ，左慈 連 飲 五斗 酒 醉 都 唔 醉 ，食咗 足足 成隻 羊 都 話 未 飽 嘅 。
嘿嘿 曹操 問 佢 話 嘞 ：你 有 咩 嘢 法術 哈哈 可以 做到 噉樣 㗎 ？
嘿嘿嘿嘿 ，貧道 喺 西川 峨眉山 裏 便 ，學道 三十年 啊 。
有 一日 ， 忽然 聽見 石牆 裏 便 有聲 嗌 我 個 名 ， 左慈 左慈 噉 喎 ， 但 係 又 唔 見 有人 喇 。
如是者 幾日 都係 噉 。
嘿嘿 呢一日 ，個天 轟轟聲 行咗 個大雷 ，震碎咗 埲石牆 。
哦 ，原來 裏頭 呀 有 三卷 天書 喺度 ，叫做 遁甲 天書 。
上卷 叫做 天遁 ，中卷 叫做 地遁 ，下卷 啊 叫做 人遁 。
學會 天遁 就能夠 騰雲 駕霧 ，飛升 太虛 ；
學會 地遁 呢 ，就 能夠 穿山 透石 ；
學會 人遁 ，啊 能夠 雲遊 四海 藏形 變身 ，飛劍 擲刀 取 人 首級 嘅 。
嘿嘿嘿嘿嘿嘿 ，大王啊 ，你位極人臣咯 ，何不急流勇退 ，跟貧道去峨眉山修行呢 ？我將呢三卷天書教會你吖 。
我 都 想 急流勇退 好耐 嘅 喇 ，無奈 朝廷 ，未 得 其人 啊 ，冇人 接替 得 我 啊 ！
嘿嘿嘿嘿嘿嘿嘿嘿 。
攞 嚟 講 啦 ， 益州 劉玄德 ， 乃 係 皇帝 後代 ， 當今 天子 嘅 皇叔 ， 你將 個位 讓 畀 佢 唔 係 得 咯 。
如果 唔係 呀 ，貧道 就 用 飛劍 攞 你 嘅 人頭 㗎 喇 ，嘿嘿嘿嘿嘿嘿嘿嘿 。
嗯？ 你 實係 劉備 派 嚟 嘅 奸細 ！人 嚟 ！捉起 佢 ！
嘿嘿嘿嘿嘿嘿嘿嘿嘿嘿 。
曹操 吩咐 十幾個 獄卒 ，拉 左慈 出去 嚴刑拷打 審問 佢 ，嗰班 獄卒 呀 出 死力 咁 打 。
點知 左慈 當係 同佢 撓痕 就 越 打 越 舒服 ，哈 ，打打下 ，噘噘聲 瞓到 淰晒 添 。
曹操 嬲極 喇 ，叫人 攞咗 面大枷 嚟 ，用 鐵釘 釘死 ，大鎖 鎖實 ，韞咗 佢 入 監獄 派 人 看實 佢 。
哈 ，一眨眼唧 ，只見 把 鎖 又 跌咗 枷 又 散咗 。
左慈 好 地 地 噉 瞓 喺 地 嚟 ， 頭髮絲 都 冇 少到 一條 ， 皮光肉 滑 ， 乜嘢 損傷 都 冇 噃。
噉啊 連 氣韞 咗 佢 七日 七夜 ，唔 畀 水 佢 飲 唔 畀 飯 佢 食 ，以為 噉樣 佢 唔死 都 差唔多 㗎 啦 。
點知 打開 道監 門 一 睇 ，只見 左慈 端端正正 噉 坐 喺 地處 ，面色 反而 更加 紅潤 添 。
啲獄卒 去 報告 曹操 話 噉噉噉噃 ，曹操 叫 人 拉佢 出嚟 問 佢 。
左慈 話 喇 ：嘿嘿嘿嘿嘿嘿嘿 ，我 幾十年 喇 ，唔食 啲 多嘢 亦 唔妨 嘅 。
之一日之間 要 我 食 一千隻羊 我亦 食得晒 嘅 ，嘿嘿嘿嘿嘿嘿 。
曹操 冇 佢 修 嘞 。
呢一日 ，文武官員 都 嚟到 魏王宮 參加 宴會 。
正喺度飲緊酒 ，忽然間 左慈 着住 對 木屐 ，𠽤咯𠽤咯噉 行到嚟 酒席 前 便 。
嗰啲 官員 見到 個 噉嘅 人 都 驚奇 到 極 。
左慈 對 曹操 話 喇 ：嘿嘿嘿嘿 ，大王 今日 舉行 宴會 ，大宴 群臣 ，山珍海味 水陸 具備 啦 。
大王 如果 仲 想要 啲 乜嘢 等 貧道 去 攞嚟 啦 。
我 想要 啲 龍 肝 嚟 做 羹 ， 你 攞 唔 攞 得到 啊 ？
嘿嘿嘿嘿嘿 ，誒 有 何 難哉 有 何 難哉 吖 ？
左慈 攞 筆墨 嚟 ，喺 埲牆 上面 畫 咗 條 龍 ，用 衫袖 一 掃 ，嘩嗨 ，睇住 條 龍 就 開 咗 肚 嘞噃 。
左慈 伸 隻 手 入去 龍肚 處 一扲 就 攞出 一副 龍肝 ，仲 嗲嗲聲 流緊 血 嘅 添 。
曹操 唔信 鬧 佢 話 嘞 ：唓 ！你 預先 收埋 喺 衫袖 裏 便 嘅 啫 。
嘿嘿嘿嘿嘿嘿 ，而家 天寒地凍 啊 ，草木 都 凋謝 枯死 咯 ，大王 你 想要 啲 乜嘢 靚花 呢 ？
你 想要 乜都 有 㗎 ，貧道 同 大王 攞嚟 啦 。
我 ，我就係 想要 牡丹花 。
嘿嘿嘿嘿 ，易啦易啦 。
左慈 叫人 攞咗 個 大花盆 嚟 ，放 喺 筵席 前 便 ，用 啲 水 嚟 噴 佢 ，噗噗噉 噴咗 幾下 ，誒 ，好快趣 就 生出 一樖 牡丹 嘞 ，開 並蒂 添 。
嘩 睇到 嗰班 文武 官員 個個 都 眼 都 擎晒 ，就 請 左慈 埋位 入席 一齊 飲 嘞噃 。
過 咗 一陣 ， 上菜 喇 ， 係 魚片 啊 。
左慈話 ：食魚片 誒 要 用 松江 鱸魚 先至 靚 㗎 ，嘿嘿嘿 。
曹操 話 ：隔 成千里 咁 遠 ，點 搵得到 松江 鱸魚 啊 ？
嘿嘿嘿 ，噉 亦 唔 難 搵 啦 ，嘿嘿嘿嘿嘿 。
左慈 問 人 攞咗 支 釣魚竿 嚟 ，就 喺 宴會 大廳 外 便 嘅 魚池 裏頭 落釣 ，哈 ，話 咁快 ，就 釣咗 幾十條 大 鱸魚 ，搦晒 上嚟 大廳 處 嘞 。
曹操話 ：哦 ，我 嘅 魚池 裏 便 原來 就 養住 啲 鱸魚 㗎 喇 。
嘿嘿嘿 ，大王 你 又 呃 我 喇 。
天下 嘅 鱸魚 都係 兩個 鰓 嘅 啫 ，唯獨 松江 鱸魚 有 四個 鰓 嘅 ，嗱 ，好易 分 嘅 啫 。
大家 行埋去 睇下 ，哈 ，果然 係 四個 鰓 嘅 。
左慈 又 話 喇 ：煮 松江 鱸魚 誒 要 紫芽姜 先至 好 㗎 喎 。
曹操 問 佢 嘞 ：噉 你 能唔能夠 攞到嚟 呢 ？
易啫 ！左慈 叫 人 攞咗 個 金盆 嚟 ，噉 左慈 用 件 衫 披 褸 住 個 金盆 。
冇 幾耐唧 ， 左慈 一 搦 開衫 披 ， 真 係 滿滿 一盆 紫芽 姜 啊 。
左慈 捧住 嗰盆 薑 獻畀 曹操 。
曹操 用 隻手 去 攞 啦 ，咦 ？盆 裏 便 仲 有 一部 書 添 噃 ，書名 係 《孟德新書》 。
曹操 攞起嚟 睇下 ，真係 一個 字 都 冇 錯 㗎 奇怪 到 極 喇 。
左慈 就 喺 枱 上 便 攞 一隻 玉杯 ，斟滿 一杯 靚酒 就 獻 畀 曹操 。
嘿嘿嘿嘿 ，請 大王 飲咗 呢杯酒 啦 ，可以 千年 長壽 啊 。
你 飲 先 啦 。
好吖 ，嘿嘿嘿嘿 。
左慈 喺 自己 頂 道士 帽 上面 啊 掹 咗 支 玉簪 出嚟 ，喺 杯 酒 處 一 劃 ，哈 ，杯 酒 就 分開 兩 邊 嘞 喎 。
佢 自己 飲咗 一半 ，將 剩返 嗰半 嚟 敬畀 曹操 ，曹操 就 鬧 佢 。
左慈 將 隻 酒杯 呀 向 天 一 掉 ，嗯 即刻 就 變咗 一隻 白色 嘅 雀 ，喺 大廳 上面 飛嚟飛去 。
人人 都 昂起 個 頭 嚟 睇 下 啦 ，嘿 咁 得意 嘅 嚱 ，再 回轉 頭 嚟 一 睇 ，左慈 都 不知 去向 嘞 。
過咗 一陣 ，外便 啲 衛士 噔噔聲 趯 入嚟 稟告 話 ：左慈 出門口 走咗 喇 噉 。
曹操 話 ：呢個 妖人 ，一定要 殺咗 佢 至得 ，否則 就 害人 㗎喇 。
即刻 就 吩咐 許褚 ，帶 三百 名 鐵甲軍 去 追捕 佢 。
許褚 一聲 得令 ，就 上馬 率領 鐵甲軍 就 飛跑 趕去 城門 。
果然 見到 左慈 着住 木屐 ，𠽤咯𠽤咯 噉 跛下跛下 噉 喺 前面 慢慢 行 。
許褚 飛馬 追上去 ，點知道 追極 都 追唔上 噃 ，一直 就 噉樣 追到 一座 山 裏 便 。
山上 呢 有 個 細佬哥 正 喺 處 趕緊 一 群 羊 咩 嚟緊 ，左慈 行咗 入去 羊群 裏 便 。
許褚 見 追極 都 追唔上 唄 ，就 攞 箭 嚟 射 佢 ，一射 ，左慈 即刻 就 唔見 咗 嘞 。
許褚 嬲 起上嚟 ，將 嗰 群 羊 咩 啊 殺 清光 就 返 扯 。
嗰個 細佬哥 喊到 好 淒涼 定啦 ，無辜辜 一 群 羊 噉 就 畀 個 將軍 大人 殺死 晒 喎 ，點算好 啊 ？
忽然間 ，有 個 羊頭 喺 地下 開聲 講 人 嘅 說話 喎 佢 話 ：
細佬哥 啊 細佬哥 ， 你 唔 使 喊 嘅 ， 你將 啲 羊頭 ， 扱 返 喺 條 羊 頸 處 就 冇 事 㗎 喇 。
嚇到 個 細佬 哥 驚晒 ，唔 流 眼淚 流 冷汗 喇 ，揞住 塊 面 趯 都 趯唔切 。
呢個 時候 ，有 個人 喺 后便 嗌 佢 話 喇 ：細佬哥 你 唔使 驚 ，你 唔使 趯 㗎 ，我 還返 啲 羊咩 畀 你 吓 。
個 細佬 哥 擰轉頭 一 睇 ，哈哈 見到 左慈 呀 ，已經 將 地下 啲 死 羊 隻隻 都 救 返 生 嘞 ，噉 就 歡喜 啦 。
個 細佬哥 想 問 下 點解 啲 羊 咩 死咗 都 能夠 返生 嘅 噉 。
但係 左慈 嘳 下 嘳下 堂衫 袖 就 走人 嘞 ，行得 㗎 ，好似 飛 咁 快 ，眨下眼 就 唔見 人 嘞 。
個 細路 仔返 去 將件 事講 畀 主人 聽 ， 主人 又 嚇到 伸出 條 脷 半日 收 唔 返 啊 。
之 又 唔 敢 隱瞞 喇 ，即刻 就 去 報告 畀 曹操 知 。
曹操 吩咐 將 左慈 嘅 樣子 畫出嚟 ，出榜 要 捉拿 佢 ，嗬 熱鬧 咯 呢 勻 。
喺 三日 之內 ，喺 城裏 城外 啊 竟然 一下 間 捉咗 三四百個 單眼 、跛腳 、白藤帽 、青懶衣 、着 木屐 嘅 道士 先生 ，嘩 ，全城 都 轟動晒 。
曹操 就 下令 ，叫人 用 啲 豬血 羊血 潑過 晒 個 三四百 個 道士 ，押去 城南 教場 。
曹操 親自 帶住 五百 名 鐵甲兵 ，沊沊𡃈 圍住 佢哋 。
一聲令下 將 佢哋 全部 殺頭 ，嘿呀 ，當堂 出現 奇蹟 喇 。
只見 被 斬 嘅 人 啊 ，人人 嗰 條 頸 處 呢 都 冒出 一道 青氣 ，嗰啲 青氣 呼噉 衝 到 上天 就 聚埋 一齊 ，誒 ，變成 一個 左慈 喎 。
佢 用 隻 手 一擪 ，就 有 隻 白鶴 飛 嚟 。
左慈 騎住 隻 白鶴 ，拍住 手掌 哈哈 大笑 噉 話 ：土鼠 隨 金虎 ，奸雄 一旦 休 ！嘿嘿嘿嘿嘿嘿嘿嘿 。
曹操 叫 啲 兵 用 箭 嚟 射 佢 。
忽然間 ，呼噉 狂風 大作 飛沙走石 。
哎呀 啱啱 殺咗 頭 嗰啲 死屍 呀 ，啪聲 跳晒 起身 ，用 隻 手 挽住 自己 嘅 人頭 ，能能聲 就 跑 上 演武廳 嚟 打 曹操 喎 。
真攞膽咯 ，嚇到 啲 文官 武將 揞實 塊面 都 唔 敢 睇 啊 ，有啲 嚇到 腳軟 跌 喺 地 唔起得 身 ，總之 係 黃牛 落水 各顧各 喇 。
過咗一陣 ，風 停嘞 ，嗰 幾百個 屍首 都 唔見晒 嘞 。
啲侍衛 扶起 曹操 ，送 佢 返去 魏王宮 。
噉啊因為嚇咗一嚇就病起上嚟 ，曹操 病咗好耐 ，食咩嘢藥都冇效 。
嗰日 ，太史丞 許芝 啊 就 由 許昌 嚟 見 曹操 。
曹操 因為 自己 病得 好耐 喇 ，就 想 叫 佢 占 個 卦 ，問下 吉凶 。
許芝話喇 ：大王 有冇 聽過 神卜管輅 個 名 呢 ？
曹操 話 ： 個名 就 好 熟 啊 ， 但 係 未 見識 過 佢 嘅 術 啊 ， 欸 你講 我 聽 下 。
哦好好 ，於是 許芝 就 詳詳細細 將 管輅 個 情況 講畀 曹操 聽 。
原來 管輅 啊 ，佢 係 平原人 ，生得 個 樣 就 好 醜陋 喇 ，鍾意 飲酒 ，為人 就 冇 乜 拘束 嘅 。
佢 個 父親 呢 就 做過 瑯琊郡 嘅 低級 官員 。
管輅 自 細 呢 就 喜歡 睇 天文 ，睇啲 星星 ，好 夜 好夜 都 唔 願 瞓 ，父母 禁止 佢 都 唔 聽 。
佢 時時 都 話 㗎 ：一隻 雞 一隻 雀 都 尚且 知道 天時 ，何況 人生 在世 呢噉 ？
佢 同 隔籬 鄰舍 啲 細路 玩 啊 ，佢 都 好 鍾意 喺 地下 畫 啲 天文 啊 ，日月星辰 嘅 分佈 啊 噉 嘅 。
噉 啊 當 佢 年紀 稍為 大多 幾歲 嘅 時候 啊 ， 佢 對 周易 ， 即 係 古時 講 占卦 嘅 書 啊 ， 就 非常 之 精通 嘞 。
佢 又 識得 觀察 風 嘅 動向 嚟 占卜 吉凶 嘅 。
總之 係 占卦 算命 睇相 樣樣 都 叻 就係 嘞 。
當時 瑯琊 太守 單子春 ，就 聞得 佢 個 名 ，就 請 佢 去 見 下面 。
去嗰日 ，單太 守 屋企 有 百幾位 客人 ，個個 都係 能言善辯 ，會講會話 嘅 讀書人 啊 。
管輅 好 細 嘅 啫 嗰陣 ，佢 對 單子 春 話 喇 ：
我 年紀 輕 冇 咩 膽量 ，唔該 你 畀 三升 美酒 我 ，等 我 飲咗 壯 下 膽 先至 講 啦 。
哈哈 單子 春 好 驚奇 ，好吖 ，就 攞 酒 嚟 畀 佢 飲 咯 喎 。
佢 真係 飲咗 成 三升 咁多 。
飲完 ，管輅 就 問嘞 ：今日 想 同 我 辯論 嘅 ，係唔係 呢度 在座 啲 先生 啊 ？
單子春話 ：唔係啊 ，我 自己 嚟 同 你 辯論 下 唧 。
於是啊 單子春 ，就 同 管輅 談論 起 易經 嘅 道理 嚟 。
嘿 ，管輅 娓娓而談 滔滔不絕 ，所 講出嚟 啲 見解 呀 非常 精闢 。
單子春 反反覆覆 同 佢 辯論 ，提出 好多 艱深 嘅 題目 嚟 要 佢 解釋 。
管輅 對答如流 ， 從朝 到 晚 ， 講到 大家 都 唔 記得 食飯 啊 。
單子春 同 佢 嘅 賓客 冇 辦法 唔 佩服 佢 啊 。
噉 呢件事 一 傳開去 呢 ，人人 都 稱佢 做 神童 嘞 。
關於 管輅 占卦 嗰 種 靈驗 法 呢 ， 有 幾件事 出晒名 㗎 喇 嗱， 有 一家 人家 姓 郭 嘅 ， 兄弟 三個 人 ， 大佬 叫做 郭恩 。
呢咁啱㗎吓 ，三兄弟 都 得埋 同一種 病 ，咩 病 啊 ？跛腳病 ，醫極 都 醫唔好 。
噉啊走去 請 管輅 同 佢 占下卦 。
管輅 同 佢 占咗 卦 ，就 解 畀 佢哋 聽 喇 ：
喺卦裏便 ，表明 你 屋企 嘅 祖墳 裏頭 有 個 女鬼 啊 ，佢 唔係 你 嘅 伯娘 就係 你 阿嬸 喇 。
以前 喺 饑荒 嗰陣 ，你 又 為咗 幾升 米 嘅 緣故 推 咗 佢 落 井 ，用 嚿 大石 砸爆 咗 佢 個 頭殼 。
佢嘅 鬼魂 孤苦伶仃 十分 痛苦 啊 ，就 向 上天 告狀 ，故此 你哋 幾 兄弟 就 得到 噉嘅 報應 啊 。
呢啲 係 求神拜佛 都 醫唔好 㗎 喇 。
一講出 嚟 ， 嚇到 郭恩三 兄弟 即刻 喊住 認罪 啊 。
又 有 個 安平 太守 王基 ，佢 又 聽聞 管輅 占卦 極 靈 嘅 ，就 請咗 佢 返 屋企 。
當時 信都縣 官 嘅 老婆 呢 時常 都 話 有 頭風 ；佢 個 仔 呢 ，又 得 咗 心痛病 。
見到 管輅 嚟咗 就 請 佢 占 個 卦 嘞 噃 。
管輅 同 佢哋 占咗 支 卦 就 話 喇 ：喺 你 大廳 西便 嘅 角落頭 啊 ，地下 有 兩個 死屍 ，係 男人 嚟 。
一個 係 揸住 支 矛 嘅 ，一個 係 揸住 弓箭 ，佢哋 嘅 頭 喺 牆 內 ，腳 喺 牆 外 。
揸矛 嗰個 呢 就 主 刺頭 故此 頭痛 ；揸弓箭 嗰個 主 刺 胸腹 ，故此 就 心痛 啦 。
噉啊掘開笪地嚟睇下 ，掘咗落去八尺深 ，哈果然發現有兩副棺材 。
真係 一副 棺材 裏 便 有 矛 ，另一 副 棺材 裏 便 有 弓箭 ，啲 木頭 呢 都 已經 霉爛 晒 㗎喇 。
管輅 叫 佢哋 將 啲 屍骨 遷 咗 去 城 外 十里 ，搵 笪 地方 嚟 埋好 佢 。
噉 從此之後啊 ，縣官 個 老婆 同 個仔 啲 病 呢 就 好返晒 嘞 。
呢 又 有 個 縣官 叫做 諸葛原 啊 ，就 升官 做 新興 太守 。
嗰日 管輅 去 送行 ，有 個 賓客 講起 話 管輅 有 種 本事 好叻 嘅 ，就係 會 覆射 ，估親 都 中 嘅 噉 。
咩嘢 叫做 覆射 呢 ？
呢個 係 一種 古代 嘅 遊戲 啊 ，誒 將 嗰啲 物件 收埋 ，等 人哋 嚟 估 。
諸葛原 就 唔 信 嘞 ，就 攞咗 燕子蛋 、蜂巢 、蜘蛛 三樣 嘢 ，分開 裝 喺 三個 盒 裏 便 就 叫 管輅 嚟 估 。
管輅 就 唔係 隨便 噏 㗎喎 ，佢 仲 係 占 咗 卦 先 ，然後 根據 卦象 啊 各 寫 咗 四句 詩文 喺 個 盒 上 便 。
喺 個 盒 上面 寫 ，含氣 須 變 ，依乎 宇堂 ；雌雄 以 形 ，羽翼 舒張 ：呢啲 係 燕子 蛋 。
喺 第二個 盒 上面 寫 ，家室 倒懸 ，門戶 眾多 ；藏 精 育 毒 ，得 秋 乃 化 ：呢個 係 蜂巢 。
喺 第三個 盒 上面 寫 ，觳觫 長足 ，吐絲 成 羅 ；尋 網 求 食 ，利 在 昏夜 ：呢隻 係 蜘蛛 。
嘩 一估 出嚟 所有 嘅 人 都 大為 驚奇 啊 ，都 未 見過 咁 靈 嘅 真係 。
有一次 ，鄉下 有個 伯爺 婆 失咗 隻 牛 ，就 𠼮管 輅 同 佢 占 個 卦 睇下 搵唔搵得返 隻 牛 啦 噉 。
管輅 一 占卦 就 批咗 四 句 說話 ：北溪 之 濱 ，七 人 宰烹 ；急 往 追尋 ，皮肉 尚 存 噉 。
嗰個 伯爺婆 真係 按照 管輅 講 嘅 去 搵 喇 ，果然 見到 喺 北便條 河邊 間 茅屋 後 便 ，有 七 個 人 喺度 煮 牛肉 食 ，牛皮 牛肉 仲 喺度 啊 。
於是 伯爺 婆 就 去 告狀 ，請求 拉 嗰 七個 偷牛 嘅 人 嚟到 處罰 佢哋 。
呢太守 問 個 伯爺 婆 ，你 點 知道 係 嗰 七個 人 偷 㗎 噉 。
伯爺婆 就 講 畀 太守 聽 ，話 管輅 啲 卦 靈 到 不得了 㗎 。
郡 太守 唔 信 啊 ， 以為 靠 撞 ， 就 請 管 輅 嚟 衙門 ， 就 攞 咗 個 印 囊 ， 即 係 裝 大印 嘅 袋 。
又攞咗 條 山雞毛 ，分別 裝 喺 盒 裏 便 叫 管輅 占卦 估下 啲 係 咩嘢 ，管輅 占咗 個 卦 一 估 ：
第一個 ，內方外圓 ，五色成文 ；含寶守信 ，出則有章 ：呢個 係 印囊 ；
第二個 ，岩岩 有 鳥 ，錦體 朱衣 ；羽翼 玄黃 ，鳴 不失 晨 ：係 山雞 毛 。
嘩 太守 服晒 佢 咯 ，當 佢 係 貴賓 噉 嚟 款待 佢 啊 。
嗱又有一次 ，管輅 出去 郊外 散步 ，見到 個 後生仔 喺度 耕緊 田 。
管輅 企 喺 田邊 條路 處望 實個 後 生仔 望 咗 好 耐 好 耐 ， 就 問 佢 ： 呢 位 後生 哥貴 姓名 啊 ？ 今年 貴庚 啊 ？
嗰個 後生仔 回答 話 喇 ：我 姓 趙 ，叫做 趙顏 ，今年 十九歲 喇 。請問 先生 係 邊位 呢 ？
管輅 話 喇 ：我 就係 管輅 ，我 睇 你 眼眉 之間 有 死氣 噃 ，三日 之內 必 死 。
唉 你 個 樣子 生得 咁 英俊 ，可惜 短命 吖 。
嚇到 趙顏 面青 啊 ，喇喇聲 跑返去 屋企 講畀 老竇 聽 。
佢 老 竇 一 聽講 ， 即刻 就 去 追管 輅 ， 追到 喇 ， 就 跪 喺 地 嚟 喊 到 嘩嘩 聲 噉 𠼮 求管 輅 話 ， 唔 該 好心 救下 我個 仔 啦 噉 。
管輅 話 喇 ：呢啲 係 天命 嚟 ，冇得 解救 㗎 噃 。
我 呢個 伯爺公 ，就係 得 佢 一粒仔 啊 ，無論如何 都 請 先生 你 可憐 下 救返 佢 條 命 啦 ！
趙顏 亦 喊住 噉 猛 咁 𠼮 。
管輅 見 佢 兩 父子 真係 咁 淒涼 ，就 對 趙顏 話 喇 ：
噉 啦 ， 你 準備 一樽好 酒 、 一大塊 鹿 肉乾 。
聽日 ，你 就 帶住 去 南山 ，上咗 山 就 有 樖 大樹 ，樹下 有 嚿 大大 嘅 磨盤石 ，嗰度 會 有 兩個 人 喺度 捉棋 嘅 。
有個人 就 向南 坐 ，着 白袍 嘅 ，個樣 呢 就 好 惡 嘅 。
另 一個 人 就 向 北 坐 ， 着 紅袍 嘅 ， 樣子 呢 就 好 好樣 嘅 。
你 就 趁 佢哋 捉 棋 捉到 㷫 嗰陣 呢 ，就 跪 響 處 ，請 佢哋 飲酒 同 食 啲 鹿肉乾 。
等佢哋 飲完 食完 喇 ，你 就 喊住 噉 嚟 𠼮 佢哋 ，畀 長啲 壽 過 你 ，你 噉 就 實得益 㗎 喇 。
不過噉啊 ，你 千祈千祈 唔好 講出嚟 話 係 我 教 你 至好 噃 。
趙顏 個 老竇 就 好感激 管輅 啦 ，就 留 佢 喺 屋企 過夜 。
第日 ，趙顏 用 隻 籃仔 ，帶住 酒 啊 鹿肉乾 啊 杯 啊 碟 啊 噉 ，就 入 南山 嘞 噃 。
行咗 約莫 五六里 路 啦 ，果然 見到 兩個人 ，個 樣子 、衣着 、打扮 同 管輅 講 嘅 一模一樣 嘅 ，就 坐 喺 樖 大松樹 下 便 嘅 磨盤石 嗰度 捉 棋 。
係喇 ，冇錯喇 。
趙顏 行埋去 ，嗰 兩個 人 呀 一心 捉棋 ，根本 冇 理到 佢 。
趙顏 跪喺 處 ，攞出 啲 酒肉 就 送過去 。
嗰 兩個 人 亦 冇 問 咩 嘢 喎 ，有 酒 送到 就 飲 ，有 鹿肉乾 就 食 。
食下 飲下 ，一便 飲住 酒 一便 捉 棋 就 分外 疏肝 㗎 嘛 ，不經不覺 就 飲晒 啲 酒 咯 喎 。
趙顏 覺得 係 開口 嘅 時候 喇 ，就 喊起嚟 向 佢哋 兩個 猛咁 叩頭 ，𠼮求 畀 多啲 壽命 過 自己 。
哎呀 嗰 兩個人 好 驚奇 啊 。
着紅袍嗰個 就 話 喇 ：實係 管先生 教 佢 㗎 喇 。
喂 ，我哋 兩個 已經 受咗 人哋 嘅 禮 咯 ，要 可憐 下 人哋 至 得嘅 喎 。
着白袍嗰個 就 喺 身邊 攞咗 本簿 出嚟 查下 ，查到 喇 ，佢 就 話 畀 趙顏 聽 ：你 今年 十九歲 ，到 年限 喇 要 死 㗎 喇 。
我 而家 喺 個 十字 上面 加 多 個 九字 ，噉 你 嘅 壽命 可以 有 九十九 歲 喇 。
你 返去 見到 管輅 ，叫 佢 唔好 再 洩漏 天機 喇 ，否則 上天 就 會 懲罰 佢 㗎 喇 。
着紅袍 嗰個人 ，攞 支筆 出嚟 加咗 個 九字 。
呼噉 一浸 香風 吹過 ，嗰 兩個 人 呀 變咗 兩 隻 白鶴 ，衝天 飛咗 去 嘞 。
