前 文 再續 啊 書 接上 一回 啊 。
話說 洪夫人 話 ，要 再 派 一 個 福分 大啲 嘅 人 去 皇宮 攞 經書 噉 。
黑龍 使 殷錦 話 ：本教 福分 最大 嘅 呢 ，當然 係 教主 佢 老人家 ，其次 就係 夫人 喇 。
不過 總 唔能夠 勞煩 兩位 大駕 親自 出馬 㗎 。
噉啊 再 其次 福分 最大 嘅 呢 應該 係 白龍 使 嘞 。
佢 識得 碑文 ，又 立咗 大功 ，印堂 隱約 透出 紅光 嘅 ，所以 福分 之 大 ，教主 屬下 冇 人 能 出其右 啊 。
教主 捋住 鬍鬚 微微 笑話 ：
但係 佢 咁 細 嘅 細路 ，能夠 擔當 呢個 咁 大 嘅 任務 咩 ？
白龍 使 呢個 職務 ，喺 神龍教 雖然 係 好高 ，不過 喺 韋小寶 個 心處 ，一啲 分量 都 冇 㗎 。
佢 既然 失陷 喺 個 島 處 咯 ，就 只好 隨遇而安 啦 。
日日 睇 嗰個 閉月羞花 嘅 洪夫人 啊 梗係 好過癮 ，但係 如果 睇得多 嘞 ，畀 教主 發覺 ，就 難免 有 殺身之禍 喎 。
嗯 都 仲係 快啲 返去 北京 為妙 嘞 。
噉而家 聽 教主 噉樣 講 ，正係 甩身 嘅 良機 ，佢 就 話 ：
教主 、夫人 ，多得 你 老人家 嘅 提拔 ，屬下 十分 感激 。
我 本事 呢 就 冇 嘅 ，但係 託 兩位 嘅 大福氣 ，混入去 皇宮 裏 便 偷 呢 四部 經書 呢 ，誒 成功 嘅 希望 都 怕 會 有 嘅 。
洪教主 岌一岌頭 。
洪夫人 好 歡喜 噉 話 ：你 肯 自告奮勇 ，足見 對 教主 忠心 。
我知 你 聰明伶俐 ，福分 又 大 ，怕 真係 上天 派嚟 幫 教主 做成 呢件 大事 㗎 。
洪教主 話 喇 ：據 黑龍使 稟報 ，佢 派 喺 皇宮 裏 便 嘅 部屬 傳出 消息 ，小 皇帝 手下 有 個 小太監 ，叫做 咩 小桂子 嘅 。
韋小寶 大吃一驚 ，穿煲喇 穿煲喇噉 就 弊弊冇咁弊喇 。
教主 繼續 話 ： 小 皇帝 派 咗 佢 去 五台山 ， 意思 係 想 不利於 我教 。
我哋 連 氣派 咗 幾 批 人手 出去 ，要 捉 佢 返嚟 審問 。
章老三 搵 佢 唔到 ，肥頭陀 亦 冇 成功 ，估唔到 小桂子 冇 搵到 ，就 遇着 咗 你 喇 。
殷錦 聽見 教主 稍為 停咗下 ，即刻 就 話 ：
呢啲 係 教主 洪福齊天 啊 。
洪教主 對 佢 微微 岌岌頭 ，繼續 話 ：
白龍使 ，你 去到 皇宮 之後 ，關於 小桂子 嘅 事 要 再 仔細 查一查 ，皇帝 派 佢 去 五台山 ，到底 有 乜嘢 圖謀 啊 。
韋小寶啊 已經 嚇到 成身 冷汗 嘞 連忙 話 ：係 ，係 。
個心 非常之 歡喜 嘞 ，因為 聽 教主 嘅 口氣 真係 派 自己 去 皇宮 嘞 噃 。
噉 就 望 咗 肥 頭陀 一眼 個 心話 ： 你 唔 洩漏 我 嘅 秘密 呢 算 你 係 個 好人 。
洪夫人 話 ：嗰 八部 四十二 章 經 裏 便 ，聽講 有 一 個 強身 保命 延年 益壽 嘅 大 秘密 嘅 。
我 哋 教主 既然 係 上 蒙天眷 ， 同意 佢 永享 仙福 ， 壽與天 齊 ， 呢 八部 經書 ， 遲早 必定會 係 教主 嘅 。
白龍使 ，你 再 去 為 教主 立 一 大功 ，將 呢 八部 經書 攞 翻嚟 ，教主 自然 另有 封賞 。
韋小寶 企起身 躬身 話 ：屬下 粉身碎骨 ，亦 難 報 教主 同 夫人 嘅 大恩 啊 ，屬下 一定 盡忠 報國 ，馬革裹尸 。
盡忠報國 ，馬革裹尸 八個字 ，係 佢 喺 講古 先生 嗰度 學翻嚟 嘅 。
因為 每逢 大將 出征 君王 勉勵 ，大將 呢 就 慷慨激昂 講 呢 八個字 出嚟 㗎 嘞 。
不過 佢 而家 照板 煮 碗 ，搦嚟 用 喺 呢處 啊 未免 有啲 不倫不類 。
洪夫人 笑一笑話 ：你 效忠 教主 ，噉 就 好極喇 。
你 去 北京 要 邊 幾個人 幫手 ，你 隨便 揀 啦 。
韋小寶 個 心 諗 ：我 一 走 就 甩身 嘞 ，神龍教 有人 跟住 去 啊 盞 綁 手 綁腳 啦 。
於是佢話 ：人多咗 怕 會 洩漏 機密 喇 ，吖係喇 ，赤龍 使 座下 嘅 少女 ，屬下 想 揀 一兩個 人 去 ，等 佢哋 喬裝 宮女 ，喺 皇宮 裏 便 做 事 呢 就 比較 方便 。
因為 佢 想起 沐劍屏 ，想要 帶埋 佢 走 。
無根 道 人 話 ：呢啲 姑娘仔 怕 冇 咩 用 嘅 ，只要 教主 同 夫人 都 准 咯 ，你 隨便 揀 就係 啦 。
韋小寶 話 ：多謝 道長 。
陸高軒 話 ：啟稟 教主 、夫人 ，屬下 尋日 犯咗 重罪 ，深感 救主 不殺之恩 。
洪教主 揮 一揮手 皺住 眉頭 話 ：
尋日嘅事 ，大家 唔好 記 喺 個 心處 ，今後 邊個 都 唔准 再 提 。
係 ，多謝 教主 。
屬下 想 跟隨 白龍 使 一齊 去 啊 。
托賴 教主 同 夫人 洪福 ， 或者 能夠 為 教主 立 啲 微功 ， 稍表 屬下 感激 之 誠 。
陸高軒 智謀 深沉 ，武功 高強 ，支筆 十分 使得 ，一篇 文章 做得 四平八穩 。
好極嘞 ，你 跟埋 白龍 使 一齊 去 啦 。
陸高軒 諗 ：佢 話 一篇 文章 做得 四平八穩 ，即係話 我 捏造 碑文 嘅 事 佢 早就 心中 雪亮 。
肥 頭陀 跟 住 話 ： 啟 稟 教主 、 夫人 ， 屬下 亦 情願 跟 埋白龍 使 去 北京 為 教主 辦事 啊 。
教主 岌一岌頭 ， 佢 見 黃龍 使 亦 想 自告奮勇 就 話 ：
人數 多咗 ，就 怕 洩漏 行藏 ，就係 你哋 兩個 一齊 去 啦 。
一切 行動 ，冚𠾴唥 聽 白龍 使 嘅 號令 ，不得 有 違 。
陸高軒 同 肥頭陀 躬身 話 ：屬下 遵命 。
洪夫人 喺 身邊 攞出 一條 小龍 ，五色 斑斕 ，係 青銅 、黃金 、赤銅 、白銀 同埋 黑鐵 鑄成 嘅 ，佢 話 ：
白龍 使 ， 呢 個 係 教主 嘅 五龍 令 ， 暫時 交 畀 你 執掌 。
教下 幾萬 教眾 ，見到 呢個 五龍令 就 會 好似 見到 教主 一樣 㗎喇 。
為咗 做成 呢件 大事 ，將 生殺大權 交畀 你 ，立功之後 ，就 將 五龍令 交翻嚟 。
係 。
韋小寶 應咗 ，雙手 恭恭敬敬噉 接咗 五龍令 ，不過 個心 呢 ，就 好 擔憂 啊 。
我 只係 望 一返到 北京 ，就 唔理 鬼佢 咩嘢 神龍教 、惡虎教 啦 。
而家 攞咗 佢 呢個 五龍令 啊 ，唉 ，從此 就 麻煩 多多 咯 。
洪夫人 話 ：白龍 使 同 陸高軒 、肥頭陀 三個人 留低 ，其餘 嘅 可以 走嘞 。
無根道人 同埋 黑龍使 、黃龍使 三個人 行咗 禮 就 退出去 。
洪教主 喺 身邊 攞出 一個 黑色 瓷瓶 ，倒咗 三粒 朱紅色 嘅 藥丸 出嚟 佢 話 ：
你哋 三個人 奮勇 去 北京 辦事 ，本座 十分 嘉許 ，各 賜 豹胎 易筋丸 一枚 。
肥頭陀 同 陸高軒 塊面 即時 現出 又 歡喜 又 害怕 嘅 表情 ，屈 右膝 多謝 賞賜 ，接過 藥丸 ，吞咗 落 肚 。
韋小寶 有樣學樣 就 跟住 照做 ，接咗 豹胎 易筋丸 ，即刻 就 食咗 。
過咗 冇 幾耐 唧 ，就 覺得 個 肚 裏 便 有 一 股 暖笠笠 嘅 氣息 升 上嚟 ，慢慢 噉 跟住 啲 血 行 ，散咗 入去 全身 裏 便 ，講唔出 咁 舒服 。
食完藥喇 ，洪夫人 話 ：
白龍 使 留低 ，其餘 嘅 人 可以 走嘞 。
肥頭陀 同 陸高軒 兩個人 退咗 出去 。
洪夫人 微微 笑話 ：白龍使 ，你 使 咩嘢 兵器 㗎 ？
韋小寶 話 ：屬下 武藝 低微 ，冇 學過 咩 兵器 ，只係 有 一把 匕首 防身 唧 。
畀 我 睇 下 。
韋小寶 喺 靴筒 拔出 匕首 ，調轉 劍柄 雙手 呈上去 。
洪夫人 接過嚟 一睇 就 話 ：匕首 好靚 啊 。
就掹咗 一條 頭髮 ，放開 手 ，嗰條 頭髮 啊 慢慢 落 喺 刀鋒 上 便 ，斷開 兩橛 。
教主 亦都 讚咗 一聲 ：好嘢 。
韋小寶 個 為人 啊 就 冇 咩嘢 第樣 長處 嘞 ，佢 就係 對於 錢財 器物 睇得 好 輕 。
見到 洪夫人 對 呢 把 匕首 十分 歡喜 佢 諗 ：要 托 大腳 就 要 托到 十足 。
佢 話 ： 呢 把 匕首 屬下 就 獻 畀 夫人 啦 。
開講有話 ：胭脂 、寶劍 都要 ，誒 都要獻畀 佳人 嘅 。
天下 嘅 佳人 ，都 冇 邊個 佳得過 夫人 㗎 喇 。
佢 聽講 古 先生 講過 好多 次 啊 ，咩 寶劍 贈 烈士 ，紅粉 贈 佳人 ，但係 呢 兩句 説話 太過 難 ，就 唔 容易 記 清楚 。
洪夫人 笑嘞 ，笑得 好 甜啊 ，佢 話 ：真係 乖喇 ，你 對 我哋 忠心 ，唔係 空口 講 白話 嘅 。
我 冇 咩嘢 好嘢 送畀 你 ，點能夠 要 你嘅 禮物 呢 ？
你嘅 心事 ，我 多謝 喇 。
嚟 ，我 傳 你 三招 防身 保命 嘅 招式 ，叫做 美人 三招 ，你 記住 啊 。
佢 離開 座位 ，攞咗 一條 手巾仔 出嚟 ，將 把 匕首 綁 喺 自己 右腳 嘅 小腿 外側 。
佢 話 ：教主 ，勞煩 你 演 下 武功 啦 。
洪教主 笑 騎騎噉 慢慢 走埋去 ，突然 左手 一伸 ，揦住 夫人 嘅 後領 將 佢 成個人 扚起嚟 。
呢下 實在 太快 喇 韋小寶 吃咗 一驚 。
洪夫人 嘅 身 輕輕 彎 一彎 ，左腳 反踢 ，向住 教主 嘅 小腹 𨅝過去 。
噉 教主 向後一縮 ， 避開 佢 。
點知 洪夫人 趁勢 反轉 個身 ，左手 攬住 教主 條頸 ，右手 竟然 揸住 匕首 ，用 劍尖 對準 教主 嘅 後心 ，佢 話 ：
呢個 係 第一招 ，叫做 貴妃回眸 ，你 記住 喇 。
呢幾下 動作 乾淨利落 ，韋小寶 睇到 好過癮 大聲 喝彩 話 ：好嘢啊 ，好嘢啊 ！
個心諗 ：嗰日 我 畀 肥頭陀 成個 扚起 ，冇晒 符弗 ，如果 我 學咗 呢一招 啊 ，一劍 就 㓤死佢 喇 。
教主 將 洪夫人 輕輕 打橫 放 喺 地下 。
洪夫人 呢 又 將 把 匕首 插入 小腿 旁邊 ，反轉 個 身 趴 喺 處 。
教主 用 右腳 輕輕 踩住 佢 條 後腰 ，隻手 呢 詐假意 揸住 把 刀 晾 喺 佢 條 頸 上 便 ，笑住 話 ：投唔投降 啊 ？
韋小寶 個 心 諗 ：到咗 呢個 地步 有 乜法子 唧 ，梗係 大叫 投降 啦 。
點知 突然間 見到 夫人 嘅 頭殼 ，向 自己 嘅 胸前 蜎落去 ，噉 敵人 晾 喺 條 頸 嗰 一 刀 呢 ，自不然 就 落空 咗 。
佢 趁勢 喺 地 下 一個 關斗 ，喺 教主 褲𧜛 蜎 過去 。
握住 匕首 嘅 右手 揸 成 拳頭 輕輕 一拳 打正 教主 後心 ，不過 呢 係 劍尖 向上 嘅 。
如果 真係 對敵 啊 ，呢 一劍 當然 插入 敵人 嘅 背心 嘞 。
韋小寶 又 試 大叫 一 聲 ：好嘢 ！
教主 等 佢 插翻 好把 匕首 之後 ，就 捩轉 佢 雙手 ，左手 揸住 佢 雙手 手腕 ，右手 啊 假裝 揸住 兵器 ，晾 喺 佢 條 頸 處 ，噉 笑住 話 ：
呢 一次 你 想 走 都 走唔甩 嘞 啩 ？
夫人 笑住 話 ：睇住嚟 啦 。
右腳 向前 輕輕 一踢 ，白光 閃動 ，嗰把 匕首 啊 已經 割斷 佢 小腿 上面 綁住 嘅 手巾仔 ，飛咗 出嚟 。
佢 右腳 趁勢 一勾 ，喺 匕首 柄 上面 一點 ，嗰 把 匕首 突然 向住 佢 喉嚨 飛射 過去 。
説時遲那時快啊 ，只見 佢 個 身 向 下 一縮 ，嗰 把 匕首 就 急 射 教主 嘅 心口 。
教主 放開 佢 雙手 仰天 一個 鐵板橋 ，噗 一聲 ，匕首 喺 佢 心口 掠過 直插入 身後 嘅 竹墻 一直 插到 盡 啊 。
洪夫人 勾腳 倒踢 匕首 ，韋小寶 已經 嚇咗 一大跳 嘞 。
等 見到 嗰 把 匕首 向住 佢 咽喉 射過去 ，噉 佢 喺 間 不容發 嘅 時候 避開 ；
噉把 匕首 呢 又 射 向 教主 嘅 胸口 ，呢一下 就 勢在必中 嘅 ，哈 教主 竟然 又 避開 。
呢幾 下 險到 極點 嘅 奇異 變化 ，真係 睇到 佢 口瞪目呆 心驚膽戰 ，喉嚨 頭 嗰個 好嘢 兩個字 啊 竟然 嗌唔出 嘞 。
洪夫人 笑住 問佢 ：點啊 ，吓 ？
韋小寶 用 手 揸住 椅背 ，好似 想 跌倒 噉 佢 話 ：哎呀 ，真係 嚇死 我 啊 。
洪教主 同 夫人 見 佢 面色 蒼白 嚇得 好 厲害 ，聽咗 佢 呢句 説話 ，真係 比 一千句 一萬句 頌揚 就 更加 歡喜 。
佢 兩個人 武功 高強 ，多 一個 細路 個 稱讚 ，亦 唔算 咩嘢 嘅 ，但係 佢 咁 擔心 ，可見 佢 對 兩個人 嘅 忠心 。
洪夫人 明知故問 噉 話 ：匕首 又 唔係 射嚟 你處 你 怕 咩 呢 ？
韋小寶 話 ：我 怕 ，怕 刺傷 夫人 同埋 教主 咯 。
傻仔 ，邊度 有 咁 容易 就 刺傷到 教主 㗎 ？
呢一招 叫做 飛燕回翔 ，好 難 練 嘅 。
教主 神功 蓋世 ，就算 佢 事前 唔知 啊 ，呢一招 亦 刺傷 佢 唔到 嘅 。
但係 世間上 除咗 教主 之外 ，能夠 避得過 呢一招 嘅 ，睇嚟 亦 冇 幾多 個 喇 。
噉 夫人 將 美人 三招 嘅 練法 ，詳詳細細 講 畀 佢 聽 。
第二招 臥地 轉身 ，叫做 小憐 橫陳 。
洪夫人 話 ：美人 三招 所用 嘅 都 係 古代 美人 嘅 名 ，男人 學咗 未免 有啲 不雅 ，好在 你 係 個 細佬 哥 都 唔 緊要 嘅 。
韋小寶 啊 一招一式 噉 跟住 學 。
洪夫人 啊 細心 糾正 佢 ，一直 教咗 個 幾時辰 先至 算做 學識 ，但係 真係 要 能夠 使 呢 ，就 非要 長期 苦練 不可 嘞 。
尤其是啊 第三招 飛燕回翔 啊 ，稍為 有啲 錯失 就 殺咗 自己 㗎喇 。
洪夫人 教 佢 去 打 一把 鈍頭 嘅 鉛劍 ，大小 重量 ，同 匕首 一模一樣 嘅 作為 練習 之 用 。
洪安通 喺 教眾 面前 威嚴 端莊 ，不苟言笑 ，但係 而家 一直 陪住 夫人 教招 ，笑眯眯 噉 喺 旁邊 睇住 ，竟然 極 有 耐心 。
等 夫人 教完 喇 佢 話 ：
夫人 嘅 美人 三招 係 十分 厲害 ，不過 畀 佢 打中 嘅 實死 無疑 。
我嚟教你 英雄 三招 ，志在 降服 敵人 㗎啫 ，敵人嘅 生死 就 由得 你 嘅 。
韋小寶 歡喜 到 極 啊 即刻 跪低 話 ：叩謝 教主 。
洪夫人 笑住 話 ：我 從來 都 冇 聽 你 有 英雄 三招 嘅 ，原來 你 留咗嚟 教 徒弟 ，就 唔肯 教 我 。
洪安通 亦 笑 住 話 ： 冇 ， 呢 啲 係 啱 先 睇 到 你 嘅 美 人 三招 臨時 想出 嚟 嘅 ， 現炒現賣 ， 都 唔 知得 唔 得 。
你 指點 下 啦 。
洪夫人 睇咗 佢 一 眼 ，媚笑 話 ：哎呀 我哋 大教主 笑 人 咩 ？
古來 英雄 難過 美人 關 ，英雄 三招 ，當然 打唔過 美人 三招 啦 。
洪夫人 又 係 一陣 媚笑 ， 嬌聲 話 ：
喺 細佬 哥 面前 ，都 同 我 講埋 呢啲 冇 釐正經 嘅 嘢 。
洪安通 覺得 有啲 失態 嘞 ，就 咳嗽 一聲 好 正經 噉 話 ：
白龍 使 佢 年紀 細 ，同人 動手 ，好容易 畀 人 揸住 條 頸 後 便 一手 扚起 。
夫人 ，你 就 將 我 當作 係 白龍使 啦 。
嗱 ，你 唔好 整痛 人哋 噃 。
噉咪梗係啦 。
洪夫人 左手 一伸 ，揸住 佢 個身 扚起嚟 。
洪安通 啊 身材 魁梧 ，睇起嚟 有成 一百七八十 斤 重 嘅 。
洪夫人 嬌滴滴 噉 嘅 樣 ，哈 ，居然 毫不費力 一手 就 將 佢 扚起 嘞 。
洪安通話 ：嗱 ，睇清楚 啊 。
左手 慢慢 反轉 ，喺 夫人 左便 胳肋 底 撓 咗 一下 。
洪夫人 咭聲 一 笑 成個人 軟咗 。
洪安通 左手 揸住 佢 腋下 右手 慢慢 回轉 ，揸住 佢 條 領 慢慢 舉起 佢 ，過咗 自己 頭頂 喇 ，然後 輕輕 𢴈 佢 出去 。
洪夫人 個 身 一 掂 地 唧 就 𨃩 出去 ，好似 喺 水面 𨃩住 噉 行 。
洪夫人 一路噉笑 ，個身 停住 之後 ，仍然 打斜瞓 喺 地下 唔起身 。
啱先 洪安通 嘅 動作 ，使得 好慢好慢 ，韋小寶 睇得 清清楚楚 ，噉 比起 洪夫人 嗰種 出手 迅捷 啊 ，顯然 又 難 咗 幾倍 嘅 。
洪夫人 笑住 話 ：你 擳 人哋 嘅 胳肋底 啫 嘛 噉 算 咩 英雄 唧 ？
講完 就 慢慢 起翻身 嘞 。
洪安通 微微 笑話 ：呢一招 喺 真正 英雄 好漢 手下 ，梗係 唔會 嚟 擳 你 啦 。
但係 白龍 使 如果 畀 敵人 扚起 ，實係 頸下 大椎穴 畀 人哋 揸住 嘞 。
嗰度 係 手腳 三陽 督脈 嘅 會合點 ，全身 有力 都 使唔出 ，噉 就 只有 去 撓 敵人 胳肋底 嘅 極泉穴 嘞 。
呢個 穴 ，屬 手 少陽 心經 ，敵人 非 鬆手 不可 嘅 。
白龍使 有 翻力 嘞 ，就能夠 舉起 敵人 𢴈佢 。
𢴈 佢 嘅 時候 ， 同時 封住 敵人 手 踭 後 便 嘅 小海 穴 ， 同 腋下 極泉 穴 ， 噉 將 佢 𢴈 咗 喺 地下 ， 佢 已經 唔 逳 得 咯 。
韋小寶 拍住 手 話 ：呢一招 果然 好嘢 啊 。
洪安通話 ：你 練熟 之後 ，出招 梗係 越快越好啦 。
講完 ，洪教主 趴喺 地下 ，洪夫人 用 腳 出力 踩住 佢 後腰 ，右手 攞住 門戌 ，晾 喺 佢 條 頸 上 便 ，嬌聲 噉 笑住 話 ：
你 投唔投降 吖 ？
洪教主 笑住 話 ：我 早就 投降 喇 ，我 叩頭 畀 你 。
雙腳 一縮 ，好似 想 跪 喺度 叩頭 噉 。
右手 呢 就 慢慢 噉 打橫 一掠 ，碰到 門戌 ，咔嘞 一聲 ，門戌 竟然 斷咗 。
洪安通話 ：你 縮腳 詐假 意向人 叩頭 ，就 趁勢 攞出 匕首 。
你隻手 雖然 冇 我 嘅 內力 ，但係 你 嘅 匕首 鋒利 非常 ，敵人 任何 兵器 一削 就 斷 㗎 嘞 。
佢 個 口 一便 講解 ，突然間 一個 關斗 ，向 洪夫人 褲𧜛 蜎 過去 。
韋小寶 打個 特 嘞 佢 諗 ： 佢 係 教主 嚟 噃， 咁 尊貴 ， 點解 要 蜎 女人 褲 𧜛 呢 ？
雖然 佢 係 佢 妻子 啫 ，似乎 都 係 有 啲 唔妥 㗎 。
誰知 洪安通 唔係 真係 蜎過去 ，佢 只係 作 個 噉嘅 狀唧 。
左手 已經 揦住 夫人 右腳 腳眼 ，右手 虛點 佢 小腹 。
佢 話 ：呢 把 係 削鐵如泥 嘅 匕首 ，敵人 就算 有 天 咁 大 嘅 膽 啊 亦 唔 敢 掙扎 啊 。
講完 ，慢慢 企翻 起身 。
嗱 各位 ，欲知 後事 如何 ，且 聽 下回 分解 。
