Egyptian Arabic Podcast: Can Arabic be taught?

إيه الأخبار؟ أهلاً بيكُم في حَلَقَة جِديدَة في البودكاست

و النَهاردَه هَنِتكَلِّم عَن سُؤال مُهِم جِدَّاً

و هو هَل اللُغَة يِنفَع تِتدَرِّس؟

قَبل ما أبدَأ أنا بَفَكَّركو طَبعاً إن الفيديو مَعاه سابتايتلز

و اِحنا عاملين الفيديو كَدَرس على المَوقِع بِتاعنا

و هَتلاقِي اللينك في الوَصْف بِتاع الفيديو

نِقدَر دِلوَقتي نِبدَأ

هَل اللُغَة يِنفَع تِتدَرِّس؟

قَبل ما أقُول وِجهِة نَظَري

حابِب إنِّي أتكَلِّم الأوِّل عَن إزَّاي حَد يِقدَر يِوصَل لِمُستَوَى

إنُّه يِقدَر يِتكَلِّم اللُغَة بِطَلاقَة

عَشان أي حَد يِوصَل لِلمُستَوَى دَه

لازِم يِكون سِمِع اللُغَة كِتير جِدَّاً

يَعني سِمِع الكَلِمات كِتير في سِياقات مُختَلِفَة

سِمِع تَعبيرات كِتير جِدَّاً

مُعظَم التَعبيرات اللي المُتَحَدِّثين الأصليين بِيِستَخدِموها

لازِم يِكون اِتعَوِّد عَلَى طَريقِة الكَلام بِتاعِة المُتَحَدِّثين الأصليين

و اِتعَوِّد عَلَى سُرعة الكَلام لأنُّه مِش كُل .. يعني

الناس اللي بِتِتكَلِّم لُغات مُختَلِفَة, فيه بَعض الناس بِتِتكَلِّم بِسُرعَة أوي

يَعني مَثَلاً فيه بَعض اللُغات الناس مُمكِن ما بِتِتكَلِّمش فيها بِسُرعَة كِبيرَة

و لُغات تانية الناس بِتِتكَلِّم بِسُرعَة كِبيرَة جِدَّاً

فَلازِم عَشان حَد يِقدَر يِتعَلِّم اللُغَة و يِقدَر يِتكَلِّم اللُغَة دي بِطَلاقَة

لازِم يِتعَوِّد عَلَى طَريقِة الكَلام بِتاعِة المُتَحَدِّثين الأصليين

و لازِم يِتعَوِّد عَلَى سُرعة الكَلام بِتاعتهم

و لازِم يِكون اِتعَلِّم كَلِمات كِتيرَة جِدَّاً و يِكون اِتعَلِّم تَعبيرات كِتيرَة

و شافها في أكتَر مِن سِياق

يَعني كُل كِلمَة أو كُل تَعبير شافُه

يعني طَبعاً مُمكِن قَراه أو سِمعه في أكتَر من سِياق

فَطَبعاً ده مُستَحيل حَد يِقدَر يِعمِله

لَو هو بَس هَيَعتَمِد عَلى إنُّه يِروح يِحضَر كُورس مُعَيَّن

أو مُجَرَّد إنُّه يِبقَى فيه عَنده مُدَرِّس و بَس بِيِشرَح لُه القَواعِد أو بِيِشرَح لُه شِوَيِّة حاجات

فَلَو هَيَعتَمِد بَس عَلى إن عَنده مُدَرِّس أو إنُّه بِيِحضَر كُورس

أعتَقِد مش هَيِقدَر أبداً إنُّه يِوصَل لِمُستَوَى إنُّه يِتكَلِّم اللُغَة بِطَلاقَة

أو هَياخُد وَقت طَويل جِدَّاً

و عَلى فِكرَة دَه بِنشوفُه في المَدارِس

يَعني فيه ناس كِتير.. فيه أطفال كِتير بِيِبدأوا يِدرِسوا لُغَة مُعَيَّنَة

و يِدرِسوا اللُغَة دي لِمُدِّة مَثَلاً عَشَر سِنين أو خَمستاشَر سَنَة

و في النِهايَة ما بِيِتكَلِّموش اللُغَة دي

ما بِيِنجَحوش إن هُما يِتكَلِّموا اللُغَة

لأن هُما بِيتعَلِّموا قَواعِد كِتير جِدَّاً و بِيتعَلِّموا حاجات كِتير جِدَّاً ما بِيِسمَعوش كِفاية

ما بِيِقروش كِفاية

فَطَبعاً وِجهِة نَظَري إنُّه أي حَد بِيدَرِّس لُغَة مُعَيَّنَة

لازِم دُوره يِكون إنُّه يِوَفَّر لِلطالِب المَصادِر المُمتِعَة بِالنِسبة لِلطالِب

يَعني مَثَلاً لو الطالِب بِيحِبّ مَثَلاً إنُّه يِتفَرَّج عَلى أفلام

طَبعاً.. أو مُسَلسَلات أو إنُّه يِسمَع أغانِي عَشان يِتعَلِّم اللُغَة دي

لازِم المُدَرِّس يِحاوِل يِساعِد الطالِب إنُّه يِتعَلِّم عَن طَريق الحاجات المُمتِعَة بِالنِسبة لِلطالِب

عَشان الطالِب بَعد كِدَه يِقدَر إنُّه يِتعَلِّم مع نَفسُه

يِقدَر إنُّه يِمارِس اللُغَة مع نَفسُه

لأن دُور اللي بِيدَرِّس اللُغَة زَي بِالظَبط دُور اللي بِيدَرَّب طِفل أو بِيدَرَّب حَد عَلى السِباحَة

يَعني هِنا اللي بيِعمِل المَجهود هو اللي بيِتعَلِّم السِباحَة مش المُدَرِّب

فَتَعليم اللُغَة نَفس الحاجَة بِالظَبط

المَجهود اللي بيِعمِله هو الطالِب أكيد

و دُور المُدَرِّس إنُّه يِساعِد الطالِب

يِحاوِل يِفَهِّمُه شوية حاجات تِسَهِّل عَليه إنُّه يِتعَلِّم اللُغَة

لَكِن في نَفس الوَقت يِحاوِل يِوَفَّر له المَصادِر

يِوَفَّر له الحاجات اللي تِخَلِّيه .. يَعني .. يِتعَلِّم اللُغَة و هو مَبسوط

يَعني الحاجات طَبعاً اللي الطالِب بِيحِبَّها

فَدي وِجهِة نَظَري. فَبِاختِصار إنُّه اللُغَة ما يِنْفَعش تِتدَرِّس

اللُغَة لازِم الطالِب يِتعَلِّمها

لأنُّه لازِم يِعرَف إنُّه يِوصَل لِمَرحَلة إنُّه يِتعَلِّم اللُغَة بِشَكل مُستَقِل

فأتمَنَّى الفيديو يِكون عَجَبكوا

و لَو عَندكو أي اِقتراحات لِمَواضيع صَعبَة بِالنِسبالكو

تِقدَروا تِكتِبوها في التَعليقات و أشوفكو في الحَلَقَة الجايَّة.