كيف رح تكون حياتك عالمريخ؟ | Life on Mars
الحروب والأوبئة
الكوارث الطبيعية أو الانهيارات الاقتصادية
هذه مش أكبر مشاكل بواجهها الإنسان
هاي كلها مشاكل الها حل
حتى لو انهار الاقتصاد العالمي مثلا
نظريا بنقدر نبلش من الصفر
لكن فيه كوارث مافي معها لعب بالمرة
زي الاحتباس الحراري مثلا
اليوم مش رح نحكي عن كيف الاحتباس الحراري عامل زي الفيل اللي في الغرفة
الكل شايفه بس محدش بده يفتح الموضوع
مبدأ الاحتباس الحراري بشكل عام ممكن ينهي حياتنا هون تماما
لكنه ممكن يكون أحد أسباب نجاة البشر في الكون
في بحثنا على كواكب قابلة للمعيشة في الفضاء العملاق
عندك يا معلم خيارين
الخيار الأول
هو أنه نلاقي كوكب يشبه الأرض بخصائصه
بس هاي شغلة صعبة كتير
واحنا التكنولوجيا الحالية تبعتنا يا دوب توصلنا للمريخ
يا دوب ببعد عنا 22 دقيقة ضوئية
ما بالك في كواكب بتبعد عنا آلاف السنين الضوئية
أما الخيار الثاني
وهو الواقعي أكثر
أنه ندور ع كوكب فيه صفات معينة
يعني بتقدر تقول عنده الأساسات
بس مش لاقي اللي يوجهه
حلو حلو
نفوت بالتفاصيل
خلينا نبدأ بالخيار الأول
عشان نسهل على حالنا البحث
أهم خاصية بندور عليها هي المياه السائلة
وعشان نقدر نلاقي هاي الكواكب بطريقة ذكية
صممنا نموذج للبحث
فيه الشروط التالية
نبحث عن نجوم بتشبه الشمس
نلاقي كواكب بتبعد عن هاي النجوم مسافة بتشبه بعدنا احنا عن الشمس
بس ليش؟
سؤال ذكي
لنفترض لقينا كوكب
xyz
قريب من نجمته مثلنا
ولقينا دلائل ع وجود مياه هناك
بنقدر نتوقع بسهولة أنه درجة حرارته ممكن تكون معتدلة
بتسمح للمي تكون موجودة بحالتها السائلة
والمياه السائلة على حد علمنا
مهمة جدا لتطور الحياة
وهيك بنكون ضربنا نجمتين بحجر
لقينا كوكب عليه درجات حرارة مناسبة وعليه مياه سائلة
طب إذا هيك الموضوع بعتمد عالبعد عن النجم
ليش لازمين حالنا ندور ع نجوم بتشبه شمسنا؟
هو صراحة احنا مش لازمين حالنا
لكن في حال لقينا نجم أكبر بكتير من شمسنا
بصير بدك تدور ع كواكب حواليه أبعد بكثير من المسافة المحددة في النموذج الأول
أما إذا كان النجم أصغر ف بتقرب مسافة البحث
بتتعدد المسافات لكن النظام واحد
هاي المنطقة اللي بيكون فيها النجم بعيد مسافة مناسبة عن الكوكب
بتسمح لدرجات الحرارة تكون معتدلة ويكون فيها مياه سائلة
هاي المنطقة اسمها المنطقة القابلة للمعيشة
حلو كتير
حلينا مشكلة المنطقة الذهبية
ف بالتالي بننتقل للمأزق اللي بعده
اللي هو لون النجم
لون النجم بأثر كتير على حياة النجمة وكيف شكلها
مثلا
النجوم اللي إضاءتها شديدة بتنحرق بسرعة
وبتعيش يادوب كم من مليون سنة
أما شمسنا الشموسة مثلا رايقة
بتشتغل ع الهدى
صارلها 4.5 مليار سنة ولسا وضعها تمام
طيب وين المشكلة ببضع ملايين السنين؟
هاي مشكل كبيرة
خد الارض ع سبيل المثال
يقدر إنه النا 300 ألف سنة موجودين ك بشر
بس إذا بتطلع على التاريخ
بتلاقي إنه أول علامات الحياة ظهرت من 3 ونص مليار سنة أو أكثر
يعني أخد الكوكب 3 ونص مليار سنة ليوصل لجنس عاقل ذكي
والسمك طلعله رجلين
وصار فيه برمائيات وزواحف
وثدييات
بس هاد الحكي أخد مليارات السنين
واستقرار الشمس هو اللي سمح للحياة هاي تتطور ع راحتها شوي شوي
أما تقولي نجم عمره بضع ملايين السنين هاي وين بدنا نحطها؟
إذا احنا أخدنا أكثر من مليون سنة عشان يتساقط شعر جسمنا
عشان هيك قررنا نريح راسنا وندور ع نجمة بتشبه نجمنا
وأصلا هدول كتار كتير
وفيه أحسن منهم كمان
اللي هم الأقزام البرتقالية
مقارنة بشمسنا اللي هي قزم أصفر
شمسنا بتعيش 10 مليار سنة إن طارت
أما الأقزام البرتقالية طبيعتها مناسبة وممكن تعيش ل 45 مليار سنة
أما هون ف نحنا معانا مليار سنة عالكوكب بالكتير
لبين ما نكون لقينا نظام شمسي تاني لإنه الشمس حتبلش تعيد ع حالها وعلينا
بس لا أعتقد إنه هاي مشكلة
لإنه نحنا أصلا بلشنا نعيد عالكوكب من هلأ
لدرجة أنه علماء الاحتباس الحراري بقولوا لك خلص
فات الأوان فات الأوان
عنا 99 مشكلة بس الشمس مو وحدة منهم
ف بلشنا ندور عالكوكب اللي بعده
والخير كتير والحمدلله
لحد الآن لقينا 3200 كوكب خارجي
في أرجاء المجرة
ورشحوهم أنه ممكن يكونوا قابلين للمعيشة
لكن بتضل المشكلة إنه نحنا ما عنا التكنولوجيا الكافية
إنه نتعرف على طبيعة هذه الكواكب
عاد هي كواكب غازية ولا عملاقة متجمدة
ولا يا ترى بتشبه الأرض بس ما فيه عليها مياه سائلة مثلا
بس مع الوقت رح تتطور التكنولوجيا أكثر ونقدر نستكشف هاي الكواكب المرشحة
بس مع هيك برضو الموضوع صعب كتير لإنه صعب كتير إنا نوصلهم
أو ممكن نلاقي كوكب مثلا بس فيه عليه ناس قبلينا
البشري: بحكيلك كوكبي خربان
البشري: وين أروح بحالي؟
الفضائي: بدك تحكيلي؟ ما انتو سمعتكم الكونية زي الزفت
البشري: سيب بسيب
الفضائي: ما رح أسيب
الفضائي: ولك هات
البشري: أقسم بالله بولع بالمجرة هلأ
البشري: كوكبي هاد أنا لقيته أصلا
البشري: أنا لقيته
بس ما هو ليش نبعد واحنا فيه عنا كوكب في الحارة؟
الرحلة للمريخ بأفضل الأحوال المدارية تاخدلها 150 يوم
بعثة نيو هورايزونز مثلا أخدت 39 يوم لتقرب من المريخ
أما إذا كانت المدارات مغلبيتنا
فالرحلة بتاخدلها شي 300 يوم
بس بشكل عام
فيه عنا كل سنتين نافذة مدارية بتخلينا نقدر نوصل للمريخ بسرعة
نسبيا
هلأ أول شيء بتلاحظه بالمريخ هو لونه الأحمر
اللي سببه وجود أكسيد الحديد أو الصدأ
كوكب مصدي يعني
قطر المريخ أقل بشوي من نصف قطر الأرض
يعني شيء حلو
بيت الضيق يوسع ألف صديق
هلأ المريخ بيجي بعد الأرض في ترتيبه بعدا عن الشمس
بالتالي
بياخد فترة أطول إنه يدور حوليها مرة وحدة
ف السنة هناك عبارة عن 687 يوم أرضي
بس معلش الجاذبية الخفيفة رح تخفف عنك آلامك
جاذبية المريخ تقريبا ثلث جاذبية الأرض
ف بتتنطنط حواليك وبتتطلع عالسما بتلاقي قمرين
دول ولا عينيك
فوبوس وديموس
بس لا تتهور كتير
صح المريخ بحتوي على أهم عناصر الحياة
واللي هي المياه والأكسجين
الكربون
والنيتروجين
بس فيه عليه بلاوي كتير
أعطيني البلاوي
برد
برد كتير
كتير كتير برد
متوسط درجة الحرارة ناقص 62
بس عالأقل فيه خصلة منيحة
أنه غلافه الجوي بحتوي على 95% غاز ثاني اكسيد الكربون
هلأ غاز ثاني أكسيد الكربون مع إنه رح يغلينا غلي هون
بس عالمريخ يعتبر فائدة لأنه من الغازات الدفيئة
اللي عندها المقومات أنها ترفع درجة حرارة الكوكب
مع أنه المريخ أيام زمان كان كوكب دافئ و رطب
واللي ساعده هي الغازات الدفيئة أو بالأخص ثاني أكسيد الكربون
يعني الغاز اللي رح يدمر كوكبنا ممكن يساعدنا في بناء حياة جديدة على كوكب ثاني حتى أنه هاد الغاز بالماضي كان أكتر بكتير عالمريخ من هلأ
بس مع الوقت نزل الغاز عالأرض وصار يتحد مع الصخور ويعمل صخور كربونية ليش هيك صار؟ لسا ما بنعرف
بقولوا يمكن الموضوع اله علاقة بالماء
المهم
الخبر الحلو
إنه العلماء عملوا محاكاة لإمكانية تغيير المناخ على المريخ
وكانت النتائج ممتازة
نظريا
بنقدر نرفع درجة حرارة الكوكب عن طريق تحرير ثاني أكسيد الكربون
المحبوس في جليد الأقطاب
في كون موازي
كنا رح نقرب المريخ شوي من الشمس
نغير مداره يعني
بس هون بالنسخة المجانية ما عنا كتير خيارات
بس عنا كتير مري جمع مرآه
بنجيب مري ضخمة
وبنعكس فيها أشعة الشمس على الأقطاب الجليدية
الحرارة رح تخليه يطلق سراح كثير من هاي الغازات
أو نعمل زي ما عملنا على الأرض
نبني مصانع ضخمة تنتج الغازات الدفيئة
وبنخرب الكوكب قبل ما نجربه
حل ثاني
هو أنه نجيب غاز الأمونيا
هاد موجود كتير منه في جليد الفضاء
ف شو بيعملو العلماء؟
بيجو بيصطادو هاي الكتل الموجودة بالفضاء
وبنزلوها على سطح المريخ
وهيك بعملو احتباس حراري وبزيدو درجة حرارته اوكي
رفعنا درجة حرارة الكوكب والأمور تمام وصار جوه مناسب
وبعدين؟
لما تروح هناك رح تكتشف أنك وصلت على مكان مستحيل تقدر تتنفس فيه زائد المكان نشط إشعاعيا
بس معلش
برضو رح نروح ورح نبني مستعمرة هناك
إذا في شيء واحد بس بميز البشر
هو إنه احنا مستكشفين فضوليين مغامرين بطبيعتنا
وقريبا
رح يكون فيه أول مستعمرة بشرية عالمريخ
هاي المستعمرة كيف حتكون عاملة؟ لو رحت عشت هناك كيف حتكون حياتك؟
ندخل بالتفاصيل
من وين بدنا نجيب طاقة تدعم المستعمرة؟
هلأ لأنه المريخ أبعد عن الشمس من الأرض
الطاقة الشمسية اللي بتوصل للمريخ أقل ب 50% من اللي بتوصل للأرض
ومش بس هيك
المريخ غلافه الجوي مليان أتربة
يعني الأشعة اللي رح توصل إذا لحقت توصل
رح يصدها الرمل لبرا
يعني استخدام الألواح الشمسية بده حظ
لحد ما نستقر عالمريخ ونفهمه
ما فيه عنا أمل غير أنه نبعتلهم طاقة من هون من الأرض
ادخل علي بالديمقراطية
ولإنه المريخ بعيد شوي
ف بدك تبعت شيء مرتب
بتبعت نووي
المفاعلات النووية هي أفضل مصدر للطاقة ممكن نصنعه على المريخ
جميل؟ جميل اللي بعده
الغلاف الجوي تبع المريخ غير صالح للتنفس
مفيش أوكسجين حضرتك
فالمستعمرات لازم يكون فيها خزانات ومولدات بتعمل أكسجين ونيتروجين اللي بيحتاجوه للمستعمرة
عشان تقدر تتنفس
حلو
هي حطينا لك أكسجين
تعال ناخدك جولة في البيت
أو بالأحرى في الأنبوبة
المستعمرة لازم تكون كروية نوعا ما
بتقدر تعتبرها ماسورة كبيرة
عشان تقدر تتحمل اختلاف الضغط بين برا وجوا
بتفوت ع الأنبوب... اووه؟
ما فيه شبابيك
والأنبوب من برا مغطى بجليد ثاني أكسيد الكربون
ومدفون بالرمل
عشان يصد الإشعاعات الشمسية القوية اللي هناك
اللي بتطبخ الحمض النووي تبعنا
الإشعاعات هناك بتوصل لخمسين ضعف الإشعاع اللي بنتعرضله احنا هون عالأرض ف ممكن تقعد بهاد الأنبوب سنين طويلة بدون ما تشم ريحة برا حتى
طيب
إذا ضليت محشور في الماسورة
مين اللي بده يعمل الشغل برا معناته؟
العبيد طبعا
الروبوتات
حلو
قعدنا شوي جعنا
شو بدنا ناكل؟
تربة المريخ سامة جدا للحياة على الأرض
مليانة بيروكلورات اللي بتخربلك الغدة الدرقية
ولإنه تصليح التربة رح تكون تكلفته عالية جدا
ف ع الأغلب رح ناكل سمك
أو حشائش بحرية من هدول اللي بنقدر نربيهم عنا بالمستعمرة
بالأحواض يعني
هذا غير بلوة انخفاض الجاذبية
اللي رح تعملك مشاكل في العضلات والعظام والتوازن ف لبين ما نلاقي حل بدك تتمرن رياضة أقل شي ساعة أو ساعة ونص باليوم
احنا بتهيألنا إنه الكواكب قاعدة بتستنى فينا وبتحكيلنا يلا تعالو
بس فعليا احنا عايشين في مركبة اسمها الأرض
لحد الآن ما فيه غيرها
موفرة لنا كل شيء محتاجينه عالتكة
أو بالأحرى
لإنه ظروفها كانت ملائمة احنا ظهرنا بس ما علينا
المهم
احنا جماعة كتير هشين
وعم نخرب المكان الوحيد اللي مآوينا
الأرض
فيه مثل لسكان أمريكا الأصليين بقول
عندما نقتلع آخر شجرة
ونصيد آخر سمكة
ونسمم آخر نهر
سندرك أن المال لا يؤكل
إذا بتحبو المحتوى اللي بعمله وبتحبو تساعدوني
بتقدرو تدعموني على باتريون
كمان على باتريون كل شهر
رح نعمل جلسة أونلاين مباشرة
نتناقش فيها مع بعض نحنا الباترونز
بأشياء الها علاقة بالعلم بالحياة
يعني ندردش
إذا مهتمين بالموضوع رابط الباتريون بتلاقوه في صندوق الوصف
سلام
طيب.. ما فيه داعي نحكي بموضوع القناة وإنك لازم تشترك وتخلي الجرس يرن.. إلى آخره
بس صراحة لازم أذكرك
إنك تشوف أو تشوفي الفيديوهات الثانية
يا أخي اسرح بخيالك
