前文 再續 啊 書 接 上 一回 啊 。
話説 韋小寶 分發 完 啲 佈施 禮物 ，點知 啊 連 一個 同 小皇帝 有 一兩分 相似 嘅 和尚 都 唔見 。
知客僧 呢 ，又 話 只有 方丈 大師 未曾 領 禮物 啫 ，不必 請 老人家 出嚟 喇 噉 。
正喺 呢個 時候 ，有 一名 僧人 匆匆忙忙 入嚟 話 ：師兄 ，外便 有 十幾 名 喇嘛 要 見 方丈 啊 。
佢哋 身上 都 帶住 兵器 ，摩拳擦掌 來 意不善 㗎 。
知客僧 皺住 眉頭 話 ：
五台山 青廟 黃廟 ，從來 河水 不犯 井水 嘅 ，佢哋 嚟 做 乜嘢 啊 ？
你 去 稟報 方丈 ，我 出去 睇下 啦 。
講完 ，對 韋小寶 講咗 聲 少陪 ，噉 就 嗱嗱聲 行 出去 。
韋小寶 笑住 話 ：呢啲 臭 喇嘛 吖 ，都 快 係 衝住 我哋 嚟 㗎 。
不過 佢 諗住 雙兒 武功 高強 ，十幾 名 喇嘛 佢 都 唔 放在心上 。
忽然間 聽見 山門外 便 傳來 一陣 喧嘩 嘅 聲音 ，跟住 一班 人 ，衝咗 入嚟 大雄寶殿 。
韋小寶 話 ： 出去 睇 下 熱鬧 咯 。 噉 拉 住 雙兒 隻 手 呢 一齊 出去 。
去到 大雄寶殿 ，只見 十幾名 黃衣 喇嘛 就 圍住 知客僧 ，七嘴八舌 噉 猛嘈 。
有啲啊話 ：非摷不可 ，有人 親眼 見到 佢哋 嚟咗 清涼寺 嘅 。
噉 有 個 又 話 ：喂 ，呢啲 係 你哋 唔啱 噃 ，點解 將 人哋 收埋 啊 ？
有個 又話 ：乖乖地 交翻 個人 出嚟 ，否則 啊 ，嘿嘿 。
韋小寶 行到 大殿 旁邊 企 響處 ，雙手 叉腰 佢 諗 ：老子 就 喺 呢處 你哋 放馬 過嚟 啦 。
點知 嗰啲 喇嘛 對 佢 啊 毫不 理睬 睇 都 唔 睇 佢 一 眼 。
正話喺度嘈緊 ，澄光方丈 行出嚟 喇 佢 話 ：咩嘢事啊 ？
方丈 ，佢哋 。
知客僧 方丈 兩個字 一 出口 唧 ，嗰班 喇嘛 就 冚聲 圍 實 澄光 ，佢哋 大叫 話 ：你 係 方丈 啊 ？啱 喇 。
有個又話 ：快啲 將人交出嚟 啊 ，如果 唔交啊 ，連 呢間寺院 一把火 燒咗去 。
有個 又話 ：豈有此理 ，真係 豈有此理喇 。
有個又話 ：唔通 做咗 和尚 就 唔講道理 喇 ？
澄光話 ：請問 眾位 師兄 ，係 邊間 廟 嘅 呢 ？光臨 敝寺 係 為咗 咩嘢 事 啊 ？
一名 身穿 黃袍 ，上面 褸住 件 紅色 袈裟 嘅 喇嘛 話 ：
我哋 喺 西藏 嚟 ，奉咗 活佛 嘅 命令 嚟到 中原 公幹 。
點知 有 一名 隨從 嘅 小喇嘛 ，畀 一個 賊 和尚 拐走 咗 ，收埋 喺 清涼寺 。
方丈和尚 ，你 快啲 將 我哋 呢個 小喇嘛 交出嚟 ，否則 ，就 點 都 唔 同 你 罷休 。
噉就 奇怪 喇 。
我哋 呢度 係 禪宗 青廟 ，同 西藏 密宗 素來 都 冇 瓜葛 嘅 。
貴處 失咗 個 小喇嘛 ，點解 唔 去 各處 黃廟 問下 呢 ？
有人 親眼 見到 㗎喇 ，嗰個 小喇嘛 喺 清涼寺 裏 便 ，我哋 噉 先至 嚟 問 你 啫 ，唔通 我哋 食飽飯 冇事做 ，嚟 亂咁 嘈 咯噃 ？
嗱 ，你 識 做 嘅 ，快啲 將 小喇嘛 交出嚟 ，我哋 不 看 僧面 看 佛面 ，唔再 追究 你 就係 喇 。
如果 真係 有 小喇嘛 嚟咗 清涼寺 ，各位 就算 唔問 啊 ，老衲 亦 唔能夠 收留 佢 嘅 。
有 幾名 喇嘛 一齊 噉 叫 ：噉 你 等 我哋 摷 一摷 啦 。
澄光 仍然 擰頭 啊 佢 話 ：呢度 係 佛門 清淨 之 地 ，點 能夠 話 摷 就 摷嘅 呢 ？
嗰個 為首 嘅 喇嘛 話 ：如果 唔係 做賊 心虛 ，點解 唔 畀 我哋 摷 啊 ？
可見 呢個 小喇嘛 千真萬確 ，實係 喺 清涼寺 裏 便 。
澄光 啊 啱啱 擰咗 擰頭 唧 ，就 有 兩 名 喇嘛 同時 逳手 ，掹住 佢 件 衫 領 大聲 喝 佢 話 ：你 畀唔畀 摷 啊 ？
另外一名喇嘛 話 ：大和尚 呢間廟 裏 便 ，係唔係 窩藏 良家婦女 怕人知 呢 ？
否則 摷一摷 有 咩嘢 緊要 唧 ？
呢陣時 清涼寺 亦 有 十幾名 和尚 出嚟 ，不過 畀 班 喇嘛 攔住 ，行唔到 方丈 身邊 。
雙兒 低聲 問 韋少寶 話 ：相公 ，要唔要 趕佢哋走 啊 ？
韋小寶 話 ：咪住 。
佢 個 心 諗 ：呢啲 喇嘛 明擺住 係 無理取鬧 嘞 ，呢間 廟 裏 便 點 會 窩藏 小 喇嘛 吖 ？
莫非 佢哋 嘅 用意 同 我 一樣 ，亦係 要 見 順治皇帝 ？
只見 白光 一閃 啊 ，兩名 喇嘛 已經 拔出 尖刀 分別 頂住 澄光 嘅 前胸 同 後心 ，大聲 噉 話 ：
唔畀摷就殺咗你先 ！
澄光 毫無懼色 佢 話 ：阿彌陀佛 ，大家 係 佛門 弟子 ，點解 要 逳手逳腳 吖 ？
兩名喇嘛 將 尖刀 輕輕 向前 一㓤 ，喝佢話 ：大和尚 噉 就 得罪 晒 喇 。
澄光 個 身 輕輕 一側 ，順勢 一帶 ，兩名 喇嘛 嘅 尖刀 ，都 向 對方 心口 㓤 過去 。
嘩 ，兩個人 急忙 用 左手 互相 一 頂 ，啪 一聲 ，各自 褪 後 幾步 。
其餘啲人 就 大叫 嘞 ：清涼寺 方丈 行兇 打人 喇 ，打死人 喇 ！
裏頭 一 嗌 唧 ， 喺 出 便 又 衝 咗 三四十 人入 嚟 ， 有 和尚 ， 有 喇嘛 ， 仲有 幾名 着 住 長衫 嘅 俗家 人 。
一名 黃袍 白鬚 老喇嘛 大聲 噉話 ：係唔係 清涼寺 方丈 行兇殺人 啊 ？
澄光 合十 行禮 話 ：出家人 慈悲 為 本 ，點敢 亂 開 殺戒 呢 ？
眾位 師兄 、施主 ，你哋 喺 邊度 嚟 㗎 ？
又 向住 一位 五十幾歲 嘅 和尚 話 ：哦 ，原來 佛光寺 方溪 方丈 大駕 光臨 ，有失 遠迎 ，得罪 ，得罪 。
佛光寺 係 五台山 上 最 古 嘅 寺院 嘞 ， 建於 元 魏孝文帝 時期 ， 有 好 耐 嘅 歷史 嘞 。
當地人 講 啊 ：先 有 佛光寺 就 後 有 五台山 。
原來 五台山 原來 個 名 叫做 清涼山 嘅 ，後來 因為 發現 五大 高峰 ，噉 先至 叫做 五台山 。
而 嗰陣時 呢 ，佛光寺 已經 建成 嘞 。
五台縣 嘅 名稱 啊 ，一直到 秦朝 大業 時期 先至 改 嘅 。
喺 佛教 之中 佛光寺 嘅 地位 ，比 清涼寺 高得多 。
噉方丈 心溪 呢 ，直情 係 五台山 所有 青廟 嘅 首腦 。
呢個 和尚 生得 肥頭 耷耳 滿面 油光 ，佢 笑口 噬噬 噉 話 ：
澄光師兄 ，我 同 你 引見 兩位 朋友 。
噉啊 指住 嗰個 老喇嘛 話 ：
呢位 係 啱啱 由 西藏 拉薩 嚟 嘅 大喇嘛 巴顏法師 ，喺 活佛 座下 最 得 寵信 、最有 勢力 嘅 大喇嘛 喇 。
澄光合十話 ：有緣 拜見 大喇嘛 。
巴顏岌 一岌頭 ，神氣 非常 驕傲 。
心溪 又 指住 一個 着住 件 青布 長衫 ，三十零歲 嘅 文士 話 ：
呢位 係 川西 大名士 ，皇甫閣 皇甫 先生 。
皇甫閣 拱 拱手 話 ： 久仰 澄光 大 和尚 武學 通神 ， 今日 得 見 真 係 三生有幸 啊 。
澄光合十話 ：老僧 年紀 老咯 ，年輕 嘅 時候 學過 嗰啲 微末 功夫 ，早就 唔記得 晒 喇 。
皇甫 居士 文武 兼資 ，可喜可賀 啊 。
韋小寶 聽 呢班人 喺度 文縐縐 講 客氣話 ，個心 諗 ：
呢場 交 多數 打唔成 㗎喇 ，又 冇 熱鬧 睇 又 少咗 個 渾水摸魚 嚟 搵 老皇帝 嘅 機會 。
個 心 呢 就 好 失望 。
巴顏話 ：大和尚 ，我 喺 西藏 帶咗 個 小徒弟 出嚟 ，畀 你哋 間 廟 ，扣留 咗 。
你 睇 在 活佛 嘅 金面 ，放咗 佢 啦 ，大家 都 多得 你 。
澄光 微微 笑話 ：呢 幾位 師兄 喺 敝寺 吵鬧 ，老衲 亦 冇 怪 佢哋 。
大師 係 通情達理 嘅 人 ，點解 亦 聽 人哋 亂講 呢 ？
清涼寺 開建 以嚟 ，怕到 今日 先至 有 喇嘛爺 光降 唧 。
話 我哋 收咗 貴座 弟子 真係 從 何 説起 呢 ？
巴顏 大聲 噉 喝佢 ：唔通 係 冤枉 你 嘞喎 ？你 唔好 ，唔好 ，罰酒 唔 飲 飲 敬酒 噃 。
巴顏 嘅 漢語 就 唔係 點 流暢 嘅 ，敬酒 唔 飲 飲 罰酒 呢句 成語 ，佢 調轉 咗 嚟 講 嘞 。
心溪 笑住 話 ：兩位 唔好 傷咗 和氣 。
計老納話呢 ，呢個 小喇嘛 係唔係 收埋 喺 清涼寺 裏便 ，口説 無憑 ，眼見為實 。
就 由 皇甫 居士 同 貧僧 做 個 證人 ，大家 喺 清涼寺 各個 地方 隨喜 一番 ，見 佛 拜 佛 ，遇 僧 點頭 。
每一笪地方 、每一位和尚 都 見過 嘞 ，如果 仲係 搵唔到 嗰個 小喇嘛 ，噉 就 咩嘢事 都 冇 啦 係唔係 啊 ？
講嚟講去 仲係 要 喺 清涼寺 裏 便 搜查 。
澄光 有 啲 唔 高興 嘞 ，佢 話 ：
呢幾位 喇嘛爺 喺 西藏 嚟 ，唔明白 我哋 漢人 個 規矩 就 唔怪得 佢哋 嘅 。
心溪大師 德高望重 ，點解 亦 講埋 啲 噉嘅 説話 呢 ？
呢個 小喇嘛 如果 真係 喺 五台山 上面 蕩失 咗 嘅 ，一座座 寺院 搜查 過去 ，怕 要 喺 佛光寺 開頭 至 係 。
心溪話 ：嘿嘿嘿 ，喺 清涼寺 睇過 之後 ，如果 仲 搵唔到 人 咯 ，呢 幾位 大喇嘛 願意 去 佛光寺 睇下 噉 當然 係 歡迎 之至 啦 。
巴顏話 ：有人 親眼 見到 ，呢個 小喇嘛 ，確實 喺 清涼寺 裏 便 ，我哋 噉 先至 嚟 查問 嘅 。
否則 ， 否則 亦 唔 敢 ， 亦 唔 敢 咁 ， 咁 ， 咁 昧 冒 。
巴顏 將 冒昧 兩個字 又 調轉 嚟 噏嘞 。
澄光話 ：唔知 係 邊個 人 見到 呢 ？
巴顏 向住 皇甫閣 一指 ：
係 呢位 皇甫 先生 見到 ，佢 係 極之 ，極之有名 嘅 人物 ，決唔會 係 講 大話 嘅 。
韋小寶 個 心 諗 ：你哋 明明 係 一班 自己人 ，點 做得 證人 吖 ？
佢 忍唔住 問 嘞 ：嗰個 小喇嘛 有 幾 大 㗎 ？
巴顏 、心溪 、皇甫閣 呢班人 一直 都 冇 理到 企 喺 旁邊 嗰 兩個 細路 ，忽然間 聽 佢 噉樣 問 ，都 望住 佢 。
見 佢 衣飾 華貴 ， 帽 鑲 美玉 ， 襟 釘 明珠 ， 係 個 富豪之家 嘅 公子 ， 身邊 嗰 個 小 小書童 亦 係 穿 綢 着 緞 嘅 。
噉心溪 笑住 話 ：嗰個 小喇嘛 同 公子 係 差唔多 年紀 啦 。
韋小寶 話 ：哦 ，噉 就係 喇 ，先頭 我哋 唔係 明明 見到 呢個 小喇嘛 咩 ？
佢 行咗 入 一 間 大廟 嘅 。
呢間 廟 前 便 寫住 有 字 嘅 ，吖 冇 錯 喇 ，係 佛光寺 三個 字 。
嗰個 小喇嘛 係 入咗 佛光寺 啊 。
佢 噉樣 一 講 ，巴顏 佢哋 當堂 變 咗 面色 ，澄光 就 暗暗 歡喜 嘞 。
巴顏 大聲 噉 話 ：亂講 一通 ，亂講 二通 ！
佢 以為 多咗 一通 呢 ，噉 啊 即係 更加 荒謬 。
韋小寶 笑住 話 ：亂講 三通 ，亂講 四通 ，五通 六通 七通 八通 。
巴顏 嬲 起 上嚟 ，一手 就 想 揦 韋小寶 心口 。
澄光 右手 一舉 ，衫袖 之上 一股 勁風 ，向住 巴顏 手踭 撲過去 。
巴顏 左手 伸出去 ，五隻 手指 啊 好似 雞爪 噉 ，揦 佢 堂衫 袖 。
點知 澄光 手臂 一 縮縮 翻轉 頭 ，衫袖 一下 倒卷 ，巴顏 就 揦 佢 唔到 嘞 。
巴顏 大叫 話 ： 你 窩藏 咗 我 哋 活佛 座 下 嘅 小 喇嘛 ， 仲想 ， 仲 想 逳 手 殺人 啊 ？ 作反 啊 你 。
皇甫閣 大聲噉話 ：大家 有 説話 慢慢 講 ，唔好 打 ！
佢 呢個 打字 啱啱 停口 ，廟外 便 啊 就 有 大班 人 齊聲 噉 叫 ：
皇甫 先生 有 令 ，大家 有 說話 慢慢 講 ，唔好 打 ！
聽 呢啲 聲音 啊 ，有 成 幾百 人 咁多 嘅 ，嘩 ，竟然 係 將 清涼寺 沊沊𡃈 圍住 喇 。
呢班人 聽見 皇甫閣 大聲 一 講 ，即刻 就 齊聲 呼應 ，噉 啊 顯然 係 示威 。
唔怕 你 澄光方丈 好 修養 啊 ，突然間 聽到 噉嘅 呼喝聲 ，個 心 啊 都 不由得 大為 震動 。
皇甫閣 笑吟吟 噉 話 ：澄光 方丈 ，你 係 武林 中 嘅 前輩 高人 ，喺 呢處 韜光養晦 ，大家 都 係 好 景仰 嘅 。
呢位 巴顏大喇嘛 要 喺 寶剎 各處 隨喜 ，你咪 就 由得 佢 睇下 啦 。
大和尚 行得正 企得正 ，光風霽月 ，清涼寺 裏 便 又 冇 咩 見唔得 人 嘅 事 ，大家 又 何必 失咗 武林 中 嘅 和氣 呢 ？
澄光 個心 就 着急 嘞 ， 佢 本人 嘅 武功 雖然 係 高強 啊 ， 但 係 喺 清涼寺 裏 便 呢 只 係 坐禪 説 法 ， 並 冇 傳授 過 武功 嘅 。
清涼寺 五十幾 名 僧人 ，冇 幾多 個 係 會 武功 嘅 。
先頭 同 巴顏 交手 呢一招 ，就 察覺到 佢 左手 呢一揦 嘅 雞爪功 啊 非常 厲害 。
再聽下 呢個 皇甫閣 啱先 大聲 講 嗰 幾句 説話 ，耐力 深厚 亦係 非同小可 。
都唔使 外便 幾百人 幫手 啊 ，淨係 眼前 呢 兩名 高手 唧 就 已經 唔 容易 抵擋 嘞 。
皇甫閣 見 佢 唔 出聲 ，就 笑住 話 ：
就算 清涼寺 裏 便 真係 有 幾位 美貌 娘子 ，噉 大家 瞻仰 下 亦 係 眼福 唔淺 啦 。
呢 兩句 說話 極之 輕薄 ，對 澄光 啊 已經 一啲 面 都 唔 畀 嘞 。
心溪話 ：方丈師兄 ，既然 係噉樣咯 ，就 由得 呢位 大喇嘛 到處 睇下 啦 。
講説話嘅時候 仲 努一努 個嘴 。
巴顏 就 大踏步 行去 後殿 嘞噃 。
澄光 諗 ：對方 係 有備而來 ，就算 阻得住 巴顏 同 皇甫閣 ，亦 決 阻唔住 佢哋 帶嚟 嗰班 人 嘅 。
混戰 一起 ，清涼寺 就會 遭劫 喇 。
霎時間 心亂如麻 ，唉 長歎 一聲 ，眼白白 睇住 巴顏 佢哋 幾十人 行去 後殿 ，自己 呢 ，就 只有 跟 喺 後 便 嘞 。
巴顏 、心溪 ，同 皇甫閣 三個人 細細聲 商量 。
噉佢哋 手下 幾十 人 呢 ，就 已經 逐間 殿堂 、僧房 咁 搜查 落去 。
清涼寺 班 僧人 見到 方丈 未有 號令 ，噉 一個個 啊 只有 嬲嬲 噉 睇住 佢哋 ，並冇 攔阻 。
韋小寶 同 雙兒 跟住 澄光 方丈 後 便 行 ，見 佢 嗰件 衫袖 啊 不停 咁 震動 ，顯然 個 心 呢 嬲 到 極點 嘅 。
忽然間 ，聽見 西便 僧房 裏頭 有人 大聲 噉嗌 ：係唔係佢啊 ？
皇甫閣 快步 行過去 ，兩名 漢子 啊 已經 揪住 一個 中年 僧人 出嚟 。
呢個 和尚 四十歲 咁上下 啦 ，相貌 清秀 ，噉 佢 話 ：你 捉住 我 做 咩嘢 唧 ？
皇甫閣 擰擰頭 。
嗰 兩 名 漢子 就 笑住 話 ：得罪晒 得罪晒 。就 放開 嗰 名 和尚 嘞 。
韋小寶 心中 雪亮 啊 ，呢啲 人 呀 ，係 嚟 搵 順治 皇帝 就 毫無疑問 嘞 。
澄光 冷笑話 ：本寺 呢個 和尚 ，係 活佛 座下 嘅 小喇嘛 咩 ？
皇甫閣 唔 回答 佢 ，見 啲 手下人 又 揪住 一個 中年 和尚 出嚟 ，佢 仔細 睇 下 呢個 和尚 嘅 相貌 ，又 擰擰頭 。
韋小寶 諗 ：原來 你 認得 順治 皇帝 嘅 。
噉樣 搜查 落去 ，一定 會 將 順治皇帝 搵出嚟 ，佢 係 小皇帝 嘅 父親 噃 ，我 要 想法子 保護 佢 至得 。
但係 對方 人多勢眾 啊 點樣 保護 法 呢 ？就 一啲 法子 諗唔出 喇 。
話説 幾十人 啊 一直 搜查 到 東北方 一座 小僧院 前 便 ，見到 院門 閂埋 ，就 大聲 嗌 ：開門 ，開門啊 ！
澄光 話 ： 呢 處 係 本寺 一位 高僧 坐 關 嘅 地方 ， 已經 有 七年 喇 ， 各位 唔 好 破壞 佢 嘅 修行 啊 。
心溪 又 話 ：而家 係 外人 入去 ，又唔係 坐關 嘅 和尚 熬唔住 自己 開關 嘅 ，有 咩 嘢 緊要 唧 ？
一名 身材 高大 嘅 喇嘛 大聲 話 ：點解 唔 開門 啊 ？多數 喺 裏 便 㗎 喇 。
一腳 對住 道門 就 踢 。
澄光 個 身 一 晃 ，已經 喺 佢 嘅 前面 擋住 。
嗰個 喇嘛 收 都 收唔切 ，右腳 踢 出去 啊 ，踢正 澄光 嘅 小腹 ，嘞 一聲 ，個 喇嘛 腳骨 斷咗 ，向 後 𢴈 低 。
巴顏 怪叫 一 聲 ，左手 上 伸 右手 反撈 ，都 變成 雞爪 噉樣 ，向住 澄光 揦 過去 。
澄光 擋住 個 門口 ，拂拂 兩 掌 ，將 巴顏 逼 翻開 。
皇甫閣 話 ：般若 掌 好嘢 。
左手 食指 點 出去 ，即刻 一股 勁風 向住 澄光 面門 刺過嚟 。
澄光 向 左 閃開 ，啪 一 聲 ，勁風 撞上 木門 。
噉啊澄光 用 般若掌 啊 仔細 接戰 。
巴顏 同 皇甫閣 分別 由 左右 進擊 。
澄光 嘅 招數 就 好 慢 嘅 ，一掌 一掌 噉 拍 出去 ，似乎 冇 咩 力量 。
但係 風聲 隱隱 ，顯然 勁力 又 頗為 凌厲 啊 。
巴顏 同 皇甫閣 嘅 手下 幾十人 大聲 吶喊 ，為 兩個人 助威 。
巴顏 就 搶攻 幾次 都 畀 澄光 嘅 掌力 逼 翻轉 頭 。
巴顏 焦躁 嘞 ，快速 搶攻 。
突然間 嗯 一聲 ，左手 一揚 ，幾十條 白鬚 飄咗 落地 。
原來 係 掹咗 澄光 一 紮 鬍鬚 ，但係 佢 嘅 右 膊 呢 亦 受咗 一 掌 。
初初 都 唔 覺得 點 噃， 漸漸 漸漸 佢 嘅 右手 越 嚟 越重 ， 好難 提高 。
佢 怒哮 一 聲 向 旁邊 閃開 ，跟住 四 名 喇嘛 手執 鋼刀 ，向 澄光 衝過去 。
澄光 飛腳踢低 兩個人 ，左掌 一拍 ，拍喺 第三名 喇嘛 個 胸口 。
嗰個 喇嘛 一 聲 大叫 成個 跳起 啊 ，就 喺 呢個 時候 ，第四 名 喇嘛 嘅 鋼刀 亦 斬到 嚟 。
澄光 用 衫袖 一拂 ，向 佢 手腕 捲 過去 。
只見 巴顏 雙手 一上一下 猛撲過嚟 ，澄光 向右 便 避開 佢 。
突然間 覺得 一陣 勁風 襲擊 過嚟 ，弊 ！順手 一掌 拍出去 ，就 覺得 右頰 痛到 不得了 ，原來 已經 畀 皇甫閣 用 手指 督中 。
呢一掌 雖然 係 打中咗 皇甫閣 嘅 手臂 啊 ，不過 就 唔能夠 打斷 佢 嘅 臂骨 。
雙兒 見到 澄光 一面 鮮血 ，就 低聲 問 韋小寶 ：要唔要 幫 佢 啊 ？
等 一 等 。
韋小寶 啊 志在 見到 順治 皇帝 嘅 ，如果 雙兒 出手 將 班人 趕走咗 ，老皇帝 梗係 見唔到 嘞 。
噉 何況 對方 人多 勢眾 ， 有刀 有 槍 ， 雙兒 一個 細路 女 啊 點打 到 咁 多 大漢 呢 ？
清涼寺 啲 和尚 見到 方丈 畀 人哋 圍攻 就 紛紛 搦起 棍棒 火叉 上嚟 助戰 嘞 噃 。
但 呢啲 和尚 呢 又 唔 會 武功 ，一 上嚟 唧 就 畀 人哋 打 到 頭 破 血流 。
澄光話 ：大家 唔好 逳手 。
巴顏 發惡話 ：大家 即管 放手 殺人 啦 ！
噉嗰班喇嘛 就 一啲都唔留情 嘞 ，一陣間 唧 ，有 四名 清涼寺 嘅 和尚 畀 人 斬死 。
噉 其餘啲 和尚 見到 敵人 行兇 殺人 唄 ，都 企得 遠遠 喺度 嗌 唔 敢 過嚟 。
澄光 稍為 一下 疏忽 ，又 中咗 皇甫閣 嘅 一指 ，呢 一指 呢 ，又 督 喺 佢 右 胸 。
皇甫閣 笑住 話 ：少林派 嘅 般若掌 亦 不過 如此 唧 ，大和尚 你 仲 唔 投降 啊 ？
澄光話 ：阿彌陀佛 ，施主 嘅 罪孽 唔 細 啊 。
突然間 ，兩名 喇嘛 揮刀 貼地 趢過嚟 ，斬 佢 雙腳 。
嗱 各位 ，欲知 後事 如何 ，且 聽 下回 分解 。
