هل أنا ملحدة؟ | Am I an Atheist?
الناس بحكوا إنا ملحدين
الناس بحكوا إنا بنخرب عقول الشباب
الناس بحكوا أنه ما عنا علم
اسمي سلام قطناني
قبل 6 سنوات قررت أعمل فيديوهات أحكي فيها عن العلوم
مع الوقت… لقيت ناس بتشاركني في شغف العلوم
وبلشنا نشتغل مع بعض في صناعة المحتوى
عملنا عشرات الفيديوهات
ووصلنا لمئات الآلاف من الشباب العربي
اشتغلنا مع هيئات كتير
من وزارات تعليم
لمنظمات دولية
حتى نفتح للأطفال أفاق من الفضول
صنعنا برامج انعرضت على أفضل القنوات التلفزيونية
و صح… أنا ما عندي شهادة جامعية بالعلوم
انجبرت أترك المدرسة وأساعد أهلي بعد وفاة أبوي
وصح… أنا من عائلة فقيرة
ما حدا فينا بختار وضع العائلة اللي بنولد فيها
وصح… شغلي في صناعة المحتوى هو مصدر رزقي
وليش ما يكون؟
أنا بحب الشي اللي بعمله وببذل كل جهدي أني أقدم أفضل ما عندي
لكن... للأسف
مش الكل بفهم المعنى الحقيقي ورا اللي بنعمله
عشان هيك قررنا نعمل هاد الفيديو
بعض الناس بحاولوا يقنعوك أنه إذا اهتميت بالبحث والتفكير العلمي
لازم تستغني عن إيمانك ومعتقداتك الروحانية
وقيمك الأخلاقية
بس عشان نعرف إذا هاد الحكي صحيح
خلينا نسأل سؤال بسيط
هل من الممكن أن يكون العالم مؤمن؟
قبل ألف سنة
كنا نفكر أنه الضوء بيصدر من الأجسام
بعدين تعلمنا أنه الضوء بوصل الجسم و برتد عنه
مش بطلع منه
واللي وصلنا لهاي المعرفة هو كتاب ابن الهيثم
"المناظر"
نفس العالم اللي استخدم الرياضيات عشان يعرف اتجاه القبلة في أي مكان على الكرة الأرضية قبل اختراع الموبايل اللي بفكر عنك ب1000 سنة
واحزر شو؟
ابن الهيثم كان رجل مؤمن
فيه اله مقولة ملهمة بحكي فيها
...سعيت دومًا نحو المعرفة والحقيقة"
...وآمنت بأني لكي أتقرب إلى الله...
...ليس هنا أفضل من أن أبحث...
...عن المعرفة...
والحقيقة"
وفيه عالم ثاني اسمه فرانسيس كولينز
هاد هو اللي حلل الشيفرة الوراثية الكاملة للإنسان
واكتشف كثير جينات
مرتبطة بكثير أمراض بتصيبنا
واحزر شو؟
كمان كان رجل مؤمن
...التاريخ
برويلنا قصص علماء مؤمنين
هم اللي أسسو لكثير من العلوم اللي ساعدتنا نوصل للتكنولوجيا العجيبة
اللي منغمسين فيها اليوم
هلأ وجهات نظر العلماء بتختلف تجاه الإيمان
بس هم صراحة حتى العلوم مش دايما بكونو متفقين فيها
لكن
الشي المهم اللي بورجينا اياه التاريخ
هو أنه العلماء
قادة الحضارة
ما كان عندهم مشكلة أنهم يفكروا بالدنيا بالطريقتين
العلمية
والإيمانية
مع بعض
إذاً الجواب على السؤال البسيط
هو أنه
اه
بإمكانك تكون علمي
ومؤمن بنفس الوقت
عادي
طيب... شو بالنسبة للسؤال الصعب؟
هل الأفكار العلمية
بتلغي الأفكار الإيمانية؟
هلأ العلم والإيمان موجودين في حياتنا كلنا
وبنتفاعل معهم بشكل يومي
من ناحية
اشي حقيقي أنه العلوم زي الكيمياء والطب
ساعدتنا نعيش بصحة منيحة وعمر طويل
يعني قبل 200 سنة بس
كان عدد البشر على الأرض مليار
واليوم
قربنا نوصل لل8 مليار
من الناحية الثانية
كمان حقيقي أنه الديانات ساعدت
في بناء مجتمعات مستقرة
الها قيم وأهداف مشتركة
يعني اليوم
فيه تقريبا 2.5 مليار مسيحي
و2 مليار مسلم
حول العالم
لكن إذا بحثنا بالعلم والإيمان بشكل أعمق من تجاربنا اليومية
رح نستنتج أنه الاثنين
الهم هدف واحد
واللي هو السعي وراء الحقيقة
هون عند هاي النقطة عاد
فيه ناس بيجوا بحكولك لاااا
كيف؟
هاد الحكي غلط وفيه مشكلة كبيرة
الحقيقة العلمية بتلغي الحقيقة الإيمانية
والحقيقة الإيمانية بتلغي الحقيقة العلمية
وبجبروك تختار واحد منهم
يا أبيض يا أسود
طيب.... بدون الأبيض
هل فيه معنى للأسود؟
هل فعلا فيه مشكلة إذا اجتمعت الأفكار العلمية والإيمانية في عقلك؟
عشان نكتشف الجواب لازم نتعرف أكثر على كيف الدماغ بشتغل
الدماغ البشري اله نظامين تفكير
الأول هو النظام الأوتوماتيكي العاطفي السريع
وهو النظام اللي بنستخدم فيه العاطفة
للحكم على صحة الأشياء
مثلا
واحد بيستخدم نظام التفكير العاطفي ممكن يشك بزوجته أنها عم بتخونه
لمجرد أنه حاسس بالغيرة
مع أنها بعمرها ما خانته
هاد الإنسان مرق بتجربة خيانة سابقة
وكان حاسس وقتيها بالغيرة
ف لما حس بالغيرة على زوجته الحالية
على طول ربط الموقفين ببعض وقلك بس.. واضحة
خاينة
بدون أي دليل مادي
بالتالي
الحقيقة بالنسبة لنظامك العاطفي مش بالضرورة تكون حقيقة ملموسة
بتقدر تعتبر الحقيقة بالنسبة اله هي
أفضل سيناريو بقدر أكونه عن نفسي وعن الواقع حولي
عن طريق ربط الأحداث
بحيث يكون الأنسب لزيادة فرص نجاتي بالمستقبل
فهو كتير اشي نسبي ويختلف من شخص لآخر
"خلينا نسميها "الحقيقة الأخلاقية
أما نظام التفكير الثاني
اللي هو النظام المنطقي العقلاني البطيء
اللي بتبع قواعد المنطق وبحاول يتفادى الانغماس بالعاطفة كتير
مثلا
الدنيا برا عم بتمطر
الأرض برا مبلولة لأنها مطرت
العشب برا
إذا العشب نبل لأنها مطرت
العشب مبلول إذن مطرت قبل شوي
إذا استخدمت النظام المنطقي ع شيء حقيقي
رح تقدر تكون فرضية
ممكن تختبرها
وتتأكد من صحتها
كلنا عنا هدول النظامين للتفكير
وبنقدر نستخدم أي واحد فيهم
التفكير المنطقي
والعاطفي
...الاثنين
ببحثوا عن الحقيقة
لكن… فيه فرق جوهري بينهم
الاثنين بدوروا عالحقيقة اه
لكن… بيبحثوا عن أنواع مختلفة من الحقيقة
قبل ما نحكي عن أنواع الحقيقة المختلفة فيه سؤال مهم
كيف مخك بيقدر يشتغل بنظامين مختلفين في التفكير؟
ممكن تستغرب لما تعرف أنه لما يكون نظام منهم فعال
الثاني بكون متعطل
أدمغتنا بتتعامل مع الأنظمة زي ما بتتعامل مع هاي الصورة
غريب صح؟
أما بتشوفها كاسة مزركشة
أو شخصين بتطلعوا على بعض
بس ما بتقدر تشوف الشغلتين
في نفس الوقت
أو هاي الصورة الثانية مثلا
إما بتشوف بطة
أو أرنب
لكن ما بتقدر تشوف البطة والأرنب بنفس الوقت
بناء على نوع التفكير اللي بنستخدمه
بتتبدل أدمغتنا بين النظامين بالزبط زي ما شفت شغلتين غير عن بعض في نفس الصورة
تمام؟
تمام
هلأ بعد ما تعرفنا على أنظمة التفكير اللي كل واحد منها بدور على حقيقة مختلفة هل هاد الشي يعني أنه العلم والإيمان
ضد بعض؟
الحقيقة
هي العكس
العلوم بتورجينا كيف تطور دماغ الإنسان
حتى يسمح للتفكير المنطقي
والتفكير العاطفي يكونوا موجودين مع بعض
ويشتغلوا كل واحد لحال
هون ممكن تسأل
معناته ليش موجود عنا نظامين تفكير
عشان ندور على الحقائق في العالم؟
يمكن لازم تسأل
ماذا لو كان فيه أنواع مختلفة من الحقائق؟
ماذا لو أدمغتنا بتستخدم نظامين مختلفين في التفكير لأنه
مش كل الحقائق زي بعض؟
خلينا نسمع من Emmanuel Kant
أحد عظماء الفلاسفة اللي حكى
توجب علي إنكار المعرفة"
"لفسح مجال للإيمان
كأنه بطخ علينا؟
شو قصده ب "توجب علي إنكار المعرفة
لفسح مجال للإيمان"؟
لازم نكون واضحين وحذرين هون
امانيويل
ما كان قصده رفض الحقيقة العلمية
لكن الشي اللي توصله
أنه التفكير العلمي
اله حدود
وفهم أنه بعض أنواع الحقيقة ما بفسرها العلم
بل فيه اشي ثاني بيفسرها
وهذا الشي هو
الأخلاق
ممكن يكون شي غريب أنه
كيف الأخلاق؟
بعدين بتتذكر وثيقة الاستقلال للولايات المتحدة
الوثيقة بتقولك
نحن نعتبر هذه الحقائق بديهية"
...أن جميع الناس خلقوا متساويين...
...وأن خالقهم منحهم حقوقًا معينة...
"غير قابلة للتصرف
بس لحظة
هاي مش حقيقة علمية بالمرة
هاي حقيقة أخلاقية
كلنا بنعرف أنه الناس مختلفين بقدراتهم
إذا بدنا نستخدم التفكير العلمي
ما بنقدر نحكي أنه كل البشر متساويين
لكن الحقيقة اللي آمن فيها مؤسسين الولايات المتحدة
واعتبروها بديهية
هي حقيقة أخلاقية
يعني بال1776
آمنوا أنه كل الأمريكيين
رح يتشاركوا بهاي الحقيقة
طيب ونحنا؟
شو هي الحقيقة الأخلاقية تبعتنا؟
ليش بنعمل اللي بنعمله؟
شو الهدف ورا اللي بنقدملكم اياه؟
لا
نحنا ما بدنا ننشر الإلحاد بينكم
لا
نحنا ما بدنا نقتل معتقداتكم شو ما كانت
لا
نحنا مش مدعومين من أي جهة حكومية سرية ولا فضائية
نحنا مجموعة من الناس اللي بنآمن أنه في عالمنا اليوم
اللي بمتلك المعرفة
هو اللي بمتلك القوة
بنآمن أنه اللي
عنده تعليم ومصادر علمية
هو اللي بيقدر يأثر على حياتنا
نحنا في الشرق الأوسط
أهلنا... صحابنا... أطفالنا
عم بتم إقناعنا بشكل خاطئ أنه العلم والإيمان ما بيجتمعوا
وما بقدروا يشتغلوا مع بعض
وهاد الشي ببكي
أجدادنا هم اللي كانوا السبب في الكثير من الثورات العلمية والاكتشافات
اللي هي أساس العلوم الموجودة اليوم
العلوم اللي بتعالجك إذا مرضت
وبتجاوبك إذا تساءلت
وبتقويك إذا عجزت
فيه فرق كبير كتير بين الفهم العلمي من ناحية
وبين أنك تكون إنسان محترم وخلوق من ناحية ثانية
ضروري ما نخربط بينهم
لأنه العالم صار
مقسم بشكل قبيح
بعض الناس بعتقدوا أنه التكنولوجيا هي السبب في هذا التقسيم
ونوعا ما… نحنا بنوافق على هاي الفكرة
التكنولوجيا مسؤولة بشكل أو بآخر
عن قلة الاتصال بين البشر حاليا
قبل 100 سنة
كان معدل الأصدقاء عند الشخص
خمس أصدقاء
اليوم المعدل هو صديق واحد فقط
يمكن يكون السبب هو إنا صرنا نقضي وقت طويل عالسوشال ميديا
بدل ما نكون موجودين مع أصدقائنا على الطبيعة
وطبعا ما ننسى المشاكل الثانية اللي عملتها التكنولوجيا
زي نقص الثقة بالذات والمقارنات الزايدة
والمشاكل النفسية والعقلية... إلى آخره... بس بنفس الوقت
العلم عم بشتغل على كتير أشياء إيجابية
التكنولوجيا عم بتحل كتير مشاكل حاليا
مكنتنا نداوي أمراض قتلت ملايين الناس
ساعدتنا نزرع أغذية
بظروف قسوى
أعطتنا طيارات
ووسائل نقل
احتلينا القمر
ووصلنا للمريخ
لكن نحنا مشكلتنا تنبع من حقيقة أنه اللي بمتلك العلم
هو اللي بمتلك القوة
القوة والتحكم بشو البرامج الموجودة على تلفزيونك
شو التكنولوجيا اللي بعطيك ياها
وشو التكنولوجيا اللي بمنعها عنك
شو الأكل اللي بتوكله
وشو الدوا المتوفر الك
عشان هيك نحنا بنعمل اللي بنعمله
بدنا نستخدم التكنولوجيا لصالحنا
بدنا نعزز ونمكن ثقافتنا وناسنا
بدنا ناخد قراراتنا بأنفسنا
بدنا نبني مستقبل أفضل للأجيال الجاية
الدين هو طريقة واحدة لإصلاح المجتمعات المحطمة
ما حدا بقدر ينكر فضل الدين والإيمان
ما في شيء بفوق خبرة التواصل الإنساني
لكن
فيه أشياء ثانية كمان
ممكن نشاركها مع بعض
التاريخ
الفلك
الفن
القراءة
الأخلاق
عادي تكون منفتح على الفكر العلمي
والفكر الإيماني مع بعض
ومن الجميل والمفيد
أنك تترك بعقلك وسع
للفكر الآخر
وعشان نختم بالسؤال اللي يوميا
بضل يوصلنا ع قنواتنا
نحنا بشو بنآمن؟
نحنا بنآمن بالعلم
وبنآمن أنه العلم
سوف ينقذنا
عشان هيك رح نضل نحكي بالمواضيع اللي بتنطرح
وبتتناقش بالساحة العلمية
عشان هيك
رح نضل نحكي عن الإرادة الحرة
والتطور
والنسبية العامة والوعي و و و
لازم ما يكون فيه أي موضوع ممنوع من البحث والتحدث فيه
ليش؟
لأنه الأسئلة هي اللي بتخلينا نتقدم ونتطور
حتى الأديان
بتشجعنا نبحث عن الأجوبة
بتشجعنا نتساءل
بتشجعنا نحاول نوصل للحقيقة
وشو ما كانت الحقيقة اللي بنوصلها
على الأقل
اجتهدنا في بحثنا عنها
احذر من الناس اللي بدها تقتل فضولك
احذر من الناس اللي بدها تمنعك عن التساؤل
احذر من أنك تنرمي ورا
أنه العالم رح يضل ماشي لقدامنا
معنا أو بدوننا
سلام
إذا بتحبوا المحتوى اللي بعمله وحابين تساعدوني بتقدروا تدعموني على باتريون
كمان على باتريون كل شهر
رح نعمل جلسة مباشرة
نتناقش فيها نحنا الباترونز
بأشياء الها علاقة بالعلم.. بالحياة.. يعني ندردش
إذا مهتمين بالموضوع
رابط الباتريون بتلاقوه بصندوق الوصف
سلام
طيب ما فيه داعي نحكي بموضوع القناة وأنه لازم تشترك وتخلي الجرس يرن إلى آخره
بس صراحة لازم أذكرك أو أذكرِك أنك تشوف أو تشوفي الفيديوهات الثانية يا أخي اسرحي بخيالك
