الفصل السادس وعشرين - الدرس التالت - حوار ٣

وفي كل مكان كنا بنطلع بقصة ممكن أقولك قصص منهم كتير يعني، نقدر نقول مكان زي الفيوم لما جينا نروح نقينا قرية كان اسمها قرية العشرا، اشمعنى قرية العشرا دي؟ كنا عاملين استبيان هي دي أفقر قرية في الفيوم اسمها قرية العشرا يمكن هناك المحزن طبعاً البيوت هناك من غير أسقف، هناك الميه مش نضيفة، الصرف الصحي فيه مشكلة، فابتدينا هناك قلنا نشتغل على الستات والأطفال، كان المكان الوحيد اللي صالح اللي ينفع نقعد فيه كان الجامع، فابتدينا الأول عملنا جمعنا السيدات وقعدت معاهم، وابتدينا نتكلم معاهم عن الصحة الإنجابية وعن أهمية تنظيم الأسرة وأيه وسائل منع الحمل اللي إحنا لازم إن إحنا نبدأ إن إحنا نتكلم معاهم، أنا بقول دايماً الناس متعطشة إن هي عايزة تعرف معلومة، يعني إحنا مشكلتنا أيه؟ إنت بتسيب الناس تولد بالخمسة والستة والسبعة وتقعد تهاجمهم وتقول ده الناس معندهاش وعي. إنت اللي سايب الناس من غير ما تديهم توعية. لأ، الستات كانت حريصة إنها تقعد معايا وتبدا تسأل، وبيقعدوا يسألوا كتير جداً وماكنوش عايزين يبطلوا أسئلة، بس لازم إحنا اللي نوصلهم المعلومة

ونكون قريبين منهم.