Bláa lónið

Fyrir sunnan Reykjavík er skagi sem lítur út eins og fótur. Hann heitir Reykjanesskagi. Ferðamenn þekkja helst tvo hluti á Reykjanesskaga: Keflavíkurflugvöll og Bláa lónið.

Bláa lónið er mjög fallegt lón sem er umkringt hrauni. Vatnið í lóninu er ljósblátt, næstum því hvítt, og það er heitt og þægilegt. Vatnið er líka mjög gott fyrir húðina.

Flestir reikna með því að Bláa lónið sé náttúrulegt lón, en það er reyndar ekki svo. Vatnið kemur í raun frá jarðhitavirkjun í nágrenninu. Virkjunin borar nokkurhundruð metra niður í jörðina og nær í sjóðandi heitt vatn sem það notar svo til að búa til rafmagn. Eftir það rennur vatnið út í hraunið.

Þetta sjóðandi heita vatn inniheldur mjög mikið af steinefnum, sérstaklega efnið kísil. Kísillinn er ástæðan fyrir því að vatnið er svona ljóst.

Bláa lónið er mjög vinsæll ferðamannastaður svo að maður þarf að kaupa miða með nokkurra vikna fyrirvara. Það er ekki beint ódýrt að heimsækja það, en það er alveg þess virði. Það er eitthvað svo huggulegt við að vera í þessu hvíta vatni úti í hrauni.