Conversation at a wedding
الصحفية: انا معزومة اليوم عاعرس بمدينة نابلس في فلسطين، اسم العروس سميرة واسم العريس فارس وهم اعطوني اذن اعمل معهم مقابلة صحفية
كثير من الناس بدخلوا القاعة وحاملين معهم هدايا للعرسان، كل عائلاتهم وقرايبهم واصدقائهم هون اليوم عشان يحتفلوا بهاي المناسبة السعيدة، اتوقع عاعقد الزواج قبل اسبوع، واليوم الاحتفال بزواجهم، رح احكي مع العرسان وبدي ابدي احكي مع العروس بالاول، هي حلوة كثير وفستان الزفاف اللي هي لبسته بوخذ العقل.
الصحفية: مبروك، ان شالله ابتتهنوا. العروس: الله يبارك فيك، وعقبالك ان شالله. الصحفية: معلش اسألك شوية اسئلة؟ العروس: ليش لأ، تفضلي. الصحفية: كيف تعرفت عاعريسك؟ العروس: تقابلنا في الجامعة، هو كان في السنة الرابعة وانا كنت في السنة الثانية، اخوي سمير كان صاحبه في الجامعة وهيك تعرفت عليه.
الصحفية: وينتى خطبتوا؟ العروس: خطبت وانا في السنة الثالثة، بعد ما تعرفنا عابعض بسنة، وبعد ما لاقى شغل كمحامي، وهلا رح اتزوج بعد شهر واحد من تخرجي من الجامعة. الصحفية: مبروك التخرج كمان، احكيلي، ووافقوا اهلك عالخطوبة ؟
العروس: ايوة، اهلي مثقفين، وهم مابفضلوا زواج القرايب، هم بأيدوا انو البنت لازم تختار شريك حياتها بنفسها ما دام الشخص مثقف ولطيف واخلاقه عالية. والحمدلله فارس عندو هاذي الصفات كلها، واهلي وافقوا عليه وباركو زواجنا.
الصحفية: انا شايفة انو العريس بضحك، انا سعيدة الكم الثنين، ممكن اسألك بعض الاسئلة؟ العريس: طبعا،ً أنا اليوم مبسوط وبتقدري تسأليني اي سؤال. الصحفية: ليش كانت فترة الخطوبة سنتين؟ العريس: احكيلك الحقيقة، انا بدي اتزوج سميرة من الدقيقة اللي تعرفت عليها بس هي اللي بدها تستنى حتى تتخرج، وحتى انا الاقي وظيفة.
الصحفية: عروستك ذكية العريس: طبعا،ً عشان هيك انا تزوجتها. الصحفية: كيف طلبت ايد سميرة؟ العريس: واحنا كنا نمشي بالجامعة، طلبت ايدها، وهي ابتسمت ووافقت. الصحفية: وكيف طلبت ايدها من ابوها؟ العريس: رحت مع اهلي عابيت اهلها وزرناهم، وهناك ابوي طلب ايدها من ابوها، والحمدلله ابوها وافق عالزواج وقرأنا الفاتحة .
الصحفية: الف مبروك وبالرفاه والبنين، وشكراً كثير الكم اللي خلتوني اعمل هاي المقابلة معكم. العريس: تفضلي معنا وتذوقي الاكل الطيب. العروس: ايوة، تفضلى عالبوفيه، في اكل زاكي كثير وبرضو حلويات كثيرة.
