林沖 係 喺 山神廟 裏 便 飲緊 酒 吖 ，忽然 見到 草料場 火燭 ，燒到 含含聲 。
噉佢 好 着急 啦 ，正話 想 開門 出去 救火 咯 喎 。
咦 ？門口 外 便 有人聲 。
林沖 就 伏 喺 門邊 聽 下 先 ，原來 係 三個 人 嘅 腳步 聲 。
嚟到 廟 門口 喇 ，喺 出便㧬 門 。
不過 道門 呢 ，係 畀 林沖 喺 裏 便 用 石頭 頂實 㗎 嘛 所以 就 㧬極 都 㧬唔開 。
嗰 三個 人 見 㧬唔開 門 咯 ，就 企 喺 屋簷 下 便 睇住 啲 大火 ，喺度 傾偈 。
其中 有 一個 人 話 ：誒 ，嚱 呢條 計 好啩 ？
真係 全靠 管營 、差撥 你哋 兩位 費心 ，返到 京師 之後 ，稟明 畀 太尉 聽 一定 保薦 你哋 兩位 做 大官 。
哈哈 ，呢趟 張 教頭 冇得 推 嘞啩 ？
林沖 呢 次 啊 畀 我 哋 搞掂 咯 ， 噉 高衙內 嘅 病 誒 實 好 㗎 啦 嚱。
張教頭 嗰個 傢伙 啊 ，我哋 三番五次 叫人 同 佢 講 你 個 女婿 死咗 喇 噉 ，哈 ，佢 仲 越發 硬頸 添 ，死 都 唔肯 應承 噃 。
搞到 衙內 嘅 病 呀 越嚟越重 ，所以 ，太尉 又 特登 派 我哋 兩個 嚟 ，相煩 你哋 兩位 做 呢件事 ，好喇好喇 ，今晚 做妥晒 嘞 。
小人呀 ，直情 擒 墻頭 入去 ，四圍 啲 火堆 ，總共 點着咗 十幾個 ，佢 趯得去邊 吖 。
而家 都 怕 燒得 七八成 呢嚱 ？
哼 ，佢 就算 燒唔死 ，趯咗 出嚟 ，之 燒咗 大軍 嘅 草料場 亦 係 個 死罪 啊嚱 。
噉 我哋 返 入 城 喇 。
再睇一陣添 ，睇一陣添 ，等陣執返佢一兩嚿骨 ，拎返去東京 ，噉太尉同衙內見到 ，都會讚我哋一聲會辦事吖嘛 。
林沖 聽 清楚 ， 呢 三個 人 ， 一個 係 差 撥 ， 一個 係 陸 虞侯 ， 一個 係 富安 。
佢 諗 ：真係 天公 可憐 我 林沖 ，如果 唔係 冧咗 間 草廳 ，我 就 梗 畀 呢班 傢伙 燒死 。
佢 輕輕 手 扚開 嚿 石頭 ，右手 揸住 支 花槍 ，左手 呢 ，一下 拉開 道 廟門 就 大喝 一聲 ：潑賊 ！你 走去 邊 ？
嗰 三個 嘢 失驚無神 ，見到 林沖 突然 係 間 廟 出嚟 ，哎呀 都 唔知 係 人 定 鬼 ，嚇到 傻晒 都 唔會 逳 嘞 。
林沖 一舉手 ，卛噉 一槍 ，先 㓤低 咗 差撥 。
陸虞侯 就 叫咗 聲 ：誒 饒饒饒命 啊 ！慌到 佢 手揗腳震 就 行 都 唔 會 行 。
嗰個 富安 呢 ，趯咗 唔夠 十零步 ，畀 林沖 追到 上去 對住 佢 背 枚 一 槍 㓤過去 又 㓤低埋 。
林沖 返轉頭 ，見到 陸虞侯 啱啱 行咗 三四步 。
林沖 喝咗 一聲 ：潑賊 ，你 仲 想 去 邊 ？
一步 衝上去 揦 住 佢 心口 ， 一 㧬， 將 佢 扽 喺 雪地 上 嚟 。
林沖 將 支 花槍 插 喺 地 ，用 隻 腳 踏住 陸虞侯 個 心口 ，一手 就 扲出 把 匕首 ，壓喺 佢 塊 面 處 ，啪嚓 ！
我 從來 同 你 無冤無仇 ，你 為乜嘢 要 噉樣 害 我 ，真係 殺人 可恕 情理 難容 ！
誒唔唔 ，誒唔唔唔 ，唔關 小人 事㗎 ，誒誒誒係 ，係 太尉 差遣 誒誒 唔敢 唔嚟 呢 ，唔唔 ，唔關 我 事㗎 。
你個奸賊 ，我 同 你 自細 就 做 朋友 ，今日 反嚟 害 我 ？仲 話 唔關 你 事 ，你 食 我 一刀 啦 ！
撕 ！ 一手 撕開 陸謙件 衫 ， 將把 尖刀 對 正 陸謙個 心口 ， 一插 一 挖 。
陸謙 呀 七竅 出血 ，當堂 冇命 。
林沖 回 轉頭 ， 見到 差撥 正在 躝 返 起身 要 走 ， 林沖 一手 將 佢 撳住 。
你個傢伙 ，原來 又 係 咁歹毒嘅 ，你食我一刀 ！一刀 就 殺咗佢 。
林沖 將 嗰 三個 傢伙 個人頭 都 割咗 落嚟 ，就 用 佢哋 嘅 頭髮 綁埋 一齊 ，用 支 花槍 挑住 就 搦返 入 廟 ，就 擺 喺 山神 前面 嗰 張 神枱 上便 。
佢 着返 好件 白布衫 ，束好 腰帶 ，戴返 頂 氈帽 ，咕咕咕咕 將 葫蘆 裏 便 嗰啲 酒 冚𠾴 唥 飲 清光 。
將棉被 同 葫蘆 呢 都 掉低 唔要 嘞 ，攞起 支 花槍 ，出咗 廟門 就 向住 東 便 行 。
行咗 四五里 路 ，就 見到 附近 村莊 嗰啲 人 呢 都 攞住 水桶 啊 ，鐵鉤 啊噉 走嚟 救火 。
林沖 就 對 佢哋 話 ：你哋 快啲 去 ，我 去 報咗 官 就 即刻 返嚟 嘞 。
林沖 一直 向 住 東便 ， 行 咗 足足有 兩個 更次 咁 長 嘅 時間 ， 嗰 啲 雪 呢 就 越 落 越 大 ， 林沖 又 着 得 好 單薄 ， 冷 到 佢 不得了 。
而家 離開 草料場 呢 ，已經 好 遠 。
佢 見到 前便 有 一座 疏疏落落 嘅 樹林 ，裏 便 有 幾間 草屋 ，屋頂 呢 都 落滿 雪 ，喺 啲 爛牆 嚹 就 漏出 啲 火光 嚟 。
林沖 一直 行 到 去 嗰間 草屋 嗰處 ，推開 道門 入去 。
見到 喺 中間 呢 坐住 一個 老莊客 ，旁邊 就 有 四五個 後生仔 ，一齊 喺 處 焙緊 火 。
火爐 裏 便 嗰啲 柴火 呀 ，含含聲 燒得 好 旺 。
林沖 行到 面前 行過 禮話 ：
各位 拜揖 ，小人 係 牢城營 嘅 差人 ，畀 啲 雪 𢱕 濕咗 衣服 ，想 借 啲 火 嚟 焙乾 下 佢 ，唔該 方便 下 啦 。
哦 你 過嚟 焙咪 係咯 ，有 乜 所謂 呢 嚟嚟嚟 呢 。
林沖 講 聲 唔該 就 坐埋 去 焙火 嘞 ，焙咗 一陣 ，嗰 件 濕 衣服 啊 稍為 乾咗啲 。
見到 喺 火炭 旁邊 就 煨住 一個 埕 ，裏 便 就 透出 一啲 酒香 嚟 。
林沖 就 話 喇 ：小人 呢度 有 啲 碎銀 ，勞煩 你哋 讓 多少 酒 畀 我 呢 。
個老莊客 就 話嘞 ：誒 我哋 晚晚 都 喺度 輪流 看 米倉 ，而家 四更天 正係 最冷 嘅 時候 嘞 。
我哋 幾個人 呀 ，自己 都 仲 唔夠 飲 ，邊度 有 多 讓 畀 你 吖 ，你 唔使 望 都 得嘞 。
求其 讓 三兩 碗 畀 小人 抵下 冷吖 。
你 呢個人 乜 咁 啰嗦 㗎 ，都 話 唔得 嘞 。
林沖 聞住 嗰啲 酒香 就 越發 想飲 ：唔該 你 啦 ，讓 啲 我 啦 。
嗰班 莊客 就 鬧 林沖 嘞噃 ：哈 ，好意 畀 你 喺度 焙衫 ，你 又 要 攞 酒 飲 。
嗱 ，你 好 扯 喇吓 ，唔 扯 就 捉住 你 吊起嚟 。
林沖 亦 發火 嘞 ：你哋 呢班 傢伙 乜 咁 唔 講 道理 㗎 ！
就用支花槍督住一嚿燒緊嘅柴頭 ，對住老莊客塊面一撩 ，又將支槍喺個火爐處一攪 ，嘿呀 ，嗰個老莊客啲鬍鬚呀 ，即刻燒着起上嚟 ，嗰班莊客都跳晒起身啦 。
林沖 用 支 槍桿 亂咁 湴 ，個 老莊客 呢 就 走咗 先 。
其他 嗰啲 走唔切 ，畀 林沖 截住 就 打咗 一餐 ，噉 先至 趯得甩 。
林沖 話 ：好好好 ，都 走 清光 ，呢趟 老爺 快快活活 飲酒 ！
佢 望見 土炕 上 便 有 兩個 椰殼 ，就 攞起 一個 嚟 ，閘側 個 埕 倒 啲 酒 出嚟 飲 咯 喎 。
飲咗 一輪 ，嘿 ，足足 飲咗 半埕 ，夠 喉喇 呢趟 ，攞起 支 槍 出 門 走人 嘞 。
佢 飲得 差唔多 嘞 咩 ，半埕 酒 㗎 嘛 ，一步 高 就 一步 低 ，佊下佊下 都 行唔穩 。
行咗唔到 一里路 唧 就 畀 啲 北風 一 吹 ，就 喺 條 山澗 旁邊 就 跌倒 喺 雪地 嚟 ，猛咁 掙扎 都 唔起得 返身 。
噉嗰班莊客呢 ，走咗 出去 之後 啊 ，就 去 班咗 廿幾人 喎 ，帶齊 槍棒 ，趕返嚟 草屋 ，想嚟 找 林沖 晦氣 啦 ，嚱一睇 ，唔見咗 人 嘞 ，喇喇聲 就 跟住 腳印 嚟 追蹤 咯喎 。
哈 ， 見到 林沖 瞓 喺 雪地 嚟 ， 支 花槍 就 掉 埋 一 便 ， 啱 晒 ， 七手八腳 撳住 林沖 ，攞 條 繩 嚟 綁 起 佢 ， 將 佢 解 咗 去 一間 莊院 。
有個 莊客 喺 裏 便 行 出嚟 話 ：大官人 未 起身 ，你哋 將 呢個 傢伙 吊 喺 門樓 下 便 先 啦 。
好喇 ，天光嘞 ，林沖 就 酒醒咯喎 ，誒 ？乜唔逳得嘅 ？哎呀 ，乜畀人綁住呀 ？
林沖 擘大眼 一睇 ，哈 ，原來 喺 間 大莊院 嚟 ，自己 畀 人 綁住 吊 喺 門樓 底 ，林沖 就 大叫 話 ：
邊個 咁 大膽 將 我 吊 喺 呢度 嚟 啊 ，快啲 放開 我 ，快啲 放開 我 ！
有個莊客 聽到 林沖 喺度 嗌唄 ，就 攞起 條 白木棍 喺裏 便 行出嚟 喝 林沖 話 ：
你 個 傢伙 仲 咁 大口氣 啊 吓 ？
嗰個 燒咗 鬍鬚 嘅 老莊客 ，亦 喺度 喎 ，佢 行過嚟 話 ：
咪 同佢 講 咁多 咯 ，打佢 就 啱㗎 喇 。
等 大官人 起咗身 ，問 清楚 佢 就 拉佢 去 官府 啦 。
於是 嗰班 莊客 一齊 湧上嚟 ，你 一拳 就 我 一棍 咁 打 林沖 。
林沖 喺 度 捱打 ， 避 都 冇 得 避 㗎 事關 畀 人 哋 綁實 吊 喺 處 嚟 㗎 嘛 ， 就 唯有 大叫 話 ： 唔 好 打 我 喇 ， 我 有 說話 講 ， 我 有 說話 講啊 ！
正喺呢個時候 ，有個 莊客 行出嚟 話 ：大官人 嚟喇 。
只見 有 個 官人 ，背住 手 慢慢噉 行出嚟 ，行到 走廊 嗰度 就 問 ：你哋 喺 處 打邊個 啊 ？
尋晚 捉到 個 偷米賊 啊 大官人 。
嗰個 官人 行前嚟 睇下 ，誒 ，認得 原來 係 林沖 ！
就快啲 喝退 嗰班 莊客 ，親自 解低 林沖 就 問 佢 話 ：教頭 ，為乜事 畀 啲人 吊 喺 呢處 嚟 啊 ？
嗰班 莊客 見到 ，原來 大官人 識得 呢個 人 嘅 ，嘿 撞板 喇 呢勻 ，嘿 你 唔 走 我 走咯 ，㗾聲 就 走晒 。
林沖 畀 嗰班 莊客 啊 打到 頭暈暈 ，而家 定眼 一 睇 ，放開 自己 嘅 唔係 邊個 ，原來 係 小旋風 柴進 ，嘿噉 就 得咯 ，佢 連忙 大叫 話 ：大官人 救 我 ！
教頭 ， 你 為 咩 事會 嚟 到 呢 度 ， 畀 嗰 班 鄉下佬 糟質 啊 ？
唉 ，一言難盡 咯 。
噉 教頭 請 入去 裏 便 坐 ，慢慢 講 。
兩個人 入去 裏 便 大廳 坐落 。
林沖 呢 ，就 將 火 燒 草料場 呢件事 從頭到尾 講晒 畀 柴進 聽 。
柴進 聽完 就 話 喇 ：兄長 真係 命苦 。
不過 唔緊要 咯 ，今日 天 假 其便 。
呢處 就係 小弟 嘅 東莊 ，你 放心 喺度 住下 先 ，有 咩事 以後 再 商量 啦 。
人嚟 ，攞啲 衣裳 畀 教頭 換過 晒 佢 。
林沖 就 將 裏裏外外 嘅 衣服 冚𠾴 唥 換過 。
然後 柴進 同 佢 去 暖閣 坐 ，擺 圍酒 嚟 款待 佢 。
從此之後呢 ，林沖 就 喺 柴進 呢座 東莊 啊 住咗 六七日 。
呢啲啊 暫時 唔講 佢 住 。
而家 講 下 滄州 牢城 嗰個 管營 啊 ，喺 出事 之後 呢 ，佢 即刻 去 報告 畀 州官 聽 ，話 林沖 殺死 咗 差撥 、陸虞侯 同 富安 三個人 ，放火 燒 咗 大軍 草料場 啊 噉 。
州尹 一聽 就 大驚 啦 ，即刻 出咗 告示 ，要 啲 緝捕人員 、差人 攞去 四鄉 、村莊 、路邊 嘅 酒店 等等 嘅 地方 到處 咁 張貼 ，出 三千 貫 賞錢 ，捉拿 正犯 林沖 。
呢 單 嘢 大 喇 ， 所以 偵緝 搜捕 呀 非常 之 緊張 ， 各處 嘅 村莊 啊 街坊 啊 度度 都 喺 度 談論 呢 件 事 啊 。
林沖 一直 住 喺 柴進 東莊 嚟 㗎 ，佢 聽見 消息 咁 緊急 唄 ，嗰日 ，等 柴進 一 返 到 嚟 ，林沖 就 話 喇 ：
並非 大官人 你 唔肯 留 小人 ，只因為 官府 追捕 得 非常之 緊 ，逐家逐戶 噉嚟到 搜查 。
如果 搵到 嚟 大官人 嘅 莊院 ，萬一 馱 累 咗 大官人 就 唔好 嘞 。
既然 一向 多得 大官人 仗義疏財 ， 而家求 大官人 你 再 借 多少 旅費 畀 小人 ， 等 小人 投奔 第二個 地方 去 安身 ， 他 日 若果 唔 死 ， 林沖 一定 效 犬馬之報 。
噉呀 ，既然 兄長 要 離開 呢處 咯 ，小人 有 一個 地方 ，兄長 可以 去 嘅 ，嗱 ，等 小人 寫 一封 信 畀 兄長 你 攞住 去 啦 。
啊 ，得 大官人 噉樣 幫忙 ，等 小人 有 個 安身立命 嘅 地方 ，真係 感激不淺 ，唔知 去 邊處 呢 ？
嗰處 ，係 山東 濟州 屬下 嘅 一個 水鄉 ，叫做 梁山泊 ，好 大 ，方圓 八百 幾里 ，中間 係 宛子城 、蓼兒窪 。
而家 ，有 三個 好漢 喺 嗰處 扎寨 。
為首嘅 叫做 白衣秀士 王倫 ，第二位 叫做 摸着天 杜遷 ，第三位 叫做 雲裏 金剛 宋萬 。
呢 三位 好漢 ，聚集咗 七八百 小嘍啰 打家劫舍 。
好多 犯咗 彌天大罪 嘅 人 ，都 投奔 去 嗰度 躲災避難 ，佢 都 收留 喺 處 咯 。
呢 三位 好漢 ，亦都 同 我 有 好深 嘅 交情 ，曾經 寄過 書信 嚟 。
我而家 寫 一封信 畀 兄長 你 ，等 你 去 投奔 嗰處 加入 佢哋 嗰一夥 呢 好唔好 吖 ？
若果 得到 大官人 噉樣 照顧 就 最好 啦 。
不過 ，而家 滄州 路口 官府 掛咗 榜文 喺度 ，又 派咗 兩個 軍官 喺 嗰度 搜查 ，卡住 個 路口 。
兄長 你 又 必定 要 由 嗰處 經過 個噃 。
嗯 ，得 ！有 個 計策 ，可以 送 兄長 過去 嘅 。
多蒙 大官人 噉 樣 幫助 ， 林沖 真 係 到 死 不 忘 啊 。
當日 ，柴進 就 叫 個 莊客 ，孭咗 林沖 啲 包裹 出去 關卡 外 便 等住 先 。
然後呢 ，柴進 就 叫人 備咗 三二十 匹 馬 ，帶齊 弓箭 旗槍 ，駕起 鷹雕 ，牽住 獵狗 。
一行 人馬 都 係 出去 打獵 嘅 裝束 ， 就將 林沖 啊 ， 混雜 埋 喺 裏頭 ， 一齊 上馬 ， 向 住 關卡 嗰 便 跑 去 咯 喎 。
把關 嗰 兩個 軍官 ， 坐 喺 關卡 嗰 處 ， 見到 有班 人馬 嚟 嘞 ， 一睇 ， 哦 原來 係 柴大官人 ， 係 識得 嘅 。
點解 呢 ？
呢 兩個 軍官 呀 ，佢哋 未曾 得到 呢個 軍職 嘅 時候 呢 ，就 曾經 喺 柴進 間 莊 處 住過 嘅 所以 係 相熟 。
嗰 兩個 軍官 企起身 話 ：大官人 ，又 去 快活 係 嘛 ？
柴進 落咗 馬 ，佢 問嘞 ：乜 兩位 官人 ，點解 會 喺 呢處 嚟 呢 ？
哦 ，滄州 太尹 有 公事 嚟 啊 ，畫咗 個 相 ，要 捉拿 犯人 林沖 ，所以 特登 派咗 我哋 喺 呢處 把守 。
但凡 有 過往 客商 都 要 逐個逐個 盤問 明白 先至 放 佢哋 出 關卡 嘅 。
呵呵 ，喺 我 呢班人 裏頭 ，夾帶住 林沖 喎 ，乜 你哋 認唔出 咩 ？
哈哈哈哈 哈哈哈哈 ， 大官人 係 識 法度 嘅 ， 唔 通會 夾帶 隻 林沖 出去 咩 ？ 哈哈哈 ， 大官人 ， 請 上馬 啦 。
好 ，既然 係咁 信得過 ，今日 打到 野味 返嚟 ，一定 送畀 兩位 。
同嗰 兩個 軍官 相別 之後 ，就 一齊 上馬 出咗 關卡 。
一直行咗 十四五里 ，就 見到 行先嗰個 莊客 已經 喺度 等候 。
柴進 叫 林沖 落馬 。
佢 除咗 打獵 嘅 衣服 ，換返 莊客 同 佢 帶 定嚟 嘅 自己 嘅 衣裳 ，掛起 腰刀 ，戴上 一 頂 紅 櫻氈 帽 ，孭起 個 包裹 揸住 把 滾刀 ，拜別 咗 柴進 就 起行 。
柴進 帶住 一班人 上返 馬 ，照樣 去 打獵 ，到到 夜 先至 返 ，依舊 過返 嗰個 關卡 ，送 咗 啲 野味 畀 嗰 兩個 軍官 就 返去 莊院 。
呢啲 就 唔 講 咁多 咯 。
而家 講返 下 林沖 啊 ，佢 辭別 咗 柴進 之後 ，一路 行 咗 十幾 日 。
當時 正係 暮冬天氣 ，好 冷 ，彤雲 密佈 朔風 凜冽 ，只見 個 天 呀 又 落起 鵝毛 大雪 嚟 。
行咗唔到 二十里 唧 ，成笪地 都 好似 畀 白銀 鋪咗 噉 。
林沖 一路 踏住 雪 行 ，個 天 就 越嚟越 冷 ，而且 就嚟 夜 喇 。
遠遠 望見 前面 挨住 條 河 ，靠近 湖邊 有 間 酒店 ，屋頂 都 堆滿 晒 雪 咯 。
林沖 行到去 ，掀起 道門簾 ，拍乾淨 身上 啲 雪 入到去 一睇 ，嘿 ，見到 好多 座位 。
於是就搵張枱坐落 ，憑好把滾刀 ，放低個包裹 除咗 頂紅櫻氈帽 ，腰刀 亦都解低咗咯 。
有個 酒保 行過嚟 問 ：客官 要 打 幾多 酒 呢 ？
打 兩角 酒 嚟 先 。
酒保 用 個 壺 打咗 兩 角 酒 嚟 ，就 擺 喺 枱 處 。
林沖 問 佢 話 喇 ：有 咩 送酒 啊 ？
有生熟牛肉 、肥鵝 、嫩雞 。
切 兩 斤 熟 牛肉 先 啦 。
好呢！
冇耐 ，酒保 捧咗 一大碟 牛肉 、幾碟 菜蔬 過嚟 ，放咗 隻 大碗 喺 林沖 面前 ，就 同佢 坐 熱啲 酒 斟畀 佢 。
林沖 飲咗 三四 碗 酒 ，只見 裏頭 有 個人 ，背住 手 行出嚟 企 喺 門口 睇 雪景 。
林沖 望 下 嗰個人 ，見 佢 頭戴 暖帽 ，身穿 貂鼠皮袍 ，腳上 着 一對 獐皮靴 ；
生得身材 高大 相貌 魁宏 ，顴骨 高高 ，留住 三叉 黃鬚 ，修修悠悠 噉 喺度 睇 雪 。
林沖 叫 酒保 過 嚟 話 ： 酒保 ， 你 都 嚟 飲 返碗 酒 啦 。
誒 ，多謝多謝 。酒保 飲咗 一碗 。
林沖 就 問 佢 話 ：由 呢度 去 梁山泊 仲 有 幾 遠 啊 ？
由 呢度 去 梁山泊 呀 ，遠 就 唔 遠咯 ，幾里 路啫 ，不過 都係 水路 嚟 ，冇 一 條 陸路 去得 嘅 。
如果 要 去 就要 搵 隻 艇 去 至 得 㗎 。
噉 你 同 我 搵 隻 艇 啦 。
哎呀 ，咁 大雪 ，天色 又 晏 咯 ，邊度 去 搵 艇 吖 ？
我 畀 多啲 錢 你 ，唔該 你 搵 隻 艇 嚟 棹 我 過去 。
嚱嚱 ，實在 係 搵唔到 嘅 呢 。
唉 ，噉 點算好呢 ？
林沖 飲咗 幾 碗 酒 ，佢 悶起 上嚟 ，佢 忽然間 諗起 ：
唉 ，我 以前 ，喺 京師 做 教頭 ，日日 六街 三市 去 遊玩 飲酒 。
嘿 ，點知 今日 畀 高俅 呢個 惡賊 陷害 我 ，刺咗 面 ，將 我 斷送 到 嚟 呢度 ，搞到 我 有 家 難 奔 ，有 國 難 投 ，咁 淒涼 寂寞 。
林沖 一時 感懷 身世 ，就 問 酒保 攞咗 筆墨 嚟 ，乘住 一時 嘅 酒興 ，就 喺 埲 白粉 牆 上面 寫咗 八 句 ：
仗義 是 林沖 ，為人 最 樸忠 。江湖 馳譽 望 ，京國 顯 英雄 。身世 悲 浮梗 ，功名 類 轉蓬 。他年 若 得志 ，威 鎮 泰山 東 。
寫完 ，放低 支筆 ，再 攞 酒 嚟 飲 。
飲 飲下 ， 嗰 個 着 皮袍 個 大漢 行前 嚟 ， 一下 將 林沖 攔腰 攬實 ， 佢 話 ： 你好 大膽 ！
你 喺 滄州 犯 咗 彌天大罪 ，原來 喺 呢度 嚟 ！
而家 官府 出 三千 貫 賞錢 嚟 捉 你 ， 你 想點 啊 ？
你 話 我 係 邊個 ？
你 唔係 豹子頭 林沖 咩 ？
我 姓 張 㗎 咋嘛 。
呵呵 ，你 咪 亂講 嘞 ，啱啱 先至 喺 埲牆 上面 寫落 你 自己 個 名 ，你 塊 面 上 便 又 刺咗 金印 ，噉 都 賴得去 嘅 ？
你 真係 要 捉 我 ？
哈哈哈哈哈哈哈哈哈 ，我 捉 你 做 乜嘢 吖 ，喂 ，你 跟 我 嚟 ，入去 裏 便 先至 傾 。
嗰個 大漢 放開 手 ，叫 林沖 跟住 佢 行咗 入去 後 便 一 間 水亭 裏 便 ，叫 酒保 點着 眼燈 ，佢 同 林沖 行過 禮 ，就 打 對面 坐落 嘞 。
嗰個 大漢 問 ：先頭 聽見 兄長 一味 咁 問 梁山泊 ，要 搵 艇 去 ，不過 嗰處 係 啲 賊佬 嘅 山寨 嚟 噃 ，你 要 去 嗰度 做 乜嘢 呢 ？
實不相瞞 ，而家 官府 追捕 小人 非常之 緊急 ，冇 地方 可以 安身 ，就 特登 嚟 投奔 呢度 山寨 個 好漢 ，請求 入夥 ，所以 一定 要 去 。
雖然 係 噉啫 ，梗 會 有 個人 舉薦 兄長 你 去 入夥 㗎 。
有 ，滄州 橫海郡 一位 老朋友 舉薦 嚟 嘅 。
莫非 係 小旋風 柴進 ？
足下 點 知 㗎 ？
柴大官人 同 山寨 裏 便 嘅 王頭領 交情 好 深厚 嘅 ，經常 有 書信 往來 。
原來啊 ，王倫 當初 不得志 嘅 時候 ，同 杜遷 就 投奔 過 柴進 ，多得 柴進 留 佢哋 喺 莊處 住咗 一排 。
臨走呢 ，又 送咗 旅費 ，係 有 過 呢一段 恩德 。
林沖 聽咗 就 拜一拜 話 ：有眼不識泰山 ，請問 高姓 大名 ？
不敢 ， 不敢 ， 小人 係 王 頭領 手下 嘅 耳目 ， 姓朱 名貴 ， 係 沂州 沂水縣 人士 ， 江湖 上 ， 都 叫 小弟 做 旱地 忽律 。
嚱嚱 ，朱貴 呢個 綽號 乜 咁 得意 㗎 吓 ，旱地 忽律 呀 ？
冇錯 ，係 有啲 古怪 。
你 哋 估下 忽律 係 啲 咩 嘢 東東 吖 嗱， 哈哈 ， 原來 忽律 即 係 鱷魚 喎 。
旱地 忽律 啊 ，即係 旱地 鱷魚 噉解 。
朱貴仲 講畀 林沖 聽 ：山寨 裏 便 ，叫 小弟 喺 呢處 名義上 開 間 酒店 ，其實 係 專門 喺度 探聽 有 咩 來往 客商 經過 。
只要 係 有錢 嘅 ，就 去 報畀 山寨 知 。
如果 嗰啲 單身 客人 嚟到 呢處 冇 錢 嘅 呢 ，就 放 佢 過去 ；
有錢㗎 ，嚟到呢度 ，輕嘅 係 用 蒙汗藥 整暈佢 ，重嘅 就 當堂 殺咗 ，瘦肉 就 當 豬肉 賣 ，肥肉 呢 就 煎咗 油 嚟 點燈 ，哈哈 。
啱先 見到 兄長 一味 咁 問 梁山泊 條 路 點 去 ，所以 就 唔敢 落手 啫 。
收尾 ，有 幾個 兄長 寫咗 你 嘅 大名 出嚟 ，有啲 喺 東京 嚟 嘅 朋友 ，講起 過 兄長 為人 豪傑 ，估唔到 今日 能夠 相會 啊 。
而家 既然 有 柴大官人 寫信 嚟 推薦 ，而且 兄長 又 名震 四海 ，王頭領 必定 會 重用 嘅 。
跟住 ，朱貴 就 安排 酒席 嚟 款待 林沖 ，兩個人 喺 水亭 裏 便 飲咗 成 半晚 酒 。
林沖 話 喇 ：點 先 至 能夠 搵到 隻 艇 嚟 棹 過去 呢吓 ？
呢處 有 艇 㗎喇 ，兄長 放心 啦 ，今晚 喺度 住 一 晚 先 ，聽朝 五更 起身 ，我哋 一齊 去 啦 。
約定 之後 就 各自 去 休息 嘞 。
第二 朝早 瞓到 五更 時分 ，朱貴 就 嚟 嗌 林沖 起身 。
洗完面之後 ，朱貴 又 攞 啲 酒 嚟 款待 林沖 ，仲 食咗 啲 肉食 之類 嘅 嘢 。
呢陣時呀 ，個天 都 仲 未曾 光 ，朱貴 打開咗 水亭 嘅 窗門 ，攞咗 一把 鵲畫弓 ，搭 上一支 響箭 ，望住 對面 港灣 啲 蘆葦 林 嗰處 ，啡噉 射過去 。
林沖 就 問 佢 ：咩嘢 意思 啊 ？
呢啲 係 山寨 嘅 信號箭 嚟 ，好快 就 有 艇 嚟 㗎 喇 。
果然 ，冇 幾耐 就 見到 對面 蘆葦 泊 裏頭 ，有 幾個 小嘍啰 扒住 一隻 快艇 過嚟 ，一直 扒 到 水亭 下 便 灣 喺度 。
朱貴 就 帶住 林沖 ，攞齊 刀杖 行李 落艇 啦 。
小嘍啰 將 嗰隻艇 一槳 撐開 ，就 一直 扒 到 去 金沙灘 嘅 岸邊 。
上咗岸 ，自然 有 小嘍啰 同 林沖 拎住 刀杖 行李 ，兩個 好漢 就 一齊 上 山寨 。
噉嗰幾個小嘍啰呢 ，就 扒返隻艇 去 嗰便港灣 。
林沖 一路 行 ，一路 睇 下 呢個 地方 。
只見 兩邊 兩便 呀 都 係 兩個 人至 抱 得 過 嘅 大樹 ， 行到 半山 有 一座 斷金 亭 。
再轉過嚟 ，係 一座 大關 ，喺 關 嘅 前面 ，擺住 刀槍劍戟 ，弓 弩 戈 矛 ，四面 都 係 擂木 炮 石 。
小嘍啰 就 行 先 去 報告 啦 。
兩個人 入咗 關 ，見到 夾道 插滿住 隊伍 嘅 旗號 。
又 過咗 兩道 關隘 噉 先至 嚟到 寨門口 喎 。
林沖 望下 ，只見 四面 高山 就 三道 雄關 ，沊沊𡃈噉 圍住 ；
中間 呢 係 鏡面 噉 一片 平地 ，差唔多 有 四五百 丈 丁方 咁 大 ；
靠住 山口 先至 係 正門 ，兩便 都 係 一排排 嘅 耳房 。
朱貴 就 帶 林沖 一直 嚟 到 聚義廳 啦 。
噉究竟 林沖 入唔入得 夥 啊 ，就 下次 再 講 喇 。
