前文 再續 啊 書 接 上 一回 。
話說 風際中 啊 拔咗 韋小寶 把 匕首 ，用嚟 頂住 佢 嘅 背心 。
韋小寶啊 只有 苦笑嘞 ，覺得 背心 上面 有啲 痛 ，知道 匕首 劍尖 啊 已經 㓤穿咗 外衣 ，雖然 係 着住 護身寶衣 啊 ，不過 就 擋唔住 呢把 寶劍 嘅 。
風際中話 ：你哋 大家 都 擰轉身 ，拋低 兵器 。
蘇荃 等 見到 噉嘅 情勢 ，只有 聽話 擰轉身 ，拋低 兵器 嘞 。
風際中 見到 仲有 六名 天弟會 兄弟 企 喺 旁邊 ，就 向 佢哋 話 ：大家 都 過嚟 ，我 有 説話 講 。
嗰 六個 人 啊 不明所以 就 行過嚟 嘞 喎 。
風際中 右踭 一舉 ，啪 一聲 ，手踭 啊 撞正 韋小寶 背心 大椎穴 ，左手 鋼刀 揮出 ，連氣 幾下 ，將 六名 天地會 兄弟 冚𠾴 唥 殺死 晒 。
佢 喺 頃刻之間 啊 ，連 氣 斬 六個人 ，每一刀 分別 斬中 一個人 嘅 要害 。
出刀 之 快 斬殺 之 狠 實在 係 好 少見 㗎 。
蘇荃 佢哋 聽見 慘叫 嘅 聲音 ，一齊 擰轉 身 ，只見 六 個 人 屍 橫 就 地 鮮血 泉湧 ，都 大驚失色 啊 。
原來 風際中 見到 已經 擘咗 面嘞 ，噉 如果 打起上嚟 ，自己 只係 孤身 一個人 ，因此 就 搶先 殺咗 呢 六 名 天地會 兄弟 。
噉而家呢 ，只係 剩低 一個 少年 、七個 女子 ，噉 就 唔驚 佢哋 咯 。
佢 用 把 鋼刀 ，晾 喺 韋小寶 條 頸 處 ，佢 話 ：韋大人 ，我哋 上 船 啦 。
佢 諗住 只要 將 韋小寶 同 鄭克塽 兩個人 ，捉咗 去 獻畀 皇上 ，就係 立咗 大功 嘞 。
呢 七個 女人 仲係 留 喺 島 上 ，以免 到咗 船 上 多 生 枝節 。
噉 自己 手下 留情 唔 殺 七個 女子 啊 ，亦係 留有 餘地 ，免致 同 韋小寶 結 怨 太 深 。
皇上 日後 對 呢個 少年 點樣 處置 ，係 邊個 都 估唔到 嘅 。
嗰班 女子 見到 韋小寶 畀 風際中 脅制 ，都 唔知 點樣 好 。
只有 建寧公主 大聲 噉 鬧 佢 話 ：你 係 咩 新鮮 蘿蔔皮 啊 ？咁 冇 禮 都 得 嘅 ？快啲 掉低 把 刀 。
風際中 曾經 隨同 韋小寶 護送 公主 去 雲南 就婚 ，吖 認得 公主 ，唔敢 頂撞 佢 ，所以 就 唔出聲 。
公主 見 佢 唔睬 ，更加 嬲 嘞 。
世上 除咗 太后 、皇帝 、韋小寶 、蘇荃 四個人 之外 ，佢 就 邊個 都 唔 放在眼內 嘅 。
護低身 執起 地 下 一把 單刀 ，衝前去 ，向 風際中 當頭 劈落 ，風際中啊 側身 避開 佢 。
公主 啊 拂拂拂 連 劈 三刀 ，風際中 就 左 避 右 閃 。
如果 換咗 第二個 女子 啊 ，佢 早就 一腳 踢低 佢 喇 。
但係 斬 自己 嘅 呢 ，係 皇帝 御妹 ，金枝玉葉 嘅 公主 噃 。
佢 嘅 心 想 嘅 ，只係 立功 升官 、報效 皇家 ，又 點 敢 得罪 咗 公主 呢 ？所以 一味 閃避 唧 。
公主 就 鬧 佢 話 ：你 呢個 死 奴才 ，企 喺 處 唔 准 逳 ！
我要斬你嘅人頭 ，點解 要 將 個頭 轉嚟轉去 ，唔畀 我 斬中 啊 ？
我 同 皇帝 哥哥 講 ，將 你 千刀萬剮 。
公主 一味 亂咁 鬧 ，把 刀 就 左 一刀 右 一刀 不停 咁 斬 。
風際中 個 身 微微 一側 ，好容易 就 避開 嘞 。
雖然 每一刀 相差 不過 幾寸 啊 ，不過 始終 斬佢 唔到 。
公主 焦躁 起嚟 ，打橫 把 鋼刀 攔腰 揮過去 。
風際中 喝一聲 ：小心啊 ！飛身 跳起 。
眼見 佢 呢一刀 收勢 唔住 ，會 斬到 韋小寶 膊頭 嘅 。
佢 身 喺 半空 ，左腳 一𨅝 ，將 韋小寶 𨅝倒 喺 地 ，同時 啊 借勢 跳 出去 丈 幾 遠 。
雙兒 向前 一撲 ，將 韋小寶 抱起 就 飛步 跑開 。
風際中 大吃一驚 啊 ，揸住 把 刀 啊 追 佢 咯 喎 。
雙兒 武功 雖然 係 使得 啊 ，到底 唔 夠 力 吖 。
佢 比 韋小寶 仲 矮 半個頭 ，打橫 抱住 佢 ，只係 跑咗 幾 丈 遠 ，風際中 已經 追近 嘞 。
韋小寶 背心 穴道 被 封 ，四肢 又 唔 聽 使 ，佢 話 ：放低 我 ，等 我 放 暗器 啊 。
但係 風際 中 嚟得 好快 啊 ，雙兒 要 將 韋小寶 放低 等 佢 發射 含沙射影 暗器 ，已經 嚟唔切 嘞 ，喺 危急 之中 ，就 出力 將 佢 拋 出去 。
啱晒啦 ，風際中 就 衝過去 伸手 想 接嘞噃 ，忽然間 聽見 背後 嗒 一聲 ，好似 係 火刀 火石 相撞 ；
跟住 又 嘣 一 聲 ，佢 成個 人 飛起身 ，跟住 𢴈 倒 喺 地 ，扭 咗 幾 下 就 唔 逳 嘞 。
韋小寶 跌咗 喺 沙灘 處 ，冇 受到 傷 ，一時 又 爬唔起身 。
只見 雙兒 前便 一團 煙霧 ，隻手 呢 揸住 一支 短槍 ，正係 當年 吳六奇 同 佢 結義 為 兄妹 嘅 時候 送畀 佢 嘅 禮物 。
呢支槍 ，係 羅剎國 嘅 精製 火器 ，實在 係 厲害 無比 。
風際中 雖然 係 武功 卓絕 ，不過 血肉之軀 ，就 點 都 頂唔住 支 槍 咁 犀利 嘅 。
雙兒 自己 都 嚇到 傻咗 ，支 火槍 一 轟 ，震到 佢 手臂 痠麻 ，隻 手 一 抖 ，短槍 就 跌 喺 地下 嘞 。
韋小寶 唯恐 風際中 仲 未死 噃 ，爬起身 ，搶上 幾步 ，用心口 對準 佢 ，一撳機關 ，一叢 鋼針 射出去 ，冚𠾴 唥 釘 喺 佢 身上 。
但係 風際 中 逳 都 唔 逳 ，事關 火槍 一 轟 啊 ，早就 死咗 嘞 ，係 咁 大 喇 。
班 女子 齊聲 歡呼 ，一齊 湧過嚟 。
七個 女人 再 加埋 一個 韋小寶 ，嘿嘿 ，真係 七嘴八舌 ，不折不扣 啊 。
你 一言 就 我 一語 ，紛紛噉 詢問 原因 。
韋小寶 就 簡簡單單噉 講咗 畀 佢哋 聽 。
雙兒 同 風際中 啊 相處 好耐 ，一路上 佢 誠實 質樸 ，對待 自己 呢 禮數 周到 ，實在 係 個 極之 本分 嘅 老好人 ，哈 誰知 佢 城府 咁 深 嘅 ，越 想 就 越 怕 。
佢 轉身 執起 短槍 ，突然之間 ，明白咗 當年 吳六奇 同 自己 結拜 兄妹 嘅 心意 。
呢位 武林 奇人 ，希望 韋小寶 日後 娶 自己 為 妻 ，不過 自己 乃係 丫鬟 啊 身份 唔 配 。
做咗 天地會 紅旗 香主 嘅 義妹 之後 呢 ，就 大可以 嫁畀 天地會 青木堂 嘅 香主 咯 。
佢 念及 呢位 義兄 嘅 好意 ，又 見 人 亡 槍 在 ，不禁 流出 眼淚 啊 。
韋小寶 擰轉身 ，只見 鄭克塽 等 四個人 正在 行緊 去 海邊 ，要 上 小艇 ，佢 諗 ：
佢 殺咗 師父 ，就 噉樣 太太平平 噉 離開 ？哼 ，未免 太便宜 喇 。
就 揸住 匕首 追上去 佢 話 ：咪 行住 ！
鄭克塽 停住 腳步 擰轉 頭 ，面如土色 佢 話 ：
韋 ， 啊 韋香主 ， 你 係 應承 過我 ， 話 ， 話 放 我 哋 走 嘅 。
韋小寶 冷笑話 ：我 答應過 唔殺 你 啫 ，不過 冇 應承過 話 唔斬 你 雙腳 啊 。
馮錫范 嬲 到 不得了 ，想 話 發作 咯 喎 ，但係 隻 手 呢 想 遞 高啲 ，就 全身 痠軟 ，使唔出 半分 力 。
呢個 時候 鄭克塽 已經 心膽俱裂 喇 雙膝 一軟 ，就 跪咗 喺 地 佢 話 ：
哎呀 ， 韋香主 ， 誒 你 ， 你 斬 咗 我 雙腳 ， 我 ， 我實 係 唔 ， 實實 係 冇 命 㗎 咯 。
韋小寶 話 ：有 ，點解 冇命 唧 ？
你 欠 我 一百萬 兩 銀 ，話 用 阿珂 嚟 抵押 。
但 佢 同 我 係 拜過 天地 噃 係 我 名 媒 正娶 嘅 老婆 ，肚裏 便 ，又 有 我 嘅 細路 ，佢 自願 跟 我 。
吖 你 點 能夠 用 我 嘅 老婆 嚟 向 我 抵押 唧 ？天下 都 冇 呢個 道理 㗎 嘛 。
呢陣時 ，蘇荃 、方怡 、曾柔 、公主 等等 ，都 企 喺 韋小寶 身邊 ，一齊 笑住 話 ：直情 係 豈有此理 啦 。
鄭克塽 嘅 頭腦 雖然 一片 混亂 ，不過 亦 覺得 冇乜 道理 嘅 噃 就 話 ：噉 ，嗯 ，噉點算 啊 ？
韋小寶 話 ：噉啦 ，我 斬咗 你 一隻 手 ，同 一隻 腳 嚟 做 抵押 。
你 將來 還 翻 一百萬 兩 銀 畀 我 個 時候 呢 ，我 就 將 你 隻 斷手 斷腳 還 畀 你 啦 。
誒 ，先頭 你 話 ，將 阿珂 賣斷 畀 你 ，誒 一萬兩 銀 吖 嘛 ，一萬兩 銀 嘅 欠賬 已經 一筆 勾銷 嘞 噃 。
唔得 ，先頭 我 糊里糊塗 上咗 你嘅 大當 。
阿珂 係 我 老婆 ，你 點 能夠 將 我 老婆 賣畀 我自己 呢 ？
好 ，我 將 你 老母 賣 畀 你 ，作價 一百萬 兩 ；
又 將 你 老豆 賣 畀 你 ，作價 一百萬 兩 ；
再 將 你 阿嫲 賣畀 你 ，作價 一百萬 兩 ；
仲將 你 嘅 外婆 賣 畀 你 ，作價 一百萬 兩 。
哎 ，哎哎 ，我 外婆 已經 死咗 喇 。
死人 亦都 賣 啫 。
我 將 你 外婆 個 屍體 賣畀 你 ，死人 打 八折 啦 ，作價 八十萬 兩 ，棺材 奉送 不 另 收費 。
鄭克塽 聽 佢 越 講 越多 ，佢 諗住 連 死人 都 賣 ，自己 嘅 高祖 、曾祖 、高祖母 、曾祖母 一個個 都 賣過嚟 ，噉 仲 得了 嘅 ？
就算 死人 打 八折 ，甚至 七折 六折 ，噉 都係 頂唔住 㗎嘛 ，但係 而家 又 唔敢 話 唔買 啊 ，噉啊 只有 哀求 話 ：
我 ，我 實在 買唔起 喇 。
韋小寶 話 ：好啊 ，你 買唔起 喇 ，噉 就 唔 賣 啦 ，不過 已經 買咗 嘅 就 唔 能夠 退貨 㗎 。
嗱 ，你 欠 我 三百八十萬 兩 銀 ，點樣 還法 先 ？
公主 笑 住 話 ： 係 啊 ， 三百八十萬兩 銀 噃， 快 啲 還啊 。
鄭克塽 愁眉苦面 噉 話 ：唉 ，我 身邊 一千兩 銀 都 冇 ，邊度 攞得出 三百八十萬 兩 吖 ？
好啦 ，冇銀 就 准 你 退貨 。
嗱 ，你 快啲 將 你嘅 父親 、母親 、阿嫲 、死外婆 一齊 還翻 畀 我 ，少 一條 頭髮 都 唔得 。
鄭克塽 諗住 噉樣 死纏落去 ，終歸 唔係 了局 。
佢 望住 阿珂 希望 佢 講下 情 ，但係 佢 又 偏偏 企 到 遠遠 ，背轉身 ，一於 置身事外 。
鄭克塽 個 心 啊 急到 死死下 ，睇 韋小寶 噉 嘅 樣 ，實係 要 斬咗 自己 一手一腳 㗎 喇 ，就 猛咁 叩頭 話 ：
哎呀 韋香主 ， 韋香主 ， 我 害死 咗 陳 軍師 的 確係 罪該萬死 嘞 ， 只求 你 寬洪大量 ， 放生 小人 條命 。
就算係 我 欠咗 你 老人家 三百八十萬 兩 銀 ，我 ，我 一定 設法 歸還 。
韋小寶 見 將 佢 整頓 得 咁 狼狽 ，噉 啊 稍為 洩 咗 啲 憤 ，就 話 ：
噉 你 寫 張 欠單 嚟 啦 。
鄭克塽 好 歡喜 啊 ，佢 話 ：係 ，係 。
噉啊 轉身 向 衛士 話 ：攞 紙筆 嚟 啦 。
不過 喺 呢個 荒島 上 便 ，邊度 搵 紙筆 呢 ？
不過 嗰個 衞士 亦都 算 機靈 ，佢 撕咗 自己 長衫 下襬 就 話 ：
嗰便 死人 好多 ，我哋 蘸 啲 血 嚟 寫 就係 喇 。
講完 ，就要 去 拖 風際中 嘅 屍首 嘞 。
韋小寶 左手 一伸 ，揦 住 鄭克 塽 右手 手腕 ， 白光 一閃 ， 用 匕首 割 甩 佢 嘅 右手 食指 。
哎呀 痛到 鄭克塽 大聲 慘叫 。
韋小寶 話 ：用 你 手指 血 嚟 寫 。
鄭克塽 痛到 全身 發抖 啊 ，一時 手足無措 。
韋小寶 話 ：你 慢慢 寫 啦 ，如果 血 乾 咗 唔夠 使 呢 ，我 再 割 你 第二 隻 手指 。
鄭克塽 連忙 話 ：係 ，係 。
邊度 仲 敢 遲疑 啊 ，咬實 牙關 忍住 痛 ，將 斷咗 嗰 半闕 食指 喺 幅 布 上面 寫 ：欠銀 三百八十 萬 兩 正 ，鄭克塽 押 。
噉 寫完 呢 十三個 字 ，吖 痛到 佢 呀 幾乎 暈 咁滯 啊 。
韋小寶 冷笑話 ：難為 你 仲係 堂堂 嘅 王府 公子 ，平時 練字 唔 用功 ，寫 一 張 欠單 ，幾個 字 寫到 歪歪斜斜 ，冚𠾴唥 都 係 敗筆 ，冇 一個 勝筆 嘅 。
將幅布 接咗 ，交畀 雙兒 話 ：你 收起 佢 。
睇下 銀碼 有冇 寫 少 啊 ，呢個 人 好 奸詐 狡猾 㗎 因住 佢 寫 少 幾 兩 啊 。
雙兒 笑住 話 ：三百八十萬 兩 銀 ，冇 寫 少到 。
講完 ，將 血書 欠單 啊 收入 懷內 。
韋小寶 哈哈大笑 ，對住 鄭克塽 下扒 一腳 踢過去 ，喝佢話 ：躝屍趷路 啦 你 ！
鄭克塽 一個 關斗 ，轆咗 出去 。
衛士 啊 搶 上去 扶起 佢 ，同 佢 包好 手指 傷口 。
噉 兩 名 衞士 ，分別 孭起 鄭克塽 同 馮錫范 上一 隻 小艇 ，向住 海 扒 出去 。
韋小寶 哈哈大笑 ，噉 忽然 想起 師父 慘死 ，忍唔住 又 放聲 大哭 。
鄭克塽 等 隻 小艇 扒 咗 幾十 丈 遠 之後 ，噉 先至 稍為 定翻 啲 ，佢 話 ：
我哋 去 搶 隻 大船 開走 ，呢班 斬頭鬼 就 點都 追 我哋 唔到 㗎喇 。
但係 駛到埋去 ，見到 船上 冇 舦 ，所有 嘅 船具 都 冇 。
馮錫范 話 ：嗰班 斬頭鬼 收起 上嚟 喇 。
眼見 大海 茫茫 ， 波浪 洶湧 ， 小艇 裏 便 無 糧 無水 啊 點樣 能夠 遠航 呢 ？
鄭克塽話 ：不如 我哋 返去 再 求下 嗰個 賊仔 ，問 佢 借 船 ，至多 又 寫 三百八十萬 兩 欠單 啫 。
馮錫范話 ：佢哋 亦 只有 一隻 船 ，點會 借畀 我哋 吖 ？
我 寧可 葬身 魚腹 ，亦唔願 去 𠼮 嗰個 賊仔 啊 。
鄭克塽 聽 佢 講得 咁 斬釘切鐵 ，冇法子 啦 只有 歎 一口氣 ，吩咐 三名 衞士 將 小艇 一直 向 大海 扒 出去 嘞 。
韋小寶 等 啊 望 住 鄭克 塽 嘅 小艇 扒 去 大船 嗰 度 ， 發現 大船 冇 法子 航行 ， 噉 先至 扒艇 走 ， 忍 唔 住 好笑 啊 。
蘇荃 見 韋小寶 又 喊 又 笑 ， 知道 佢 死 咗 師父 嘅 悲痛 一時 冇 法子 平息 ， 就講 啲 説 話 引 佢 高興 ， 佢 就 話 ：
呢個 鄭 二公子 奸詐 到 極 ，明明 係 想 搶 我哋 嘅 大船 啊 。
小寶啊 ，你 三百八十萬 兩 銀 嘅 賬 我 睇 佢 啊 ，非 賴 不可 㗎 喇 。
韋小寶 話 ：睇嚟 呢個 傢伙 呀 ，係 唔會 還 㗎 咯 。
蘇荃 笑住 話 ：你 做咩 都 好 精明 ，不過 先頭 呢個 嘢 將 你 自己 嘅 老婆 賣 畀 你 ，一萬 兩 銀 就 算 還清 咗 筆 賬 ，你 諗 都 唔 諗 ，就 一啖 應承 嘞 。
嗯 ，實係 你 鐘意 阿珂 妹妹 啊 鐘意到 糊塗晒 。
嗰陣時呀 ，佢 就係 要 你 倒貼 一百萬 兩 銀 ，我 睇 你 都 會 應承 㗎 。
韋小寶 用 衫袖 抹 一抹 眼淚 笑起 上嚟 佢 話 ：
唔理佢 三七二十一 ，應承咗 再講 ，慢慢 再 同佢 算賬 囉 。
方怡 問 ：噉 收尾 你 點樣 先至 諗起 原來 係 吃咗 大虧 嘅 呢 ？
韋小寶 撓撓 頭 佢 話 ：殺咗 風際中 之後 呢 ，我 個 心 冇 咩 擔憂 㗎 嘞 ，忽然間 ，頭腦 就 清楚 起嚟 喇 。
佢 本來 亦 冇 懷疑過 風際中 嘅 ，只係 內心 深處 ，總係 隱隱約約 覺得 身邊 有 個 極大 嘅 禍胎 ，噉 到底 係 咩 禍胎 呢 又 講唔出 ，只係 毫無理由 噉 害怕 啲 咩 嘢 。
等到 風際中 一死 ，即時 如釋重負 ，舒暢 到 極 啊 。
眾人 經歷咗 咁多 危險 ，直到 而家 所有 強敵 死嘅 死趯嘅 趯 ，島上 先至 太平 。
人人 都 覺得 身心 交瘁 。
韋小寶 雙腳 好似 千斤 咁 重 啊 支持唔住 ，就 瞓 喺 沙灘 上面 休息 。
蘇荃 同 佢 按摩 背上 被 風 際中 點過 嘅 穴道 。
夕陽 返照 ，水波 搖晃 ，海面 上 好似 萬道 金蛇 競相 竄躍 ，景色 奇麗 無比 啊 。
嗰班 女子 一個個 坐低 。
坐咗 冇 幾耐 ，韋小寶 瞓着 先 嘞 ，跟住 呢 ，班 女子 亦 先後 瞓着 嘞 。
過咗 個 幾時辰 之後 ，方怡 醒咗 先 ，就 去 韋小寶 舊日 嘅 中軍 帳 茅屋 裏 便 煮咗 飯 炒咗 餸 ，就 叫 大家 嚟 食 。
大堂 上 點咗 兩支 松柴 ，照到 光光猛猛 。
八個 人圍 埋 一 枱 食飯 ， 食 完飯 喇 ， 方怡同 雙兒 啊 執拾 碗筷 等等 ， 呢 啲 就 唔 講 佢 喇 。
韋小寶 逐個 睇 下 蘇荃 、方怡 、公主 、曾柔 、沐劍屏 、雙兒 、阿珂 ；
只見 有啲 嬌豔 ，有啲 温柔 ，有啲 活潑 ，有啲 端麗 ，各有各 嘅 好處 ，個 心 呀 歡喜 到 乜嘢 噉 。
而家 倚 紅 偎 翠 ，心中 和平 ，比起 當日 喺 麗春院 裏頭 同 佢哋 大被 同眠 嗰種 糊天糊帝 ，另外 有 一番 平安 豐足 之 樂 ，就 笑住 話 ：
當年 ，我 同 呢個 小島 改名 做 通食島 ，原來 有 先見之明 ，知道 你哋 七位 姊姊 妹妹 ，都 要 做 我 老婆 嘅 ，係 天意 中 註定 ，趯 都 趯唔甩 㗎 。
從 今 之 後 ，我哋 八 個 人 ，喺 通食島 住 ，壽 與 天 齊 ，仙福 永 享 啊 。
蘇荃話 ：小寶啊 ，呢 八個字 唔利是嘅 ，以後 唔好再講 佢 喇 。
韋小寶 即時 醒悟 ， 知道 佢 唔 願 聽到 任何 同洪 教主 有關 嘅 事 ， 連忙 話 ： 冇 錯 ， 冇 錯 ， 係 我 亂 噏 唧 。
蘇荃話 ：施瑯 同 鄭克塽 返去 之後 ，多數 會 帶埋 兵 嚟 報仇 ，我哋 唔 能夠 喺 呢個 島 長住 㗎 。
大家 都 話 講得 啱噉 。
方怡話 ：荃姐 ，你話 我哋 去 邊度 好 呢 ？
蘇荃 望住 韋小寶 話 ：仲係 聽 至尊 嘅 主意 啦 。
韋小寶 笑住 話 ：你 叫 我 做 至尊 啊 ？
蘇荃話 ：如果 唔係 至尊 ，點能夠 通食 啊 ？
韋小寶 眼見 大家 都 望住 自己 ，稍為 沉吟咗 下 就 話 ：
中原 就 唔好 返去 喇 。
神龍島 離 呢度 好 近 ，亦 唔得 㗎 。
噉啊 總係 要 去 一個 又 舒服 、又 冇人 嘅 地方 至 得 。
不過 冇 人 嘅 荒僻 地方 一定 唔 舒服 ，舒服嘅 地方 一定 係 人多 嘅 。
何況 韋小寶 心目中 嘅 舒服 ，既要 賭博 又要 睇戲 、聽講古 、各種 雜耍 、唱 小曲 、菜餚 點心 、美貌 姑娘 ，樣樣 都係 越多越好 。
除 咗 美貌 姑娘 身邊 呢 已經 頗 為 唔 少 之外 ， 其餘 各項 啊 ， 如果 唔 係 喺 北京 、 揚州 呢 啲 天下 一等一 嘅 繁華 嘅 地方 ， 佢 係 點 都 難以 住 得 開心 㗎 喇 。
佢 一 想到 呢啲 風流熱鬧 ，忽然 動起 孝心 佢 話 ：
我哋 喺 呢處 相聚 ，亦 算得 十分 有趣 ，唔知 我 阿媽 一個人 孤苦伶仃 噉 又 係 點樣 呢 ？
大家 都 從來 冇 聽 佢 提過 自己 母親 ，都 諗住 佢 有 噉 嘅 孝心 好 難得 ，就 問 佢 話 ：你 阿媽 喺 邊度 啊 ？
韋小寶 歎 一口氣 佢 話 ：唉 ，我 阿媽 喺 揚州 麗春院 咯 。
大家 一聽到 揚州麗春院 ，除咗 公主 一個人 之外 ，其餘 六個人 啊 當堂 滿面 通紅 ，有啲 啊 擰歪面 ，有啲 啊 耷低 個 頭 。
公主話 ：吖 ，揚州 麗春院 你 講過 嘅 ，嗰度 係 天下 最好玩 嘅 地方 咯 ，你 應承過 要 帶 我 去 玩 嘅 。
方怡微微笑話 ：佢 整蠱 你 啫嘛 ，唔好 信 佢 唧 。
嗰度 呀 係 一笪 最 唔正經 嘅 地方 嚟 㗎 。
點解 唔正經 唧 ？你 去 玩過 喇 ？
吓點解 你哋 個個 神情 都 咁 古怪 嘅 啫 ？
方怡 忍住 笑 唔 回答 。
公主 又 攬住 沐劍屏 嘅 膊頭 話 ：好妹妹 ，你 講 畀 我 聽下 啦 。
沐劍屏 啊 紅 起 塊 面 話 ：嗰度 ，嗰度 係 一 間 妓院 嚟 㗎 。
公主 仲唔明白 噃 佢 問 ：佢 媽媽 喺 妓院 做 咩嘢 啊 ？
聽講 嗰啲 啊 ，係 男人 玩 嘅 地方 嚟 㗎 嘛 。
方怡 笑住 話 ：佢 從嚟 就 鐘意 亂噏 一通 㗎喇 ，你 要 信 佢 半句 啊 ，就 夠 你 頭 赤 㗎喇 。
各位 ，欲知 後事 如何 ，且 聽 下回 分解 。
