前 文 再續 啊 書 接上 一回 啊 。
話 說 韋小寶 攞 啲 化 尸 粉 ， 糝 咗 落瑞 棟 嘅 屍體 傷口處 ， 冇 幾耐 ， 瑞 棟 嘅 屍體 就 爛成 兩 橛 嘞 。
韋小寶 攞起 張 凳 ，用 凳腳 將 兩 橛 屍體 都 推 喺 黃水 裏 便 ，噉樣 過咗 大半個 時辰 ，冚𠾴唥 變為 黃水 。
佢 唞咗 個 大氣 個 心 諗 ：
老舉乸 就算 派 百萬 兵馬 ，去 五台山 咁 遠 都 捉唔到 瑞棟 喇 。
噉佢 去 水缸 𢳂 水 洗地 ，噉啊 洗咗 去 屍首 流出嚟 嘅 黃水 。
都冇 沖得 幾殼 水唧 ，一趢 低 喺 床處 ，因為 攰到 極 啊 ，就噉 就 噘噘聲 就 瞓咗 咯 。
瞓 醒 嘅 時候 ， 個天 已經 光晒 喇 ， 只 係 覺得 心口 好 煩悶 ， 噉 噁 噁 聲作 一輪 嘔 ， 又 嘔 唔 出 咩 嘢 。
沐劍屏 好 關心 噉 問 佢 ：
桂大哥 ，你 見 點 啊 ？好啲 啦 嘛 ？
韋小寶 坐咗 起身 ，噉 先至 知道 自己 喺 方沐 兩個人 嘅 腳邊 ，和衣 瞓咗 半晚 ，連忙 跳落 床 佢 話 ：
我 趕住 去 見 皇帝 啊 ，你哋 瞓 喺 處 唔好 逳吓 。
噉佢 想 喺 窗口 爬 出去 嘅 ，但係 腰背 痛 得 好 犀利 ，唯有 開門 出去 就 反鎖 翻 道門 。
韋小寶 去到 上書房 ，等咗 唔到 半個時辰 唧 ，康熙 就 退朝 喇 ，佢 笑住 話 ：
小桂子 ，聽講 你 尋晚 殺咗 個 刺客 噃 。
韋小寶 請咗 個 安 佢 話 ：皇上 聖體 安康 。
你 真係 好運 喇 ，同 刺客 打起上嚟 ，我 就 連 刺客 嘅 影 都 冇 見到 。
喂 ，你 殺 嗰個人 嘅 武功 點 啊 ？你 用 咩 招數 殺 佢 㗎 ？
韋小寶 並冇 真正 同 刺客 逳手 過招 ，皇帝 武功 唔曳噃 唔能夠 隨口 亂講 㗎 。
想起 嗰日 喺 楊柳胡同 白家 ，風際中 同 玄貞道人 表演過 招 嘅 情景 ，噉 佢 就 話 喇 ：
黑麻麻 ，我 只係 同 佢 亂打 咋 ，噉 忽然間 呢 ，佢 左腳 ，向 右 打橫 一掃 ，右臂 呢 向 左 打橫 一掠 。
噉佢 一面 講 ，一面 手腳 就 同時 逳 。
康熙 拍住手 話 ：冇錯喇冇錯喇 ，就係 呢一招 。
韋小寶 窒 一窒 佢 問 ：皇上 ，乜 你 知道 呢一招 咩 ？
你 知道 呢一招 叫做 乜嘢 啊 ？
韋小寶 早就 知道 叫做 橫掃千軍 ，之 佢 話 ：奴才 唔知 啊 。
我嚟教你啦 ，呢一招 叫做 橫掃千軍 。
韋小寶 好 驚奇 啊 ：哦 呢個 名 都 幾 好聽 噃 。
佢 吃驚 嘅 唔係 呢 一招 嘅 名 ，而係 康熙 竟然 亦都 知道 。
康熙話 ：佢 使 呢招 打 你 ，噉 你 又 點 應付 呢 ？
韋小寶 話 ：噉 一時之間 我 心慌意亂 ，唉 睇 白實 死 㗎 喇 。
忽然間啊 想起 你 同 我 比武 個 時候 ，使過 一 招 好妙 嘅 招數 ，將 我 𢴈到 喺 你 頭殼 頂 飛過去 ，好似 你 講過 嘅 係 ，誒 武當派 嘅 武功 仙鶴 梳翎 。
康熙 好 歡喜 ，佢 話 ：
你 用 我 嘅 武功 破 佢 呢 招 橫掃千軍 啊 ？
係啊 ，我 學 嘅 武功 呢 ，本來 唔係 點得 嘅 ，好彩 我哋 兩個 比武 打交 打得 多 喇 ，你 使 嘅 手法 ，我 亦 記得 成 大半 。
我 記得 你 係 噉樣 一 打 ，噉樣 一 拗 。
冇錯喇冇錯喇 ，呢啲 係 紫雲手 同 折梅手 。
係喇 ，噉 我 學 你 嘅 樣 啦 ，走去 捉住 佢 嘅 手 嘞噃 ，捉 係 捉到 嘞 ，但係 唔夠力 ，捉 嘅 部位 呢 又 唔係 點啱 ，畀 佢 左手 出力 一 捹 ，噉 就 捹甩咗 喇 。
唉真係可惜喇 ，我 教 你 吖 ，應該 捉住 會宗 同 外關 兩 穴 之間 ，佢 就 無論如何 捹唔甩 㗎喇 。
講完 ，伸手 揸住 韋小寶 嘅 手腕 穴道 。
噉韋小寶出力擢咗幾下 ，吖果然冇法子擢甩 。
唉噉 你 早啲 教會 我 ，就唔會 有 收尾 咁 兇險 喇 。
康熙 放開 佢 隻手 問 ：收尾 點 啊 ？
噉佢 一擢甩咗 ，個身 一轉 ，就 轉到 去 我 背後 ，用 雙掌 打 我 背脊 。
高山 流水 。
呢一招 叫做 高山流水 啊 ？
唉 當時 我 真係 畀佢 嚇到 落花流水 嘞 ，冇 收 啦 ，咪 只有 又 用 你 嘅 招數 嘞 。
你 真係 冇 本事 嘞 。
點解 同人哋 打交 唔 用 師父 教 嘅 功夫 ，一味 用 我 嘅 招數 呢 ？
師父 教 嘅 招數 ，練起嚟 嘅 時候 呢 ，亦都 頭頭是道 啊 ，之 同人 嚟 真 嘅 ，噉 就 冚𠾴 唥 冇用 嘞 。
反而 係 你 嗰啲 招數 ，突然之間 就 記得 晒 噃 。
皇上 ， 嗰 個 時候 佢 手掌 嘅 邊 啊 ， 已經 打到 我 背脊 喇 ， 我 早就 嚇 到 魂不附體 啦 ， 又點 能夠 去 想 咁 多 呢 ？
我 個 身 就 趁勢 向前 一撲 ，喺 右邊 轉 咗 過去 咯 喎 。
好極嘞 ，呢個 係 回風步 。
係咩 ？噉 我啊 避過咗 佢 呢招 ，乘機 拔出 匕首 ，反手 一劍 ，大叫 一聲 ：小桂子 ，投唔投降 ？
康熙 哈哈大笑嘞 ：你 點解 叫起 小桂子 啊 你 ？
韋小寶 話 ：奴才 危急 起嚟 都 唔知 點解 嘅 ，竟然 將 你 嘅 招數 學到 十足 。
呢 反手 一劍 呢 ，本來 係 你 反手 一掌 ，打喺 我 背脊 你 就 大叫 小桂子 ，投唔投降 啊 噉嘅 。
我 想 都 冇 想 就 使咗 出嚟 喇 ，個 嘴 呢 亦 係 噉樣 叫 。
佢 呻咗 一 聲 ，仲 嚟唔切 話 ：投降 ，噉 就 瓜咗 咯 。
好極喇 ，我 呢 反手 一掌 叫做 孤雲出岫 ，想唔到 你 化為 劍法 一擊 成功 。
康熙 練咗 武功 之後 啊 ，只係 同 韋小寶 詐 假意 打唧 ，噉 啊 總係 冇 真係 同 敵人 搏命 過招 咁 過癮 啦 。
而家 聽到 韋小寶 殺死 敵人 ，所用 嘅 招數 冚𠾴 唥 喺 自己 呢處 學翻去 嘅 ，噉 當然 興高采烈 。
個心諗 ：如果 係 自己 出手 呀 ，一定 精彩過 韋小寶 十倍 ，噉 佢 話 ：
呢啲 刺客 真係 膽大包天 ，不過 武功 呢 ，都 係 平常 嘅 啫 。
皇上 ，刺客 啲 武功 啊 ，都 唔係 點 差 㗎 ，我哋 宮內 嘅 侍衞 ，就 有 好幾個 死 喺 佢哋 手 上 嘞 。
總算 我 小桂子 條命 大 ，曾經 侍候過 皇上 練咗 咁耐 武功 ，偷到 你 三招兩式 咋 。
否則啊 ，皇上 ，你 今日 就 要 落 一道 聖旨 ，撫恤 殉職 忠臣 小太監 小桂子 紋銀 一千 兩 喇 。
一千 兩點 夠 啊 ？至少 係 一萬 兩 啦 。
噉 兩個人 一齊 哈哈大笑 。
康熙話 ：小桂子 ，你 知唔知道 呢啲 刺客 係 咩嘢 人 啊 ？
韋小寶 話 ：我 唔知 啊 ，皇上 明白 佢哋 嘅 武功 家數 ，實 係 估到 喇 。
本來 ，我 都 仲係 話 唔實嘅 ，不過 你 先頭 噉樣 一 講 ，又 多咗 一層 證明 嘞 。
講完 ，雙手 拍一拍 ，吩咐 喺 上書房 侍候 嘅 太監 話 ：
傳索額圖 、多隆 兩個人 入嚟 。
佢 兩個人 本來 喺 書房 外 便 等候 嘅 ，一 聽到 皇帝 傳呼 ，就 行 入嚟 叩頭 。
多隆 係 滿洲 正白旗 嘅 軍官 ，進關 嘅 時候 ，曾經 立咗 唔少 戰功 啊 ，武功 亦 好 使得 ，但係 一直 受到 鰲拜 嘅 排擠 啊 ，喺 官場 好 唔得意 。
噉 最近 鰲拜 冧 咗 咯 ，先 畀 康熙 提升 為 御前侍衞總管 ，掌管 乾清門 、中和殿 、太和殿 同 各處 宿衛 。
領 內侍 衞 大臣 總共 有 六個 人 ， 正黃 、 正白 、 鑲黃三旗 每旗 有 兩個 人 ， 其中 真正 有 實權 嘅 ， 只有 掌官 宮中 宿 衞 嘅 ， 御前 侍 衞 正副 總管 。
多隆 新新 擔任 要職 ，噉 皇宮 裏頭 突然間 出現 刺客 ，已經 成 晚 冇 瞓 嘞 ，個 心 啊 十五十六 ：
唔知道 皇帝 同 太后 會 唔會 怪罪 啊 ？
康熙 見 佢 兩隻眼 都 係 紅絲 就 問 ：
捉到 嘅 刺客 都 已經 審問 明白 未 啊 ？
多隆話 ：回皇上 ，捉到 個 叛賊 ，生 嘅 總共有 三個 人 ，奴才 分別 審問 ，初時 ，佢哋 死都唔肯講 ，收尾 頂唔住 刑罰 喇 ，先至 招認 。
果然係 ，果然係平西王 ，平西王 吳三桂 嘅 手下 。
康熙 岌 一岌頭 ，嗯噉 一聲 。
多隆 又 話 ：叛賊 掉低 嘅 兵器 ，上面 刻住 平西王府 嘅 字樣 。
打死咗嘅 叛賊 所着嘅 內衣 ，亦都有 平西王 嘅 標記 。
尋晚 入宮 嚟 騷擾 嘅 叛賊 ，證據 確鑿 ，乃係 吳三桂 嘅 手下 。
就算 唔係 吳三桂 所派 啊 ，佢 ，佢 亦 走唔甩 關係 㗎 。
康熙 問 索額圖 嘞 ：你 有冇 查過 啊 ？
索額圖話 ：叛賊 嘅 兵器 、內衣 ，奴才 都 查核過 喇 ，多總管 記錄 嘅 叛賊 口供 ，確係 噉樣 招認嘅 。
康熙話 ：嗰啲 兵器 、內衣 攞嚟 畀 我 睇下 。
多隆 應咗 一 聲 ：係 。
佢 知道 皇帝 年紀 雖然 係 細小 ，不過 十分 精明 啊 。
呢件事情 又 關係 重大 ，噉 啊 早就 將 各種 證物 包妥 ，叫 手下 親信 侍衞 捧住 喺 上書房 外 便 等候 。
呢而家 用得着 喇 ，即刻 出去 攞咗 入嚟 ，解開 包袱 ，放 喺 枱 上 ，即刻 退後 幾步 。
清朝 以 百戰 而 得 天下 ，開國 幾個 皇帝 呢 都 識 武功 ，本來 係 唔 棹忌 兵器 㗎 。
但喺 書房 裏 便 ，臣子 喺 皇帝 面前 露出 兵刃 ，到底 係 忌諱 嘅 事 ，多隆 小心 謹慎 ，就 行開 先 嘞 。
康熙 走過去 攞起 刀劍 嚟 睇 ，見 一把 單刀 嘅 柄 上面 刻住 大明 山海關 總兵府 噉 ，微微 一笑 佢 話 ：
欲蓋彌彰 固然 唔 啱 ， 但 弄巧成拙 ， 故意 搞鬼 搞馬過 咗 頭 ， 亦 都 會 令人 生疑 啊 。
對索額圖話 ：吳三桂 如果 派人 嚟 宮中 行刺 犯上 ，當然 係 深謀遠慮 籌劃 周詳 。
噉咩 刀劍 唔能夠 用 唧 ？點解 用 刻咗 字 嘅 兵器 唧 ？
點解 會 想唔到 呢啲 刀劍 啊 會 失落 喺 宮中 呢 ？
索額圖 話 ： 係 ， 係 ， 聖上 明見 ， 奴才 拜服 之至 啊 。
康熙 擰轉頭 問 韋小寶 ：小桂子 ，你 所 殺 嗰 名 叛賊 ，佢 使 咗 啲 咩 嘢 招數 啊 ？
韋小寶 話 ：佢 使 一招 橫掃千軍 ，又 使 一招 高山流水 。
康熙 又 問 多隆 嘞 ：嗰啲 係 咩嘢 功夫 呢 ？
多隆 雖然 係 滿洲 大臣 ， 對於 各家 各派 嘅 武功 亦 知道 得 好多 嘅 。
橫掃千軍 同 高山流水 兩招 ，又唔係 生僻 嘅 招數 ，就 回答 話 ：
回 皇上 ，嗰啲 似乎 係 雲南 前 明 沐王府 嘅 武功 啊 。
康熙 雙手 一拍 佢 話 ：冇錯喇 ，多隆 ，你 嘅 見聞 都 好 廣博 。
多隆 受寵 若驚 ，面上 露出 一絲 笑容 即刻 跪低 叩頭 話 ：謝 皇上 稱讚 。
康熙話 ：你哋 仔細 諗下 ，吳三桂 如果 派人 入宮 行刺 ，決 唔會 揀 正 佢 個仔 正喺 北京 嘅 時候 。
刺客 咩 日子 都 嚟得 㗎 ，唔通 一定 要 揀 佢 個 仔 嚟 朝見 嘅 時候 ？
呢啲 係 可疑者 之一 嘞 。
吳三桂啊 善於 用兵 ，辦事 周密 ，派 呢啲 逆賊 入 宮 行刺 ，人數 又 少 ，武功 亦 唔係 好 高 ，明知 難以 成功 有 咩 用處 呢 ？
呢點 同 吳三桂 嘅 性格 唔 符合 嘞 ，呢啲 係 可疑者 之 二 。
仲有 ，就算 佢 派人 殺死咗 我 ，對 佢 又 有 咩 好處 呢 ？唔通 佢 想 起兵 造反 咩 ？
佢 如果 要 造反 ，派 佢 個 仔 嚟 北京 做 乜嘢 啊 ？豈唔係 存心 將 個 仔 送嚟 畀 我哋 殺頭 ？
呢啲 係 可疑者 之 三 。
韋小寶 先頭 聽 方怡 講到 陷害 吳三桂 嘅 計策 ，覺得 係 一條 妙計 。
而家 經過 康熙 一 分析 ，即刻 就 覺得 度度 都 露出 破綻 ，不由得 佩服 之至 喇 猛咁 岌頭 。
索額圖 話 ：皇上 聖明 ，所見 非 奴才 所及 啊 。
康熙 話 ： 你 再 想 下 ， 如果 刺客 唔 係 吳三桂 派 嚟 嘅 ， 但 係 又 帶 住 平西王 府 嘅 兵器 ， 噉 係 有 咩 用意 呢 ？
梗係 想 陷害 佢 嘞 。
吳三桂 幫 我 大清 打平 天下 ，功勞 好 大 ，嬲 佢 、妒忌 佢 嘅 人 好多 。
到底 呢批 叛賊 係 由 邊個人 指使 嘅 ，需要 好好 再 加 審問 至 得 。
索額圖 同埋 多隆 一齊 應話 ，係啊噉 。
多隆話 ：皇上 聖明 ，如果 唔係 皇上 詳詳細細 加以 指點 開導 ，奴才 糊里糊塗 噉 上咗 當 ，不免 冤枉 咗 好人 啊 。
索額圖 同埋 多隆 見 皇帝 唔再 吩咐 咩嘢 嘞 ，就 叩頭 辭別 出去 。
康熙話 ：小桂子 ，嗰 橫掃千軍 同 高山流水 呢 兩 招 ，你 估 我 點 知道 㗎 嗱 ？
韋小寶 個 心 嘣 噉 跳咗 一下 。
我 正 話 喺度 奇怪 喇 皇上 你 點 知 嘅 呢 ？
今朝 一早 ，我 已經 傳咗 好多 侍衞 嚟 ，問 佢哋 尋晚 同 刺客 格鬥 嘅 情形 ，一查 ，刺客 所使 嘅 武功 家數 ，有 好幾 招 啊 竟然 係 前 明 沐家 嘅 。
你 諗下 ，沐家 本來 係 世代 鎮守 雲南 ，我 大清 龍興 之後 ，將 雲南 封咗 畀 吳三桂 ，噉 沐家 當然 嬲 嘞 。
何況 沐家 最後 一個 黔國公 沐天波 ，就係 死喺 吳三桂 手下 嘅 。
我 叫 人 將 沐家 最 厲害 嘅 招數 打畀 我 睇 ，其中 ，就 有 橫掃千軍 同 高山流水 兩 招 。
皇上 你 真係 料事如神 喇 。
韋小寶 個 心 不禁 擔憂 喇 ：
我 間 屋 收埋 沐家 兩個 女仔 唔知 佢 知唔知道 呢 ？
康熙 笑住 問 ：小桂子 ，你 想唔想 發財 呢 ？
韋小寶 聽到 發財 兩個 字 ，當堂 精神 晒 ，咩嘢 憂心 都 冇 喇 。
佢 笑口噬噬噉 話 ：皇上 唔 叫 我 發 呢 我 就 唔 敢 發 ，皇上 叫 我 發財 呀 ，小桂子 就 唔 敢 唔 發 喇 。
好 ，我 叫 你 發財 吓 。
你 將 呢啲 刀劍 ，喺 刺客 身上 剝落嚟 嘅 內衣 ，刺客 嘅 口供 ，都 搦去 交畀 一個 人 ，就 有 好大 一筆 財發 喇 。
韋小寶 窒咗 一窒 ，即刻 就 明白晒 嘞 佢 話 ：交畀 吳應熊 。
你 真係 聰明 嘞 ，去 啦 。
吳應熊 呢個 嘢 啊 ，運程 真係 好 啊 ，佢 全家 性命 都 係 皇上 賜畀 佢 嘅 。
你 同 佢 講 啲 咩 嘢 呢 ？
我話 ：吳應熊 ，我哋 皇上 明見 萬里 ，你 兩仔 爺 喺 雲南 做咗 啲 咩 嘢 事 ，皇上 冇 一 件 唔知 嘅 。
你哋 唔 造反 ，皇上 清清楚楚 ；如果 係 呢 ，呵呵 ，有 咩 三心兩意 、兩面三刀 ，皇上 一樣 明明白白 。
叉叉叉 ，你 兩仔 爺 乖乖哋 啦 。
康熙 聽完 哈哈大笑 佢 話 ：你 嘅 人 啊 真係 聰明伶俐 嘞 。
雖然 係 唔 讀書 ，講 說話 粗粗俗俗 ，都 好啱 我 嘅 心水 。
叉叉叉 ，你 兩仔 爺 乖乖哋 啦 ，哈哈哈哈哈哈哈哈哈哈 。
韋小寶 聽見 皇帝 居然 學咗 一句 叉叉叉 ，不禁 心花怒放 哈哈大笑啊 ，捧 咗 刀劍 等等 嘅 物件 ，走出 書房 返到 自己 間 屋 。
佢 啱啱 要 開鎖 唧 ，突然間 背脊 一陣 劇痛 ，心頭 煩悶 又 想 嘔 嘞 ，噉 勉強 開鎖 入咗 房 ，坐 喺 張 椅 處 不停 咁 喘氣 。
沐劍屏 話 ：你 ，你又 唔舒服 啊 ？
韋小寶 話 ：見到 你 閉月羞花 咁 靚 ，我 就 舒服 翻 嘞 。
沐劍屏 笑住 話 ：我 師姐 先 係 閉月羞花 啫嘛 ，我 塊面 有 隻 烏龜仔 ，醜 都 醜死 喇 。
韋小寶 聽 佢 講笑 ，個 心情 即刻 好晒 ，佢 話 ：
你 塊 面點 會 有 隻 烏龜仔 呢 ？
啊 ，我 知道 嘞 我 知道 喇 ，好 妹妹 ，你 塊 面 又 光 又 滑 又 白淨 ，就 好似 一 面 鏡 噉 ，因此 呢 ，就 有 隻 烏龜仔 。
沐劍屏 唔明白 噃 佢 問 ：點解 啊 ？
韋小寶 話 ：你 同 邊個 瞓埋一齊 吖 ？
你 塊面 好似 一面鏡 ，噉啊 照出 嗰個 人 嘅 樣嘞 ，噉 你 塊面 梗係 有 隻 烏龜仔 啦 。
方怡話 ：你 自己 過嚟 睇下 ，小郡主 塊面 先 有 隻 烏龜仔 啊 。
韋小寶話 ：我 如果 過嚟 睇 啊 ，好妹妹 塊面 啊 出現 一個 又 靚仔 又 神氣 嘅 大老爺 啊 真 。
方沐 兩個人 都 笑起上嚟 嘞 ，方怡 話 ：
係 個 咩 嘢 大老爺 啊 ？ 係 烏龜 仔 大老爺 。
噉 三個人 細細聲 笑咗 一陣 ，方怡 話 ：
喂 ，我哋 點樣 逃出去 皇宮 啊 ？你 要 想 個 法子 至得 㗎 。
韋小寶 呢一排 到處 都 畀 人哋 奉承 ，但係 一 返到 自己 間 屋 ，就 非常 孤寂 無聊 嘞 。
噉 忽然間 有 兩個 年輕 姑娘 陪 自己 ，雖然 每時每刻 ，都 有 畀 人 撞見 嘅 危險 ，不過 實在 唔捨得 佢哋 咁快 就 離開 ，噉 佢 話 ：
噉啊 要 慢慢 想法子 至 得喇 。
你哋 又 負咗 傷 ，只要 行出 房門 一步 啊 ，即時 就 會 畀 人 捉咗 去 㗎 喇 。
方怡 歎咗 一口氣 話 ：
我哋 尋晚 入 宮 嚟 嘅 人 ，唔知 有 幾多 人 死咗 ，幾多人 畀 人 捉 咗 呢 ？
遇難嘅人 叫做 咩名 你 知唔知道 啊 ？
唔知道啊 ，你既然關心 ，我可以 幫你 去打聽下嘅 。
多謝你喇 。
韋小寶 自從 同 方怡 相逢 以來 ，從來 都 冇 聽 佢 講説話 咁 客氣 嘅 ，個 心 都有 啲 奇怪 。
沐劍屏 話 ：尤其是 要 問 下 ，有 個 姓 劉 嘅 有冇 平安 脫險 啊 。
姓劉嘅 ？劉 咩 名 啊 ？
佢 係 我哋 嘅 劉師哥 ，叫做 劉一舟 。
佢 係 我 哋 師姐 嘅 ， 係 我 哋 師姐 嘅 心上人 ， 佢 啊 。
突然間 咭噉 笑咗 出聲 ，原來 方怡 擳 佢 胳肋 底 唔准 佢 講落去 。
韋小寶 話 ：啊 劉一舟 ，嗯 ，唔係 點 妙噃 。
方怡情 不自禁 連忙 問 ：點啊 ？
佢 係咪 一個 身材 高高 ，面口 白白 ，大約 廿幾歲 嘅 靚仔 吖 ？
呢個人 嘅 武功 好 使得 嘅 係 唔係 ？
韋小寶 啊 當然 唔識 劉一舟 嘞 ，但係 諗住 呢個 人 既然 係 方怡 嘅 意中人 ，噉 實 係 個 靚仔 啦 。
噉既然係佢嘅師哥 ，話 佢 武功 好高 亦 唔會 錯 啊 。
果然 沐劍屏 話 ：係喇係喇 ，就係 佢 。
方師姐 話 ，琴晚 佢 受傷 嘅 時候 ，見到 劉師哥 畀 三名 侍衞 打倒 咗 ，一名 侍衛 撳住 佢 ，噉 多數 實 係 畀 人 捉住 嘞 。
唔知 而家 點 呢 ？
韋小寶 話 ：唉 ，呢位 劉師傅 ，原來 係 方姑娘 嘅 心上人 。
講講下 ，唔講嘞 ，不停咁 擰頭 歎氣 。
方怡 好 憂愁 啊 佢 問 ：
桂大哥 ，嗰個 劉 ，嗰個 劉師哥 點啫 ？
韋小寶 個 心 諗 ：
臭妹釘 你 嘩 ，同 我 講説話 嘅 時候 ，一直 冇 好口面 我 睇 ，當 提到 你 嘅 劉師哥 又 叫 我 做 桂大哥 喇 。
好 ，我 嚇下 你 至得 。
噉佢 又 長歎 一聲 擰擰頭 話 ：
唉 ，可惜啊 。
方怡 吃咗 一驚 喇 問 ：點啊 ？佢 ，佢 係咪 受咗 傷 ，定係 死咗 啊 ？
韋小寶 哈哈 大笑話 ：
咩 劉一舟 、劉兩屁 啊 ，老子 從來 冇 見過 。
佢 係 死 係 生 我 點 知道 唧 ？
呢 你 叫 我 三聲 好老公 ，我又 幫 你 去 查下 。
方怡 先頭 見 佢 搖頭 歎氣 又 話 可惜 ，以為 劉一舟 必定 係 凶多吉少 嘞 ，忽然 聽 佢 噉樣 講 ，個 心 就 好 歡喜 啦 佢 話 ：
講嘢 一啲 都 冇 正經 嘅 ，你 到底 邊句 係 真 ，邊句 係 假 嘅 啫 ？
韋小寶 話 ：呢個 劉一舟 如果 落喺 我 手 啊 ，哼 ，我 綁住 佢 ，搏命 咁 打佢 一輪 ，打到 佢 𦣇柚 變成 四塊 ，問 佢 用 咩 花言巧語 ，呃咗 我 老婆 個 芳心 。
然後呢 我 攞起 把 刀 ，一刀 斬落去 ，嚓噉 一聲 。
沐劍屏 話 ：你 殺咗 佢 啊 ？
唔係 ，我 割咗 佢 咕咕 ，叫 佢 變 個 太監 咯 。
沐劍屏 唔明 佢 講 啲 乜嘢 噃 。
不過 方怡 就 明白 嘅 ，滿面 通紅 鬧 佢 話 ：滑頭仔 ，就 鐘意 亂噏 無為 。
你 嗰個 劉師哥 呢 ，多數 畀 人 捉住 嘞 ，要唔要 佢 做 太監 ，我 桂公 公開 到 口 有 唔少 人 肯 聽 嘅 。
方姑娘 ，你 𠼮 我 唔𠼮 吖 ？
嗱 各位 ，欲知 後事 如何 ，且 聽 下回 分解 。
