Food - Lesson 3

الشعب الأردني كتير بحب أكل اللحوم بكل أنواعها، وتقريباً ما في بيت ما بيطبخ لحمه أو جاج أو سمك عالغدا وكل يوم. وعلى عكس العالم الغربي، وجبتنا الرئيسية هي الغدا مش العشا. وبالنسبة للاطباق اللي ما بتحتوي على لحوم، بنعتبرها مش أكتر من أطباق جانبية أو مزات خفيفة وزاكية. وأكتر اللحوم الي منتشر عنا طبخها هي لحمة الخروف المدهنة. وجمب اللحمة، دايما بيكون في رز ويخنة خضار أو رز وسلطة. وعشان هيك، ما في حي سكني في الأردن بيخلا من محلات بيع المواد التموينية أو محلات بيع الخضرة والفواكة. وكمان، منتشر عنا كتير خيم بالشوارع ببيعو جواتها خضار وفواكه. وبهدول المحلات، في تشكيلة واسعة من المواد التموينية والخضار والفواكة مثل النعناع الأخضر والكوسا والجرجير والفلفل الأخضر الحار. أما الفواكة الموسمية الصحية للجسم واللي طعمها حلو مثل الأسكدنيا والتين والبطيخ بتلاقيها طازة بس بموسمها. ومن الخضرة الموسمية الي كتير بنعتمد عليها في الأكلات الخفيفة هي ورق العنب مع الكوسا المحشية والملوخية الخضرا اللي ممكن في باقي أوقات السنة نشتريها مفرزة من السوبرماركت. وبالنسبة للمنتجات المصنوعة من الحليب، ممكن نشتريها يا إما معلبة من السوبرماركت أو من محلات مخصصة لبيع هاي المنتجات أو من البدو الي بصنعوها في بيوتهم ومزارعهم وببيعوها. وكتير بنستخدم الألبان والأجبان في الطبيخ الأردني، سواء بالحلويات أو الأكل المالح، مثلا، أشهر طبق حلويات عنا اسمو الكنافة، وواحد من المكونات الرئيسية فيه هو الجنبة، وبيجي فوقها طبقة شعيرية محمرة وقطر. والمنسف، اللي بنعتبرو طبقنا الشعبي الرئيسي بتحضر من لحمة الخروف المدهنة المطبوخة بالجميد وبيتاكل مع صحن رز ، وبنحط في قاع السدر طبقة خبز كتير رقيق اسمو خبز الشراك، وبنقلي لوز وصنوبر كمان وبنحطعم على وجه المنسف. والجميد شكلو زي الحجر الكبير وبكون مصنوع من اللبن الناشف والملح، وطبعا المنسف كتير دسم وتقيل عالمعدة، خاصة للناس اللي بيجربوه أول مرة. بنتمنى منكم تزورو الأردن وتجربو منسفه!