The News from Damascus and Latakiyah

بمخيم اليرموك المُحَاصَر بجنوب دمشق، تم امبارح توزيع مساعدات غذائية على المدنيين المُحَاصَرين، وطِلِع من المخيم بعض الحالات المرضية.

الحصار ما منع الأهالي من إحياء ذكرى يوم الارض الفلسطيني، احتفلوا باليوم وأعلنوا انو الوجع السوري والفلسطيني واحد، انشالله بنحتفل نحن وإخوتنا الفلسطينيين بالحِرية والنصر.

بأدسيا بريف دمشق، لسّاتا كل الطرقات الواصلة بين أدسيا ودمشق مسكرة، ولسّا الحصار مفروض على المدينة والحواجز، كمان هاي الحواجز عم تمنع خروج المدنيين، وعم تمنع إدخال الطحين والمواد الغذائية والطبية، الله يكون بالعون.

بالغوطة الشرقية، وصلت امبارح بعض المساعدات من الأمم المتحدة، بس للأسف المساعدات ما بتكفي غير اتنين بالمية من نسبة السكان المُحَاصَرين.

ننتقل لمدينة اللاذقية، في سيارة مليانة عناصر من الامن والشبيحة على دوار محطة القطار، العناصر عم بيدوروا على شباب وعم بيعتلقوا الشباب اللي عم بيلاقوهن.

كمان قوات الدفاع الوطني يلي بقيادة هلال الاسد قاموا امبارح بحملة اعتقالات عشوائية بشكل هجومي بدون اي سبب واضح.

حسب ناشطين من الثورة، طِلع رِتل من قوات النظام الفرقة الرابعة من مدينة حمص وتوجهوا لمدينة اللاذقية.

كمان امبارح شهدت مدينة اللاذقية إنقطاع للتيار الكهربائي بشكل مفاجئ ولساعات طويلة.

هيك بتنتهي اخبارنا لليوم، بنلاقيكن بأخبار جديدة بكرة، انشالله تكون احسن. كنت معكن انا سلافا، سلام.