前文 再續 啊 書 接 上 一回 。
話説 韋小寶 一行 呢 一日 嚟到 山東 。
地方官 啊 抄到 邸報 ，呈畀 欽差 大臣 ，乃係 康熙 斥責 吳三桂 嘅 詔書 。
韋小寶 叫 師爺 讀 畀 佢 聽 ，同時 又 要 詳加 解釋 。
嗰封 詔書 係 噉嘅 ：
逆賊 吳三桂 窮蹙 來歸 ，我 世祖 章皇帝 念 其 輸款 投誠 ，授之 軍旅 ，錫 封 王爵 ，盟勒 山河 ；
其所屬 將弁 ，崇階 世職 ，恩賚 有加 ；
開捆滇南 ，傾心 倚任 。
迨及朕躬 ，特隆異數 ，晉爵親王 ，重寄乾城 ，實託心膂 ，殊恩優禮 ，振古所無 。
韋小寶 聽咗 師爺 嘅 解釋 ，猛咁 岌頭 話 ：
皇上 待 呢個 反賊 呀 的確 唔錯 啊 ，一啲 都 冇 吹牛皮 。
好似 我 韋小寶 噉 吖 ，對 皇上 忠心耿耿 ，亦 不過 係 封 個 伯爵 啫 嘛 ，要 封 到 親王 呀 仲 差 一 大 截 啦 。
嗰個 師爺 又 繼續 讀 落去 嘞 ：
詎意 吳三桂 性 類 窮奇 ，中 懷 狙 詐 ，寵 極 生 驕 ，陰 圖 不軌 ，於 本 年 七月 內 ，自 請 搬移 。
朕 以 吳三桂 出於 誠心 ，且 念及 年齒 衰邁 ，師徒 遠戍 已久 ，遂 允 所請 ，令 其 休息 。
乃飭 所司 安插 周至 ，務 使 得 所 ，又 特遣 大臣 往 宣諭 朕 懷 。
朕 之 待 吳三桂 ，可謂 體隆 情至 ，蔑 以 加 矣 。
近覽 川湖 總督 蔡毓榮 等 奏 ：
吳三桂 徑行 反叛 ，背累 朝 豢養 之 恩 ，逞 一旦 鴟張 之 勢 ，播行 兇逆 ，塗炭 生靈 ，理法 難 容 ，人神 共 憤 。
韋小寶 聽完 一句 解釋 就 讚 一句話 ：
皇上 真係 寬洪大量 啊 ，冇 問候 吳三桂 嘅 老母 一句 嘿 真係 算 客氣 嘞 。
張勇 、 趙良棟 、 王進寶 、 孫思克 ， 以及 李力世 等 就 喺 側 跟 一齊 旁聽 ， 佢 哋 都 諗 ：
聖旨 裏 便 只係 講 皇帝 待 佢 好 到 唔能夠 再 好 ，斥責 吳三桂 忘恩負義 ；
冇 提 半句 滿漢 之 分 ，亦 冇 提 佢 點樣 殺害 明朝 王室 ，真係 十分 高明 ，等 天下 都 覺得 吳三桂 造反 係 極之 唔 應該 嘅 。
噉嗰個 師爺 繼續 讀 落去 。
敕旨 裏 便 勸諭 地方 官 民 就 唔好 附逆 ，就算 已經 誤 從 賊黨 啊 ，只要 悔罪 歸誠 ，亦都 不咎 既往 ；
噉親族 喺 各省 做官 居住 嘅 ，一概 不予 株連 ，不必 疑慮 。
噉詔書 裏 便 又 話 ：其 有 能 擒 吳三桂 投獻 軍 前者 ，即 以 其 爵 爵之 ；
有能 誅縛 其 下 渠魁 ，以及 兵馬 城池 歸命 自效者 ，論功 從優 取錄 ，朕 不食言 。
韋小寶 聽 嗰個 師爺 解釋 話 ：
皇上 應承 ，邊個 能夠 捉到 吳三桂 呢 ，皇上 就 封佢 做 平西 親王 啊 。
不由得 心 都 痕晒 ，佢 同 李力世 等人 話 ：
我哋 去 將 吳三桂 捉咗嚟 ，搞 個 平西 親王 做 下 噉 就 夠 妥當 啦 。
眾人 都 話 好啊 噉 。
張勇 等 武將 就 諗嘞 ：吳三桂 兵 多 將 廣 ，要 捉到 佢 啊 談何 容易 啊 ？
噉 李力世 佢哋 又 諗 嘞 ：
我哋 要 殺 吳三桂 係 因為 佢 傾覆 漢人 江山 啫 ，唔通 真係 要 為 清廷 皇帝 出力 咩 ？
不過 如果 韋香主 做咗 平西親王 ，喺 雲南 帶兵 啊 再嚟 造反 ，噉 都 唔錯 噃 。
韋小寶 聽完 詔書 ，下令 立即 啟程 ，要 盡快 趕翻 去 北京 ，請求 皇上 派 佢 出征 ，噉啊 以免 畀 人哋 搶先 將 吳三桂 捉咗 ，就 搶 咗 平西 親王 嘅 封爵 嘞 。
呢一日 ，嚟到 香河 喇 ，離開 北京 就 唔係 好遠 。
韋小寶 吩咐 張勇 啊 率領 大隊 ，就地 等候 ，嚴密 看守 欽犯 毛東珠 。
自己啊 帶埋 雙兒 同 天地會 群雄 ，押住 吳之榮 ，屈翻 去 西南 便 ，去 莊家 大屋 ，要 親自 交 畀 莊家 三少奶 ，嚟 報答 佢 送 雙兒 咁 好 嘅 丫鬟 畀 自己 嘅 厚意 。
傍晚時分 ，就嚟到 一個 市鎮 ，離開 莊家 大屋 仲有 二十幾 里 路 啦 ，噉 一行人 呢 去 一間 飯店 打尖 。
當其時 各人 都 換咗 便服 ，將 吳之榮 啊 點咗 啞穴 ，同 上身 幾個 穴道 ，就 冇 綁 佢 ，以免 嚇 親人 。
噉 大家 坐咗 兩圍 枱 ，就 冇 人 願意 同 吳之榮 同 枱 啊 。
雙兒 啊 怕 佢 逃走 ，就 一個人 同 佢 坐埋 一枱 嚴加 監視 。
飯菜 送咗嚟 嘞 ，各人 正 喺度 食緊 飯 ，有 十幾個 官兵 行 入嚟 飯店 ，為首 一人 係 名 守備 。
噉 兩 名 士兵 就 自己 打水 餵 馬 。
一名 把總 啊 大聲 噉 呼喝 ，吩咐 快啲 劏雞 煮飯 ，話 有 緊急 公事 要 趕 去 北京 報訊 嘅 。
個老闆 猛話 ：誒嚟喇嚟喇嚟喇 。
噉啊 催促 夥記 侍候 官老爺 ，又 親自 幫 嗰個 守備 抹 枱 抹 凳 。
嗰批 官兵 啱啱 坐落 ，又 傳嚟 一陣 車輪 聲 馬蹄 聲 喺 飯店 門前 停車 落馬 。
跟住 有 幾個 人 行 入嚟 飯店 嘞 ，行先 嗰 兩個 係 精壯 大漢 。
第三個 呢 ，係 個 廢癆鬼 噉樣 嘅 中年 男人 ，生得 又 矮 又 瘦 ，兩腮 深陷 ，顴骨 高聳 ；
面色蠟黃 ，一啲 血色 都冇 ，仲 隱約 現出 黑氣 添 ，行 幾步 就 咳 一聲 。
喺 佢 後便 ，一個 伯爺公 、一個 伯爺婆 一拍噉 行 ，睇嚟 ，都 已經 年過 八十 嘞 。
嗰個 伯爺公 呢 亦 係 身材 瘦小 ，但係 精神 係 極之 好 噃 ，一把 白鬚 喺 胸前 飄拂 ，滿面 紅光 。
嗰個 伯爺婆 啊 比 嗰個 伯爺公 稍為 高啲啲 ，腰板 挺直 ，雙目 炯炯 有神 。
最後 嗰 兩個 都 係 二十幾歲 嘅 少婦 。
睇 呢 七個 人 嘅 打扮 ，嗰個 病漢 啊 衣着 華貴 係 個 富家 員外 。
兩男兩女 係 僕人 、使媽 。
伯爺公 伯爺婆 身穿 青布 衣服 ，質料 係 好 粗糙 㗎 ，但係 十分 乾淨 ，睇唔出 係 咩 身份 嘞 。
伯爺婆 話 ：張媽 ，斟滿 滾水 侍候 少爺 食藥 啦 。
一名 使媽 應咗 ，喺 提籃 裏 便 攞咗 隻 瓷碗 出嚟 ，攞起 飯店 嘅 銅壺 ，喺 隻 碗 處 斟滿 滾水 ，噉啷咗 幾啷 倒咗 去 ，再 斟咗 半 碗 水 放 喺 病漢 面前 。
嗰個 伯爺 婆 喺 懷內 攞咗 個 瓷樽 出嚟 ，打開 個 樽枳 ，倒出 一粒 紅色 藥丸 ，攞到 病漢 口邊 。
病漢 又 擘開 個 嘴 ，伯爺 婆 啊 將 藥丸 放 喺 佢 條 脷 上 便 ，噉 攞起 碗 水 餵 佢 吞咗 藥丸 。
噉 病漢 食咗 藥 之後 呢 就 猛咁 喘氣 一味 咁 咳 。
伯爺公 伯爺婆 睇住 個 病漢 ，神情 又 關心 又 擔憂 。
見佢 喘氣 冇 咁 緊要 喇 ，停咗 咳 喇 ，兩個人 都 長長 吐 咗 一口氣 。
嗰個 病漢 皺住 眉頭 話 ：
爹 ，阿媽 ，你哋 一味 睇住 我 做 咩嘢 啊 ？我 又 死唔了 。
老翁 哼咗 一 聲 擰轉 塊 面 。
個伯爺 婆笑 住 話 ： 講 咩 死死 聲唧 ， 我個 我 仔 啊 長命百歲 。
韋小寶 諗嘞 ：呢個 嘢 呀 就算 食咗 玉皇大帝 嘅 靈丹 ，亦 冇 幾日 命 㗎 喇 。
哦 原來 呢個 伯爺 公 伯爺婆 係 佢 老豆 老母 。
呢個 肺癆鬼 ，實係 自細 寵壞晒 啦 連 老豆 老母 睇 多 幾 眼 都 發脾氣 。
嗰 伯爺 婆 話 ：張媽 、孫媽 ，你哋 去 座 翻 熱 少爺 嘅 參湯 先 ，然後 再 煮飯 啦 。
噉 兩 名 使媽 應咗 ，一 人 挽 一個 提籃 就 行咗 去 後堂 。
官兵 隊伍 嗰個 守備 問 個 老闆 去 北京 嘅 路程 。
老闆 話 ：眾位 老爺 今日 再 趕 二三十里 路 ，喺 前面 嘅 市鎮 過夜 。
噉 聽 朝早 一早 起程 呢 ，午後 一定 能夠 趕到 京城 㗎 喇 。
嗰個 守備 話 ：我哋 要 漏夜 趕路 啊 ，仲 過 咩 夜 吖 ？
嗱老闆 ，從而家起 ，一年之內 ，包你 生意興隆 。
嗱 你 要 準備 多啲 好酒 好菜 ，免致 到時 搞到 手忙腳亂 喇 。
嗰個 老闆 笑住 話 ：呵呵呵呵 ，誒 真係 承蒙 你 老爺 貴言 喇 。
小店 嘅 生意 呢 向來 都 係 好 平常 㗎 啫 ，好似 今日 咁 好 嘅 生意 ，一個月 呀 難得 有 幾 日 啊 。
呢啲 都係 眾位 老爺 同埋 客官 關照 㗎啫 ，邊度 會 日日 都 咁多 貴人 光臨 嘅 呢 ？
個 守備 笑住 話 ：老闆 嗱 ，我 話 你 知 啦 。
吳三桂 造反 已經 打到 湖南 嘞 ，我哋 係 趕去 京城 呈送 文書 嘅 。
呢一場 大仗 打起上嚟 呀 ，至少 都 要 打佢 三年 五載 。
稟報 軍情 嘅 人 日日 都 要 喺 呢度 經過 ，你 呀 ，有得 發 喇 。
老闆 把 口 就 一味 多謝 ，但係 個 心 就 喺 處 叫苦 嘞 。
你哋 班 軍佬 嘅 生意 有 咩 好 做 㗎 大飲大食 一輪 ，大方 嘅 就 隨便 打賞 幾 個 錢 ；
惡死嘅 打人 鬧人 之後 ，拍下 𦣇柚 就 走嘞 ，唉 莫講話 三年五載 啊 ，就算係 一年半載 我 都 要 吊頸 啊 。
韋小寶 同 李力世 佢哋 聽講 吳三桂 已經 打到 湖南 ，都 吃咗 一驚 。
啊 乜 嗰個 嘢 嚟 得 咁快 嘅 ？
噉錢 老本 低聲 話 ：等我 去 問下 呢 。
韋小寶 岌一岌頭 。
錢 老本 行 到 嗰個 守備 前 便 ，滿面 笑容 噉 問 佢 ：
先頭 聽到 呢位 將軍 大人 講 ，吳三桂 已經 打到 湖南 喇 。
小人 嘅 家眷 喺 長沙 ，唔知 嗰便 打成 點 呢 ？
長沙 緊唔緊要 啊 ？哎呀 真係 好 擔心 啊 。
嗰個 守備 聽 佢 稱呼 自己 做 將軍 大人 ，嘿 成個人 鬆晒 就 話 ：長沙 緊唔緊要 我 就 唔知 嘞 。
吳三桂 派咗 佢 手下 大將 馬寶 ，由 貴州 進攻 湖南 ，沅州 啊 失陷 嘞 ，總兵 崔世祿 畀 人哋 俘虜 咗 去 添 。
吳三桂部下 嘅 張國柱 、龔應麟 、夏國相 正在 分 幾路 東進 。
另外一名大將 王屏藩 呢 就 去 攻 四川 ，聽講 佢哋 啊 ，好 打得 㗎 。
四川 湖南 一帶 啲 百姓 都 走難 嘞 。
錢老本 好 憂愁 噉 話 ：噉啊 ？噉就 唔係 幾 妥當 嘞 噃 。
不過 大清兵 好 厲害 嘅 ，吳三桂 唔見得 會 打贏 啩 ？
嗰個 守備 話 ：本來 大家 都係 噉 講 嘅 ，但係 沅州 呢 一仗 打完 呀 ，吳三桂 嘅 兵馬 好 難 抵擋 㗎 ，唉 局面 真係 好 難 講 嘅 。
錢 老本 多謝咗 佢 又 行翻 自己 張 枱 坐低 。
天地會 群雄 有 啲 係 諗 ： 吳三桂 呢 個 大 漢奸 千祈 唔 好 做成 皇帝 啊 。
有啲又諗 ：最好 吳三桂 打到去 北京 ，同 清廷 鬥到 兩敗俱傷 。
噉 眾 官兵 匆匆忙忙 食完 酒飯 ，嗰個 守備 企 起身 話 ：
老闆 ， 我 報告 咗 個 好消息 你 知 噉 呢 餐飯 你 請客 啦 。
個 老闆 彎腰 陪 笑話 ：應該 應該 ，眾位 大人 好行 啊 。
嗰個 守備 行 去 門口 ，咪 經過 伯爺公 、伯爺婆 同 病漢 張 枱 嘅 時候 呢 ，嗰個 病漢 突然 一 伸 左手 ，揦住 佢 心口 ，個 病漢 話 ：
你 去 北京 送 咩 公文 啊 ？誒 攞嚟 睇下 吖 。
嗰個 守備 身材 粗壯 ，但係 畀 佢 一揦 住 ，當堂 踎低 成個人 矮咗 半 橛 。
豈有此理 你 做咩嘢 啊 你 ！
唂 紅 塊 面 出力 掙扎 ，不過 一啲 呢 都 唔 逳得 。
嗰個 病漢 右手 嗤 一聲 ，撕開 守備 心口 嘅 衣襟 ，就 跌咗 個 大 信封 出嚟 。
嗰個 病漢 左手 輕輕 一 推 ，個 守備 成個 𢴈 出去 ，撞冧 咗 兩 張 枱 乒乒乓乓 ，碗碗 碟碟 啊 跌到 碎晒 。
眾官兵 大叫 ：作反啊你 ！
紛紛 挺槍拔刀 ，向 嗰個 病漢 撲過去 。
病漢 帶嚟 嗰 兩 名 僕人 抬 拳 踢 腿 ，掂親 嘅 就 𢴈低 。
頃刻之間 ， 眾 兵丁 癱到 成地 都 係 。
嗰個 病漢 撕開 信封 ，攞 封 公文 出嚟 睇 。
嗰個 守備 嚇到 魂不附體 啊 大聲 噉 叫 ：
呢 封信 係 呈 畀 皇上 嘅 奏章 ， 你 ， 你 膽敢 撕毀 公文 ？ 你 你 你 你 ， 你 你 噉 咪 造反 ？
呢個 病漢 睇完 公文 就 話嘞 ：
湖南巡撫 ，請 清廷 皇帝 加派 援兵 去 打 平西王 ，哼 ，就算 派 一百萬 兵 去 ，仲唔係 。
仲唔係 ，畀 平西王 掃蕩 得 乾乾淨淨 。
一面 講説話 ，一面 將 公文 鋸埋 一嚿 ，揸住 喺 手掌 嚟 。
幾句 説話 講完 ，攤 下 手掌 一揚 ，無數 嘅 紙片 啊 ，就 好似 穿花蝴蝶 噉 隨風 飛舞 四散 飄揚 嘞 。
天地會 群雄 見到 咁 高 嘅 內力 ，人人 面色 都 變咗 啊 ，佢哋 諗 ：
聽佢 語氣 ，十足十 係 吳三桂 手下 噃 。
嗰個 守備 掙扎 住 躝 起身 ，拔出 腰刀 佢 話 ：
誒 ， 你 ， 你 撕毀 公文 ， 老子 橫掂都 冇 命 㗎 喇同 你 搏過 ！
噉啊揸住把刀 衝上去 猛力 向 病漢 頭頂 劈落去 。
嗰個 病漢 仍然 係 坐響處 ，右手 伸出 ，喺 守備 嘅 小腹 上 便 輕輕 一 推 ，似乎 係 要 佢 唔好 喺度 搞搞震 啦噉 。
嗰個 守備 舉起 把 刀 隻 手 忽然間 慢慢噉 垂低 ，跟住 個 身 軟 顂顂 噉 坐 喺 地下 ，擘大 個 口 ，有 氣 出 就 冇 氣 入 嘞 。
被打倒嘅 官兵 ，有啲 啊 已經 躝翻起身 。
佢哋 企 到 遠遠 ，有 氣 冇 力 噉樣 喝 幾句 ，但係 邊個 都 唔 敢 過嚟 救 個 長官 。
一名 使媽 捧咗 碗 熱湯 出嚟 ，輕輕 放 喺 病漢 面前 佢 話 ：少爺 ，請 飲 參湯 啦 。
伯爺公 伯爺婆 兩個人 ，對 先頭 呢一場 打鬥 啊 完全 好似 冇 睇見 噉 ，毫不 理會 ，只係 留意 個仔 嘅 神情 唧 。
徐天川 低聲 話 ：呢幾個人 好 古怪 ，我哋 走啦 。
高彥超 畀咗 飯錢 ，噉 一行人 就 出門 走嘞 。
只見 嗰個 伯爺 婆 捧住 參湯 ，輕輕 吹下 ，等 冇 咁 熱 喇 ，就 將 隻 碗 送到 病漢 嘴邊 ，餵 佢 飲 參湯 。
韋小寶 佢哋 出到 市鎮 ，先至 議論 紛紛 嗰個 病漢 嚟 咩嘢 路數 。
徐天川 話 ：呢個 人 撕爛 嗰個 武官 件 衫 ，功力 咁 厲害 嘅 ，嘿 真係 ，真係 少見 啊 。
玄貞道人話 ：佢 喺 個 武官 肚處 就噉 一推 ，似乎 係 好平常啫 ，不過 要 閃避 擋格 真係 唔容易 啊 。
風兄弟 ，你 話 點樣 避佢 呢 ？
風際中話 ：應該 離開 佢 三尺 遠 。
群雄 一諗 ，都 覺得 好 有道理 。
對於 呢一 推 啊 ，無論 閃避 定係 擋格 ，至少 喺 佢 三尺 之外 先至 做得到 嘅 。
既然 已經 靠到 咁近 咯 ，就 點 都 避唔開 擋唔住 喇 。
徐天川 話 ：我 揦 佢 手腕 。
一句 說話 未 講完 ，就 擰 下個 頭 。
知道 對方 內勁 咁 強大 ， 就算 揦 住 佢 手腕 啊 ， 佢 手掌 一翻 一扭 ， 自己 嘅 手指 骨 、 腕骨 都 好 難話 唔 斷 㗎 。
眾人 明知 呢個 病漢 係 吳三桂 一黨 ，但係 睇住 佢 行兇 傷人 ，竟然 邊個 都 唔敢 出手 阻攔 。
雖然 被害 嘅 係 清兵 軍官 啊 ，到底 唔係 眾人 平常 嘅 俠義 豪傑 行為 ，個 心 都有 啲 慚愧 嘞 。
不免 興致 索然 ，傾咗 一陣 就 收口 唔 傾 。
行咗 幾里 路 ，忽然 聽見 背後 有 馬蹄聲 ，有 兩 騎馬 急跑 而 嚟 。
呢 度 係 通向 莊家 大屋 嘅 小路 ， 唔 能夠 兩匹馬 一拍 行 嘅 。
群雄 正係 好冇癮 ，雖然 聽見 蹄聲 好急啊 ，除咗 風際中 同 雙兒 勒馬 停 喺 路邊 之外 呢 ，其餘 啲 人 邊個 都 唔肯 讓路 。
轉眼之間 ，兩騎馬 已經 跑到 身後 嘞 ，噉 群雄 一齊 擰轉頭 ，只見 騎馬 嘅 人 ，係 嗰個 病漢 嘅 兩名 僕人 。
一名 僕人 話 ：我哋 少爺 請 各位 等 一等 ，有 説話 要 問下 各位 嘅 。
呢句 説話 雖然 唔算 冇禮 ，但係 目中無人 嘅 意思 就 明擺 喺度 嘞 。
群雄 一聽 大家 都 嬲 起上嚟 。
玄貞道人話 ：我哋 有事在身 ，唔得閒 等 啊 。
大家 素 不相識 ，有 咩 好 問唧 ？
嗰個 僕人 話 ：係 我哋 少爺 吩咐 嘅 ，各位 仲 係 等 一等 好 ，免致 大家 唔方便 啊 。
噉樣 講 直情 係 威嚇 咯 喎 。
錢老本 話 ： 你 哋 主人 ， 係 唔 係 吳三桂 嘅 手下 啊 ？
嗰個 僕人 話 ：唓 ，我哋 主人 係 咩嘢 身份 啊 ？點 會 係 平西王 嘅 手下 呢 ？
噉啊群雄都諗 ：佢 唔講 吳三桂 ，就 叫 佢 係 平西王 ，實係 同 吳賊 有 啲 淵源 嘅 。
就喺呢個時候 ，只見 一架 大車 由 小路 駛緊嚟 。
嗰個 僕人 話 ：我哋 主人 嚟 喇 。噉勒 轉 馬頭 迎 上去 。
呢陣時 群雄 如果 縱馬 就 走 ，就好似 係 怕咗 嗰個 病漢 噉 ，所以 就 一齊 勒停 隻 馬 喺度 等候 嘞 。
大車 駛到 埋嚟 ，係 一名 使媽 駕 車 ，另外 一名 使媽 掀起 車簾 。
只見 嗰個 病漢 坐 喺 正當中 ，佢 父母 呢 坐 喺 佢 後便 。
嗰個 病漢 向 群雄 睩 咗 一 眼 就 問 ：你哋 點解 要 ，點 咗 呢個 人 嘅 穴道 啊 ？
噉 講完 向 吳之榮 指咗 一指 ，又 問 ：
你哋 係 咩嘢 人 ？要 去 邊處 啊 ？
語氣 十分 驕傲 。
玄貞 道人 話 喇 ：尊駕 高姓 大名 啊 ？我哋 素 不 相識 ，河水 不 犯 井水 ，管 咁多 閒事 做 咩 嘢 唧 ？
嗰個 病漢 話 ：哼 ，你 仲 唔 配 問 我 個 名 。
我 先頭 問你 ， 誒 ， 誒 講 兩句 説 話 ， 你 聽到 未 啊 ？ 點解 唔 回答 啊 ？
玄貞 好嬲 噉話 ：我 唔配 問 你 嘅 姓名 ，你亦 唔配 問 我哋 嘅 事 。
吳三桂 造反 作亂 ，係 個 大 奸賊 ，你 口口聲聲 稱呼 佢 做 平西王 ，實係 賊黨 嘞 。
我 睇 尊駕 已經 病入膏肓 ，仲係 及早 返 屋企 壽終正寢 好 ，免致 受咗 風寒 ，傷風 咳嗽 一命嗚呼 添 。
天地會 群雄 正在 哈哈大笑 啊 ，突然間 人影 晃動 ，啪 一聲 ，玄貞 塊面 已經 捱咗 重重 一巴 ，跟住 小厴 中 掌 ，跌咗 落 馬 。
呢 兩下 迅捷 無比 ，等到 玄貞 跌咗 落地 嘞 ，群雄 先至 睇清楚 出手 嘅 ，原來 ，竟然 係 嗰個 伯爺 婆 。
佢 兩 掌 打 低 咗 玄 貞 ， 雙腳 喺 地下 一 𨂽， 個身 就 飛起 ， 倒退 翻去 ， 坐 翻落 架車 處 嘞 。
嗱 各位 ，欲知 後事 如何 ，且 聽 下回 分解 。
