宋江 嗰 晚 喺 中軍帳 內 就 朦朦朧朧 見到 天王 晁蓋 顯靈 。
話佢聽 有 百日 血光之災 ，只有 江南 地靈星 可以 醫得好 ，勸佢 早早 收兵 呢個 係 上策 噉 。
宋江 又 想 再 問 清楚啲 ，就 行 上前 去 話 ：
大哥 你 陰魂 嚟到 ，請 你 講明白啲 啦 。
點知 畀 晁蓋 一推 ，即刻 就 扎醒 ，原來 係 南柯 一夢 。
就嗌 個 小校 啊 請 軍師 嚟 圓夢 ，即係 嚟 解下 夢 。
吳用 嚟到 中軍 帳 ，宋江 就 將 呢件 奇怪 嘅 事 講 佢 聽 。
吳用 話 喇 ：既然 係 晁天王 顯聖 就 唔好 唔聽 噃 。
而家 天寒地凍 ，啲 人 馬 好 難 住得耐 嘅 。
不如 暫時 回山 ，等到 冬盡 春初 咯 ，雪消 冰解 嗰陣 再嚟 攻城 ，亦 未為 遲 吖 。
宋江 話 ： 軍師 你 噉 講 係 好 啱 嘅 。
不過 盧 員外 同 石秀 兄弟 仲 韞 喺 監牢 嚟 ，度日如年 ，就係 盼望 住 我哋 去 救 佢 。
聽下 我哋 返咗 去 ，又 怕 嗰班 傢伙 害 咗 佢哋 兩個 條命 噃 。
唉 ，呢件事 真係 進退兩難 。
噉 呢件事 當晚 就 商量 未定 。
第日 ，宋江 覺得 神思 疲倦 周身 痠痛 ，個頭 呀 好似 刀劈 噉 ，發起 高燒 ，唔起得身 。
各位 頭領 都 嚟 探 佢 啦 ，宋江 就 話 喇 ：
哎呀 ，我 只係 覺得 ，個 背脊 又 熱 又 痛 啊 。
大家 解開 佢 件 衫 睇下 ，嘩嗨 ，只見 個 背脊 呀 ，好似 隻 鑊仔 噉 紅腫 起上嚟 。
吳用 就 話 喇 ：呢種 病 唔係 癰 就係 疽 喇 。
我 睇 醫書 ，話 綠豆粉 可以 護心 ，保住 唔 畀 毒氣 侵犯 嘅 。
誒 ，即刻 去 買 返嚟 畀 大哥 食 。
同時 呢 ，又 使 人 搵 藥 嚟 到 醫 佢 ，亦 唔 見 好 。
浪 裏 白跳 張 順 就 話 喇 ：
小弟 喺 舊時 喺 潯 陽江 嘅 時候 呢 ， 我 老母 個 背脊 就 生過 個 毒瘡 ， 乜嘢 藥都 唔 能夠 醫得 好 喇 。
收尾 就 得到 建康府 嗰個 醫生 安道全 啊 ，哈 手到 病除 。
所以 收尾 呢 ，小弟 但凡 撈到 啲 錢 就 梗係 搵人 送 啲 去 畀 佢 。
而家 兄長 得咗 呢個 病 ，係 要 佢 至 醫得 好㗎 喇 。
不過 呢次 去 建康府 條路 好 遠 ，一下間 就 冇 咁快 嚟得到 就係 喇 。
為咗 大哥 嘅 病 ，小弟 就 日夜 趕路 去 請 佢 返嚟 啦 。
吳用話 ：啊 ，兄長 發夢 ，聽見 晁天王 話 百日之災 ，係 要 江南 地靈星 先至 醫得好 佢 。
唔通 就 應喺 呢個 人 嘅 身上 ？
宋江 話 喇 ：
兄弟啊 ，你 ，你如果識得 呢個人 ，就快啲 同我去 ，唔好怕 辛苦 ，唉 以義氣為重 ，趕去 請 呢個醫生 返嚟 ，救 我 一命 吖 。
吳用 就 嗌 人 攞咗 蒜條 金 一百 兩 ，愛嚟 送畀 醫生 嘅 ，再 交 三 二十 兩 碎銀 畀 張順 作為 使用 ，就 吩咐 佢 話 喇 ：
你 即刻 起程 ，吓 ，無論如何 一定要 同佢 嚟 ，千祈 唔好 誤事 啊 。
我 而家 呢 就 拔寨 回 山 ，你 同 佢 嚟 山寨 相會 啦 。
兄弟 ， 你 一定 要 快去快回 啊 。
張順 拜別咗 大家 ，孭 上 包袱 就 趕去 建康府 喇 。
而家 講下 軍師 吳用 啊 ，佢 又 通知 眾位 將領 ，暫時 收兵 罷戰 回 山 。
噉啊 用 架 車 呢 載咗 宋江 ，漏夜 起程 。
噉 啊 大名府 裏頭 呢 曾經 中過 伏兵 之計 㗎 ， 又 估 話 佢 又 試想 引 官軍 去 追 ， 就 唔 敢 去 追 嘞 喎 。
第日 ，梁中書 得到 報告 ，話 宋江 人馬 又 扯咗 喇 唔知 咩 嘢 意思 呢噉 。
李成 、聞達 就 話 喇 ：嘿嘿 ，吳 用 嗰個 傢伙 啊 ，詭計多端 ，我哋 只可 堅守 不宜 追趕 啊 。
梁中書 就 話 係 啊 唔 好 追 啊 唔 好 追 啊 。
所以 吳 用 佢哋 呢 ，就 好 順利 噉 返咗 去 梁山泊 喇 。
而家 話 分 兩頭 ，就 講下 張順 佢 為咗 要 救 宋江 ，就 日夜 兼程 。
當時 正 係 冬盡春來 ，唔係 雨 就係 雪 ，一路 都 唔知 幾 難行 。
張順 冒 住 風雪 ， 唔 要命 咁 趕路 啊 。
行咗 十幾日 ，就 嚟到 揚子江 邊 ，噉 想 搵 渡船 啦 ，點知 一隻 都 冇 ，弊嘞 。
張順 跟住 江邊 行 ，誒 ，見到 蘆葦林 裏 便 有 啲 煙 起 喎 ，得喇得喇 有 喇 。
張順 就 嗌喇 ：船家 ，撐 隻 船 過嚟 搭 我 啊 。
只見 蘆葦林 裏 便 沙沙聲響 ，有 個人 行出嚟 。
呢個人 頭戴 竹帽 ，褸住 件 蓑衣 ，佢 問 喇 ：客官 想 去 邊處 啊 ？
張順 就 話 喇 ：我要 過江 ，去 建康府 有 啲 緊要 事 ，我 畀 多啲 船錢 你 ，棹 我 過去 啦 。
棹 你 去 又 得 ，之 今日 ，咁 晏 咯 ，就算 過咗 江 都 冇 埞住 吖 。
不如 噉 誒 ， 你 喺 我 船 處 唞 下 先 ， 到 咗 四 更 風靜雪停 喇 ， 我 就 棹 你 過去 啦 。
喂 之 你 要 畀 多啲 船錢 過 我 至 得 㗎 喎 。
噉好啦 。
張順 就 跟住 個 船家 鑽 入去 蘆葦林 裏 便 行咗 冇 幾 遠 。
見到 灘邊 就 灣住 隻 船仔 ，喺 船篷 下 便 有 個 瘦瘦 嘅 後生仔 喺 處 焙緊 火 。
船家 就 扶 張順 落咗 船 ，行 入去 艙 裏 便 。
張順 就 除低 身上面 嘅 濕衣服 ，叫 嗰個 後生仔 啊 喺 啲 炭火 上面 同 佢 焙乾 。
然後呢 ，佢 打開 個 包袱 ，攞 張 棉被 出嚟 捲住 個 身 就 瞓 喺 艙 嚟 。
佢 問 個 船家 話 ：船家 ，呢處 有 冇 酒 賣 啊 ？買 幾 碗 嚟 飲 下 都 好 噃 。
船家 就 話 喇 ：誒 酒 就 冇 埞 買 咯 ，想 食飯 呢 嚟 食 碗 啦 。
張順 食咗 碗飯 ，碌低 就 瞓 。
一來 呢 ， 連氣 咁 多日 好 辛苦 喇 ， 二來 亦 十分 大意 喎 ， 所以 到 咗 初 更 左右 呢 就 噘 噘 聲 咁 瞓 着 喇 。
嗰個 瘦𠵼𠵼嘅 後生仔 喺 啲 炭火 處 焙緊 嗰件 棉衲 ，見到 張 順 瞓着 喇 ，就 嗌 個 船家 話 ：大哥 ，睇見 嘛 ？
個 船家 就 扤過嚟 ，喺 包袱 嗰處 一捻 ，咦呀 ，覺得 係 啲 金銀 之類 嘅 嘢 ，就 打個 手勢 話 喇 ：
你 去 解開 隻 船 ，撐 去 江心 先至 逳手 都 唔 遲 啊 。
嗰個 後生仔 就 推開 個 船篷 跳咗 上岸 ，解咗 纜索 上返 船 ，用 竹篙 撐 離咗 岸 ；
搭上 支 櫓 ，咿啞咿啞噉 就 棹到 去 江心 喇 。
嗰個 船家 喺 船艙 裏 便 ，攞 一條 綁 船 嘅 繩 ，輕手輕腳 噉 ，將 張 順 就 扎起 上嚟 ，就 行 去 船尾 嘅 艎板 底下 攞出 一把 板刀 。
張順一 醒咗 ，死喇 ，雙手 畀 人 綁實 ，逳 都 唔 逳得 。
嗰個 船家 揸住 把 大刀 ，扤住 喺 佢 身處 。
張順 就 話 喇 ： 好漢 ， 你 放生 我 條命 ， 我將 啲 金 畀 晒 你 。
個 船家 話 喇 ：嘿嘿 ，金 我 又 要 ，你 條 命 我 亦 要 。
大佬 ，噉 唔該 你 畀 我 一個 全尸 喇 ，噉 我 個 冤魂 亦 唔會 嚟 纏 你 。
好啦 。
個 船家 放低 板刀 ，將 張順 搦起 上嚟 兵 砰噉 掉咗 落水 。
嗰個 船家 走去 打開 張 順 嘅 包袱 嚟 睇下 咯噃 ，嘩嗨 ，見到 咁多 金銀 ，哼 ，佢 就 唔 想 分畀 嗰個 瘦鬼 後生 。
佢 話 ：五哥 啊 ，入嚟 ，我 有 説話 同 你 講 啊 。
嗰個 瘦鬼 後生 咪 鑽入 船艙 咯 ，畀 個 船家 一手 揪住 一刀 劈落去 當堂 攞 佢 條命 啊 推 咗 落水 。
然後 呢 ， 嗰 個 船家 就 抹 乾淨 船 裏 便 嘅 血跡 ， 自己 呢 就 棹 船 走 咗 喇 。
張順 呢個人 係 好掯 㗎嘛 ，佢 確係 喺 水底 啊 伏得 三晚五晚 嘅 。
佢 畀 個 船家 推 咗 落水 ，嘿啱晒 ，佢 喺 江底 就 咬斷咗 條 繩 ，就 游水 游到 去 南岸 。
上咗岸喇 ，見到 樹林 裏 便 隱隱約約 有 啲 燈光 。
噉佢就 全身 濕淋淋 噉 行入去 樹林 去 望下 。
哦 ，原來 係 一間 鄉村 酒店 ，啲 人 就 半夜 起身 醡酒 ，嗰啲 燈光 呢 ，係 喺 啲 爛墻 嚹 漏 出 嚟 。
張 順行 到 去 拍開 咗 門 ， 見到 個伯爺 公行 出 嚟 ， 張順 跪 低 就 拜 。
個 伯爺 公話 喇 ：哦 ，你 係唔係 喺 江 上面 畀 人哋 打劫 咗 ，跳水 逃命 嘅 呢 ？
張順 就 話 喇 ：我 老實 同 老伯 你 講 啦 ，小人 係 嚟 建康 有 啲 事 嘅 。
好夜喇喺對岸搵船 ，點知撞着 兩個壞人 ，將小人所有嘅衣服金銀冚𠾴唥都劫晒 ，掉咗小人落個江處 。
小人 又 好彩 會 游水 所以 得返 條命 啫 ，求 老伯 你 救下 我 啦 。
個 伯虎 聽 佢 噉 講 ，就 帶 張 順 入 去 裏 便 間 房 處 ，攞 件 棉衲 畀 佢 着 ，換 低啲 濕衣服 嚟 焙乾 ，仲 坐 熱啲 酒 嚟 畀 佢 飲 。
個伯虎 話 喇 ：你 ，貴姓 啊 ？你 喺 山東 嚟 呢處 做 乜嘢 事 啊 ？
小人 姓 張 ，建康府 安太醫 係 我 個 好朋友 ，特意 嚟 探望 佢 啫 。
哦 ，你 喺 山東 嚟 呀 ，噉 有冇 經過 梁山泊 啊 ？
有 啊 ， 正 正 喺 嗰 處 經過 啊 。
誒聽講佢山上嘅宋頭領啊 ，係唔打劫嗰啲來往客商 ，又唔殺害人命㗎噃 ，就係替天行道㗎啫係唔係啊吓 ？
係啊 ，宋頭領 就係 以 忠義 為 主 ，唔 害 良民 㗎 ，就係 嬲 啲 貪官 污吏 㗎 咋 。
我啊聽人哋講喇 ，話 宋江 呢班人 呢 ，確係 仁義 嘅 ，一味 係 救濟 啲 貧苦人家 㗎啫噉 ，唔係 我哋 呢處 啲 草賊 噉樣 嘅 。
啊 如果 得到 佢 嚟 呢度 ，噉 啲 百姓 就 快活 咯 ，唔使 畀 嗰班 貪官 污吏 魚肉 咯 。
張順 聽咗 就 話 喇 ：老伯 ，你 唔好 驚吓 。
小人 就係 梁山泊 嘅 浪裏白跳 張順 。
因為 我 大哥 宋公明 ，背脊 生 個 大瘡 ，叫 我 攞住 一百 兩 黃金 嚟 請安道全 去 醫病 。
點知 一時 大意 ，喺 船 裏 便 瞓着咗 ，畀 呢 兩 個 賊仔 綁咗 手腳 ，掉咗 落 江 。
收尾 畀 我 咬斷 條 繩 ，就 嚟到 呢處 啫 。
啊 ， 你 既然 係 梁山泊 嘅 好漢 ， 誒 你 等等 ， 你 等等 ， 等 我 叫 個 仔出 嚟 見 下 你 。
冇幾耐 ，有 個 後生仔 後便 行出嚟 ，佢 對住 張 順 拜咗 幾 拜 佢 話 ：
小人 久聞 阿哥 個 大名 ，只係 無緣 見面 啫 。
小人 姓 王 ，排行 第六 。
因為 走趯得快 ，人人 都 嗌 小人 做 活 閻婆 王 定 六 。
我 平生 ，就係 好 游水 舞棍 ，就係 搵唔到 師父 嚟 教 ，而家 ，暫時 喺 江邊 賣 酒 度日 。
先頭 打劫 阿哥 嗰 兩個 人 啊 ，小人 都 認得 嘅 。
一個 係 截江鬼 張旺 ， 嗰 個 瘦 𠵼𠵼 嘅 呢 ， 就 叫做 油 裏 鰍 孫五 。
呢 兩個 傢伙 啊 ，周時 都 喺 條 江 處 打劫 嘅 。
阿哥 你 放心 啦 ，喺 處 住 幾日 先 ，等 呢 兩個 傢伙 嚟 飲酒 嘅 時候 ，我 同 阿哥 你 報仇 。
張順 就 話 喇 ：好多謝 兄弟 你 嘅 好意 。
我 為咗 兄長 宋公明 ，恨不得 一日 就 返到去 山寨 。
等到天光 我 入城 ，去 請安 太醫 ，請咗 佢 之後 ，我 就 返嚟 同 你 見面 ，吓 。
王定六 將 自己 嘅 衣裳 畀 咗 張順 換 。
又 連忙 擺酒 嚟到 款待 佢 呢啲 不在 話下 喇 。
第日 ，好天喇 ，啲 雪 又 化咗 喇 ，王定六 攞咗 十幾 兩 銀 ，畀咗 張 順 ，等 佢 好 去 建康府 。
張順 入到 城 ，一直 去到 安道全 間 屋企 ，見到 安道全啊 正 喺 門前 賣 藥 。
張順 入到去 對住 安道全 跪低 就 拜 。
安道全 睇見 張順 就 話 喇 ：哎呀 ，兄弟 咁多年 冇見 ，咩嘢 風吹 你 嚟 啊 ？嚟嚟嚟 ，請 入裏 便 坐 啦 。
張順 跟住 安道全 入到去 裏便 ，就 將 大鬧 江州 ，跟 宋江 上 梁山 嘅 事 講咗 畀 安道全 聽 。
然後 就 話 宋江 啊 ，背脊 生咗 個 瘡 ，特意 派 佢 嚟 請 神醫 ；
點知 喺 揚子江 上 ，畀 人 打劫 爭啲 連命 都 冇 咗 ，因此 呢 空手 嚟到 ，就 將 呢啲 事 都 晒出嚟 喇 。
安道全 就 話 ：誒 如果 講到 宋公明 呢 係 天下 義士 ，去 行 一趟 都 好 應該 嘅 。
只不過 係 拙妻 就 過咗身 ，屋企 再 冇 第二 個 親人 咯 ，去得 遠 係 唔得 㗎 噃 ，因此 呢 ，誒 好難 同 你 去 喎 。
張順 就 苦苦 哀求 佢 話 ：唉 ，如果 兄長 你 推辭 唔去 ，噉 小人 亦都 好難 回山 咯 。
噉 ，等 我 諗下 先 啦 。
張順 就 搏命 咁 𠼮 佢 ，終於 安道全 就 應承 咗 。
點解 安道全 咁 難 至 請得 佢 逳 呢吓 ？
原來 安道全 啊 ，同 建康府 一個 煙花娼妓 叫做 李巧奴 ，近來 來往 得 非常 之 密切 ，打到 火熱 ，哈哈 。
噉 當晚 就 帶 張順 一齊 去 佢 屋企 飲酒 ，就 叫 李巧奴 就 拜 張順 做 阿叔 。
三杯 兩盞 飲到 半醉 ，安道全 就 對 巧奴 話喇 ：
誒 我 今晚 就 喺 你 處 過夜 喇 ，聽朝早 我 同 呢個 兄弟 去 山東 行 趟 ，多則 一 個 月 ，少則 廿零 日 就 返嚟 探 你 啦 吓 。
嗰個 李巧奴 話 ：我 唔 畀 你 去 ，你 如果 唔聽 我 話 ，以後 你 就 唔好 上 我 門 喇 。
安道全話 ：唉 ，我 個 藥箱 行李 都 執拾 好喇 ，聽日 就 要 趕住 起程 㗎喇 。
你 放心 啦 ，我 去咗 又 唔係 唔返嚟 嘅 ，吓 。
李巧奴 一味 詐嬌 ，僂住 喺 安道全 嘅 身處 佢 話 ：
你 如果 唔聽 我話 呢 ，你 係 要 去 我 就 ，我 就 咒 到 你 啲 肉 一片片 咁 飛 。
張順 聽到 呢句 説話 就 恨不得 一啖 就 吞咗 呢個 婆娘 。
到咗挨晚 ，安道全 飲到大醉 ，就 扶咗佢 去 巧奴 間房 瞓 喺 張床 處 。
巧奴 又 走嚟 趕 張 順 嘞 喎 ，佢 話 喇 ：
你 返去 啦 ，我 屋企 冇 地方 畀 你 瞓 喇 。
張順話 ：我要 等 阿哥 酒醒 先 一齊 扯 。
哦 ，李巧奴 趕 佢 唔逳 ，冇 修 啦 ，就 唯有 安排 佢 喺 門口 間 房仔 裏 便 住 。
張順 個 心 啊 擔憂 到 好似 畀 火 煎 噉 啊 邊度 瞓得着 呢 ？
初更嘅時候 ，有人 敲門 。
張順 喺 墻 嚹 裏 便 裝下 ，見到 有 個人 閃咗 入嚟 就 同 嗰個 虔婆 傾偈 。
嗰虔婆 問 喇 ：哎呀 ，乜 你 咁耐 冇嚟 啊 ？去咗 邊處 啫 ？
今晚 個 太醫 飲醉咗 瞓 喺 房 嚟 啊 ，噉 點算 啊 真係 。
嗰個人 就 話 ：
我 有 十 兩 黃金 送畀 阿巧姐 打啲 首飾 啫 ，阿嬸 啊 ，你 點 都 方便 下 ，叫 佢 嚟 陪下 我 啦 吓 ，去 啦 。
噉啊 ，噉就 去 我 間 房 啦 ，我 叫 個 女 嚟 ，吓 。
張 順 喺 燈影 下 便裝 下 ， 見到 呢 個人 原來 就 係 截江鬼 張旺 。
呢個 傢伙 啊 ，但凡 喺 條 江 處 作 到 啲 錢 呢 就 嚟 佢 屋企 捹 㗎 喇 。
張順 見咗 ，哦 ，即刻 心頭火起 啊 。
佢 再 仔細 聽 下 ，就 聽見 虔婆 喺 間 房 處 安排 酒菜 ，叫 巧奴 嚟 陪 張旺 咯噃 。
張順 呢 本來 想 即刻 衝入去 㗎 喇 ，之 又 怕 搞𢰸咗 ，就 畀 呢個 賊佬 走甩 就 唔 抵 啦 ，噉 啊 等下 先 。
約莫 等到 三更 嘅 時候 ，廚房 嗰 兩個 工人 都 醉咗 喇 ，嗰個 老虔婆 亦 東倒西歪 ，喺 燈 前 瞌眼 瞓 。
張順 靜靜噉 開咗 房門 ，閃咗 落去 廚房 ，見到 有 把 菜刀 ，擸擸 亮噉 放 喺 灶頭 上 便 。
佢 睇 下 嗰個 虔婆 ，就 喺 側 跟 張 轎凳 上面 瞓着 。
張順行 入去 攞起 菜刀 ，就 殺咗 個 老虔婆 先 。
當佢 要 殺 工人 嘅 時候 呢 ，唔得嘞 。
原來 把 菜刀 唔夠 利 ，斬咗 一個 人 啊 ，刀口 已經 卷起 上嚟 。
嗰 兩個 工人 正 話 想 嗌啫 ，張 順 見到 有 把 劈柴 嘅 斧頭 就 喺 手邊 嚟 ，一攞起 一斧 一個 ，就 劈死 晒 。
嗰個 李巧奴 喺 個 房間 聽見 動靜 就 連忙 開門 ，撞正 張 順 ，手 起 斧 落 ，照 心口 就 劈 低 佢 。
張旺 喺 燈影 之下 見到 斬死咗 個 婆娘 ，推開 後 便 嘅 窗 啊 跳 牆 走咗 。
哎呀 張順 呀 後悔 到 極 咯 ，𨂽 脚 都 冇 用 啦 。
噉佢 割咗 啲 衣襟 ，蘸 啲 血 ，喺 埲牆 上面 寫住 ：
殺人者 安道全 也 噉 ，一連 寫咗 幾十 笪 。
等到 五更 上下 天光 喇 ，就 聽到 安道全 喺 房間 裏 便 酒醒 就 嗌 巧奴 嘞噃 。
張順話喇 ：阿哥 ，阿哥啊 ，你 唔好 出聲 吓 ，我 帶 你 睇下 兩個人 。
嘩 ，安道全 起咗身 ，見到 四條 鹹魚 喺 處 ，嚇到 佢 成身 都 痺晒 ，牙齒 打掛 。
張順話 ：阿哥 ，你 睇下 墻 上面 寫嘅 嘢 。
安道全 一睇 ：哎呀 你 害死 我 咯 。
張順話喇 ：而家 只有 兩條路 ，任你行喇 。
如果 你 嘈起上嚟 ，我 自己 走人 ，噉 阿哥 你 就 要 去 填命 。
如果 你 想 冇事 呢 ，就 即刻 返 屋企 攞咗 藥箱 ，跟 我 漏夜 趕上 梁山泊 ，救 我 宋江 大哥 。
嗱 呢 兩條 路 任 你 行 喇 。
安道全 話 ： 哎呀 兄弟 乜 你 做 埋 晒 啲 噉 嘅 短命 嘢 㗎 ， 唉 我 跟 你 行 係 啦 。
趁住 個 天 未光 ，張順 就 擸咗 啲 錢 嚟 做 使用 ，同 安道全 就 返 屋企 攞咗 藥箱 ，出咗 城 ，一直 就 嚟 到 王定六 間 酒店 。
王定六 就 講畀 張順 聽 ：哎 阿哥 ，尋日 張旺 喺 呢處 經過 噃 ，可惜 阿哥 你 唔 喺 處 啫 。
張順話 ：我 有 大事 要 做 ，顧唔切 報 小仇 喇 。
説話未了 ，王定六 就 話喇 ：嘿 ，張旺 嗰傢伙 嚟喇 。
張順話 ：你 唔好 驚動 佢 ，睇下 佢 去 邊處 。
王定六 就 跟住 張旺 ，只見 張旺 去到 灘頭 睇 船 。
王定六 就 嗌住 佢 話 ：張大哥 啊 ，你 留住 隻 船 吓 ，搭 我 兩個 親眷 過 江 啊 。
張旺 話 喇 ：要 搭船 就 快啲 嚟 啦 。
王定六 就 講畀 張順 知 。
張順話喇 ：安兄啊 ，你 除 啲 衫 嚟 畀 小弟 着 ，小弟嘅 衫 呢 就 換 畀 你 着 ，換咗 衫 先至 搭 船 。
安道全 話 ：咦 ，噉 係 咩嘢 意思 啊吓 ？
小弟 自有 主張 兄長 唔使 問 。
於是 安道全 就 除咗 衣服 ，同 張順 換轉 嚟 着 。
王定六 就 孭住 個 藥箱 ，就 一齊 行 去 江邊 。
張旺 呢 灣 好隻 船 ，三 個 人 上 咗 船 喇 。
張順 一直 行 入去 船尾 ，掀起 艎板 睇睇 ，嗰 張板 刀 仲 喺 處 。
張順 就 攞起 把 刀 ，行返 入 船艙 。
張旺 撐開 隻 船 ，咿咿啞啞 咁 搖到 去 江心 。
張順 就 除咗 長袍 嗌 一聲 話 ：船家 你 快啲 嚟 ，你 睇下 船艙 裏 便 點解 有 啲 血跡 嘅 ？
張旺 就 話 喇 ：嘿 客官 啊 咪 講笑 啦 。
一便 講 啊 一便 鑽入 去 船艙 。
畀 張 順 一揦住 佢 手 一扭 ，揪住 佢 喝 一 聲 話 ：死賊佬 ，認唔認得 落雪 嗰 日 搭 船 嘅 客人 啊 ！
張旺 一 睇 ，唉 ，啞 都 冇 得 啞喇 。
張順 就 話 ：你 呢個 傢伙 謀咗 我 一百 兩 黃金 ，又 要 害 我 條 命 ，吓 。
你 嗰個 瘦鬼 後生 去咗 邊處 啊 ？
哎 ， 哎 ， 哎 好漢 ， 好漢 ， 誒 ， 小人 得 咗 錢 ， 唔 想 分 畀 佢 ， 就 將 佢 殺死 咗 掉 咗 入 去 江 裏 便 喇 。
你 識唔識 我 啊 ？
誒誒 ，我 誒唔識 好漢 喎 ，誒唔該 好漢 放生 小人 條 狗 命 啦 。
嘿嘿 ，我 生在 潯陽江邊 ，長在 小孤山下 ，開過 魚欄 ，邊個 唔識 我 ？
皆因 鬧咗 江州 上咗 梁山泊 ，跟隨 宋公明 縱橫 天下 ，邊個 唔怕 我 吖 ？
你呢個傢伙 趁 我 瞓着 ，綁住 我 雙手 掉咗 落 江心 。
如果唔係 我 水性 好啊 就冇命喇 ，今日 仇人 相見 ，唔能夠 放過 你 ！
順手 一拖 就 拉咗 入去 船艙 ，將 張旺 嘅 手腳 扎實 ，綁埋 一嚿 ，揦起嚟 就 對住 楊子江 。
張順話 ：我 亦 免 你 一刀 啦 ！
兵 砰噉 就 掉咗 佢 落水 。
王定六 睇見 啊 非常之 感慨 。
張順 就 喺 船 裏 便 抄返 前 幾日 畀 佢 劫 咗 嘅 黃金 同埋 啲 零碎 銀兩 ，都 包埋 落 個 包袱 處 ，三 個 人 棹 隻 船 就 到 咗 北岸 。
張順 對 王定六 講 ：賢弟 嘅 恩義 我 生死 難忘 。
你 如果 唔 嫌棄 咯 ，就 同 你 父親 執埋 間 酒店 ，上嚟 梁山泊 一同 歸順 大義 啦 。
唔知 你 心意 如何 呢 ？
王定六 話 ：大哥 你 講 嘅 ，正係 合 小弟 嘅 心水 啊 。
講完 就 分別 喇 ，噉 張 順 同 安道全 呢 就 喺 北岸 起程 。
王定六啊 落返船 ，自己 返去 屋企 ，收拾 行李 啊 跟住 趕上 梁山 。
噉呢個 安道全 係 個 斯文人 噃 ，唔 行得 路 嘅 ，所以 行咗 唔到 卅里 呢 ，就 已經 行 唔 逳 嘞 。
張順 就 請 佢 入去 間 鄉村 酒店 買 酒 嚟 招呼 佢 。
正喺度飲緊酒 ，只見 外便 有 個 商人 行到 面前 嗌咗 聲話 ：兄弟 ，乜 你 咁 遲 啊 ？
張順 擔 高頭 一望 ，哦 ，原來 係 神行太保 戴宗 ，扮做 個 商人 趕住 嚟 。
張順 就 介紹 畀 佢 同 安道全 相識 ，就 問 宋公明 大哥 個 消息 嘞 。
戴宗話 ：哎呀 ，而家 宋大哥 神思昏迷 ，一粒米 都 唔食得落 啊 ，眼睇住 ，眼睇住就死喇 。
張順 聽講 啊 流起 眼淚 上嚟 。
安道全 就 問 喇 ：佢 嘅 皮肉 血色 點 呢 ？
戴宗 就 回答 話 ：唉 ，肌膚 憔悴 ，成晚 咁 呻吟 ，痛得 好 交關 ，性命 難保 咯 。
安道全話 ：哦 如果 係 皮肉身體 都 仲 知道 痛 呢 ，就 有得 醫 ，就係 怕 誤咗 日期 啫 。
戴宗話 ：嘿噉啊 容易啫 。
即刻 攞 兩個 甲馬出 嚟 綁 喺 安道全 雙腳 處 。
噉戴宗 自己 就 孭起 個 藥箱 ，吩咐 張順 話 ：嗱 你 自己 慢慢 嚟 喇 ，我 同 太醫 行 先 喇 。
兩個人 離開咗 酒店 作起 神行法 ，喇喇聲 就 去咗 。
而家 講 下 張 順 喺 間 酒店 啊 ，一連 休息 咗 兩 三 日 ，就 見到 王 定 六 孭住 個 包袱 ，同埋 個 父親 果然 過咗嚟 。
張順 接到 佢哋 個 心 好 歡喜 ，就 話 ：我 特登 喺 處 等 你 啊 。
王定六 就 問 喇 ：誒 ，安太醫 去 咗 邊處 啊 ？
張順話 ：神行太保 戴宗 趕嚟 接佢 啊 ，已經 同佢 去咗 先 喇 。
王定六 同埋 父親 就 跟住 張順 ，一齊 起程 去 梁山泊 。
而家 講下 戴宗 佢 帶住 安道全 ，作起 神行法 ，好快 就 趕到 梁山泊 。
寨裏頭 個 大小頭領 迎接到 佢 就 帶 佢 嚟到 宋江 嘅 病床 前 便 ，只見 宋江 啊 ，呼吸 微弱 ，啲 氣息 好似 條 絲 咁 細 。
安道全 同 佢 把 咗 脈 就 話 ：各位 頭領 唔使 慌 ，啲 脈 冇事 嘅 。
病情 雖然 係 沉重啫 ，不過 唔緊要嘅 。
唔係 我 安某人 誇口 啊 ，十日 之內 就會 復原 㗎喇 。
大家 聽 佢 噉 講 歡喜 到 一齊 拜倒 喺 地下 多謝 佢 。
安道全啊 ，先 用 艾灸 引出 咗 毒氣 ，然後 又 用 藥 ，又 食 又 敷 。
哈哈 ，五日 之內 ，漸漸啲 皮膚 紅白 ，肉體 滋潤 ，飲得 食得 咯噃 。
唔到 十日 ，雖然 個 瘡 未曾 埋口 啊 ，之 已經 飲食 如常 喇 。
呢個 時候 ，只見 張順 帶住 王定六 父子 兩人 就 嚟到 ，拜見咗 宋江 同埋 眾位 頭領 ，就 講起 喺 江中 被劫 ，水上 報冤 嘅 事 。
大家 都 話 喇 ：哎呀 ，爭啲 誤咗 兄長 嘅 病情 啊 ，好彩 ，好彩啊 。
宋江 啱啱 病好 ，就 同 吳 用 商量 要 打 大名府 ，去 救 盧 員外 同 石 秀 。
安道全 就 勸 佢 話 ：將軍 個 瘡 未曾 埋口 啊 ，不可 輕動 ，一逳 親 就 冇 好得 咁快 㗎 喇 。
吳用 亦 話 喇 ：兄長 你 唔使 掛心 ，你 好好 休息 ，調理 身體 嘅 元陽 真氣 啦 。
呢 ，喺 兄長 有 病 嘅 時候 啊 ，小生 好幾次 派 人 去 大名 探聽 消息 。
知道 梁中書 啊 佢 日夜 驚慌 ，就係 怕 我哋 軍馬 臨 城 啊 。
小生 又 派人 一直 去到 大名城 裏 城外 ，喺 熱鬧 個 地方 ，貼咗 好多 無頭 告示 ，講 畀 啲 居民 知 叫 佢哋 唔使 疑慮 。
冤有頭債有主 ，大軍嚟到喇 ，自有對頭嘅噉 。
因此啊梁中書就越發驚喇 。
東京 蔡太師 啊 ，聽講話 關勝 投咗 降 ，喺 皇帝 面前 一句 都 唔敢 提到 ，就 只係 主張 招安 啫 。
因此 佢 幾次 寄信 畀 梁中書 ，叫 佢 留返 盧俊義 同 石秀 兩個人 條命 ，好 留 條 後路 啊 。
宋江 聽見 吳用 噉 講 ，就 催住 要 發兵 落山 去 打 大名 。
吳用話 ：而家 冬盡春初 ，就嚟 係 元宵佳節 ，大名城 每年 照例 都 要 大放花燈 嘅 。
我 想 趁 呢個 機會 ，預先 派人 入去 城 裏 便 埋伏 。
外便 呢 就 大軍 攻城 ，裏 應 外 合 就 可以 破佢 喇 。
宋江話 ：呢條 計策 好啊 ，就 請 軍師 你 命令 啦 。
吳用話 ：首先 最緊要嘅 ，係 喺 城裏 便 放火 為 號 。
眾位 兄弟 ，邊 一 位 敢 同 我 先 入去 城裏 便 放火 啊 ？
只見 有 個人 行 出嚟 話 喇 ：小弟 願 去 。
大家 一 睇 ，原來 係 鼓上 蚤 時 遷 。
時遷話喇 ：小弟 細個 嗰陣 啊 ，去過 大名 。
城裏 便 有 座 樓 ，叫做 翠雲樓 噃 。
樓上 樓下 ，大大 細細 有 百幾 間 房 嘅 。
呢眼 見得 元宵 夜晚 啊 必定 熱鬧 㗎 喇 ，噉 我 乘機 潛伏 入 城 。
正月 十五 夜晚 ，我 擒 上去 翠雲樓 上 ，放起 火 嚟 做 信號 。
軍師 你 就 調動 人馬 嚟 劫獄 ，噉 呢條 就係 上策 喇 。
吳用話 ：冇錯 ，我 個心 正係 噉諗嘅 。
嗱 ，你 聽日 天光 就 落山 先 ，喺 元宵 嗰 晚 到 一更 時候 ，喺 翠雲樓 上 放起 火 嚟 呢個 就係 你 嘅 功勞 。
時遷 得咗 命令 就 走咗 咯 。
於是 吳用 就 調兵 譴將 ，準備 智取 大名府 。
