前文 再續 啊 書 接 上 一回 啊 。
話説 第 日 一 早 ，韋小寶 啱啱 起身 ，只 聽見 吹起 號角 ，好多人 喺 門外 大聲 噉 叫 ：
白龍 門 座下 弟子 ，恭送 掌門 使 出征 ，為 教主 忠心 做事 。
跟住 響起 鑼鼓 音樂 。
韋小寶 即刻 出去 門口 ，只見 門外 有 三四百人 排住 隊 ，全部 着 白色 衣服 嘅 ，有 老 有 嫩 。
一見到佢出嚟 ，就齊聲高呼 ：掌門 使 旗 開得勝 ，馬到成功 ！
喺 後便 ，有 幾十名 青衣 教眾 ，係 嚟 送 代 掌門 使 肥頭陀 嘅 。
韋小寶 覺得 好威啊 ，當堂 精神 振奮 ，帶埋 肥頭陀 、陸高軒 兩個人 就 去 上船 嘞 。
當佢 正在 同 嚟 送行 嘅 無根 道人 、張 淡月 、殷 錦 等 人 行禮 分別 嘅 時候 ，忽然 有 兩 騎馬 跑到 嚟 船邊 。
馬上 兩個人 都 係 身穿 白衣 嘅 ，竟然 係 方怡 同 沐劍屏 。
韋小寶 歡喜 到 極 啦 個 心 嘭嘭 咁 跳 ，佢 諗 ：
唔通 夫人 回心轉意 ，又 放 佢哋 同 我 一齊 返去 ？
只見 方沐 兩個人 翻身 落馬 行 上 幾步 。
方怡 大聲噉話 ：奉 教主 同 夫人 之 命 ，前嚟 相送 白龍 使 出征 啊 。
韋小寶 個 心 一 沉 ：原來 嚟 送行 咋 。
方怡 又 躬身 話 ： 屬下 方怡 、 沐劍屏 ， 奉 夫人 之命 ， 喺 赤 龍門 調歸 白龍門 ， 一齊 奉白龍 使 號令 。
韋小寶 打個 特嘞 ，跟住 就 恍然大悟 佢 諗 ：
原來 你 ，你早就已經 係 神龍教 赤龍門 嘅 屬下 ，一路上 裝腔作勢 ，只係 奉教主之命 呃 我 嚟 神龍島 嘅 。
肥尊者 夾硬 請唔得 ，你 就 嚟 軟請 。
一想到呢度 ，只覺得 周身冇癮 ，本來 係 想 同佢哋兩個 講 幾句 親熱説話 嘅 ，而家 乜都冇興致喇 。
忽然間諗起一件事 ，佢 就 對 陸高軒 話 ：
陸 先生 ，服侍 我 嗰個 小丫鬟 雙兒 ，你 去 叫 人 放出嚟 ，我 要 帶埋 佢 去 啊 。
陸高軒 話 ：誒 。
韋小寶 發惡嘞 ：誒咩嘢誒 ，快啲放 ！
佢 大聲 一 喝 ，陸高軒 啊 竟然 唔 敢 違抗 噃 就 話 ：係 ，係 。
跟住 向 船上 嘅 隨從 吩咐 咗 幾句 ，嗰個人 跳翻 上岸 飛奔 而去 啊 。
過咗冇幾耐 ，就見 兩騎馬 飛快 噉 跑嚟 ，當先 一匹馬 嗰個人 係 雙兒 。
佢 都 唔 等 勒 定 匹 馬 唧 ，叫 一 聲 公子 噉 ，就 喺 鞍 上面 飛身而起 ，輕輕 擎擎 噉 落 喺 船頭 。
喺 無根 道 人 呢 班 高手 眼 內 ，呢手 輕功 亦 唔 算 係 點 了不起 嘅 ，不過 見 佢 年紀 咁 細 ，姿勢 又 咁 好睇 ，所以 都 喝咗 聲 彩 。
初時 韋小寶 見 坐嚟 嗰隻 船 駛走咗 ，好 怕 雙兒 畀 啲 壞人 捉咗 去 ，時時 都 為 佢 擔心 。
知佢 武功 雖然 係 叻啫 ，不過 到底 年紀 輕 ，個人 又 温柔斯文 ，不明 世務 ，喺 海船 上 便 又 冇 埞 好 走 㗎 ，必定 蝕底 嘅 。
及至 見到 方怡 亦 係 神龍教 下 弟子 ，佢 一下 想起 ，自己 坐嚟 神龍島 嗰隻 大船 啊 梗係 神龍教 嘅 。
而家 佢 見到 雙兒 非常 高興 ，咪 拉住 佢 隻 手 。
見佢 神情 憔悴 ，雙眼 又 紅 又 腫 ，顯然 係 喊過 唔少次 㗎 喇 就 問 佢 ：有冇 人 欺負 你 啊 ？
雙兒話 ：冇 ，冇 ，我 只係 掛住 相公 啫嘛 。
佢哋 ，佢哋韞住 我 啊 。
好喇好喇 ，我哋 返去 喇 。
呢度啊 ，好多 毒蛇 㗎 。講完 ，雙兒 又 喊起嚟 。
韋小寶 又 望咗 方怡 一 眼 ，諗起 佢 引 自己 行入 樹林 畀 啲 毒蛇 咬 ，諸多 做作 ，喺 隻 船 上面 種種 甜言蜜語 冚𠾴唥 都 係 虛假 嘅 ，不由得 好 氣憤 啊 ，佢 就 話 ：開船啦 。
船上 嘅 水手 起錨 開船 嘞 。
岸上 燒 響 炮仗 ，送行 啲 人 齊聲 話 ：恭祝 白龍 使 旗 開得勝 ，馬到成功 ，為 教主 立下 大功 。
海船 慢慢 離開 神龍島 嘞 。
岸上 啲人 大聲 噉 呼叫 ：教主 寶訓 ，時刻 在 心 。
開咗 船 之後 ，韋小寶 諗 ：
我 如果 唔 知道 方姑娘 已經 入咗 教 ，我啊 會 時時 都 掛住 佢 嘅 ，不過 而家 噉 都 好 ，一 無 牽掛 啦 。
但係 想到嚟嘅時候 ，方怡 嗰種 柔情蜜意 ，個心 又 不禁 一片 惆悵 嘞 。
佢 諗 ：佢哋 兩個 點解 會 入咗 神龍教 呢 ？真係 奇哉怪也 嘞 。
係喇 ，佢哋 畀 章老三 嗰 班 人 捉咗 去 ，莊少奶 話 託 人 去 救 佢哋 實 係 救唔出嚟 ，於是 就 畀 神龍教 逼 佢哋 入 咗 教 啦 。
小郡主 食咗 教主 嘅 毒藥 ，方姑娘 當然 亦 食咗 嘞 。
嗯 ，方姑娘 如果 唔聽話 ，唔呃 我 去 神龍島 ，噉 佢 亦 要 毒發 身亡 ，噉 佢 係 無可奈何 ，唔能夠 怪得 佢 嘅 。
不過 呢個 衰女 裝模作樣 ，呃 老公 就 唔使 本錢 嘅 ，唔係 好人 。
哈 ，神龍教 到底 做乜嘢 嘅 呢 ？
老子 雖然 做咗 白龍 使 不過 就 完全 糊里糊塗 嘅 。
韋小寶 想到 呢啲事 都係 因為 章老三 而起 ，噉 佢 諗 ：
呢個 老嘢 唔知 係 屬於 咩 嘢 門 嘅 ，老子 將來 如果 返去 神龍島 ，就 將 佢 調嚟 白龍門 ，日日 打 呢個 老嘢 三百 板𦣇柚 。
佢 又 諗 ：章老三 唔知 係咪 喺 島 上 呢 ？
佢 多數 唔敢 稟報 教主 話 我 就係 小桂子 嘅 ，否則 教主 聽 佢 講 已經 捉到 咗 我 呢個 大人物 喇 ，轉手 又 放翻 ，非 殺 佢 嘅 頭 不可 。
佢 係 老嘢 ，唔係 白板仔 ，教主 同 夫人 呢 本來 要 殺 佢 㗎 嘞 ，犯得 噉樣 嘅 錯誤 啊 ，仲有 話 唔殺 佢 十次 八次 咩 ？
冇 錯喇 ，肥頭陀 唔 敢 穿 煲 ，章老三 亦 唔 敢 穿 煲 。
只不過 有 一件事 搞 佢 唔清唧 ，夫人 鐘意 白板仔 就 唔 奇怪 吖 ，哈教主 為咩 亦 鐘意 呢 ？
話説 呢一日 ，大船 到達 秦皇島 ，噉 就 離船 登岸 到咗 北京 。
韋小寶話 ：我要 想法子 混入 去 皇宮 ，不過 就 唔知 邊日 先至 得 ，大家 搵 笪 地方 住住 先 啦 。
於是 陸高軒 去 租咗 一間 住宅 ，係 喺 宣武門 頭髮 胡同 ，嗰度 好 清靜 嘅 ，噉 一行人 就 搬咗 入去 嘞 。
安頓咗之後 ，韋小寶 一個人 出嚟 ，行去 甜水井胡同 天地會 嘅 落腳地方 一 睇 ，見住客 已經 換咗 個 茶葉商人 。
佢 用 天地會 嘅 暗語 問咗 幾句 ，嗰個人 完全 唔識 嘅 ，顯然 係 天地會 已經 搬 咗 地址 嘞 。
再行去天橋 ，佢 諗 ：八臂猿猴 徐天川 ，就算 亦 畀 人哋 逼住 入咗 神龍教 唔 喺 天橋 啊 ，噉 會裏 便 其餘 兄弟 好似 高彥超 啊 、樊綱 啊 、錢老本 等等 ，或者 可以 撞到 嘅 噉 。
點知 喺 天橋 來回 行 咗 幾 轉 ，竟然 一個 都 見唔到 。
佢 即刻 去 西直門 上次 嚟 北京 住過 嘅 客店 ，攞 咗 三兩 銀 拋 喺 櫃位 ，話 要 開 一 間 上房 。
掌櫃 見 佢 出手 闊綽 ，噉 梗係 招呼 得 十分 恭敬 定 啦 。
韋小寶 又 攞咗 五錢 銀 塞畀 店小二 ，話 仍然 要 翻 上次 住過 嗰 間 天字 第三 號 上房 。
咁啱 嗰間 房 又 冇 人 住 ，店小二 講 都 唔 使 講 嘞 ，就 白 賺 咗 五 錢銀 。
韋小寶 飲咗 杯 茶 ，瞓 喺 炕床 上 便 閉目 養神 ，聽下 四面 都 冇 聲 喇 ，拔出 匕首 ，撬開 個 墻窿 ，順治皇帝 交畀 佢 嗰 部 經書 好地地 喺 個 窿 處 。
佢 打開 油布 ，睇過 冇 錯 喇 ，然後 將 磚頭 塞 翻 好 個 墻窿 。
而家 肥頭陀 已經 係 自己 嘅 下屬 ，噉 就 唔使 再 叫 侍衞 嚟 護送 經書 嘞 ，於是 將 經書 塞 喺 懷抱 ，就 行 去 禁城 。
行到 皇宮 外便 ，守門 嘅 侍衞 見到 個 少年 着住 平民 服飾 ，一直 行嚟 宮門 就 喝 佢 話 ：細路 ，做咩 啊 ？
韋小寶 笑 住 話 ： 你 唔 認得 我 啊 ？ 我 係 宮裏 便 嘅 桂公公 啊 。
嗰個 侍衞 仔細 噉 睇 下 佢 ，認出嚟 嘞 ，果然 真係 皇上 身邊 嘅 大紅人 桂公公 ，就 連忙 滿面 笑容 噉 話 ：
係 桂公公 ，你 着咗 呢身 衣服 我 都 ，嘿嘿嘿嘿 。
韋小寶 笑 住 話 ： 皇上 派 我 去 做 一件 緊要 事 ， 趕住 返 嚟 報告 ， 嚟 唔 切換 衣服 喇 。
係 ，係嘅 。桂公公 紅光滿面 ，呢趟 差事 啊 一定 好 順手 定 嘞 ，皇上 實有 大大 賞賜 啫 。
韋小寶 返到 自己 嘅 住地 ，換翻 太監 服飾 ，將 經書 用 塊 舊布 包住 ，一直 去 上書房 嚟到 見 皇帝 。
康熙 聽見 小桂子 求見 好 歡喜 噉 話 ： 快 啲 入 嚟 ， 快 啲 入 嚟 。
韋小寶 快步 行 入去 ，只見 康熙 企 喺 內 書房 門口 ，喜笑 微微 噉 話 ：
叉叉叉 你個 小桂子 吖 ，快啲 同我 躝入嚟 ，點解 去咗 咁 耐 㗎 ？
叉叉叉 呢 三個字 啊 ，佢 只係 喺 韋小寶 面前 先至 講 㗎啫 ，已經 唂咗 好耐 冇 講過 喇 。
韋小寶 跪低 叩頭 話 ：恭喜 皇上 ，天大之喜 啊 。
康熙 一聽 ，就 知道 父皇 果然 仲 喺 人世 ，個 心 好 激動 啊 ，不由得 岌咗 一岌 ，用 手 扶住 門框 佢 話 ：入嚟 至 慢慢 講 。
個 心 一 酸 ，爭啲 流出 眼淚 。
韋小寶 行 入內 書房 ，閂埋 房門 上咗 門戌 ，喺 四圍 嘅 書架 後 便 巡 咗 一次 ，唔見 另外 有 侍候 皇帝 嘅 太監 喺 度 喇 ，就 低聲 話 ：
皇上 ，我 喺 五台山 見到 老皇爺 啊 。
康熙 緊緊噉 揸住 佢 隻手 ：
父皇 ，真係 喺 五台山 出咗 家 ？佢 ，佢 有 咩 講 啊 ？
韋小寶 ，於是 將 喺 清涼寺 裏 便 點樣 會見 老皇爺 ，西藏 個 喇嘛 點樣 意圖 加害 ，自己 又 點樣 奮勇 救護 搏命 保駕 ，又 點樣 得到 少林 十八 羅漢 幫手 等等 嘅 情形 講咗 。
聽到 康熙 啊 都 唔知 幾 緊張 一味 話 ：好 危險 啊 好 危險 啊 ！
我哋 即刻 派 一千名 侍衞 上山 加以 保護 。
韋小寶 擰頭 話 ：唔得㗎 ，老皇爺 多數 唔 願意 㗎 。
噉啊 於是 又 將 順治 所 講 個 説話 講畀 康熙 聽 。
康熙 聽 父親 叫 自己 唔使 去 五台山 相會 ，又 讚 自己 佢 係 個 好 皇帝 ，首先 想到 朝廷 大事 ，唔似 我 噉 呢 幾句 説話 ，忍唔住 喊出聲 啊 佢 話 ：
我 一定 要 去 ， 一定 要 去 ！
韋小寶 等 佢 喊咗 一陣 ，佢 就 攞出 經書 雙手 呈上去 佢 話 ：
老皇爺 要 我 同 你 講 ，天下事 ，必須 順其自然 ，唔好 強求 ，能夠 同 中原 百姓 造福 ，噉啊 最好啦 。
如果 天下 百姓 都 要 我哋 走 ，噉 我哋 就 喺 邊處 嚟 嘅 就 返去 邊處 喎 噉 。
老皇爺 又 要 我 同 你 講 ，要 天下 太平 ，永不 加 賦 四個 字 ，務必要 緊緊 記住 。
佢 能夠 做到 呢 四個 字 嘞 ，就係 對 我 好 ，我個 心 就 歡喜 喇 噉 。
康熙 定定噉 聽住 ，啲 眼淚 滴滴嗒嗒 噉 滴 喺 包袱 上面 。
佢 接過 包袱 ，打開 佢 ，見 係 一部 四十二 章 經 ，噉 掀開嚟 睇下 啦 。
第一頁 上面 寫住 永不加賦 四個 大字 ，筆致 圓柔 ，果然 係 父皇 嘅 親筆 。
佢 話 ：父皇 訓示 ，孩兒 決 不 敢 忘 。
然後 佢 定 一定神 ，詳細 噉 詢問 順治 身體 是否 安康 ，而家 相貌 點樣 ，喺 清涼寺 裏 便 嘅 生活 是否 清苦 到 極 等等 。
韋小寶 都 據實 稟告 嘞 。
康熙 傷心 起嚟 ，又 試 喊 。
韋小寶 靈機 一動 佢 諗 ：佢 阿爺 吖 ，我 亦 陪 佢 喊 一 場 ，佢 畀 我 個 賞賜 呢 一定 又 多咗 好多 㗎 喇 ，橫 掂 眼淚 又 唔 使 錢 買 嘅 。
話喊就喊 ，佢 索 咗 幾下 鼻 ，就 眼淚 惦 流嘞 ，喊得 啊 好 悽慘 。
康熙 雖然 係 悲痛 難忍 喊到 出聲 啊 ，但係 佢 諗住 唔好 太過 失身份 ，因此 呢 不停 咁 抑制 自己 。
韋小寶啊 有意 做作 ，竟然 嚎啕大哭 。
康熙 喊咗 一陣 ，就 抹乾 啲 眼淚 問佢 ：
我 想念 父皇 ，所以 喊啫 ，你 仲 喊得 傷心過 我 點解 啊 ？
韋小寶 話 ：我 見 你 喊得 咁 傷心 ，又 想起 老皇爺 温和 慈愛 ，猛咁 稱讚 我 ，話 我 命 都 唔顧 喇噉 保駕 ，又 喜歡 我 噃 ，噉 我 個 心 啊 更加 難過 啦 。
如果唔係 我知道 你掛住我 ，要 我 趕住 返嚟 向 你 稟報 ，我真係 想 留 喺 五台山 ，服侍 老王爺 ，亦 免致 擔心 佢 畀 壞人 欺負 啊 。
康熙話 ：小桂子 ，你 真係 好嘞 ，我 一定 重重 有賞 。
韋小寶 啲 眼淚 仲係 不停 咁 流 ，佢 抽抽噎噎 噉 話 ：
皇上 待 我 已經 係 好好 㗎 嘞 ，我亦 唔 要 咩 賞賜 嘞 ，只係 盼望 老皇爺 平安 ，噉 我哋 做 奴才 嘅 就 好 快活 嘞 。
佢 去咗 一趟 神龍島 ，聽見 人人 高呼 教主 永享 仙福 壽 與 天齊 ，一啲 都 不以為恥 嘅 。
不免 面皮 練得 更加 厚 ，托 大腳 嘅 功夫 啊 大有 長進 ，但 求得 人 歡喜 ，言語 啊 更加 誇張 。
康熙 真係 信以為真 ，佢 話 ：我 亦 真係 擔心 父皇 冇人 服侍 啊 。
你 話 嗰個 行癲 和尚 莽莽撞撞 ，個人 又 粗 又 笨 嘅 ，父皇 身邊 冇 個 得力 嘅 人 ，真係 令人 放心 唔 落 。
小桂子 ，難得 父皇 咁 喜歡 你 。
韋小寶 聽到 呢處 擘大 個口 合唔翻 嘞 個心 就 暗暗 叫苦 喇 ：
死喇死 喇 ， 呢 次 老子 撞 大板 嘞 ， 先頭 吹牛 吹過 咗 頭喇 。
只聽見 康熙 繼續 話 ：本來 呢 ，我 身邊 亦 唔 少得 你 嘅 。
不過 做 仔 嘅 要 孝順 父親 ， 手邊 有 啲 咩 嘢 ， 總 係 揀 最好 嘅 嚟 孝敬 阿爹 嘅 。
你係 我 最得力 嘅 手下 ，年紀 雖然 好 細 ，不過 十分 能幹 ，對 我 父子 都 忠心耿耿 。
韋小寶 喺 個 心處 大叫 ：哎吖 千祈 唔好啊 ！
你 派 老子 去 五台山 陪 老和尚 ，你 你 你 你 叫 我 坐監 好過 啦 。
果然 康熙 就 話 喇 ：噉啦 ，你 去 五台山 出家 做 和尚 ，就 喺 清涼寺 服侍 我 父皇 啦 。
嘩 ，韋小寶 聽見 不但 要 陪 老和尚 ，自己 仲 要 做 小和尚 啊 真係 弊弊 冇 咁 弊咯 ，唔 等 康熙 講完 就 連忙 話 ：
服侍 老皇爺 當然 係 好好 啦 ， 要 我 做 和尚 噉 ， 噉 ， 噉 我 唔 䎺 啊 。
亦唔係 要 你 永遠 做 和尚 ，只不過 父皇 既然 一心 清修 咯 ，噉 你 亦 做埋 和尚 啦 服侍 起嚟 方便啲 吖嘛 。
將來 ， 將來 你 要 還俗 ， 噉 當然 由 得 你 啦 。
言下之意 呢 ，即係話 日後 順治 老咯 ，圓寂 歸西 ，你 唔 做 和尚 噉 冇人 會 唔 畀 你 嘅 噉 。
唉 任你 韋小寶 點樣 機變 百出 ，而家 都 束手無策 嘞 。
佢 雖然 知道 小皇帝 待 自己 好好 啊 ，不過 已經 講咗 話 派 自己 去 ；
如果 自己 堅決 唔肯 ，不但 前功盡棄 啊 講唔定 皇帝 一 反面 ，即時 斬 咗 自己 嘅 人頭 噉 就 唔係 講玩 㗎 喇 ，佢 話 ：
我 ，嗯 ，我又 唔 捨得 你 啊 。
真係 喊嘞 ，不過 呢 就 唔係 為咗 忠君愛主 ，實在 係 唔願意 去 做 小和尚 唧 。
康熙 好感動啊 ，輕輕 拍下 佢 個 膊頭 。
噉 啦 ， 你 去 做 幾年 和尚 ， 服侍 我 父皇 ， 然後 我 另外 派 人 去換 你 ， 噉 你 就 返 嚟 我 身邊 嘞 噉 咪 就 得 囉 。
父皇 唔准 我 去 朝見 ，不過 我 係 非 去 不可 嘅 ，到 其時 你 又 可以 見到 我 嘞 ，唔會 隔 幾 耐 嘅 啫 。
小桂子 ，你 乖乖地 ，聽 我 話 ，將來 我 畀 個 好 官 你 做 。
見到 韋小寶 不停 咁 喊 ，就 安慰 佢 話 喇 ：
你 喺 廟 裏 便 得閒 嘞 ，就 讀書 識字 ，以便 日後 做 官 吖 嘛 ，做個 大 官 。
韋小寶 諗 ：將來 做唔做 大官 啊 理鬼佢 咁多 吖 ，不過 小和尚 就 怕 做 定 嘞 。
啊 ，我 去到 五台山 亂咁 噏 ，呃到 老皇帝 放 我 返嚟 ，噉 都 唔係 好 難 嘅 啫 。
我 話 小皇帝 冇 我 服侍 ，就 食 唔落 飯 咯 ，呢次 離開 佢 一 兩 個 月 ，就 瘦 咗 好幾 斤 嘞 。
老皇爺 咁 錫 個 仔 嘅 ，一定 會 叫 我 回宮 嘅 。
一諗到 呢條 計 ，就 慢慢 收聲 唔喊嘞 ，佢 話 ：
你 派 我 去 做 咩事 ，我 都係 要 赴湯蹈火 在所不辭 嘅 。
咪 講話 去 做 和尚 啦 ，就係 烏龜 王八蛋 我 都 照 做 㗎啫 。
皇上 放心 啦 ，我 一定 盡心竭力 服侍 老皇爺 ，等 佢 老人家 身體 康強 ，長命百歲 ，誒 仲有 ，永享 仙福 ，壽 與 天 齊 。
康熙 好 歡喜 啊 笑住 話 ：哈 ，你 離開 北京 幾個 月 ，居然 學問 都 進步 咗 噃 ，成語 又 用得 唔 錯 。
係喇 ，你 點解 喺 五台山 耽擱 咁 耐 嘅 ？係唔係 好 唔容易 見到 老皇爺 呢 ？
韋小寶 諗住 神龍島 個事 仲係 唔講 為妙 喇 就 回答 話 ：
係啊 ，清涼寺 嘅 住持 方丈 啊 ，仲有 嗰位 玉林 老法師 啊 ，點都 唔肯 認 廟裏 便 有 老皇爺 啊 。
我 又 唔 好 點破 咯 噃， 噉 啊 只有 喺 山上 一間 間 和尚 寺轉 嚟 轉去 噉 做法 事 。
今日 去 顯通寺 打醮 ，聽日 又 去 佛光寺 打齋 ，五台山 上 幾千 個 大和尚 小和尚 ，我 至少 都 認得 一千 有 零 㗎 喇 。
如果 唔係 嗰啲 惡鬼 喇嘛 嚟 啰嗦 老王爺 啊 ，怕 我 而家 仲 喺度 佈施 僧衣 齋飯 啊 。
康熙 笑住 話 ：你 呢次 破費 唔少 嘞 ，使咗 幾多 銀 去 內務府 領翻 啦 。
佢 亦 唔 問 數目 ，佢 諗住 韋小寶 立 咗 大功 ，又 肯 去 做 小和尚 ，噉 佢 鐘意 報 幾多 大數 啊 ，就 隨得 佢 報 啦 噉 。
點知韋小寶話 ：唔怕 同皇上講吖 ，上次 你 派 我 去 抄 鰲拜 嘅 家 ，奴才 都有 唔少 好處 嘅 ，不過 當時 就 唔好意思 稟報 畀 你 知唧 。
呢次 去 五台山 見到 老皇爺 ，得到 佢 老人家 嘅 教訓 ，明白 對 皇上 咩嘢 壞事 都 唔 可以 做 嘅 。
噉啊 於是 將 以前 得到 嘅 銀 ，都 施捨 畀 和尚 寺 嘞 ，亦 算 係 奴才 幫 皇上 積 啲 福德 ，望 菩薩 保佑 ，老皇爺 同 皇上 早日 團圓 。
呢筆錢 本來 係 皇上 嘅 ，唔使 再 領 喇 。
佢噉樣講係有原因嘅 ，因為 日後 如果 有人 告發 ，話 韋小寶 抄 鰲拜 家 嘅 時候 吞沒 巨款 ，而家 已經 有 咗 伏筆 嘞 。
我 早就 代 你 施捨 畀 五台山 嘅 和尚 寺 啦 你 仲 追問 咩嘢 唧 ？
康熙 一聽 ，更加 歡喜 嘞 一味 岌頭 。
好喇 各位 ，欲知 後事 如何 ，且 聽 下回 分解 。
