劉唐 同 雷橫 啊 ，正 喺度 打到 不可開交 ，有 個 秀才 模樣 嘅 人 出嚟 勸 。
呢個人 ，就係 智多星 吳用喇 ，佢 表字 學究 ，道號 加亮 先生 ，係 本鄉 人士 。
當時 吳 用 就 指住 劉唐 話 ：
你 唔 好 逳 手 ， 你 為 咩 事 同都頭 爭執 起上 嚟 啊 ？
唔關 你 秀才 事 ！
雷橫 就 話 喇 ：教授 你 唔知 喇 ，呢個 嘢 ，尋晚 黑 赤 條條 噉 喺 靈官廟 裏頭 瞓着 咗 ，畀 我哋 捉住 ，帶咗 去 晁保正 間 莊處 。
原來 佢 係 保正 嘅 外甥 喎 ，噉 就 睇在 佢 舅父 嘅 面子 放咗 佢 啦 。
晁天王 請 我哋 飲咗 酒 ，又 送咗 啲 禮物 過 我 。
哈 ，呢個 嘢 ，瞞住 佢 舅父 ，追到嚟 呢處 要 問 我 攞返 喎 ，你 話 呢個 嘢 大膽 唔 大膽 呢 ？
吳用 啊 諗嘞 ：
奇噃 ，晁蓋 同 我 都 係 自細 相識 嘅 ，乜嘢 事 都 嚟 同 我 商量 嘅 。
佢啲 親戚 朋友 我 都 知道 晒 ，冇 見過 佢 有 呢個 外甥 㗎 ，而且 年歲 亦 唔 登對 吖 ，實係 有啲 古怪 定 喇 。
好 ，等 我 勸開 佢哋 先 ，返轉頭 慢慢 至 問 佢 。
於是 吳用 就 話 ：喂 ，你 呢個 大漢 唔好 咁 牛頸 喇 。
你個舅父 同 我 係 好朋友 ，同 呢個 都頭 亦 係 有 交情 嘅 。
你舅父 送咗 啲 禮 畀 都頭 ，你 就 走嚟 要攞返 ，噉 唔係 傷咗 你舅父 嘅 面子 。
好喇好喇 ，你 睇 在 小生 嘅 份 上 ，返去 啦吓 ，唔好 嘈 喇 。
我 會 同 你 舅父 講 㗎 喇 ，啊 。
秀才 ，你 都 唔 知道 呢 ，嗰啲 銀 呀 唔係 我 舅父 心甘情願 送畀 佢 㗎 ，佢 敲詐 我 舅父 嘅 啫 。
佢 如果 唔 還返 畀 我 ， 我點 都 唔 返去 。
雷橫 就 話 喇 ：除非 保正 自己 嚟 攞 ，我 就 還畀佢 ，你 ，我 就 唔 畀 ！
哈 ，你 冤戾 我 做賊 ，呃咗 人哋 啲 銀 ，點解 唔 還 啊 ？
又唔係 你嘅 銀 ，唔還 ，唔還 ！
你唔還 ，你 問下 我 手上 呢 把 朴刀 啦 ，佢 肯 ，你 就 唔使 還 啦 。
吳用 又 勸 佢哋 話 ：你哋 兩個 鬥咗 半日 都 冇 輸贏 ，噉 要 鬥 到 幾時 先 了 吖 ！
佢 唔 還 返 啲 銀 過 我 ， 我 就 同 佢 鬥 到 你死我活 先至 了 ！
雷橫火滾嘞 ：我 如果 怕 你 添 多 半個 土兵 嚟 同 你 打 呢 ，都 唔 算 我 係 個 好漢 ，我 幾大 都 要 斬低 你 先至 算數 。
劉唐 就 拍到 個 心口 啪啪聲 噉 話 ：你 估 我 怕 你 啊 嚟 吖 嗱 ！噉 就 上前 嘞 喎 。
呢便 雷橫 亦都 指手畫腳 噉 湧上嚟 嘞 。
睇住 兩個 又 要 搏過命 ，吳 用 拃住 喺 中間 嚟 猛咁 勸 。
邊度 勸得住 呢 ？
呢個 時候 ，只見 嗰班 土兵 指住 嗰便 話 ：呢 ，保正 嚟喇 保正嚟喇 ！
劉唐 擰轉身 睇下 ，只見 晁蓋 就噉 褸住 件 衫 ，打開咗 前襟 ，喺 條 路 處 呀 猛追過嚟 大聲 噉 話 ：畜生 ，唔准 無禮 ！
吳用 就 笑起上嚟 話 喇 ：哈哈哈 係 要 保正 親自 嚟 ，呢場 交 先至 勸得住 㗎 喇 。
晁蓋 追到嚟 ，氣喘喘噉 話 ：你 走嚟 呢處 鬥 朴刀 做乜嘢 啊 ！
雷橫 話 喇 ：你位 外甥 啊 ，揸住 把 朴刀 追住 嚟 ，問 我 攞返 啲 銀 喎 。
我話 ：唔還畀 你 ，要 還 我 自己 還畀 保正 ，唔關 你 事噉 。
哈 ，佢 噉 就 同 我 打起上嚟 ，鬥 咗 五十 個 回合 。
呢 教授 唔 喺 喺度 勸緊 咯 。
呢個 畜生 吖 ，小人 一啲 都 唔 知道 ，都 頭 你 畀 個 面 我 ，請 返 去 啦 ，第日 再 登門 賠禮 。
小人 亦都 知道 佢 係 亂嚟 嘅 啫 ，唔會 計較 佢 嘅 。
你 睇下 ，又 勞煩 保正 走 咁 遠 嚟 添 。
雷橫 講完 就 帶住 班 土兵 走咗 咯 。
吳用 就 同 晁蓋 話 ：如果 唔係 保正 親自 嚟 呀 ，幾乎 鬧出 一場 大事 啊 。
你 呢位 外甥 確係 使得 ，好 武藝 啊 ！
先頭 ，小生 喺 籬笆 入便 睇住 㗎 喇 。
呢個 使 朴刀 出咗名 嘅 雷都頭 都 打 佢 唔過 呢 ，淨係 識得 架格 遮攔 咋 。
你話 如果 再 鬥 多 幾個 回合 ，我 睇 雷橫 必定 連命 都 冇埋 。
故此 小生 快啲 出嚟 格 開 佢哋 啦 。
係喇 ，你 呢位 外甥 喺 邊度 嚟 㗎 ？往日 喺 你 莊處 未曾 見過 噃 。
晁蓋 話 ：正話 想 請 先生 你 嚟 敝莊 商量 一 件 事 ，啱啱 想 叫 個人 嚟 請 你 ，就 唔見 咗 佢 嘞 ，睇下 槍架 上 便 唔見 咗 把 朴刀 。
收尾 聽見 一個 看 牛仔 話 ，有 個 大漢 揸住 把 朴刀 向住 南 便 一直 追過去 啊噉 。
我 就 連 隨 追 住 嚟 啦 ，哈哈 ，好彩 得 教授 勸解 住 唧 。
教授 ，請 嚟 敝莊 一趟 ，有 件事 要 同 你 商量 下 。
好啊 好啊 。
吳用 返入 去 書齋 ，掛 返 起 條 銅鏈 ，同 個 主人家 話 ：等 緊 啲 學生 嚟 就 話 先生 今日 有 事 幹 ，放 一日 假 啦 。
吳用 閂 好 書齋 道門 ，用 鎖 鎖住 ，就 同 晁蓋 、劉唐 一齊 去 晁家莊 嘞 。
晁蓋 請 佢哋 一直 入到去 後堂 ，分 賓主 坐落 。
吳用 問 喇 ：保正 ，呢個 人 ，究竟 係 邊個 啊 ？
呢位 ，係 江湖 上 個 好漢 ，姓 劉 名 唐 ，係 東潞州 人士 。
因為 有 一單 富貴 特意 嚟 搵 我 。
尋晚 佢 飲醉咗 ，瞓 喺 靈官廟 嚟 ，點知 畀 雷橫 捉住 ，拉 到 嚟 我 間 莊處 。
我 認佢 係 我 外甥 ，噉 先至 得甩身 。
佢 話 ：北京 大名府 梁 中書 ，買咗 十萬 貫 金珠寶貝 ，準備 送 去 東京 ，同 佢 個 外父 蔡 太師 賀壽 。
日內 ，就 喺 呢處 經過 。
呢啲 不義之財 ，攞咗 佢 冇 咩 嘢 唔妥 吖噉 。
教授 ，佢 呢一番 來意 ，應 正 我 一個 夢噃 。
我 尋晚 ，夢見 北斗七星 ，落喺 我 間 屋脊 上 便 。
斗柄上 ，另外 仲有 一粒 小星 ，化咗 道 白光 飛咗 。
我諗 ：星照 本家 冇 話 唔利事 㗎 。
今朝早 ，就係 想 請 教授 嚟 商量 下 。
呢件事 ，你 睇 點 呢 ？
哈哈哈哈哈哈哈 ，小生 見到 劉兄 嚟 得 奇怪 ，亦都 估到 七八成 咯 。
呢件事 好啊 ，不過 有 一樣 噃 ，人多 做唔成 ，人少 又 唔 做得 。
貴莊 空 有 咁多 莊客 ，之一 個 都 用唔上 。
而家 只係 得 保正 、劉兄 同 小生 三個人 ，噉 點 做得成 呢件事 呢 ？
就算 保正 同 劉兄 都係 非常 使得 ，亦都 擔負 唔了 嘅 。
要做成 呢件事 ，七八個 好漢 就啱嘞 ，多 亦冇用 。
咦 ，莫非 係 要 應 正夢 裏頭 嘅 星數 ？
兄長 你 呢個 夢 ，非同小可 啊 ！
嗯 ， 嗯 ， 唔 通 喺 北方 ， 仲有 扶助 嘅 人 嚟 ？
吳用 耷 低頭 諗 咗 一陣 ， 佢 眉頭一皺 就 計上心來 喎 。
佢 話 ：有喇 ，有喇 ！
晁蓋 急急 問佢 話 ：先生 ，如果 有心腹 嘅 好漢 ，就 去 請 佢哋 嚟 ，做成 呢件事 啦 。
吳用話 ：我 諗起嚟喇 ，有 三個人 ，真係 義膽包身 ，武藝出眾 ，敢 赴湯蹈火 同死共生 嘅 。
得到 呢 三個 人 嚟 ，噉 就 做得成 呢件事 喇 。
呢 三個 係 咩嘢 人 啊 ？叫 咩嘢 名 ？喺 邊處 住 㗎 ？
佢哋 係 三 兄弟 嚟 ，喺 濟州 梁山泊 邊邊 嘅 石碣村 住 。
平時 ，係 靠 打魚 搵食 ，有時 亦都 喺 水泊 裏 便 做下 私商 嘅 勾當 。
佢 哋 姓 阮 ， 一個 叫做 立地 太歲 阮小二 ， 一個 叫做 短命 二郎 阮小五 ， 一個 叫做 活 閻羅 阮小七 ， 係 親兄弟 嚟 。
小生 往日 喺 嗰處 住過 幾年 ，識得 佢哋 。
佢哋 雖然 係 不通文墨 咋噃 ，但係 同人 做 朋友 呀 ，認真 講義氣 ，係 個 男子漢 ，所以 小生 就 同 佢哋 來往 ，到 而家 已經 有 成 兩 年 多 冇 見面 。
如果 有 呢 三個 人 ，大事 必 成 啊 ！
係啊 ，我 亦都 聽聞過 阮家 三兄弟 個名 ，就係 未見過 唧 。
係喇 ，石碣村 離 呢度 只有 百零里 嘅 路程 ，使 個人 去 請 佢哋 嚟 商量 下 好唔好 呢 ？
使人 去 請 佢哋 點 肯 嚟 㗎 ？
等 小生 親自 去 嗰度 ，就 憑 我 三寸 不爛 之 舌 ，説 佢哋 入夥 。
先生 高見 啊 ！幾時 起程 呢 ？
事不宜遲 ，我 今晚 三更 起程 ，聽日 晏晝 就 可以 到 嗰處 喇 。
好極喇 ！
晁蓋 又 吩咐 啲 莊客 擺 酒 嘞 。
吳用 又 話 ： 北京 到 東京 啲 路 我 都行 過 ， 就 係 唔 知道 生辰 綱混邊 條路 嚟 唧 。
劉兄 ，呢次 又 要 麻煩 下 你 ，唔好 怕 辛苦 ，漏夜 趕去 北京 探聽 下 起程 嘅 日期 ，同埋 究竟 混 邊 一 條 路 嚟 ，吓 。
噉 ，小弟 亦都 喺 今晚 起行 。
啊 ，咪住咪住 ，佢 嘅 生日 係 六月 十五 ，而家 先至 係 五月 初幾 ，仲有 四五十日 。
仲係等 小生 說服咗 三阮兄弟 返嚟 ，到 嗰陣 先至 請 劉兄 去 啦 。
晁蓋話 ：噉亦好 ，劉唐 兄弟 你 就 喺 呢處 等候 啦 。
噉 當日 佢哋 飲咗 成個 下午 酒 。
到咗 晚頭 黑 ，三更時分 ，吳 用 起身 啷口 洗面 食咗 飯 ，攞咗 啲 銀 收埋 喺 身邊 ，着返 對 草鞋 ，晁蓋 、劉唐 就 送 佢 出 咗 莊門 。
吳用 呢 ，漏夜 就 趕去 石碣村 。
行到 第日 晏晝 ，行到嘞 。
吳用 喺度 住過 嘅 ，識得 路 ，唔使 問 人 ，嚟到 石碣村 就 一直 行 去 阮小二 屋企 。
行到 門口 睇睇 ，只見 水邊 灣住 幾隻 小漁船 ，竹籬笆 上 便 晾住 一堂 爛漁網 。
依山傍水 ，約莫 有 十零 間 草屋 。
吳用 嗌咗 一聲 ：二哥 喺唔喺 屋企 啊 ？
只見 有 個人 喺 裏 便 行出嚟 ，呢個 人 ，生得 面 凹口 闊 ，兩眼 有神 ，心口 長咗 執 黃毛 。
佢 頭戴 一 頂 爛 頭巾 ，身穿 一件 舊 衣服 ，打 大 赤腳 。
呢個人 就係 阮小二 嘞 。
佢 一 見到 吳用 ， 連忙 行過 禮話 ：
哎呀 教授 喺 邊處 嚟 啊 ？今日 乜嘢 風吹 咗 你 嚟 呢度 啊 ？
有啲 小事 特登 嚟 求下 二郎 你 。
有咩事 即管 開聲 。
小生 自從 離開咗 呢度 ，眨下眼 就 兩年 喇 ，而家 喺 一個 大 財主 屋企 教書 。
佢 係 要 請 飲 ，想 搵 十零 條 十四五 斤 重 嘅 金色 鯉魚 喎 ，因此 特登 嚟 搵下 二郎 啦 。
大鯉魚 係嘛 ，哎 ，小人 同 教授 飲 幾杯 先至 講 。
冇錯喇 ，小生 嘅 來意 亦 係 想 同 二哥 飲 返 幾 杯 。
嗱 ，湖 對面 有 幾家 酒店 ，我哋 扒艇 過去 啦 。
啱喇 ，我 都 要 搵下 五郎 講 句 說話 ，唔知 喺 唔喺 屋企 呢嚱 ？
我哋 去 搵下 佢 就係 啦 。
噉 兩個人 落到 湖邊 ，阮小二 喺 條 木樁 處 解開 一隻 艇仔 嘅 纜繩 ，扶住 吳用 落咗 艇 。
喺 樹頭 攞咗 支 槳 出嚟 ，掘 幾 下 就 扒咗開去 。
扒扒 下 ，阮小二 將 隻 手 一 擪 ，佢 嗌話 ：七哥 ，有冇 見到 五郎 啊 ？
吳用 望過去 ，只見 喺 蘆葦林 裏 便 有 個 大漢 扒 隻 艇 出嚟 。
呢個人呀 ，闊面 突眼 ，腮邊 長住 一把 黃鬚 ，周身 烏卒卒 ，好似 生鐵 打成 嘅 噉 。
佢 頭戴 一 頂 遮陽 黑 草笠 ，身穿 一 件 格仔布 背心 ，呢個 就係 活閻羅 阮 小七 嘞 。
佢 一便 棹住 艇 一便 問 ：二哥 ，你 搵 五哥 咩事 啊 ？
吳用 見到 佢 就 話 ：七郎 ，小生 特登 嚟 搵 你哋 有 說話 講 啊 。
吖 ，教授 ，我哋 好耐 冇見 咯 喎 。
七郎 ，一齊 同埋 二哥 去 飲杯酒 呢 ？
好啊好啊 ，小人 都 唔知 幾 想 同 教授 飲 返 杯 㗎喇 ，之 一直 都 冇 機會 見面 啫 。
兩隻艇 一前一後 ，扒咗 冇幾耐 ，就 扒到 一笪地方 。
呢住 四周圍 沊沊𡃈 都係 水 ，有 個 小島仔 上便 ，七八 間 草房 。
阮小二 就 嗌 上去 話 ：阿媽 ，五哥 喺 唔 喺度 啊 ？
有個 伯爺 婆 出嚟 話 ：
佢 呀 ， 魚又 冇 去 打 日日 咁 去 賭錢 ， 輸 到 一文錢 都 冇 晒 ， 呢 啱 先連 我 頭上 嗰 支 銀 釵 都 攞 埋 去 ， 話 要 去 圩 賭過 喎 。
阮小二 笑咗 一笑 ，又 將 隻艇 扒返開 。
阮小七 喺 後便 嗰隻 艇 處 話 ：
阿哥啊 ，真係 唔知 點解 嘅 ，賭親 都係 輸 ，你話 晦氣 唔晦氣 呢 ？
咪話 五哥 冇得贏 啊 ，我 亦都 輸到 光晒 喇 。
吳用 聽見 ，個心 就 諗嘞 ：嗯 ，呢次 呀 實中 我 嘅 計 喇 。
兩隻艇 一拍噉 ，扒去 石碣村 嘅 圩鎮 。
扒咗 半個 時辰 ，只見 前面 獨木橋 邊 有 個人 ，挽住 兩串 銅錢 落嚟 解艇 。
阮小二 話 ：呢 ，五郎 嚟 喇 。
呢個 阮小五 呀 ，生得 雙手 如 鐵棍 ，兩眼 似 銅鈴 。
佢 斜斜地 噉 戴住 一 頂 爛 頭巾 ，鬢邊 仲 插住 朵 石榴花 添 ，褸 住 一 件 舊 布 衫 。
打開 胸 ，心口 上 便 ，青 必必 噉 刺住 一隻 豹 。
佢 擸高 褲腳 ，條 腰 束住 一 條 格仔布 手巾 。
吳用 就 嗌 佢 一 聲 話 ：五郎 ，好唔好 手氣 啊喂 ！
哦 ，原來 係 教授 呀 ，嘿 成 兩年 冇見 咯 喎 。
我 喺 橋 上 便 望咗 你哋 好耐 㗎 喇 哈 估話 邊個 呢 ？
阮小二 就 話 ：我 同 教授 去過 你 屋企 搵 你 ，阿媽 話 你 去 咗 圩鎮 賭錢 喎 。
噉啊 一齊 嚟 呢處 搵 你 啦 ，嚟啦 ，嚟 同埋 教授 去 水閣 嗰便 飲 幾杯 。
阮小五 連忙 喺 橋邊 解開 隻艇仔 ，跳咗 落去 ，攞 去 支 搖 一扒 就 扒埋 一拍 。
三隻艇 扒咗 冇幾耐 ，就嚟到 嗰間 水閣酒店 嘞 。
三隻艇 都 灣 喺 水亭 下 便 嘅 荷花 蕩 嚟 ，扶吳 學究 上咗 岸 ，入到 間 酒店 ，喺 水閣 裏頭 搵到 張 枱 。
阮小二 話 ：先生 唔好 怪 我哋 三兄弟 咁 粗魯 啊 ，請 上座 啦 。
唔敢當 ，唔敢當 。
阮小七 話 ：唔好 你 推 我 讓 喇 ，嗱 ，阿哥 你 坐 主位 ，請 教授 坐 客席 ，我哋 兩 兄弟 就 隨便 坐 先 喇 吓 。
吳用話 ：哈哈哈哈 ，七郎 真係 爽快 。
四個人 坐落 之後 ，叫 酒保 打咗 一桶 酒 嚟 。
店小二 擺好咗 四隻 大酒杯 就 四雙 筷子 ，跟住 攞咗 四碟 菜 、一桶 酒 嚟 就 放 喺 張 枱 處 。
阮小二 就 話 ：有 咩 好 送酒 㗎 ？
今日 ，新劏咗 一隻 黃牛 ，好肥 好靚 ，啲肉 呀 好似 花膏 噉嘅 啱唔啱 吖 ？
大嚿大嚿 切 十斤 嚟 啦 。
阮小五 就 話 ：教授 唔好 見笑 啊 ，確實 係 冇 乜 好嘢 嚟 款待 你 。
滾攪晒 你哋 就 真 。
誒 千祈 唔好 噉 講 ，哈哈哈哈哈哈哈 。
冇耐 ，牛肉 攞咗嚟 嘞 ，分 做 兩 碟 ，個 酒保 就 猛咁 同 佢哋 斟 酒 。
阮家 三 兄弟 夾咗 幾件 畀 吳 用 ，嗨 真係 食咗 幾件 吳 用 就 食唔落 。
嗰 三 兄弟 啊 ，狼吞虎嚥 ，大刷 一輪 。
阮小五 就 問 ：教授 嚟 呢度 有 何 貴幹 啊 ？
阮小二 就 話 佢 聽 ：教授 而家 喺 一個 大 財主 屋企 ，開咗 間 館 教書 。
今日 嚟到 話 要 十零 條 金色 鯉魚 ，要 十四五 斤 重 一 條 個 喎 ，特登 嚟 搵 我哋 。
阮小七 就 話 喇 ：你 話 平時 呢 ，要 三五十 條 都有 啊 ，咪 講 話 十零 條 啦 ，仲 要 多啲 我哋 幾 兄弟 都 包得起 。
之而家 就算 要 啲 十斤 重 嘅 都 好 難得 。
阮小五 話 ：教授 咁遠 嚟 ，我哋 點 都 搵 十零條 五六斤 嘅 送畀 教授 啦 。
吳用 就 話 喇 ：
小生 帶咗 好多 銀兩 嚟 啊 ，價錢 就 唔論 嘅 ，不過 細條 嘅 就 唔合用 ，係 要 十四五 斤 重 嘅 至 啱 。
阮小七 話 ：
教授啊真係搵唔到呢 ，就算 先頭 五哥 應承 話 搵啲 五六斤 嘅 ，都唔係話 即刻 就 有㗎 ，都要 等 幾日 先 得㗎 。
啊係喇 ，我 隻艇 處 仲 有 一桶 魚仔 好 生猛 嘅 ，等 我 攞埋嚟 送 酒 至 得 。
講完 ，阮小七 就 去 艇處 攞咗 一桶 魚仔 上嚟 ，約莫 有 六七 斤 ，攞咗 去 灶頭 自己 逳手 整 ，整好咗 又 分 做 三 碟 擺咗 張 枱 處 。
阮小七 就 話 ：教授 嚟 喇 ，隨便 食啲 。
噉 四個人 又 食咗 一輪 ，睇住 個 天 就 嚟 夜 喇 ，吳 用 個心 諗 ：
喺 酒店 呢度 嚟 好 難 講 說話 嘅 ，今晚 梗係 喺 佢哋 屋企 過夜 㗎 喇 。
好 ，去到 先至 講 啦 。
阮小二 就 話 ：而家 就嚟 夜 喇 ，教授 就 請 喺 我 屋企 瞓 一 晚 先 ，買 魚 啲 事 聽日 再 算 啦 。
小生 嚟 呢度 一趟 真係 千難萬難 ，哈哈 ，好彩 你哋 三兄弟 ，今日 喺 齊處 。
睇 嚟 今日 呢 一圍 酒 就 梗 係 唔 肯 畀 我 出錢 㗎 喇 。
噉呢 ，今晚 小生 就 喺 二郎 屋企 過 一夜 。
我呢度 有 多少 錢 ，唔該 就 喺 呢間 酒店 買 佢 一埕 酒 ，買啲 肉 ，喺 村處 買 兩隻 雞 ，今晚 大家 再 嚟 一醉 呢 ，點啊 ？
阮小二 就 話 喇 ：使乜 教授 你 使 錢 吖 我哋 幾 兄弟 整 咪 得 咯 ，使 憂 冇 辦法 咩 ？
我嚟就係要請你哋三位 ，如果唔畀我請 ，噉小生告辭喇 。
阮小七 就 話 ：既然 教授 都 噉 講咯 ，我哋 恭敬不如從命 ，食咗 先至 算啦 。
到底係 七郎 爽快 。
於是 吳 用 攞咗 一兩 銀 ，交畀 阮小七 ，同 主人家 買咗 一埕 酒 ，借咗 個 大甕 路 轉過嚟 裝好 ；
買咗 二十 斤 生熟 牛肉 ，兩 隻 雞 。
阮小二 就 同 個 店主人 話 ：嗱 ，我啲 酒錢 一齊 畀埋 你 嘞 。
誒噉就真係盛惠晒喇 。
四個 人 離開 咗 酒店 ， 返落艇 ， 將 啲 酒 啊 肉 啊 都 放 喺 艇 嚟 ， 解開 纜 ， 就 一直 扒 去 阮小二 屋企 。
嚟到 阮 小二 屋企 門前 ，上咗 岸 ，灣 好啲 艇 ，攞齊 啲 酒肉 ，四 個 人 一齊 入去 後 便 水亭 坐落 。
原來 阮家 三 兄弟 啊 ，只有 阮小二 娶咗 老婆 。
阮小五 、阮小七 都 仲 未曾 結婚 。
阮小七 劏咗 雞 ，就 叫 阿嫂 同 一個 攞返嚟 嘅 細路仔 喺 廚房 整 餸 。
到 一更 咁上下 ，整好晒 呢 就 開 枱 飲 咯 喎 。
吳用 敬咗 佢哋 三兄弟 幾杯 ，又 提起 買魚 嘅 事 ，佢 話 ：
你哋 呢處 咁大 嘅 地方 ，點解 冇 咗 呢 停 大鯉魚 呢吓 ？
阮小二 就 講 佢 聽 ：實不相瞞 啦 教授 ，呢啲 大鯉魚 呀 ，除非 梁山泊 啦 就 有 喇 。
我哋 呢度 石碣湖 細過 頭 ，唔容得 落 啊 。
呢處 去 梁山泊 冇 幾 遠 嘅啫 ，水路 都 通 㗎 ，點解 唔 去 打 啲 呢 ？
唉 ，唔好提咯 。
咦 ，二哥 為咩事 歎起氣 上嚟 啊 ？
阮小五 就 話 ：教授 你 唔知 㗎 喇 。
起先呢 ，梁山泊 係 我哋 幾 兄弟 嘅 衣食飯碗 嚟 嘅 ，之而家 絕唔敢 去 。
咁大 一笪 地方 ，官府 斷 估 唔會 話 禁止 打魚 啩 ？
咩嘢 官府 禁止 打魚 吖 ？就算 係 個 活閻王 都 禁唔住 啊 。
既然 唔係 官府 有 禁令 ，點解 又 絕 唔敢 去 呢 ？
教授 你 都 唔 知道 來龍去脈 ，講 畀 你 聽 喇 。
係咯 ，小生 真係 唔明白 。
阮小七 接住 話 ：呢個 梁山泊 呀 ，難講 喇 。
而家 個 水泊 畀 一班 賊佬 佔住 ，唔准 打魚 。
係咩 ？小生 唔知 噃 。
哦原來 而家 有 班 賊佬 喺 處 呀 ，我 嗰 處 冇 聽講過 噃 。
阮小二 就 講畀 吳 用 聽 ，佢 話 ：嗰班 賊佬 ，做 頭 嘅 ，係 一個 落第 舉人 叫做 白衣 秀士 王倫 ；
第二個 叫做 摸着天杜遷 ；
第三個 叫做 雲裏金剛 宋萬 ；
打落 呢 仲 有 個 旱地 忽律 朱貴 ，就 喺 李家道 口 開 酒店 ，專門 探聽 事情 嘅 。
誒 呢 幾個 都 冇 緊要 ，而家 新新 嚟咗 個 好漢 就 犀利 咯 。
係 東京 禁軍 教頭 ，叫做 咩嘢 豹子頭 林沖 ，武藝 十分 叻 嘅 。
呢幾個 賊 男女 ，聚集咗 六七百 人 打家劫舍 ，收買 路錢 打腳骨 ，搶劫 啲 來往 客商 ，嘿 我哋 有 成年 幾 冇 去 嗰度 打魚 喇 。
而家 個 水泊 畀 佢哋 霸住 ，即係 打爛 咗 我哋 隻 飯碗 ，所以 真係 一言難盡 啊 。
哦 原來 噉嘅 ，啊 小生 都 唔 知道 有 件 噉嘅 事 噃 。
係咯 ，噉 點解 官府 唔 嚟 捉 佢哋 呢吓 ？
阮小五 就 話 ：官府 ？哼 ！佢哋 一逳親 呀 就 嚟 害 我哋 老百姓 。
一聲話嚟 鄉村 剿匪 嘞 ，首先 就 將 啲 老百姓 屋企 養 嗰 啲 豬 羊 雞 鵝 冚𠾴 唥 食 清光 ，臨走 仲要 送 錢 畀 佢哋 。
而家 啱啦 ，等 嗰班 人 整 下 佢哋 就 啱喇 。
嗰啲 捉賊 嘅 緝捕人員 ，邊度 敢 落嚟 鄉村 㗎 ？
佢哋 上司 一 話 派 佢哋 嚟 唧 ，就 嚇到 瀨屎 瀨尿 咯 ，仲 講話 捉 賊 添 ，正眼 都 唔 敢 望 下 人哋 啊 。
阮小二 就 話 ：不過 噉 ，講開 又 講 喇 ，我哋 雖然 打唔到 大魚 ，亦 慳返 唔使 繳 咁多 苛捐雜稅 。
吳用 就 話 ：哦 如果 係噉 ，佢哋 嗰班 傢伙 幾 快活 㗎 喎 。
阮小五 話 ：佢哋 唔怕 天 唔怕 地 ，唔怕 官府 ，嚱 ，論稱 分 金銀 ，着親 都係 綢緞 ；
成埕咁 飲酒啊 大嚿噉 食肉 ，有 咩嘢 唔快活 啊 ？
唉 我哋 兄弟 三 人 ，空有 一身 好 本事 ，哼 ，點 學得 人哋 吖 ？
得喇 ，噉就 好用計喇 。
阮小七 就 接住 話 喇 ：人生 一世 ，草木 一秋 ，我哋 淨係 識得 打魚 過日子 。
你話 能夠 學得 佢哋 噉 呀 ，一日 都係 好 㗎 。
吳用 就 話 喇 ：呢啲 噉嘅 人 ，學 佢哋 做 咩嘢 吖 ？
佢哋 做埋晒 嗰啲 勾當 ，唔係 話 打 幾十板 就 了事 㗎 噃 ，畀 官府 捉到 呀 ，不得了 㗎 。
阮小二 話 ：而家 啲 官府 都有 公道 嘅 ？一片 糊塗 ，無數 咁多 犯咗 彌天大罪 嘅 乜事 都 冇 。
我哋 幾 兄弟 ，都 冇 機會 過 下 啲 噉 嘅 好日子 。
如果 有人 肯 帶 協下 我哋 呀 ，幾大 都 去 啊 。
阮小五話 ：我 時時 都係 噉 諗㗎喇 ，我哋 三兄弟 嘅 本事 ，又唔係 唔及得 人哋 ，不過 有邊個 識得 我哋 吖 ？
阮小七 跟住 話 喇 ：如果 有人 睇得起 我哋 ，嘿 ，水 裏 嚟 就 水 裏 去 ，火 裏 嚟 就 火 裏 去 。
如果 能夠 快活 得 佢 一日 呀 ， 就算 係 死 都 死 得 眉開眼笑 啊 。
吳用 個 心 就 暗暗 歡喜 嘞 ：嗯 ，你 三個 都有意 喇 ，等 我 慢慢 嚟 引 佢哋 至 得 。
吳用 就 敬佢哋 三兄弟 飲咗 兩巡酒 就 話 ：
你哋 三個 敢唔敢 上 梁山泊 去 捉 呢班 賊佬 呢 ？
阮小七 就話 ：嘿嘿 ，就算 捉到 佢哋 又 去 邊處 請賞 啊 ？誒 盞 畀 江湖 上 啲 好漢 笑話 㗎 啫 。
照 小生 嘅 睇法 ，既然 你哋 話 打魚 又唔 打得 咯 ，噉 不如 去 嗰度 入埋 佢哋 一夥 唔係 仲 好 ？
阮小二 就 話 ：唉 先生 你 又 唔知嘞 ，我哋 三 兄弟 呀 ，商量過 幾次 話 要 去 入夥 㗎 喇 。
之 聽 嗰個 白衣 秀士 王倫 嘅 手下 講 ，話 佢 個 心地 好 狹窄 嘅 ，唔 容得 人 落 嘅 噉 話 。
前次 東京 嗰個 林沖 上山 啊 ，聽講 都 唔知 幾 翳氣 。
王倫 嗰個 嘢 依 老七 都 唔 肯 收 人 嘅 ，我哋 三 兄弟 睇見 噉樣 都 冇 晒 心機 啦 。
阮小七 就 話 ：佢哋 如果 學 似 老兄 你 咁 慷慨 ，咁 睇得起 我哋 三兄弟 呀 ，噉 就 好咯 。
阮小五 就 話 ：嗰個 王倫 如果 學得 教授 待 我哋 咁 有情分 嘅 ，我哋 早 就 去咗 啦 仲 使 等到 今日 咩 ？
我哋 三 兄弟 呀 ，替 佢 去 死 都 甘心 啊 。
唔 好 噉 講 ， 好似 小生 噉 嘅 人 ， 算 得 乜嘢 吖 ？ 而家 山東 、 河北 幾多 英雄豪傑 啊 。
阮小二 話 ：冇錯 ，好漢 係 唔少 啊 ，不過 我哋 幾 兄弟 都 未曾 遇見過 一個 啫 。
吳用 就 話 喇 ：呢處 就 有 一個 喇 。
你哋 估 吳 用 講出 邊個 英雄 好漢 呢 ？噉 就 下次 再 講 喇 。
