前 文 再續 啊 書 接上 一回 啊 。
話 説 白衣 尼同 陶红英 ， 喺 客店 裏 便 係 足不出户 。
韋小寶 呢 就 每日 出去 探聽 皇上 係 唔 係 已經 回宮 。
到 咗 第七日 上午 ， 見 康親王 、 索額圖 、 多隆 等 人 ， 率領 大批 御前 侍 衞 ， 擁住 幾頂 大轎入 宮 ， 噉 啊 知道 皇上 已經 返 咗 嚟 喇 。
果然 過 咗 冇 幾耐 ， 一群群 親王 貝勒 、 各部 大臣 就 陸續 入宮 ， 梗 係 去 恭 叩 聖安 啦 。
韋小寶 啊 連忙 返去 客店 講 畀 白衣 尼 聽 。
噉 當晚 三個 人 由 原 路 入宮 ， 去 到 太后 居住 嘅 慈寧宮 外便 ， 四圍 靜英英 。
白衣 尼帶 住 兩個 人 兜 到 去 後 便 ，揦 住 韋小寶 條腰 跳牆 入去 ， 落地 一 啲 聲 都 冇 。
陶紅英 跳落 嚟 嘅 時候 ， 白衣 尼 左手 嘅 衫袖 喺 佢 條 腰 處 一 托 ， 噉 佢 落地 嘅 時候 呢 亦 都 係 冇 聲 。
韋小寶 指住 太后 寢 殿 嘅 側 跟 嘅 窗 ， 用 手勢 示意 太后 呢 就 住 喺 嗰 處 嘞 。
佢 帶 兩個 人行 去 後院 ， 嗰 度 係 慈寧宮 宮女 嘅 住 地 ， 嗰 度 三間房 嘅 窗口 透出 淡淡 嘅 黃 光 。
白衣 尼 喺 一間 房 嘅 窗 罅 裝入 去 ， 只見 十幾名 宮女 一排 噉 坐 喺 凳 上 便 ， 每個 人 都 低眉 耷目 ， 好似 入定 噉 樣 。
佢 輕輕 掀開 門簾 ， 直入 太后 嘅 寢 殿 。
韋小寶 同 陶紅英 跟 埋 佢 入 去 。
枱 上 ， 點住 四支 紅 蠟燭 ， 光光 猛猛 ， 不過 房裏 便 一個 人 都 冇 。
陶紅英 低聲 話 ： 奴婢 割爛 過 佢 三個 箱 ， 櫃桶 呢 都 搵 勻 嘞 ， 仲 係 搵 唔 到 經書 。
當時 太后 呢 ， 同埋 嗰 個 假 宮女 就入 嚟 喇 ， 哎呀 ， 有人 嚟 喇 。
韋小寶 一 掹 佢 個 衫袖 連忙 匿去 床後便 。
白衣 尼岌一岌頭 ， 同 陶紅英 啊 跟 住 佢 匿 埋 喺 床 後 便 。
只 聽見 房外 便 一個 女子 聲音 話 ：
媽 ， 我同 你 做成 呢 件 事 ， 你賞 啲 咩 嘢 畀 我 啊 ？
呢 個 係 建寧公主 啊 。
聽見 太后 話 ： 媽叫 你 做 呢 啲 小事 都 要賞 啊 ？ 真 係 唔 似 樣 嘅 你 。
兩個 人一便 講一便 行入 嚟 。
建寧公主 話 ： 吖 呢 啲 仲 係 小事 啊 ？ 如果 皇帝 哥哥 查起 嚟 ， 知道 係 我 搦 嘅 ， 嬲 死 佢 都 得 啊 。
太后 坐低 之後 又 話 ： 一部 佛經 又 有 咩 咁 緊要 唧 ？
我 哋 去 五台山 進香 ， 就 係 求 菩薩 保佑 ， 返 嚟 皇宮 之後 ， 仲 係 要 誦經 念佛 ， 菩薩 噉 至 歡喜 㗎 嘛 。
哦 ， 既然 唔 緊要 ， 噉 我 就 去 同 皇帝 哥哥 講 ， 話 你 派 我 攞 咗 呢 部 四十二章 經 ， 用 嚟 誦經 念佛 ， 求 菩薩 保佑 佢 國泰民安 ， 皇帝 哥哥 萬歲 萬歲 萬萬歲 。
韋小寶 個心 好 歡喜 啊 佢 諗 ： 哦 ， 原來 你 派 公主 去 偷 咗 經書 返 嚟 。
不過 佢 轉念 一想 ， 又 覺得 自己 好運 滯 。
呢 次 如果 唔 係 同 白衣 尼 一齊 嚟 ， 呢 部 經書 完全 可以 自己 攞 到 嘅 ， 噉 而家 就 冇 指望 啦 。
太后 話 ： 你 唔 係 去講 囉 。
皇帝 如果 嚟 問我 ， 我話 唔 知 呢 件 事 。
細佬哥 亂 咁 講 嘢 都 算 得數 嘅 ？
哎 吖 媽媽 你 想賴 啊 ？ 經書 明明 喺 呢 處 。
嘿 ， 噉 都 好容易 啫 ， 我 掉 咗 個 爐 處燒 咗 佢 咪 係 囉 。
哎呀 算喇算 喇 ， 我點 都講 你 唔 過 嘅 。
阿媽 你 真 係 小氣 嘅 啫 ， 你 唔 肯賞 嘢 畀 我 就算 嘞 ， 仲要 嚟 蝦 我 。
你 乜嘢 都 有 喇 ， 又 要 我賞 你 咩 嘢 呢 ？
我 咩 嘢 都 有 嘞 就 係 差 一件 唧 。
爭 咩 嘢 吖 ？
爭 一個 陪我玩 嘅 小太監 咯 。
太后 笑 嘞 ： 嘿嘿 ， 小太監 ， 宮裏 便 幾百個 小太監 ， 你 鐘意 搵 邊個 陪你玩 就 搵 邊個 囉 。
嗯 ， 嗰 啲 小太監 啊 笨 到 死 都 唔 好玩 嘅 。
我要 皇帝 哥哥 身邊 嗰 個 小桂子 。
韋小寶 個心 一震 ： 哎呀 呢 個 死妹 釘 居然 仲 記得 我 。
陪 佢 玩 真 係 唔 容易 啊 ， 一下 唔 小心 ， 老子 條命 都 冇 埋 啊 。
只 聽見 公主 繼續 話 ： 我問 皇帝 哥哥 ， 佢 話 派 咗 小桂子 出京 去 辦事 喎 。
不過 咁 耐 都 唔 返 嚟 嘅 。
媽 ， 你 去 同 皇帝 講啦 ， 要 佢 將 小桂子 畀 咗 我 啦 。
韋小寶 喺 個 肚 處 鬧 佢 喇 ：
死妹 釘 ， 你 啊 想 得出 喇 ， 老子 落 咗 入 你 手 啊 ， 全身 如果 唔 係 日日 畀 你 搞 到 十七八個 窿 ， 老子 就 跟 你 姓 。
哎呀 ， 公主 姓 咩 呢 ？
公主 同小 皇帝 係 一個 姓 ， 噉 小 皇帝 又 姓 咩 啊 ？
嘿 ， 老子 真 係 糊塗 嘞 ， 都 唔 知道 添 。
太后 話 ： 皇帝 派 小桂子 去 辦事 ， 你 知 唔 知去 咗 邊處 啊 ？ 去 辦 咩 嘢 事 呢 ？
建寧公主 話 ： 哦 ， 呢 啲 我 知 啊 。
我 聽 啲 侍 衞 講 ， 小桂子 去 咗 五台山 。
吓 ， 佢 ， 佢 就 喺 五台山 啊 ？
呢 次 我 哋 點解 冇 見到 佢 呢 ？
我 都 係 回宮 之後 ， 先至 聽 啲 侍 衞 講 㗎 咋 ， 唔 知 皇帝 哥哥 派 佢 去 五台山 做 乜嘢 呢 ？
聽 啲 侍 衞 講 ， 皇帝 哥哥 又 升 咗 佢 官 喇 。
太后 嗯 噉 應 咗 佢 ， 諗 咗 一陣 就 話 ：
好 ， 等 小桂子 回宮 喇 ， 我同 皇后 講啦 。
太后 語氣 冷淡 ， 似乎 心神 不屬 噉 ， 佢 又 話 ：
都 好 晏 嘞 ， 你 返 去 瞓 啦 。
媽 ， 我 唔 返去 ， 我要 陪 你 瞓 。
又 唔 係 細路 女 嘞 ， 點解 唔 返去 自己 間房 呢 ？
我間 房 有鬼 㗎 ， 我怕 啊 。
亂講 有 咩 嘢 鬼 呢 ？
媽 ， 真 係 嘅 呢 。
我 宮裏 便 嘅 太監 同 宮女 都 話 ， 前 幾晚 啊 ， 個個 人 都 畀 鬼 迷 ， 一 覺 瞓 到 第二日 晏晝 先至醒 啊 ， 個個 人 都 發 噩夢 啊 。
邊有 噉 嘅 事 呢 ？ 咪 聽 啲 奴才 亂 咁 講 。
我 哋 唔 喺 宮裏 便 ， 班 奴才 心驚 ， 就 疑神疑鬼 啫 嘛 。
快 啲 返 去 啦 。
公主 唔 敢 再講 嘞 ， 請 咗 安 就 退出 去 。
太后 坐 喺 枱 邊 ， 一隻 手 撐住 塊面 ， 望住 燭火 定晒型 噉 出神 。
過 咗 好 耐 好 耐 ， 一 轉頭 ， 突然 見到 牆上 有 兩個 人影 ， 跟 住 啲 燭火 微微 喺 度 震 下 震 下 。
初時 佢 仲 以 為 係 眼花 噃， 定神 一睇 ， 果然 係 兩個 影 。
一個 係 自己 嘅 ， 另外 一個 影 呢 ， 同 自己 個 影一 拍 。
嚇 到 太后 乜嘢 噉 ， 想起 自己 過去 害死 咁 多 人 ， 不由得 全身 寒毛 直豎 ， 就算 佢 有 一身 武功 啊 竟然 唔 敢 擰 轉頭 。
過 咗 好 耐 下 佢 先 至 想起 ： 鬼 係 冇 影 嘅 ， 有 影 嘅 就 唔 係 鬼 啦 。
不過 屏住 氣息 聽下 ， 身邊 又 冇 第二個 人 嘅 呼吸聲 啊 。
哎呀 嚇 到 佢 全身 手腳 酸軟 ， 唔 逳 得 ， 望住 牆上 兩個 影 ， 幾乎 暈 咁 滯 。
突然 間 ， 聽見 床 背後 有 輕微 嘅 呼吸聲 ， 即刻 擰 轉頭 。
只見 一個 白衣 尼姑 隔住 張 枱 坐 喺 對面 ， 雙眼 正在 望實 自己 。
容貌 清秀 ， 神情 木然 ， 一時 亦 睇 唔 出 係 人 定 係 鬼 。
太后 聲 震震 噉 話 ：
你 ， 你 係 邊個 啊 ？ 點解 ， 點解 會 喺 呢 度 呢 ？
白衣 尼 唔 回答 佢 ， 過 咗 一陣 冷冰冰 噉 話 ：
你 係 邊個 啊 ？ 點解 會 喺 呢 度 呢 ？
太后 聽見 佢 講 説 話 就 冇 咁 驚 嘞 。
呢 度 係 皇宮 內 院 ， 你 ， 你 真 係 大膽 喇 。
白衣 尼 冷冰冰 噉 話 ：
冇 錯 ， 呢 度 係 皇宮 內 院 ， 你 係 乜嘢 啊 ？ 咁 大膽 嚟 到 呢 處 ？
我 係 皇太后 ， 你 係 邊 處 嘅 妖人 吖 ？
白衣 尼 伸出 右手 撳住 太后 面前 嗰 部 四十二章 經 ， 慢慢 攞 過 嚟 。
太后 喝 佢 話 ： 放手 ！ 呼 噉 一掌 ， 向 佢 面 門 擊 過去 。
白衣 尼 右手 翻 起 ， 同 佢 對 咗 一 掌 。
太后 個身 一晃 ， 即刻 離開 張椅 ， 低聲 喝 佢 話 ： 好 啊 ， 原來 係 個 武林高手 。
太后 知道 對方 係 人 而 唔 係 鬼 就 完全 唔 怕 喇 ， 撲上去 ， 呼呼 呼呼 連氣擊 咗 四掌 。
白衣 尼 坐 喺 椅 處 ， 並 冇 起身 ， 首先 將 經書 收 喺 懷 內 ， 然後 用 掌 將 佢 攻 過 嚟 嗰 四招 逐一 逐二 化解 。
太后 見 佢 攞 咗 經書 去 又 驚 又 嬲 ， 催動 掌力 ， 霎時之間 又 連氣攻 咗 七八招 。
白衣 尼 又 化解 咗 ， 始終 冇 還擊 。
太后 一手 喺 右腳 一摸 ， 手上 已經 多 咗 一把 寒 光閃閃 嘅 短 兵器 。
韋小寶 定眼 一望 ， 見 太后 隻 手 揸 住 嘅 係 一把 白金 點鋼 蛾眉 刺 ， 當日 殺 海大富 用 嘅 呢 ， 就 係 呢 件 嘢 嘞 。
佢 兵器 在手 ， 氣勢 一振 ， 連氣 向 白衣 尼刺 過去 。
只 聽見 風聲 呼呼 ， 用 掌 劈 用 刺 㓤， 寢宮 裏 便 一條條 白光 急閃 。
韋小寶 低聲 話 ： 我 出去 喝 住 佢 ， 唔 好 傷害 咗 師太 。
陶紅英 一手 拉 住 佢 低聲 話 ： 唔 使 。
只見 白衣 尼 仍然 定定 噉 坐 喺 張 椅 處 ， 右手 食指 東 一點 ， 西一督 ， 將 太后 凌厲 嘅 攻勢 化解 咗 。
太后 忽進 忽退 ， 一時 跳 起 ， 一時 伏低 ， 迅速 到極 。
掌風將 四支 蠟燭 嘅 火焰 逼 到 向 後 傾斜 ， 突然 間 ， 間房 一 暗 ， 四支 蠟燭 熄 咗 兩支 ；
再 拆 幾招 ， 其餘 嗰 兩支 亦 都 熄 埋 嘞 。
黑暗 之中 ， 只 聽見 掌 風 嘅 聲音 更加 響 ， 仲 夾住 太后 沉重 嘅 喘息聲 。
忽然間 聽見 白衣 尼 冷冰冰 噉 話 ：
你 身為 皇太后 ， 呢 啲 武功 喺 邊度 學翻 嚟 㗎 ？
太后 唔 回答 佢 ， 仍然 竭力 進攻 。
突然 啪啪 啪啪 四下 清脆 嘅 聲音 ， 顯然 係 太后 塊面 畀 白衣 尼打 咗 四巴 。
跟 住 佢 吖 噉 一聲 ， 跟 住 嘭 噉 一響 ， 即刻 間房 就 冇 晒 聲 嘞 。
喺 黑暗 之中 火光 一閃 ， 白衣 尼 手上 已經 揸 住 一條 點着 咗 嘅 火 折 ， 太后 呢 就 直 篤篤 噉 跪 喺 佢 面前 逳 都 唔 逳。
嘩 韋小寶 啊 歡喜 咯 佢 諗 ： 今日 非殺 咗 老舉 乸 不可 喇 。
只見 白衣 尼將 火折 輕輕 向上 一 拋 ， 火折 飛 起 幾尺 高 ， 跟 住 左手 衫袖 揮 出去 。
嗰 條 火 折 畀 衫袖 鼓起 嘅 風 一 送 就 慢慢 飛去 蠟燭 嗰 度 ， 竟然 將 四支 蠟燭 ， 逐 支點 着 咗 ， 就 好似 有 一隻 無形 嘅 手 喺 空中 揸 住 一樣 。
白衣 尼 衫袖 向 裏 便 一 擪， 一股 吸力 將火折 吸翻 轉頭 ， 用 右手 接 住 ， 吹熄 佢 收埋 喺 身邊 。
將 韋小寶 睇 到 啊 擘 大個 口 ， 佩服 到 五體投地 啊 。
太后 畀 佢 點中 穴道 跪 喺 地下 ， 嗰 塊 面 啊 ， 一陣 茄瓜 噉 色 ， 一陣 呢 又 好似 白紙 咁 白 ， 佢 低聲 話 ：
你 快 啲 將我 殺 咗 啦 ， 噉 樣 折磨 人 ， 唔 係 高手 嘅 所 為 啊 。
白衣 尼話 ： 你 一身 蛇島 武功 ， 噉 就 奇怪 喇 。
一個 深 宮裏 便 嘅 貴人 ， 點解 會同 神龍教 拉上 關係 呢 ？
韋小寶 好 驚奇 啊 佢 諗 呢 位 師 太 無 事 不知 ， 嗯 以後 對 佢 講 大話 要 打醒 十二分 精神 至 得 。
太后 話 ： 我 唔 知道 神龍教 係 乜嘢 。
我 呢 啲 粗淺 功夫 ， 係 宮內 一個 太監 教 嘅 。
白衣 尼話 ： 太監 ？ 宮內 嘅 太監 ， 點 會同 神龍教 有關 啊 ？
佢 叫做 咩 嘢 名 啊 ？
佢 叫做 海大富 ， 早就 死 咗 喇 。
韋小寶 喺 個 肚裏 便 哈哈大笑 佢 諗 ：
嗰 個 老 舉 乸 亂 噏 無 為 啦 。
如果 佢 知道 我匿 埋 喺 呢 處 啊 ， 就 唔 敢車 呢 個 大炮 喇 。
白衣 尼 沉吟 一下 話 ：
海大富 ， 冇 聽過 呢 個人 喇 ？
你 先頭 向 我連 拍七掌 ， 掌力 陰沉 ， 嗰 啲 叫做 咩 嘢 掌法 呢 ？
太后 話 ： 我 師父 講 ， 呢 啲 係 武當派 功夫 ， 叫做 ， 叫做 柔雲掌 。
唔 係 ， 呢 啲 係 化骨綿 掌 。
武當派 名門 正派 ， 點會 有 呢種 咁 陰毒 嘅 功夫 呢 ？
師太講 得 啱 ， 柔雲掌 係 我 師父 講 嘅 ， 我 ， 我 唔 知道 啊 。
佢 見 白衣 尼 武功 精深 見聞廣博 ， 個心 就 越 嚟 越 敬畏 佢 ， 言語 之間 就 越加 客氣 嘞 。
白衣 尼話 ： 你 用 呢 路 掌法 打死 過 幾多 人 呢 ？
太后 話 ： 我 ， 晚輩 生長 喺 深宮 ， 練武 只 係 為 咗 強身健體 ， 從來 冇 殺過 一個 人 啊 。
韋小寶 諗 ： 唔 要面 ， 亂 咁 噏 。
太后 又 話 ： 師太明 鑑 ， 晚輩 有人 保護 ， 一生 之中 從來 冇 同 人 打 過 交 嘅 ， 今晚 遇到 師太 係 第一次 唧 。
晚輩 所學 嘅 武功 ， 原來 一 啲 都 冇 用 嘅 。
白衣 尼 微微一笑 話 ： 你 嘅 武功 ， 算 得 係 好 唔 錯 㗎 喇 。
太后 話 ： 晚輩 係 井底之蛙 ， 今日 如果 唔 係 見到 師 太 嘅 絕世 神功 ， 點 知道 天地 之大 呢 ？
嗯 ， 嗰 個 太監 海大富 幾時 死 㗎 ？ 係 邊個 殺 咗 佢 嘅 呢 ？
佢 ， 佢 死 咗 好多年 喇 ， 係 年老 病死 嘅 。
你 自己 雖然 冇 作惡 ， 但 係 你 哋 清廷 佔 咗 我 大明 江山 ， 逼死 我 大明 天子 ；
你 係 第一個 清代 皇帝 嘅 妻子 ， 又 係 第二個 皇帝 嘅 母親 ， 唔 能夠 留 你 喺 世上 。
嚇 到 太后 大驚 啊 佢 話 ： 師 ， 師太 ， 當今 皇帝 唔 係 晚輩 生 嘅 。
佢 嘅 親生 母親 係 孝 康皇后 ， 早就 死 咗 嘞 。
原來 係 噉 嘅 。
但 係 你 身為 順治 嘅 妻子 ， 佢 殘殺 我 哋 千千萬萬 漢人 百姓 ， 何以 你 一句 説 話 都 唔 勸 下 佢 呢 ？
師太明 鑑 ， 先帝 只 係 寵愛 嗰 個 狐狸精 董鄂妃 ， 晚輩 當年 要 見 下 先帝 一面 都 好 難 ， 實在 係 無從 勸起 啊 。
白衣 尼 沉吟 咗 一陣 就 話 ： 你 講 嘅 説 話 亦 不無道理 。
今日 我 唔 殺 你 。
太后 話 ： 多謝 師太不殺 之恩 ， 晚輩 今後 必定 日日 誦經 念佛 。
嗰 ， 嗰 部 佛經 請 師太賜 還 畀 晚輩 啦 。
呢 部 四十二章 經 ， 你 要 嚟 有 咩 嘢 用 啊 ？
晚輩 誠心 禮佛 ， 今後 有生之年 ， 日日夜夜 都 要念經 啊 。
四十二章 經 係 非常 尋常 嘅 經書 啫 ， 無論 邊 一間 廟宇 寺院 裏 便 都 有 十部 八部 嘅 ， 何以 你 非 要 呢 部 不可 呢 ？
師太 有所不知 。
呢 部 經書 係 先帝 當年 日夜 誦讀 嘅 ， 晚輩 不 忘 舊情 ， 對經 如 對 先帝 啊 。
噉 就 唔 啱 嘞 。
誦經 禮佛 嘅 時候 ， 需要 心 內 一片 空明 ， 唔 好 有 啲 多 情緣 牽掛 嘅 。
你 一 便念經 ， 一便 想 住 死去 嘅 丈夫 ， 噉 仲有 咩 用 呢 ？
多謝 師太 指點 。
只 係 ， 只 係 晚輩 愚鈍 ， 解脱 唔 開 啊 。
白衣 尼 雙眼 裏 便 突然 間 神光 一現 ， 佢 問 ：
到底 呢 部 經書 裏 便 有 咩 古怪 ？ 你 同 我 老實 講 。
太后 話 ： 實在 ， 實在 係 晚輩 一片癡心 。
先帝 雖然 對待 晚輩 唔 好 ， 不過 我 始終 冇 法子 忘記 佢 ， 每日 見到 呢 部 經書 亦 可以 稍慰 思念 之苦 㗎 。
唉 ， 你 既然 執迷不悟 唔 肯 老實 講出 嚟 ， 噉 亦 由 得 你 啦 。
白衣 尼 左手 衫袖 一揮 ， 袖 尖 喺 佢 身上 一拂 ， 佢 被 點 嘅 穴道 當堂 解開 翻 。
太后 話 ： 多謝 師太 慈悲 。
叩 咗 個頭 企翻 起身 嘞 。
白衣 尼話 ： 我 亦 冇 咩 嘢 慈悲 。
你 啲 化骨綿 掌 打 喺 別人 嘅 身上 會點 㗎 ？
嗰 個 太監 冇 同 我 講過 ， 只 係 話 呢 路 掌法 好 使得 嘅 ， 天下 冇 幾多 個人 能夠 抵擋 得 住 。
嗯 ， 先頭 你 向 我 拍 咗 七掌 ， 我亦並 冇 抵擋 ， 只 係 將 你 嗰 七 掌 化骨綿 掌 嘅 掌 力 ，冚𠾴唥 送 翻 轉頭 ， 喺 邊 處 嚟 ， 就 返去 邊處 。
呢 啲 掌 力 喺 你 身上 發出 嚟 嘅 ， 就 返 翻 你 嘅 身上 。
呢 個 惡業 係 你 自己 做 嘅 ， 自作自受 ， 唔 怪 得 人 哋 。
哎呀 ， 嚇 到 太后 魂飛天外 啊 。
佢 當然 知道 化骨綿 掌 嘅 厲害 啦 ， 中 咗 掌力之 後 ， 全身 骨骼 酥化 ， 一寸 寸 噉 斷 ， 終於 周身 軟綿綿 ， 將遞 高 隻 手指 尾 都 唔 得 。
當年 佢 用 化骨綿 掌 拍 死 董鄂妃 兩 姊妹 ， 同 董鄂妃 個 仔 榮親王 ， 三個 人 臨死 嗰 陣 嗰 啲 慘狀 ， 自己 係 親眼 睇 住 㗎 。
呢 個 白衣 尼 武功 咁 使得 ， 將 敵人 掌力 逼 翻 去 敵人 身上 ， 亦 係 武學上 時常 有 嘅 ， 佢 噉 樣 講 ， 唔 會 係 虛假 嘅 ， 噉 就 等於 有人 將七掌 化骨綿 掌 拍 喺 自己 身上 咯 噃。
啱 先 出手 嘅 時候 ， 唯恐 唔 夠狠 ， 真 係 竭盡 平生 之力 ， 一掌唧 ， 就 已經 頂 唔 住 咯 ， 何況 連拍七掌 呢 ？
霎時之間 驚 到極點 啊 ， 啪 聲 跪 咗 喺 地 ， 大叫 話 ： 師太 救命 啊 ！
白衣 尼 歎 咗 口氣 話 ： 唉 ， 業由 自 作 ， 須當 自解 ， 人 哋 係 無能 為 力 嘅 。
太后 叩頭 話 ： 希望 師太 大發慈悲 ， 指點 一條 明 路 啊 。
你 事事 都 隱瞞 ， 唔 肯 老實 講出 嚟 。
明 路 好 地 地 擺 喺 你 眼前 ， 你 自己 偏偏 唔 願 走 ， 又 怨 得 邊個 呢 ？
我 縱 有 慈悲 之心 ， 亦 送 畀 我 哋 漢人 同胞 啦 。
你 係 滿奴 ， 同 我 有 深仇大恨 ， 今日 唔 親手 攞 你 條 命 已經 係 慈悲 到極 喇 。
講完 就 企 起身 。
太后 知道 時機 稍縱即逝 ， 呢 個人 一走 ， 自己 幾日 之內 就 會 死 得慘 不堪 言 。
董鄂妃 兩 姊妹 臨死 嘅 時候 痛楚 萬狀 ， 典 嚟 典 去 嘅 情景 ， 霎時之間 都 出現 喺 眼前 ， 不由得 全身 發抖 佢 話 ：
師 ， 師太 ， 我 唔 係 滿人 啊 ， 我 係 ， 我 係 。
白衣 尼問 ： 你 係 乜嘢 啊 ？
我 係 ， 我 係 ， 我 係 漢人 啊 。
嗱 各位 ， 欲知 后事 如何 ， 且 听 下回分解 。
