Discussing Tastes in Music
هبه: هَسّا إحنا عِنّا هُون...عِنّا أغاني عرَبِيِه مُتْنَوْعه. مثلاً في عِنّا أغاني بِتكُون عِنّا رومانسيه، في عِنّا أغاني شعبية، أغاني وطنية، في عِنّا أغاني للأعراس، للدَّبكات، في عِنّا أغاني بتكون أحزان وهيك، في عِنَا أغاني بتكون دِينية. فالأغاني عِنّا مُش نُوع واحد، إنما هيَّ بتكون عِنّا مًتَنَوِعة. وبَرضُوا المُغنيين بكونوا مُتنوعين. مثلاً لو جِيت أسألك مثلا شو أكثر الأغاني إليِّ بهتَموا فيها الناس وليش؟
سلام: هسَا عِنّا الأغاني إلَّي بهتمّوا فيها الشباب، فئة الشباب، عِنّا أغاني لبنانية أو الأغاني المصرية والسورية. إنو بتكون أغاني لهجتها لهجه حلوه إنو بسرعه بحفظوها الشباب وبسرعة بفهموها. بالإضافة إلا إنو في عنا أغاني دينيه وأغاني شعبيه بحبوها الزلام الكبار والبنات بِسمعوها، بالإضافه إلا إنو عِنَّا أغاني دينيه إنو بتتحَدث عن الدِّين الإسلامي أو أي دين آخر، فهاي الأغاني مشهورة شوي بالعالم العربي.
هبة: طيب هسّا عِنّا إحنا الأغاني، مثلاً في عِنّا أغاني مصرية عرِفنا لبنانية، سورية، أردنية، في برضوا أغاني فلسطينية. طيب أكثر إشي يعني شو الإهتمامات الناس...إنو أنو أكثر نوع من الأغاني...أي أكثر شعب بكون في أكثر مغنيين وهيك، ويعني الناس أكثر إشي بلاحظوا إنهم هم إلِّي أكثر إشي بالسَّاحة الفنية؟
سلام: عِنّا أكثر دولة عربية يعني بِخْرُج منها مغنيين إلّي هي دولة لبنان. إنو لبنان دَولة مُنفتحة، إنو بكثر فيها المغنين. من المغنيين اللبنانيين مثلاً نانسي عجرم. إنو نانسي عجرم مغنية مشهورة بالعالم العربي، وأحياناً بتروح بتعمل حفلات بدول أجنبية، خارج الدول العربية. بالإضافة عِنّا عمرو دياب، إنو هو مُغني مَصري، إنو بعمل حفلات يعني خارج الدول العربية، بأمريكيا أو بدول أوروبية أو غيرها.
هبه: طب إحنا في عنّا أغاني قديمة وأغاني جديدة، طب الأغلب هون..الأغلب الميل للأغاني القديمة ولاّ للأغاني الجديدة؟ وليش؟ ومين إلِّي بميل للأغاني القديمة ومين بميل للأغاني الجديدة؟
سلام: الأغاني الجيدية معظمها أغاني شبابية إنو بَحبُوها الشَباب، أما الأغاني القَدِيمة إنو هِي أغاني بتكُون هَاديه، رومانسيه، يعني إنو بتكون موسيقتها هادية فلذلك إنو الشباب بيميلوش إلها كثير، بينما إنو الرجال الكبار بِحِبوا الأغاني القديمة، فبشعروا إنو الأغاني القديمة فيها جودة أكثر من الأغاني الحديثة.
هبه: طيب إحنا عِنَّا هونّ مثلاً في آلآت موسيقية بستعملوها بالأعراس، بتغدري تقوليلنا بَعض مِنها، وهل إنو الغناء بالأعراس موجود ولاَّ لعَ؟ وشو نُوع الأغاني إلِّي بغنوها بالأعراس؟
سلام: هسا عنا بالأعراس إنّهُم بِغَنوا أغاني شَعبية، إنو أكثر إشي بستخدموا الطبلة، إنو هيّض أكثر الأدوات المستخدمة ومتواجدة هون عِنَّا في العالم العربي، إنو بغنوا أغاني بِتكون شعبية وبتكون إنو يَعني بِدون لَحن، إنو مُجرد على الطبلة وبس.
هبه: طيب في عنَّا مثلاً إنوأغاني غير الأغاني العربية في عِنّا أغاني أجنبية ودخل السَّاحة العَربية، طب مثلاً في ناس بتميل إنها تِسمَع أغاني أجنبية أكثر من العَربية ولاَّ نادر إنا نشُوف حَدا بِسمَع أجنبي؟
سلام: في عِنَّا العَديد مِن الشُبان إنهم بِلجؤوا للأغاني الأجنَبية، فإنوا أصبَحَت عِنَّا المَحَطات العَربية بتِعرِض أغاني أجنبية بمِقدار ما بتعرِض ألاغاني العَربية، فعِنَّا ميل كثير للأغاني الأجنبية من الشباب خاصةً.
