前文 再續 啊 書 接 上 一回 啊 。
話說 嗰個 綠衫 女郎 突然之間 跳起身 ，雙拳 直上直下 ，狂揮亂打 ，兩腳 就 亂咁 踢 ，完全 不成章法 嘅 。
睇到 澄觀 非常之 奇怪 大聲 叫話 ：
吖呀 ，古怪 ，真係 奇喇 ，吓 ？唔明白 ，唔明白 ，哎呀怪啊 ，怪啊 ！
只見 嗰個 女郎 每一招 都係 見所未見 嘅 ，偶然 有 幾招 同 某啲 門派 中 嘅 招式 相似 ，不過 亦係 小 同 大 異 似是而非 。
一時之間 ，頭腦 混亂 不堪啊 ，只覺得 幾十年 勤修苦練 嘅 武學 ，突然間 冚𠾴唥 都 變咗樣 。
一切 奉為 天經地義 金科玉律 嘅 規則 ，霎時間 全部 破壞 無為 啊 。
嗰個 女郎 出手 越 亂 ，澄觀 就 越 覺得 迷惑 。
韋小寶 見到 嗰個 女郎 亂咁 出手 ，澄觀 呢 ，卻 係 一本正經 噉 定晒神 喺度 鑽研 ，忍唔住 咭咭聲 噉 笑起上嚟 。
點知 一笑 ，牽動咗 傷口 非常之 痛 ，噉啊 只有 咬住 牙關 忍住 啦 ，一時 又 痛 又 好笑 嗨 真係 難頂 嘞 。
澄觀 正喺度 惶惑失措 ，忽然 聽到 韋小寶 笑 ，當堂 面紅耳赤 。
噉嗰個女郎 亂打咗 好耐 ，手腳 酸軟 ，突然間 個身 一晃 ，就 扽咗 喺地 嘞 。
澄觀 大吃一驚 啊 佢 諗 ：
聽講 ，武功 練到 極高境界 ，坐喺 地下 就 可以 隔遠 出手 傷人 ，只怕 ，只怕 。
頭腦 本來 一片 混亂 嘞 ，而家 一急 ，啲 血 一沖 ，當堂 就 暈咗 坐咗 喺 地 。
嗰個 女郎 見到 又 驚 又 喜 ，但係 又 怕 佢 兩個 人 安排 落 咩 毒辣 詭計 ，就 唔 敢 去 殺 佢 兩個 ，一起身 就 衝 出 禪房 嘞 。
般若堂班和尚 ，忽然間 見到 一個 少女 向外 猛咁 跑 都 好 驚奇 啊 ，但係 未 得到 尊長 號令 ，邊個 都 唔 敢 上去 攔阻 佢 。
韋小寶 瞓 喺 鋪床處 ，只有 擘大眼 睇住 佢 走 係啦 。
過咗 好耐 ，澄觀 醒嘞 ，佢 滿面 羞慚 話 ：
師叔 ， 我 ， 我 實在 愧對 本 寺 嘅 列祖列宗 啊 。
韋小寶 苦笑住 話 ：唉 你 到底 想咗 去 邊處 唧 ？
呢位 女施主 武功 精妙 ，師侄 一招 都 識唔到 ，孤陋寡聞 實在 慚愧之至 。
哦 我 想 畀 心機 記住 嗰個 女郎 嘅 招式 啦 ，但係 佢 招數 變幻 無方 ，冇 到 脈絡 可以 依循 嘅 ，啊 邊度 記得住 呢 ？唉 。
佢 搖 下 搖下 企翻 起身 ，扶住 埲墻 又 想 暈 嘞 。
韋小寶 笑住 話 ：你 誒 ，你話 佢 噉樣 亂打 一輪 ，亦係 精妙 武功 啊 ？
哈哈 ， 哎呀 哎呀 ， 哎 ， 哎 ， 真 係 ， 哎 哈哈哈 ， 哎呀 哎 ， 哎 真 係 笑 死 我 喇 。
師叔 話 佢 係 ， 誒 亂打 一輪 ， 唔 ， 唔 係 精妙 武功 啊 ？
韋小寶 揞住 傷口 竭力 忍住 笑 ，額頭 啲 汗 啊 一粒粒 滲出嚟 ，不停 咁 咳 佢 話 ：
呢 啲 係 天下 每個 細佬哥 ， 細佬哥 都 ， 都 會 㗎 啦 ， 哈 哎呀 ， 哎呀 ， 哎呀 ， 哎呀 笑 死 我 喇 。
澄觀 唞咗 個 大氣 ，個心 呢 仲 喺度 將信將疑 噃 ，不過 呢 有翻啲 笑容 喇 佢 話 ：
師叔 ，佢 真係 亂打 一輪 㗎 咋 ？點解 我 從來 未 見過 嘅 呢 ？
韋小寶 笑住 話 ：少林寺 裏 便 ，當然 係 冇 啲 噉 嘅 功夫 啦 。
澄觀 擔 高頭 諗咗 好耐 ，突然 拍下 大髀 話 ：冇錯喇 。
呢 位女 施主 呢 啲 拳腳 雖然 係 奇特 啊 ， 其實 係 好容易 破解 㗎 啫 ， 只要 用 少林 長拳 最 粗淺 嘅 招式 就 可以 取勝 㗎 嘞 。
只不過 ， 不過 呢 位女 施主 點解 要 喺 呢 處 施展 呢 ？ 呢 啲 招式 似乎 不登大雅之堂 㗎 噃。
韋小寶 笑住 話 ：我 睇 亦 冇 咩 奇怪 ，佢 使唔出 咩 新招 咯 ，就 只有 亂咁 打 啦 。
唉 ，哈哈哈 ，哈哎呀哎呀哎 ，哎呀 哈哈哈哈 。
忍唔住 又 大笑 起嚟 喇 。
話 説 韋小寶 受 嘅 刀傷 啊 好 輕 ， 噉 啊 少林寺 嘅 金瘡 藥又極 之靈 擎 嘅 ， 休息 咗 十幾日 就 嘞 。
佢 係 當今 皇帝 嘅 替身 ，喺 寺 裏 便 地位 尊崇 咁 邊個 都 唔 敢 問 佢 嘅 事 。
而且 呢件事 呢 又 唔係 人人 都 知 嘅 ，只要 佢 自己 唔 講 ，人哋 就 唔 知 㗎 嘞 。
佢 養傷 嘅 時候 ，澄觀 將 兩個 女郎 所 使 嘅 各種 招式 ，逐樣 都 寫 清楚 ，又 諗出 破解 嘅 法子 ，一等 韋小寶 個 傷 好翻 喇 ，就 一招一式 噉 教 佢 。
澄觀 所教 嘅 雖然 係 難 啊 ，但係 大致 以 拈花擒拿手 為 主 。
拈花擒拿手 係 少林派 嘅 高深 武學 ，純粹 係 以 渾厚 內力 為 基礎 ，出手 平淡 文雅 完全 冇 到 霸氣 嘅 。
韋小寶 完全 冇 內力 根基 ， 而 嗰 兩個 女郎 呢 ， 亦 係 全 無 耐力 ， 所以 韋小寶 用 拈花 擒拿 手 嚟 對付 佢 哋 呢 都 用得上 嘅 。
韋小寶 當日 向 海大富 學 武功 ，噉 由於 有人 監督 ，兼之 即學即用 ，總算 學到 一啲 ；
以後 陳近南 將 武功 圖譜 傳 畀 佢 ， 佢 只 係 學 咗 幾次 ， 就 怕 難 唔 學喇 。
噉啊 至於 洪教主 夫婦 教 佢 嘅 救命 六招 啊 ，亦 只係 馬馬虎虎 噉 學 個 大概 ，離開 神龍島 之後 呢 就 冇 再 練習 嘞 。
不過 呢次 練武 啊 ，係 為咗 要 捉 嗰個 綠衫 女郎 嚟 做 老婆 。
自己 做唔成 佢 嘅 老公 就要 上 刀山 落 油鑊 ，死咗 之後 身 入 十八層 地獄 ，呢件事 係 非同小可 噃 。
故此 學 嘅 時候 呢 居然 十分 用心 ，一招一式 ，同 澄觀 拆解 試演 。
不過 學咗 幾日 ，又 懶起嚟 喇 ，佢 忽然 想起 雙兒 ：
吖 呢個 小丫鬟 武功 唔 弱 ，大可以 對付 呢 兩個 姑娘 吖 。
我 叫 雙兒 喺 身邊 保駕 就 得嘞 ，唔使 自己 學 武功 嘅 。
佢 轉念 又 諗 ： 我 自己 靠 本事 捉住 嗰 綠衣 姑娘 ， 錫 下 佢 嘅 面 珠 噉 先 至 夠 味道 㗎 。
叫 雙兒 點咗 佢 穴道 ，我 再 去 錫 佢 ，咪 太過 冇種 ，綠衣 姑娘 就 更加 睇 我 唔起 嘞 。
而且 叫 雙兒 做 呢種 事 ，噉 佢 就算 聽話 ，個 心 一定 會 好 難過 嘅 ，我 亦 唔能夠 太過 對 佢 唔住 㗎 。
就算 兩個 人 嘅 面 珠 我 都 錫 ， 公平交易 ， 噉 佢 兩個 人 必定 都 唔 鐘意 嘅 。
噉啊 終於 強打 精神 又 學 招式 嘞 。
呢日 澄觀 對 韋小寶 話 ：
師叔 ，你 咁 畀心機 學 呢種 武功 ，其實 ，誒 其實 係 冇 咩 嘢 用處 嘅 。
你 噉 樣 捉住 我 ， 如果 我 內力 一吐 啊 ， 你 嘅 手腕 ， 誒 你 嘅 手腕 就 會 ， 誒 就 會 噉 啊 。
韋小寶 笑住 話 ：我 個 手腕 就 會 咔 一 聲 ，斷 之 哀哉 喇 係咪 啊 ？
師叔 唔使 擔心 ，我 決唔會 對 你 使 內力 嘅 ，誒 師侄 點 都 唔 敢 。
不過 照 師侄 睇 呢 ，仲係 從頭 由 少林 長拳 學起 ，循序漸進 先至 係 正途 嘅 。
噉 我哋 而家 練 嘅 招式 點解 唔係 正途 唧 ？
呢啲 招式 冇 內功 做 根基 ，一 遇到 高手 ，唔理 你 變化 幾咁 巧妙 啊 都 難免 一敗塗地 㗎 。
只有 對付 嗰 兩位 女施主 先至 有用 㗎啫 。
噉咪就啱囉 ，我 就要 學嚟 對付 呢位 女施主 嘅 。
噉 ，誒噉 如果 今後 師叔 再 遇唔到 嗰 兩位 女施主 嘞 ，呢番 功夫 心血 ，豈唔係 白白 嘥咗 ？
而且 又 耽誤咗 正經 練功 嘅 時候 添 。
我 如果 遇唔到 呢位 女施主 ，噉 就 非 死 不可 咯 ，練咗 正經 功夫 又 有 咩 用 啊 ？
澄觀 講 嘅 係 嗰 兩位 女 施主 ， 韋小寶 講 嘅 呢 ， 係 呢 位女 施主 。
澄觀 更加 奇怪 喇 佢 問 ：
師叔 係 唔 係 中 咗 嗰 位 女 施主 嘅 毒 ， 所以 就 非 搵 佢 嚟 攞 解藥 不可 啊 ？
如果唔係 ，就會 性命 難保 嘅 嘞 係唔係 啊 ？
係 啊 ， 係 啊 ， 我 中 咗 佢 嘅 毒 啊 。
呢 啲 毒 啊 ， 入 咗 五臟六腑 全身 骨髓 ， 唔 係 佢 本人 都 解 唔 到 㗎 。
啊 ，本寺 澄照 師弟 善於 解毒 ，我 去 請 佢 嚟 幫 師叔 你 睇下 。
韋小寶 忍住 笑話 ： 唔 使 喇 唔 使 喇 ， 我 中 嘅 係 慢性 毒 ， 只有 佢 本人 先至 係 解藥 ， 其他 嘅 人 ， 邊個 都 冇 用 嘅 。
澄照 老和尚 啊 更加 冇用 啦 。
哦 ，原來 只有 佢 本人 先至 有 解藥 嘅 。
韋小寶 講 ，只有 佢 本人 先至 係 解藥 ，澄觀 呢 就 以為 只有 佢 本人 先至 有 解藥 ，一字 之 差 ，意思 就 大不相同 喇 。
呢一日 ，韋小寶 同 澄觀 正 喺 禪房 裏 便 談論 兩個 女仔 嘅 刀法 。
般若堂 有 個 執事 僧 嚟到 門外 話 ：
方丈大師 有 請 師叔祖 同 師伯 ，請去 大殿 傾談 啊 。
兩個人 去到 大雄寶殿 ，只見 大殿 裏 便 有 幾十名 外客 ，方丈 晦聰 禪師 ，坐 喺 下首 便 陪 佢哋 。
上首 便 坐住 三個人 。
第一個 ，係 身穿 蒙古服裝 嘅 貴人 ，二十幾歲 ；
第二個 係 個 中年 喇嘛 ，身材 乾䋫䋫 ，又 矮 又 瘦 又 黑 ；
第三個 係 個 軍官 ，着住 總兵 服裝 ，約莫 四十 幾歲 。
企喺 呢 三個 人 身後 嗰 幾十個 人 當中 ，有 啲 係 武官 ，有 啲 係 喇嘛 ，另外 有 十幾 人 着住 平民 服裝 ，個個 都 係 相貌 健悍 身負 武功 。
晦聰方丈 見 韋小寶 入嚟 ，就 企起身 話 ：師弟 ，貴客 降臨 本寺 啊 。
呢位 係 蒙古 葛爾丹 王子 殿下 ；
呢位 係 西藏 大喇嘛 ，昌齊 大法師 ；
呢位 係 雲南 平西王 麾下 總兵 ，馬寶馬 大人 。
又 對住 三個人 話 ：呢位 係 老衲 嘅 師弟 晦明 禪師 啊 。
眾人 見到 韋小寶 年紀 細小 ，神情 狡猾 ，吖 居然 係 少林寺 裏 便 同 方丈 並肩 嘅 禪師 ，都 覺得 好奇怪 。
葛爾丹王子 忍唔住 笑出聲 嘞 佢 話 ：
呢位 小高僧 真係 小得 有趣 ，哈 ，古怪 ，古怪 。
韋小寶 合十 話 ：阿彌陀佛 ，呢位 大王子 真係 大得 滑稽 ，嘻 ，稀奇 ，稀奇 。
我 有 咩 滑稽 稀奇 啊 ？
小僧 有 咩 有趣 古怪 ，殿下 就 有 咩 滑稽 稀奇 喇 ，難兄難弟 ，彼此彼此 ，請 ，請 。
講完 ，就 喺 晦聰 方丈 嘅 下首 便 坐低 。
澄觀 啊 企喺 佢 身後 。
大家 聽咗 韋小寶 嘅 説話 ，見 佢 莫測高深 ，心裏 便 都 覺得 有啲 奇怪 嘞 。
晦聰方丈話 ：三位 貴人 降臨 寒寺 ，唔知 有何 見教 呢 ？
昌齊喇嘛話 ：我哋 三個人 喺 路上 偶然 相遇 ，言談之下 ，都 話 少林寺 係 中原 武學 泰山北斗 ，非常 仰慕 。
我哋 三個人 都 僻處 邊地 ，見聞 鄙陋 ，因此 一齊 嚟到 寶寺 瞻仰 ，得見 高僧 尊范 不勝 榮幸 啊 。
佢 雖然 係 西藏 喇嘛 ，不過 一口 北京 官話 講得 非常之 好 ，清脆 明亮 ，吐屬 文雅 。
晦聰話 ：唔敢當 。
蒙古 、西藏 、雲南 三地 ，素來 佛法 昌盛 。
三位 久受 佛法 光照 ，一定 係 智慧 明澈 ，希望 多加 指點 啊 。
昌齊喇嘛 講 嘅 係 武學 ，晦聰方丈 講 嘅 呢 卻係 佛法 。
少林寺 雖 以 武功 聞名 天下 啊 ，但係 寺 裏 便 嘅 高僧 個個 都 以 勤修佛法 係 正途 ，向來 都 係 將 武學 當做 護持 佛法 嘅 末節 嘅 啫 。
葛爾丹話 ：聽講 少林寺 歷代 相傳 ，總共有 七十二 門 絕技 ，威震天下 少有 匹敵 嘅 。
方丈大師 可唔可以 請 貴寺 眾位 高僧 逐樣 試演 ，等 小王 等一 開眼界 呢 ？
晦聰話 ：殿下 ，江湖上 傳聞 不足 憑信 。
敝 寺 僧侶 勤 修參禪 ， 以求 正覺 ， 雖然 ， 亦 有人 得閒 習練 武功 ， 亦 只 係 強身健體 而已 ， 區區 小技 ， 不足掛齒 啊 。
葛爾丹話 ：方丈 ，你 噉 就 太過 唔得 光明磊落 咯 。
你 試演 一下 呢 七十二項 絕技 ，我哋 亦 不過 係 睇睇 而已 啫 ，又 偷學 唔到 去 嘅 ，何必 咁 小氣 呢 ？
晦聰 微微 一笑話 ：三位 如果 肯 闡明 禪理 ，講論 佛法 ，老僧 一定 召集 僧眾 ，恭聽 教益 。
至於 武功 呢啲 嘢 ，本寺 一向 有 規矩 ，卻 唔敢 妄自 向外來 嘅 施主 班 門弄斧 嘅 。
葛爾丹 雙眉 一挺 ，大聲 話 ：噉樣 講 ，少林寺 乃係 浪得虛名 。
寺裏 便 嘅 僧侶 嘅 武功 狗屁不如 ，一錢不值 咯 。
晦聰微笑話 ：人生在世 ，本來就係 虛妄 ，本來就 狗屁不如 ，一錢不值 。
五藴皆空 ，色身 已經 係 空嘅 ，名聲 ，更加 係 身外之物 。
殿下 話 敝寺 浪得虛名 ，噉 亦 講得 啱 。
葛爾丹 啊 估唔到 呢個 老和尚 竟然 半分 火氣 都 冇 ，企起身 哈哈大笑 ，指住 韋小寶 話 ：
哈哈哈哈哈哈哈哈 ，小和尚 ，你亦係 狗屁不如 ，一錢不值 嘅 人 咩 ？吓 ？哈哈哈哈哈 。
韋小寶 啊 笑咗 一笑 ，佢 話 ：大王子 當然 係 叻過 小和尚 喇 。
小和尚 確實 係 狗屁不如 ，一錢不值 。
大王子 呢 卻 係 有如 狗屁 一樣 ， 值得 一文錢 啊 ， 噉 就 叫做 勝過 一籌 喇 。
企喺處嗰班人之中 ，即時 有 幾個人 笑起上嚟 。
葛爾丹 好嬲啊 ，忍唔住 就要 離座 動武 。
不過 佢 跟住 諗 ：呢個 小和尚 喺 少林寺 裏 便 輩分 好 高 ，怕 真係 有 啲 古怪 嘅 。
佢 㗾㗾聲 咁 喘氣 ，夾硬 將 自己 嘅 火氣 撳住 。
韋小寶 話 ：殿下 唔使 嬲 嘅 ，須知 世上 最臭 嘅 嘢 呢 就 唔係 狗屁 ，而係 説話 噃 。
有啲人 講 啲 説話 出嚟 ，臭氣沖天 ，好似 ，誒 好似 ，嘿嘿 ，都唔使 講 咁多 喇 。
至於 一錢不值 呢 ，仲唔係 最賤 噃 ，最賤嘅 呢 ，乃係 欠咗 人哋 幾千萬 、幾百萬 兩 銀 ，抵賴 唔還 。
殿下 有冇 虧欠 呢 ，自己 心中 有數 啦 。
葛爾丹 啊 擘 大 個 口 愕然 喇 ，一時 都 唔知 點樣 回答 佢 。
晦聰方丈話 ：師弟嘅説話 ，禪機淵深 ，佩服 ，佩服 。
世事 因果 報應 ，有 因 必 有果 。
做咗惡事 ，就 必有 惡果 。
一錢不值 ，亦不過係 無善無惡 啫 ，比起 欠落 無數 孽債 又好得多 咯 。
澄觀聽方丈噉樣一解釋 ，亦都明白喇 ，佢亦好歡喜噉話 ：
晦明 師叔 年少 有德 ，妙悟 至理 。
老衲 跟住 佢 老人家 學咗 幾個月 ，近來 參禪 ，腦筋 都 似乎 開通咗 好多 啊 。
一個 和尚仔 胡言亂語 ，兩個 老和尚 呢 就 隨聲附和 ，真係 好似 同 葛爾丹 有意過 唔去 噉 。
葛爾丹 滿面 通紅 ，突然間 啪聲 一跳 ，向住 韋小寶 撲過去 。
噉賓主雙方 打對面坐 ，隔開 二丈幾遠嘅 ，但係 佢 身手敏捷 ，一撲就到喇 ，兩隻手 成爪狀 ，一抓面門就 一抓前胸 。
手爪 都 未 到 ，一股 勁風 已經 將 佢 全身 罩住 嘞 。
韋小寶 就算 想 抵擋 啊 ，已經 毫無 施展 餘地 ，噉咪 只有 束手待斃 。
説時遲那時快 ，只見 晦聰 方丈 右便 衫袖 輕輕 拂 出去 ，擋住 葛爾丹 前便 。
葛爾丹 一股 猛勁 同 佢 衫袖 一撞 ，只覺得 心口 氣血 翻湧 ，就好似 撞 喺 一埲 棉花 做 面 、鋼鐵 做 芯 嘅 厚 墻 上 便 一樣 ，身 不自主 噉 急退 三步 。
想話出力企定啦 ，吖竟然 企唔住腳 ，又退咗三步 。
當其時 撞嚟 嘅 力 已經 消失 嘞 ，不過 霎時 之間 ，自己 全身 力量 ，竟然 亦 已經 無影無蹤 。
哎呀 佢 大吃一驚 ，雙腳 一軟 ，成個 坐低 佢 諗 ：弊 ，呢次 出醜 嘞 。
啱啱 係 噉 諗唧 ，覺得 個 屁股 碰到 硬板 ，原來 已經 坐翻 喺 自己 嗰 張 椅 處 。
晦聰 方丈 堂衫袖 呢 一拂 嘅 力量 ，輕柔 渾和 ，絕冇 半點 霸氣 。
對於 對方 撞過嚟 嘅 力度 ，頃刻之間 ，就 估計得 非常 準確 ，啱啱好 將 佢 彈翻 原來 嗰張 椅 處 。
力量 用得 稍為 重啲 ，葛爾丹 呢 必定 坐 裂 張 木椅 之後 ，向 後 𢴈低 。
力量 用 得 輕 啲 ， 佢 未 到 張 椅 ， 就 已經 坐低 嘞 ， 噉 就 不免 坐 喺 地下 ， 哈 ， 真 係 使得 啊 。
韋小寶 都 驚魂未定 ，晦聰 已經 擰轉頭 對 佢 話 ：
師弟 ，你 定力 真係 高強 嘞 。
你 年紀 輕輕 ，禪定 修為 ，竟然 已經 達到 時時 無心 、刻刻 不動 嘅 極高 境界 ，實在 係 宿根 深厚 ，大智 大慧 啊 。
澄觀 更加 佩服 到 五體投地 嘞 ，佢 話 ：
金剛經 有云 ： 無 我 相 ， 無人 相 ， 無眾 生相 ， 無 壽者 相 。
晦明師叔 竟然 已經 修到 呢個 境界 ，第日 必定 得證 阿褥多羅三藐三菩提 嘅 。
葛爾丹 本來 怒不可遏 㗎 嘞 ，聽 呢個 老和尚 又 嚟 大讚 呢個 小和尚 ，即刻 就 大叫 ：
哈里斯巴兒 ，尼馬哄 ，加奴比丁兒 ！
佢 身後 嘅 武士 突然間 手臂 一揚 ，黃光 連閃 ，九 支 金鏢 分別 打 晦聰 、澄觀 、韋小寶 三 個 人 嘅 心口 。
噉啊 雙方 距離 好 近 ，韋小寶 佢哋 呢 又 唔識 葛爾丹 喝令 發鏢 嘅 蒙古話 ，猝不及防 ，九 支 鏢 ，已經 嚟到 胸前 嘞 。
晦聰 同 澄觀 同時 叫 一 聲 ：哎吖 ！
晦聰 仍然 係 使 佢 嘅 破衲功 ，衫袖 一 掩 ，已經 將 三 支 金鏢 捲住 。
澄觀 就 雙掌 一合 ，使 一招 敬禮 三寶 ，將 三支 金鏢 都 合 喺 手掌 裏 便 。
射向 韋小寶 嗰 三支 金鏢 呢 ，啪啪啪 三聲 ，都 打正 佢 心口 。
嗱 各位 ，欲知 後事 如何 ，且 聽 下回 分解 。
