Egyptian Arabic Podcast: What's the difference between Standard Arabic and the dialects?

صَباح الخير. أهلا بيكُو في حَلَقة جِديدة

النهارده حابِب أتكَلِّم عَن اللُغَة العَرَبيَّة الفُصحَى و اللَهَجات المُختَلِفَة

أعتَقِد في الفيديو ده هَستَخدِم كَلِمات و تَعبيرات صَعبَة شوَيَّة

فَطَبعاً فيه سابتايتلز بِالعَربي و بِالإنجليزي و الفَرَنساوي

و فيه لينك الدرس على المَوقِع بِتاعنا في الوَصف بِتاع الفيديو

يَللا بينا نِبدأ !

ليه اللُغَة العَرَبيَّة هي الوَحيدَة في العالَم اللي فيها فَرق كِبير أوي بين اللَهَجات و بين الفُصحَى

لِدَرَجة إن بَعض الناس بِتِفتِكِر إنها لُغات مُختَلِفَة؟

طَبعاً اللُغَة العَرَبيَّة هي لُغَة قَديمَة

يَعني.. ماحَدِّش عارِف عُمر اللُغَة العَرَبيَّة بِالظَبط

بَس يَعني أكتَر مِن ألفين سَنَة

و طَبعاً مع ظُهور الدِين الإسلامِي فَاللُغَة العَرَبيَّة اِنتَشَرِت في دِوَل ما كانِتش بِتِتكَلِّم عَربي قَبل كِدَه

زَي مَصر زَي العِراق زَي دِوَل الشام زَي دِوَل المَغرِب

فَاللُغَة اِتطَوَّرِت تَقريباً بِشَكل مُنفَصِل

إلى حَد ما مُنفَصِل في كُل دَولَة

و طَبعاً اللَهَجات بَقِت مُختَلِفَة جِدَّاً لِدَرَجة إن تَقريباً اللَهَجات بِتكون مش مَفهومَة

يَعني مَثَلاً اللَهَجات في دِوَل المَغرِب صَعبَة جِدَّاً بِالنِسبَة لِحَد في الشَرق

يَعني مَثَلاً في دِوَل الخَليج أو في مَصر

صَعب إنُّهُم يِفهَموا اللَهَجات بِتاعِت دِوَل المَغرِب

فَعَشان كِدَه طَبعاً اللَهَجات مُختَلِفَة جِدَّاً عَن الفُصحَى

طَب, الفُصحَى جَت مِنين؟

هو مَع ظُهور الطِباعة.

طَبعاً دَه يِمكِن في القَرن التِسَعتاشَر

مَع ظُهور طِباعة الكُتُب و الجَرايِد و كِدَه

بَدَأت الناس تِستَخدِم الفُصحَى و الهَدَف من الفُصحَى إنَّها تِكون قُرَيِّبَة من اللُغَة العَرَبيَّة القَديمَة الكلاسيكيَّة

و في نَفس الوَقت تِكون مَفهومَة بِالنِسبَة لِمُعظَم الناس في العالَم العَربي

عَشان لو حد هَييجي يِقرا كِتاب أو يِقرا جُرنال

يِقدَر إنُّه يِفهَم بِسهولَة الكَلام اللي مَكتوب في الكِتاب أو في الجُرنال دَه

عَشان كِدَه فيه فَرق بين الاتنين. فيه فَرق بين الفُصحَى و اللَهَجات

طَبعاً السُؤال المُهِم هِنا ..أقدر أتعَلِّم ... أوِّل سُؤال

هَل لازِم أتعَلِّم الفُصحَى أو لأ؟

تاني سُؤال .. يِنفَع أتعَلِّم الفُصحَى مَع اللَهجَة؟

مَثَلاً المَصري أو اللَهجَة الشامِيَّة أو الخَليجيَّة أو أي لَهجَة

بِالنِسبَة لِلسُؤال الأوَّل, في وِجهة نَظَري, الأفضَل إنَّك تِتعَلِّم الفُصحَى

لأن هَتِحتاج إنَّك تِقرا كِتاب أو تِقرا جُرنال

أو مَثَلاً تِكتِب إيميل لَو هَتِحتاج اللُغَة العَرَبيَّة في الشُغل

فأعتَقِد مُهِم إنُّه عَلَى الأقَل تِفهَم أساسيَّات الفُصحَى

لَكِن طَبعاً لَو بَس عايِز تِتعَلِّم اللُغَة عَشان تِتكَلِّم مَع الناس في مَصر أو في سُوريا أو في أي دَولَة

مُمكِن مش مُهِم أوي تِتعَلِّم الفُصحَى

السُؤال التاني. هَل يِنفَع أتعَلِّم الاتنين مَع بَعض؟

في وِجهة نَظَري أكيد. أكيد يِنفَع. و دي حاجة كُوَيِّسَة جِدَّاً

و عَلَى فِكرَة لَو هَتِخلِط الاتنين

يَعني لَو بتِتكَلِّم مَع حَد و بتِستَخدِم اللَهجَة و بتِستَخدِم أحياناً بَعض التَعبيرات أو الكَلِمات مِن الفُصحَى

دِي حاجة مش وِحشَة. بِالعَكس دِي حاجة راقيَة .. حاجة شيك

مش حاجة وِحشَة خالِص إنَّك تِستَخدِم تَعبيرات من الفُصحَى

و إنَّك تِخلِط الفُصحَى و العاميَّة

دِي حاجة, في وِجهة نَظَري, مش وِحشَة

و ناس كِتير جِدَّاً من المُتَحَدِّثين الأصليين بيِعمِلوا كِدَه

أتمَنَّى الفيديو يِكون عَجَبكوا و أشوفكو الحَلَقَة الجايَّة