Past and Present Economic Success

الأب: الإقتصاد اللبناني، تقليديا بالقرن العشرين مبني على أساس إنّو لبنان بلد صغير، وبلد كان مفتوح على العالم، وكان في دور كبير للتجارة فيه من خلال مرفأ بيروت إلِّي توسع وإلِّي انطلق من نص القرن التاسع عشر وأصبح بالقرن العشرين احد المرافئ الأساياة إلِّي بتمرق فيها البضاعة المستوردة لكل المشرق العربي، لسوريا والأردن والعراق والخليج حتى قبل ما يصير في خطوط مباشرة للخليج، يعني كان في تجارة ترانزيت مهمة من خلال مرفأ بيروت. والسكك الحديدة اللي كانت تروح من بيروت للشام وللداخل بالمشرق, بعدين بلبنان كان في نشاط مصرفي ومالي, كان في بنوك من زمان, قبل ما تأسس كثير بنوك في المنطقة العربية, فكان لبيروت وللبنان دور مالي مصرفي كثير مهم, وكان كثير من رجال الأعمال والأثرياء بالمنطقة يحطو ودائعهم بالبنوك اللبنانية ويتعاملوا مع العالم من خلال. كمان تقلديا بالإقتصاد اللبناني كان في قطاع قوي هوي قطاع السياحة لأنو لبنان طقسوا معتدل خلافا لجزء من الدول العربية اللي بالخليج وبالداخل اللي فيهن كثير حرارة, وطبيعته كثير متنوعة, في جبال خضره, في سهول, في شواطئ, يعني مجهز كثير منيح طبيعيا من ناحية طبيعة ومناخه ومناظرة ليكون بلد سياحي. فكمان السايحة نسبيا قديمة بلبنان ومتطورة في سياحة صيفية في سياحة شتوية في ناس بيجوا بيصيفوا بلبنان في ناس بيجوا بيتزلجوا لانو في ثلوج كمان على الجبال وقليل كثير بالمنطقة اللي فيها جبال وثلج ويعني مناطق تزلج. فهيدي القطاعات الأساسية اللي كانت واللي تطورت كثير بلبنان لحد الستينات والسبعينات من القرن الماضي. الزراعة اللبنانية كانت موجودة ولكن يعني نوعا ما صغيرة وحصورة وما كانت قادرة تنافس باسعارها الزراعات بالمنطقة و العالم أو المواد الغذائية المستوردة. فالزراعة اللبنانية ركزت اساسا على نوعين ثلاثة, اللي هيي اساسا الفواكه, الفاكهة اللبنانية اللي كثير طيبه, خاصة الحمضيات البرتقان والأفندي والكليمنتين والتفاح وعدد من الفاكهة الثانية, فلبنان كان يصدر للمنطقة كمان وشوي بالمتوسط فواكهة كان يصدر شوية زيت زيتون.. يعني في بعض الزراعات المتخصصة, ولكن الزراعات الغذائية الأساسية كثير انحصرت بلبنان لانو لبنان كان يستورد مواد غذائية باسعار ارخص بكثير من انتاجو المحلي, فكان في قطاع زراعي صغير, متخصص, ما بي شي, بس حجموا بالإقتصاد ما كبير كثير.