前 文 再續 啊 書 接上 一回 啊 。
話說 康熙 問 韋小寶 ，點 知道 趙良棟 有 本事 啊噉 。
韋小寶 就 唔 敢 話 因為 呢 個 鬍鬚 佬 啊 唔 肯托 大腳 噃， 因為 事關 自己 呢 係 托 大腳 大王 吖 嘛 。
呢個 秘訣 就 絕對 唔能夠 話畀 皇帝 知道 嘅 。
所以 佢 話 ： 上次 皇上 派 奴才 去 天津 ， 噉 我 見 呢 個 鬍鬚 佬 帶 嘅 兵 啊 操 得 好好 嘅 。
我諗 ，噉 啊 總有一日 ，要 對 吳三桂 用兵 㗎 嘛 ，呢個 鬍鬚佬 啊 係 個 人才 啊 噉 。
康熙 岌一岌頭 話 ：你 念念不忘 對付 吳三桂 噉 就 好極 喇 。
朝廷 嗰啲 老嘢 啊 ，哼 ，念念不忘 就係 點樣 討好 吳三桂 向 佢 索取 賄賂 。
誒 ， 趙良棟 而家 係 副將 係 唔 係 啊 ？
你 應承佢 ，一力 保薦 佢 升官 ，我 特旨 升佢 做 總兵 ，等 佢 多得 你 ，以後 盡心盡力 幫 你 辦事 。
哎呀 皇上 體貼 臣下 ，真係 無微不至 㗎喇 。
韋小寶 返到 伯爵府 ，噉啊 同 趙良棟 講咗 。
過 咗 幾日 ， 兵部 果然 通知 話升 趙良棟 為 總兵 ， 聽 由 都統 韋小寶 調遣 。
趙良棟 啊 梗係 感激不盡 啦 ，佢 諗 ：
跟住 呢位 少年 上司 ，唔使 托大腳 ，升官 又 快 ，實在 係 人生 第一 大 樂事 啊 。
噉話説 呢一排 ，朝中 大臣 啊 等待 三藩 係 奉旨 撤藩 呢 定係 起兵 造反 嘅 消息 ，個 心 啊 都 惶惶不安 。
呢日 ，韋小寶 同 趙良棟 喺 屋企 談論緊 ，有人 求見 ，係 額駙 吳應熊 請 去 佢 府中 飲酒 。
嗰個 請客 嘅 親隨 話 ：
額駙 好耐 冇見到 韋大人 喇 ，非常 牽掛 ，務必 請 韋大人 賞光 。
額駙 講 ：謝媒酒 仲 未 請 你 老人家 飲過 呢 。
韋小寶 個 心 諗 ：呢個 駙馬爺 有名無實 ，謝 乜 鬼 媒 吖 ？
不過 講到 呢個 謝字 呢 ，吳應熊 總 唔 能夠 請 我 飲 一杯 酒 就此 了事 嘅 ，不妨 過去 睇下 ，順手 發財 有 何 不可 啊 ？
噉就 帶埋 趙良棟 同 驍騎 營 親兵 ，就 嚟到 額駙 府 嘞 。
吳應熊 同 建寧 公主 成婚 之後 ，喺 北京 已經 賜 咗 住宅 畀 佢 ，噉 啊 同 以前 暫時 居住 嘅 局面 啊 ，又 唔 同 嘞 。
吳應熊 帶住 幾名 軍官 ，出去 大門 迎接 ，佢 話 ：
韋大人 ，我哋 係 自己 兄弟 ，今日 大家 聚下 ，亦 冇 請 外客 。
啱啱 喺 雲南 嚟咗 幾位 朋友 ，請 佢哋 陪 趙 總兵 飲酒 就 啱喇 。
噉啊幾名軍官 通名 引見 。
一個 留咗 長鬚 ，相貌 威嚴 嘅 係 雲南 提督 張勇 ；
另外 兩個 都 係 副將 ， 神情 悍勇 嘅 ， 叫做 王進寶 ， 温和 恭敬 嘅 ， 叫做 孫思克 。
韋小寶 拉 住 王進寶 隻 手話 ： 王大哥 ， 你 係 寶 ， 我 又 係 寶 ， 不過 呢 你 係 大寶 ， 我 係 小寶 。
我 哋 兩個 一對 寶啊有 殺 冇 賠 啊 。
雲南 三將 都 哈哈大笑 起上嚟 ，見到 韋小寶 性情 隨和 都 好 歡喜 。
韋小寶 對 張勇 話 ：張大哥 ，上次 兄弟 去到 雲南 ，點解 冇 見到 你哋 三位 嘅 ？
張勇話 ：嗰陣時 ，王爺 啱啱 派 小將 三個人 出去 巡邊 ，所以 唔能夠 喺 昆明 侍候 韋大人 嘞 。
哎呀咩 大人 小將 吖 ，嗱 ，大家 爽爽快快 ，我 叫 你 做 張 大哥 ，你 叫 我 啊韋 兄弟 噉 幾 好 呢 。
韋大人 噉樣 講 我哋 點 敢 當 啊 ？
噉 幾個人 一便 傾 就 一便 行 入去 大廳 。
啱啱 坐定 ，家人 獻咗 茶 ，噉 啊 另外 一名 家丁 行過嚟 向 吳應熊 話 ：
公主 請 額駙 陪 韋 大人 入去 見面 啊 。
韋小寶 個 心 乒乓 噉 一 跳 ，佢 諗 ：哎呀 呢位 公主 啊 唔係 幾 好 見 喇 。
噉啊 想到 嗰陣 同佢 一齊 去 雲南 ，一路上 風光旖旎 ，好似 新婚夫婦 一樣 ，不由得 熱血 上湧 塊面 都 紅起 上嚟 。
吳應熊啊 笑住 話 ：
公主 時時 都 話 ，我哋 嘅 姻緣 係 韋大人 撮合 嘅 ，一定 要 敬 一杯 謝媒酒 啊 。
講完 企起身 ，向 張勇 佢哋 話 ：各位 隨便 坐 。
噉就 陪埋 韋小寶 行 入 內堂 嘞 。
經過 兩處 廳堂 ，嚟到 一間 廂房 ，吳應熊 捩手 掩埋 房門 ，神情 鄭重 佢 話 ：
韋大人 ，呢件事 非 請 你 幫 個 大忙 不可 啊 。
韋小寶 塊面 又 試 紅 起 上嚟 嘞 ，佢 諗 ：
你 畀 公主 閹 咗 唔 做得 丈夫 ，要 我 幫 呢個 大 忙 啊 ？
就口 窒 窒 噉 話 ： 誒 ， 噉 誒 ， 噉 誒 有 啲 唔 係 點 好意思 啩？
吳應熊 愕然 嘞 。
如果 唔 係 韋大人 仗義 幫手 ， 解救 呢 個 急難 ， 第二個 人 邊個 都 冇 噉 嘅 本事 嘅 。
韋小寶 嘅 神情 啊 更加 忸怩 嘞 佢 諗 ：
實係 公主 逼 佢 嚟 求 我 啫 。
否則 點解 第二個人 就 唔得 ，一定要 我 幫手 至 得唧 。
吳應熊 見到 韋小寶 嘅 神情 係 噉樣 ，以為 佢 唔肯 幫手 噃 就 話 ：
呢件事情 ，我 亦 明知 十分 難做 嘅 。
做成之後 ，父王 同 兄弟 一定 唔會 忘記 韋大人 畀 我哋 嘅 好處 。
韋小寶 諗 ：為咩 連 吳三桂 都 要 感激 我 啊 ？
啊係喇係喇 ，吳三桂 實係冇男孫 ，要 我 幫 佢 生翻 一個 ，不過 係 唔係 能夠 生翻 個 男孫 噉 就 話 唔埋 㗎 噃 。
佢 話 ：駙馬爺 ，呢 件 事 係 冇 把握 㗎 ，王爺 同 你 都 多謝 咗 先 ，如果 做唔嚟 喇 豈 不是 對唔住 人 ？
吳應熊 話 ： 唔 緊要 唔 緊要 ， 韋大人 只要 肯盡 咗 力 咯 ， 我 父子 一樣 多得 你 嘅 ， 就算 係 公主 亦 係 感激不盡 啊 。
韋小寶 笑住 話 ：你 要 我 盡力 做啫 嘛 ，噉啊 當然 啦 。
嗱 ，無論 成 或者 唔成 ，我 一定 守口如瓶 嘅 ，王爺 同 額駙 即管 放心 啦 。
噉 啊 梗 係 啦 ， 邊個 敢 洩 漏風聲 啊 ？
呢件事 總要 韋大人 鼎力 ，越快 做得成 越好啊 。
噉 亦 唔 爭 在 呢 一 時 三 刻 啦 。
韋小寶 突然間 想起 ：哎呀 弊 ，我 幫 佢 生 個 仔 就 唔緊要 啊 ，佢 兩 父子 要 造反 㗎 嘛 ，不免 滿門 抄斬 ，到 其時 ，豈不是 連 我 個 仔 都 一刀 斬埋 ？
不過 怕 亦 唔會 啩 ？小皇帝 唔會 連 建寧 公主 都 殺埋 㗎 。
噉 至於 公主 個 仔 ，當然 亦都 網開 兩面 三面 嘅 。
吳應熊 見到 韋小寶 個 面色 陰晴不定 ，就 行近 一步 低聲 話 ：
削藩嘅事 ，消息 仲未 傳到 去 雲南 ，張提督 佢哋 係 唔 知道 嘅 。
韋大人 如果 能夠 快 啲 喺 皇上 面前 進言 ， 收翻 削 藩 嘅 成命 ， 六百里 加急 文書 趕 去 雲南 ， 一定 能夠 將削 藩 嘅 上諭 截翻 嚟 嘅 。
韋小寶 打個特 ：你 ，你你 嗯 ，乜 你 講 嘅 係 削藩 嘅 事 啊 ？
係 啊 ， 眼前 嘅 大事 ， 仲有 邊件 大得 過削 藩 呢 ？
皇上 對 韋大人 可以 講 係 言聽計從 ，只有 韋大人 出馬 先 能夠 挽 狂瀾 於 既 倒 。
韋小寶 個 心 諗 ：嘿 ，原來 我 冚𠾴唥 會 錯 咗 意 ，真係 好笑 嘞 。
佢 忍唔住 哈哈大笑 起上嚟 。
吳應熊 愕然 喇 佢 話 ：韋大人 笑 咩 啊 ？
係咪 我 講嘅 説話 講錯咗 啊 ？
韋小寶 連忙 話 ：唔係唔係 ，哎 對唔住 啊 ，我 忽然間 諗起 另外 一樣 嘢 好笑 啫 嘛 。
吳應熊 嬲 嘞 ，佢 個 心 話 ：你 叻 啦 ，你 猖狂 啦 。
等 父王 舉起 義旗 ，一路 勢如破竹 噉 打到 嚟 北京 ，捉住 你 呢個 衰仔 ，睇 我 將 唔 將 你 千刀萬剮 吖嗱 。
韋小寶 話 ：嗱 駙馬爺 ，聽朝 一早 呢 我 就 去 叩見 皇上 。
我話 ：吳額駙 係 皇上 嘅 妹夫 ，平西王 係 皇上 嘅 尊親 ，就算 唔再 加官進爵 咯 ，總 唔能夠 削 咗 尊親 嘅 爵位 㗎 ，噉啊 對唔住 公主 㗎 喎 。
我噉講 好唔好 啊 ？
好 ，好極喇 。
韋大人 嘅 腦筋 啊 真係 轉得快 嘅 ，話 咁快 就 想咗 大條道理 出嚟 嘞 。
韋大人 ，一切 拜託 喇 。
好喇 ，我哋 而家 去 見 公主 啦 。
佢 帶住 韋小寶 嚟到 公主 間 房 外 便 求見 。
喺 公主 間 房 裏 便 ，有 名 宮女 行 出嚟 ，就 吩咐 韋小寶 喺 房 側 跟 嘅 花廳 等候 。
過咗冇幾耐 ，公主 嚟到 花廳 嘞 ，佢 大聲 噉 話 ：
小桂子 ，你 隔咗 咁耐 都 唔嚟 見 我 你 想死 啊 ？快啲 躝過嚟 。
韋小寶 笑住 請咗 個 安 佢 話 ：公主 萬福 金安 。
小桂子啊 日日 咁 掛住 公主 ，不過 皇上 派咗 我 出差 ，一直 去到 羅剎國 ，先 嗰 幾日 先至 返嚟 啫 嘛 。
公主 眼圈 一 紅 佢 話 ：你 ，你日日 掛住 我 ，撞鬼 你 啦 ，我 ，我 。
講完 ，啲 眼淚 一串串 噉 流落嚟 嘞 。
韋小寶 見到 公主 清減咗 ，神情 憔悴 ，佢 估計 公主 同 吳應熊 結婚 之後 ，一定 係 鬱鬱寡歡 嘞 。
佢 諗 ： 吳應熊 呢 個 衰仔 係 個 太監 ， 嫁 畀 太監 做 老婆 梗 係 唔 快活 啦 。
眼見 公主 噉嘅 情況 ，想起 往日 之 情 ，就 不由得 可憐 起嚟 嘞 佢 話 ：
公主 掛住 皇上 ， 皇上 都 好 掛住 公主 啊 。
皇上 話過 幾日 呢 ，要 接 公主 入 宮 ，敘 下 兄妹 之 情 喎 。
呢啲 係 韋小寶 假 傳 聖旨 嘞 ，康熙 係 冇 講過 呢句 説話 嘅 。
建寧公主 呢 幾個月 嚟 住 喺 額駙府 裏頭 ，悶 到 無比 ，聽到 韋小寶 呢句 説話 當堂 開心 晒 佢 就 問 ：
幾時啊 ？你 同 皇帝 哥哥 講 ，聽日 我 就 去 睇 佢 啦 。
好啊 ，額駙 有 件事 吩咐 我 聽日 面奏 皇上 ，我就 奏請 皇上 接 公主 入 宮 就係喇 。
吳應熊 亦 好 歡喜 啊 佢 話 ：
有 公主 幫口 ，皇上 就 更加 唔會 駁回 㗎喇 。
公主 扁 一扁 個 嘴 話 ：
哼 ，我 淨係 同 皇帝 哥哥 傾 閒偈 嘅 啫 ，我 唔 幫 你 講 咩 國家 大事 嘅 。
好好好 ，你 鐘意 講 乜嘢 就 講 乜嘢 啦 。
公主 慢慢 企 起身 笑 住 話 ： 小桂子 ， 好 耐 冇 見 你 喇 你 高 咗 喇 。
聽講 你 喺 羅薩國 有 個 鬼姑娘 相好 噃 係唔係 啊 ？
邊度 有 噉嘅 事 呢 ？
突然之間 啪噉 一聲 ，韋小寶 塊面 啊 已經 捱咗 公主 一巴 嘞 。
㷫晒 ，韋小寶 呀呀聲 ，成個 跳起 。
公主 笑住 話 ：你 講 嘢 唔 老實 ，同 我 都 敢 車 大炮 ？
舉起手嚟又試一巴升過去 。
韋小寶 打 側 個 頭 避開 咗 ，呢 一 掌 呢冇 打到 。
公主 對 吳應熊 話 ：我 有事 要 審問 小桂子 啊 ，你 唔使 喺 處 聽 喇 。
吳應熊 微笑話 ：好 ，我 去 陪 外便 啲 武官 飲酒 。
佢 諗 ：眼白白 睇住 韋小寶 捱打 ，佢 都 好 冇癮 嘅 。
就行咗 出去 花廳 。
吳應熊 一 走咗 ，公主 一手 就 扭住 韋小寶 隻 耳仔 喝佢 話 ：
死嘢 你 嘩 ，你唔記得咗 我 喇 ？
噉啊 講完 出力 一扭 。
韋小寶 啊 痛到 哇哇聲 咁 大叫 ， 佢 話 ： 哎 冇 啊 冇 啊 ， 冇 啊 冇 唔 記得 啊 ， 我而家 唔 係 嚟 見 你 嘞 咩 ？
公主 又 一 腳 喺 佢 小腹 上面 一踢 。
你嘅嘢冇良心嘅 ，睇 我 唔 劏咗 你 吖嗱 ？
如果 唔 係 我 叫 你 啊 ， 你 再過 三年 都 唔 會 嚟 見 我 啊 。
韋小寶 見到 廳 上面 冇人 ，就 攬住 公主 低聲 話 ：
唔好逳手逳腳啦 ，聽日 呢 我 同 你 喺 皇宮 裏 便 聚下 。
公主 塊面 一紅 ： 聚 咩 啊 聚 ， 聚 你 嘅 死人頭 。
伸手 喺 佢 額頭 上面 㩧噉 鑿咗 一下 。
韋小寶話 ：我哋 如果 喺 呢處 親熱 呢 ，至怕 駙馬爺 疑心 啊 ，聽日 我哋 喺 皇宮 見面 啦 ，吓 。
公主 似 笑 非 笑 ，雙眼 啊 一條線 噉 。
佢 疑心 咩 嘢 啊 ？ 衰鬼 ， 快 啲 躝 扯 啦 。
話説 韋小寶 笑眯眯 噉 返到去 大廳 ，只見 吳應熊 啊 陪住 四名 武將 傾偈 。
趙良棟 同 王進寶 啊 唔知 喺度 爭論 緊 咩嘢 ，兩個人 爭到 放開 喉嚨 面紅耳赤 ，噉 啊 見到 韋小寶 出嚟 就 停口 嘞 。
韋小寶 笑住 問 ：兩位 爭 咩 啊 ？講畀 我 聽下 得唔得 啊 ？
張勇 話 ：我哋 喺度 談論 馬匹 。
王副將 相 馬 嘅 眼光 啊 好 獨到 嘅 ，佢 挑選 出嚟 嘅 馬 呢 必定 係 良駒 。
先頭 大家 講起 馬匹 ，黃副將 啊 稱讚 雲南 嘅 馬 好 。
趙總兵 啊 唔 信噃 ，話 川馬 、滇馬 腳短 ，跑唔快 嘅 。
王副將 就 話 川馬 、滇馬 有 長力 ，十里 路 之內 ，唔 及得 第啲 馬 ，跑到 二三十里 之後 呢 ，就 越 跑 就 越 有 精神 喇 噉 話 。
韋小寶話 ：係咩 ？兄弟 有 幾匹 坐騎 ，要 請 王副將 嚟 相 下 至 得 。
就 吩咐 親兵 回府 ，將 馬廄 嘅 好馬 牽過嚟 。
吳應熊 話 ：韋都統 嘅 坐騎 係 康親王 送 嘅 ，有名 嘅 大宛 良駒 ，叫做 玉花骢 。
我哋 啲 滇馬 又 點 及得上 吖 ？
王進寶 話 ：韋大人 嘅 馬 ，當然 係 好 㗎啦 。
大宛 出 好 馬 卑職 亦 聽過 。
卑職 喺 甘肅 、陝西 嘅 時候 ，曾經 騎過 唔少 大宛名駒 ，短途 衝刺 係 極快 嘅 ，咩嘢 馬 都 比 唔上 。
趙良棟 話 ：噉 賽 長途 呢 ？唔通 大宛馬 仲 唔 及得 滇馬 咩 ？
王進寶 話 ：雲南馬 本來 並唔係 好 ，只不過 係 勝在 刻苦耐勞 ，有 長力 。
咁 多年嚟 卑職 喺 滇北 養馬 ，將 川馬 、滇馬 交配 ，呢啲 新種 真係 好唔錯 嘅 。
趙良棟 話 ：老兄 ，你 噉 就 外行 咯 。
馬匹 向 來講 純種 㗎 嘛 ， 種越 純 就 越 好 ， 未 聽講 過 話 雜種 馬 反而 更好 嘅 。
王進寶唂到面都紅晒佢話 ：趙總兵 ，我唔係話 雜種馬 一切都好 。
馬匹 用途 唔同 ，有啲 係 用嚟 衝鋒陷陣 ，有啲 用嚟 負載 輜重 ，就算 係 軍馬 亦 大有 分別 㗎 嘛 。
有 啲 係 百里 馬 ， 有 啲 係 千里馬 ， 長途 短途 ，冚𠾴唥 唔 同 嘅 。
趙良棟 話 ：哼 ，居然 有人 話 仲係 雜種 好喎 。
王進寶 啊嬲 到不得了 ，啪聲 企起身 話 ：
你 鬧 邊個 係 雜種 啊 ？不乾不淨 亂 咁 講 。
趙良棟 冷笑話 ：我 係 講 馬 ，又 唔係 講 人 。
邊個 嘅 種 唔 純 ，作 賊 心虛 ，何必 亂 發脾氣 啊 ？
王進寶 更加 嬲 嘞 ：我 見 呢度 係 額駙公 嘅 府上 ，唔係 啊 ，哼哼 ！
趙良棟 話 ：哼咩啊 ，唔通 你 想 同 我 打交 啊 ？
張勇 啊 勸 佢 哋 話 ： 兩位 初次 相識 ， 何必 為 咗 馬匹 嘅 事 嘈 起 上 嚟 呢 ？
嚟嚟嚟 ，我 陪 兩位 飲 一杯 ，大家 唔好 爭 嘞 。
張勇 係 提督 ， 官階 比 趙良棟 、 王進寶 都 高 ， 噉 兩個 人 啊 唔 敢 唔 畀 面 佢 ， 只有 都 飲 咗 酒 啦 。
兩個 人 你 睩 住 我 我 睩 住 你 ， 如果 唔 係 上官 在座 啊 ， 兩個 火爆 霹靂 嘅 人 當堂 就要 打起 上 嚟 嘞 。
過咗 冇 幾耐 ，韋小寶 府中 嘅 親兵 馬夫 啊 牽 咗 馬 嚟 ，噉 大家 一齊 去 後 便 馬廄 裏 便 睇 馬 。
王進寶啊 真係 識 馬 㗎 噃 ，睇 一 眼 咁多 唧 ，就 能夠 講出 每 匹 馬 嘅 長處 缺點 ，甚至 連 性情 脾氣 亦 估中 七八成 嘅 。
韋府 嘅 馬夫 都 十分 佩服 ，大讚 王 副將 好 眼力 啊 。
最後 ，睇到 韋小寶 嘅 坐騎 玉花驄 嘞 。
呢 匹 馬腿 長膘 肥 ， 形貌 神駿 ， 全身 雪白 嘅 毛 上 ， 都 係 胭脂 色 嘅 斑點 ， 毛色 油 光亮 滑 ， 靚 到極點 啊 ， 噉 人人 猛 咁 喝彩 。
王進寶 就 不置可否 噃 ，睇咗 好耐 就 話 ：
呢匹馬 本質 係 極之 好 嘅 ，只係 可惜 養壞 咗 咯 。
韋小寶 話 ：點解 養壞咗 呢 ？吖 真係 要 請教 下 噃 。
韋大人 呢 匹 馬 ，可以 講 係 天下 少有 嘅 良駒 。
呢種 好馬 每日 要 騎佢 快跑 十幾里 ，慢跑 幾十里 ，越 磨練 就 越 好 。
不過 韋大人 就 過於 愛惜 佢 嘞 ，唔捨得 騎 咁多 。
呢匹馬 嘅 日子 過得 太過 舒服 喇 ，食嘅 係 上等 精料 ，一年 難得 跑 一兩 趟 。
唉 ，真係 可惜啊 ，好似 係 富貴 人家 嘅 子弟 ，寵壞 晒 咯 。
吳應熊 聽咗 面色 有啲 變嘞 ，輕輕 哼咗 一聲 。
韋小寶 見到 嘞 ，知道 王進寶 最後 呢 幾 句 説話 已經 得罪 咗 吳應熊 ，佢 諗 ：
我 乘機 挑撥 離間 ，等 佢哋 雲南 將帥 不和 都 好 噃 。
韋小寶 就 話 ： 王副將 嘅 説 話 ， 恐怕 只 係 講 啱 一半 唧 ， 富貴 人家 嘅 子弟 亦 有 本事 極之 大 嘅 。
呢 ， 好似 額 駙爺 吖 ， 佢 係 你 哋 王爺 嘅 世子 ， 自細 係 捧住 金飯碗 食飯 ， 捧住 玉碗 飲湯 ， 但 一 啲 都 冇 寵壞 啊 。
王進寶 面 都 紅晒 ，佢 連忙 話 ：
係 ， 係 。 王爺 世子 當然 係 唔 同 啦 ， 卑職 決 唔 係 講額 駙 爺 嘅 。
趙良棟 冷冰冰 噉 話 ： 喺 你 嘅 心裏 便 ， 怕 都 係 以 為 冇 咩 嘢 唔 同 嘅 啫 啩？
黃進寶 嬲嘞 ：趙總兵 ，你 點解 一味 同 兄弟 過唔去 啊 ？兄弟 並冇 得罪 你 吖嘛 ？
韋小寶 笑住 話 ：好喇好喇 ，唔好 為 啲 多事 傷咗 和氣 。
噉做武官嘅 呢 ，往往 睇唔起 朝裏 便 年輕 嘅 大臣 亦係 有 嘅 。
王進寶 話 ：回 都統 大人 ，卑職 唔敢 睇你 唔起 。
趙良棟 話 ： 你 睇 唔 起額 駙爺 啊 ？
王進寶 大聲 話 ：冇啊 ！
韋小寶話 ：王副將 ，可惜 你 養 嘅 好馬 呢 ，都 留晒 喺 雲南 ，否則 就 可以 等 我哋 嚟 見識 下 嘞 。
王進寶 話 ：我 養 嘅 馬 ，誒 係 係 ，唔 敢當 。
韋小寶 個心 覺得 好 奇怪 嘞 ， 咩 叫做 ， 係 係 ， 唔 敢當 唧 ？
趙良棟 話 ： 橫 掂 王副將 嘅 好 馬 都 喺 雲南 ， 死無對證 嘅 。
韋都統 ，小將 喺 關外 ，養咗 幾百 匹 好馬 ，匹匹 日行 三千里 ，夜行 二千里 。
就係 可惜 隔得 遠 過頭 咯 ，唔能夠 畀 都統 大人 睇下 唧 。
眾人 哈哈大笑啊 ，都 知道 佢 係 故意 諷刺 王進寶 。
王進寶 啊嬲 到 面 都 黑晒 ，指住 左手 便嘅 馬廄 大聲 話 ：
嗰便 幾十 匹馬 ，就係 呢次 我 喺 雲南 帶嚟 嘅 。
趙總兵 ，你 揀 十匹馬 ，同 我 呢度 是 但 十匹 嚟 比賽 下 腳力 ，睇下 邊個 輸 邊個 贏 啦 。
趙良棟 見 嗰啲 滇馬 ，又 瘦 又 細隻 ，毛 禿 皮 乾 ，噉啊 總共有 五六十 匹 ，個心 諗 ：
你 嗰啲 乞衣馬 有 咩 咁 了不起 唧 ？
就話 ：馬 就 好多 ，不過 有啲 五勞七傷 唧 。
就係 韋都統府 裏 便 隨便 牽嚟 呢 幾 匹 馬 啊 ，亦 擔保 叻 過 王 副將 你 親手 調養 嘅 心肝寶貝 啦 。
韋小寶 笑住 話 ：大家 一味 空口 爭 係 冇用 嘅 。
額駙爺 ，噉呢 ，我哋 各揀 十匹 ，就嚟 比賽 一下 ，雙方 賭 一賭 好唔好 ？
嗱 各位 ，欲知 後事 如何 ，且 聽 下回 分解 。
