前文 再續 啊 書 接 上 一回 啊 ，話説 錢老闆 又 送 咗 一隻 燕窩 人參 豬 嚟 畀 韋小寶 ，又 靜靜 塞 咗 張 字條 畀 佢 。
噉 韋小寶 返去 自己 間 屋 嘅 時候 ，佢 一路 行 就 一路 諗 ：
錢 老闆 呢 個人 啊 真 係 聰明 啊 。
第一次 ，喺 隻 死豬 裏 便 收埋 個人 入 宮 ；
噉 第二次 如果 再 送 隻 死豬 入 宮 呢 ，少不免 會 引人 懷疑 㗎 ，咪 索性 送 隻 生豬 入嚟 ，等 佢 喺 御膳房 裏 便 餵 ，噉 就 乜嘢 蠱惑 都 冇 啦 。
就算 本來 有人 要 懷疑 啊 ，噉 就 乜嘢 疑心 都 冇晒 喇 。
嗯 ， 冇 錯 喇 冇 錯 喇 ， 要 出術 呃 人 呢 ， 不但 事前 要 想 得 周到 ， 事後 一有 機會 啊 ， 仲要 再補 下 漏洞 至 得 。
噉佢又諗 ：呢張字條 只有 請 小郡主 睇下 啦 ，死人頭 佢 嘩 ，有 說話 唔會 當面 講 咩 ？寫 乜鬼 嘢 字條 吖 。
好喇 ，佢 行翻 入 屋 ，沐劍屏 就 話 ：
桂大哥 ，有人 嚟到 門口 外便 ，好似 係 送飯菜 嚟 嘅 ，實 係 見到 道 門 鎖住 ，就 冇 敲 門 就 走 喇 。
韋小寶 話 ：你 點知 係 送飯菜 嚟 㗎 ？
哈 你 哋 聞到 飯菜 香 呢 ， 實 係 餓 得 好 緊要 定 喇 係 咪 呢 ？ 點解 唔 食 啲 糕餅 點心 呢 ？
沐劍屏 咭咭聲 咁 笑佢 話 ：老實 唔客氣 ，食完 喇 。
方怡話 ：桂 ，桂大哥 ，你 ，你有冇 。
講到 呢處 就 窒住 唔 講 嘞 。
韋小寶 話 ：你 話 劉師哥 嘅 事 係 嘛 ？
我 都 未 查到 啊 ，宮 裏 便 啲 侍衞 講 ，冇 捉到 姓 劉 嘅 人 喎 。
方怡 低聲 話 ：多謝 你 喇 ，不過 唔知 係咪 畀 佢哋 殺咗 呢 ？
劉師哥 就算 係 畀 佢哋 捉住 ，亦 唔會 話 係 姓 劉 嘅 ，大家 都 講 定 㗎 喇 ，佢 冒充 姓 夏 。
吳三桂 嘅 女婿 姓 夏 嘅 。
劉師哥 會 招供 話 ，嗰個 姓 夏 嘅 係 佢 叔父 。
韋小寶 啊 笑嘞 ：噉 你 豈不是 變成 吳三桂 嘅 親戚 ？
小郡主 連忙 話 ：係 假 㗎嘛 。
韋小寶 話 ：唉 不過 方姑娘 想 做 吳三桂 咩 侄孫 心抱 啊噉 ，噉 亦 做唔成 喇 。
你 嗰 個 劉 師哥 就算 趯 出去 啊 ， 佢 喺 外 便 想 你 ， 你 喺 宮裏 便 想 佢 。
一 世人 你 想 我 我 想 你 噉 ， 一對 情人 見 唔 到 面 ， 豈不是 好 難捱 ？
方怡 塊面 又 試 紅起 上嚟 嘞 佢 話 ：
我 點 會 喺 皇宮 裏 便 等 一世 唧 。
啲 姑娘 啊 一 入咗 皇宮 ，仲 點 有 翻得 出去 嘅 日子 啊 ？
好似 你 噉樣 ，羞花 閉月 嘅 大姐仔 ，我 小桂子 見到 就 想 娶嚟 做 老婆 喇 。
如果 畀 皇帝 睇見 咗 啊 ，非 封 你 做 皇后 娘娘 不可 。
方姑娘 ，我 勸 你 呢 ，仲係 做 皇后娘娘 罷啦 。
我 唔同 你 講 喇 ，你 講親 嘢 總係 激 我 嘅 。
韋小寶 笑一笑 ，將 手裏 便 嘅 字條 交畀 沐劍屏 佢 話 ：
小郡主 ，你 讀 下 張 字條 。
沐劍屏 接咗 過嚟 讀 ：高升茶館 講 英烈 傳 ，啲 係 咩嚟㗎 ？
韋小寶 已經 明白 其中 道理 嘞 ，即係話 天地會 嘅 人 有事 見 我 ，請 我 去 茶館 相會 。
噉佢笑住話 ：枉你係 沐家 後代 啊 ，連 英烈 傳 都 唔 知道 喎 。
沐劍屏話 ：咩嘢 唔知道 啊 ？英烈 傳 我 梗係 知道 㗎 ，係 太祖 皇帝 龍興 開國 嘅 故事 咯 。
嗱噉 我 問下 你 ，有 一回 書 叫做 沐王爺 三戰 定 雲南 ，桂公公 雙手 抱 佳人 你 聽過 未 吖 ？
切 ！我哋 黔寧 王爺爺 平定 雲南 ，英烈 傳 裏頭 梗係 有 㗎 。
之咩 桂公公 雙手 ，即邊度 有 唧 ？
你 話 桂公公 雙手 抱 佳人 冇 呢件事 啊 ？
梗係冇啦 ，你 生 安白 造 嘅 啫嘛 。
嗱 我 哋 輸 賭 吖 嗱， 如果 有 又 點樣 ， 冇 又 點樣 。
英烈傳 嘅 故事 我 都 聽到 熟晒 咯 ， 梗 係 冇 㗎 啦 ， 輸 乜嘢 都 可以 。
方師姐 ，冇 佢 講 呢件事 嘅 係咪 ？
方怡仲 未 回答 ，韋小寶 已經 啪聲 跳 上 床 ，連 鞋 一齊 蜎 入 被竇 瞓 喺 兩個人 中間 。
左手 啊 攬住 方怡條 頸 ， 右手 啊 攬住 沐劍屏 條 腰 佢 話 ： 我話 有 就 係 有 喇 。
方怡 同 沐劍屏 同時 吖噉 叫 一 聲 ，都 嚟唔切 閃避 ，已經 畀 佢 緊緊 抱住 嘞 。
沐劍屏 用 右手 將 佢 出力 一 推 ，韋小寶 又 乘機 側過 頭 ，喺 方怡 嘅 嘴 處 吻 咗 一下 ，讚 佢 話 ：好香啊 ，好香啊 。
方怡 啱啱 想 掙扎 ，個 身 輕輕 逳 一逳 唧 ，心口 肋骨 啊 斷 個 地方 呢 痛到 好 厲害 ，噉 唯有 左手 翻過嚟 ，啪 一聲 打咗 佢 一下 。
韋小寶 笑住 話 ：哎呀 謀殺 親夫 啊 ，謀殺 親夫 啊 。
咯碌 一 聲 喺 被竇 跳出嚟 ，攬住 沐劍屏 亦 接咗 個 吻 ，又 讚佢 話 ：一樣 咁 香 。
跟住 哈哈大笑 ，跟手 攞咗 包 衣服 ，趯咗 出 屋 ，反鎖 翻 道 門 。
韋小寶 嘅 住處 係 喺 乾清門 西 ，南庫 南便 嘅 御膳房 旁邊 。
噉佢 向北 繞過 養心殿 ，屈翻去 西便 ，過 西三橋 、養華門 、壽安門 ，向北 過 壽安宮 、英華殿 嘅 旁邊 ，轉過 東便 ，過 西鐵門 ，就 向北 出咗 神武門 嘞 。
神武門 係 紫禁城 嘅 後門 ， 一出 咗 神武門 就 係 出 咗 皇宮 ， 噉 佢 直筆 去 高升 茶館 嘞 。
一坐定 ，茶博士 沖咗 茶 ，就 見到 高彥超 慢慢 行埋嚟 同 佢 打個眼色 。
韋小寶 岌一岌頭 ，見 高彥超 出咗 茶館 喇 ，於是 就 飲咗 幾啖 茶 ，喺 枱面 掉低 一 錢 銀 佢 話 ：
今日 呢 回 書 都 冇 咩 聽頭 嘅 。
噉就 行咗 出去 ，果然 見到 高彥超 喺 街角 嗰度 等 ，再 行 幾步 ，有 兩 頂 轎 喺 處 。
韋小寶 坐咗 一頂 ，高彥超 呢 自己 跟住 行 一橛 路 ，四面 睇下 見到 冇 人 跟尾 嘞 ，就 坐 上 另外 一頂 轎 。
轎夫 行得 好快 啊 ，健步如飛 ，行咗 一 餐 飯 咁 耐 就 到 嘞 。
韋小寶 落咗 轎 ，見 係 一座 小小 嘅 四合院 ，就 跟住 高彥超 行 入去 裏便 。
一入大門 ，就 見 天地會 嗰班 兄弟 迎上嚟 ，躬身 行禮 。
呢個 時候 李力世 、關安基 、祁彪清 等 人 呢 ，亦都 由 天津 保定 趕到 嚟 。
此外 樊綱 、風際中 、玄貞道人 ，同埋 嗰個 錢老闆 都 喺 齊處 。
韋小寶 笑住 問 ：錢老闆 ，你 到底 尊姓大名 啊 ？
錢老闆 話 ：不敢 ，屬下 真係 姓 錢 嘅 ，個 名 叫做 老本 ，係 本來 個 本 。
意思 呢 即係 做生意 就 蝕咗 老本 噉 解 。
韋小寶 哈哈大笑 話 ： 哈哈 你 叻 啊 真 喇 ， 如果 真 係 做生意 啊 ， 人 哋 嘅 本錢 畀 你 賺 清光 咯 。
韋香主 ，你 誇獎 嘞 。
噉 眾人 將 韋小寶 啊 請 去 上房 坐落 。
關安基 心急 啊 佢 話 ：韋香主 ，你 睇下 。
講完 就 遞咗 一張 大紅泥金 請帖 畀 佢 ，上便 係 寫咗 幾行 字 嘅 。
韋小寶 接 都 唔 接 ：呢啲 字 啊 ，佢哋 識得 我 ，我 呢 同 佢哋 冇 乜 交情 ，我哋 係 第一次 見面 啫 ，唔 識 。
錢老本 話 ：韋香主 ，係 張 請帖 嚟 ，請 我哋 去 食飯 嘅 。
韋小寶 話 ：噉 好到極啦 ，邊個 咁 賞面 啊 ？
錢老本 話 ：請帖 上面 寫嘅 名 係 沐劍聲 。
沐劍聲 ？
佢 就係 沐王府 嘅 小公爺 啊 。
啊 ，花雕 茯苓 豬 嘅 哥哥 。
冇 錯 嘞 。
係唔係 請 我哋 大家 去 啊 ？
佢 請帖 上面 寫得 好 客氣 ，請 天地會 青木堂 韋香主 ，率 同 天地會 眾位 英雄 一齊 去 赴宴 ，就係 今晚 ，喺 朝陽門 內 南豆芽胡同 。
咦 ？呢次 又 唔 喺 楊柳胡同 喇 ？
冇錯咯 ，喺 京城 做事 ，落腳 嘅 地方 要 時時 調換 至 得 。
你 諗 佢 係 咩 意思 呢 ？
唔通 喺 酒飯 裏 便 落 蒙汗藥 ？
李力世 話 ：照道理 講 ，雲南 沐王府 喺 江湖 上 咁 大 嘅 名堂 ，沐劍聲 又 係 小公爺 嘅 身份 ，係 同 我哋 總舵主 平起平坐 個 大 人物 ，決 唔會 使 呢啲 噉 下三濫 嘅 勾當 嘅 。
不過 會無好 會 ， 宴無好 宴 ， 韋香主 噉 嘅 顧慮 亦 不可不 防 啊 。
韋小寶 話 ：我哋 去 唔去 食 呢 餐 飯 呢 ？
哼 ，宣威火腿 、過橋米線 、雲南汽鍋雞 ，噉即係 有得 打牙祭 咯喎 。
大家 你 望 我 我 望 你 都 唔 出聲 ， 過 咗 好 耐下 關安基 話 ：
大家 要 請 韋香 主 指示 啊 。
韋小寶 啊 笑住 話 ：一餐 好酒 好餸 今晚 大家 總係 有得食 嘅 。
嗱 ，如果 要 太太平平 ，就 等 我 嚟 做 東 ，我哋 上 酒樓 ，食完 飯 呢 ，再 嚟 推 牌九 賭錢 ，叫 花姑娘 亦 可以 ，噉 都 係 兄弟 畀 錢 。
你哋 如果 想 幫 我 慳錢 呢 ，噉 大家 就 去 食 嗰個 姓 沐 嘅 。
呢番 説話 講得 慷慨大方 ，其實 係 十分 滑頭 啊 ，去唔去 赴宴 ，自己 唔 揸 主意 。
關安基話 ：韋香主 請 各位 兄弟 吃喝玩樂 噉 啊 最 開心 㗎 喇 。
不過 呢個 姓 沐 嘅 請 我哋 ，如果 唔去 呢 ，就 不免 滅 咗 天地會 嘅 威風 噃 。
韋小寶 話 ：噉 你 話 應該 去 嘞 噃 ？
跟住 將 眼光 轉到 李力世 、樊綱 、祁彪清 、玄貞 、風際中 、錢老本 、高彥超 等 人 嗰處 ，見到 佢哋 都 慢慢 岌一岌頭 。
韋小寶話 ：大家 都 話 去噉 我哋 去 啦 ，去食 佢 嘅 ，飲 佢 嘅 。
兵 來 將 擋 ，水 來 土 掩 ，茶 來 伸手 ，飯 來 張口 ，噉 毒藥 嚟 呢 ？我 就 咕 一 聲 ，亦都 吞 鬼 埋 佢 落 肚 就係 喇 。
呢啲 叫做 英雄 不怕死 啊 怕死 不 英雄 啊 。
李力世 話 ：大家 都 小心 在意 ，總係 睇得出 一啲 嘢 嘅 。
大家 商量 好喇 ，有啲 飲茶 有啲 又 唔 飲 ，有啲 飲酒 ，有啲 又 唔 飲 ，有啲 唔食肉 有啲 唔食魚 。
就算 佢哋 落毒 啊 ，亦 唔 能夠 畀 佢哋 一網打盡 。
但係 如果 大家 乜嘢 都 唔食 呢 ，就 會 畀 佢哋 笑 㗎 喇 。
噉 眾人 商量 妥當 嘞 ，傾咗 一陣 閒偈 ，
等到 申牌 時分 ，即係 而家 講 下午 三點 到 五點 啦 ，噉 啊 韋小寶 除咗 太監 嘅 服飾 ，又 打扮 成 個 公子哥兒 噉 嘅 樣 。
佢 仍然 係 坐咗 轎 ，咪 班人 簇擁住 佢 ，就 去 南豆芽胡同 嘞 。
南豆芽胡同 大概 離開 青木堂 嗰間 四合院 啊 兩里 路 遠 啦 ，頂轎 啱啱 停低 ，就 聽見 打鼓 奏樂 嘅 聲音 。
韋小寶 落咗 轎 ，就 聽見 吹 嘀嗒嘞 ，個 心 諗 ：娶 新抱 啊 乜 咁 熱鬧 嘅 ？
只見 一座 大屋 ，大門 打開 ，十幾個 人 衣冠楚楚 企 喺 門口 迎接 。
當 先 一個人 係 個 二十五六歲 嘅 青年 ，身材 高高瘦瘦 ，英氣勃勃 ，佢 話 ：
在下 沐劍聲 ，恭迎 韋香主 大駕 。
韋小寶 呢排 結交 親貴官宦 ，對方 呢種 執禮 甚恭 嘅 局面 呢 見到 慣晒 。
開講 有話 居移氣 ， 養移體 ， 佢 日日 同 皇帝 做伴 ， 咩 嘢 親王 、 貝勒 、 尚書 、 將軍 ， 時時 見面 ， 亦 唔 當 係 咩 嘢 一 回事 。
因此 年紀 雖然 係 細 啊 ，已經 自然而然 噉 有 一股 威嚴 氣象 。
沐劍聲 名氣 雖然 係 大啫 ，不過 亦 大唔過 康親王 、吳應熊 呢啲 人 嘞 ，佢 拱 一 拱手 話 ：
小公爺 真係 禮勻 喇 ，在下 唔敢當 。
睇下 佢 嘅 相貌 ，見到 佢 面口 黑黑哋 ，眉目 之間 同 小郡主 沐劍屏 啊 依稀 有 啲 相似 。
沐劍聲 早就 知道 天地會 喺 北京 嘅 首領 韋香主 係 個 細路 ，又 聽 白寒楓 話 呢個 細路 武藝 低微 ，油嘴滑舌 ，係 個 無賴仔 。
估計 佢 不過 係 恃住 師傅 陳近南 做 靠山 先至 做得 香主 嘅 啫 。
而家 見到 佢 神色 鎮定 ，一副 漫不在乎 嘅 樣 ，個 心 諗 ：
呢個 細路 都 怕 有 啲 來頭 嘅 。
噉啊 請 佢哋 入去 嘞 。
大廳 裏頭 啲 椅 ，冚𠾴 唥 套咗 紅 緞 椅套 ，仲有 錦墊 添 ，噉 各人 都 分 賓主 坐落 。
聖手 居士 蘇岡 ，白寒楓 同埋 其餘 十幾 個 人 都 垂手 企 喺 沐劍聲 後 便 。
沐劍聲 同 李力世 、 關安基 等 人 逐一 逐二 請問 姓名 ， 噉 講 咗 好多 久仰大名 等等 嘅 客套 説 話 。
李力世 佢哋 都 諗 ：呢位 沐家 小公爺 都 冇 乜 架子 噃 ，講説 話 依足 咗 江湖 上 嘅 規矩 嘅 。
僕人 送上 香茶 ，噉 大廳 門口 嘅 鼓樂手 呢 又 試 吹奏 起嚟 嘞 ，乃係 歡迎 貴賓 嘅 隆重 禮儀 。
跟住 ，沐劍聲 吩咐 話 ：開席 ！
噉啊 請 大家 行 入 內廳 。
下人 閂埋 咗 廳門 。
內廳 當中 係 一張 八仙枱 ，鋪咗 繡花 嘅 枱圍 。
下首 便 左右 各 有 一圍 ，噉 啊 枱 上 器皿 陳設 ，雖然 冇 康親王府 咁 闊綽 啊 ，不過 都 頗為 精緻 嘅 。
沐劍聲 微微 躬身 佢 話 ：請 韋香主 上座 。
韋小寶 睇下 呢個 局面 ，呢個 首席 應當 係 自己 坐 喇 ，佢 話 ：
噉啊 我哋 唯有 唔客氣 喇 。
沐劍聲 坐 喺 下首 主位 陪 佢 。
噉 各人 坐定 之後 ，沐劍聲 話 ：有請 師傅 。
蘇岡 同 白寒楓 行 入 內室 ，陪 咗 一個 老人家 出嚟 。
沐劍聲 起身 話 ：師父 ，天地會 青木堂 韋香主 今日 大駕光臨 ，真係 畀足面 喇 。
韋香主 ，呢位 柳 老師傅 係 在下 嘅 受業 恩師 。
韋小寶 企 起身 拱手 行禮 話 ：久仰 。
只見 呢個 老人家 身材 高大 滿面 紅光 ，白鬚 稀稀落落 ，有 七十幾歲 咁上下 啦 ，精神 飽滿 ，雙目 炯炯 有神 。
嗰個 老人 望 一望 韋小寶 ，佢 笑住 話 ：
天地會 近來 好大 嘅 名堂 喇 。
佢 聲音 好 響亮 ，呢 幾句 説話 隨口 噏 嘅 啫 ，不過 同 常人 放大 喉嚨 嗌 咁 大聲 ，跟住 話 ：
果然 係 英才輩出 ，韋香主 咁 少年 ，確係 武林 少見 嘅 奇才 啊 ，哈哈哈哈哈哈 。
韋小寶 笑住 話 ：係 少年 噉 就 唔錯 嘅 ，只不過 既 唔係 英才 ，更 唔係 奇才 ，其實 呢 ，係 個 蠢才 唧 。
呢嗰日啊 ，畀 白師傅 捻住 隻手 ，逳 都 唔逳得 ，痛到 我 啊 眼淚水 都 流出嚟啊 。
在下 嘅 武功 啊 實在 係 水皮 到 極 ，哈哈哈哈 真係 好笑 喇 ，哈哈 ，真係 好笑 喇 。
眾人 一 聽 ，不禁 愕然 啊 。
白寒楓 嘅 面色 就 更加 難睇 嘞 。
嗰個 老人 哈哈哈 噉 又 笑咗 一陣 ，佢 話 ：
韋香主 性情 爽直 ，果然 係 英雄 本色 ，老夫 有 三分 佩服 喇 。
韋小寶話 ：三分佩服啊 ？嘿 ，多過頭嘞 多過頭咯 ，有一分半分 ，唔將 在下 當做 乞兒仔 、馬騮仔 噉 就 幾好嘞 。
嗰個 老人 又 試 哈哈大笑 話 ：
哈哈哈哈哈哈 ，韋香 主講 笑喇 ，哈哈哈哈 。
玄貞道人 話 ： 老前輩 係 咪 威震 天南 ， 武林 人士 稱呼 你 係 鐵 背 蒼龍 嘅 柳 老 英雄 啊 ？
嗰個 老人 話 ：冇錯 ，玄貞道長 都 仲 知道 老夫 嘅 賤名 。
玄貞心中一震啊 ：我 仲未曾 介紹 ，佢 已經 知道 我 個名 嘞 ，沐家 呢次 真係 準備得 十分 周到 噃 。
鐵背蒼龍柳大洪成名好耐 ，聽講 當年 沐天波 對佢 亦 好 敬重 嘅 。
清軍 打平 雲南 ，柳大洪 出盡 全力 救護 沐氏 遺孤 ，沐劍聲 就係 佢 嘅 親傳 弟子 ，乃係 沐王府 裏 便 除咗 沐劍聲 之外 嘅 第一號 人物 。
於是 躬身 話 ：柳老 英雄 當年 怒江 誅 三霸 ，騰衝 殺 清兵 ，俠名 傳播 於 天下 。
江湖 的 後生 小輩 講起 老英雄 嚟 ，冇 一 個 唔 敬仰 嘅 。
柳大洪話 ：嘿嘿嘿嘿 ，嗰啲 係 好多 年前 嘅 事 咯 ，仲 講 佢 嚟 做 乜嘢 吖 ？
但係 面色 睇上嚟 啊 十分 歡喜 。
沐劍聲話 ：師父 ，你 老人家 陪 韋香主 坐 。
好啊 。
柳大洪 就 喺 韋小寶 身邊 坐低 。
呢張 八仙枱 向 外 嗰 便 呢 係 空 嘅 ，唔 坐 人 。
上首便 ，係 韋小寶 、柳大洪 ，左手 係 李力世 、關安基 ，右首便 下座 係 沐劍聲 ，上座 係 空 嘅 ，等 人 嚟 。
天地會 啲 人 都 諗 嘞 ：你 沐王府 又 要 請 一個 咩 厲害 嘅 人物 出嚟 呢 ？
只聽見 沐劍 聲話 ：扶 徐師傅 出嚟 坐下 ，等 各位 好朋友 見咗 都 放心 啦 。
蘇岡話 ：係 。
入去 裏頭 又 扶 咗 一個 人 出嚟 。
李力世 等人 一見 啊 真係 又 驚 又 喜 一齊 叫 ：徐三哥 ！
呢 個人 彎腰駝背 ， 正 係 八臂 猿猴 徐天川 啊 。
佢 個 面色 黃紙 噉 傷勢 都 未 好 ，但係 條命 呢 ，顯然 已經 係 唔緊要 喇 。
天地會 群雄 一齊 圍上去 紛紛 問好 ，歡喜 到 極 。
沐劍聲 指住 自己 上首 便 嘅 座位 佢 話 ：徐師傅 請過嚟 呢 便 坐 啦 。
徐天川 行前一步 ，向 韋小寶 躬身 行禮 話 ：韋香主 ，你好啊 。
韋小寶 抱拳 還禮 話 ：徐三哥 你好 ，近來 膏藥 生意 ，唔係 點 發財 呢 ？
徐天川 歎 一口氣 話 ：唉 ，直情 冇 生意 啊 。
屬下 畀 吳三桂 手下 嘅 走狗 捉咗 去 ，爭啲 老命 都 冇埋 ，好在 多得 沐家 小公爺 同埋 柳老英雄 搭救 噉 先至 脱險 咋 。
天地會 群豪 都 打 個 突 。
樊綱話 ：徐三哥 ，原來 嗰日 嘅事 係 吳三桂 手下 嗰批 漢奸 做 㗎 ？
徐天川 話 ：係囉 。
呢批 漢奸 撞入嚟 回春堂 捉咗 我 去 ，
嗰個 盧 ，盧一峰 嗰個 狗賊 鬧咗 我 一輪 ，將 一帖 膏藥 貼住 我 個 嘴 ，話 要 餓死 我 呢個 老嘢 喎 。
大家 聽見 盧一峰 都 在 內 ，噉 一定 係 唔會 錯 㗎喇 。
樊江 、玄貞 等人 一齊 向 蘇岡 、白寒楓 話 ：嗰日 真係 唔好意思 喇 。
眾位 英雄 義氣 深重 ，我 天地會 感激 不盡 啊 。
蘇岡話 ：不敢 ，我哋 只係 奉咗 小公爺 嘅 命令 辦事 唧 ，冇 咩嘢 功勞 。
白寒楓 就 哼咗 一 聲 ，顯然 搭救 徐天川 嘅 事 呢 佢 完全 唔同意 嘅 。
關安基話 ：徐三哥 畀人 擄咗去 之後 我哋 到處 去 查察 都 搵唔到 ，呢份 焦急 呢 真係 唔使 講 嘞 。
貴府 居然 救翻 徐三哥 出嚟 真係 令人 十分 佩服 啊 。
蘇岡話 ：吳三桂 手下 嘅 雲南 狗官 都 係 沐家 嘅 死對頭 ，我哋 梗係 盯得 佢哋 好 緊 啦 。
呢個 狗官 冒犯 徐三哥 畀 我哋 發覺咗 亦 冇 咩 稀奇 嘅 。
嗱 各位 ，欲知 後事 如何 ，且 聽 下回 分解 。
