前 文 再續 啊 書 接上 一回 啊 ， 話 説 北京 天橋 左近 ， 都 係 賣 雜貨 、 玩 把戲 、 江湖 閒雜人等 聚居 嘅 地方 。
韋小寶 啱啱 行到 外皮 唧 ，只見 廿幾 名 差役 蜂擁而嚟 。
兩個 捕快 帶頭 ，手 拖 鐵鏈 ，鎖住 五個 衣衫襤褸 嘅 小販 。
啲 差役 呢 ，就 舉住 七八 個 麥稈 紮成 嘅 草把 ，草把上面 就 插滿咗 冰糖葫蘆 。
呢 五個 小販 ，顯然 都係 賣 冰糖葫蘆 嘅 。
韋小寶 個 心 一 動 ，噉 啊 閃埋 一便 ，睇住 啲 差役 鎖住 五 名 小販 去 咗 嘞 。
只聽見 人叢 裏 便 有 個 老人家 歎口氣 話 ：
唉 ，呢個 年頭 ，連 賣 冰糖葫蘆 都 犯 咗 天條 咯 。
韋小寶 正 話 想 問 佢 咩 嘢 事 ，忽然間 ，聽見 啊哼 噉 咳嗽 一 聲 ，有 個 人 行埋嚟 。
彎腰駝背 ，滿頭白髮 ，原來 係 八臂猿猴 徐天川 啊 。
佢 對住 韋小寶 打 個 眼色 ，轉身 就 行 喇 。
韋小寶啊 跟 喺 佢 後便 。
行到 僻靜 嘅 地方 徐天川 話 ：
韋香主 ，大喜事啊 。
韋小寶 微微 一 笑 個 心 諗 ：
我 將 吳立身 佢哋 救 出去 嘅 事 ，佢 已經 知道 嘞 。
韋小寶 話 ：哦 ，噉 亦 冇 乜嘢 啫 。
徐天川 睩 大 雙眼 話 ：咩話 ？冇乜嘢 啊 ？總舵主 嚟 咗 啊 。
韋小寶 吃一驚 ，佢 話 ：哦 ，我 ，我師父 嚟咗 啊 ？
係啊 ，係 尋晚 到 嘅 ，要 我 設法 通知 韋香 主 ，即係 去 同 佢 老人家 見面 啊 。
哦 。
韋小寶 同 師父 分別咗 大 半年 ，功夫 呢一啲 都 冇 練到 ；
師父 一見面 ，即刻 就會 查 下 自己 練功 嘅 進境 嘞 ，噉 而家 就 唯有 交 白卷 啦 ，點算 呢 ？
就 推搪 話 ：皇帝 派 我 嚟 做件嘢 ，馬上 要 返去 匯報 嘞 ，我 做完 之後 ，再 去 見 師父 啦 。
總舵主 吩咐 ，佢 喺 北京 唔 能夠 停留 咁耐 ，請 韋香主 無論如何 馬上 去 見 佢 老人家 。
韋小寶 見 無可推託 嘞 ，只有 硬住頭皮 ，跟住 徐天川 去 天地會 聚會 嘅 地方 。
都仲未入胡同唧 ，就見到 天地會 啲 弟兄 分散 喺 街邊 巷口 ，同 總舵主 睇 水 。
入咗屋之後 ，噉啊 一道道 門 都 有人 把守 嘅 。
嚟到 後廳 ，只見 陳近南 坐 喺 正當中 ，同 李力世 、關安基 、樊綱 、玄貞道人 、祁彪清 等人 傾偈 。
韋小寶 行快 兩步 ，跪喺度 叩頭 話 ：
師父 ， 你 老人家 嚟 咗 啊 ， 弟子 想 你 啊 真 係 想 得 好 緊要 啊 。
陳近南 笑住 話 ：哈哈哈哈 ，好 ，大家 都 好 誇獎 你 啊 。
韋小寶 企起身 ，見到 師父 面色 非常 和氣 ，噉 就 冇 咁 擔心 喇 ，佢 話 ：
師父 身體 好 吖 嘛 ？
陳近南 微微笑話 ：好 。你 功夫 練得 點 啊 ？有 咩 唔明白 嘅 地方 冇 啊 ？
韋小寶啊 一直 喺度 諗 ：
師父 考查 武功 個 時候 攞 咩 說話 嚟 推搪 呢 ？師父啊 十分 精明 嘅 ，就 唔 容易 呃 ，只有 隨機應變 係 啦 ，噉 佢 話 ：
唔明白嘅 地方 好多 啊 。
就唔知 幾艱難 至 等到 師父 嚟 ，仲要 請 師父 指點 至 得 。
好 ，呢 一次 我要 為 你 停留 多 幾 日 ，好好地 教下 你 。
説話 講到 呢處 ，守門 嘅 一名 弟兄 匆匆忙忙 入嚟 報告 話 ：
啟稟 總舵主 ，有 人 拜山 ，話 係 雲南 沐王府 個 沐劍聲 同 柳大洪 噃 。
陳近南 好 歡喜 ，佢 企起身嚟 話 ：我哋 快啲 出去 迎接 。
韋小寶 話 ：弟子 都 未曾 換過 裝束 ，同 佢哋 見面 ，唔係 點 方便 嘅 。
哦係噃 ，你 喺 後 便 等 我 啦 。
噉 天地會 一行人 就 出去 迎客 ，韋小寶 行咗 去 廳 後 便 ，擔 咗 張 椅 坐 。
過咗 冇 幾耐 ，就 聽見 柳大洪 爽朗 嘅 笑聲 嘞 ：
在下 生平 有 個 志願 ，要 見 一見 天下 聞名 嘅 陳 總舵主 ，今日 得 如所願 ，真係 高興 喇 。
陳近南 話 ： 承蒙 柳老 英雄 錯愛 ， 在 下 愧不敢當 啊 。
噉 眾人 一便 傾偈 ，一便 行 入嚟 廳 ，分 賓主 坐落 。
沐劍聲 話 ：貴會 韋香主 唔 喺 呢處 啊 ？在下 想 親口 多謝 佢 。
韋香主 大恩大德 ，敝處 上下 冇 個 唔 感激 嘅 。
陳近南 仲 唔 知道 原因 好奇怪 噉 話 ：
韋小寶 一個 細佬哥 ，小公爺 咁 謙虛 太過 抬舉 啲 細佬哥 嘞 。
只聽見 一個人 大聲 話 ：
在下 師徒 同 呢位 劉 師侄 嘅 性命 ，都 係 韋香主 救 嘅 。
韋香主義薄雲天 ，在下 曾經 同 貴會 錢師傅 講 ，貴會 如果 有 用得着 我哋 嘅 地方 ，我哋 師徒 隨時 奉命 。
講説話嘅就係搖頭獅子吳立身 。
陳近南 唔明白 喇 ，就 問 ：
錢兄弟 ，係 咩嘢 一回事 啊 ？
錢老本 就 陪埋 吳立身 等 三個人 一齊 去 沐劍聲 嘅 住地 ，噉 梗係 唔 走得 啦 ，留住 飲宴 咗 一番 。
然後 沐劍聲 、柳大洪 親自 率領 一班人 ，請 錢老本 帶路 ，去 天地會 嘅 落腳地方 嚟 多謝 ，又 估唔到 總舵主 駕到 喎 。
噉 呢個 時候 陳近南 問起 ，就 簡單 噉 講咗 經過 。
話 韋香主 有 個 好 朋友 喺 皇宮 做 太監 嘅 ，受 咗 韋香主 嘅 囑託 ，不顧 危險 ，將 失陷 喺 皇宮 嘅 吳立身 佢哋 三 個 人 救 咗 出嚟 噉 。
陳近南 一 聽 ，就 知道 所謂 韋香主 嘅 好朋友 ，其實 就係 韋小寶 自己 唧 。
個心 好 歡喜 ，佢 笑住 話 ：小公爺 、柳大爺 、吳大哥 ，三位 太 客氣 嘞 。
敝會 同 沐王府 同氣 連枝 ，自己人 有 難 ，出手 幫忙 係 理所當然 ，講唔上 咩嘢 感恩報德 嘅 。
嗰個 韋小寶 係 在下 嘅 小徒 ，年紀 輕 唔懂事 ，只係 對於 呢 義氣 兩個 字 ，都 仲係 睇得 極重 嘅 。
講到 呢處 個 心 諗 ：小寶 喺 清宮 裏 便 本來 係 十分 隱蔽 嘅 ，原來 盼望 佢 能夠 刺探到 宮內 重要 機密 ，有利於 我哋 反清復明 嘅 大業 。
而家 既然 做咗 噉嘅 大事 出嚟 ，江湖 上 遲早 都 會 知道 嘅 ，如果 再 隱瞞 沐王府 就 顯得 唔夠 朋友 喇 。
吳立身 話 ：我哋 好 想 見 一見 韋香主 ，親口 多謝 佢 啊 。
陳近南 笑住 話 ：大家 都係 好朋友 ，呢件事 雖然 關係 重大 ，不過 亦 唔能夠 隱瞞 喇 。
喺 皇宮 裏 便 做 小太監 嘅 ，就係 我 嗰個 小徒 韋小寶 自己 。
小寶 ，你 出嚟 見過 各位 前輩 。
韋小寶 喺 廳 後 便 應咗 一 聲 ：係 。轉身 行 出嚟 ，向 大家 抱拳 行禮 。
沐劍聲 、柳大洪 、吳立身 等 一齊 企起 ，驚奇 到 極 。
沐劍聲 佢哋 想唔到 韋香主 就係 小太監 。
吳立身 、敖彪 、劉一舟 三個人 呢 ，就 想唔到 救佢哋 條命 嘅 小太監 ，竟然 就係 天地會 嘅 韋香主 。
韋小寶 笑笑口 噉 對 吳立身 話 ：
吳大爺 ，先頭 喺 皇宮 裏 便 晚輩 同 你 講 嘅 係 假名 ，請 你 唔好 見怪 啊 。
吳立身 話 ：喺 咁 危險 嘅 地方 ，梗係 應該 噉 㗎啦 。
我 先頭 同 敖彪 講 ，呢位 小英雄 辦事 乾淨利落 ，敢擔當 有氣概 ，確實 係 一位 了不起 嘅 人物 。
喺 皇宮 裏 便 ，點解 會 有 噉 嘅 人才 呢 ？我哋 都 覺得 好奇怪 喇 。
啊 原來 係 天地會 嘅 香主 ，噉 ，嘿 ，唔怪得 ，唔怪得 ！
講完 戙起 手指公 ，不停 咁 擰頭 ，態度 啊 非常之 欽佩 。
搖頭獅子吳立身 係 柳大洪 嘅 師弟 ，喺 江湖 上 都 頗 有 名聲 嘅 。
陳近南 聽 佢 噉 樣 稱讚 自己 嘅 徒弟 個心 好 歡喜 笑 住 話 ：
吳兄 千祈 唔好 咁 誇獎 啊 ，縱 壞咗 細佬 哥 咯 。
柳大洪 哈哈大笑 佢 話 ：哈哈哈哈哈哈哈 ，陳 總舵主 ，你 一個人 呢 佔晒 武林 嘅 好處 啊 。
武功 咁 犀利 ，名聲 咁 響亮 ，手創 嘅 天地會 咁 興旺 ，連 收 嘅 徒弟 ，都 咁 為 你 爭光 嘅 ，哈 真係 好嘢 。
陳近南 拱手 話 ：柳大爺 呢 番 説話 連 我 都 縱 壞 咗 咯 。
陳 總舵主 ，我 柳 大洪 生平 佩服 嘅 人 冇 幾多 個 㗎啫 。
你嘅 豐采 為人 ，我 真係 佩服到 極 。
日後 趕走 咗 韃子 ， 我 哋 朱五太子 登上 龍庭 ， 呢 個 宰相 呢 ， 非請 你 嚟 做 不可 啊 。
在下 無德無能 ，點敢 坐 呢個 高位 呢 ？
祁彪清 啊 插口 話 ： 柳 大爺 ， 將來 趕走 咗 清兵 ， 朱三太子 登極 做 皇帝 ， 中興 大明 ， 呢 個 天下 兵馬 大元帥 嘅 職位 ， 大家 一定 要 請 你 老人家 嚟 做 嘅 。
柳大洪 睩 大 雙眼 話 ：你 ，你 ，你 講 咩嘢 話 ？咩嘢 朱三太子 啊 ？
祁彪清話 ：隆武 天子 殉國 ，留低 嘅 朱 三 太子 ，行宮 而家 設 喺 台灣 。
第日 還 我 河山 ，朱三太子 自 不 然 正位 為 君 啦 。
柳大洪噗聲企起身話 ：天地會 呢次 救咗 我 師弟 同 徒弟 ，我 非常 多得 你哋 。
但係 大明 天子 嘅 正統 ，就 一啲 都 唔 錯得 。
祁老弟 ，真命天子 明明 係 朱五太子 。
永歷天子 乃係 大明 正統 ，天下 皆知 ，你 唔好 亂咁 講啊 。
陳近南話 ：柳大爺 你 唔好 發火 ，我哋 目前 嘅 大事 乃係 聯絡 江湖 豪傑 ，一齊 嚟 反抗 清廷 。
至於 將來 到底 係 朱三太子 定係 朱五太子 做 皇帝 ，而家 講 仲 早 ，無謂 傷 咗 自己人 嘅 和氣 吖 。
大明 帝 系 嘅 正統 屬於 邊個 ， 當然 係 一件 大事 ， 不過 亦 唔 係 我 哋 做 臣子 嘅 一時 半時 所 能夠 爭得 明白 嘅 。
嚟嚟嚟 ，擺酒 先 ，大家 痛痛快快 飲 一場 。
只要 大家 齊心協力 ，將 清兵 趕走 咯 ，咩嘢 事 唔能夠 慢慢 商量 呢 ？
沐劍聲 擰擰頭 話 ：陳 總舵主 呢番 說話 就 唔啱 嘞 。
名 不 正則 言不順 ， 言不順 則事 不成 。
我哋 保 朱五太子 ，決唔係 貪圖 咩 榮華富貴 。
陳 總舵主 只要 明白 天命 所歸 ，向 朱 五 太子 盡忠 ，我哋 沐王府 上下 冚𠾴唥 歸 陳 總舵主 驅策 ，不敢 違抗 。
陳近南話 ：天 無 二 日 ，民 無 二 主 。朱三太子 好 地地 喺 台灣 啊 。
台灣 幾十萬 軍民 ，天地會 十幾萬 弟兄 ，早就 向 朱三太子 效忠 咯 。
柳大洪 雙眼 一睩 ，大聲 話 ：
陳 總舵主 講 咩 幾十萬 軍民 、十幾萬 弟兄 ，你 想 倚 多 為 勝 啊 ？
不過 天下 千千萬萬 百姓 ，都 知道 永歷 天子 喺 緬甸 殉國 ，係 大明 最後 嘅 一位 皇帝 。
我哋 唔 立 永歷 天子 嘅 子孫 ，又 點 對得住 呢位 受盡 千辛萬苦 ，終於 死於 非命 嘅 大明 天子 啊 ？
佢 本來 聲 若 洪鐘 ，而家 大聲 一 講 ，直情 震到 耳 都 聾 啊 。
但係 講到 收尾 ，由於 心酸 嘞 ，把 聲 都 啞晒 。
陳近南 呢次 嚟到 北京 ，本來 係 知道 徐天川 為咗 唐王 、桂王 邊個 係 正統 嘅 事 ，同 沐王府 白氏 兄弟 引起 爭執 ，以致 失手 打死 咗 白寒松 。
佢 一心 以 反清復明 大業 為 重 ，噉 如果 清廷 仲 未 趕走 ，自己人 呢 就 鬥 到 不亦樂乎 ，噉 反清 大事 ，呢 定係 障礙 重重 嘅 。
所以 佢 得到 消息 之後 ，漏夜 喺 河南 趕到 嚟 京城 ，希望 以 極度 忍讓 ，取得 沐王府 嘅 原諒 。
嚟到 北京 之後 一問 ，局面 呢 ，就 比 所 預料 嘅 為 好 。
天地會 喺 北京 嘅 人員 ，由 韋小寶 率領 ，已經 同 沐王府 個 首腦 會過面 ，噉 雙方 都 冇 反面 ，睇嚟 有 轉圜 嘅 餘地 。
及至 知道 韋小寶 又 救咗 吳立身 佢哋 三個人 ，噉 徐天川 誤殺 白寒松 呢件事 一定 可以 得到 諒解 嘅 。
估唔到 祁彪清 同 柳大洪 提到 唐桂之爭 ，形勢 又 漸漸 緊張 嘞 。
而家 睇住 柳大洪 講到 永歷帝 殉國 嘅 事 ，老淚 縱橫 ，不由得 心一酸 ，佢 話 ：
永歷 陛下 殉國 ，天人 共 憤 。
古人 有 話 ：楚 雖 三 戶 ，亡 秦 必 楚 。
何況 我哋 漢人 ，多過 清兵 成百倍 。
清兵 勢力 雖然 係 強大 啊 ，我 大漢子孫 ，只 需要 萬眾 一心 ，必定 能夠 驅除 胡虜 ，還 我 河山 嘅 。
沐小公爺 、柳大爺 ，我哋 大仇 未 報 ，點 可以 自己 先 起 爭執 呢 ？
我哋 一定要 同心合力 ，殺咗 吳三桂 嗰個 嘢 ，為 永歷 陛下 保仇 ，為 沐 老公爺 報仇 ！
沐劍聲 、柳大洪 、吳立身 等 一齊 企起身 話 ：冇錯 ，冇錯 ！
有啲人 淚流滿面 ，有啲人 係 全身 發抖 都係 激動 到 無比 。
陳近南話 ：到底 正統 喺 隆武 定係 喺 永歷 ，此時此刻 亦 不必 急於 分辯 。
沐小公爺 、柳大爺 ，天下 英雄 ，只要 係 邊個 殺咗 吳三桂 嘅 ，大家 都 聽從 佢 號令 ！
沐劍聲 嘅 父親 沐天波 係 畀 吳三桂 所 殺 ，佢 日日夜夜 所 想 嘅 呢 ，就係 點樣 殺翻 吳三桂 唧 。
一聽到 陳近南 噉樣 講 ，佢 就 大聲 叫 ：冇錯 ，邊一個 殺咗 吳三桂 ，天下 英雄 都 聽從 佢 號令 。
陳近南話 ：沐小公爺 ，敝會 就 同 貴會 立 一個 誓 ，係 貴會 嘅 英雄 殺咗 吳三桂 呢 ，天地會 上下 都 聽從 沐王府 嘅 號令 。
沐劍聲 接住 話 ：係 天地會 嘅 英雄 殺咗 吳三桂 ，雲南 沐家 由 沐劍聲 打落 ，個個 都 聽從 天地會 陳 總舵主 嘅 號令 。
講完 ，兩個人 伸隻手 ，啪一聲 擊咗 一掌 。
江湖 之上 啊 ，如果 三擊掌 立誓 ，噉 就 點 都 唔能夠 再 有 反悔 㗎 喇 。
兩個人 正 話 想 擊 第二 掌 嘅 時候 ，忽然間 聽見 屋頂 上面 有 個人 話 ：
如果 係 我 殺咗 吳三桂 呢 ？
即刻 喺 東西 屋 角 上面 都 有人 大喝 ：邊個 ？
係 天地會 喺 屋上 守衞 嘅 人 查問 啊 。
跟住 輕輕 𠻘 一聲 ，有 個人 喺 瓦面 跳落嚟 天井 。
大廳 嘅 屏風窗 一 開 ，有 個 黑影 快 到 無比 噉 閃咗 入嚟 。
東便 關立基 、徐天川 ，西便 柳大洪 、吳立身 同時 攔 佢 。
嗰個人 輕輕 一跳 ，跳過 四個 人 頭頂 ，就 已經 企喺 陳近南 同埋 沐劍聲 面前 嘞 。
關 、徐 、柳 、吳 四個人 ，居然 唔能夠 將 呢個人 攔住 。
但係 當 呢個 人 啱啱 落地 唧 ，四個 人 嘅 手指 都 已經 揸住 咗 佢 嘞 。
關立基 揸 住 佢 右 膊 ， 徐天川 呢 揦 住 佢 右 便 小 掩 ， 柳大洪 捻 住 佢 左手 ， 吳立身 就 兩隻手 一齊 嚟 啊 ， 揸 住 佢 條 後腰 。
四個人 使嘅 ，都係 上乘 擒拿手法 。
嗰個人 並冇 反抗 噃 反而 笑住 話 ：天地會 同埋 沐王府 係 噉樣 對付 好朋友 嘅 咩 ？
只見 呢個 人 一身 青布 長衫 ，約莫 二十三歲 ，身材 高高瘦瘦 ，睇 個 樣 係 個 文弱 書生 。
陳近南 抱拳 行禮 話 ：足下 尊姓大名 ？係唔係 好朋友 啊 ？
嗰個 書生 笑住 話 ：唔係 好朋友 亦 唔嚟 嘞 。
突然間 身體 一縮 ，關立基 等 四個人 嘅 手 ，突然間 一鬆 ，都 揸空 咗 。
只得見叻一聲 ，一團青影 向上飛起 。
陳近南 一聲 長笑 ，右手 飛 咁快 揸過去 。
嗰個 書生 啱啱 擺脱 四個 人 嘅 掌握 ，猛然間 ，覺得 左腳 腳眼 一緊 ，就 好似 畀 鐵箍 一樣 噉 箍住 。
佢 右腳 即刻 踢出去 ，直 踢 陳近南 嘅 面門 。
呢一腳啊 好大力㗎 。
陳近南 順手 扚起 身邊 嘅 茶几 一擋 ，嚇一聲 ，一張 酸枝 茶几 當堂 粉碎 。
陳近南 右手 一捹 ，將 佢 掟落地 。
嗰個 書生 𦣇 柚 掂 地 ，個 身 好似 喺 水面 滑行 噉 ，𠻘 ，喺 地 下一直 𨃩 出去 幾 丈 遠 ，條 腰 一 挺 ，靠住 牆 企 翻 起 身 。
關立基 、徐天川 、柳大洪 、吳立身 四個人 嘅 手 ，各自 揸住 一塊 布 。
原來 係 將 嗰個 書生 着住 嗰件 青布 長衫 ，各人 啊 扯爛咗 一窟 。
呢幾下 兔 起 鹘 落 ，動作 迅捷 無比 。
六個人 出手 又 乾淨利落 ，旁觀 啲 人 啊 睇得 清清楚楚 ，忍唔住 大聲 喝彩 啊 。
而 喝彩 最大聲 嘅 ，就係 嗰個 鐵背蒼龍 柳 大洪 。
吳立身 係 猛 咁 擰頭 真係 又 慚愧 又 佩服 。
陳近南 微微笑話 ：閣下 既然 係 好朋友 ，點解 唔 請 坐 飲茶 呢 ？
嗰個 書生 拱手 行禮 話 ：多謝 。
向住 眾人 沊沊𡃈 作咗 個 揖 ，就 行去 最 拉尾 嗰 張 椅 坐落 。
陳近南 笑住 話 ：閣下 何必 太 謙 呢 ？請 上座 。
不敢 ， 不敢 ， 在 下 能夠 同眾位 英雄 一齊 坐 ， 已經 係 生平 最大 嘅 幸福 嘞 ， 仲點 敢 上 座 吖 ？
陳 總舵主 ，你 先頭 問 我 姓名 都 嚟唔切 回答 ，非常 失敬 ，
在下 姓 李 ，草字 西華 。
陳近南 、柳大洪 等人 聽 佢 自報 姓名 都 諗 ：
武林 之中 ，冇 聽過 李西華 呢個 人 噃 ，多半 係 假名 喇 。
但 係 少年 英雄 之中 ， 亦 冇 聽 過邊 一位 有 咁 高 嘅 武功 嘅 。
陳近南話 ：在下 孤陋寡聞 ，江湖上 出咗 閣下 噉樣 一位 英雄 竟然 唔 知道 ，實在 好 慚愧 。
哈哈哈哈 ，人哋 話 天地會 陳 總舵主 待人 誠懇 ，果然 名不虛傳 。
你 聽 咗 賤名 如果 話 久仰 久仰 噉 ， 噉 在 下 嘅 心 呢 ， 就 未免 有 三分 睇 你 唔 起 咯 。
在下 初出茅廬 ，江湖 上 半點 名堂 都 冇 ，連 我 自己 都 唔 久仰 自己 ，何況 別人 吖 ？哈哈哈哈哈哈 。
陳近南 微微笑話 ：今日 呢次 相會 之後 ，李兄 大名 就 會 喺 江湖 上 傳播 開去 。
此後邊個 見到 李兄 ，都 要 話 一聲 久仰久仰 咯 。
陳近南 呢 句 説話 實際上 係 極高 嘅 讚譽 ，人人 都 聽得出 嘅 。
天地會 、沐王府 嗰 四大高手 居然 攔 佢 唔住 ，捉 佢 唔實 。
陳近南 同 佢 對咗 兩 招 ，亦 不過 係 略佔 上風 唧 。
噉樣嘅 身手 ，唔使 幾日 啊 自不然 如 遠近 都 知 聞 喇 。
李西華 耍耍手話 ：唔係唔係啊 ，在下 啱先 所使嘅 ，都不過係 小巧功夫 ，未免 有啲 旁門左道 嘞 。
呢位 大爺 使 招 雲中 現 爪 ，捻到 我 手臂 啊 爭啲 斷 咁滯 。
呢 位 鐘意 擰 頭 嘅 鬍鬚 佬 朋友 呢 ， 雙手 揸 住 我 後腰 ， 睇 嚟 必定 係 一招 搏兔手 喇 ， 哎呀 揸 到 我 喊 又 唔 係 ， 笑 又 唔 係 。
呢位 白鬍鬚 老公公 呢一招 白猿 取 桃 ，真係 將 我 小 掩 嚿 肉 啊 ，當做 蟠桃 噉 出力 揸實 噃 ，點 都 唔肯 放 。
呢 位長 鬍鬚 朋友 使 呢 一手 ， 誒 誒 ， 招數 巧妙 ， 係 唔 係 城隍 摱 小鬼 啊 ？
關立基 即刻 戙起 手指公 ，話 佢 講得 啱 。
其實 呢一招 本來 叫 小鬼 摱 城隍 嘅 ，佢 調轉頭 嚟 講 ，即係 自己 謙啫 。
嗱 各位 ，欲知 後事 如何 ，且 聽 下回 分解 。
