مساومة لشراء موبايل

البياع: تفضلي تفضلي. تعالي وشوفي الموبايلات اللي عنا موجود عنا اسعار مافش زيها بكل السوق؛ ماتضيعيش عليك هاي الفرصة.

مها: طيب؛ المزبوط انا بدي اشتري موبايل جديد. الموبايل تبعي صار عتيق كثير.

البياع: شو انت محظوظة اليوم؛ عنا كثير من الموبايلات الجديدة اللي ممكن تختاري منها.

مها: بدخل وبشوف الموبايلات عاشرط واحدث اذا وعدتني انك تعطيني سعر خاص عأجدد واحسن موبايل.

البياع: تكرمي؛ شوفي هاذا التلفون الذكي؛ وصلنا هذا النوع قبل اسبوع بس وهذا النوع متطور من الناحية التكنلوجية؛ وهذا احسن نوع بالسوق. لاحظي قديش اقل سماكة من التلفونات الذكية الثانية وبرضو في منو الوان كثيرة.

مها: منيح، وشو ميزاتو؟

البياع: الو ميزات كثيرة؛ في كامرا بدقة خمسة ميغابكسل. بتقدري توخذي صور واضحة وبأي مكان بتكوني في. وموجود في GPS وهاذا اشي ممتاز لأنو بدلك عالاتجاهات لما تسوقي وحتى لما تمشي.

بخليك تتصفحي كل شي بدك اياه على اي موقع الكتروني وبرضو بوصلك لمواقع الشبكات الاجتماعية مثل الفيس بوك وتويتر. بتقدري تقرأي رسايلك عالإيميل وبنفس الوقت بتقدري تكتبي رسايل وتوديها. وبتقدري تعملي تكستنج مع صديقاتك وتشوفيهم بنفس الوقت عن طريق الفيديو وحتى عاسكايب. بتقدري تعملي تنزيل وتحميل لسوفت وير وهيك بتقدري تسمعى موسيقى وتتفرجي عافلام وتخيلي! بتقدري تشتري كتب الكترونية وتقرأيها عالتلفون الذكي.

مها: بس انا بعرف انو التلفونات الذكية العتيقة فيها هاي المزايا، بشوف صديقاتي بعملوا كل هاي الاشياء عموبايلاتهم.

البياع: ايوة بس هذا النوع اسرع بكثير صديقاتك ممكن عندهم اي فون ثلاثة جي؛ مزبوط؟

مها: ايوة. مزبوط

البياع: هذا التلفون هو افضل واحسن نوع لأنو اي فون جي اربعة؛ وهذا معناه انك بتقدري تتصفحي الانترنت بسرعة البرق. وتنزلي السوفت وير بسرعة.

مها: بسرعة البرق؛ معقول؛ صاحباتي دايما بتذمرن انو التلفونات الذكية ابطأ بكثير من الكومبيوتر وخاصة لما يتصفحن المواقع عالانترنت ولما يعملن تنزيل آبس.

لبياع: شوفي؛ هسا بدي ادخل على موقع الجرايد شوفي قديش سريع؛ وشوفي رح انزل اربعة آبس بنفس الوقت؛ هيني خلصت.

مها: هذا التلفون روعة؛ حسنوا كثير

البياع: وميزة اخرى الناس بحبوها ..

مها: طيب طيب؛ بس ما تحاولش تأثر علي بهاي المزايا ماتنساش بدي سعر خاص.

البياع: عاراسي؛ بس ممكن تحبي التلفون اكثر اذا عرفت انو بمبلغ بسيط كل شهر ممكن تسوي "تذر" وهذا معنا انو ممكن تحولي الانترنت من التلفون لأي كومبيوتر مافش في خدمة الانترنت.

مها: ما احلاه؛ انا معلمة اجتماعيات. وعندي بالصف كومبيوتر وبروكسما بس مافش انترنت؛ وهيك ممكن اوصل الانترنت عالكومبيوتر اللي بالصف؛

طيب خلينا هسا نحكي عن سعرو اذا بتعطيني سعر خاص انا رح اشتريه.

البياع: سعر هذا التلفون ثمنمية وعشرين شيكل بس عشانك رح اعطيك اياه بسبعمية وثمانين شيكل

مها: هذا غالي كثير؛ بقدرش ادفع هالمبلغ؛ شو رأيك تعطيني اياه بستمية وخمسين شيكل.

البياع: بس بهالحالة رح اخسر مصاري بقدر ابيعو الك بسبعمية وخمسين شيكل.

مها: هذا كثير؛ اذا اعطتيني سعر خاص انا رح احكي لكل صاحباتي وزميلاتي يجوا عندك لما بدهم يشتروا موبايل.

البياع: شو رأيك تشتريه بسبعمية شيكل. مش ممكن انزل السعر اقل من هيك. صدقيني مابربج الا اشي بسيط.

مها: خلص اتفقنا ورح تنبسط كثير لما تشوف الزباين اللي رح اوديلك اياهم.