宋江 喺 清風山 ，結識 咗 燕順 、王英 、鄭天壽 三位 頭領 。
當晚 係 飲酒 ，飲到 五更 先至 散席 。
宋江 一直 瞓到 第日 辰牌 ，即係 九點零鐘 先 起身 。
起身 之後 ， 同 三位 頭領 又講 咗 路上 好多 見聞 ， 又 講下 武松 點樣 點樣 英雄 使得 啊 噉 。
三個 頭領 聽咗 就 猛咁 𨂽腳 悔恨 話 ：哎 ，我哋 冇 緣份 啊 ！
如果 得到 佢 嚟 呢處 你 話 幾好 呢 ，哎 ，點知 佢 又 投奔 咗 去 嗰度 啦 。
啰嗦嘅 唔講 。
宋江 自從 嚟到 清風山 ，住咗 六七日 ，每日 都係 好酒 好菜 噉 款待 不在話下 喇 。
當時 ，係 十二月初 ，山東人 嘅 慣例 啊 ，係 呢個 時候 拜山 㗎 喎 。
只見 小嘍啰 喺 山下 便 報上嚟 話 ：
稟告 大王 ，大路 上 有 一 頂 轎 ，有 七八 個 人 跟住 嘅 ，擔住 兩 個 拜盒 去 拜山 啊 。
王矮虎 呢 係 個 好色之徒 嚟 嘅 ，佢 聽見 咗 報告 ，佢 諗 喇 ：
嗯 ，呢 頂 轎 裏 便 呀 ，必定 係 個 女人 嚟 嘅 。
即刻 就 點起 幾十個 嘍啰 要 落山 咯噃 。
宋江 、燕順 啊 點 攔 都 攔佢 唔住 。
佢 揸住 槍刀 ，滂滂聲 打住 銅鑼 就 落山 喇 。
噉 宋江 、燕順 、鄭天見 三個人 就 喺 山寨 飲酒 等 啦 。
嗰個 王矮虎 去咗 約莫 有 兩三個 時辰 ，探 消息 嘅 小嘍啰 就 返嚟 報告 喇 ，佢 話 ：
王頭領 一直 追上去 ，七八個 軍佬 都 走晒喇 ，就 捉到 轎 裏 便 抬住 嗰個 婦女 。
誒 ，只係 得 一個 銀香盒 ，其他 嘅 物件 啊 財物 就 冇 喇 。
燕順 問 佢 ：嗰個 女人 而家 抬 咗 去 邊處 啊 ？
小嘍啰 就 話 喇 ：王頭領 已經 抬咗 返去 自己 間 房 裏 便 喇 。
燕順 聽咗 哈哈聲 大笑 起上嚟 。
宋江 就 話 啦 ：原來 王英 兄弟 咁 貪 女色 㗎 ，呢啲 唔係 好漢 嘅 所為 喎 。
燕順 就 話 啦 ：我 呢個 兄弟 ，樣樣 都 肯 向上 ，就係 呢一點 毛病 唔好 。
宋江 就 話 ：兩位 同我 一齊 去 勸 下 佢 呢 。
燕順 、鄭天壽 就 帶住 宋江 ，一直 嚟到 後山 王矮虎 間房 ，推開咗 道 房門 ，嘿 ，只見 王矮虎呀 正 喺度 啰嗦緊 嗰個 女人 。
佢 見到 三位 入嚟 唄 ，即刻 就 推開 嗰個 女人 請 三位 坐 。
宋江 睇 下 嗰 個 女人 ， 見 佢 着 住 一身 素白 嘅 孝服 ， 又 生得 幾靚 下 嘅 。
宋江 就 問 佢 喇 ：
娘子 ，你 係 邊家 嘅 眷屬 啊 ？
呢個 時候 出嚟 行 有 咩 緊要 嘅 事 呢 ？
嗰個 女人 含羞噉 行上前 ，深深噉 行咗 三個 禮 佢 就 回答 話 ：
我係 清風寨 知寨 嘅 老婆 。
為因 母親 去世 ，今日 係 一周年 ，特意 嚟 墳前 拜祭 啫 。
冇事 邊度 敢 出嚟 行吖 ？
請 大王 開恩 ，救 我 條命 啊 。
宋江 聽咗 吃咗 一驚 啊 ，佢 諗 ：
我 正係 要嚟 投奔 花知寨 ，莫非 佢 就係 花榮 嘅 老婆 ？我 唔 救 佢 點得 啊 。
於是 宋江 就 問 喇 ：
你 丈夫 花 知寨 點解 唔 同 你 出嚟 拜山 啊 ？
稟告 大王 ，我 唔係 花知寨 嘅 老婆 啊 。
你啱啱唔係講 ，你 係 清風寨 知寨 嘅 夫人 咩 ？
大王 你 唔知 喇 ，呢個 清風寨 而家 有 兩個 知寨 ，一文一武 。
武官 係 知寨 花榮 ；文官 呢 ，就係 我 嘅 丈夫 ，知寨 劉高 喇 。
宋江 就 諗 喇 ：
佢 丈夫 既然 係 同 花榮 同僚 嘅 ，我 如果 唔 救 佢 ，噉 聽日 去到 嗰處 就 唔 好 睇 喎 。
宋江 又 對 王矮虎 話 ：
小人 有 句 說話 ，唔知 你 肯唔肯 聽 ？
阿哥 有 說話 即管 講 ，唔拘 嘅 。
誒 ，但凡 好漢 ，犯咗 貪 女色 三個字 嘅 ，就會 畀 人哋 恥笑 㗎 喇 。
我 睇 呢個 娘子 係 個 朝廷 命官 嘅 夫人 。
請你 睇 在 小人 嘅 薄面 ，同埋 江湖 上 大義 兩個字 ，放 佢 落山 返去 ，等 佢哋 夫妻 團聚 好唔好 啊 ？
阿哥 ，你 ，誒 你聽我講 ，王英 我 一直 都 冇 個 壓寨夫人 做伴 嘅 ，而家 呢個 世界 呀 ，都 係 畀 嗰啲 官 搞到 衰晒 ，阿哥 你 理 佢 咁多 做乜 呢 ？
求其 畀 小弟 ，吓 ，誒噉 算啦 。
宋江 就 跪低 話 喇 ：
賢弟 如果 要 壓寨 夫人 嘅 時候 ，等 日後 宋江 揀 個 認真 好 嘅 ，我 嚟 出 錢 娶 佢 返嚟 服侍 賢弟 噉 好唔好 啊 ？
因為 呢個 娘子 係 小人 朋友 嘅 同僚 正官 嘅 老婆 ，賢弟 你 ，點都 做 個 人情 ，吓 ，放咗 佢 啦 。
燕順 、 鄭天壽 一齊 扶住 宋江 話 ： 阿哥 你 請起 身 ， 請起 身 ， 呢 層 容易 啫 。
宋江 就 多謝 佢哋 話 喇 ：係噉 就 多得晒 你哋 喇 。
燕順 見 宋江 堅決 要 救 呢個 女人 ，因此 就 唔理 王 矮虎 肯唔肯 啊 ，就 喝 嗰 兩個 轎夫 抬 佢 返 扯 。
嗰 個 女人 聽見 話 抬 佢 返 扯 唄 ， 即 係 跪 喺 地下 猛 咁 叩頭 ， 多謝 宋江 啊 ， 一口一聲 嗌 話 多謝 大王 啊 ， 多謝 大王 啊 噉 。
宋江 就 話 喇 ： 夫人 你 唔 好 多謝 我 ， 我 唔 係 山寨 裏 便 嘅 大王 啊 ， 我 係 鄆城縣 做生意 嘅 商人 啫 。
嗰個 女人 拜謝咗 落山 ，嗰 兩個 轎夫 得返 條命 ，抬住 嗰個 女人 落山 呀 行到 飛 咁 快 啊 ，嘿 ，只係 恨 爹娘 ，少生 兩 隻 腳 咯 。
呢個 王矮虎 ，又 醜 又 悶 ，唂實 泡氣 唔出聲 。
就 宋江 拉佢 出去 前廳 勸佢 話 ：兄弟 ，你 唔使 嬲 嘅 。
宋江 日後 點 都 要 同 兄弟 你 娶 返 一個 ，包 你 歡喜 就係 喇 。
小弟 唔會 失信 嘅 。
燕順 同 鄭天壽 都 笑起上嚟 。
王矮虎 一時 畀 宋江 用 禮義 嚟 笠住 佢 ，雖然 話 唔 滿意 啫 ，但係 敢怒而不敢言 ，只好 騎騎騎噉 陪笑 。
就 同埋 宋江 佢哋 喺 山寨 飲酒 ，呢啲 呢 不在 話下 喇 。
而家 講返 清風寨 嗰 幾個 軍佬 啊 ，佢 見到 夫人 畀 啲 賊 擄咗去 唄 ，就 返嚟 就 報 畀 劉 知寨 聽 啦 ，話 夫人 畀 清風山 啲 賊佬 擄咗去 啊 噉 。
劉高 聽咗 嬲 到 不得了 ，鬧 去 嗰啲 軍佬 冇 中用 ，點解 掉低 夫人 唔理 啊噉 ，大棍 大棍噉 打 去 嗰班 軍佬 咯噃 。
嗰啲人 就 分辯 話 啦 ：
誒 我哋 得 六七 個 人 ，佢 嗰處 幾十 人 㗎 嘛 ，點 打得過 佢哋 吖 ？
亂噏 ！你哋 如果 唔去 搶返 夫人 返嚟 ，我 就 拉晒 你哋 坐監 問罪 。
嗰幾個 軍佬 畀 佢 逼得 緊 喇 ，冇 辦法 啦 ，只有 去 𠼮求 本寨 裏 便 嗰啲 軍卒 ，總共 七八十 人 ，帶齊 槍棒 準備 去 搶喇 。
點知 去到 半路 ，就 撞見 嗰 兩個 轎夫 抬住 夫人 就 飛 咁 快 返緊 嚟 喎 。
嗰班 軍佬 接到 夫人 就 問 喇 ：點解 能夠 落得 山 㗎 噉 ？
嗰 女人 話 ：
嗰個 傢伙 捉到 我 去 山寨 ，見 我 講話 係 劉知寨 嘅 夫人 ，嚇到 嗰班 嘢 慌晒 ，拜 我 都 拜唔切 喇 ，咪 叫 轎夫 送 我 落 山 咯 。
嗰班 軍佬 又 話 ：
哎呀 夫人 啊 你 可憐 下 我哋 ，你 返到去 呢 ，就 對 相公 話 ，係 我哋 去 搶 返 夫人 返嚟 嘅 ，噉 救下 我哋 大家 免得 呢餐 打吖 。
得喇 ，我 會 講 㗎喇 。
嗰班 軍佬 拜謝 一番 ，就 擁住 頂 轎 就 行 咯 喎 。
嗰班人 見到 轎夫 乜 行得 咁快 嘅 就 話 咯 ：喂 ，乜 你 兩個 平時 喺 鎮 上面 抬 轎 ，好似 鵝 行 鴨 步 ，而家 點解 行得 咁快 嘅 ？
嗰 兩個 轎夫 就 話 喇 ： 哎呀 ， 本來 都行 唔 逳 㗎 喇 ， 不過 而 家 喺 後 便 呀 猛 咁 畀 人 㩧 頭殼 呢 。
啲人 就 笑起上嚟 話 ：嘿 你 撞鬼 咩 你 ，後便 邊度 有人 啊 ？
個轎夫 噉 先至 敢 擰轉頭 睇下 ，嘿呀 我 估 話 乜嘢 㩧 我 頭殼 喎 。
原來 係 我 自己 行到 慌晒 ，腳踭 踢到 後枕 咯 。
啲 人 聽咗 笑到 肚 都 赤 。
擁住 頂轎 ，返到 去 寨 嘞 。
劉知寨 見咗 好 歡喜 啦 ，就 問 夫人 話 ：係 邊個 救 你 返嚟 㗎 ？
嗰班賊 ，擄咗 我 去 ，見 我 唔順從 佢哋 正話 想 殺 我 噃 。
收尾 見 我 話 係 知寨 嘅 夫人 就 唔 敢 逳手 ，即刻 同 我 叩頭 ，收尾 呢 ，得 咁 多人 嚟 搶 咪 搶返 我 返嚟 咯 。
劉高 聽咗 ，就 叫 攞 十瓶 酒 ，一隻 豬 賞畀 大家 。
呢啲 呢 就 唔 講 佢 喇 。
而家 講 下 宋江 ，佢 救咗 嗰個 女人 落山 ，佢 又 喺 山寨 住咗 六七 日 ，諗住 要 去 投奔 花知寨 ，就 要 辭別 大家 落山 。
三個 頭領 點 留 都 留唔住 喇 ，就 安排咗 筵席 餞行 ，各人 都 送咗 啲 金銀珠寶 畀 宋江 ，包好 喺 個 包袱 裏 便 嚟 。
嗰日 ，宋江 一早 起身 ，食完咗 早飯 ，收拾好 行李 ，辭別咗 三位 頭領 就 落山 。
嗰 三個 好漢 ，叫 人 帶咗 酒菜 ，一直 送 到 落山 二十 幾 里 嘅 大路 旁邊 ，再嚟 飲酒 分別 。
三個人 好唔捨得啊 ，千叮囑萬叮囑 話 ：
阿哥 你 去到 清風寨 返嚟 ，事必 要 再 到 山寨 相會 至好 啊 。
宋江 孭起 包袱 ，提咗 朴刀 ，同 大家 講 一 聲 再見 ，行咗 個 禮 ，就 同 大家 分手 起程 。
呢個 清風山 ，就 離開 青州 冇 幾 遠 ，相隔 只係 百零里路 啦 。
而 呢個 清風寨 呢 ，就 喺 青州 三岔路口 嚟 ，個 地名 啊 叫做 清風鎮 。
因為 呢個 三岔路 上 啊 ，又 通去 三處 險惡 嘅 山嶺 ，因此 啊 特登 設立 呢個 清風寨 喺 呢個 清風鎮 上 。
嗰處 呢 ，亦都有 三五千 戶 人家 ，就 離開 清風山 只有 一 站 幾 路 嘅 啫 。
宋公明 佢 獨自 一個人 ，孭住 包袱 ，一路 噉 行到嚟 清風鎮 嘞 。
鎮上 嗰個人 回答 佢 話 ：呢 ，呢個 清風寨 衙門 喇 ，就 喺 鎮市 中間 嚟 。
南 便 有 個 小寨 ，係 文官 劉 知寨 嘅 住宅 ；
北便 嗰個 小寨 呢 ，就係 武官 花知寨 嘅 住宅 咯 。
宋江 聽咗 多謝咗 嗰個 人 ，就 去 北寨 啦 。
行到 門口 ，見到 有 幾個 守門 嘅 軍卒 ，問咗 姓名 就 入去 通報 。
冇幾耐 ，只見 寨裏 便 有 一個 少年 嘅 軍官 行 出嚟 ，拖住 宋江 就 拜 。
嗰個人呀 ，生得 齒白唇紅 ，兩眉入鬢 ，細腰 寬膀 ，又 英俊 又 威武 。
出嚟 呢個 少年 將軍 啊 ，就係 清風寨 武知寨 小李廣 花榮 喇 。
花榮 拜見 咗 宋江 之後 ，就 叫 軍卒 接過 咗 包袱 、朴刀 、腰刀 ，扶住 宋江 一直 嚟到 正廳 ，請 宋江 當中 坐落 。
花榮 跪低 又 拜咗 四拜 ，佢 起身 話 ：
自從 同 兄長 分別 之後 ，眨下眼 又 過咗 五六年 咯 ，時時 都 想念 兄長 ，嗨 。
聽講 兄長 殺咗 一個 下賤 女人 ，官府 啊 發咗 文書 各處 咁 追捕 。
小弟 聽講 之後 真係 如坐針氈 啊 ，連 氣 寫 咗 十幾 封 信 ，去 貴莊 探聽 消息 ，唔知 有冇 收到 呢吓 ？
今日 天賜良緣 咁好彩 得 阿哥 嚟到 ，相見 一面 真係 大慰 平生 啊 ！
講完 ，又 拜 。
嗨 ，古時 啲 人 呀 ，真係 多禮 㗎 吓 。
宋江 扶住 佢 話 ：賢弟 你 唔好 淨係 顧住 咁多 禮 。
請坐 ，等 我 講畀 你 聽 。
花榮 就 斜斜 身噉 坐 喺 住 。
宋江 呢 ，就 將 殺 閻婆惜 ；投奔 柴 大官人 ；同埋 喺 孔 太公 間 屋企 遇到 武松 ；清風山 上面 被 捉 ，遇到 燕順 等等 ，詳詳細細 都 講咗 一次 。
花榮 聽咗 就 話 ：唉 兄長 咁多 磨難 ，今日 好彩 嚟到 呢度 噉 就 住 佢 幾 年 先 ，再 作 打算 啦 。
宋江 話 喇 ：就算 我 細佬 宋清 冇 寄 信 嚟 孔太公 屋企 畀 我 ，我 亦都 特登 要 嚟 賢弟 呢處 行 一 趟 㗎 喇 。
花榮 就 請 宋江 去 後堂 裏 便 坐 ，叫 個 老婆 崔氏 出嚟 拜見 阿伯 。
拜見完喇 ，花榮 又 叫 個 妹 出嚟 拜見 阿哥 。
然後呢 ，就 請 宋江 ，用啲 香噴噴嘅 熱水 洗身 ，更換 衣裳 鞋襪 ，喺 後堂 安排 筵席 嚟 洗塵接風 。
當日 飲酒 嘅 時候 呢 ， 宋江 就 將救 咗 劉知寨 夫人 嘅 事 啊 ， 就講 咗 畀 花榮聽 。
花榮 聽咗 就 皺住 眉頭 話 ：唉 ，兄長 你好地地 救 嗰個 女人 做乜吖 ！
要嚟塞嗰個嘢把口就啱喇 ！
宋江 就 話 啦 ：吖噉 又 奇怪 喇 。
我 聽講 係 清風寨 知寨 嘅 夫人 ，因此 睇在 賢弟 同僚 嘅 面上 ，連 王矮虎 怪 我 都 唔理得 咁多 ，一力 要 救 佢 落山 。
你 點解 會 噉樣 講 嘅 呢 ？
兄長 你 唔知嘞 ，唔係 小弟 誇口 ，呢個 清風寨 係 青州 一個 緊要 嘅 地方 。
當初 仲 係 小弟 獨自 喺 呢處 把守 個 時候 ，遠近 啲 盜賊 ，點 敢 將 青州 搞到 咁 亂 啦 。
近日 派咗 呢個 瘟神 嚟 做 個 正知寨 ，呢個 傢伙 又 係 個 文官 ，又 冇 本事 。
自從 到任 之後 ，就 對 呢處 四鄉 啲 上戶 敲詐 勒索 ，貪贓 枉法 無所不為 。
小弟 係 個 武官 副知寨 ，成日 都 畀 呢個 傢伙 激氣 ，恨不得 呀 殺咗 呢個 貪官 賊 禽獸 ！
點知 兄長 救咗 呢個 嘢 嘅 女人 喎 。
呢個 女人 呀 ，壞 到 不得了 ，一味 挑撥 佢 丈夫 做 啲 不仁不義 嘅 事 ，殘害 良民 ，貪圖 賄賂 ，本來 等 嗰個 賤人 受 啲 污辱 就 啱 㗎 喇 。
兄長 你 救 錯咗 呢個 壞人 喇 。
賢弟啊 ，你 噉就 唔啱咯 。
自古 話 冤仇 可 解 不 可 結 。
佢 同 你 係 同僚 官 ，雖然 有啲 過失 ，你 應該 隱惡而揚善 吖嘛 。
賢弟 你 千祈 唔好 咁 淺見 至好 啊 。
哦 ，冇錯冇錯 ，兄長 噉 講 又 好啱嘅 。
等第日 喺 辦公廳 見到 劉知寨 嘅 時候 ，就 同 佢 講 話 救咗 佢 老婆 嘅 事 啦 。
係咯 ，賢弟 如果 噉樣 ，亦 顯出 你 嘅 好處 吖 嘛 。
噉啊 花榮 夫妻 一家 幾口 ，早晚 都 非常之 殷勤 ，好酒 好菜 款待 宋江 。
當晚 安排好 床鋪 ，喺 後堂 一間 房間 ，請 宋江 休息 。
第日 ，又 試 擺 酒 嚟 款待 宋江 。
噉 宋江 自從 嚟到 花榮 間 寨 處 啊 ，飲咗 四五日 酒 。
花榮 手下 有 幾個 心腹 家人 ，一日 換 一個 ，畀啲 碎銀 佢哋 袋住 喺 身邊 ；
每日 叫 佢哋 陪 宋江 去 清風鎮 行 下 街 ，又 去 啲 村落 宮觀 寺院 ，四周圍 散 下 步 ，睇 下 風景 。
呢個 清風鎮 上 便 啊 ，亦 有 幾座 小勾欄 嘅 ，即係 啲 妓女 啊 歌女 活動 嘅 地方 嘞 ，又 有 茶坊 酒店 。
噉 當日 宋江 同 呢個 心腹 家人 ，喺 小勾欄 裏 便 睇咗 一陣 ，又 去 附近 嘅 寺院 宮觀 遊覽 一番 ，又 去 市鎮 嘅 酒店 飲酒 。
臨行 ，嗰個 心腹 家人 要 找數 。
宋江 啊 邊度 肯 要 佢 使 錢 㗎 ，噉 就 自己 攞 啲 碎銀 畀 咗 。
宋江 返到嚟 呢 又 冇 同 花榮 講 喎 。
嗰個 陪佢 飲酒 嘅 人 就 梗係 歡喜 定 㗎 啦 係咪 呢 ，嗱 ，落得 有錢 逗 ，又 落得 自在 ，嘿嘿 。
從此啊 ，每日 都 派 一個人 嚟 陪 宋江 出去 玩 。
每日 呢 ，又 都 係 宋江 使 錢 。
所以 自從 嚟到 寨 之後 啊 冇 一個 話 唔 敬愛 佢 嘅 。
宋江 喺 花榮 間 寨 處 住咗 有 個 幾 月 喇 ，眼 睇住 冬 去 春 來 ，就嚟 又 到 元宵 佳節 咯 喎 。
呢個 清風寨 鎮上 嘅 居民 啊 ，準備 慶賀 元宵 ，大放 花燈 喎 。
佢哋 夾齊 錢 ，去 土地大王廟 前面 搭起 一座 小鰲山 ，上面 係 結綵懸花 ，掛起 五六百 盞 花燈 。
土地 大王 廟 裏 便 呢 仲 有 各種各樣 嘅 遊藝 表演 競賽 ；
家家戶戶 嘅 門口 ，扎起 燈棚 ，掛起 啲 花燈 喺度 鬥靚 。
市鎮 上面 ，各行各業 樣樣 都有 。
雖然 就 比唔上 京師 咯 ，但係 亦都係 人間 天上 咯 喎 。
到咗元宵喇 ，嗰日 天色晴明啊 ，花榮 到咗 巳牌 前後 ，即係 上午 十點 咁上下 啦 ，就 上馬 去 辦公廳 。
點起 幾百個 軍士 ，吩咐 佢哋 夜晚 去 市鎮 上面 巡邏 ，維持 治安 。
又 派咗 好多 軍士 ，分頭 去 四面 把守 營門 。
未牌嘅時分 ，即係 下午 兩點鐘 左右 ，返到嚟 寨喇 ，就 請 宋江 食 點心 。
宋江 就 話 喇 ：聽講 呢處 市鎮 今晚 要 放 花燈 啊 ，我 啊 想 去 睇 下 啫 。
好啊 ，小弟 本來 亦都 要 陪伴 兄長 前去 ，無奈 我 職務 在身 ，就 唔能夠 一齊 去 喇 。
今晚 兄長 就 同 我 屋企 兩三個人 去 睇 燈 ，早啲 返嚟 。
小弟 喺 屋企 等 你 返嚟 家宴 ，飲 返 幾杯 嚟 慶賀 佳節 啦 。
誒 ， 噉 就 最好 啦 噉 就 最好 啦 。
當晚 ，宋江 同 花榮 屋企 嗰 兩三個 心腹 家人 ，漫步 出去 大街 睇 燈 。
到咗 清風鎮 上 ，嘩 只見 家家 門前 都 搭起 燈棚 ，懸掛 花燈 ，燈上 便 呢 畫咗 好多 故事 嘅 ；
亦有 剪采 飛白 牡丹花燈 ，芙蓉 荷花 異樣 燈火 。
佢哋 四個人 ，大家 拖住 手 ，嚟到 大王廟 前 便 喇 ，嘿 睇下 嗰個 小鰲山 呀 ，哎呀 ，真係 靚 啊 ！
只見 雙龍 戲水 ，又 有 獨鶴 朝天 ；
有 金蓮燈 ，玉梅燈 ，荷花燈 ，芙蓉燈 ，嘿 真係 千團 錦繡 啊 。
宋江 佢哋 四個人 喺 鰲山 前面 睇咗 一陣 ，就 一路 向住 南 行 。
行咗 六七百步 ，只見 前面 燈光 火猛 ，有 一班人 圍住 一個 大院落 個 門口 ，非常之 熱鬧 。
啲 鑼鼓 啊 叮叮噹噹 咁 響 ，啲 人 啊 大聲 咁 喝彩 。
宋江 逼埋 去 睇下 ，嗬 ，原來 係 一隊 舞鮑老 嘅 。
舞鮑老 即係 一種 戴住 面具 嘅 滑稽舞 。
宋江 個人 就 生得 矮 𠱂𠱂 吖 ， 噉 啊 拈 高腳 ， 伸 長條 頸 ， 左 睇 右 睇 睇 得 唔 清楚 。
噉 陪佢 去 嗰 幾個 心腹 家人 呢 ，就 識得 遊藝隊 啲 人 嘅 ，就 撥開 啲 人 ，等 宋江 行近 去 睇 。
嗰個 跳鮑老 嘅 ，嘿 將 個 身 啊 扭得 古古怪怪 土頭土腦 ，嘿 宋江 睇到 就 哈哈聲 大笑 咯 喎 。
哼哼 ， 一笑 就 弊 ， 點解 呢 ？
原來 呢個 院落 裏 便 啊 ，係 劉知寨 夫婦 兩個 ，同埋 幾個 女人 喺度 睇 。
聽見 宋江 笑聲 ，嗰個 劉知寨 嘅 老婆 隻 眼 好 尖 嘅 ，喺 燈 下 一 眼 就 認出 宋江 喇 ，就 指 畀 佢 丈夫 睇 喇 ：
呢 ，嗰個 又 黑 又 矮 嘅 男人 啊 ，就係 前 嗰排 ，喺 清風山 搶咗 我 去 嘅 賊頭 喇 。
劉知寨 聽咗 吃一驚 ，即刻 嗌 六七個 親隨 ，去 捉 嗰個 喺度 笑嘅 黑男人 。
宋江 聽到 擰轉 身 就 走啦 。
走咗唔到 十零 間 屋位 唧 ，就 畀 班 軍佬 追上去 嘞 ，一下 就 捉住 宋江 。
拉咗 去 寨裏 便 ，用 四條 麻繩 綁實 ，押 到嚟 大廳 。
嗰 三個 心腹 家人 見 捉咗 宋江 去 唄 ，就 趯 返嚟 報畀 花榮 知 嘞 。
嗰個 劉知寨 坐 喺 大廳 上面 ，叫話 押 嗰個 傢伙 嚟 噉 。
嗰啲人 就 將 宋江 拉到 嚟 廳前 跪低 。
劉知寨 就 喝 佢 話 ：
你呢個傢伙 係 清風山 打劫 嘅 強賊 ，點解 膽敢 擅自 嚟 睇 燈 啊 ？
而家 被擒 喇 ，有 咩嘢 說話 講 ？
小人 ，係 鄆城縣 嘅 商人 張三 ，同 花知寨 係 朋友 。
嚟 呢 處 好多 日 喇 ， 未曾 喺 過 清風 山 打劫 啊 。
劉知寨 個 老婆 喺 屏風 後 便 轉出嚟 話 ：
你 呢 個 傢伙 仲想 抵賴 啊 ！
你 仲 記唔記得 要 我 叫 你 做 大王 嗰陣 啊 ？
夫人 ，你 錯 喇 ，嗰陣 小人 唔係 同 夫人 講過 咩 ？
話 小人 係 鄆城縣 嘅 商人 ，亦都 係 畀 佢哋 搶 咗 喺 處 唔 能夠 落山 吖 嘛 。
劉知寨 就 話 喇 ：
你既然係商人 ，畀佢哋搶咗去 ，今日 點解 能夠 落山 又 嚟到 我 呢處 睇 燈 啊 ？
個 女人 又 話 喇 ：
你呢個傢伙 喺 山上 嗰陣 ，大辣辣 噉 坐 喺 中間 交椅 上便 ，由得 我 叫 大王 你 邊處 肯睬 人 啊 你 ！
夫人啊 ，你 完全 唔記得 我 一力 救 你 落山 ，為乜事 幹 今日 反轉頭 冤戾 我 做 賊 呢 ？
嗰個 女人 聽咗 就 嬲喇 ，指住 宋江 噉 鬧 ：
你呢個賴皮賴骨 ，唔打點 肯招認㗎 ！
劉知寨話 ：講得啱 ，人嚟 ，同我打 ！
一連 打咗 幾十下 ，打到 宋江 啊 皮開肉綻 鮮血 惦流 啊 。
打完喇 ，又 叫人 將 宋江 用 鐵鎖 鎖住 ，聽日 呢 用 架 囚車 ，將 鄆城 虎 張三 解去 青州 。
嗰幾個 陪 宋江 睇 花燈 嘅 心腹 家人 ，搏命 噉 走 返去 報畀 花榮 知 。
花榮 聽到 大驚 ，即刻 寫 封信 ，派 兩個 能幹 嘅 親隨人 ，去 劉知寨 嗰 處 攞 人 咯 喎 。
個 親隨 人 攞住 信 ，急急忙忙 去到 劉知寨 門前 嘞 。
守門嘅 軍士 入去 稟報 話 ：花知寨 派 人 送 信 嚟 啊 。
劉高就話 ：叫佢入嚟吖 。
嗰個 親隨人 入到嚟 大廳 ，將 封信 呈上去 。
劉高 拆開 封信 睇下 ，嗰 封信 話 ：
花榮拜上 ，僚兄 相公 座前 ：
因 有 薄親 劉丈 ，近日 從 濟州 來 ，因 看 燈火 ，誤犯 尊威 ，萬乞 情恕 放免 ，自當 造謝 。
草字 不恭 ，煩 乞 照察 不宣 。
劉 高 睇咗 封信 呀 發惡 ，將 信 搣 到 粉碎 破口大罵 噉 話 ：
花榮 呢個 傢伙 真係 豈有此理 ！
你 係 朝廷 命官 ，點解 要 同 啲 強賊 來往 啊 ，仲 想 嚟 呃 我 ，哈 ！
呢個 賊人 已經 招認 係 鄆城縣 張三 嘞 ，你 喺 封 信 度 點解 話 佢 係 劉丈 呢 ？
我唔係咁容易畀你戲弄㗎 。
你 寫 佢 姓 劉 ，係 同 我 同 姓 ，你 以為 噉樣 我 就 放 佢 呀 ？
就 喝令 左右 將 呢個 送信人 推咗 出去 。
嗰個 親隨人 畀 劉高 趕出 寨門 就 急急 返去 ，稟報 畀 花榮 知 啦 。
花榮 聽咗 就 嗌 ：哎呀 ！呢趟 苦咗 阿哥 咯 。
人 嚟 ！同 我 備 馬 。
花榮 即刻 披掛 盔甲 ，扎好咗 弓箭 ，揸槍 上馬 ；
帶住 四五十個 軍士 ，都係 拖槍 帶棍 嘅 ，一直 跑到 劉高寨 裏頭 嚟 。
守門嘅 軍人 見到 ，邊度 敢 攔擋 吖 ？
見到 花榮 來勢 兇猛 唄 ，個個 都 慌晒 走散晒 咯 。
花榮 衝到 大廳 前 便 落咗 馬 ，隻手 揸住 支槍 ，嗰 四五十 人 呢 ，都 排 正 喺 廳 前 。
花榮 大聲 噉 嗌話 ：請 劉 知寨 出嚟 有 說話 講 ！
劉高 聽咗 嚇到 魂飛魄散 啊 ，怕 花榮 係 個 武官 ，唔敢 出嚟 見面 。
花榮 見 劉高 唔 出嚟 唄 企咗 一陣 ，就 喝啲 左右 去 兩便 耳房 抄 人 。
嗰 四五十 個 軍佬 ，一齊 去 抄 啦 ，好快趣 ，就 喺 廊下 耳房 裏 便 搵到 宋江 。
宋江 慘咯 ，畀 麻繩 啊 高高 噉 吊 喺 屋樑 上面 ；
又 用 鐵索 鎖住 ，兩 隻 髀 呀 打到 皮 開 肉 綻 。
幾個 軍士 呢 就 割斷咗 條 繩 ，打開咗 鐵鎖 ，救返 宋江 出嚟 。
花榮 叫 軍士 送 佢 返 屋企 先 。
花榮 上返 馬 ，提槍 在手 ，佢 話 喇 ：
劉知寨 ，你 就算 係 個 正知寨 ，點解 要 咁嚟 欺負 我 花榮 呢 ！
邊家 冇 個 親眷 啊 ？你 係 咩嘢 意思 ！
將 我 一個 表哥 ，拉咗 返 屋企 ，夾硬 冤戾 佢 做 賊 。
你 咁 欺負 人 ，好 ，聽日 再 同 你 講 ！
花榮 帶住 啲 人 ，就 返返去 寨 裏 便 睇 宋江 嘞 。
嗰個 劉知寨 啊 ，見 花榮 救咗 人 扯唄 ，即刻 點起 兩百 人 ，叫 佢哋 去 花榮寨 搶 人 咯噃 。
