孫權 啊 就 請 孔明 入 去 後堂 ，擺 酒 嚟 款待 佢 吖 。
飲過 幾 巡 酒 ，孫權 就 話嘞 ：
曹操 平生 最 憎恨 嘅 ，就係 呂布 、劉表 、袁紹 、袁術 、刘豫州 同 我 噉 幾個 人 唧 。
而家 幾位 英雄 已經 消滅 嘞 ，唯獨 劉豫州 同 我 仲 喺 處 。
我 點 都 唔 能夠 以 整個 東吳 受制 於 人 。
我 已經 揸定 主意 ，除咗 劉豫州 之外 ，再 冇 第個 人 能夠 同 我 合作 去 對付 曹操 㗎 喇 。
不過 ， 不過 劉豫州 剛剛 先至 打 咗 敗仗 ， 又點 有 力量 嚟 擔當 呢 個 咁 艱難 嘅 責任 呢 ？
將軍 ，劉豫州 雖然 新近 打咗 敗仗 ，不過 關雲長 手下 ，仲有 一萬 精兵 。
劉琦 率領 嘅 江夏 戰士 亦 有 一萬 人 。
而家 ，曹兵 喺 咁 遠 路 嚟到 係 十分 疲乏 。
佢哋 最近 為咗 要 追趕 劉豫州 ，一日一夜 要 行軍 三百里 。
呢種 情形 ，就 正如 一支 箭 啊 ，射出嚟 嘅 時候 任佢 點 猛 都 好 ，臨尾 ，就 連 薄薄 嘅 一幅 紗布 都 射唔穿 喇 。
何況 佢哋 都係 北方人 ，唔識 水戰 。
而 荊州 嘅 民眾 ，係 因為 冇 辦法 先至 歸順 曹操 嘅 啫 ，佢哋 嘅 本心 係 唔 願 嘅 。
如果 將軍 你 真係 同 劉豫州 齊心合力 ，噉 就 一定 能夠 擊敗 曹操 。
曹操 一 敗 ，必定 撤退 返去 北方 ，而 荊州 同 東吳 嘅 勢力 ，必定 會 強盛 起嚟 。
噉 天下 嘅 局面 ，就 會 形成 鼎足三分 嘅 形勢 啦 嘛 。
成功 與 失敗 ，全 在 今日 ，請 將軍 你 決斷 啦 。
嘿呀 ，聽咗 孔明 呢一番 說話 ，孫權 嗰種 高興法 真係 難以 形容 啊 。
佢 對 孔明 話 喇 ：先生 嘅 說話 使 我 頓開 茅塞 啊 。
而家 我 明白晒 嘞 ，我嘅 主意 已經 揸定 ，亦 冇 乜嘢 其他 嘅 顧慮 喇 。
我 決定 ，立即 商量 起兵 ，一齊 去 消滅 曹操 。
於是 孫權 就 叫 魯肅 將 自己 嘅 意思 傳達 畀 文武官員 知道 。
同時啊 ，送孔明 去 賓館 住落 休息 。
張昭 聽講 孫權 決定 起兵 嘞 ，即刻 就 去 同 大家 商量 話 喇 ：
主公 呢一趟 係 上咗 孔明 當 喇 ！
然後 佢 就 同埋 幾個 謀士 ，急急 去 見 孫權 ，佢 話 ：
聽講 主公 要 興兵 去 同 曹操 打仗 ， 唔 知 主公 有 冇 考慮 過 ， 你 比起 袁紹 上 嚟 點啊 ？
當日 ，曹操 兵 微 將 寡 ，尚且 一下 就 打垮 袁紹 咯 。
何況 今日 曹操 已經 擁有 百萬 大軍 ，點 可以 輕敵 啊 ？
如果 聽咗 諸葛亮 嘅 說話 ，隨便 出兵 呀 ，簡直 係 孭住 啲 柴 去 救火 啊 ，實弊 㗎 ！
孫權 聽咗 ，一味 耷低頭 唔出聲 。
顧雍亦 開聲 話嘞 ：劉備 因為 畀 曹操 打敗咗 ，所以 想 借 我哋 江東 嘅 兵力 ，去 頂住 曹操 啫嘛 。
點解 主公 要 畀 佢 嚟 利用 呢 ？請 主公 聽 子布 嘅 說話 啦 。
孫權 有啲 動搖 嘞 ，但係 決定 唔 落 。
張昭 佢哋 走咗 之後 ，魯肅 即刻 入去 見 孫權 話 ：
剛才 張子布 佢哋 呢班人 ，實係 又 嚟 勸 主公 唔好 出兵 定 嘞 。
佢哋 竭力 主張 投降 ，無非 都係 為 自己 一家 大細 打算 ，希望 主公 唔好 聽 佢哋 講 啊 。
孫權 唔 出聲 ，仲 喺度 猶豫 。
魯肅 又 緊盯 佢 一句 ：主公 你 如果 仲係 唔揸 定 主意 ，就 一定 畀 呢班 人 誤咗 你 啊 。
嗯 ，你 出去 先 啦 ，等 我 好好地 再 想 下 。
孫權 既然 噉樣 講 嘞 ，魯肅 就 唯有 告辭 出去 啦 。
喺 呢個 時候 ，東吳 嘅 大小 官員 啊 都 議論 紛紛 。
喺 武將 當中 呢 ，有 啲 仲 係 主張 打 嘅 ；但係 文官 方面 就 全部 主張 投降 㗎 嘞 。
孫權 返返 入去 內室 ，個 心 啊 亂糟糟 ，坐唔係 企 又唔係 。
打 呢 ？ 定 係 投降 呢 ？ 一時間 都 決定 唔 落 啊 ， 搞 到 食飯 瞓覺 都 唔 安樂 。
吳國太 見到 孫權 噉樣 就 問 佢 喇 ：乜嘢 事 呀 吓 ？乜 搞到 失魂落魄 噉 啊 。
孫權 就 話啦 ：而家 ，曹操 嘅 大軍 駐扎 喺 江漢 一帶 ，有意 要 吞併 江南 。
我 召集 啲 文武 官員 嚟 商量對策 ， 有 啲 係 主張 投降 ， 有 啲 係 主張 打 。
如果 要 打 ，又 怕 寡 不敵 眾 ；你 話 要 投降 咩 ，又 怕 曹操 唔 容 得 我 噃 。
因此 ，一直 都 猶豫不決 啫 。
吳國太 對 孫權 話 嘞 ：
家姐 逝世 之前 ，曾經 講過 話 你 阿哥 臨終 嘅 時候 ，就 話 落 喇 。
內政 有 解決 唔 了 嘅 事 就 問 張 昭 ， 對外 嘅 事 解決 唔 了 就問 周瑜 ， 而家 你 點解 唔 去 請 公瑾 返 嚟 問 下 佢 呢 ？
公瑾 就係 周瑜 嘅 別字 咯 。
真係 一言 驚醒 夢中人 啊 ，孫權 好 歡喜 ，即刻 派 人 去 鄱陽 請 周瑜 返嚟 商量 。
周瑜 本來 喺 鄱陽湖 訓練緊 水軍 。
佢 接到 消息 ，話 曹操 嘅 大軍 啊 ，已經 嚟到 漢上 ，就 連忙 趕返 嚟 柴桑郡 要 商量 軍機 大事 。
所以 孫權 嘅 使者 都 未 出發 唧 ，周瑜 就 已經 到埠 嘞 。
魯肅 同 周瑜 係 最好 嘅 朋友 。
魯肅 第一個 去 迎接 周瑜 嘅 ，見咗 面 之後 啊 ，就 將 最近 呢 幾日 嘅 事 都 講咗 畀 周瑜 聽 。
周瑜 就 安慰 魯肅 話 喇 ：子敬 你 唔使 擔心 ，我 自有 辦法 ，唔該 你 快啲 去 請 孔明 嚟 啦 。
好 ，我 而家 就 去 。魯肅 即刻 上馬 就 去 請 孔明 。
周瑜 返到 公館 正 話 想 休息 下 ，張昭 、顧雍 、張紘 、步騭 呢 四 個人 就 嚟 探訪 佢 。
周瑜 請 佢哋 入嚟 大堂 裏 便 坐落 ，寒暄 咗 幾句 ，張昭 就 問 嘞 ：
都督 知道 江東 最近 嘅 嚴重 情形 嘛 ？
未知噃 。
目前 ，曹操 率領 百萬 大軍 ，喺 漢 上 駐扎 啊 。
前幾日 派人 送咗 檄文 嚟 ，約 主公 喺 江夏 會師 。
雖然 曹操 對 江東 係 有 吞併 嘅 意思 嘞 ，但係 仲 未曾 露出 跡象 。
所以 我哋 就 勸 主公 暫時 投降 曹操 先 ，噉樣 呢 ，江東 就 可以 避免 戰禍 。
點知道 魯子敬 去到 江夏 ，請咗 劉備 嘅 軍師 諸葛亮 返嚟 。
諸葛亮 為咗 報 佢哋 自己 嘅 仇 ，講咗 好多 說話 嚟到 挑動 主公 起兵 去 打 曹操 啊 。
唉 ，子敬 亦 係 話 要 打 喎 ，執迷不悟 。
而家 ，就係 盼望 都督 你 返嚟 下個 決斷 喇 。
你哋 各位 嘅 意見 係 唔係 都 一樣 嘅 呢 ？
係啊 ，我哋 都係 一樣 噉 睇法 㗎 。
我 亦 係 一早 就 想 投降 㗎 嘞 ，各位 請 返去 先 ，我 聽日 一早 去 見 主公 ，自然 會 有 定論 㗎 喇 。
張昭佢哋 四個 聽咗 放心 ，就 告辭 走嘞噃 。
過咗 一陣 咁耐 ，程普 、黃蓋 、韓當 呢 一班 戰將 嚟到 見 周瑜 嘞噃 。
周瑜 請 佢哋 入嚟 ，彼此 問候 過 喇 ，程普 就 話 ：
都督 ，你 知唔知 啊 ，江東 呀 ，就快 屬於 他人 㗎 喇 。
吓 ？唔知道 噃 。
我哋 自從 跟隨 孫將軍 開基創業 打 天下 ，大大小小 ，打咗 幾百場 仗 ，先至 打咗 呢 六郡 城池 返嚟 。
而家 ，主公 聽咗 嗰班 謀士 嘅 說話 ，想要 投降 曹操 喎 ，真係 可恥 到 極 ，可惜 到 極 啊 ！
我哋 寧肯 死咗 都 唔 肯 丟 呢個 架 ！
希望 都督 無論 如何 ，都 要 勸 主公 揸定 主意 出兵 ，我哋 一定 誓死 戰鬥 ！
各位 將軍 嘅 意見 ，係 唔係 都 相同 啊 ？
黃蓋 好 激憤 噉 啪 一聲 企 起身 ，用 隻手 拍住 個頭 話 ：我 嘅 頭 可 斷 ，誓 不 降 曹 ！
大家 都 跟住 話 喇 ：我哋 誓 不 降 曹 啊 ！
周瑜 話 ：好極喇 ！我 正係 要 同 曹操 決戰 ，點 肯 投降 呢 ？
各位 將軍 請 返去 先 啦 ，我 見咗 主公 ，自然 有 分數 。
於是 程普 佢哋 就 好 滿意 噉 告辭 走 嘞 。
又過咗一陣 ，諸葛瑾 、呂范 等等 一班 文官 啊 ，亦 嚟到 問候 周瑜 。
噉啊 請 佢哋 入去 坐落 ，行過 禮 ，諸葛瑾 就 話 ：
捨弟 諸葛亮 喺 漢 上嚟 ，話 劉豫州 想 同 東吳 聯合 起嚟 打 曹操 。
今日 商量咗 一日 ，都 仲 未曾 決定 落嚟 。
誒 因為 捨弟 係 使臣 ，所以 我 就 唔 敢 講 咁多 咯 ，就 等 都督 你 嚟 決定 呢件事 嘞 。
照 你 睇 誒 點 做好 呢 ？
誒 ，投降 呢 ，誒仲 可以 過 下 太平 日子 ；誒打起嚟 就 好難 保 喇 。
哈哈哈 哈哈哈 ， 我 有 辦法 㗎 喇 ， 聽日 ， 我 哋 一齊 去 見 主公 商量 啦 。
好 ， 好 ， 誒 我 哋 告辭 喇 。
諸葛瑾 佢哋 啱啱 走咗 ，呂蒙 、甘寧 一班人 又 嚟 見 周瑜 嘞噃 。
亦係 談論 呢件事 嘅 ，有啲 話 要 打 有啲 話 要 投降 ，講下講下 就 爭論 起嚟 。
周瑜 就 話 喇 ：而家 唔使 講 咁多 咯 ，聽日 一齊 去 見 主公 嘅 時候 再 商量 啦 。
送走咗 呢一班人 之後 ，周瑜 諗下諗下 ，忍唔住 不歇 咁 冷笑 啊 。
到咗 夜晚 ，魯肅 就 陪住 孔明 嚟 拜會 周瑜 。
誒各位聽眾 ，呢次啊 ，乃係 孔明 同 周瑜 第一次 見面 。
你哋 估下 吖嗱 ，佢哋 兩個 嘅 年紀 啊 邊個 大 呢 ？
喺 我哋 睇過 嘅 戲曲 裏 便 呢 ，就 無論 係 京劇 嘅 群英會 ，或者 粵劇 嘅 三氣周瑜 啊 ，諸葛亮 都 係 掛住 長長 嘅 鬍鬚 。
而 周瑜 呢 ，相貌 英俊 ，白面 無鬚 ，睇 個 樣 呀 梗係 諸葛亮 老過 周瑜 定 嘞 。
其實 唔係 啊 ，呢啲 只係 戲曲 藝術 上 嘅 誇張 。
按照 歷史 嘅 記載 呢 ， 周瑜 係 出 生於 公元 一七 五年 ， 諸葛亮 出 生於 公元 一八 一年 ， 周瑜 大過 孔明 六歲 。
呢次 孔明 嚟到 柴桑郡 同 周瑜 第一次 見面 嘅 時候 ，係 建安 十三 年 ，即係 公元 二零八 年 。
當時 孔明 係 二十七 歲 ，而 周瑜 呢 ，已經 係 三十三 歲 㗎喇 。
噉啊 而家 周瑜 一 聽見 話 孔明 嚟到 咯 ，就 親自 行 出嚟 中門 迎接 。
入到去大廳 ，彼此 行過禮 ，就 分開 賓主 坐落 。
魯肅啊 先 問 周瑜 話嘞 ：
而家 曹操 帶兵 南下 想 吞併 江東 ，係 和 定係 戰 ，主公 仲 揸唔定 主意 。
全靠 將軍 你 嚟 決定 嘞 ，唔知 將軍 你 嘅 意思 點 呢 ？
周瑜 話 ：
曹操 出兵 係 用 天子 嘅 名義 ， 要 抵抗 係 唔 合 道理 嘅 。
而且 佢 嘅 兵勢 強大 ，係 唔 容易 抵敵 。
打就必敗 ；而 投降 呢 ，仲 容易 保全 。
我 已經 決定嘞 ，聽日 去 見咗 主公 ，就 派 使者 去 投降 啦 。
魯肅 聽咗 愕然 啊 ，佢 話 ：將軍 你 噉 講 就 唔啱 咯 。
江東 嘅 基業 ，已經 傳 咗 三 代 喇 ，點 能夠 一下 就 唔 要 送 咗 畀 人 啊 ？
當年 伯符 臨死 嘅 時候 ，佢 講過 對 外 嘅 事 ，都 托付 畀 將軍 。
當前 ， 正 係 要 依靠 將軍 你 嚟 保衛國家 ， 點解 你 都 附和 嗰 班 懦夫 嘅 意見 呢 ？
江東 六郡 咁多 老百姓 ，如果 遭受到 兵災 橫禍 ，人人 都會 怨恨 我 㗎喇 。
故此 我 先至 決心 主張 投降 嘅 啫 。
噉 就 唔 係 噉 講喇 。
有 將軍 你噉嘅 英雄 人物 ，又 有 東吳 咁 險要 嘅 地勢 ，曹操 未必 就 能夠 佔到 便宜 嘅 。
哈 ，你 一言 佢 一語 ，魯肅 同 周瑜 就 爭論 起嚟 。
孔明 袖手旁觀 ，坐 喺 旁邊 一味 冷笑 。
周瑜 見到 就 問 嘞 ：先生 你 笑 咩 呢 ？
嘿嘿 ，我 唔係 笑 邊個 ，我 係 笑 子敬 不識時務 唧 。
魯肅 急嘞喎 ：先生 ，你 為咩嘢 笑 我 不識時務 啊 ？
公瑾 決心 要 投降 ，係 十分 合理 㗎 。
周瑜 話嘞 ：係咯 ，孔明 係 識時務 嘅 人 ，一定 係 同 我 嘅 睇法 一樣 嘅 。
魯肅 真係 有啲 氣憤 嘞 ，佢 話 ：孔明 ，點解 你 都 噉 講 呢 ？
嘿嘿嘿嘿 ，子敬 呀 你 聽 我 講 啦 ，曹操 係 極 善於 用兵 ，天下 冇 人 能夠 抵擋得住 佢 嘅 。
以前 ，亦 只有 呂布 、袁紹 、袁術 、劉表 佢哋 敢 同 曹操 對敵 嘅 啫 。
而家 呢 幾個人 都 畀 曹操 滅咗 嘞 ，天下 再 冇 人 敢 同 佢 對抗 㗎 喇 。
就係 ，唯獨 一個 劉豫州 ，佢 就 真係 不識時務 ，硬係 要 同 曹操 爭過 。
而家 佢 一個人 趯 到 去 江夏 ，生死 都 難保 。
將軍 你 如果 決心 投降 呢 ，就 可以 保全 妻子 兒女 榮華富貴 。
至於 國家 命運 ，就 睇 天意 算 咯 ，有 咩 咁 可惜 呢嚱 ？
嘩 當堂 激到 魯肅 呀 吹鬚碌眼 ，佢 鬧 孔明 話 ：咩 話 ？你 係 要 我 主公 喺 國賊 面前 屈膝 投降 係嘛 ？
誒 ，我 仲有 個 辦法 ，唔使 牽 羊 擔 酒 ，納 土 獻 印 ，亦 唔使 親自 過江 去 請求 投降 嘅 。
只要 派 一個 使者 ，用 一隻 小船 ，送 兩個 人 去到 江 上 。
曹操 一 得到 呢 兩個 人 ，百萬 大軍 ，就 全部 卷旗 卸甲 撤退 㗎喇 。
周瑜 一 聽 奇喇 ，請問 先生 ，用 邊 兩 個 人 可以 使到 曹操 退兵 呢 ？
江東 送咗 呢 兩個 人 去 ，就 好似 大樹 飄咗 兩片 樹葉 ，糧倉 少咗 兩粒 米 啫 。
而 曹操 得到 佢 兩個 呢 ，就 歡喜 到 極 要 走人 㗎喇 。
究竟 係 邊 兩個 人 呢 ？
以前 ，我 喺 隆中 嘅 時候 就 聽講 曹操 喺 漳河 ，新新 起 咗 一 座 銅雀台 ，係 極其 壯麗 嘅 。
佢 仲 喺 天下 各地 啊 ，到處 噉 選咗 一 大 批 美女 住 喺 裏 便 嚟 添 。
曹操 本來 係 個 好色之徒 ，佢 早就 聽講 江東 喬公 有 兩個 女 ，長女 叫做 大喬 ，次女 叫做 小喬 。
佢 兩個 都 係 有 沉魚落雁之容 ，閉月羞花之貌 。
曹操 曾經 發過 誓 ，佢 話 ：我 平生 第一個 志願 ，係 要 掃平 天下 做 皇帝 ；
第二個 志願 呢 ，係 得到 江東 二喬 ，接 佢哋 喺 銅雀台 住 ，自己 就 快快樂樂 ，喺 處 度過 晚年 就 死 而 無 恨 喇 噉 。
而家 ，曹操 率領 百萬 之 眾 虎視 江南 ，其實 呀 ，不過 係 為咗 呢 兩 個 女子 咋嘛 。
將軍呀 ，你 點解 唔 去 搵 喬公 嚟 ，使 多 幾個 錢 買咗 呢 兩 個 女子 ，派 人 將 佢哋 送 畀 曹操 。
曹操 得到 呢 兩個 女子 就 稱心如意 ，一定 班師 回朝 。
呢個 乃係 范蠡 獻 西施 之 計 呀 ，我 睇 ，將軍 快啲 噉 做 就 啱嘞 。
啊？ 先生 話 曹操 想 得到 二喬 ，有 乜嘢 憑據 呢 ？
有啊 ，曹操 嘅 細仔 曹植 ，寫過 一篇 銅雀台 賦 。
文章 裏 便 嘅 意思 ，就係 話 曹操 應該 做 皇帝 ，一定 要 得到 二喬 噉 嘅 。
呢一篇 銅雀台賦 ，先生 你 記唔記得 ？
記得 ，因為 佢 呢一篇 賦 寫得 文辭 華美 ，我 就 背咗 落嚟 嘞 。
誒 ，等 我 念 幾句 畀 將軍 你 聽下 呢 。
於是 孔明 啊 ，就 將 銅雀台 賦 成 段 成段 噉 背出嚟 。
當佢 背到 其中 兩句 ：立 雙台 於 左右 兮 ，有 玉龍 與 金鳳 。攬 二喬 於 東南 兮 ，樂 朝夕 之 與 共 。
孔明 用 眼尾 一掃 周瑜 ，嘴角 微微 一笑 。
嘩呀 ！周瑜 嬲 到 成個 跳起 ，離開 座位 ，指住 北 便 大聲 噉 鬧 ：
曹操 老賊 ，你 欺人 太甚 啊 ！
真係唔嬲就瓦燒個咯 ，講得明明白白啦 ，甚至好露骨添 。
就係話 要 喺 江東 啊 將 二喬 攞到 返嚟 ，從 朝 到 晚 陪伴 自己 作樂 啦嘛 。
孔明 即刻 企起身 勸 周瑜 話 喇 ：將軍 唔好 咁 嬲 。
從前 ，匈奴 侵犯 邊疆 ，連 漢朝 天子 ，都 肯 送 公主 去 和親 咯 。
而家 曹操 所要 嘅 ，不過 係 兩個 民間 女子 啫 ，使 乜 咁 可惜 呢 ？
先生 你 有所不知 ，大喬 ，係 孫伯符 將軍 嘅 主婦 ；小喬 嘛 ，就係 我 嘅 妻子 ！
哎呀 ！我 真係 唔知道 啊 ，剛才 失口 亂咁 講 ，死罪 ，死罪 ！
哈哈 ，孔明 啊 仲 喺度 詐諦 喎 。
嘿！ 我 同 曹操 老賊 ，誓 不 兩立 ！
誒 ，仲係 請 將軍 三思 ，免至 將來 後悔 啊 。
當初 ，伯符 將 後事 托付 畀 我 ，我 點 肯 屈膝 投降 曹操 呢 ？
剛才 所講 嘅 說話 ，不過 係 想 試探 下 先生 你 唧 。
我 離開 鄱陽湖 嘅 時候 ，就 決心 北伐 ，就算 鋼刀 擺 喺 條 頸 處 ，呢個 決心 都 唔會 變 。
希望 孔明 你 助 我 一臂之力 ，我哋 一齊 嚟 擊敗 曹操 ！
如果 將軍 唔 嫌棄 我 ， 我 一定 效力 ， 聽從 將軍 驅策 。
噉 ，聽日 去 見 主公 商量 出兵 嘅 事 啦 。
得喇 ，目的 達到喇 ，孔明 同 魯肅 辭別 咗 周瑜 返 扯嘞 。
第日一早 ，孫權 升堂 嘞 ，文武官員 分開 兩邊 站立 。
左便 ，係 張昭 、顧雍 等等 三十幾位 文官 ；
右便 ，係 程普 、黃蓋 等等 三十幾 員 武將 。
大家 衣冠齊整 ，十分 威嚴 。
大堂 上 便 ，一片 肅穆 ，只係 聽到 寶劍 同埋 掛住 喺 身 嚟 嘅 玉器 啊 ，碰起 上嚟 嘅 叮叮聲 唧 。
過咗 一陣 ，周瑜 入嚟 拜見 孫權 嘞 。
行過禮 ，孫權 講咗 幾句 慰問 嘅 說話 之後 ，周瑜 就 問 ：
最近 曹操 大軍 壓境 ，派 人 送咗 檄文 嚟 ，唔知 主公 嘅 尊意 如何 呢 ？
孫權 就 將 檄文 攞 畀 周瑜 睇 。
周瑜 睇咗 就 笑起嚟 話 喇 ：哼哼 ，老賊 以為 我哋 江東 冇 人 ，竟然 噉樣 嚟 侮辱 我哋 吓 。
孫權 問 ：你 嘅 意思 點 呢 ？
主公 有冇 同 各位 文武官員 商量過 啊 ？
已經 商量過 好幾日 嘞 ，有啲 勸 我 投降 ，有啲 又 勸 我 抵抗 。
我 自己 亦 揸唔定 主意 ，故此 ，想 請 公瑾 你 作 個 決斷 。
請問 係 邊啲 人 勸 主公 你 投降 呢 ？
張子布 佢哋 都 係 主張 投降 㗎 。
周瑜 就 問 張昭 嘞 ：請 先生 講 一 講 主張 投降 嘅 理由 。
張昭話 ：曹操 以 天子 嘅 名義 嚟 征討 四方 ，最近 又 得咗 荊州 ，威勢 就 越 大咯 。
我哋 江東 可以 憑藉 嚟 抵抗 曹操 嘅 呢 ，係 長江 啫 。
之 而家 曹操 擁有 嘅 戰艦 何止 千百 啊 ，曹軍 水陸 並進 ，冇 辦法 抵擋 嘅 噃 。
不如 暫時 投降 先 ，以後 再 想辦法 啦 。
周瑜 話 ：呢啲 正一 係 書呆子 嘅 意見 ！
江東 自從 開基創業 以嚟 ，已經 三代 嘞 ，點能夠 一下 就 掉咗 佢 呢 ？
孫權 就 問 嘞噃 ：噉 如果 唔 投降 ，又 有 咩 好 嘅 辦法 嚟 對付 曹操 呢 ？
周瑜 就 講 ：曹操 雖然 名為 漢朝 丞相 ，實際上 ，係 個 漢朝 奸賊 ！
以 將軍 你嘅 英雄 才智 ，繼承 父兄 嘅 基業 ，有 江東 做 根據地 ，兵 精 糧 足 。
正係 應該 縱橫 天下 ，為 國家 剷除 奸賊 ，點解 ，反而 要 投降 曹賊 呢 ？
而且 ，曹操 呢次 南下 ，喺 軍事 上 嚟睇 ，佢 犯 咗 好多 兵家 之 忌 。
目前 ，北方 仲 未曾 完全 平定 嘅 。
馬騰 、 韓遂 ， 就 喺 曹操 嘅 後方 為 患 ， 而 曹操 呢 ， 卻 係 經常 喺 南方 作戰 ， 呢 個 ， 係 第一 忌 ；
北方 嘅 軍隊 ，唔 熟悉 水戰 ，而 曹操 偏偏 唔 使用 馬匹 ，唔 用 陸軍 ，反而 要 用 起 船隻 戰艦 嚟 同 東吳 較量 ，呢個 ，係 佢 嘅 第二 忌 ；
而家 ，正係 隆冬 嚴寒 季節 ，馬匹 缺乏 草料 ，呢個 係 第三 忌 ；
將 中原 地帶 嘅 兵卒 ，趕到嚟 南方 長途跋涉 ，不服 水土 ，好多 兵卒 都 生咗 病 ，呢個 係 第四 忌 。
曹軍犯 咗 咁 多 兵家 之忌 ， 雖然 人數 眾多 ， 亦非 失敗 不可 ！
主公 ，你 要 生擒 曹操 ，而家 正係 好 機會 啊 。
我 請求 主公 你 ，准許 我 帶 幾萬 精兵 進駐 夏口 ，為 主公 你 打敗 曹操 ！
孫權 一 聽 周瑜 呢 一番 說話 ，講得 有 道理 ，有 勝利 嘅 信心 ，慷慨激昂 ，嗨呀 ，不禁 精神 振奮 啊 。
佢 啪聲 企起身 嚟 話 ：曹操 老賊 想 篡位 好耐 㗎喇 。
佢 就係 怕 袁紹 、袁術 、呂布 、劉表 同 我 唧 。
而家 嗰 幾位 英雄 已經 消滅 喇 ，唯獨 我 仲 喺 處 。
我 同 老賊 誓不兩立 ！你 主張 討伐 曹操 ，合晒 我 嘅 心意 啊 。
臣 願 為 將軍 決 一 血戰 ，萬死 不辭 ，就係 怕 將軍 你 猶疑 不定 啫 。
孫權 見 周瑜 噉 講 ，就 拔出 寶劍 ，咵 一聲 ，將 面前 嘅 公案 斬 咗 隻 角 。
佢 話 ：邊個 敢 再 提 投降 曹操 嘅 ，就 好似 呢 張 公案 一樣 ！
講完 ，就 將 呢一把 寶劍 賜畀 周瑜 ，馬上 封 周瑜 做 大都督 。
