Gulf Arabic - ازمة طبية

بو علي: گوة بوعبدالله، وينك يا ريال؟

بوعبدالله: والله مشقول. رفيجي ناصر ياته سكتة غلبية وصارله ثلاث تايام بالمستشفه.

بوعلي: لا ماعندي خبر.

بوعبدالله: چانت نوبة غلبية غوية، چنا معزومين عند صالح، وبان عليه انه مامرتاح.سألته "شفيك؟"، گال انه ما فيه شي.

بوعلي: اي، وتالي ويش هي المشكلة.

بوعبدالله: بعدين صار واضح ان عنده وجع بصدره لأن حط ايده على گلبه، وانا ظليت اسأله "ويش فيك؟" بس هو ما گدر يجاوبني. چان يتنفس بصعوبة والعرگ يصب من گصته واللي خوفني اكثر شي ان لون بشرته تقير وازرگ. وبعدين انقمى علیه انا گلت لصالح يتصل بالاسعاف.

بوعلي: ياه، وبعدين شصار؟

بوعبدالله: ولد ناصر ممرض وچان موجود، وگام يسوي اسعافات اولية، واستمر لين ما وصلت سيارة الإسعاف. وبعدين الطاغم الطبي عالجوه وحطوله اوكسجين، خلوه فوگ السدية وخذوه للطواري.الحمدلله ولد ناصرانغذ حياته.

بوعلي: الحمدلله انه چان موجود هناك.

بوعبدالله: اي والله صج.

بوعلي: وشنو صار بالمستشفى؟

بوعبدالله: عالجوه چم يوم وبعدين الدكاترة غرروا يسوله عملية الغلب المفتوح. ويگلون انه راح يتحسن وما عليه خطر. اليوم بروح عنده ونشوف متى بيطلعونه من المستشفى.

بوعلي: انزين انا بروح معاك حتى ازوره وتحمدله السلامة.

بوعبدالله: اي يا خوك زيارة المريض واجب وانت ماتگصر.

بوعلي: الحين لازم يدير باله على حاله ويسمع نصايح الدكاترة.

بوعبدالله: اي اكيد يسمع من الدكاترة، لان بعد العملية بيخلونه يقير عاداته اليومية. اول شي بيسوله علاج طبيعي بيلعب تمارين رياضية ثلث مرات بالاسبوع لمدة نص ساعة. ويسوي رجيم ويعطون غايمة اكل صحي مافيها دسم وملح. ولازم يخفف من اكل اللحم الاحمر ويكثر من اكل الخضرة والفواكه.

بوعلي: تضن انه بيلتزم بنصايح الاطبة؟

بوعبدالله: هو لازم يلتزم ومو بس هذا، لازم يبطل التدخين بعد.

بوعلي: الله يكون بعونه، اهل الغلب بياخذون ادوية خاصة؟

بوعبدالله: اي ، لازم ياخذ حبوب للضقط والكولسترول، ولازم يراجع الدكتور بانتظام عشان يفحصونه ويتأكدون ان كل شي تمام.