曾頭市 嘅 曾長官 同 史文恭 寫信 畀 宋江 要求 投降 。
宋江 睇完 嗰封信 ，嘿呀 ，嬲到不得了 ，三下兩下 撕爛 封信 ，佢 鬧喇 ：殺 我 兄長 ，我 點 肯 罷休 ！
唔掃平 你 曾頭市 ，我 決唔罷手 ！
嚇到 送信 嗰個人 伏喺地 嚟 及及聲 咁 震 。
吳用 就 勸 佢 話 喇 ：兄長 你 噉 就 唔啱 喇 。
我哋 爭嚟爭去 都係 為 一啖氣 啫 。
既然 曾家 派 人 送 信 嚟 講和 喇 ，我哋 就 唔好 為 一時之憤 失咗 大義 啊 。
跟住 ，就 寫 封 回信 ，攞咗 十兩 銀 賞 畀 嗰個 來使 ，叫 佢 帶 封信 返 去 。
曾 長官 同 史文恭 打開 封信 睇 下 ， 封信 講 ：
要講和咩可以 ，條件 係 第一 ，要交還 前後 兩次 搶去 嘅 馬匹 ，第二 ，交出 搶馬 嘅 兇徒 郁保四 ，第三 ，賠償金 錢 嚟 慰勞 三軍 。
曾長官 同 史文恭 睇咗 就 好 驚 。
第日 ，曾長官 又 派人 去 見 宋江 佢 話 ：
如果 要 講和 呢 ，噉 啊 雙方 各 派 一個 人 做人質 啦 。
宋江 唔肯 ，吳用 就 話 喇 ：唔緊要 。
跟住 就 派 時遷 、李逵 、樊瑞 、項充 、李袞 五個人 ，去 曾頭市 做 人質 噃 。
臨行嘅時候 ，吳用 就 嗌 時遷 過嚟 伏埋 佢 耳仔 細細聲 話 ：
噉噉噉噉噉 ，唔好 誤事 啊 。
噉 派咗 五個 人 去 。
之後呢 ，冇幾耐 ，關勝 、徐寧 、單廷珪 、魏定國 嚟到 ，噉 就 喺 中軍 駐扎 ，呢啲 唔講 佢 。
而家 講 下 時遷 啊 帶住 四名 好漢 嚟到 見 曾 長官 。
時遷 行前 一步 話 ：奉 大哥 將 令 ，派 我 時遷 帶 李逵 等 四人 前 嚟 講和 啊 。
史文恭 就 話 喇 ：吳用 派 五個人 嚟 ，必定 有 陰謀 啊 。
李逵 嬲 起 上嚟 揪住 史文恭 就 打 。
曾長官 連忙 勸住 佢 。
時遷話 ：李逵 雖然 係 粗魯 ，之 佢 係 我哋 宋公明 大哥 心腹 之 人 ，所以 特意 派 佢 嚟 ，唔使 疑心 嘅 。
曾長官 一心 要 講和 就 冇 聽 史文恭 嘅 説話 ，擺 酒 款待 佢哋 之後 呢 ，就 請 佢哋 去 法華寺 嘅 營寨 休息 ；
就 撥咗 五百 個 兵 ，前後 噉 圍住 。
同時 呢 ，派咗 曾升 帶埋 郁保四 ，去 宋江 大寨 講和 。
兩個人 嚟到 中軍 見咗面 ，跟住 呢 ，就 將 原來 搶咗去 嘅 馬匹 ，同埋 一車 金錢 就 送到 大寨 。
宋江 睇完 啲 嘢 就 話 喇 ：
呢啲 馬 都係 第二次 搶 嘅 。
以前段景住 送嚟 嗰匹 千里白龍駒 照夜玉獅子馬 ，點解 唔見 帶嚟 啊 ？
曾升就話喇 ：係 師父 史文恭 坐緊 ，因此 冇 帶嚟 啊 。
你 快啲 寫 封 信 去 ，叫 人 即刻 牽 嗰 匹 馬 嚟 還畀 我 。
係 。
曾升 即刻 寫信 叫 隨從 個人 返去 攞 嗰 匹 馬 嚟 。
史文恭 聽咗 就 話 喇 ：攞 邊 匹 馬 去 我 都 唔 緊要 ，乜 呢 匹 馬 我 就 唔 畀 得 佢 。
噉呢個 帶信 嘅 人 呢 來來回回 就 行咗 好幾 趟 。
宋江啊死都要呢匹馬 ，噉 史文恭 收尾 就 使 人 嚟 話 喇 ：
如果 一定 要 我 呢匹馬 呢 ，噉 就 叫佢 即刻 退兵 啦 ，我 就 送 匹馬 嚟 還畀 佢 係 啦 。
宋江 聽咗 呢句 説話 就 同 吳 用 商量 。
都未曾商量掂啫 ，就 有人 嚟 報告 話 ，青州 、凌州 兩路 有 兵馬 嚟 啊噉 。
宋江 就 話 喇 ：嗯 ，如果 畀 嗰班人 知道 ，必定 會 變卦 嘅 。
就 暗傳 命令 ，派 關勝 、單廷珪 、魏定國 ，去 迎戰 青州 軍馬 ；
花榮 、馬麟 、鄧飛 ，去 迎戰 凌州 軍 馬 。
又 暗中 叫 郁保四 嚟 ，好言好語 噉 安慰 佢 ，吳用 就 對 佢 話 喇 ：
你 如果 肯 立 呢個 功 呢 ，我哋 山寨 亦 畀 你 做 個 頭領 。
至於 搶馬 嘅 仇 ，我 可以 拗箭 發誓 ，一概 唔計 。
你 如果 唔肯 ，噉 亦都 由得 你 啦 ，不過 曾頭市 破 在 旦夕 ，噉 啊 任 你 選擇 喇 。
郁保四 聽咗 就 情願 投降 ，聽從 命令 。
於是 吳 用 呢 ，就 講 條 計 畀 郁 保 四 聽 ，佢 話 ：
嗱 ，你 整成 係 ，逃跑 返去 ，你 就 話畀 史文恭 聽 ：
話 你 同 曾升 去 宋江寨 裏 便 講和 ，探聽 清楚 喇 ，而家 宋江 啊 ，就係 要 攞返 呢匹 千里馬 ，實在 係 無心 講和 嘅 。
如果 還咗 匹馬 畀 佢 呀 ，佢 梗 反悔 㗎 噉 。
而家 又 聽到 青州 、凌州 兩路 救兵 嚟咗 ，慌到 不得了 ，而家 乘機 去 攻佢 就 實得嘅 。
佢 如果 信 你 嘅 説話 ，噉 我 就 有 辦法 喇 。
郁保四 就 依計 行事 ，趯 到 去 史文恭 個 營寨 將 吳用 教 佢 嘅 説話 一五一十 講咗 一次 。
史文恭 就 帶住 郁保四 嚟到 見 曾長官 ，話 宋江 係 無心 講和 ，乘機 劫 佢 營 就 啱喇 噉 。
曾長官 就 話 ：不過 噉噃 ，我 阿曾 升 就 押住 喺 佢 嗰處 嚟噃 ，我哋 如果 反悔 就 梗 畀 佢 殺害 㗎噃 。
史文恭 話 ：打破咗 佢 營寨 ，噉 就 救 佢 出嚟 都 唔 遲 吖 。
今晚 就 傳令 畀 各寨 ，點齊 人馬 ，先 去 劫 宋江 大寨 。
一斬咗佢個蛇頭嗰班賊就冇術㗎喇 ，返嚟先至殺李逵佢哋五個人都唔遲 。
曾 長官 話 ： 哎呀 ， 教頭 你 真 係 善用 良計 啊 。
當時 就 傳令 畀 北寨 蘇定 ，東寨 曾魁 ，南寨 曾密 ，一齊 去 劫寨 。
郁保四 呢 ，睺住 冇人 睇見 就 閃咗 入去 法華寺 大寨 裏 便 ，見到 李逵 佢哋 五 個人 ，暗中 同時 遷 透露 呢個 消息 。
而家 返轉頭 講下 宋江 ，佢 同 吳用 講 喇 ：哎呀 唔知 呢條計 點 呢嚱 ？
吳用 就 話 ：如果 郁保四 唔 返嚟 呢 ，就係 佢哋 中咗 我 嘅 計 喇 。
嗱 ，佢哋 如果 今晚 嚟 劫寨 ，我哋 就 埋伏 喺 兩便 ，叫 魯智深 、武松 ，帶 步兵 殺入 佢 東寨 ；
朱仝 、雷橫 ，就 帶 步兵 殺入 佢 西寨 ；
楊志 同 史進 ，帶 騎兵 截殺 北寨 ：
呢個 就 叫做 番犬 伏窩 之計 ，百發百中 㗎 。
好喇 ，當晚 月色 朦朧 ，雲 遮 霧 障 。
史文恭啊 帶咗 蘇定 、曾密 、曾魁 ，點齊 人馬 全部 出發 。
史文恭 、蘇定 啊 當先 ，曾密 、曾魁 押後 ，靜 雞雞噉 就 嚟到 宋江 總寨 嘞噃 。
只見 寨門 打開 ，寨裏 便 靜嚶嚶 一個人 都 唔見 冇啲 動靜 ，哼 知道 中計 ，即刻 就 擰轉頭 想 扯 ，趯返去 本寨 嘞噃 。
呢個 時候 ，只見 曾頭市 裏 便 就 打響 鑼鼓 ，炮聲 隆隆 ，咩嘢 事 呢 喂 ？
原來 係 時遷 啊 擒咗 上去 法華寺 鐘樓 上面 撞起 個 鐘 ，鐘聲 係 信號 嚟 ；
東西 兩 門 就 火炮 齊 響 ，喊殺 連 天 ，真係 都 唔知 幾多 軍馬 殺緊 入嚟 噉 。
噉喺 法華寺 裏 便 呢 ，李逵 、樊瑞 、項充 、李袞 就 一齊 逳手 殺出嚟 喇 。
史文恭 佢哋 急急 帶兵 返返去 營寨 ，已經 四圍 截住 冇路 喇 。
曾長官 見到 寨裏頭 啊 亂到 天翻地覆 雞飛狗走 ，又 聽講 話 梁山泊 大軍 兩路 殺緊 入嚟 啊 噉 ，噉就 喺 寨裏 便 吊頸 而 死 。
曾密啊 想 趯 去 西寨 ，畀 朱仝 一 朴 刀 殺死 咗 。
曾魁 要 走去 東寨 嘅 時候 啊 ，喺 亂軍 之中 ，就 畀 啲 戰馬 踩 成 肉醬 。
蘇定 就 死命 趯 出 北門 ， 之 嗰 處 有 無數 咁 多 陷坑 ；
背後 魯智深 、武松 啊 追殺 過嚟 ，前面 係 撞啱 楊志 、史進 ，結果 呢 就 畀 亂箭 射死 。
後頭 撞嚟 嘅 人馬 ，冚𠾴 唥 跌晒 落 個 陷坑 ，重重 沓沓 啊 跌死 嘅 不知其數 。
而家 講 下 史文恭 ，佢 騎住 嗰匹 千里馬 就 行得 好快 ，殺出咗 西門 就 落荒 而 走 。
呢個 時候 啊 ，黑霧 遮 天 ，不分 南北 。
約莫 行咗 二十 零 里 啦 ，都 唔知 去到 邊處 。
只聽見 樹林 背後 嗙嗙聲 鑼響 ，撞出 四五百人 。
當先 一個 好漢 ，揸住 條 棍 對住 馬腳 就 打 。
千里馬即係千里馬 ，見到 有條棍嚟嘅時候 呢𠽤𠽤𡃈噉就 喺頭殼頂 跳咗過去 。
史文恭 正係 逃走緊 嘅 時候 ，只見 陰雲 冉冉 ，冷氣 颼颼 ，黑霧 漫漫 狂風 颯颯 ，咈 ，呼 ，見到 半空中 有 個人 擋住 去路 。
史文恭 以為 係 神兵 啦 就 勒 轉 馬頭 就 返去 嘞噃 ，點知 東西南北 ，四面 都 係 晁蓋 嘅 陰魂 纏住 。
史文恭 再 返去 舊路 ，哈 就 撞正 浪子 燕青 ，跟住 玉麒麟 盧俊義 衝出嚟 喝 一聲 話 ：強賊 ，你 仲 想 走 去 邊 ！
對住 史文恭 嘅 大髀 一朴 刀錐 過去 就 打咗 佢 落馬 ，將 繩索 綁住 佢 ，就 解 咗 去 曾頭市 。
燕青 係 牽住 嗰 匹 千里 龍駒 ，一直 嚟到 大寨 。
宋江 見到 呀 ， 個心 啊 真 係 一喜 一 嬲 啊 ：
喜嘅 ，就係 盧員外 立功 ；
嬲 嘅 ， 就 係 嬲 史文恭 射死 晁天王 ， 而家 仇人相見 就 分外 眼明 啊 。
宋江 就 下令 先 將 曾升 ，就 喺 本地 斬首 ，曾家 一門 老少 一個 不留 。
抄到嘅 金銀財寶 ，米麥糧食 啊 冚𠾴唥 裝晒 上車 ，帶返 梁山泊 ，分畀 各位 頭領 同 打賞 三軍 。
呢陣時 ，關勝 啊 帶兵 殺退咗 青州 軍馬 ，花榮 帶兵 殺散咗 凌州 軍馬 都 返嚟 。
大小頭領 ，一個 都 唔 缺 。
又得咗 呢一匹 千里 龍駒 照夜 玉獅子馬 ，仲有 其餘 物件 就 講唔晒 咁多 。
噉啊用駕囚車 ，韞住 史文恭 ，班師 返去 梁山泊 。
大軍 所過 嘅 州縣村坊 啊 真係 秋毫無犯 。
返到 山寨 忠義堂 上 喇 ，大家 都 嚟 參見 晁蓋 嘅 靈位 。
宋江 就 下令 ，叫 聖手 書生 蕭讓 作咗 篇 祭文 ，就 命令 大小 頭領 ，人人 掛 孝 個個 舉哀 ，將 史文恭 剖腹 挖心 ，祭奠 晁蓋 。
完咗喇 ，宋江 就 喺 忠義堂 上 ，同 眾位 兄弟 商量 立 梁山泊 之 主 喇 。
吳用 就 話 ：噉 啊 梗係 兄長 你 為 尊 ，盧員外 為 次 ，係嘛 ，噉 其餘 嘅 眾 弟兄 咯 ，就 各 依 舊位 啦 。
宋江話 ：往日 晁天王 有 遺言 講落 ，但凡 有人 捉得 史文恭 ，唔理 佢 係 邊個 ，就 做 梁山泊 之 主 。
今日 ，盧 員外 生 擒 呢個 賊人 ，押 返嚟 山寨 祭獻 晁 兄 ，報仇 雪恨 就 正當 為 尊 ，不必 多 講 喇 。
盧俊義 即刻 話 ：小弟 德薄才疏 ，點敢 承當 呢個 位置 呢 ？
其實 ， 能夠 居於 末位 都 仲 係 過分 啊 。
宋江 又 話 ：唔係 宋某 故意 謙讓 ，有 三件 我 唔 及 盧 員外 你 。
第一件 ，宋江 我 身材 黑矮 ，貌掘 才疏 ；員外 就 堂堂 一表 ，凜凜 一軀 ，有 貴人 之 相 。
第二件 ，我 宋江 出身 小吏 ，犯罪 在逃 ，多得 眾位 兄弟 畀面 ，暫居 尊位 啫 ；
之員外生 於 富貴 之家 ，素來 有 豪傑 之 譽 ，雖然 有啲 兇險 ，之屢次 都有 上天 保佑 。
第三件 ，我 宋江文 不能 安邦 ，武 又 不能 敵眾 ，手無 縛雞之力 ，身無 寸箭之功 ；
員外 力敵 萬人 ， 通今博古 ， 天下 間 邊個 唔 望風 而服 呢 ？
尊兄 有 噉嘅 才德 ，正當 做 山寨 之主 啊 。
第日 ，歸順 朝廷 建功立業 ，官爵 升遷 ，一定 能夠 使到 弟兄們 盡生光彩 嘅 。
小弟 主張 已定 ，唔好 推託 ，唔好推託 喇 。
盧俊義 跪喺 地下 佢 話 ：
兄長 唔 使講 咁 多 ， 盧某 寧可 死 實難 從命 啊 。
吳用 亦 勸 佢 話 ：兄長 為 尊 ，盧員外 為 次 ，人人 都 服 㗎 喇 。
兄長 如果 再三 推讓 ，就怕 寒咗 眾人 之心 噃 。
吳用 一便 講 ，一便 就 同 大家 打 眼色 。
只見 黑旋風 李逵 又 大聲 噉 嗌話 ：
我 喺 江州 ，天 不怕 地 不怕 ，捨身 拼命 ，都係 跟住 你 嘅 啫 。
我哋 人人 都 敬 你 一步 ，你 一味 噉 讓嚟讓去 做 乜鬼 吖 ！
你 如果 仲 讓 啊 我 就 殺起嚟 各自 散伙 罷啦 ！
武松 見到 吳用 打眼色 唄 佢 亦都 發作 起嚟 話 喇 ：
大哥 手下 咁多 軍官 ，都 係 受 朝廷 誥命 嘅 ，亦 只係 敬 大哥 你 嘅 啫 ，點 肯 跟 第個人 㗎 ！
劉唐 又 話 喇 ：
我哋 起初 七個人 上山 ，嗰陣時 就 有 讓 大哥 你 為 尊 嘅 意思 㗎喇 ，點解 今日 要 讓畀 第二個人 呢 ？
魯智深 大聲 叫話 ：如果 兄長 仲 要 讓畀 第個人 ，我哋 不如 散檔 罷啦 ！
宋江 就 話 喇 ： 你 哋 大家 不必 多講 喇 不必 多講 喇 ， 我 有 個 辦法 ， 等 天意 嚟 定 啦 。
吳用 就 話 ：兄長 ，你 有 何 高見 請 講 啦 。
宋江 就 話 喇 ：嗱 ，而家 我哋 山寨 錢糧 缺少 吖 ，喺 我哋 梁山泊 以 東 就 有 兩 個 州府 ，錢糧 充足 。
一處 係 東平府 ，一處 係 東昌府 。
如果 去 問 佢 借 糧 呢 佢 梗係 唔肯 嘅 。
嗱 ，我哋 而家 寫 兩張 籌 ，我 同 盧員外 一人 執 一張 ，邊個 先 攻破 城池 嘅 ，佢 就 做 梁山泊 主 啦 大家 話 點 吖 ？
吳用 話噉 亦 好 ，聽從 天命 啦 。
盧俊義 話 ： 千祈 唔 好 噉 講 啊 ， 大哥 做 梁山泊 主 就 啱 㗎 喇 ， 小弟 願意 聽從 差遣 啊 。
不過 呢陣 時 亦 唔 由得 盧俊義 喇 。
當時 就 嗌 鐵面孔 目裴宣 ，寫落 兩張 籌 。
焚咗香 ，對天 祈禱喇 ，然後 就 各自 執籌 。
宋江 啊 執着 東平 府 ， 盧俊義 啊 執着 東昌府 ， 噉 啊 大家 都 冇 意見 啦 。
當日 ，大排筵席 ，飲酒 嘅 時候 ，宋江 就 下令 調撥 人馬 。
宋江 部下 呢 ，有 林沖 、花榮 、劉唐 、史進 、徐寧 等等 啊 大小 頭領 二十五 員 ，馬步軍 兵 一萬 ；
水軍 頭領 三員 ，係 阮小二 、阮小五 、阮小七 ，帶領 水軍 駕船 接應 。
盧俊義 部下 呢 ，有 吳用 、公孫勝 、關勝 、呼延灼 、朱仝 、雷橫 等等 大小 頭領 二十五 員 ，馬步軍 兵 一萬 ；
水軍 頭領 三員 ，係 李俊 、童威 、童猛 ，率領 水軍 就 駕船 接應 。
其餘 剩返 落嚟 嘅 頭領 同埋 有 傷病 嘅 ，就 留低 看守 山寨 。
呢個 時候 ，正係 三月初 ，日暖 風和 ，正係 打仗 廝殺 嘅 天氣 。
宋江 、盧俊義 帶領 人馬 ，各自 落山 出發 。
而家 就 先 講下 宋江 佢 帶兵 嚟到 東平府 。
離城仲有 四十里 路 ， 嗰 笪 地名 啊 叫做 安山鎮 噃， 噉 就 喺 呢 處 駐 扎 軍馬 。
宋江話 ：東平府 太守 叫做 程萬里 ，嗰度 有 一 個 兵馬都監 ，乃係 河東 上黨郡 人氏 。
呢個人 姓 董 名 平 ，係 使 雙槍 好 叻 嘅 ，人人 都 叫 佢 做 雙槍將 ，有 萬夫不當之勇 㗎 。
而家 我哋 雖然 去 打 佢 個 城 ，亦都 同 佢 講 下 禮 吖 ；
我 想 搵 兩個 人 帶 一 封 戰書 送 去 佢 嗰 處 。
佢哋 如果 肯 歸降 咯 ，就 免致 動兵 ；
如果 唔肯 喇 ，我哋 再 嚟 打佢 噉 就 冇得 怨 啦 。
誒 ，邊個 敢 同 我 去 送 戰書 啊 ？
郁保四行出嚟話喇 ：小人 認得 董平 ，願意 去 送 戰書 啊 。
跟住 王定六 又 行出嚟 話 喇 ：我 同埋 佢 去 啦 。
佢 兩個人 都 話 ：我哋 都 未曾 為 山寨 出過 半分 氣力 ，今日 願意 去 行 一趟 。
宋江 好 歡喜 ，跟手 就 寫咗 戰書 交畀 郁保四 同 王定六 兩個人 送去 。
戰書 上 便 呢 ，就 只係 話 要 借 糧 噉啫 。
噉嗰個 東平府 程太守 啊 ，聽聞 宋江 起兵 嚟到 安山鎮 駐扎 唄 ，就 請 本州 兵馬都監 雙槍 將 董平 嚟 商議 軍情 重事 。
正喺度傾緊 ，有人 嚟 報告 話 宋江 派 人 嚟 送 戰書 啊 噉 。
程太守 就 嗌 佢 入嚟 啦 。
郁保四 、王定六 入到去 見咗面 ，就 將 封 戰書 呈上去 。
程萬里 睇完 封 戰書 就 同 董都監 話 喇 ：
佢哋 要 借 本 府 錢糧 噃 ，呢 件 事 點算 好 呢 ？
董平 聽咗 好嬲 ，就 嗌 將 佢哋 兩個 推出去 ，即刻 斬首 噉 。
程太守 就 話 喇 ：誒 唔好啊 。
自古話 兩國 相戰 ，不斬 來使 吖嘛 ，如果 殺咗佢哋 就 於禮 不當喇 。
噉啦 ，將 呢 兩個 人 各 打 二十大 棍 ，趕 佢哋 返 去 睇 佢 點 啦 。
董平 怒氣 未消 ：好啦 ，人 嚟 ，同 我 出力 痛打 。
就喝 人 將 郁保四 、王 定六 一 繩 綁 實 就 撳 喺 地 嚟 ，打 到 皮 開 肉 綻 就 推出 城 去 。
兩個人 返到 營寨 呀 喊住 講畀 宋江 聽 ：
哎呀 董 平 嗰 個 傢伙 ， 真 係 豈有此理 嘿 ， 哎呀 ， 哎呀 ， 好 藐視 我 哋 梁山泊 啊 。
宋江 見 打咗 佢哋 兩個 ，可惱嘢 咯 ，嬲 到 肚 都 爆埋 ，發誓 要 掃平 佢 東平府 。
噉啊叫 郁保四 同 王定六 上車 返去 山寨 休息 養傷 先 。
呢個 時候 ，只見 九紋龍 史進 就 起身 話 喇 ：
大哥 ，小弟 往日 喺 東平府 嘅 時候 ，同 一個 叫做 李瑞蘭 嘅 妓女 相好 嘅 。
嗱 ，我 而家 帶 多啲 金銀 ，偷偷地 入咗 城 ，去 佢 屋企 住落 。
噉 我哋 約定 時間 ，大哥 你 就 攻城 。
等 董平 出嚟 交戰 喇 ，我 就 擒 上去 更樓 放火 ，裏 應 外 合 就 大事 成功 喇 。
宋江話 ：啊 ，噉就好極喇 。
於是 史進 就 帶 啲 金銀 ，用 個 包袱 包好 ，喺 身邊 藏好 暗器 ，拜別 咗 宋江 就 起程 。
宋江話 ：兄弟 ，你 要 小心 在意 啊 ，我 暫時 按兵不動 ，吓 。
好喇 ，而家 講下 史進 啊 ，佢 偷偷 入咗 城 ，一直 就 嚟到 李瑞蘭 屋企 。
嗰個 大伯 見到 係 史進 就 吃咗 一驚 ，請 佢 入去 裏 便 坐 就 叫 個 女 出嚟 。
李瑞蘭 就 將 史進 帶咗 上樓 坐落 ，就 問 喇 ：
哎呀 ，乜 咁耐 唔見 你 啊 ？
聽講 你 喺 梁山泊 做咗 大王 ，官府 出 榜 捉 你 噉 話 啊 。
呢兩日 ，喺 街上面 嘈 到 㗾㗾聲 ，都 話 宋江 要 嚟 打 城 借 糧 喎 ，你 點解 走嚟 呢度 嘅 啫吓 ？
史進 就 話 ：我 實不相瞞 ，我而家 喺 梁山泊 做咗 頭領 ，之 未曾 有過 咩嘢 功勞 。
而家 宋大哥 要 嚟 打城 借糧 ， 我 啊將 你 屋企 嘅 情形 同 宋大哥 講 咗 。
而家 我 特登 嚟 呢處 做 卧底 ，嗱 ，呢度 有 一包 金銀 送畀 你 嘅 ，你千祈唔好 走漏 消息 啊 。
聽日 如果 事情 成功咗 ，就 索性 帶 你 一家 上山 快活 啦吓 。
李瑞蘭 岌頭岌腦 一啖 應承 ，收起 啲 金銀 ，整咗 幾味 好餸 攞 壺 酒 嚟 款待 佢 。
然後呢 ，就嚟 同 嗰個 老虔婆 商量 喇 ，佢 話 ：
史進 往時 嚟 做客 ，係 個 好人 ，喺 我 屋企 出入 ，梗係 唔緊要 啦 。
之而家佢做咗山大王噃 ，一下穿咗煲 ，唔係講玩嘅噃 。
個 大伯 又 話 喇 ： 喂 ， 梁山泊 宋江 呢 班 好漢 呀 好 犀利 㗎 噃， 但凡 攻打 城池 ， 冇 有 話 攻 唔 破 㗎 。
如果 我哋 唔 聽 佢 話 ，嗯哼 ，有朝一日 ，佢哋 打破 咗 城池 入嚟 呀 ，會 肯 過 我哋 嘅 ？
個 老 虔婆 就 鬧 佢 話 喇 ： 正 蠢材 啊 你 ， 你 識得 乜嘢 吖 ！
自古 都有 話 吖嘛 ，黃蜂 入 懷 ，除 衫 去 趕 吖嘛 ，天下 通 嚟 㗎 喇 ，自首者 就 免 本罪 。
嗱 ，你 快啲 去 東平府 告發 佢 啊 ，捉咗 佢 去 就 免得 日後 馱累 我哋 啊 。
之噉噃 ，佢 畀咗 咁多 金銀 過 我哋 ，都係 想 我哋 幫 佢 啫 。
如果唔係呀 ，佢 買 我哋 做 乜嘢 吖 ？
死 老 鬼 ， 你講 啲 噉 嘅 説 話 真 係 放屁 啊 ！
我哋 呢間 老舉寨 ，都 唔知 害盡 千千萬萬 人 㗎 喇 爭在 佢 一個 咩 ？
好 ，你 如果 唔去 告 ，我 就 親自 去 衙門 ，連 你 都 告埋 。
誒誒誒誒 ，你 咪 咁 惡 咋 。
嗱 ，叫 阿女 氹住 佢 先 ，千祈唔好 打草驚蛇 啊 畀 佢 走咗 就唔得掂㗎 。
嗱 ，我 而家 去 報畀 啲 差人 聽 ，叫 啲 差人 嚟 捉住 佢 ，然後 再 去 告發 佢 啦吓 。
而家 講 下 史進 佢 一個人 喺度 ，慢慢 飲酒 。
見到 李瑞蘭 返上嚟 樓 ，咦 。覺得 李瑞蘭 嘅 面色 呀 ，神色 不定 。
史進 就 問 喇 ：大姐 ，你 屋企 係咪 有 啲 咩 嘢 事 啊 ？睇 你 噉 慌失失 噉 嘅 。
唔係 ，我 先頭 上 樓梯 ，一腳 踩空咗 ，爭啲 跌咗 一跤 啫嘛 ，哎呀 嚇到 我 個心 噗噗 咁 跳啊 。
史進 雖然 係 英勇 啊 ，之 個人 直腸直肚 就 畀 佢 呃過咗 ，一啲 都 冇 懷疑 到 。
好喇 ，當 史進 同 李瑞蘭 正 喺度 暢敘 離情 ，都 唔到 一個 時辰 ，聽見 樓梯 啊 沊沊 聲 腳步 響 有人 奔 上嚟 喇 。
窗外 便 ，哦嗬噉 吶喊 一聲 ，幾十個 差人 就 衝到 上樓上 。
史進 就 措手不及 ，就畀 嗰班人 七手八腳 將 佢 五花大綁 捉住 一直 解到 去 東平 府衙門 大堂 。
程太守 見咗 就 鬧佢 話 喇 ：
你 呢 個 傢伙 膽大包天 啊 ， 啊 ， 居然 一個 人 走 嚟 做 奸細 ？
哼哼 ， 如果 唔 係 李瑞 蘭 嘅 父親 嚟 告發 你 ， 就 畀 你 害 咗 我 一府 良民 咯 。
你 快啲 招供 ，啊 宋江 叫 你 嚟 做 乜嘢 ！
史進 一聲 唔出 。
董平 就 話 喇 ：呢啲 噉嘅 賊骨頭 ，唔 打佢 點 肯 招供 㗎 。
程太守 就 喝 一聲 話喇 ：人 嚟 ，同 我 出力 噉 打 呢 傢伙 。
兩便 嗰啲 獄卒 牢子 ，即刻 過嚟 ，將 冷水 噴 喺 史進 嘅 大髀 處 ，兩隻 大髀 就 各 打一百 大棍 。
史進 就 真係 硬漢 啊 ，任得 佢 點 打 都 好 ，一句 説話 都 唔 講 。
董平 就 話 喇 ：將 呢個 傢伙 用 長枷木 銬鎖住 佢 ，韞 喺 死囚牢 裏 便 ，等 捉埋 宋江 ，一齊 解去 京師 斬首 。
好喇 而家 返轉頭 講下 宋江 。
自從 史進 去咗 之後 啊 ，佢 就 將 呢件事 詳詳細細 噉 寫信 話畀 吳用 知 。
吳用 一 睇咗 宋公明 嗰 封 來信 ，話 史進 去咗 個 妓女 李瑞蘭 屋企 做 卧底 ，準備 做 內應 喎 就 大吃一驚 。
即刻 同 盧俊義 講聲 就 漏夜 嚟 見 宋江 ，佢 問 喇 ：係 邊個 叫 史進 去 㗎 ？
宋江 就 話 ：哦 ，佢 自願 去 嘅 。
佢 話 呢個 李瑞蘭 啊 ，係 佢 往日 嘅 相好 ，感情 好 深 㗎 喎 ，所以 佢 話 去 咯 ，我 就 畀 佢 去 啦 。
哎呀 兄長 啊 你 考慮 得 唔夠 周到 喇 ，如果 吳某 喺 呢處 就 點 都 唔 畀 佢 去 㗎 喇 。
娼妓之家 迎新送舊 ，唔知 害咗 幾多人 咯 。
更兼 水性楊花 ，就算 舊時 有啲 恩情 ，亦 難 出 虔婆 之 手 。
史進 呢次 去 呀 ，必定 會 吃虧 。
噉 宋江 就 問 吳用 有 咩嘢 辦法 補救 啊噉 。
吳用 呢 就 嗌 顧 大嫂 嚟 佢 話 ：
勞煩 你 去 行 一趟 ，你 扮做 個 乞兒婆 ，偷偷 入 城 ，沿街 去 乞食 探聽 下 消息 。
有咩嘢 動靜 喇 就 火急 返嚟 。
如果 史進 韞 喺 個 監牢 喇 ， 你 就 去 𠼮 啲 獄卒 ， 你 話 ， 史進 往日 呢 對 你 有 恩 ， 要 送 碗飯 畀 佢 噉 。
入咗 監牢 呢 就 暗中 講畀 史進 知 ，話 我哋 月尾 嗰 晚 ，黃昏 前後 就 必定 嚟 攻城 嘅 。
叫 史進 啊 喺 廁所 附近 安排 脱身 之計 啦 。
噉喺 月尾 嗰 晚 ，你 就 喺 城裏 便 放火 為 號 ，我哋 呢度 就 進兵 ，噉 呢件事 就 可以 成功 。
跟住 吳 用 呢 又 同 宋江 話 ：
兄長 ，我哋 要 先 打 汶上縣 ，噉 啲 老百姓 呢 ，就 必定 趯 去 東平府 嘅 。
到其時 ，顧大嫂 就 混雜 喺 啲 百姓 裏 便 ，乘機 入城 就 無人 知覺 。
吳用 定 落咗 呢條 計策 之後 ，上馬 返去 東昌府 。
跟住 宋江 就 命令 解珍 、解寶 ，帶咗 五百 幾 人 ，攻打 汶上縣 。
果然啲 百姓 呢 就 扶老攜幼 拖 男 帶 女 走難 ，㗾㗾聲噉 趯去 東昌府 喇 。
顧大嫂 呢 ，頭髮 蓬鬆 衣衫襤褸 就 混雜 喺 啲 人群 裏 便 ，就 湧咗 入 城 。
通街 咁 嗌 福心 啦 ，好心 啦 噉 到處 乞食 咯 喎 。
噉究竟 顧大嫂 啊 見唔見到 史進 呢 ？又 救唔救到 史進 出嚟 呢 ？
