في البنك
يمن: مرحبا.
الموظفة: أهلا وسلا. كيف بقدر اساعدك؟
ايمن: انا زبون جديد وعندي كم سؤال.
الموظفة: أهلا وسهلا فيك. بنشكرك لاختيارك هادا البنك.
ايمن: العفو. الصحيح زمايلي في الشغل كلن بتعاملوا معكن وبقولوا انو خدمتكن ممتازة.
الموظفة: شكراً وانشاءهالله بنكون عند حسن ظنك.
ايمن: انشاءالله.
بدي افتح حساب في البنك عندكن لو سمحتي.
الموظفة: اي طبعاً، بس في الاول بدي منك بعض المعلومات متل اسمك والعنوان ووين بتشتغل. لو سمحت عبي هادا الطلب ووقع اسمك هون عالورقة تحت.
ايمن: تفضلي هي الطلب، مليتو متل ما طلبت، في اي شي تاني لازم اسويه؟
الموظفة، اي، معك بطاقتك الشخصية او جواز السفر؟
ايمن: معي رخصة السواقة. آه تذكرت ،معي الباسبور تفضلي.
الموظفة: تمام شكراً. هلا عنا نوعين حسابات يا سيدي، حساب جاري وحساب توفير. أي واحد بتفضل؟
ايمن: بدي حساب جاري لو سمحتي.
الموظفة: تمام.
ايمن: بتاخدوا رسوم على فتح الحساب؟
الموظفة: لا، خدماتنا كلها ابلاش للزباين. ايمن: ممتاز.
الموظفة: هلا هادا الحساب الجاري بسمحلك توخد دفتر شيكات وكرت بنك.
ايمن: اه، كردت كارد يعني؟
الموظفة: لا، هادا دبت كارد. بتقدر تستعملو لتسحب كاش من ال اي تي ام او لتدفع المشتريات.
ايمن: آه طيب. في فوائد تانية؟
الموظفة: اي. السحب وحط مصاري واستعمال ماكينات ال اي تي ام في كل فروعنا بكون ابلاش.
ايمن: كتير منيح. قوليلي، في حد ادنى لفتح هادا الحساب؟
الموظفة: اي لازم يكون رصيدك في الحساب الجاري اكتر من خمسين الف ليرة وهيك بتقدر تكتب شيكات ابلاش اديش بدك.
ايمن: طيب ممتاز. بتدفعوا فايدة عالحساب؟
الموظفة: ما في فايدة عالحساب الجاري، بس بنعطي فايدة اتنين بالمية عحساب التوفير.
ايمن: طيب. دخللك اخر سؤال. بتقدر زوجتي تحولي مصاري من حسابي وانا مسافر؟
الموظفة: اي بتقدر تبعتلك حوالة بنكية بس لازم يكون عندها حساب مشترك معك.
ايمن: كتير منيح. هلا كلشي تمام بالنسبة لحسابي؟
الموظفة: اي كلشي تمام. بعد اسبوع بتقدر تجي تستلم كرت البنك ودفتر الشيكات
ايمن: كتير منيح. برجع بعد أسبوع وبجيب مرتي لنعمل الحساب المشترك.
الموظفة: مرة تانية شرفتنا يا استاذ. ومنشوفك بعد اسبوع.
ايمن: شكراً ومع السلامة.
الموظفة: مع السلامة
