因為 梁山泊 啊 ，派 咗 柴 進 嚟 大名府 ，上上下下 都 使 咗 錢 ，買通 晒 啲 貪官 ，所以 呢 ，只係 判 咗 盧俊義 充軍 啫 。
李固 知道咗 哎呀 乜冇 殺到 盧俊義 啊 不得了 ，即刻 叫人 去 請咗 嗰 兩個 解差 嚟 ，去到 酒店 斟盤 。
飲完 三杯 酒 ，李固 就 開口 話 喇 ：
實不相瞞啦 ，盧員外 係 我 嘅 仇人 。
而家 充軍 去 沙門島 ，路途 遙遠 。
佢 就 一文錢 都 冇 得 孝敬 過 畀 你 兩位 嘅 ，噉 啊 連累 你哋 兩個 白白 使 一筆 使用 㗎啫 。
至快至快 ，要 三四個月 先至 返得嚟 。
嗱， 噉 喇 ， 我 冇 咩 嘢 相送 喇 ， 兩錠 大銀 ， 畀 住 你 哋 揸 喺 手 嚟 先 。
多就 兩站 路 少就 幾里 路 ，搵 笪靜僻 嘅 地方 ，攞咗 佢 條命 ；
割佢 面上 嘅 金印 返嚟 做 證據 畀 我 睇咗 ，然後 我 每人 再 送 五十 兩 蒜條 金 。
上頭嗰度 ，我 會 去 打點 㗎喇 ，好唔好啊 ？
董超 、 薛霸 你 望 下 我 我 望 下 你 ， 吟沉 咗 好 耐 。
之 睇住 嗰 兩 錠 大銀 啊 有 乜 話 唔 貪心 㗎 。
董超話 ：哎呀 ，至怕 做唔嚟 㗎噃 。
薛霸 就 話 喇 ：阿哥 ，呢位 李官人 咁 豪爽 ，我哋 幫 佢 辦妥 呢件事 同 佢 交 個 朋友 。
日後 有 咩嘢 為難 嘅 事 ，搵 佢 照應 下 都 好 喎 。
李固 就 話 喇 ：我 唔係 忘恩負義 嘅 人 嚟 ，以後 一定 會 報答 你哋 兩個 嘅 吓 。
於是 董超 、薛霸 就 收起咗 銀錠 ，同 李固 分別咗 ，返 屋企 執拾 行李 ，即刻 就 起程 。
盧俊義 就 𠼮佢 話 喇 ：
小人 今日 受咗 刑 ，棍傷 好 痛 ，唔該 你哋 聽日 先至 起行 啦 。
薛霸 就 鬧 佢 喇 ：合埋 你 把 衰口 啦 ！
老爺呀 ，夠晒 晦氣 喇 ，撞正 你 個 窮神 。
沙門島 一來一去 ，六千幾里 ，嚱 ，要 幾多 使用 至夠 啊 ？
你 一文錢 都 冇 嘅 ，你 要 我哋 點 做 吖 ，吓 ！
盧俊義 又 𠼮佢 喇 ：唉 請 兩位 ，念在 小人 負屈 含冤 ，關照 下 啦 。
董超 又 鬧 佢 ：
你哋啲 財主佬 呀 ，平常 就 一毛不拔 ，嘿嘿 今日 天 開眼 喇 ，報應 得快 啊 。
你唔好怨天怨地喇 ，我哋 幫下你 行下 啦 ，行啦 。
盧俊義 忍氣吞聲 ，只有 起步 行 係 啦 。
出咗 東門 ，董超 、薛霸 就 將 嗰啲 包袱 、雨遮 ，掛晒 喺 盧員外 擔 嗰 副 枷 上 便 。
盧員外 一生 做 財主 㗎嘛 ，今勻 就 做咗 監犯 ，哑 都 冇得 哑咯 。
兩個 差人 ，一路 之上 一個 做好 一個 做醜 ，押住 盧俊義 行 。
行到 挨晚 ， 約莫 行 咗 十四五里 啦 ， 前面 嚟 到 一個 村鎮 就 搵 咗 間 客店 過夜 。
客店 嘅 小二哥 呢 ，帶 佢哋 去到 後便 間 房 ，放低 包袱 ，薛霸 就 話 喇 ：
老爺 衰晒 都係 個 公差 吓 ，唔通 要 我哋 嚟 服侍 你 個 犯人 呀 ？
你 想 食飯 就 快啲 去 燒火 。
盧俊義啊唯有擔住枷 ，嚟到廚房 ，問 小二哥 攞咗啲柴草 ，去灶頭燒火咯喎 。
小二哥 幫 佢 淘米 煮飯 ，洗 乾淨 啲 碗碟 。
盧俊義 係 個 財主 出身 吖 嘛 ， 呢 啲 事 係 未曾 做 過 嘅 。
柴草又濕 ，燒唔着 冚𠾴唥熄晒 ，盧俊義 出盡力 噗噉一吹 ，哎呀 畀啲灰 呀入咗雙眼 。
董超 又 咿咿吟吟 噉 鬧 。
煮得 飯 熟喇 ，董超 、薛霸 裝晒 去 食 ，盧俊義 唔敢 攞嚟 食啊 。
等 佢哋 兩個 食完 晒 喇 ，剩落 返 啲 殘湯 冷飯 然後 先至 畀 盧俊義 食 。
薛霸 又 唔 停口 噉 鬧咗 一輪 。
食完晚飯 ，叫 盧俊義 去 煲 熱水 洗腳 。
煲到 水 滾 喇 ，盧俊義 噉 先至 敢 返去 房間 裏 便 坐低 唞下 。
嗰 兩個 差人 洗完 腳 ，扚咗 一盆 滾到 含含聲 嘅 滾水 ，氹 盧俊義 洗腳噃 。
盧俊義啊 除咗 草鞋 ，畀 薛霸 一揦揦 住 兩隻腳 ，出力 撳 喺 個 滾水 裏 便 ，哎呀 淥死 嚟 喇 。
薛霸 又 話 喇 ： 哼 ！ 老爺 服侍 你 ， 你 仲 畀 面色 我 睇 係 嘛 ？
糟質完 盧俊義 喇 ，兩個 差人 就 上 炕床 瞓覺 。
將 條 鐵鏈 啊 ，將 盧俊義 鎖 喺 房門 背後 。
盧俊義啊 一直 呻 到 四更 ，唉 陰功 嘞 。
兩個 差人 起身 ，叫 小二哥 煮飯 ，自己 食飽咗 ，收拾 行李包袱 就 要 起程 。
盧俊義 睇下 隻 腳 哎呀 起晒 大泡 ，掂下 地 都 痛啊 。
當日 係 秋風 秋雨 ，條 路 又 濕 又 滑 。
盧俊義啊 行 一步 趷 一下 。
薛霸 揸住 條 水火棍 攔腰 就 打 。
董超仲 詐假意 去 勸 喎 ，一路 之上 就 怨 神 怨 鬼 。
離咗 客店 啊 約莫 行咗 十零 里路 啦 ，就 嚟到 一座 大樹林 。
盧俊義 話 ：哎呀 ，小人 ，實在 係 捱唔逳 喇 ，可憐 下 喺 呢處 唞 一陣 啦 。
兩位 差人 將 佢 帶咗 入去 樹林 裏 便 。
呢個 時候 ，個 天 仲 係 蒙蒙光 ，未 有人 行 。
薛霸話喇 ：今朝早 我哋 兩個 起身 起得 咁早 ，好眼瞓啊 。
我哋 想 喺 樹林 裏 便 瞓 一陣 ，就 怕 你 趯 更 啫 。
盧俊義 話 喇 ：唉 ，小人 插翼 都 難 飛 啦 。
薛霸話 ：哼 ，千祈 咪 領 你 嘢 ，等 老爺 綁住 你 先 。
薛霸 就 喺 條 腰間 ，解咗 條 麻繩 出嚟 ，兜住 盧俊義 個 肚 ，喺 樖松樹 上 便 一勒 就 捩轉 佢 隻 腳 ，將 佢 綁 喺 樹 上 。
薛霸 對 董超 話 喇 ：大哥 ，你 出去 樹林 外 便 企 喺 處 吓 ，睇下 水 ，有 人 嚟 喇 就 咳 一 聲 。
董超話 ：兄弟 爽手啲 啊 。
放心啦 ，你 去 睇 水 啦 。
講完 ，薛霸 就 攞起 條 水火棍 對住 盧員外 話 喇 ：
你唔好怪我哋兩個 ，啊 ，你屋企嘅主管 李固 啊 ，叫 我哋 喺 路上 做 瓜 你 。
其實呢 ，就算 去到 沙門島 亦係 死路一條 嘅啫 ，就不如 趁早 仲好過 喇 。
嗱 ，落咗 陰司地府 ，就 唔好 怨 我哋 喇 。
明年 今日 ，就係 你 週年 。
盧俊義 聽咗 呀唉 淚如雨下 ，唯有 耷低頭 準備 死 係啦 。
薛霸 兩隻手 ，高高舉起 條水火棍 ，對 實盧 員外 個 頭殼 頂 就 劈落去 嘞噃 。
董超 喺 外便 聽見 裏頭 啪噉 一聲 響 ，就 連忙 行返 入嚟 樹林 睇下 ，嘿 ，奇怪 喇 ？
盧員外 啊 依舊 好好地 綁 喺 樹 上 。
薛霸 呢 ，仰面朝天 就 瞓 喺 樹 下 嚟 ，條 水火棍 就 掉埋 一便 。
董超 話 喇 ：嘿 ，奇怪 喇 又 ，唔通 你 出力 過頭 跌咗 一 跤 啊 ？
佢 擔 高頭 四周圍 望下 ，冇 咩嘢 動靜 啊 ，咦 ，乜噉嘅 ？
只見 薛霸 個 口 裏 便 出血 啊 ，喺 心口 嗰 處 露出 三四寸 長 一枝 小小 箭桿 。
佢 正 話 想 嗌啫 ，只見 東北角 嗰 樖樹 上面 坐住 一個 人 ，聽 佢 嗌 一 聲 ：着 ！
砰！ 董超 條 頸 已經 中咗 一箭 ，噼啪 一聲 ，𢴈咗 喺 地下 嚟 ，當堂 冇 命 。
嗰 個人 啪 聲 喺 樹 上面 跳落 嚟 ，扲 出 一把 尖刀 ， 割斷 咗 條繩 ， 打碎 咗 嗰 個 盤頭 枷 ， 喺 樹 邊 抱住 盧員外 就 放聲大哭 。
盧俊義 擘開 雙眼 睇下 ，原來 係 浪子 燕青 ，佢 就 話 喇 ：小乙 ，係唔係 我 嘅 魂魄 同 你 相見 啊 ？
燕青話喇 ：主人啊 ，我 喺 留守司 ，一直 跟實 呢 兩個 傢伙 。
又見到 李固 請咗 佢 去 傾密偈 ，我 就 估到 呢 兩個 傢伙 要害 主人 你 㗎 喇 ，我 一直 跟 你 出 城 。
主人 你 尋晚 喺 客店 ，我 就 伏 喺 外頭 嚟 ，你哋 五更 起身 ，我 就 行 先 喺 呢處 等住 。
我諗 ，呢 兩個 傢伙 必定 喺 呢個 樹林 裏 便 逳手 嘅 。
先頭 畀 我 兩 箭 就 射死 佢哋 兩個 咯 ，主人 你 睇下 。
盧俊義 話 喇 ：
雖然 ，你 救咗 我 條命 ，之 射死 呢 兩個 差人 噃 ，呢條 罪 就 越發 重 啊 ，噉 我哋 趯去 邊度 好 呢 ？
唉 ，一日 都係 宋公明 搞到 主人 你 今日 咁 淒涼 啫 ，今日 唔 上 梁山泊 就 冇 埞 去 㗎 喇 。
不過 ，我 嘅 棍傷 又 發作 ，對 腳 又 淥親 ，唔行得 啊 。
燕青 話 喇 ：事 不宜 遲 ，我 孭 你 去 啦 主人 。
講完 ，燕青 就 喺 差人 嘅 身邊 ，抄到 啲 銀兩 ，帶住 弓箭 ，插住 腰刀 ，攞起 水火棍 就 孭住 盧俊義 ，一直 向住 東 便 行 。
行咗 十零里 ，已經 孭唔逳喇 ，咁啱 見到 有 間 小小 嘅 客店 ，就 行入裏 便 搵 間 房 住落 ，買 啲 酒肉 頂下 肚餓 先 。
噉佢哋兩個啊 ，就 暫時 喺 呢度 住落 喇 。
當日 天光 之後 ，嗰啲 過往 行人 見到 樹林 裏 便 射死咗 兩個 差人 ，就 去 話 畀 里正 知 ，里正 就 去 大名府 報告 啦 。
跟住 就 派咗 官員 落嚟 檢驗 ，哦 ，原來 係 留守司 嘅 差人 董超 、薛霸 。
就 返去 回覆 梁中書 ， 就 命令 大名府 嘅 緝捕 觀察 啊 ， 限 咗 日期 ， 要 捉拿兇手 。
噉嗰啲捉賊嘅差人 ，都 嚟 睇過 ，認得 嗰支箭 啊 係 浪子 燕青 嘅 。
即刻 就 嚟 喇 ，百幾 二百 個 差人 ，分頭 出發 ，到處 貼咗 告示 ，講明 嗰 兩個 人 嘅 模樣 ；
通知晒 遠近 村坊 店鋪 、市鎮 人家 ，逐家逐戶 去 搜捕 。
噉盧俊義呢個時候啊 ，正喺 客店 嗰處 養傷 ，一時又行唔逳 ，就只有 喺嗰處 住住先啫 。
店小二 聽見 話 有 殺人 嘅 命案 ，村坊 嗰啲 人 又 講到 含含聲 ，仲 畫咗 兩個 人 嘅 模樣 出嚟 。
小二哥 見咗 ，就 連忙 去 報畀 本地 嘅 社長 聽 。
話 我 店裏 便 有 兩個 人 ，來路 不明 㗎 ，唔知 係唔係 呢噉 。
社長 啊 即刻 走去 轉報 畀 啲 差人 知 咯噃 。
燕青 因為 冇 餸 啊 ，就 攞住 弓箭 去 附近 想 搵 幾隻 雀仔 食下 ；
打完雀 返嚟 ，聽見 成條村 都 嘈晒 。
燕青 啊 匿 埋 喺 樹林 裏 便裝 下 ， 見到 百幾 二百個 差 人 ， 用 刀槍 圍實 ， 將 盧俊義 啊 綁 喺 架 車上 便 推 咗 過去 。
燕青 本來 想 衝出去 救 嘅 ，之 手上 又 冇 兵器 啊 ，就 唯有 一味 叫苦 啦 。
佢 諗嘞 ：要 快啲 去 梁山泊 報畀 宋公明 知 ，叫 佢 嚟 救 至得 喇 ，如果 唔係 就 誤咗 主人 條命 㗎 喇 。
話 去 就 去 ，馬上 起程 。
佢 行到 半夜 ，個 肚 餓 到 咕咕聲 ，身邊 就 一 文錢 都 冇 。
佢 行到 嗰個 崗仔 上 便 ，見到 叢叢雜雜 有 啲 樹木 ，佢 就 喺 個 樹林 裏 便 一路 瞓 到 天光 。
佢 個 心 好 愁悶 啊 ， 嘿 ， 聽見 樹枝 上 便 ， 有 隻 喜鵲 吱吱 啁 啁 噉 喺 度 叫 ， 佢 諗 喇 ：
如果 射到 落嚟 ，問 人 攞 啲 水 煮熟 咗 都 頂得下 肚 噃 。
佢 行出 樹林 ，擔 高頭 望望 ，嗰 只 喜鵲 啊 對住 佢 叫 。
燕青 輕輕 攞出 弓箭 ，暗暗 就 向 天 占卦 ，佢 喺度 祈禱 啊 ，佢話 ：
蒼天 在上 ，燕青 ，只係 得 呢支 箭 喇 。
如果 係 能夠 救到 主人 條命 嘅 ，箭 一到 就 射中 喜鵲 ；
如果 主人 條命 整定 冇得摱 ，箭到 就 雀 飛 。
佢 搭上 箭 ，嗌咗 一 聲 ：箭啊箭啊 ，唔好 誤 我 ！
𠻘噉 一箭 ，正中 喜鵲 嗰 條 尾 ，帶住 嗰 支 箭 一直 飛咗 落 山崗 。
燕青 大踏步 趕落去 山崗 ，嘿 ，唔見咗 喜鵲 咯 。
正喺度搵緊 ，只見 有 兩個 人 喺 前面 行過嚟 。
行前頭嗰個 ，戴 頂 豬嘴 頭巾 ，着住 件 香皂 羅衫 ，攬住 條 銷金 腰帶 ，揸住 一條 齊眉 棍 。
後便嗰個呢 ，戴 頂 白色 嘅 范陽 笠 ，着 一件 茶褐色 嘅 攢線 袖衫 ；
孭住 個 包袱 ，揸住 條 短棒 ，掛住 把 腰刀 。
呢 兩個 人 ，正正 同 燕青 擦住 膊頭 行過 。
燕青 擰轉身 ，睇住 呢 兩個 人 佢 諗嘞 ：
我 正係 冇 使用 ，不如 三拳兩腳 打倒 呢 兩個 嘢 ，搶咗 佢 嘅 包袱 ，趕去 梁山泊 唔係 好 ？
一於噉話 。
佢 孭 返 好 張 弓 ，行 返 轉頭 。
嗰 兩個 人 就 耷低頭 一味 行 。
燕青 追上去 對住 後 便 戴 氈笠 嗰個 人 ，一拳 打落 佢 背 枚 ，將 佢 啪聲 打低 ；
啱啱 想 開 拳 再 打 行 前面 嗰個 啫 ，點知 畀 嗰個 大漢 手起 棍 落 啊 ，掃 正 燕青 嘅 腳骨 ，將 佢 打低 喺 地 嚟 。
後便嗰個大漢爬返起身 ，踩住燕青 ，掹出腰刀 ，對住面門就要斬落去 。
燕青 大聲 叫話 ：好漢 啊 我 死咗 唔緊要 啊 ，就 冇人 去 報信 喇 ！
嗰個 大漢 把 刀 唔 斬 落去 ，收住 手 ，摵起 燕青 問 佢 話 ：
你 呢個 傢伙 報 咩 信 啊 ？
燕青話喇 ：你 問 我 做咩嘢 吖 ？
嗰個 行 前面 嘅 好漢 ，將 燕青 隻 手 一 掹 ，誒 ，捋起 咗 件 衫袖 打出 手腕 上 嘅 花繡 佢 就 連忙 問 喇 ：
咦 ， 你 係 唔 係 盧員外 屋企 嗰 個 咩 嘢 浪子 燕青 啊 ？
燕青 諗 喇 ：橫掂 都係 死 㗎 喇 ，索性 講出嚟 ，畀 佢 捉咗 去 同 主人 嘅 陰魂 喺 埋 一處 罷 啦 。
佢 就 話 喇 ：我 就係 盧 員外 屋企 嘅 浪子 燕青 。
而家 要 上 梁山泊 報信 ，請 宋公明 救 我 主人 ，點吖 ？
兩個 人 聽講 就 呵呵大笑 ： 哈哈哈哈 ， 好彩 冇 殺 咗 你 ， 原來 你 就 係 燕小乙 哥 啊 。
你 識唔識 我哋 兩個 啊 ？
着黑衫嗰個唔係邊個 ，佢就 梁山泊 頭領 病 關索 楊雄 ；
後面 嘅 呢 ，就係 拼命三郎 石秀 。
楊雄 話 喇 ：我哋 兩個 而家 奉 咗 大哥 將令 ，要 去 北京 打聽 盧 員外 嘅 消息 。
軍師 同埋 戴院長 ，跟住 尾 就 落山 㗎喇 ，就係 等 我哋 嘅 報告 啫 。
燕青 聽講 係 楊雄 、石秀 ，就 將 上便 嘅 事情 呢 ，都 對 佢哋 兩個 講咗 。
楊雄 就 同 石秀 話 喇 ：
既然 係噉樣 ，我 同 燕青 返 上去 山寨 報告 畀 大哥 知 ，想 個 辦法 。
你 就 自己 去 北京 ，探聽到 消息 呢 就 返嚟 報告 啦 。
石秀 話 好啦 。
噉就 將 包袱 呢 交畀 燕青 孭住 ，佢 自己 就 去咗 北京 。
燕青 就 跟住 楊雄 ，趕住 返去 梁山泊 。
見咗 宋江 之後 ，燕青 就 將 所有 個 事情 詳詳細細 講咗 一遍 。
宋江 聽到 大吃一驚 喇 ，即刻 召集 眾位 頭領 嚟 商量 辦法 。
呢啲呢就唔講佢住喇 。
而家 只 係 講下 石秀 啊 ， 佢 帶 住 自己 嘅 隨身 衣服 ， 嚟 到 北京 城外 。
因為 當時 已經 好 夜 ，唔入得 城 ，就 喺 城外 住咗 一 晚 。
第 日 食完 朝頭早飯 ，行咗 入城 ，只見 人人 歎氣 啊 個個 傷心 。
石秀 覺得 好奇怪 喇 。
嚟到 市中心 ，只見 家家 都 關門 閉户 噃 。
石秀 就 問 下啲 人 啦 ，有 個 伯爺公 講 佢 聽 喇 ：客官 啊 ，你 唔知 㗎 喇 ，我 呢處 北京 啊 有 個 盧 員外 ，係 個 大 財主 嚟 。
呢因為 畀 梁山泊 啲 賊佬 啊 捉咗 去 ，啊 又 畀 佢 趯 返 返嚟 噃 ，噉 啊 好啦 ，點知 就 吃咗 一場 冤枉 官司 ，要 發配 去 沙門島 。
啊 又 唔知 點解 呢 ，喺 路上 啊 殺死咗 兩個 差人 。
尋晚 將 佢 捉咗 返嚟 ，今日 午時 三刻 啊 ，就 要 押 佢 嚟 呢度 市頭 啊 斬 佢 啊 。
客官啊 你 嚟 睇下 啦 。
石秀 聽咗 ，就 行到 去 市頭 望下 ，見 喺 個 十字路口 呢 有 間 酒樓 。
石秀 就 行 上 酒樓 ，臨街 搵 間 房仔 坐落 。
個 酒保 嚟 問喇 ： 客官 ， 你 請客 呢 ， 定 係 獨酌 啊 ？
石秀 瞪大 雙眼 話 ：大碗 酒 大嚿 肉 ，即管 攞嚟 仲 問 乜嘢 啊 ！
係 ，係 。
酒保 吃咗 一驚 ，打咗 兩角 酒 ，切咗 一大碟 牛肉 捧上嚟 。
石秀 大碗 大嚿 咁 食啊 ，食咗 一輪 。
坐咗 冇 幾耐 ，只 聽見 街上面 好 熱鬧 ，石秀 喺 窗口 裝下 ，見到 家家 閉户 啊 鋪鋪 關門 。
酒保 上樓 嚟 話 喇 ：客官 食完 啦 嘛 ？樓下 要 殺 犯人 喇 ，誒 請 客官 快啲 睇咗 數 去 第處 迴避 下 啦 。
石秀 就 話 喇 ：我 怕 咩 啊 ！你 快啲 返 落去 吓 ，唔係 老爺 就 打 你 。
酒保 唔敢 出聲 喇 ，嘩 乜 咁 惡 呢個 傢伙 真係 打起上嚟 咪 好 蝕底 ，就 落樓 喇 。
冇幾耐 ，只聽見 街上 鑼鼓 喧天 。
石秀 喺 窗口 望 下 ，見到 喺 十字路口 ，沊沊𡃈 噉 圍住 法場 。
十幾對 揸 住 刀 棒 嘅 劊子手 ， 前呼後擁 ， 將 盧俊義 啊 綁住 押 到 嚟 酒樓 前 便 跪 低 。
鐵臂膊 蔡福 ，就 捧住 法刀 ；
一枝花 蔡慶 就 扶住 面枷 ，佢 話 ：
盧員外 ，你 要 知道 啊 ，唔係 我哋 兩 兄弟 唔肯 救 你 啊 ，啲 事情 𢰸晒 喇 。
喺 五聖堂 裏 便 ，我哋 已經 安排咗 你嘅 座位 㗎 喇 ，你 嘅 魂魄 就 去 嗰處 領受 啦 。
講完 ，喺 人堆 裏 便 啊 ，有 個 人 高聲 噉 嗌 ：午時 三刻 到 ！
一便 同 盧俊義 開咗 枷 ，蔡慶 就 捉住 佢 個 頭 ，蔡福 就 舉起 法刀 。
當 案孔 目 高聲 讀完 犯 由牌 ，啲 差人 就 齊齊 和咗 一 聲 。
石秀 喺 樓上 ，扲出 把 腰刀 喺 手 嚟 ，應聲 大叫 話 ：梁山泊 好漢 全部 喺 處 ！
蔡福 、蔡應 一 聽見 ，掉低咗 盧員外 拉起 條 繩 就 走咯 。
石秀 喺 樓上面 ，啪聲 跳落嚟 ，舉起 鋼刀 ，殺人 好似 斬瓜切菜 噉樣 ，趯遲啲 嘅 畀佢 殺低咗 十幾個 ；
石秀一手拖住盧俊義 ，向住南便就猛咁走 。
哈 ，原來 呢個 石秀 啊 ，佢 又 唔 認得 北京 嘅 路 㗎 ；
盧員外 呢 ，又 嚇到 傻晒 ，行唔逳 。
梁中書 聽到 報告 就 大驚 啦 ，即刻 命令 帳前 頭目 ，帶住 人馬 分頭 將 四道 城門 閂好 ；
派啲 差人 啊 ，四面 噉 圍過去 。
石秀 同 盧俊義 兩個 啊 ，喺 城內 走投無路 。
四面 嘅 人馬 已經 合圍 過嚟 喇 ，嗰班 差人 呀 ，用 啲 撓鉤 搭住 套索 𠽤住 。
真係 任你 硬 英雄 本事 亦係 寡 不敵 眾 。
兩個 當堂 就 畀 官兵 捉咗 ，解到 去 留守司 。
梁中書 就 叫話 喇 ：將 劫法場 嘅 賊人 ，押上嚟 ！
嗰啲 差人 將 石秀 就 押 到 嚟 公堂 ，石秀 碌 大 雙眼 ，高聲 大罵 ：
你呢個 敗壞 國家 ，殘害 百姓 嘅 狗官 ！
我 大哥 有 令 ，好快 就 會 帶兵 嚟 ，打 你 大名城 ，將 你 呢處 踏為 平地 ，將 你 斬 成 三橛 ！
佢 叫 老爺 嚟 講 畀 你哋 聽 先 。
石秀 喺 公堂 之上 ，狗官 害民 賊 噉 搏命 咁 鬧 ，搞到 公堂 上面 嗰啲 人 啊 都 嚇到 傻晒 。
梁中書 聽咗 就 吟沉咗 好耐 ，然後 就 叫 人 攞 面 大枷 嚟 ，將 佢 兩個人 都 枷咗 ，韞 喺 死囚牢 裏 便 。
佢 又 吩咐 蔡福 啊 嚴加 看管 ，唔准 疏忽 。
蔡福 個 心 呢 ，係 要 結識 梁山泊 好漢 嘅 ，所以 就 將 佢哋 兩個 韞埋 喺 一 間 監房 裏 便 ，每 日 都 攞 啲 好酒 好肉 嚟 畀 佢哋 兩個 食 。
因此就冇受到咩嘢苦 ，反而保養得好咗添 。
噉而家 講 下 梁中書 啊 ，佢 就 嗌 本州 新任 王太守 嚟 吩咐 佢 ，要 佢 統計 下 城 裏 便 ，被 殺傷 嘅 人數 。
統計 結果 呢 ，殺死 嘅 有 七八十個 ，跌傷 頭面 扻親 碰親 ，撞斷 手腳 嘅 就 不計其數 。
噉呢啲 受傷嘅 或者 被殺死嘅 呢 ，梁中書 吩咐 由 官家 出 錢 ，嚟到 醫治 佢哋 或者 火化 ，噉 就 了咗 呢件事 喇 。
第日 ，城 裏 城外 啊 ，到處 都有 報告 嚟 話 收到 咗 梁山泊 嘅 無頭 告示 幾十張 ，唔敢 隱瞞 ，而家 呈報 上嚟 噉 。
梁中 書 攞 嚟 睇 下 ， 哎呀 嚇 到 佢 魂飛天外 就魄 散 九霄 啊 。
呢張 無頭 告示 係 寫住 ：話 朝廷 啊 係 貪官污吏 當權 ，殘害 百姓 。
而家 呢 ，又 捉咗 盧俊義 同 石秀 。
如果 保存 佢哋 兩個 條 性命 ，獻出 姦夫 淫婦 ，噉 就 唔會 嚟 打 。
如果 膽敢 殺咗 盧俊義 同 石秀 啊 ，就要 興兵 嚟 攻破 大名城 ，到時 就 玉石俱焚 喇 。
當時 梁中書 睇咗 張 無頭 告示 ，就 嗌 王 太守 嚟 商量 。
佢 話 ：哎呀 ，呢件事 ，點樣 解決 好 呢 ？
王太守 呢個人 係 幾 會 諗 㗎 ，佢 就 話 喇 ：
梁山泊 呢一班人馬 ，朝廷 尚且 幾次 都 收捕 佢哋 唔到 ，噉 何況 我哋 呢處 一郡 之力 呢 ？
如果 呢班 亡命之徒 啊 ，佢 興兵 嚟到 ，而 朝廷 嘅 救兵 又 嚟唔切 ，嗰陣 我哋 就 悔之晚矣 嘞 喎 。
如果 按照 小官 嘅 愚意 呢 ，誒 不如 留返 呢 兩個 人 條命 先 ，一面 啊 ，即刻 寫 封 表章 申奏 朝廷 ；
其次啊即刻寫信報告蔡太師恩相知道 ；
同時 ，就 命令 本處 嘅 軍馬 ，出城 扎寨 ，加強 戒備 。
噉樣就可以保障 大名 冇事 ，軍民 不傷 喇 。
如果 將 呢兩個 殺死咗 啊 ，唉 ，最怕 佢 賊兵 臨 城 ，一則 就 冇 兵 嚟到 解救 ，二則 係 朝廷 見怪 ，三則 呢 就 百姓 驚慌 ，城中 騷動 。
噉就 極之 唔妥 喇 恩相 。
梁中書 聽 咗 就 話 ： 啊 ， 你 講得 好 啱 啊 。
於是即刻就嗌押牢節級蔡福嚟 ，就吩咐佢話 ：
呢 兩個 賊徒 非同小可 啊 。
你 如果 管得 佢 嚴過頭 又 怕 佢 冇命 ；
如果 放鬆啲 呢 ，又 怕 畀 佢 走咗 ，我 睇 不如 噉 啦 ：
你 兩 兄弟 早早晚晚 ，應緊就緊 ，該松就松 ，吓 ，你哋 睇住 嚟 做 啦 ，總之 打穩 十二分 精神 就係 喇 。
蔡福 聽咗 就 偷笑 喇 個 心 ：哎呀 噉樣 做法 啊 合晒 河車 喇 。
佢 得咗 命令 ，就 返去 監牢 安慰 佢哋 兩個 ，呢啲 不在 話下 。
而家 只係 講下 梁中書 ，佢 又 叫咗 兵馬都監 大刀 聞達 、天王 李成 兩個 就 嚟到 公堂 商量 。
梁中書 就 將 梁山泊 嘅 無頭 告示 ，同 王太守 先頭 所 講 嘅 辦法 ，同 佢哋 兩個 講咗 。
李成就 話 喇 ：諒 呢班 草寇 ，點 敢 擅離 巢穴 吖 ？相公 你 何必 擔心 呢 ？
小將 得咗 朝廷 咁多 俸祿 ，並冇 功勞 嚟 報答 ，今日 ，我 願 效 犬馬之勞 ，率領 軍卒 ，出到去 城外 扎寨 。
呢班 草寇 如果 唔嚟 ，噉 就 冇得 講 啦 。
如果 嗰 班 草寇 整 定 佢 哋 當 衰 ， 膽敢 擅離 巢穴 帶兵 前 嚟 嘅 話 ， 唔 係 小將 誇口 ， 一定 殺到 呢 班 賊人 片甲不留 啊 ！
梁中書 聽咗 非常 歡喜 ，跟住 叫人 攞咗 錦繡 綢緞 賞賜 畀 兩位 將軍 。
第日 ，李成就 召集 大小 軍官 ，嚟到 商量 。
只見 有 一個 將軍 威風凜凜 ，相貌堂堂 行出嚟 ，呢個 就係 急先鋒 索超 嘞 。
李成 命令 佢 話 ：宋江 草寇 好快 就 嚟到 攻打 我哋 大名 ，你 點 齊 本部 軍兵 ，離城 三十五 里 扎寨 。
我 隨後 就 帶領 軍隊 嚟 喇 。
索超得咗命令 ，第日 就 點起 本部 軍兵 ，出咗城 三十五里 ，嗰度 呢 叫做 飛虎峪 ，靠住 山腳 扎落 營寨 。
李成 呢 ，亦都 帶領 住 正偏將 ，離 城 二十五 里 ，去到 槐樹坡 ，扎落 營寨 。
周圍 都 刀槍 密佈 啊 ，深藏 鹿角 ，三面 都 掘咗 陷坑 。
三軍 將士 個個 都 摩拳擦掌 ，就係 等 梁山泊 嘅 軍馬 嚟到 ，要 立功勞 嘞噃 。
