前文 再續 啊 書 接 上 一回 啊 。
話 説 九難 見 韋小寶 同神行 百變 呢 項 輕功 ， 頗 有緣分 ， 都 大出 意料之外 啊 。
佢 話 ：睇嚟 ，你 天生 係 個 逃之夭夭 嘅 料 啊 。
韋小寶 笑住 話 ：弟子 練唔成 神行百變 啊 ，練成 神行 抹油 總算 唔係 一事無成 啦 。
佢 沖 咗 一杯 茶 ， 捧 到 九難 面前 問 ：
師父 啊 ， 師祖木 桑 道長 已經 逝世 嘞 ， 當今 天下 ， 就 以 你 老人家 嘅 武功 第一 係 唔 係 啊 ？
唔係 ，天下 武功 第一 ，點能夠 亂咁 認 㗎 ？
有 一個 人 ，稱得上 係 天下 武功 第一 嘅 。
係邊個啊 ？弟子 一定要 拜見 下 佢 。
佢 ，佢 。
九難 突然 間 眼圈 一紅 ， 唔 出聲 嘞 。
呢位 前輩 係 邊個 啊 ？
弟子 第日 如果 有機會 見到 佢 ，一定 恭恭敬敬噉 向 佢 叩 幾個 頭 。
九難 揮 一揮手 ，叫佢 出去 。
韋小寶 好奇怪 嘞 就 慢慢 行 出去 ，佢 諗 ：
師父 嘅 神情 咁 古怪 嘅 ？ 唔 通 呢 個 天下 武功 第一 嘅 人 ， 係 佢 嘅 契 家 佬 ？
九難 呢個 時候 心所想嘅 ，正係 嗰個 遠在 萬里 海外 嘅 袁承志 啊 。
佢 對 袁承志 落花有意 ， 袁承志 呢 ， 卻 係 情 有別 鍾 。
二十幾年 嚟 呢一番 情意 深深 噉 藏 喺 心底 ，而家 又 畀 韋小寶 撩撥 起嚟 嘞 。
第日 ，韋小寶 去 九難 間 房 請安 ，見 佢 已經 唔聲唔氣 噉 走咗 嘞 ，只係 留低 一 張 字條 。
韋小寶 攞去 請 徐天川 讀 佢 聽 ，原來 紙條 上面 寫住 好自為之 四個字 。
韋小寶 個 心 有 啲 唔 安樂 嘞 ，佢 諗 ：
尋日 我 問 師父 邊個 係 天下 武功 第一 ，吖唔通 呢句 説話 得罪 咗 佢 啊 ？
話説 呢一日 ，一行人 嚟到 北京 。
建寧公主 同 韋小寶 一齊 去 謁見 皇帝 。
康熙 早就 接到 奏章 嘞 ，已經 復旨 准許 吳應熊 嚟 北京 完婚 ，噉 而家 見到 妹妹 同 韋小寶 個 心 非常 歡喜 。
建寧公主 就 撲上去 ，一下 攬住 康熙 放聲 大哭 ，佢 話 ：
嗯 ，吳應熊 嗰個 嘢 欺負 我 ，嗯嗯嗯嗯 。
康熙 笑住 話 ：佢 咁 大膽 啊 ，等 我 打 佢 個 𦣇柚 。佢 點樣 欺負 你 啊 ？
哼 ，你 問 小桂子 啦 ，佢 欺負 我 ，佢 欺負 我 ！
皇帝 哥哥 ，你 要 同 我 作主 啊 。
一便 喊 一便 猛咁 𨂽 腳 。
康熙 笑 住 話 ： 好 ， 你 返去 自己 間房 唞 下 啦 ， 我問 小桂子 啦 。
建寧公主 早就 同 韋小寶 商量 妥當 嘞 ，見到 康熙 之後 啊 ，點樣 稟奏 吳應熊 無禮 嘅 事 。
一等公主 退咗 出去 ，韋小寶 就 詳詳細細 噉 講畀 康熙 聽 。
康熙 皺住 眉頭 ，一言不發 噉 聽完 ，諗咗 一陣 佢 就 話 ：
小桂子 ，你 好大膽啊 ！
韋小寶 嚇咗 一跳 連忙 話 ：奴才 唔敢 。
你 同 公主 打 同 通 嚟 呃 我 。
冇啊 ，奴才 點 敢 呃 皇上 呢 ？
吳應熊 對 公主 無禮 ， 你 當然 冇 親眼 睇 見 ， 但 係 點 能夠 聽 咗 公主 一面之詞 就 噉 樣奏 畀 我 聽 呢 ？
韋小寶 諗 ：哎呀 不得了 ，小皇帝 好 厲害 啊 ，睇出 咗 破綻 喇 。
連忙 跪低 叩頭 話 ：皇上 明見 萬里 。
吳應熊 對 公主 點樣 無禮 呢 ，奴才 的確 係 冇 親眼 起見 ，不過 當時 好多人 企 喺 公主 窗外 ，大家 都 係 親耳 聽見 嘅 。
噉就 更加 離譜 嘞 。
吳應熊 呢個人 我 見過 兩次 ，佢 精明能幹 ，係 個人才 。
佢 又 唔係 好 年輕 ，佢 美貌 嘅 姬妾 仲 會 少 咩 ？
點會 大膽 狂妄 對 公主 無禮 呢 ？
哼 ，公主 嘅 脾氣 我 仲 唔 知道 咩 ？
實係 佢 同 吳應熊 嘈 起上嚟 ，割咗 ，割咗 佢 嗰件 鬼嘢 。
講到 呢處 ，康熙 忍唔住 哈哈大笑 。
韋小寶 亦 笑嘞 ，佢 企 翻 起身 話 ：
呢啲事情 ，公主 係 不便 詳細 講 嘅 ，奴才 當然 亦 唔敢 多問 啦 。
噉 公主 點樣 講 ，奴才 就 點樣 稟告 喇 。
你噉樣講 亦啱 。
吳應熊 佢 受咗 委屈 咯 ，你 傳旨 落去 ，叫 佢哋 喺 北京 擇日 完婚 啦 ，滿咗 月 之後 ，再 返去 雲南 。
皇上 啊 ， 完婚 唔 緊要 啊 ， 吳三桂 要 造反 啊 ， 唔 能夠 畀 公主 返去 雲南 喇 。
康熙 不動聲色 ，岌一岌頭 話 ：吳三桂 果然 要 造反 嘞 ，你 見到 啲 咩嘢 ？
韋小寶啊 於是 將 吳三桂 點樣 同 西藏 、蒙古 、羅剎國 、神龍教 各方面 勾結 嘅 情形 ，逐一逐二 講咗 。
康熙 神色 鄭重 ，唔出聲 ，過咗 好耐 就 話 ：
呢個 奸賊 ，竟然 勾結咗 咁多 外援 。
韋小寶 早就 知道 呢件事情 十分 棘手 就 唔敢 出聲 。
再過一陣 ，康熙 又 問 ：收尾 點 啊 ？
韋小寶 話 ：已經 將 蒙古 王子 嘅 使者 捉咗 翻嚟 喇 。
講佢 自己 點樣 假扮 吳三桂 嘅 細仔 ，呃 個 使者 講出 真相 ；
吳應熊 點樣 想 搶翻 罕帖摩 ，喺 公主 住地 放火 反而 畀 人 閹咗 ；
自己 又 點樣 派遣 部屬 ，化妝 做 王府 家將 ，喺 妓院 裏 便 爭風 呷醋 ，假裝 殺死 罕帖摩 等等 。
康熙 聽到 入晒神 佢 話 ：吖 真係 好玩 嘞 。
吳三桂 呢個 人 呢 我 冇 見過 。
當年 ，父皇 賓天 嘅 時候 ，吳三桂 帶 咗 重兵 嚟 北京 祭拜 。
我 本來 想 見見 佢 嘅 ， 不過 幾名 顧命 大臣 怕 佢 擁兵 入京 ， 忽然 發生 變亂 ， 就要 佢 喺 北京 城外 搭個 孝棚 拜祭 ， 唔 准 佢 入 北京城 。
講到 呢處 ，康熙 企 起身 ，來來回回 噉 行 ，佢 繼續 話 ：
鰲拜 呢個 嘢 真係 糊塗 嘞 。
如果 擔心 吳三桂 入京 會 發生 變亂 ，只要 下旨 要 佢 父子 入 京 拜祭 ，大軍 就 駐扎 喺 城外 噉咪得囉 ，佢 有 咩 作為 呢 ？
佢 如果 唔 敢 入 城 ，噉 係 佢 自己 失禮 。
唔准 佢 入城 ，即係 明明 講畀 佢 聽 ：
我哋 怕咗 你 嘅 大軍 喇 ，怕 你 入 京 造反 喇 ，你 都係 唔好 入嚟 喇 。
呵呵 ，示弱 之至 ！
吳三桂 知道 朝廷 對 佢 有 疑心 又 怕 咗 佢 ，點 會 話 唔 造反 㗎 ？
佢 嘅 造反 陰謀 呀 ，恐怕 就係 因為 噉 而 引起 嘅 。
韋小寶 聽 康熙 噉樣 一 分析 ，真係 佩服 到 極 啊 。
佢 話 ：當時 如果 佢 見到 皇上 ，皇上 又 好好噉 開導 佢 一番 ，講唔定 啊 ，佢 就 唔敢 造反 嘞 。
康熙話 ：嗰陣時 我 好 細個 ，都 唔 懂 軍國大事 ，見咗面 後啊 ，有 咩 厲害 説話 同佢 講 呢 ？
佢 睇 我 唔起 只有 反得 更快 啫 。
康熙 又 詳細 詢問 吳三桂 嘅 相貌 舉止 ，噉 又 問 ：
佢 書房 嗰 張 白老虎皮 到底 係 點樣 㗎 ？
韋小寶 好奇怪 ，就 描述 嗰張 白老虎皮 嘅 模樣 ，佢 話 ：
皇上 連 呢啲 小事 都 知道 㗎喎 ？
康熙 微微 笑 唔 出聲 。
又 問起 吳三桂 嘅 兵馬 部署 ，用 啲 咩 嘢 人 ，以及 十大 總兵 嘅 性情 才幹 。
喺 問話 裏頭 ，顯得 對 吳三桂 嘅 情形 知道得 好 詳細 。
手下 大將 邊 一個 貪錢 ， 邊 一個 好色 ， 邊 一個 勇敢 ， 邊個 糊塗 ， 冇 一個 唔 清楚 嘅 。
韋小寶 又 吃驚 又 佩服 ，佢 話 ：
皇上 ， 你 冇 去過 雲南 ， 不過 平西王 府 內府 外 嘅 事情 ， 知道 得 呀 仲比 奴才 多 啊 。
吖冇錯喇 ，皇上 喺 昆明 派 咗 唔少 探子 。
康熙 笑住 話 ：呢啲 叫做 知己知彼 ，百戰百勝 吖嘛 。
佢 一心 想要 造反 ，唔通 我哋 一啲 都 唔理 佢 咩 ？
小桂子 ，你 呢趟 功勞 好大 ，探明咗 吳三桂 同 西藏 、蒙古 、羅剎國 勾結 。
呢件 大 秘密 啊 ，我 嗰啲 探子 又 查 唔到 嘞 ，佢哋 只能夠 查 小事 ，查唔到 大事 㗎 。
嘩 ，韋小寶 啊 周身 都 鬆晒 ，佢 話 ：
呢啲 全靠 皇上 洪福齊天 啫 。
康熙話 ：將 嗰個 罕帖摩 帶入嚟 ，等 我 親自 審問 佢 。
韋小寶 應咗 ，咪 率領 十名 御前 侍衞 ，將 罕帖摩 送 到 嚟 上書房 。
康熙 一 見到 佢 ，就 用 蒙古話 問 佢 。
罕帖摩 聽到 蒙古話 又 驚奇 又 覺得 親切 ，眼見 皇宮 裏 便 嘅 氣派 ，就 唔敢 隱瞞 嘞 ，一五一十 ，都 將 實情 講出嚟 。
康熙 連氣 問咗 兩個 幾時辰 ，除咗 蒙古 同 吳三桂 勾結 嘅 詳情 之外 ，又 問 蒙古 嘅 兵力 部署 、錢糧 物產 、山川 地勢 、風土人情 ；
以及 蒙古 各旗 王公 邊個 精明 ， 邊個 平庸 ， 噉 啊 相互之間 ， 邊個 同 邊個 有仇 ， 邊個 同 邊個 有親 等等 。
韋小寶 企 喺 一便 侍候 ，聽見 兩個人 嘰哩咕嚕 噉 講到 冇 停 。
罕帖摩 一時 呢 就 顯得 十分 佩服 ，一時 就 顯得 害怕 ；
到咗 收尾 跪 喺 地下 猛咁 叩頭 ，似係 ，感恩 到 極噉 。
康熙 命令 御前侍衞 帶 翻佢 去 監禁 。
一名 小太監 送咗 一碗 參湯 嚟 。
康熙 飲咗 ，佢 對 小太監 話 ：
你 斟 碗 畀 韋 副總管 啦 。
韋小寶 叩頭 謝恩 ，噉啊 飲咗 參湯 。
呢個 時候 ，聽見 書房 外 便 有 腳步聲 ，一名 小太監 話 ：
啟稟皇上 ，南懷仁 、湯若望 侍候 皇上 。
康熙 點點頭 。
噉啊 小太監 傳呼 出去 ，跟住 有 兩個 身材 高大 嘅 外國人 入嚟 ，跪低 向 康熙 叩頭 。
韋小寶 非常 奇怪 啊 佢 諗 ：
嗯 ，點解 有 外國 鬼 嚟到 皇宮 嘅 呢 ？哈 ，真係 奇哉怪也 喇 。
兩個 外國人 叩完 頭 之後 ，各人 喺 身邊 攞出 一本 書 ，放 喺 康熙 枱 上 。
嗰個 年紀 比較 輕 ，叫做 南懷仁 嘅 外國人 話 ：
皇上 ，今日 我哋 再 講 大炮 發射 嘅 道理 。
韋小寶 聽 佢 一口 北京話 ，清脆 流利 ，不由得 咦 咗 一聲 ，驚奇 到 極 啊 。
康熙 向 佢 笑咗 一 笑 ，就 耷低 頭 睇 書 嘞 。
南懷仁 企 喺 康熙 側 跟 ，用 手 指住 本書 就 講解 起嚟 。
康熙 聽到 唔明白 嘅 地方 呢 ，就 即刻 發問 。
南懷仁 講 咗 半個 時辰 ， 噉 另外 一個 老年 白 鬍鬚 嘅 外國人 湯若望 呢 ， 接住 又講 天文 曆法 ， 亦講 咗 半個 時辰 ， 兩個 人 就 叩頭 退 翻出去 。
康熙 話 ： 外國人 講我 哋 中國 話 ， 你 聽 起 上 嚟 好 奇怪 呢 係 唔 係 呢 ？
韋小寶 話 ：奴才 本來 係 好奇怪 嘅 ，收尾 仔細 一 諗 呢 ，亦 唔 奇怪 喇 。
聖天子 百神 呵護 吖嘛 。
羅剎國 圖謀 不軌 ，上天 就 派咗 兩個 會 講 中國話 嘅 番鬼佬 下凡 嚟 輔助 聖朝 ，製造 槍炮 火器 ，掃平 羅剎 喇 。
你 心思 都 幾 機靈 。
不過 番鬼佬 會 講 中國話 就 唔係 天生 嘅 。
嗰個 老年人 ，喺 前 明天 啟年間 就 嚟到 中國 ，佢 係 日耳曼人 。
後生 嗰個 呢 ，係 比利時人 ，係 順治 年間 嚟 嘅 。
佢哋 都係 耶穌會 教士 ，嚟 中國 傳教 嘅 。
要 傳教 ，就 要 學 講 中國話 嘞 。
哦 原來 係 噉嘅 。
奴才 一直 都 喺度 擔心 羅剎 嘅 火器 厲害 。
今日 聽 呢 個 外國人 ， 咩 嘢 大炮 啊 、 誒 短槍 啊 ， 講得 頭頭是道 ， 奴才 噉 就 放心 嘞 。
康熙 喺 書房 裏 便 慢慢 噉 踱嚟踱去 佢 話 ：
羅剎人 係 人 ，我哋 亦 係 人 ，佢哋 能夠 做 槍炮 ，我哋 一樣 亦 能夠 做 。
不過 我哋 一直 唔 懂 呢個 法子 啫 。
當年 我哋 同 明朝 喺 遼東 打仗 ，明兵 有 大炮 ，我哋 吃咗 好多 苦頭 。
太祖皇帝 就係 畀 炮火 打傷 ，龍馭 賓天 嘅 。
不過 明朝 嘅 天下 ，唔係 畀 我哋 奪取 到 嚟 嘞 咩 ？
可見 槍炮 係 要 人 嚟 使 㗎 ，使嘅 人 唔 爭氣 ，槍炮 更 厲害 都 係 冇 用 。
原來 明朝 就 有 大炮 㗎喇 ？唔知 呢啲 大炮 而家 喺 邊處 呢 ？
我哋 攞咗 去 揈 吳三桂 嗰個 衰公 ，揈到 佢 啊 一佛出世 二佛升天 。
明朝 嘅 大炮 就係 得 嗰 幾 坎 ，都 係 同 澳門 紅毛人 買 嘅 。
淨 係 買 番 鬼佬 嘅 槍炮 唔 得 嘅 。
如果 同 番鬼佬 打仗 ，佢哋 唔 肯 賣 喇 ，噉 唔係 弊 ？
我哋 要 自己 做 ，噉 先至 唔怕 人哋 制 我哋 死命 啊 。
係啊係啊 。
皇上 仲 怕 嗰啲 耶穌會 教士 做 假嘢 嚟 呃 你 ，所以 自己 嚟 搞清楚 啲 槍炮 係 點樣 做嘅 。
從 今 之 後 啊 ，任 佢 番 鬼佬 講 得 天花亂墜 亂墜 天花 都 呃 唔到 你 嘞 。
你 明白 我 個 諗法 。
呢啲 做槍炮 嘅 道理 ，真係 好 繁雜 好 難 ，淨係 煉 嗰啲 上等 精鐵 就 非常 唔 容易 嘞 。
皇上啊 ，我 去 幫 你 將 北京城 裏 城外 嘅 打鐵佬 啊 冚𠾴 唥 叫 齊嚟 ，大家 拉起 風箱 ，嘰咕嘰咕 噉 煉 佢 幾百萬 斤 上等 精鐵 啦 。
你 喺 雲南 嘅 時候 ，我哋 已經 煉成 十幾萬 斤 精鐵 嘞 。
湯若望 同 南懷仁 正在 監造 大炮 ，幾時 你 跟 我 去 睇 下 啦 。
吖 ，噉 真係 好嘞 。
皇上啊 ，啲 外國 鬼 居心不良 ，我哋 要 提防 佢哋 先至 好啊 。
做炮嘅地方 又 有 火藥 又 有 鐵器 ，皇上 自己 唔好 去 喇 ，奴才 同 你 去 監督 啦 。
噉 又 唔 使 擔心 。
呢件事情 ，關係到 國家 氣運 ，我 如果 唔係 親眼 睇住 終歸 唔放心 。
南懷仁 忠誠 耿直 。
湯若望 嗰條 老命 係 我 救 嘅 ，佢 感激 到 不得了 。
呢 兩個 人 決唔會 有 咩 異心 嘅 。
皇上 居然 救咗 外國 老番鬼 條命 啊 噉 真係 奇怪 喇 。
康熙 微微 笑話 ：
康熙 三年 ，湯若望 話 欽天監 推算 日食 有 錯誤 ，就 同 欽天監 嘅 漢官 雙方 辯論 得 好 激烈 。
欽天監 嘅 漢官 楊光 先 唔夠 佢 講 ，就 捉 佢 雞腳 ，上咗 一道 奏章 。
話湯 若望 制定 嘅 嗰部 大清 時 憲歷 ，總共 只係 推算 咗 二百年 ，但係 我 大清 得 上天 眷佑 ，聖祚 無疆 ，萬萬年 嘅 江山 。
噉汤 若望 淨係 推算 二百年 ，噉唔係 咒 我 大清 只有 二百年 嘅 天下 嘞 咩 噉 ？
韋小寶 伸 下 條 脷 話 ：嘩 ，好 厲害 啊 。
呢個 外國 老番鬼 會 算 天文地理 ，就係 唔會 算 做官人 嘅 手段 。
噉唔係就係囉 。
嗰個 時候 鰲拜 當政 ，呢個 嘢 ，糊糊塗塗 ，就 話 湯若望 詛咒 朝廷 ，應該 凌遲 處死 。
噉 呢道 旨意 送畀 我 睇 ，我 一 睇 ，就 睇出 一個 破綻 嘞 。
康熙 三年 ， 嗰 陣 時 皇上 你 先 至 係 十歲 啫 ， 就 已經 睇 出 其中 嘅 破綻 喇 ？ 真 係 聖 天子 聰明智慧 ， 自古 少有 啊 。
你 唔好 托大腳 喇 。
其實 呢個 道理 呢 ，講起 上嚟 亦 好 顯淺 。
我 就 問 鰲拜 ，呢部 大清 時 憲曆 係 幾時 做好 嘅 ？
佢 話 唔 知道 ， 要 返去 查一查 ， 噉 回奏話 ， 係 順治 十年 做好 嘅 。
噉 當時 先帝 下旨 嘉獎 ，賜咗 佢 一個 通玄 教師 嘅 封號 噉 。
我話 ：係吖 ，我 六七歲 嘅 時候 ，就 喺 書房 見過 呢部 大清 時 憲曆 嘞 。
呢部曆書 已經 做成咗 十年 ，點解 當時 大家 唔話 佢 唔啱 呢 ？
而家 爭 佢 唔過 咯 ，就 嚟 翻 佢 老賬 啊 ？噉 太過 唔公道 喇 。
鰲拜 諗下 ，冇錯啊 ，噉咪 冇殺佢 ，將佢 韞 喺 監牢 。
呢件事 我 收尾 亦 唔記得 咗 嘞 ，最近 南懷仁 講起 ，我 先至 下旨 放翻 佢 出嚟 啫 嘛 。
皇上啊 ，等 奴才 叫 佢 花啲心思 ，做 一部 大清 萬年曆 出嚟 好唔好啊 ？
康熙 笑咗 幾聲 ，跟住 好正經 噉 話 ：
我 讀 前朝 嘅 歷史書 ，凡係 愛惜 百姓 嘅 ，必定 係 國運 長久 ，否則 一味 講 啲 吉祥 嘅 説話 又 有 咩 用 吖 ？
自古以來 ，人人 都 叫 皇帝 做 萬歲 ，哼 ，其實 唔好 講話 萬歲 啊 ，享受 一百歲 嘅 皇帝 都 冇 吖嘛 。
咩 萬壽無疆 啊 都係 呃 人 嘅 。
父王 諄諄叮囑 ，要 我 實行 永不加賦 嘅 訓諭 ，我仔細噉 想下 ，只有 遵守 呢 四個字 ，我哋 嘅 江山 就係 鐵打 。
咩嘢 番鬼佬 嘅 大炮 啊 、吳三桂 嘅 兵馬 啊 ，冚𠾴唥 都 唔 使 擔心 。
韋小寶 啊 唔明白 呢啲 治國 嘅 大道理 ，只係 應話 係 係 係 噉 。
然後 攞出 喺 吳三桂 嗰處 偷翻嚟 嗰部 正藍 旗 四十二 章經 ，雙手 獻畀 康熙 佢 話 ：
皇上 ，呢部 經書 啊 ，果然 係 吳三桂 呢個 衰 公 吞沒 咗 啊 。
奴才 喺 佢 書房 裏 便 見到 ，就 一於 嚟 個 順手牽羊 ，噉 就 物歸原主 嘞 。
康熙 好 歡喜 佢 話 ：好極嘞 。
太后 一味 掛住 呢件事 ，我 去 獻 畀 佢 老人家 ，然後 攞 去 太廟 焚化 咗 佢 。
唔理 裏頭 有 咩嘢 秘密 都 好 ，從此 就 冇人 知道 喇 。
韋小寶 諗 ：你 燒 咗 梗係 最好 啦 ，噉 就 叫做 毀尸滅跡 。
我 偷咗 經書 裏 便 碎羊皮 嘅 事 就 永遠 都 唔會 畀 人 發覺 喇 。
佢 返到 自己 嘅 子爵府 ，天黑 之後 ，閂實 道門 ，攞出 嗰 包 碎羊皮 ，呢 叫咗 雙兒 嚟 ，佢 就 話 ：
有 一件 長命 功夫 ，你 幫 我 做下 。
吩咐 佢 將 幾千片 碎 羊皮 夾 翻埋 還原 。
噉 雙兒 呢 伏 喺 張 枱 處 慢慢 噉 對住 剪痕 ，一片 一片 噉 嚟 夾 嘞 噃 。
但 係 幾千片 碎 羊皮 亂糟糟 ， 要 夾翻 原來 噉 樣真 係 談何容易 呢 ？
韋小寶 初時 仲 坐 喺 枱邊 ，出下 主意 ，東 攞 一片 西 攞 一片 ，幫 雙兒 嚟到 夾 。
但係 搞咗 好耐 ，連 兩 塊 相連 嘅 羊皮 都 搵唔到 ，就 冇 晒 癮頭 ，就 行 去 瞓覺 嘞 。
嗱 各位 ，欲知 後事 如何 ，且 聽 下回 分解 。
