前 文 再續 啊 書 接上 一回 啊 。
話説 韋小寶 一覺 瞓到 大天光 ，瞓醒 之後 ，只見 外便 間 房 仲 點住 蠟燭 。
雙兒 隻 手 呢 ， 揸 住 一片 碎 羊皮 ， 定晒神 噉 喺 度 諗 。
韋小寶 行到 佢 後便 ，哇 一聲 大叫 。
雙兒 吃咗 一驚 ，跳起身嚟 一睇 ，就 笑住 話 ：吖 ，你 醒喇 ？
韋小寶話 ：呢啲 碎羊皮 呀 好攞命㗎 ，我 又唔係 趕住 要 ，點解 你 成晚 都 唔瞓 唧 ？快啲 去 瞓 啦 。
好 ，我 執埋 佢哋 先 啦 。
韋小寶 見到 枱面 一塊 大白布 上 便 ，已經 用 繡花針 釘 咗 十一二 塊 碎羊皮 ，夾埋 一齊 ，完全 吻合 ，好 歡喜 啦 ，佢 話 ：
哎呀 ，你 搵到 好幾片 嘞噃 。
雙兒話 ：就係 開頭 最難 ，而家 我 已經 明白 一啲 道理 嘞 ，以後 就 會 夾得 快啲 㗎 喇 。
佢 將 啲 碎羊皮 用 油布 包好 ，連埋 嗰 塊 大 白布 啊 ，鎖 喺 一個 金漆 箱 裏 便 。
韋小寶話 ：呢啲 碎羊皮 呀 好 有用 㗎 ，千祈 唔 能夠 畀 人 偷 咗 去 啊 。
雙兒話 ：我 一日 看住 佢 就係啦 ，我 半步 都 唔 離開 。
就係 怕 瞓着 出咗 事唧 。
唔緊要 ，我 去 調 一 小隊 驍騎營 軍士 嚟 ，喺 屋外 便 同 你 守住 ，同 你 保駕 。
噉 我 就 放心得多 喇 。
韋小寶 見 佢 雙眼 有 啲 紅絲 ，可見 佢 尋晚 極之 勞累 嘞 ，好錫 佢 就 話 ：
快 啲 瞓 啦 ， 我 抱 你 上床 啦 。
雙兒 啊 醜 到 滿面 通紅 猛咁 耍手 話 ：唔好 唔好啊 。
有咩 好唔好 嘅 呢 ？你 幫 我 做 嘢 辛苦 咗 成晚 喇 ，噉 我 抱 你 上床 啫 嘛 有 咩 緊要 啊 ？
講完 ，伸手 就 抱 。
雙兒 咭噉 笑 一 聲 ，喺 佢 手臂 下 便 蜎咗 過去 。
韋小寶 啊 連氣 抱咗 幾次 ，都 抱 個 空 ，自己 知道 輕身 功夫 同 佢 爭得 遠 嘞 ，個 心 有 啲 喪氣 ，唉噉 歎 一口氣 ，就 坐 喺 椅 上 便 。
雙兒 笑吟吟 噉 行埋去 佢 話 ：
服侍 你 啷口 洗面 ，食完 早餐 我 先至 去 瞓 啦 。
韋小寶 擰擰 頭 唔 出聲 。
雙兒 見 佢 唔 高興 ， 個心 啊 有 啲 唔 安樂 嘞 ， 低聲 話 ： 相公 ， 你 ， 你 嬲 嘞 ？
唔係嬲 ，我 嘅 輕功 太 差 嘞 ，師父 教咗 我 好多 法子 我 總係 學唔會 。
連 你 噉嘅 一個 姑娘仔 我 都 捉唔住 有 屁用 咩 ？
你 要 抱 我 ，我 梗係 要 搏命 避開 你 啦 。
韋小寶 突然間 跳起身 ，佢 話 ：我 非 捉到 你 不可 ！
擘開 雙手 就 向 佢 撲過去 。
雙兒 咭咭聲 咁 笑 ，側身 避開 。
韋小寶 又 詐 假意 向 左 便 一 撲 ， 等 雙兒 走 去 右邊 嘅 時候 ， 一手 揸 住 佢 衫 角 。
雙兒 吖噉 叫咗 一聲 ，就 怕 畀 佢 扯爛 咗 件 衫 ，唔敢 出力 掙扎 。
韋小寶 攔腰 將 佢 抱住 ，噉 雙兒 一味 喺度 笑 。
韋小寶 右手 兜住 佢 腿彎 ，將 佢 打橫 抱起 ，放 喺 自己 鋪床 上 便 。
雙兒 呢 滿面 通紅 佢 話 ：哎呀 相公 你 ，嗯 你 。
我 咩嘢 吖 我 ？
拉過 張 被 𢫏住 佢 ，護低 個 身 喺 佢 塊 面 上 輕輕 吻 一吻 ，笑住 話 ：
快啲 眯埋 眼 ，瞓 啦 。
噉就 轉身 出 房 ，閂 翻埋 道 門 ，佢 諗 ：
雙兒 實係 怕 我 嬲 ，特登 畀 我 抱住 嘅 啫 。
佢 去到 大廳 ，吩咐 親兵 傳令 落去 ，調 一隊 驍騎 營 軍士 嚟 自己 房間 外 便 守衞 。
噉喺 呢 幾日 當中 啊 ，佢 將 雲南 帶嚟 嘅 金銀 禮物 ，分別 送 畀 宮中 妃嬪 、王公大臣 、侍衞 、太監 ，佢 諗 ：
如果 話 係 吳三桂 送 嘅 ，噉 就 人人 都 會 多謝 嗰個 衰公 嘞 ，不如 老子 自己 做好人 好過 啦 。
於是 吳三桂 嗰 幾十萬 兩 金銀 啊 ，都 變成咗 欽差 大臣 、驍騎營 都統 韋小寶 嘅 禮物 。
收禮嘅人 ，當然 係 好評如潮 定 啦 。
宮中 朝中 ， 都 話 皇上 真 係 聖明 喇 ， 所 提拔 嘅 呢 個 少年 都統 啊 精明 幹練 ， 居官 得體 啊 。
話説 雙兒 每日 都 喺度 夾 嗰啲 碎 羊皮 ，一 搵到 吻合 無誤 嘅 皮片 ，就 用 繡花針 釘住 。
韋小寶 每晚 睇見 拼成 嘅 圖形 越嚟越 大 ，圖 裏 便 畫 嘅 果然 都係 山川 地形 ，噉 圖上 呢 ，就 注住 彎彎曲曲 嘅 文字 。
雙兒話 ：呢啲 都係 外國字 ，我 一個 都 唔識 喇 。
韋小寶 喺 皇宮 啊 住得 耐 嘞 ，知道 寫 嘅 呢 係 滿洲 字 。
佢 係 連 漢字 都 唔 識 幾個 嘅 ， 圖形 裏 便 寫 嘅 無論 係 咩 嘢 文字 啊 ， 亦 唔 放 喺 心上 。
好嘞 ，到咗 第十八日 夜晚 ，韋小寶 啊 返入屋 ，只見 雙兒 滿面 笑容 。
佢 摸 下 雙兒 嘅 下爬 就 問 ：咩嘢 事 咁 開心 啊 ？
雙兒 微微 笑話 ：相公 ，你 估下 啦 。
尋晚 臨瞓 嘅 時候 ，韋小寶 見 只係 剩翻 二三百片 碎羊皮 仲 未曾 夾起 。
呢夾嘢 就係 噉㗎嘞 ，每夾起 一片 ，淨低嘅 就 少 一片 ，就 容易 一分 。
噉啊 最初 一兩日 呢 就 最艱難 ，一個 時辰 啊 ，都 未必 能夠 搵到 兩片 互相 吻合 嘅 碎羊皮 嘞 ，噉啊 到咗 收尾 呢 ，就 進展 迅速 咯噃 。
佢 估到 雙兒 呢 已經 將 啲 圖形 夾起 上嚟 㗎 喇 ，所以 喜上眉梢 ，就 笑住 話 ：
嗯 ，等 我 估下 先 。
係嘞 ，你 實係 包咗 幾隻 湖州粽 畀 我 食 係咪 呢 ？
雙兒 擰 下 頭 話 ：唔係 。
嗯 ，你 喺 地下 執到 件 寶貝 。
唔係 。
吖 ，我 知嘞 ，你 義兄 喺 廣東 帶咗 好多 嘢 嚟 送畀 你 。
唔係 ，條路 咁遠 ，點會 送嘢 嚟 唧 ？
係唔係 莊家 三少奶 搵人 帶 信 嚟 呢 ？
唔係咯 。
莊家 三 少奶 佢哋 唔知 點 呢 ，我 真係 掛住 佢哋 啊 。
吖 我 知 喇 我 知 喇 ， 今日 係 你 生日 。
唔係咯 ，我 生日 唔係 今日 。
噉係邊一日啊 ？
係 九月 十 。
雙兒 忽然 塊面 一紅 就 話 ：我 唔記得 嘞 。
你 呃 人 嘅 ，自己 生日 點 會 唔 記得 㗎 ？
冇錯喇 冇錯喇 ，一定係 ，你 喺 少林寺 嗰個 老和尚 朋友 嚟 探 你 定 嘞 。
雙兒 笑起上嚟 ，猛咁 耍手 話 ：
相公 講嘢 啊 真係 好笑 㗎 嘞 ，我 有 咩 少林寺 嘅 老和尚 朋友 呢 ？你 先至 有 。
韋小寶 撓 下 個 頭 ，沉吟 話 ：
估 呢樣 唔係 ，估 嗰樣 又 唔係 噉 真係 難估 咯噃 。
我啊 本來 想 估 係咪 你 已經 夾好咗 幅 圖 嘅 。
不過 尋晚 見到 仲有 二三百片 未能 夾好 ，噉 啊 至快 都 要 五六日 至 得 㗎 。
雙兒 雙眼 裏 便 閃耀住 喜悦 嘅 光芒 ，佢 微微 笑話 ：
如果 偏偏 係 今日 夾 好咗 呢 ？
你 呃 人 嘅 ，我 先至 唔信 啊 。
相公 ，你 過嚟 睇下 ，呢啲 係 乜嘢 啊 ？
韋小寶 跟住 佢 行到 枱邊 ，只見 枱面 大白布 上面 釘滿 咗 幾千 眼 繡花 針 。
幾千件 碎羊皮 啊 ，已經 夾成 一幅 完整無缺 嘅 大地圖 ，難得 嘅 係 幾千片 碎羊皮 夾埋 一齊 ，既 冇 多出 一件 亦 冇 少咗 一件 。
韋小寶 大叫 一聲 ，將 雙兒 一手 抱住 佢 話 ：大功告成 ，啜 個 嘴 先 ！
講完 ，就 向 佢 個 嘴 吻 過去 。
雙兒啊 醜 到 滿面 通紅 ，個 頭 一 側 ，韋小寶 個 嘴 呢 ，就 吻到 佢 嘅 耳珠 嘞 。
雙兒 只 覺得 全身 痠軟 喇 ，佢 話 ：唔好啦 ，唔好啦 。
韋小寶 笑住 放翻開 佢 ，噉 就 拉住 佢 隻 手 ，同 佢 一拍 噉 睇 嗰幅 圖形 ，不停口 噉 稱讚 話 ：
哎呀 雙兒 啊 ，如果 唔係 你 幫 我 辦 呢件事 啊 ，我 自己 嚟 做 呢 ，就算 夾 三年 零 六個月 ，都 唔知 夾唔夾得成 啊 。
雙兒話 ：你 有 幾多 大事 要 做 啊 ，邊 有 時間 嚟 做 呢啲 笨功夫 吖 ？
哎呀 ， 呢 啲 係 笨 功夫 啊 ？ 呢 啲 係 天下 最 聰明 最 聰明 嘅 功夫 啊 。
雙兒 聽 佢 讚 自己 非常 開心 。
韋小寶 指住 圖形 話 ：呢個 係 高山 ，呢條 係 大河 。
佢 指住 一條 大河 轉彎 嘅 地方 ，畫埋 一齊 嗰 八個 顏色 圈仔 佢 話 ：
全幅 地圖 都 係 用 墨筆畫 嘅 ， 呢 八個 圈仔 裏 便 有紅 、 有白 ， 有 黃 、 有 藍 ， 仲有 黃 圈 鑲 紅邊 嘅 。
啊冇錯喇 ，呢啲 係 滿洲人 嘅 八旗 啊 。
畫 呢 八個 圈仔 嘅 地方 實係 大有 古怪 定 嘞 。
不過 唔知 山 係 咩嘢 山河 係 咩嘢 河 唧 。
噉啊 雙兒 攞出 呢一沓 薄棉紙 ，總共有 三十幾張 ，每一張 上面 ，都 寫住 彎彎曲曲 嘅 滿洲 文字 ，交畀 韋小寶 。
韋小寶 話 ：呢啲 係 咩嘢 嚟㗎 ？邊個 寫 㗎 ？
雙兒 話 ：係 我 寫 嘅 。
吖 原來 你 識 滿洲 字 嘅 ，前 幾日 仲 呃 我 添 。
講完 ，擘開 雙手 想要 抱 雙兒 噉 。
雙兒 急忙 走開 就 笑 住 話 ： 我 冇 呃 你 啊 ， 我 係 唔 識 滿洲 字 啊 。
我 將 薄紙 印 喺 圖形 上便 ，一筆一劃 噉 印住 寫 嘅 啫嘛 。
哎呀 ，你 真係 叻 嘅 啫 。
好 ，我 搦去 叫 滿洲 師爺 認 ，注上 我哋 中國字 ，就 知道 圖形 裏 便 寫 嘅 係 咩嘢 嘞 。
哎呀 雙兒 啊 雙兒 ， 你 真 係 細心 㗎 嘞 ， 知道 圖形 嘅 關係 重大 ， 就將 啲 滿洲 字 呢 分成 幾十張 紙 嚟 到 寫 。
噉 我 分別 搦 去 問 人 ，就 唔會 洩漏 咗 機密 喇 。
雙兒 微笑話 ：相公 啊 你 真係 聰明 喇 ，你 一見 就 估到 我 嘅 用意 。
韋小寶 笑住 話 ：大功告成 啜 個 嘴 先 。
雙兒 一聽 ，反身 一跳 就 趯咗 出房 。
韋小寶 行出 大廳 ，就 吩咐 親兵 去 叫咗 驍騎營 嘅 一名 滿洲 筆帖式 嚟 ，攞出 一張 棉紙 ，問 佢 嗰 幾個 滿洲 字 係 咩 嘢 意思 。
筆帖式 ， 係 清朝 嘅 官名 ， 即 係 而家 講 嘅 翻譯 啊 。
嗰個 筆帖式 話 ：回 都統 大人 ，誒 額爾古納河 、精奇里江 、呼瑪爾窩集山 ，都 係 我哋 關外 滿洲 嘅 地名 啊 。
韋小寶 話 ：咩嘢 精得 你 江 、苦到 你 屙 山 ，噉嘅 名 都有 嘅 ？
嗰個 筆帖式 話 ：回 都統 大人 ，額爾古納河 、精奇里江 、呼瑪爾窩集山 都係 我哋 滿洲 嘅 大山 大江 啊 。
喺 咩 地方 㗎 ？
回 都統 大人 ，係 喺 關外 好 北 嘅 地方 。
韋小寶 個 心 好 歡喜 嘞 佢 諗 ：冇 錯 喇 ，果然 係 滿洲人 藏寶 個 地方 。
佢哋 將 金銀珠寶 搬 到去 關外 ，實係 要 收埋 得 越 遠 越 好啦 。
佢 話 ：你 將 咩嘢 嗰啲 ，誒呃 你 唔到 河 啊 、苦到 你 屙 山 嘅 名 啊 都 用 漢字 寫出嚟 。
韋小寶 又 攞 出 一張 棉紙 ， 問 佢 ： 你 睇 下 係 咩 嘢 江 咩 嘢 山 。
嗰個 筆帖式 話 ：回 都統 大人 ，呢條 係 西里木 的 河 、阿穆爾山 、阿穆爾河 啊 。
韋小寶話 ：嘩 ，越嚟越古怪嘞 ，喂 ，你 係咪 亂講 㗎 ？
咩 嘢 犀利 到 冇 河 啊 ， 又 咬 章魚 啊 、 咬 墨魚 啊 噉 都 有 嘅 ？
嗰個 筆帖式 好 驚 啊 佢 請咗 個 安話 ：
卑職 唔敢 亂講 ，喺 滿洲話 裏 便 ，係 另有 意思 嘅 。
好 ，你 將 咬 章魚 咬 墨魚 啊 仲有 犀利 到 冇 河 啊 都 用 漢字 寫 喺 呢 張 紙 上 便 。
等陣呢 ，我 仲要 問下 第二個人 ，睇 你 係唔係 亂噏 。
係 ， 係 ， 誒 卑職 就算 係 有 天 咁 大個 膽啊 ， 亦 唔 敢 喺 都統 大人 面前 亂 咁 講 。
哈 ， 乜 你 有 天 咁 大個 膽 咩 ？
誒 唔 係 唔 係 ， 誒 卑職 膽小如鼠 。
韋小寶 哈哈大笑嘞 ：哈哈哈哈哈哈哈哈 ，哈哈 ，嚟人喇 ，攞 五十兩 銀 ，賞畀 呢個 膽小如鼠 嘅 朋友 。
嗱 ，呢啲 咩 犀利 到 冇 河 啊 、咬 墨魚 山 啊 等等 ，你 如果 出去 同 人哋 講 畀 我 一 知道 呢 ，即刻 追翻 你 五十 兩 銀 ，連 本 帶 利 ，總共 係 一百 五十 兩 銀 㗎 。
嗰個 筆帖式 啊 歡喜 到 癲 喇 ，佢 一個月 嘅 餉銀 呢 ，亦 不過 係 十二 兩 銀 。
都統大人 一打賞 就 五十兩 嘞 ，連忙 請安 多謝 猛咁 話 ：卑職 決唔敢 亂講 ，決唔敢亂講 。
噉幾日之間 ，韋小寶 已經 問明咗 七八十個 地名 。
噉啊搦去複喺圖上一睇 ，原來 嗰 八個 顏色圈仔 啊 ，係 喺 黑龍江 之 北 ，喺 正 阿穆爾河 ，同 黑龍江 合流 嘅 地方 ，喺 呼瑪爾窩 集山 正 北 ，阿穆爾山 西北 。
八個 圈仔 之間 寫住 兩個 黃色 滿洲 字 ，譯成 漢字 呢 ，乃係 鹿鼎山 三個 字 。
韋小寶 將 圖形 同 地名 記到 實嘞 ，噉啊 要 雙兒 亦 幫埋 自己 記 ，佢 諗 ：
呢啲 碎羊皮 如果 畀 人哋 搶咗去 就 會 洩漏 秘密 。
於是就 掟入 火爐 ，燒咗 佢 。
見到 火光 熊熊 ，個 心 真係 講唔出 咁快活 ，佢 諗 ：
師父 要 我 分成 幾包 ， 分別 埋 喺 唔 同 嘅 地方 ， 噉 樣講 唔 定 ， 仲 係 會 畀 人 偷 咗 去 嘅 。
而家 呢 唔同 喇 ，收埋 喺 我 個 心 裏 便 ，就算 將 我 個 心 挖咗 去 ，亦 搵 唔到 呢幅 地圖 啦 。
不過 我 呢個 心 啊 ，梗係 唔 挖得 嘅 。
佢 擰轉頭 ，見 啲 火光 照住 雙兒 塊 面 ，紅卜卜 十分 嬌豔 ，個 心裏頭 讚 佢 嘞 ：
嘩 阿雙兒吖 ，真係 靚啊 。
雙兒 畀 佢 睇到 有啲 怕醜 就 耷低 個 頭 。
韋小寶話 ：雙兒 啊 ，我哋 圖形 呢 亦 夾到 喇 ，地名 亦 查到 喇 ，咩 犀利 到 冇 河 啊 ，誒 咬 章魚山 啊 ，都 記 喺 心裏頭 喇 ，噉 算唔算 大功告成 呢 ？
雙兒 連忙 跳起身 佢 話 ：唔算啊 唔算啊 唔唔算 告成啊 。
韋小寶 話 ：點解 仲 唔算 啊 ？
雙兒 笑住 奪門而出 佢 話 ：我 唔 知道 。
韋小寶 追住 出去 笑住 話 ：你 唔 知道 我 知道 。
忽然 有 名 親兵 ，急急 腳噉 入嚟 話 ：啟稟 都統 ，皇上 傳召 要 你 快啲 去 啊 。
韋小寶 向 雙兒 做 個 鬼臉 ，就 出門 去 皇宮 嘞 。
去到 皇宮 門口 ，見到 康熙 嘅 車駕 正在 喺 皇宮 裏 便 出緊嚟 。
韋小寶 繞到 儀仗隊 後 便 ，跪喺 路邊 叩頭 。
康熙 見到 佢 ， 微微 笑話 ： 小桂子 ， 跟 我 睇 外國人 試炮 啦 。
韋小寶 好 歡喜 噉 話 ：係 ，啲 大炮 啊 造得 真係 快 喇 。
噉 一 行人 去到 左 安門 內 嘅 龍潭 炮廠 ，南懷仁 同 湯若望 已經 遠遠 跪 喺 路邊 迎駕 。
康熙 話 ： 起身 ， 起身 ， 大炮 喺 邊 處 啊 ？
南懷仁 話 ：回 聖上 ，大炮 就 喺 城外 ，恭請 聖上 移駕 御覽 。
好 。
康熙 落咗 車 ，班 侍衛 前後 擁護 ，出咗 左 安門 ，只見 三尊 大炮 一排 噉 擺 響處 。
康熙 行埋去 ，見到 三門 大炮 青光 閃閃 ，炮身 粗大 ，炮輪 、承軸 等等 ，都 做得 極之 結實 ，個心 好 歡喜 就 話 ：
好 ，好啊 ，我哋 就 放 幾炮 嚟 試下 。
南懷仁 親自 喺 炮筒 裏 便 倒咗 火藥 入去 ，用 鐵條 舂實 ，攞起 一枚 炮彈 ，裝入 炮筒 ，噉 佢 轉身 話 ：
回皇上 ，呢一炮 可以 射到 一里半 ，個靶 已經 安放 喺 嗰便 嘞 。
康熙 順住 佢 隻 手指 望 過去 ，見到 約莫 喺 一里半 之外 ，有 十 個 土墩 ，就 岌頭 話 ：好 ，你 放啦 。
南懷仁 話 ：恭請 皇上 移駕 十丈 之外 ，以 策 萬全 。
康熙 微微 一笑 ，就 行開咗 嘞 。
韋小寶 自告奮勇 話 ：呢 第一炮 ，等 奴才 嚟 放 呢 ？
康熙 岌 一岌 頭 。
韋小寶 行到 大炮 旁邊 ，向 南懷仁 話 ：
喂 ，外國 老兄 ，嗱 你 嚟 瞄準 ，我 嚟 點火 呢 。
南懷仁 已經 校準咗 炮口 高低 嘞 ，呢陣時 ，再 校核 一次 。
韋小寶 接過 火把 ，點着 炮 上 嘅 藥線 ，連忙 跳開 ，掉咗 火把 ，雙手 緊緊噉 揞住 耳仔 。
只見 火光 一閃 ，轟噉 一聲 ，黑煙 瀰漫 ，跟住 遠處 一個 土墩 就 炸開咗 ，一條 火柱 就 升天而起 啊 。
原來 嗰個 土墩 裏 便 ，埋咗 大量 硫磺 ，炮彈 一 落 ，即時 燃燒 ，更 顯得 威勢 驚人 。
眾軍士 就 齊聲 歡呼 ，向住 康熙 大叫 ：萬歲 ，萬歲 ，萬萬歲 ！
噉啊 三尊 大炮 輪流 放 ，總共 開咗 十炮 ，打中咗 七個 土墩 ，有 三個 土墩 呢 偏咗 少少 冇 打中 。
康熙 非常 歡喜 ，對 南懷仁 同 湯若望 大加 獎勉 ，咪 即刻 升 南懷仁 呢 ，為 欽天監 監正 。
湯若望 原來 係 太常寺 卿 ，加 通政使 ，號 通玄 教師 ，不過 呢 ，畀 鰲拜 革 咗 職 。
康熙 下旨 恢復 原官 ，改號 通微 教師 。
因為 康熙 個 名 叫做 玄燁 啊 ，玄字 為咗 避諱 唔能夠 再 用 嘞 。
噉 三門 大炮 呢 ，賜名 為 神武 大炮 。
返到去 皇宮 ，康熙 叫咗 韋小寶 嚟 書房 ，笑吟吟 噉 話 ：
小桂子 ， 我 哋 日夜 開工 ， 做 佢 幾百門 神武 大炮 ， 一字排開 ， 對準 咗 吳三桂 呢 個 衰 公 揈 鬼 佢 ， 你 話 佢 仲 造 唔 造 得 成 反 吖 嗱？
韋小寶 笑 住 話 ： 皇上 神機妙算 ， 本來 就算 冇 神武 大炮 啊 ， 吳三桂 呢 個 衰公 亦 係 手到擒來 啦 。
不過 有 咗 神武 大炮 呢 ， 就 更加 係 如 ， 誒 ， 如 ， 如龍 添翼 喇 。
佢 本來 係 想 講 如虎添翼 嘅 ，但係 轉念 一 想 ，將 皇帝 比做 老虎 唔係 點 恭敬 。
康熙 笑住 話 ：你 呢句 説話 呢 太過 冇 學問 嘞 ，飛龍 在 天 ，仲 使 乜 翼 呢 ？
係啊係啊 ，可見 就算 冇 大炮 呢 ，皇上 亦 唔怕 吳三桂 嘅 。
你 總係 有得 講 嘅 。
吖 ，講到 呢處 ，我 諗起 一件事 嘞 。
吳三桂 同 蒙古 、西藏 、羅剎國 勾結 ，仲有 一個 神龍教 。
嗰個 大逆不道 嘅 老舉乸 假太后 ，就係 神龍教派 嚟 穢亂 宮禁 嘅 係 唔係 啊 ？
係啊 。
嗰個 叛逆 ，如果 唔 捉嚟 千刀萬剮 ，點 同 母後 報仇 啊 ？
講到 呢處 ，康熙 咬牙切齒 ，極之 氣憤 。
各位 ，欲知 後事 如何 ，且 聽 下回 分解 。
